L-effiċjenza operazzjonali tal-ġestjoni ta’ kriżijiet bankarji mill-BĊE

Sommarju eżekuttiv

Dwar il-Mekkaniżmu Superviżorju Uniku

I

Il-kriżi finanzjarja tal-2008 wasslet għal bidliet kbar fir-regolamentazzjoni finanzjarja fl-UE. Il-qafas legali għas-superviżjoni bankarja ssaħħaħ u l-Mekkaniżmu Superviżorju Uniku (MSU) ġie stabbilit fl-2014. Is-superviżjoni tal-banek importanti fiż-żona tal-euro saret ir-responsabbiltà tal-Bank Ċentrali Ewropew (BĊE). L-MSU jinkludi l-Bank Ċentrali Ewropew (BĊE) u l-awtoritajiet superviżorji nazzjonali tal-pajjiżi parteċipanti. Wieħed mill-għanijiet prinċipali tiegħu huwa li jtejjeb l-istabbiltà tas-sistema bankarja taż-żona tal-euro.

X’awditjajna

II

Dan l-awditu eżamina l-effiċjenza operazzjonali tal-ġestjoni, mill-BĊE, ta’ kompitu superviżorju speċifiku wieħed - il-ġestjoni ta’ kriżijiet. Dan huwa l-proċess użat mis-superviżuri biex jidentifikaw banek li jkunu qed jesperjenzaw diffikultajiet finanzjarji u jintervjenu meta jkun meħtieġ. L-objettiv tal-ġestjoni ta’ kriżijiet huwa li tippreserva l-istabbiltà finanzjarja u li tnaqqas id-dipendenza fuq il-fondi pubbliċi. Il-ġestjoni ta’ kriżijiet tinvolvi l-ippjanar minn qabel ta’ rkupru mill-banek sabiex ikunu ppreparati għal sitwazzjonijiet ta’ kriżi. Hija tinvolvi wkoll l-identifikazzjoni, mis-superviżur, ta’ deterjorament tas-sitwazzjoni finanzjarja ta’ bank u, fejn meħtieġ, l-użu tas-setgħat ta’ intervent bikri.

X'sibna

III

B’mod ġenerali, fir-rwol superviżorju tiegħu, il-BĊE stabbilixxa qafas sostanzjali għall-proċeduri ta’ ġestjoni ta’ kriżijiet. L-istruttura organizzattiva u r-riżorsi tal-BĊE sabiex titwettaq valutazzjoni tal-pjanijiet ta’ rkupru u s-superviżjoni tal-banek li jinsabu fi kriżi huma sodisfaċenti, minkejja dgħufijiet fl-ippjanar inizjali u l-ħtieġa li jsir titjib fl-allokazzjoni tal-persunal għas-sitwazzjonijiet l-aktar urġenti.

IV

Il-BĊE qed jiffinalizza arranġamenti għall-kooperazzjoni u l-koordinazzjoni esterni ma’ awtoritajiet superviżorji oħra u mal-Bord Uniku ta’ Riżoluzzjoni. Madankollu, il-kwistjonijiet pendenti għandhom il-potenzjal li jdewmu u jirrestrinġu l-kondiviżjoni ta’ informazzjoni u li jnaqqsu l-effiċjenza tal-koordinazzjoni.

V

Il-proċess tal-BĊE għall-valutazzjoni tal-pjanijiet ta’ rkupru tal-banek huwa pożittiv. Ġew stabbiliti proċeduri ta’ preżentazzjoni u monitoraġġ, u l-assessuri għandhom aċċess għal għodod u gwida utli, minkejja li s-sitwazzjoni tista’ titjieb, partikolarment għall-qasam tal-indikaturi tal-pjanijiet ta’ rkupru. Barra minn hekk, ir-riżultati tal-valutazzjonijiet tal-pjanijiet ta’ rkupru ma jintużawx b’mod sistematiku għall-identifikazzjoni ta’ kriżijiet u r-rispons għalihom. Barra dan, aħna ma nistgħux nisiltu konklużjonijiet dwar l-effiċjenza operazzjonali tal-ġestjoni ta’ dan il-proċess fil-prattika minħabba nuqqas ta’ evidenza pprovduta mill-BĊE.

VI

Il-qafas operazzjonali tal-BĊE għall-ġestjoni ta’ kriżijiet għandu xi difetti, u hemm sinjali ta’ implimentazzjoni ineffiċjenti. Il-gwida għall-valutazzjonijiet ta’ intervent bikri mhijiex żviluppata biżżejjed u ma tiddefinix kriterji jew indikaturi oġġettivi biex jiġi ddeterminat jekk bank ikunx daħal f’sitwazzjoni ta’ kriżi. Ma hemmx gwida dwar l-aħjar użu tas-setgħat tal-BĊE jew il-miżuri l-aktar xierqa li jridu jiġu kkunsidrati f’xenarji speċifiċi. Aħna ma ksibna l-ebda evidenza komprensiva dwar l-użu reali tas-setgħat tiegħu, u għalhekk ma nistgħux nisiltu konklużjonijiet dwar l-effiċjenza tal-ġestjoni mill-BĊE fil-prattika. Il-gwida dwar il-valutazzjonijiet biex jiġi ddeterminat jekk bank huwiex “qed ifalli jew probabbilment se jfalli” għandha wkoll nuqqas ta’ ambitu u mhijiex dettaljata biżżejjed.

Aċċess għall-evidenza

VII

Il-BĊE rrifjuta li jipprovdi evidenza importanti li aħna tlabna biex inwettqu l-awditu, u dan kellu impatt negattiv fuq ix-xogħol tal-awditjar tagħna. Dan ifisser li l-osservazzjonijiet u l-konklużjonijiet tagħna huma proviżorji. Nistgħu nisiltu konklużjonijiet ġenerali dwar it-tfassil tal-proċessi tal-BĊE, iżda ma nistgħux nikkonfermaw l-effiċjenza operazzjonali tal-ġestjoni ta’ kriżijiet mill-BĊE fil-prattika.

X'nirrakkomandaw

VIII

Aħna nagħmlu għadd ta’ rakkomandazzjonijiet biex isir titjib fil-ġestjoni ta’ kriżijiet mill-BĊE.

IX

Fil-qasam tal-kooperazzjoni, jenħtieġ li l-BĊE jtejjeb il-koordinazzjoni ma’ atturi esterni u jadotta qafas intern għas-superviżjoni supplimentari tal-konglomerati finanzjarji. Għall-ippjanar ta’ rkupru, jenħtieġ li l-BĊE jipprovdi gwida addizzjonali rigward il-kalibrazzjoni tal-indikaturi tal-pjanijiet ta’ rkupru.

X

Għall-identifikazzjoni ta’ kriżijiet, jenħtieġ li l-BĊE jkompli jiżviluppa l-gwida tiegħu dwar il-valutazzjonijiet ta’ intervent bikri u jistabbilixxi indikaturi biex jiġi ddeterminat deterjorament fil-kundizzjoni finanzjarja ta’ bank. Anke f’dawn iċ-ċirkustanzi, jenħtieġ li huwa jagħmel użu sistematiku mill-informazzjoni miksuba mill-valutazzjonijiet tal-pjanijiet ta’ rkupru.

XI

Fil-qasam tar-rispons għall-kriżijiet, jenħtieġ li l-BĊE jiżgura li l-problemi jiġu kkwantifikati qabel ma l-miżuri ta’ rispons għall-kriżijiet jiġu kkunsidrati, u jistabbilixxi sistema ta’ rappurtar għall-monitoraġġ sistematiku tal-kwalità tal-assi. Jenħtieġ ukoll li jkompli jiżviluppa l-gwida operazzjonali tiegħu dwar il-valutazzjonijiet ta’ intervent bikri, inkluż l-użu sistematiku tal-għarfien li jkun inkiseb permezz tal-valutazzjoni tal-pjanijiet ta’ rkupru tal-banek. Fl-aħħar nett, fil-qasam tal-valutazzjonijiet biex jiġi ddeterminat jekk bank huwiex “qed ifalli jew probabbilment se jfalli”, jenħtieġ li l-BĊE jkompli jiżviluppa l-gwida operazzjonali tiegħu.

Introduzzjoni

01

Waħda mit-tagħlimiet meħuda mill-kriżi finanzjarja tal-2008 kienet li l-qafas regolatorju bankarju kien jeħtieġ li jsirlu titjib biex tiġi żgurata ġestjoni aħjar ta’ kriżijiet. Fl-Unjoni Ewropea (UE), din il-ħtieġa ġiet indirizzata mit-traspożizzjoni fil-liġi nazzjonali tad-Direttiva 2014/59/UE, komunement magħrufa bħala d-Direttiva dwar l-Irkupru u r-Riżoluzzjoni tal-Banek (BRRD). Din tistabbilixxi qafas Ewropew komuni għall-irkupru u r-riżoluzzjoni.

02

F’konformità mal-istandards globali l-ġodda, din id-direttiva hija magħmula minn tliet pilastri: l-ippjanar ta’ rkupru mill-banek, l-intervent bikri mis-superviżuri u, bħala l-aħħar alternattiva, ir-riżoluzzjoni. Il-Kummissjoni Ewropea adottat ukoll regolamenti ta’ implimentazzjoni. Flimkien mal-linji gwida maħruġa mill-Awtorità Bankarja Ewropea (EBA), dawn jinterpretaw u jispjegaw il-qafas regolatorju u jfittxu li jiżguraw l-applikazzjoni uniformi tiegħu.

03

Taħt il-Mekkaniżmu Superviżorju Uniku (MSU)¹, il-Bank Ċentrali Ewropew (BĊE) ilu minn Novembru 2014 li ngħata r-responsabbiltà li jiżgura ġestjoni operazzjonali effiċjenti ta’ kompiti relatati mal-valutazzjoni tal-ippjanar ta’ rkupru tal-banek kif ukoll li jiżgura intervent bikri għal banek sinifikanti fiż-żona tal-euro. F’Lulju 2017, il-BĊE kien qed jissorvelja direttament 120 bank sinifikanti fiż-żona tal-euro, li kellhom ftit aktar minn 80 % tal-assi bankarji, jew madwar EUR 22 000 biljun. Il-BĊE jistma l-ispejjeż totali tiegħu għas-superviżjoni prudenzjali tas-sistema bankarja għall-2017 għal ammont ta’ EUR 490 miljun, li jiġu ffinanzjati mill-banek infushom permezz ta’ imposta.

04

L-ippjanar ta’ rkupru u l-intervent bikri huma maħsuba biex jiżguraw li kriżi tiġi mitigata, jew mill-banek infushom jew inkella permezz ta’ miżuri superviżorji. Għall-fini ta’ dan ir-rapport, sitwazzjonijiet ta’ kriżi jirreferu għal ċirkustanzi li fihom id-deterjoramanet ta’ bank jilħaq punt fejn il-kundizzjoni finanzjarja tiegħu tkun mhedda. Din ir-responsabbiltà superviżorja tirrikjedi qafas għall-ġestjoni ta’ kriżijiet. Dan huwa l-proċess ta’ tħejjija għal sitwazzjonijiet ta’ kriżi, u l-identifikazzjoni u r-rispons għalihom meta jseħħu.

05

L-ippjanar ta’ rkupru huwa komponent ġdid tal-qafas regolatorju. Taħt is-sistema tal-BRRD, il-banek huma issa obbligati li jiżviluppaw u jżommu pjanijiet ta’ rkupru li jikkonsistu f’miżuri li jkun biħsiebhom jieħdu biex jistabbilixxu mill-ġdid il-kundizzjoni finanzjarja tagħhom bħala l-ewwel rispons għad-deterjorament. Is-superviżuri tal-banek jivvalutaw il-kwalità ta’ dawn il-pjanijiet u jistabbilixxu jekk dawn ikunux kredibbli u fattibbli.

06

Fil-fehma tal-Kumitat ta’ Basel dwar is-Superviżjoni Bankarja (BCBS), intervent bikri jista’ jipprevjeni dgħufija identifikata milli tiżviluppa f’theddida għas-sikurezza u s-solidità². Dan huwa komponent kruċjali tal-ġestjoni superviżorja ta’ kriżijiet. Il-BRRD introduċiet sett komprensiv ta’ għodod ta’ intervent bikri, u r-Regolament tal-UE li jistabbilixxi l-MSU³ wkoll ikkonferixxa setgħat ta’ intervent bikri lill-BĊE.

07

Għalhekk, il-ġestjoni effettiva ta’ kriżijiet issa tiddependi primarjament mill-ġestjoni operazzjonalment effiċjenti, mill-BĊE, tas-setgħat estensivi tiegħu. Dan jinkludi t-tisħiħ tal-kapaċità superviżorja li jiġu identifikati żviluppi negattivi u jkun hemm reazzjoni għalihom fi stadju bikri. Jeħtieġ ukoll li jiġi żgurat fluss adegwat ta’ informazzjoni, kemm internament kif ukoll esternament, kif ukoll li jittieħdu deċiżjonijiet f’waqthom. Prerekwiżit finali għall-ġestjoni operazzjonalment effiċjenti, meta tkun qed tiġi ttrattata sitwazzjoni ta’ kriżi, huwa l-iskambju mingħajr xkiel ta’ informazzjoni u l-koordinazzjoni effiċjenti ma’ superviżuri u awtoritajiet rilevanti oħra.

08

Il-valutazzjoni tal-pjanijiet ta’ rkupru u d-determinazzjoni ta’ sitwazzjonijiet ta’ kriżi huma deċiżjonijiet sensittivi li jenħtieġ li jkunu bbażati fuq proċess sod. L-istess japplika għall-użu ta’ setgħat superviżorji diskrezzjonali, billi jridu jitfasslu miżuri biex jindirizzaw il-problema b’mod immirat u proporzjonat. Sfida ewlenija hija li jiġu stabbiliti kriterji li jkunu jippermettu konsistenza fit-trattament ta’ banek b’mudelli kummerċjali differenti fi swieq differenti li jkunu sorveljati minn timijiet bi sfondi superviżorji differenti.

09

Għaldaqstant, jeħtieġ li jkun hemm bilanċ bejn il-kriterji li jkunu ġenerali u globali u dawk li jkunu speċifiċi għall-istituzzjoni, filwaqt li tkun permessa flessibbiltà suffiċjenti fil-mod kif dawn jiġu applikati. Fl-istess ħin, il-kriterji kollha jridu jkunu espliċiti u robusti biżżejjed biex jiżguraw konsistenza superviżorja u salvagwardji kontra t-tendenza għall-inattività (il-vantaġġi relattivi li ma jsir xejn) u kontra l-manipulazzjoni tar-regolatur (il-promozzjoni tal-interessi ta’ bank minflok l-interess pubbliku).

10

Bejn wieħed u ieħor, għal żewġ terzi tal-banek li kienu suġġetti għal proċeduri ta’ ġestjoni ta’ kriżijiet tal-BĊE il-punteġġ tal-Proċess ta’ Reviżjoni u Evalwazzjoni Superviżorji (SREP)⁴ kien ta’ erbgħa (l-agħar klassifikazzjoni qabel ma bank jiġi kklassifikat bħala “qed ifalli jew probabbilment se jfalli” (FOLTF), u għal terz minnhom il-punteġġ kien ta’ tlieta. Bank wieħed biss kellu punteġġ SREP ta’ tnejn. Il-biċċa l-kbira mill-banek kienu suġġetti għal ġestjoni ta’ kriżi għal mill-inqas sena – u xi wħud għall-perjodu kollu kemm hu. Iċ-ċifri għall-2016 juru li 11 % tal-banek fl-Ewropa kellhom punteġġ SREP ta’ erbgħa. Fit-tieni trimestru tal-2016, ħames banek kellhom livelli ta’ kapital li kienu inqas mill-iskattatur tal-AMD.

Approċċ u metodoloġija tal-awditjar

11

Aħna eżaminajna jekk, fir-rwol superviżorju tiegħu, il-BĊE kienx immaniġġja l-istabbiliment ta’ qafas operazzjonalment effiċjenti għall-proċeduri ta’ ġestjoni ta’ kriżijiet⁵. B’mod partikolari, iffukajna fuq:

1. jekk il-metodoloġiji superviżorji tal-BĊE u l-proċeduri relatati jidentifikawx b’mod effiċjenti deterjorament materjali fil-kundizzjoni finanzjarja ta’ bank u jekk jirreaġixxux għalih; u
2. jekk il-proċeduri operazzjonali u l-arranġamenti għall-koordinazzjoni u l-kooperazzjoni kemm fi ħdan il-BĊE kif ukoll ma’ atturi rilevanti oħra jippermettux ġestjoni effiċjenti ta’ kriżijiet.

12

F’dan il-kuntest, l-awditu kellu l-għan li jeżamina:

1. l-istruttura organizzattiva tal-BĊE u l-proċessi tiegħu għar-reklutaġġ u l-allokazzjoni tal-persunal;
2. il-proċessi tiegħu għall-iskambju ta’ informazzjoni, il-koordinazzjoni u l-kooperazzjoni, kemm internament kif ukoll esternament ma’ partijiet interessati oħra;
3. il-proċessi tiegħu għall-valutazzjoni tal-pjanijiet ta’ rkupru, inklużi l-għodod ta’ appoġġ u l-prattiki;
4. il-proċessi tiegħu għall-implimentazzjoni tal-qafas ta’ intervent bikri, inklużi kriterji u metodi biex tiġi żgurata l-identifikazzjoni ta’ kriżijiet fi stadju bikri u rispons xieraq.

13

Il-kriterji tal-awditjar ġew idderivati mis-sorsi li ġejjin:

1. il-leġislazzjoni rilevanti – il-BRRD, id-Direttiva dwar ir-Rekwiżiti ta’ Kapital (CRD IV)⁶ u r-Regolament dwar il-Mekkaniżmu Superviżorju Uniku (Regolament MSU);
2. ir-regolamenti delegati rilevanti tal-Kummissjoni u l-linji gwida tal-EBA;
3. l-istandards globali rilevanti (il-BCBS u l-Bord għall-Istabbiltà Finanzjarja (FSB)); u
4. ir-regoli u l-proċeduri interni tal-BĊE.

14

Aħna ġbarna evidenza għall-awditjar permezz ta’ laqgħat u intervisti mal-persunal superviżorju ewlieni tal-BĊE u billi spezzjonajna ċerti dokumenti interni u data disponibbli għall-pubbliku. Minbarra x-xogħol tal-awditjar li wettaqna fil-BĊE, aħna bgħatna kwestjonarju lill-banek kollha sinifikanti bil-għan li niksbu feedback dwar l-effiċjenza tal-proċess tal-ippjanar ta’ rkupru.

15

L-awditu ffoka biss fuq l-effiċjenza operazzjonali tal-ġestjoni ta’ kriżijiet, mill-BĊE, fir-rigward tal-banek suġġetti għas-superviżjoni diretta tiegħu (dawn huma esklussivament magħrufa bħala“Istituzzjonijiet Sinifikanti” (SIs)). L-ambitu ma kienx jinkludi l-attivitajiet ta’ ġestjoni ta’ kriżijiet għal “istituzzjonijiet inqas sinifikanti” (LSIs) jew l-interazzjoni tal-BĊE mal-awtoritajiet ta’ riżoluzzjoni, minbarra l-iskambju f’waqtu ta’ informazzjoni. Aħna ma awditjajniex jekk id-deċiżjonijiet superviżorji individwali tal-BĊE kinux xierqa jew le, iżda jekk il-proċessi stabbiliti jkunux jippermettux li jittieħdu deċiżjonijiet fiż-żmien it-tajjeb u jekk il-valutazzjonijiet imwettqa qabel it-teħid ta’ deċiżjonijiet kinux jippermettu li jsiru ġudizzji infurmati tajjeb.

16

Aħna komplejna niffaċċjaw limitazzjonijiet fl-ambitu tagħna. Huwa minnu li l-BĊE pprovda dokumentazzjoni estensiva għall-iskopijiet ta’ dan l-awditu, u li applika riżorsi konsiderevoli biex jappoġġa l-awditu tagħna, biex b’hekk dan seta’ jitkompla b’mod f’waqtu. Barra minn hekk, ġew stabbiliti arranġamenti ta’ kooperazzjoni bejn il-QEA u l-BĊE biex jiżguraw il-protezzjoni ta’ data kunfidenzjali u l-fluss regolari tad-dokumentazzjoni. B’riżultat ta’ dan, aħna fil-fatt irnexxielna niksbu evidenza suffiċjenti dwar it-tfassil tas-sistema biex inkunu nistgħu nisiltu konklużjonijiet xierqa f’dan ir-rigward. Madankollu, ma ngħatatx evidenza suffiċjenti il-qasam tat-testijiet tal-kontrolli u tal-ittestjar sostantiv. Id-dettalji kollha jingħataw fl-Anness I. Dan ifisser li, fir-rigward tal-effiċjenza operazzjonali tal-implimentazzjoni fil-prattika tal-valutazzjonijiet tal-pjanijiet ta’ rkupru u ta’ attivitajiet oħra ta’ ġestjoni ta’ kriżijiet, l-evidenza għall-awditjar li kellna aċċess għaliha kienet limitata, u xi kultant ma tqegħiditx immedjatament għad-dispożizzjoni tagħna. B’hekk, filwaqt li huwa minnu li rċevejna volum sinifikanti ta’ dokumentazzjoni, aħna ma stajniex niksbu tweġibiet għall-mistoqsijiet kollha tal-awditjar tagħna fil-livell meħtieġ mill-istandards xierqa tal-awditjar, u dan ir-rapport bilfors irid jitqies bħala li huwa proviżorju f’dak li jirrigwarda dawn l-oqsma tal-awditu.

Osservazzjonijiet

L-istruttura organizzattiva, ir-reklutaġġ u l-allokazzjoni tal-persunal għall-attivitajiet ta’ ġestjoni ta’ kriżijiet

17

Sabiex ikunu operazzjonalment effiċjenti, l-attivitajiet ta’ ġestjoni ta’ kriżijiet tal-BĊE jirrikjedu struttura organizzattiva li tappoġġja l-prestazzjoni, kif ukoll persunal adegwat. Dan ir-rekwiżit tal-aħħar ifisser l-identifikazzjoni tal-ħtiġijiet tal-persunal, abbażi ta’ ppjanar realistiku, ir-reklutaġġ u l-impjegar ta’ għadd suffiċjenti ta’ individwi b’ħiliet xierqa. Jenħtieġ li jkun hemm ukoll proċessi għar-riallokazzjoni tal-persunal fuq bażi ta’ każ b’każ biex jirreaġixxu għal emerġenzi.

B’mod ġenerali, l-istruttura organizzattiva hija adegwata …

18

Fil-BĊE, it-timijiet superviżorji konġunti (TSK) huma inkarigati mis-superviżjoni kontinwa li tinkludi l-eżerċizzju ta’ attivitajiet superviżorji relatati mal-valutazzjoni tal-pjanijiet ta’ rkupru tal-banek, kif ukoll mill-ġestjoni ta’ kriżijiet. It-TSK dejjem jitmexxew mill-persunal tal-BĊE. Huma magħmulin minn membri tal-persunal tal-BĊE u minn persunal maħtur mill-awtoritajiet superviżorji tal-Istati Membri (SM) parteċipanti. Awditu preċedenti sab li l-BĊE ma għandux kontroll suffiċjenti fuq l-għadd u l-ħiliet ta’ dawn is-superviżuri⁷. Barra minn hekk, fil-BĊE hemm Diviżjoni ddedikata inkarigata mill-Ġestjoni ta’ Kriżijiet (CRM), li hija grupp ta’ esperti speċifiċi fil-qasam u tappoġġa lit-TSK. L-interazzjoni mas-CRM tista’ tiżgura wkoll il-konsistenza tat-teħid ta’ deċiżjonijiet u l-effiċjenza operazzjonali tat-TSK fil-ġestjoni ta’ xogħolhom (ara l-Kaxxa 1).

19

Minbarra dan ta’ hawn fuq, is-CRM tistabbilixxi u timmonitorja indikaturi rilevanti għall-kriżi bbażati fuq informazzjoni dwar ir-riskji u l-vulnerabbiltajiet tal-istituzzjonijiet tal-MSU. Hija tirċievi din l-informazzjoni mid-Diviżjoni tal-analiżi tar-riskju (RIA) u mid-diviżjonijiet tal-ġestjoni ta’ kriżijiet tal-Awtoritajiet Nazzjonali Kompetenti (ANK), kif ukoll data superviżorja mid-Direttorat Ġenerali tal-Istatistika (DĠ Statistika) tal-BĊE.

20

Din l-istruttura organizzattiva ssaħħaħ l-effiċjenza fil-ġestjoni operazzjonali tal-kompiti. Hemm separazzjoni ċara bejn ir-responsabbiltajiet u d-dmirijiet bejn tat-TSK u dawk tas-CRM; din is-sistema tikkontribwixxi għal interazzjoni effiċjenti bejn iż-żewġ naħat kif ukoll tiġi rinfurzata minnha. It-TSK għandhom responsabbiltajiet ċari għal superviżjoni kontinwa u huma involuti wkoll f’bosta fażijiet tal-ġestjoni ta’ kriżijiet, bħalma huma l-attivitajiet ta’ tħejjija, u fl-aħħar mill-aħħar jinkludu l-intervent bikri jew il-proċess FOLTF.

21

Il-BĊE kompla jtejjeb din l-interazzjoni mat-TSK billi qasam is-CRM f’żewġ sezzjonijiet: “Operazzjonijiet ta’ Mmaniġġjar ta’ Kriżijiet” u “Politika u Kooperazzjoni fir-rigward tal-Ġestjoni ta’ Kriżijiet”. L-ewwel waħda hija responsabbli għall-interazzjoni speċifika għall-banek mat-TSK, filwaqt li t-tieni waħda hija inkarigata minn kompiti relatati mal-koordinazzjoni tal-politika dwar il-qafas għall-ġestjoni ta’ kriżijiet u l-kooperazzjoni mal-awtoritajiet kompetenti, l-awtoritajiet ta’ riżoluzzjoni u partijiet interessati oħra.

…minkejja xi dgħufijiet fl-ippjanar inizjali

22

L-appoġġ espert li jingħata lit-TSK mis-CRM jista’ jkun kruċjali għall-effiċjenza operazzjonali tal-ġestjoni ta’ sitwazzjoni ta’ kriżi, peress li ma hemmx garanzija li l-membri tat-TSK se jkollhom il-ħiliet meħtieġa għall-ġestjoni ta’ kriżijiet.

23

Il-proċess tal-ippjanar inizjali għar-reklutaġġ tal-persunal tas-CRM ma kellux firxa predefinita ta’ ħiliet. Barra minn hekk, fir rigward tal-istabbiliment tal-MSU, esperjenza fil-ġestjoni ta’ kriżijiet ma kinitx espliċitament meħtieġa għar-reklutaġġ tal-persunal tat-TSK. Il-BĊE lanqas ma għandu s-setgħa li jiżgura li l-membri tat-TSK mibgħuta mill-awtoritajiet nazzjonali jkollhom l-għarfien espert meħtieġ. Attwalment, ir-riżorsi umani qed jiddiskutu l-possibbiltà ta’ database tal-ħiliet u l-kwalifiki għall-MSU.

B’mod ġenerali, ir-reklutaġġ għas-CRM kien effiċjenti

24

Fuq il-bażi tal-kampjun li eżaminajna, aħna nikkonkludu li r-reklutaġġ għas-CRM kien b’mod ġenerali effiċjenti, partikolarment fid-dawl tal-isfida biex jinstabu persuni b’esperjenza rilevanti. Ir-reklutaġġ dam bejn xahrejn u sitt xhur mill-bidu sat-tmiem tal-proċess, u r-rekluti kollha kellhom il-ħiliet meħtieġa.

… iżda l-BĊE ma għandux proċeduri speċifiċi biex jivvaluta mill-ġdid l-allokazzjoni tal-persunal għat-TSK f’sitwazzjoni ta’ kriżi u biex jiskjera mill-ġdid il-persunal sabiex jippermetti li jkun hemm effiċjenza operazzjonali tal-ġestjoni tagħha

25

Kif spjegat fil-paragrafu 119 tar-Rapport Speċjali tagħna⁸, il-livell ta’ riskju ta’ entità sorveljata għandu jkollu impatt fuq l-għadd u l-profondità tal-kompiti superviżorji. Deterjorament rapidu fis-sitwazzjoni ta’ bank jista’ jfisser restrizzjonijiet tar-riżorsi għat-TSK korrispondenti. F’sitwazzjoni ta’ kriżi, it-TSK jistgħu jnaqqsu jew jipposponu kompiti regolari. Madankollu, ma hemmx proċess għall-valutazzjoni mill-ġdid tal-ħtiġijiet tal-persunal jew għar-riallokazzjoni tal-persunal, u dan ixekkel potenzjalment l-effiċjenza operazzjonali tal-ġestjoni f’sitwazzjoni ta’ kriżi.

Kooperazzjoni u koordinazzjoni fir-rigward tal-ġestjoni ta’ kriżijiet

26

Il-ġestjoni operazzjonalment effiċjenti ta’ kriżijiet tirrikjedi kooperazzjoni u koordinazzjoni effettivi bejn il-partijiet interessati rilevanti. Dan huwa partikolarment il-każ għal gruppi bankarji transkonfinali, minħabba n-natura kumplessa tagħhom.

27

Id-dritt tal-UE⁹ jirrikjedi li l-BĊE, meta jkun qed tittratta sitwazzjoni ta’ kriżi f’bank, jiskambja informazzjoni u jikkoordina l-attivitajiet tiegħu ma’ awtoritajiet oħra. Dawn jistgħu jinkludu awtoritajiet kompetenti oħra għas-superviżjoni tal-banek fi ħdan il-kulleġġi tas-superviżuri, superviżuri tal-assigurazzjoni, awtoritajiet ta’ riżoluzzjoni u awtoritajiet makroprudenzjali.

28

Il-kulleġġi tas-superviżuri huma l-mezzi għall-kooperazzjoni u l-koordinazzjoni superviżorji, kemm f’kundizzjonijiet normali kif ukoll f’każ ta’ kriżi. Ġestjoni operazzjonalment effiċjenti tal-kompiti tal-kulleġġi tkun tkopri l-iskambju ta’ informazzjoni rilevanti, il-koordinazzjoni tal-valutazzjonijiet ta’ kriżijiet u l-koordinazzjoni tar-rispons għall-kriżijiet.

29

Jenħtieġ li l-kulleġġi jkunu bbażati fuq arranġamenti bil-miktub li jinkludu dispożizzjonijiet għall-kunfidenzjalità, l-użu u l-kondiviżjoni ta’ informazzjoni u l-koordinazzjoni bejn il-membri¹⁰. Mudell għal arranġamenti bil-miktub kif ukoll proċeduri interni tal-BĊE jipprovdu gwida lit-TSK għall-għeluq tal-arranġamenti bil-miktub ma’ awtoritajiet oħra. Madankollu, fir-rigward ta’ sitwazzjonijiet ta’ kriżi, il-proċeduri tal-BĊE ma jinkludux istruzzjonijiet speċifiċi rigward l-ambitu u l-firxa ta’ informazzjoni speċifika għall-gruppi bankarji li trid tiġi skambjata. Fl-arranġamenti bil-miktub li ġew konklużi sa issa, informazzjoni bħal din mhux dejjem ġiet iddefinita kif meħtieġ. In-nuqqas ta’ arranġamenti ta’ dan it-tip jista’ jimpedixxi l-funzjonament effiċjenti ta’ kulleġġ f’sitwazzjoni ta’ kriżi.

L-istabbiliment tal-koordinazzjoni u l-kooperazzjoni ma’ awtoritajiet oħra għadu mhuwiex komplet

30

Fil-kapaċità tiegħu bħala superviżur fuq bażi konsolidata, il-BĊE jippresiedi 34 kulleġġ superviżorju, inklużi 4 kulleġġi internazzjonali li ma jinkludux parteċipanti tal-UE minbarra l-BĊE. Il-BĊE jinsab fil-proċess li jikkonkludi Arranġamenti bil-Miktub ta’ Koordinazzjoni u Kooperazzjoni (WCCAs) sabiex jiffaċilita l-ġestjoni ta’ kriżijiet fi ħdan dawn il-kulleġġi. F’Ġunju 2017, il-BĊE kien ikkonkluda biss WCCAs għal ħames kulleġġi (ara t-Tabella 1). Il-BĊE ma pprijoritizzax il-konklużjoni tad-WCCAs fuq bażi ta’ riskju. In-negozjati huma xi kultant diffiċli minħabba li jiddependu, fost l-oħrajn, fuq il-kapaċità ta’ rispons tal-kontropartijiet. In-nuqqas ta’ WCCA jista’ jnaqqas l-abbiltà tal-BĊE li jirreaġixxi għal kriżi b’mod f’waqtu u effiċjenti.

Tabella 1

Status tad-WCCAs

Status	Għadd ta’ istituzzjonijiet
Konklużi	5
Qed jistennew l-approvazzjoni mill-BĊE	4
Qed jiġu eżaminati internament mill-BĊE	18
Pendenti (inklużi żewġ Banek ta’ Importanza Sistemika Globali (G-SIBs))	3
Għadhom maa nbdewx (kulleġġi internazzjonali)	4

Sors: Il-BĊE.

31

Ihuwa minnu li d-dokumenti li ġew ipprovduti mill-BĊE fihom gwida operazzjonali limitata għat-TSK biex jiġi żgurat li l-kompiti tagħhom relatati mal-kulleġġi qed jiġu mmaniġġjati b’mod konsistenti u effiċjenti f’sitwazzjoni ta’ kriżi.

32

Barra minn hekk, ma hemmx qafas intern ta’ regoli biex jiżguraw li l-isfidi addizzjonali li jirriżultaw mis-superviżjoni supplimentari, mill-BĊE, ta’ 29 Konglomerat Finanzjarju (FICOs)¹¹ qed jiġu indirizzati¹². In-nuqqas ta’ qafas ta’ dan it-tip jista’ jkollu impatt fuq l-effettività u l-puntwalità tal-intervent f’każ li FICO jidħol fi kriżi.

33

Għal dawn iż-żewġ raġunijiet, il-mudell tal-BĊE għad-WCCAs huwa partikolarment rilevanti għall-ġestjoni operazzjonalment effiċjenti ta’ kriżijiet transkonfinali. Madankollu, il-mudell ma jinkludix il-ġabra minima meħtieġa ta’ informazzjoni li trid tiġi skambjata bejn il-membri tal-kulleġġ f’xenarju ta’ kriżi¹³. L-evidenza għad-dispożizzjoni tagħna ma pprovdietx eżempji fejn il-BĊE kien qabel dwar il-ġabra minima ta’ informazzjoni. It-taqsima tal-mudell li tittratta l-interazzjoni bejn il-kulleġġi superviżorji u l-kulleġġi ta’ riżoluzzjoni hija wkoll inkompleta, minħabba l-istabbiliment reċenti tal-kulleġġi ta’ riżoluzzjoni u l-fatt li 19-il grupp transkonfinali jinsabu attwalment taħt ir-responsabbiltà tal-Bord Uniku ta’ Riżoluzzjoni (SRB). Il-BĊE ddikjara li biħsiebu jirrevedi din it-taqsima ladarba l-arranġamenti bil-miktub għall-kulleġġi ta’ riżoluzzjoni u l-gruppi għall-ġestjoni ta’ kriżijiet ikunu ġew finalizzati.

Jeħtieġ li jsir titjib fl-interazzjoni mal-SRB u ma’ partijiet interessati oħra

34

L-interazzjoni effiċjenti mal-awtoritajiet ta’ riżoluzzjoni inġenerali, u mal-SRB b’mod partikolari bħala l-korp il-ġdid tal-UE inkarigat mir-riżoluzzjoni ta’ banek li jkunu qed ifallu, saret komponent ġdid u kruċjali tal-ġestjoni ta’ kriżijiet.

35

Il-kooperazzjoni tal-BĊE mal-SRB tinvolvi l-kondiviżjoni u l-iskambju ta’ informazzjoni rilevanti għall-kompiti ta’ waħda mill-organizzazzjonijiet jew it-tnejn li huma. Dawn jinkludu l-ippjanar ta’ riżoluzzjoni, l-impożizzjoni ta’ miżuri ta’ intervent bikri u t-twettiq ta’ valutazzjonijiet FOLTF.

36

Bħala l-ewwel pass biex jiġi żgurat il-fluss effiċjenti ta’ informazzjoni, il-BĊE u l-SRB iffirmaw memorandum ta’ qbil (MtQ) f’Diċembru 2015. Attwalment, il-MtQ qed jiġi aġġornat, bl-intenzjoni li jitkabbru l-ambitu u l-firxa ta’ informazzjoni pprovduta lill-SRB għall-ippjanar ta’ riżoluzzjoni u f’sitwazzjonijiet ta’ kriżi, abbażi tal-esperjenza matul dawn l-aħħar sentejn.

37

Minn April 2015 'il hawn, l-SRB kellu aċċess mill-bogħod għal Darwin, is-sistema ta’ ġestjoni tad-dokumenti u r-rekords tal-BĊE, u minn Diċembru 2016 'il hawn huwa kellu aċċess għall-IMAS, is-sistema ta’ ġestjoni li tintuża fi ħdan l-MSU. L-ammont ta’ informazzjoni li tiġi kondiviża mal-SRB dwar is-sitwazzjonijiet mhux ta’ kriżi huwa limitat. Fir-rigward tas-sitwazzjonijiet ta’ kriżi, attwalment ma hemmx pakkett ta’ informazzjoni speċifikat minn qabel li jrid jiġi pprovdut lill-SRB. Għalhekk il-BĊE jagħmel disponibbli l-informazzjoni li l-huwa jqis rilevanti u, jekk l-SRB ikun jeħtieġ aktar informazzjoni, dan tal-aħħar ikun irid jibgħat talba għaliha.

38

Huwa mistenni li l-qbil minn qabel dwar l-informazzjoni li trid tiġi kondiviża huwa mistenni jkun jiffaċilita t-tqegħid tad-data għad-dispożizzjoni tal-SRB f’sitwazzjoni ta’ kriżi, u għaldaqstant tiġi indirizzata ineffiċjenza operazzjonali attwali. Xorta waħda, din il-miżura waħidha ma tiżgurax li l-SRB jirċievi din l-informazzjoni fl-istadju bikri ta’ kriżi. Il-livell ta’ informazzjoni li hija disponibbli ma jiżdiedx awtomatikament hekk kif il-kundizzjoni finanzjarja ta’ bank tiddeterjora, li huwa l-punt ta’ kriżi, iżda dan isir biss jekk il-BĊE jikkunsidra intervent bikri u jissenjalah fil-fażi tal-IMAS jew jekk il-BĊE jqis li madankollu huwa xieraq.

39

B’mod ġenerali, dawn in-nuqqasijiet affettwaw b’mod negattiv l-effiċjenza operazzjonali tal-ġestjoni tas-sistema. Minflok ma jirċievi sett ta’ data aktar komprensiv mill-bidu nett, l-SRB huwa obbligat jibgħat ħafna talbiet ad hoc, li għalihom trid titħejja, tiġi approvata u tintbagħat id-data meħtieġa. Barra minn hekk, il-proċess għall-kondiviżjoni ta’ ġabra aktar ġenerali ta’ informazzjoni, hekk kif is-sitwazzjoni ta’ istituzzjoni tiddeterjora, jista’ jkompli jittejjeb sabiex tiżdied l-effiċjenza operazzjonali tal-ġestjoni. Ir-rapport speċjali reċenti tagħna dwar l-SRB jinkludi informazzjoni ulterjuri dwar il-kooperazzjoni bejn iż-żewġ korpi.

Bord Ewropew dwar ir-Riskju Sistemiku (BERS)

40

Il-BERS huwa responsabbli għas-sorveljanza makroprudenzjali tas-sistema finanzjarja fi ħdan l-UE. Huwa jidentifika u jipprijoritizza r-riskji sistemiċi u joħroġ twissijiet u rakkomandazzjonijiet għal azzjoni korrettiva. Aħna ma sibniex proċeduri elaborati biex jiżguraw li r-riskji sistemiċi għall-istabbiltà finanzjarja identifikati mill-BERS jittieħdu inkunsiderazzjoni fil-ġestjoni ta’ kriżijiet tal-BĊE.

Kooperazzjoni mal-awtoritajiet rilevanti

41

Il-BĊE stabbilixxa proċessi interni għat-tħejjija, in-negozjar u l-approvazzjoni ta’ ftehimiet ta’ kooperazzjoni jew ta’ għadd ta’ MtQ ma’ awtoritajiet rilevanti oħra għall-iskop ta’ koordinazzjoni f’sitwazzjoni ta’ kriżi (ara l-Figura 1). Huwa ffirma għadd ta’ MtQ mal-Awtorità Ewropea tat-Titoli u s-Swieq (ESMA) u qed ikompli jaħdem sabiex jikkonkludi ftehimiet ta’ kooperazzjoni mal-awtoritajiet nazzjonali tas-swieq, mal-awtoritajiet superviżorji tal-Istati Membri mhux fiż-żona tal-euro, u ma’ awtoritajiet nazzjonali barra mit-territrorju tal-UE.

42

Il-prijoritizzazzjoni mogħtija għall-konklużjoni ta’ ftehimiet mal-pajjiżi li mhumiex fl-UE tiddependi minn sett ta’ fatturi bħall-analiżi tal-iskoperturi u l-istrutturi tal-grupp. Madankollu, dawn il-prijoritajiet ma jiġu riflessi fl-ebda pjan ta’ azzjoni kumplessiv fi ħdan il-BĊE. Lanqas ma hemm xi prijoritizzazzjoni meta jiġu konklużi ftehimiet ma’ awtoritajiet nazzjonali tas-swieq jew mal-Istati Membri li mhumiex koperti mill-MSU. Fil-prattika, l-iffirmar għadd ta’ MtQ ma’ awtoritajiet li jinsabu barra mit-territorju tal-UE jiddependi minn kemm il-kontroparti tkun lesta tikkoopera. Il-ftehimiet konklużi sa issa, li huma relatati mas-superviżjoni kontinwa, ma fihomx arranġamenti speċifiċi fir-rigward tal-attivitajiet ta’ ġestjoni ta’ kriżijiet.

43

Minbarra dan ta’ hawn fuq, il-BĊE huwa legalment meħtieġ li jinforma lil partijiet interessati oħra dwar sitwazzjoni ta’ kriżi potnzjali, skont is-severità tagħha. Dawn il-partijiet interessati jinkludu l-EBA, il-banek ċentrali nazzjonali u l-funzjoni monetarja proprja tal-BĊE.

Ippjanar ta’ rkupru

44

Obbligu ewlieni tal-BRRD huwa li l-banek ifasslu u jżommu pjanijiet biex jistabbilixxu mill-ġdid il-pożizzjoni finanzjarja tagħhom f’każ ta’ deterjorament f’daqqa. Dawn huma magħrufin bħala pjanijiet ta’ rkupru. Fil-kapaċità tiegħu bħala superviżur tal-banek, il-BĊE jrid jivvaluta l-kwalità tal-pjanijiet ta’ rkupru fuq bażi annwali.

45

Proċess operazzjonalment effiċjenti għall-valutazzjoni tal-pjanijiet ta’ rkupru jkun jirrikjedi għodod koerenti kif ukoll rwoli u responsabbiltajiet iddefiniti b’mod ċar fi ħdan il-BĊE. It-TSK iwettqu l-valutazzjonijiet tagħhom u jipprovdu feedback lill-banek fi ħdan ċerti limiti ta’ żmien, sabiex l-SRB jkun jista’ jagħti l-fehmiet tiegħu¹⁴.

46

Proċess operazzjonalment effiċjenti jkun jippermetti wkoll is-senjalar fil-pront ta’ nuqqasijiet potenzjali u jiżgura konsistenza fil-valutazzjoni tal-pjanijiet ta’ rkupru fl-MSU kollu. Fl-aħħar nett, ir-riżultati tal-valutazzjonijiet kumplessivi jintużaw sistematikament bħala input għat-tħejjija u l-ġestjoni ta’ kriżijiet.

Wara fażi ta’ tranżizzjoni, il-BĊE stabbilixxa kronoloġija konsistenti għall-preżentazzjoni tal-pjanijiet ta’ rkupru …

47

Il-BĊE kellu jifrex il-proċess ta’ preżentazzjoni għall-banek kollha fuq perjodi ta’ żmien minħabba t-traspożizzjoni tardiva tal-BRRD f’ħafna Stati Mermbri fl-2015. Dan il-proċess ġie aġġustat, u approċċ ġdid għall-preżentazzjoni tal-pjanijiet ġie adottat u implimentat għat-tieni ċiklu fl-2016, bir-riżultat li ttejbet l-effiċjenza operazzjonali tal-proċess

… iżda l-ilħuq ta’ deċiżjonijiet konġunti dwar il-pjan ta' rkupru tal-grupp baqa’ problematiku

48

Il-proċedura eżatta li trid tiġi segwita għall-valutazzjoni tvarja skont l-istruttura tal-bank jew tal-grupp bankarju. Pereżempju, għall-gruppi bankarji transkonfinali, il-kulleġġ superviżorju huwa meħtieġ li jieħu deċiżjoni konġunta tal-membri kollha tiegħu. L-Anness II juri l-fluss tal-proċess għall-valutazzjoni tal-pjanijiet ta’ rkupru mill-kulleġġi superviżorji.

49

Abbażi ta’ rappreżentazzjoni mill-BĊE, l-ewwel ċiklu tal-preżentazzjonijiet kellu dewmien għal għadd ta’ raġunijiet. Minn 106 banek, 71 (67 %) ippreżentaw il-pjanijiet ta’ rkupru tagħhom fil-ħin. L-SRB ma pprovdiex kummenti dwar xi pjan fiċ-ċiklu tal-2015. Fejn il-proċedura kienet tirrikjedi l-involviment ta’ kulleġġ superviżorju, il-proċess formali ta’ deċiżjoni konġunta - jiġifieri l-ilħuq ta’ deċiżjoni konġunta fost il-membri kollha - ġie kkompletat fi 11 biss minn 32 każ (34 %). Meħuda flimkien, dawn ir-riżultati jagħtu x’jifhmu li hemm xi ineffiċjenza fix-xogħol tal-kulleġġi superviżorji.

L-użu ta’ esperti nazzjonali jfisser kunflitti potenzjali ta’ governanza

50

L-awtorità kompetenti hija responsabbli għall-valutazzjoni tal-pjanijiet ta’ rkupru¹⁵. Fil-każ tal-SIs, din hija l-BĊE. Il-Manwal Superviżorju proprju tal-BĊE¹⁶ jippermetti lill-impjegati tal-ANK jipparteċipaw fil-valutazzjoni tal-pjanijiet ta’ rkupru – mingħajr, madankollu, ma jkunu parti minn TSK jew jirrappurtaw lis-subkoordinatur tal-ANK. Minflok, huma jirrappurtaw lill-kap tad-dipartiment nazzjonali korrispondenti. Fir-Rapport Speċjali Nru 29/2016 tagħna (il-paragrafi 140, 141 u 147), aħna kkonkludejna li l-linji ta’ rappurtar konfliġġenti u n-nuqqas ta’ feedback dwar il-prestazzjoni jistgħu jaffettwaw b’mod negattiv il-prestazzjoni u l-effiċjenza operazzjonali fil-ġestjoni tal-proċedura ta’ valutazzjoni. F’dan il-każ, is-sitwazzjoni hija saħansitra aktar problematika, peress li ma hemmx rabta mat-TSK permezz tas-subkoordinatur tal-ANK, u ma hemmx proċess ta’ trasferiment iddefinit formalment. Il-Manwal jonqos ukoll milli jipprovdi linji gwida għall-interazzjoni proċedurali bejn il-Koordinatur tat-TSK u l-esperti nazzjonali rilevanti.

Is-CRM timmonitorja l-proċess tal-ippjanar ta’ rkupru u tipprovdi gwida ġenerali lit-TSK u lill-banek, iżda jeħtieġ li jsir xi titjib

51

Matul żewġ rieżamijiet interni, is-CRM identifikat ċerti problemi relatati mal-ġestjoni effiċjenti tal-proċess ta’ valutazzjoni. Inħasset il-ħtieġa għal gwida ulterjuri dwar l-għażliet, ix-xenarji u l-indikaturi ta’ rkupru, u din ġiet sussegwentement ipprovduta lis-superviżuri f’ħafna oqsma tal-ippjanar ta’ rkupru. Dan irriżulta f’approċċ aktar armonizzat u effiċjenti għall-valutazzjonijiet.

52

Sabiex tittejjeb il-kwalità u l-kredibbiltà tal-pjanijiet ta’ rkupru u tiġi ggarantita l-effiċjenza operazzjonali tal-proċess, huwa essenzjali li l-istituzzjonijiet jirrappurtaw, b’mod ċar u konsistenti, data ewlenija li hija meħtieġa mill-BRRD. Għal din il-fini, il-BĊE pprovda lill-istituzzjonijiet mudell ta’ rappurtar konċiż u standardizzat, li jippermettilhom jippreżentaw data finanzjarja ewlenija bl-istess mod. L-għodda tal-mudell fiha evalwazzjonijiet predefiniti u għandha l-vantaġġ li torbot informazzjoni li tinsilet mill-indikaturi, mix-xenarji u mill-għażliet, kif ukoll li tikkwantifika l-effetti tagħhom. Il-mudell intuża inizjalment għaċ-ċiklu tal-2016. Fuq nota pożittiva, dan diġà ġie rivedut u kemxejn aġġornat għaċ-ċiklu li jmiss billi ġiet inkorporata gwida addizzjonali kemm għall-banek kif ukoll għas-superviżuri.

53

Minkejja l-gwida li diġà ġiet żviluppata mis-CRM f’għadd ta’ oqsma f’kooperazzjoni man-Netwerk għall-Ġestjoni ta’ Kriżijiet f’għadd ta’ oqsma, it-TSK ivverifikaw permezz ta’ intervisti u ħafna banek ikkonfermaw permezz tal-istħarriġ tagħna (ara l-paragrafu 14) il-ħtieġa għal għajnuna addizzjonali sabiex tittejjeb il-kwalità tal-informazzjoni pprovduta fil-pjanijiet ta’ rkupru (ara l-Anness III għat-tweġibiet dettaljati). Qasam wieħed ta’ importanza partikolari kien il-kalibrazzjoni tal-livelli ta’ sollijiet tal-indikaturi, pereżempju bl-istabbiliment ta’ livelli tal-iskattar għal proporzjonijiet/indikaturi u bil-klassifikazzjoni tal-marġni magħżul ’il fuq mir-rekwiżiti tal-pilastru, fejn madankollu jenħtieġ li jiġi nnotat li l-EBA diġà pprovdiet gwida.

54

F’dan ir-rigward, il-BĊE ma tax lit-TSK gwida dettaljata, flimkien ma’ dik li diġà ġiet żviluppata mill-EBA¹⁷, dwar kif għandhom jivvalutaw il-kwalità tal-indikaturi (b’mod aktar speċifiku l-adegwatezza li biha jiġu kkalibrati s-sollijiet għal kull indikatur), li jkun jippermetti li jsir titjib fl-effiċjenza operazzjonali fil-ġestjoni tal-proċess. F’Ġunju 2017 aħna sibna li l-BĊE ma wettaqx analiżi bejn il-pari ta’ banek b’mudelli kummerċjali u b’karatteristiċi simili (li skont l-EBA din l-analiżi tista’ tippermetti li ssir l-identifikazzjoni ta’ xejriet komuni u tal-aħjar prattiki).

Il-BĊE ħaddem ir-rekwiżiti legali għall-valutazzjoni tal-pjanijiet ta’ rkupru f’għodda li hija effiċjenti u fil-biċċa l-kbira komprensiva

55

Il-BĊE u l-ANK ingħaqdu flimkien biex jibnu mudell li jkopri r-rekwiżiti legali kollha għall-valutazzjoni tal-pjanijiet ta’ rkupru. Il-mudell issimplifika x-xogħol tas-superviżuri, tejjeb il-kwalità tal-valutazzjonijiet u saħħaħ l-effiċjenza operazzjonali tal-mod kif il-proċess jiġi mmaniġġjat. Feedback orali mill-Koordinaturi tat-TSK ikkonferma li huma ħarsu lejn i-mudell simplifikat b’mod pożittiv.

56

Il-BĊE fassal għodda tal-excel biex jappoġġa l-valutazzjoni tal-kredibbiltà u tal-fattibbiltà ta’ għażliet individwali ta’ rkupru. L-għodda tikkombina data kwalitattiva mill-valutazzjonijiet tal-pjanijiet ta’ rkupru ma’ data speċifika għall-banek u tas-suq, u tikkalkula l-impatt ta’ firxa wiesgħa ta’ miżuri potenzjali f’xenarji differenti. Minħabba li din tagħti aċċess għal ammont kbir ta’ data disponibbli, kemm storika kif ukoll attwali, għandha tgħin biex tiġi żviluppata stampa aktar realistika tal-fattibbiltà ta’ miżuri individwali, u f’dan ir-rigward ittejjeb l-effiċjenza operazzjonali tal-ġestjoni ta’ dawn il-valutazzjonijiet.

57

Ġiet stabbilita proċedura għall-aġġornament annwali tal-għodda ta’ valutazzjoni tal-pjanijiet ta’ rkupru taħt l-awspiċi ta’ grupp iddedikat ta’ esperti min-Netwerk għall-Ġestjoni ta’ Kriżijiet (CMN). Il-BĊE pprovdielna evidenza li turi kif l-għodda ta’ valutazzjoni tiġi kontroverifikata mar-Regolament Delegat tal-Kummissjoni (UE) 2016/98 u kif ċerti elementi jridu jiġu aġġornati u inkorporati fl-għodda. L-għodda fiha wkoll referenzi għar-rekwiżiti legali rilevanti biex tittejjeb l-effiċjenza.

58

Madankollu, aħna osservajna li ma kienx hemm proċedura formali biex jiġu analizzati r-rapporti komparattivi tal-EBA¹⁸ u ma kienx hemm dokumentazzjoni li turi jekk is-sejbiet u l-konklużjonijiet tagħhom jiġux riflessi fl-għodda nfisha li tista’ tipprovdi lill-utent gwida addizzjonali jew eżempji prattiċi. Dawn l-elementi jtejbu l-effiċjenza operazzjonali tal-valutazzjonijiet, peress li jkunu jiffrankaw lill-assessuri milli jkollhom ifittxu gwida f’firxa ta’ dokumenti mhux marbutin flimkien.

59

Għalkemm l-assessuri normalment ikollhom aċċess għall-IMAS, il-BĊE ma stabbiliex proċedura formali biex jipprovdi gwida dwar il-verifikazzjoni tal-informazzjoni fil-pjanijiet ta’ rkupru b’referenza għal sorsi oħra (eż. rapporti dwar l-inkarigu tal-awditjar, reġistri, data mill-SREP, rapporti ta’ spezzjoni fuq il-post), inklużi l-links għal dawk is-sorsi. L-effiċjenza operazzjonali tista’ tiġi affettwata minn dan in-nuqqas ta’ gwida, speċjalment fejn l-pjanijiet ta’ rkupru jiġu valutati minn esperti nazzjonali tal-ANK li ma jkunux parti mit-TSK rilevanti, jew minn membri tal-persunal ta’ livell inqas.

… iżda r-riżultati tal-ippjanar ta’ rkupru ma jintużawx b’mos sistematiku għall-identifikazzjoni jew il-ġestjoni ta’ kriżijiet

60

Il-valutazzjoni tal-pjanijiet ta’ rkupru tintemm bl-ikkompletar ta’ mudell ta’ valutazzjoni u ittra ta’ feedback li tiddeskrivi n-nuqqasijiet tal-pjan lgħal-bank. Il-Manwal Superviżorju fih regoli ġenerali għall-użu ta’ din l-informazzjoni. Biex tiġi promossa l-effiċjenza operazzjonali, jenħtieġ li r-riżultati tal-valutazzjonijiet tal-pjanijiet ta’ rkupru jkunu wkoll komponent ċentrali u sistematiku tal-proċess superviżorju kontinwu tal-BĊE. Madankollu, l-ebda proċedura speċifika ma ġiet stabbilita f’dan ir-rigward u l-ebda output dokumentat, pereżempju fil-forma ta’ rapport ta’ sinteżi, li jirrikjedi li t-TSK jinkludu aspetti ta’ pjan ta’ rkupru fl-attività superviżorja kontinwa tagħhom ma ġie ddefinit. Ara l-Kaxxa 2 għal xi eżempji.

61

Ir-riżultati tal-valutazzjonijiet tal-pjanijiet ta’ rkupru għadhom ma jikkontribwux għad-diskussjonijiet tat-tim għall-ġestjoni ta’ kriżijiet speċifiku għall-istituzzjoni (IS-CMT)²⁰ jew ma jservux għall-użu potenzjali ta’ miżuri ta’ intervent bikri. Mill-informazzjoni ta’ hawn fuq mhuwiex ċar jekk l-informazzjoni faċilment disponibbli mill-proċess ta’ valutazzjoni tintużax b’xi mod sistematiku. Pereżempju, ma hemmx monitoraġġ sistematiku ggarantit tan-nuqqas ta’ rispett tal-indikaturi jew tal-implimentazzjoni tal-azzjonijiet ta’ rkupru. Dawn in-nuqqasijiet jistgħu jaffettwaw b’mod negattiv il-ġestjoni operazzjonalment effiċjenti tal-identifikazzjoni ta’ kriżijiet, l-intervent bikri u r-rispons għall-kriżijiet.

L-entitajiet sorveljati jidhru li huma b’mod ġenerali pożittivi fir-rigward tal-proċess tal-ippjanar ta’ rkupru

62

Bħala parti mill-awditu, aħna wettaqna stħarriġ online tal-banek kollha li kienu fornew pjanijiet ta’ rkupru lill-BĊE. Aħna tlabnihom jagħtu l-fehmiet tagħhom dwar l-istandards stabbiliti għall-ippjanar ta’ rkupru u l-interazzjoni tagħhom mal-BĊE bħala parti mill-proċess. L-istħarriġ intbagħat lill-125 SI kollha u twettaq f’Marzu u f’April 2017. Waslu risposti minn 64 entità fi 17-il Stat Membru (ara l-Anness III għat-tweġibiet dettaljati).

63

Inġenerali, il-banek wieġbu b’mod pożittiv għall-mistoqsijiet dwar il-proċess tal-ippjanar ta’ rkupru, għalkemm huma indikaw ukoll ħtieġa għal aktar ċarezza u gwida sabiex jiġu indirizzati l-ambigwitajiet li jifdal f’ċerti oqsma. Dawn kienu jinkludu d-definizzjoni tas-sinjali ta’ twissija bikrija u l-indikaturi tal-pjanijiet ta’ rkupru, il-kalibrazzjoni tal-indikaturi u l-livell ta’ sollijiet xierqa, l-allinjament tal-indikaturi mal-mudelli kummerċjali tal-banek, u l-metodoloġija adottata għall-ittestjar invers tal-istress għall-firxa sħiħa tax-xenarji. Kien hemm 10 banek li aċċennaw id-duplikazzjoni tat-talbiet għal informazzjoni u talbu li ssir distinzjoni aktar ċara bejn l-informazzjoni mitluba, rispettivament, għall-pjanijiet ta’ rkupru u għall-pjanijiet ta’ riżoluzzjoni²¹.

64

Il-biċċa l-kbira mill-banek irrappurtaw li l-interazzjoni mal-BĊE kienet pożittiva, għalkemm sebgħa ddikjaraw li l-ittri ta’ feedback kienu ddewmu jew assolutament ma ntbagħtux²². Kien hemm 12-il bank li esprima l-fehma li jenħtieġ li t-TSK ikunu aktar speċifiċi fil-provvediment ta’ assistenza teknika lill-banek, u preokkupazzjonijiet simili kienu relatati mal-gwida dwar kif is-sussidjarji għandhom jiġu integrati fil-pjanijiet ta’ rkupru tal-grupp. Fl-aħħar nett, disa’ banek esprimew dubju dwar l-applikazzjoni tal-prinċipju tal-proporzjonalità. Analiżi dettaljata tar-risposti għal kull mistoqsija tingħata fl-Anness III.

Minħabba l-limitazzjoni tal-kampjun ipprovdut mill-BĊE, ma setgħux jinsiltu konklużjonijiet dwar il-valutazzjonijiet tal-pjanijiet ta’ rkupru

65

Minħabba l-limitazzjonijiet deskritti hawn fuq fil-paragrafu 16, kellha naġġustaw il-proċeduri tal-awditjar tagħna u stajna nqabblu biss l-informazzjoni (parzjalment emendata) dwar aspetti magħżula ta’ tliet pjanijiet ta’ rkupru mal-kriterji/gwida disponibbli u l-valutazzjonijiet riżultanti. L-għan tagħna kien li nevalwaw, sa fejn kien possibbli, il-koerenza u l-konsistenza tal-għodda ta’ valutazzjoni bħala parti mill-proċessi operazzjonali li ntużaw mill-maniġment. Għal dan l-iskop aħna eżaminajna, sa fejn kien possibbli, kif il-valutazzjonijiet tpoġġew fil-prattika u jekk huma pprovdewx feedback effiċjenti lill-banek fil-forma ta’ lista kompleta tad-defiċjenzi identifikati.

66

Aħna identifikajna inkoerenzi żgħar fir-rigward tal-kriterji ta’ valutazzjoni għat-taqsima tal-indikaturi u l-valutazzjoni u fir-rigward tal-feedback riżultanti għall-banek. Barra minn hekk, ir-rekord tal-informazzjoni tal-awditjar ġie kompromess mill-fatt li l-assessuri ma jagħmlux kontroreferenza għat-taqsimiet rilevanti tal-pjan ta’ rkupru jew tal-fajl superviżorju²³. Madankollu, l-evidenza li kienet disponibbli ma kinitx biżżejjed għalina biex naslu għal konklużjoni fir-rigward ta’ kemm il-proċess tal-ippjanar ta’ rkupru qed jiġi implimentat tajjeb fil-prattika. Ara l-Anness I għal analiżi dettaljata tal-limitazzjonijiet fl-ambitu tagħna.

Identifikazzjoni ta’ kriżijiet

67

Il-qafas regolatorju tal-UE jinkludi firxa wiesgħa ta’ setgħat fta’ intervent bikri u setgħat superviżorji oħra biex jiġu ttrattati l-banek li jinsabu fi kriżi. Bħala superviżur, il-BĊE stabbilixxa qafas għall-ġestjoni ta’ kriżijiet li huwa mistenni li jiskatta reazzjonijiet f’waqthom u effettivi u jiżgura teħid ta’ deċiżjonijiet xieraq f’każ ta’ kriżi.

68

Sabiex ikun operazzjonalment effiċjenti, dan il-qafas jeħtieġ li jiżgura li l-BĊE japplika s-setgħat tiegħu skont il-linji gwida rilevanti tal-EBA u l-objettivi tal-MSU. Il-ġestjoni operazzjonalment effiċjenti ta’ kriżijiet tiddependi mill-kapaċità superviżorja li tiġi identifikata kriżi fi stadju bikri. Din tirrikjedi fehim ċar tal-bażi legali għall-użu ta’ setgħat ta’ intervent bikri u setgħat superviżorji oħra, bi kriterji oġġettivi biex isir dan u b’kunsiderazzjoni dovuta għall-prinċipju tal-proporzjonalità. F’dan ir-rigward, proċessi adegwati u gwida komprensiva u dettaljata għall-persunal għandhom importanza partikolari, minħabba l-isfidi legali li l-BĊE identifika għall-applikazzjoni uniformi tas-setgħat tiegħu.

Il-BĊE alloka kompiti u stabbilixxa fluss tax-xogħol kumplessiv għall-identifikazzjoni ta’ kriżijiet u r-rispons għalihom, iżda l-gwida tiegħu dwar l-implimentazzjoni tad-dispożizzjonijiet rilevanti mhijiex żviluppata biżżejjed

69

Tnejn mid-dokumenti operazzjonali prinċipali għall-ġestjoni ta’ kriżijiet fi ħdan il-BĊE huma żewġ kapitoli tal-Manwal tal-MSU, kif ukoll il-Pjan ta’ Azzjoni ta’ Emerġenza (EAP) tal-MSU. Dawn jittrattaw l-użu tas-setgħat ta’ intervent bikri u aspetti operazzjonali oħra, bħall-istabbiliment u l-funzjonament ta’ tim għall-ġestjoni ta’ kriżijiet.

70

Il-Manwal tal-MSU u l-EAP jinkludu biss referenzi għad-dispożizzjonijiet legali rilevanti u l-linji gwida tal-EBA dwar is-setgħat ta’ intervent bikri, aktar milli gwida speċifika dwar kif iridu jiġu implimentati. Nota għall-Gwida tal-SREP għall-Valutazzjoni ta’ Intervent Bikri, li ġiet aġġornata f’Lulju 2016, tinkludi xi mistoqsijiet ta’ kontroll, u telenka suġġetti li jridu jiġu dokumentati, minbarra li tagħmel referenza għal-leġiżlazzjoni rilevanti u l-linji ġwida tal-EBA. Madankollu, mhumiex deskritti s-setgħat legali tal-BĊE u l-kundizzjonijiet għall-użu tagħhom kif previsti mil-leġislazzjoni nazzjonali u mir-Regolament MSU. In-nota lanqas ma tipprovdi gwida ċara dwar l-elementi oġġettivi li jridu jiġu kkunsidrati għall-eżerċizzju tal-ġudizzju superviżorju u d-diskrezzjoni f’dan il-kuntest.

71

Il-Gwida tal-SREP għall-Valutazzjoni ta’ Intervent Bikri, li ġiet adottata fl-2016, ma tispeċifikax ir-rekwiżit kapitali minimu regolatorju rilevanti (jiġifieri jekk tinkludix il-Pilastru 1, il-Pilastru 2 u l-bafers kapitali), u ma tidentifikax ir-rekwiżiti rilevanti tal-likwidità. Hija tonqos ukoll milli tidentifika rekwiżiti prudenzjali oħra, b’mod partikolari dawk li jikkonċernaw l-arranġamenti ta’ governanza u l-kapaċità operazzjonali, li huma maħsuba li jiġu kkunsidrati f’dan ir-rigward. Barra minn hekk, il-gwida ma tispjegax x’jikkostitwixxi ksur tar-rekwiżiti regolatorji rilevanti jew x’jagħmilha probabbli li dawn jinkisru fil-futur qrib – għalkemm din hija l-bażi biex il-BĊE jifhem meta għandu juża s-setgħat tiegħu.

72

Għalhekk, b’mod kumplessiv, f’Ġunju 2017, ftit li xejn ingħata appoġġ permezz ta’ gwida għall-persunal tal-BĊE biex jeżerċitaw is-setgħat ta’ ġudizzju superviżorju u s-setgħat diskrezzjonali tagħhom. Dan għandu l-potenzjal li jaffettwa b’mod negattiv l-effiċjenza tal-ġestjoni operazzjonali, mill-BĊE, tal-identifikazzjoni ta’ kriżijiet u r-rispons għalihom.

Il-BĊE għandu proċessi għall-identifikazzjoni ta’ kriżijiet …

73

Kemm il-Manwal tal-MSU kif ukoll l-EAP jidikjaraw li jenħtieġ li l-attivitajiet ta’ ġestjoni ta’ kriżijiet tal-BĊE jiġu skattati meta jkun hemm “deterjorament materjali” fil-kundizzjoni finanzjarja ta’ istituzzjoni. Il-Manwal jiddikjara li deterjorament materjali jenħtieġ li jiġi identifikat abbażi tal-inputs li ġejjin:

1. notifika ta’ sitwazzjoni ta’ kriżi potenzjali mill-istituzzjoni nfisha;
2. identifikazzjoni ta’ deterjorament mit-TSK, ibbażata b’mod partikolari fuq osservazzjonijiet li jirriżultaw mis-Sistema ta’ Valutazzjoni tar-Riskju (RAS²⁴) tal-BĊE;
3. monitoraġġ orizzontali imwettaq miis-CRM.

74

In-notifiki ta’ sitwazzjoni ta’ kriżi potenzjali mill-entità sorveljata, sa issa kienu l-eċċezzjoni aktar milli r-regola. Fil-prattika, il-BĊE jidentifika s-sitwazzjonijiet ta’ kriżi matul is-superviżjoni kontinwa tiegħu.

… iżda ma hemmx sett komuni ta’ indikaturi b’sollijiet ċari biex jiddeterminaw id-deterjorament u l-identifikatur ewlieni għandu bosta żvantaġġi …

75

Il-BRRD tirrikjedi li jintużaw setgħat ta’ intervent bikri u setgħat superviżorji oħra meta bank jikser jew, minħabba deterjorament rapidu tal-kundizzjoni finanzjarja li jkun ġie vvalutat fuq il-bażi ta’ sett ta’ skattaturi, x’aktarx jikser ir-rekwiżiti regolatorji bħalma huma l-livelli kapitali. Il-linji gwida tal-EBA għall-użu ta’ miżuri ta’ intervent bikri²⁵ jipprovdu lill-BĊE sett ta’ għodda addizzjonali biex jistabbilixxi jekk il-kundizzjonijiet għall-intervent bikri jkunux ġew issodisfati.

76

Skont il-linji gwida tal-EBA, skattaturi speċifiċi għall-banek biex jivvalutaw jekk intervent bikri għandux jiġi applikat jinkludu, fost l-oħrajn, il-punteġġ SREP, bidliet materjali jew anomaliji identifikati fil-monitoraġġ ta’ indikaturi finanzjarji u mhux finanzjarji ewlenin taħt l-SREP (eż. proporzjonijiet kapitali u tal-likwidità), u avvenimenti sinifikanti b’impatt prudenzjali potenzjali. Jekk l-awtoritajiet kompetenti jagħżlu li jwettqu l-monitoraġġ ta’ indikaturi ewlenin taħt l-SREP, jeħtieġ li, skont l-EBA, jidentifikaw indikaturi u jistabbilixxu sollijiet li jkunu rilevanti għall-ispeċifiċitajiet ta’ istituzzjonijiet individwali jew gruppi ta’ istituzzjonijiet li jikkondividu karatteristiċi simili. Il-kriterji possibbli biex jiġi rikonoxxut deterjorament materjali jinkludu kriterji kwantifikabbli għal nuqqas ta’ rispett probabbli tar-rekwiżiti regolatorji u jistgħu jkunu marbutin mal-iskattaturi tal-pjan ta’ rkupru ta’ istituzzjoni. Dan jgħin biex tiġi żgurata l-effiċjenza operazzjonali tal-ġestjoni tal-identifikazzjoni ta’ kriżijiet u r-rispons għalihom.

77

Il-gwida operazzjonali tal-BĊE dwar l-Intervent Bikri tittratta s-suġġett fil-kuntest tal-SREP. Hija tenfasizza r-rilevanza tal-punteġġ SREP bħala sinjal għal sitwazzjoni ta’ kriżi potenzjali li għandha tiskatta l-valutazzjoni superviżorja dwar jekk hemmx il-ħtieġa li jintużaw is-setgħat ta’ intervent bikri tiegħu. Barra minn hekk, il-gwida tagħmel referenza għal-leġiżlazzjoni applikabbli u għal-linji gwida rilevanti tal-EBA. Il-BĊE jafferma li huwa juża t-tipi kollha ta’ skattaturi msemmija, jiġifieri l-punteġġ SREP, bidliet materjali jew anomaliji ta’ indikaturi ewlenin, u avvenimenti sinifikanti, b’mod partikolari każijiet reali ta’ ksur tar-rekwiżiti minimi regolatorji. Madankollu l-BĊE ma identifikax sollijiet, speċifiċi għall-istituzzjonijiet, li kienu ogħla mir-rekwiżiti minimi li jistgħu jissenjalaw ksur (“probabbli”) potenzjali futur. Fi kliem ieħor, f’din is-sistema in-nuqqas reali ta’ rispett tar-rekwiżit superviżorju huwa indikatur għal intervent bikri. Minbarra dan, il-BĊEma jagħmilx użu sistematiku mill-indikaturi u mill-iskattaturi ta’ rkupru li huwa approva bħala li huma xierqa għall-identifikazzjoni ta’ kriżi għal bank individwali fil-kuntest għall-ippjanar ta’ rkupru, jew mill-elementi oġġettivi li jistgħu jindikaw sitwazzjoni ta’ FOLTF skont il-linji gwida tal-EBA (ara wkoll il-paragrafu 84). F’avvenimenti sinifikanti, il-gwida tal-BĊE ma ġietx speċifikata f’aktar dettall minn dak li jista’ jinstab diġà fil-linji gwida tal-EBA.

78

Għalhekk, l-uniku skattatur sistematiku li l-BĊE għandu għall-ġestjoni operazzjonali tal-attivitajiet tiegħu ta’ ġestjoni ta’ kriżijiet huwa punteġġ SREP kumplessiv li jindika li bank jinsab f’riskju għoli²⁶. Il-punteġġi SREP jiġu stabbiliti biss darba fis-sena permezz tal-proċess SREP annwali f’Settembru. Il-BĊE enfasizza li l-aġġornamenti fil-punteġġi jistgħu jsiru b’mod aktar frekwenti, abbażi tal-monitoraġġ kontinwu tiegħu tal-indikaturi tar-riskju. Ma ġewx ipprovduti eżempji konkreti ta’ punteġġi SREP li kienu għenu biex tiġi identifikata sitwazzjoni li kienet qed tevolvi rapidament jew li fil-fatt kienet ġiet aġġornata f’sitwazzjoni ta’ kriżi. Il-gwida tippromwovi t-twettiq ta’ valutazzjonijiet ta’ intervent bikri fil-kuntest tal-proċess deċiżjonali annwali SREP.

79

In-nuqqas ta’ skattaturi formali ma jfissirx li l-BĊE assolutament mhu qed juża l-ebda valutazzjoni aktar olistika bbażata fuq kriterji inqas formalizzati għall-iskop ta’ identifikazzjoni ta’ kriżijiet. It-TSK jimmonitorjaw regolarment firxa wiesgħa ta’ indikaturi bħala parti mill-SREP għalkemm mhuwiex żgurat li dan isir b’mod konsistenti fit-TSK kollha u mhux il-valutazzjonijiet kollha li jsiru huma suġġetti għal approvazzjoni mill-maniġment. Il-BĊE ma analizzax b’mod komprensiv liema indikaturi jew avvenimenti oħra kkontribwew prinċipalment għall-identifikazzjoni tal-banek li jinsabu kriżi.

… u jeħtieġ li jsir titjib fis-sistemi ta’ monitoraġġ

80

L-iskattaturi tal-pjanijiet ta’ rkupru bbażati fuq rappurtar speċifiku għall-istituzzjoni mhumiex inkorporati fis-sistema tal-IT li tintuża mill-BĊE. Huma jridu jiġu mmonitorjati manwalment minn kull TSK – jekk qatt xi darba jiġu mmonitorjati – u l-każijiet ta’ (kważi) nuqqas ta’ rispett ma jiġux issenjalati awtomatikament. Dan jaffettwa b’mod negattiv l-effiċjenza operazzjonali tal-ġestjoni fl-identifikazzjoni ta’ kriżijiet.

81

Diversi unitajiet tal-BĊE jikkontribwixxu għall-ġestjoni operazzjonali tal-identifikazzjoni ta’ kriżijiet. Huma jipproduċu firxa wiesgħa ta’ materjal li jkun fih informazzjoni rilevanti għall-identifikazzjoni ta’ kriżijiet, inklużi rapporti dwar in-nuqqas ta’ rispett tar-rekwiżiti regolatorji u l-monitoraġġ ta’ livelli kritiċi għal riskji speċifiċi. Madankollu, aħna ma stajniex nistabbilixxu li hemm proċess iddefinit b’mod ċar għall-ġbir, il-valutazzjoni, ir-rappurtar ’il fuq fil-ġerarkija u t-teħid ta’ azzjoni dwar din l-informazzjoni. Lanqas ma stajna niddeterminaw jekk u sa fejn it-TSK jew il-maniġment superjuri jagħmlu użu sistematiku minn dawn ir-rapporti biex jidentifikaw il-kriżijiet.

82

Barra minn hekk, aħna ma nstabet l-ebda evidenza li tagħti x’tifhem li hemm sistemi ta’ informazzjoni maniġerjali li jissenjalaw deterjorament materjali jekk it-TSK jonqsu milli jidentifikaw u/jew jirrappurtaw każijiet ta’ dan it-tip. Lanqas ma hemm xi proċess speċifiku biex jiżgura li f’każ ta’ nuqqas ta’ rispett tar-rekwiżiti regolatorji, it-TSK responsabbli jivverifika jekk ikunx seħħ deterjorament materjali tal-kundizzjoni finanzjarja jew jekk tinħtieġx valutazzjoni FOLTF.

83

B’mod partikolari, aħna sibna defiċjenzi fil-proċess ta’ monitoraġġ tal-każijiet ta’ nuqqas ta’ rispett tal-indikaturi tal-pjanijiet ta’ rkupru. Madankollu, monitoraġġ effiċjenti jtejjeb il-kapaċità operazzjonali li tiġi identifikata kriżi potenzjali i stadju bikri. Il-każijiet ta’ nuqqas ta’ rispett ġew irrappurtati mill-banek b’dewmien ta’ mill-anqas erba’ ġimgħat²⁷ f’aktar minn 40 % tal-każijiet. Dawn il-każijiet ta’ nuqqas ta’ rispett kienu jikkonċernaw l-indikaturi kapitali (bejn wieħed u ieħor 30 %), indikaturi tal-profittabilità (26 %), indikaturi tal-kwalità tal-assi (17 %) u, f’livell inqas, indikaturi tal-likwidità u dawk ibbażati fuq is-suq.

84

Barra minn hekk, kien hemm evidenza li tagħti x’tifhem li t-TSK ma jaderixxux mal-proċessi ta’ ġestjoni ta’ kriżijiet tal-BĊE fil-każijiet kollha. Pereżempju, xi każijiet ta’ nuqqas ta’ rispett tal-indikaturi tal-pjanijiet ta’ rkupru ma ġewx irrappurtati, kif suppost kellu jsir, lis-CRM. Aħna ma stajniex nikkonfermaw li l-attivitajiet ta’ ġestjoni ta’ kriżijiet, bħall-valutazzjonijiet formali ta’ intervent bikri, tqiesu anke f’każijiet ta’ nuqqas ta’ rispett ta’ regoli regolatorji importanti, għalkemm ġejna infurmati li f’għadd ta’ każijiet li ġew ikkunsidrati, diġà kienu ġew stabbiliti miżuri superviżorji jew ta’ intervent bikri biex jimmitigaw il-problema li kienet qed tinħoloq.

85

Lanqas ma kien hemm xi evidenza ta’ approċċ sistematiku biex jiġi żgurat li l-impatti mikroprudenzjali potenzjali tal-iżviluppi makroekonomiċi u l-akkumulazzjoni tar-riskju sistemiku jittieħdu inkunsiderazzjoni sabiex tiżdied l-effiċjenza tal-identifikazzjoni ta’ kriżijiet. Il-funzjonijiet superviżorji u monetarji tal-BĊE jiskambjaw informazzjoni dwar l-iżviluppi makro- u mikroprudenzjali. Madankollu, aħna ma rajna l-ebda evidenza li dawn l-iżviluppi jittieħdu speċifikament inkunsiderazzjoni mill-BĊE fis-superviżjoni tiegħu, pereżempju permezz tal-klassifikazzjoni ta’ ċerti fatturi ta’ riskju fir-RAS, jew li jiġu sistematikament ivvalutati fl-SREP. Lanqas ma ntwerejna xi proċess għas-segwitu sistematiku ta’ riskji sistemiċi identifikati mill-BERS jew korpi makroprudenzjali oħra.

86

In-nuqqas ta’ monitoraġġ ċentralizzat tal-indikaturi għandu wkoll il-potenzjal li jkollu impatt negattiv fuq l-effiċjenza tal-maniġment. Ma stajniex insibu evidenza li s-sistemi ta’ informazzjoni maniġerjali tal-BĊE jipprovdu lill-maniġment superjuri ħarsa ġenerali komprensiva u aġġornata tal-istituzzjonijiet kollha taħt ġestjoni ta’ kriżi. Sett ta’ data ta’ dan it-tip jassisti lill-maniġment fit-twettiq tal-kompiti tiegħu u għaldaqstant jikkontribwixxi għall-effiċjenza operazzjonali. Ma hemmx sistema ta’ “rapport fuq bażi ta eċċezzjoni” biex jiġi żgurat li l-informazzjoni tiġi awtomatikament skalata għal-livelli ġerarkiċi xierqa jekk tkun tissodisfa l-kriterji predefiniti. Ma jidhirx li ġie stabbilit proċess ta’ segwitu ddefinit b’mod ċar.

87

Skont rapport tal-awditjar intern, it-TSK ma jagħmlux użu effiċjenti mis-sistema ta’ segwitu tal-BĊE għas-superviżjoni kontinwa, u s-segwitu li ngħata għall-maġġoranza l-kbira tar-rekwiżiti fid-deċiżjonijiet tal-bord superviżorju lanqas biss ġie dokumentat (għal kampjun meħud minn awditu intern, 81 % tal-każijiet ma ġewx irreġistrati fis-sistema u għal 17 % ma kienx hemm dokumentazzjoni tal-azzjoni relatata).

Hija fuq kollox ir-responsabbiltà tat-timijiet superviżorji li jiddeċiedu meta għandhom iwettqu valutazzjonijiet ta’ intervent bikri u kif jippreżentawhom

88

L-evidenza li kisbna rigward l-effiċjenza tal-ġestjoni operazzjonali, mill-BĊE, għall-identifikazzjoni ta’ kriżijiet la kienet suffiċjenti u lanqas rappreżentattiva. Madankollu, hija ġibdet l-attenzjoni għal ċerti dgħufijiet fit-tfassil.

89

Mid-dokumentazzjoni u l-intervisti aħna sibna li valutazzjonijiet ta’ intervent bikri jitwettqu prinċipalment fil-kuntest tal-eżerċizzju SREP annwali, jiġifieri fl-istess żmien kull sena. Fil-prinċipju, jenħtieġ li l-valutazzjonijiet formali bikrin jiġu skattati wkoll wara li jseħħu avvenimenti sinifikanti matul sena partikolari. Il-BĊE sostna li huwa minnu li każijiet bħal dawn iseħħu, iżda dawn ma kinux evidenti fil-kampjun tagħna. Fil-fatt, ibbażat fuq l-evidenza limitata għad-dispożizzjoni tagħna jidher li, f’xi każijiet regolatorji, każijiet apparentement importanti ta’ nuqqas ta’ rispett ma wasslux għal eżerċiżżji ta’ valutazzjoni formali ta’ intervent bikri li kienu separati mill-proċess SREP, għalkem, dan ma jeskludix il-possibbiltà li l-BĊE, minkejja dan, qies il-possibbiltà li jieħu miżuri superviżorji jew ta’ intervent bikri li kienu xierqa.

90

Kif meħtieġ mil-linji gwida tal-EBA u l-gwida tal-BĊE, il-valutazzjonijiet ta’ intervent bikri li l-BĊE pprovdielna kienu ġeneralment jinkludu dikjarazzjonijiet dwar jekk ir-rekwiżiti regolatorji kinux inkisru jew kienx probabbli li jinkisru. Il-każijiet kollha kienu relatati ma’ nuqqas ta’ rispett (jew nuqqas ta’ rispett probabbli) tar-rekwiżiti kapitali u l-ebda wieħed minnhom ma kien relatat ma’ nuqqas ta’ rispett (jew nuqqas ta’ rispett probabbli) tar-rekwiżiti tal-likwidità. Ma kienx hemm referenza għal każijiet ta’ ksur ta’ rekwiżiti regolatorji oħra, partikolarment dgħufijiet serji identifikati fil-qafas tal-governanza u ta’ ġestjoni tar-riskju tal-istituzzjoni matul is-superviżjoni kontinwa tal-BĊE, u ma kienx hemm referenza sistematika għal każijiet preċedenti ta’ nuqqas ta’ konformità.

91

B’mod ġenerali, aħna ma stajniex nistabbilixxu li s-sejbiet superviżorji kollha rilevanti huma riflessi fid-dokumenti tal-valutazzjonijiet formali ta’ intervent bikri. Il-konklużjonijiet li ġew ippreżentati lilna dwar il-każijiet ta’ nuqqas ta’ rispett jew nuqqas ta’ rispett probabbli kienu bbażati prinċipalment fuq iċ-ċifri u l-projezzjonijiet irrappurtati mill-banek, anke f’każijiet fejn, il-BĊE kellu evidenza li ċ-ċifri rrappurtati kienu kontroversjali, għalkemm aħna nifhmu li, f’xi każijiet, dan seta’ ġie mmitigat minn analiżijiet tas-sensittività li kienu jindikaw sensiela ta’ eżiti possibbli għall-bank inkwistjoni, jew azzjonijiet oħra.

Rispons għall-kriżijiet

92

Meta bank jiġi identifikat bħala li jinsab fi kriżi, it-TSK huma mistennija li jżidu l-iskrutinju superviżorju tagħhom u huma mistennija li jiddeterminaw ir-rispons xieraq f’koordinazzjoni mill-qrib mas-CRM. Dan jinkludi l-proposti għall-użu ta’ setgħat ta’ intervent bikri u setgħat superviżorji oħra u, skont is-severità tal-kriżi, jista’ jinvolvi t-twettiq ta’ valutazzjoni FOLTF.

In-natura u l-punt sa fejn l-attività superviżorja intensifikata jiġu ddefiniti minn kull TSK

93

Il-BĊE ma taniex evidenza ta’ xi gwida formali li tikkonċerna t-titjib tal-iskrutinju superviżorju (kif, sa fejn u b’liema għażliet). Aħna ġejna infurmati li l-prattika normali hija li tiżdied l-interazzjoni mal-maniġment superjuri ta’ bank u li jintalab rappurtar aktar frekwenti u dettaljat qabel l-iskattar formali tal-attivitajiet ta’ ġestjoni ta’ kriżijiet.

Ġew stabbiliti għodod ta’ monitoraġġ tal-likwidità …

94

Id-disponibbiltà ta’ data kompleta u aġġornata dwar il-likwidità hija essenzjali għall-effiċjenza operazzjonali fil-ġestjoni ta’ bank li jinsab fi kriżi. Għalhekk, il-BĊE fassal mudell ta’ rappurtar tal-likwidità biex il-banek ikunu jistgħu jużawh f’sitwazzjonijiet ta’ kriżi. Dan ikopri l-għoti ta’ informazzjoni ewlenija dwar il-finanzjament u l-likwidità. Barra minn hekk, l-istituzzjonijiet jiġu mitluba jagħtu l-valutazzjoni proprja tagħhom u jispjegaw l-aspettattivi tagħhom.

95

Madankollu, il-banek mhumiex meħtieġa jikkondividu s-suppożizzjonijiet ta’ bażi. Difett potenzjali ieħor huwa l-fatt li d-data tinġabar biss fil-livell tal-grupp, li jista’ jfisser li kriżi fil-livell sussidjarju tista’ xxekkel l-utlità tagħha fl-għoti ta’ informazzjoni kritika meħtieġa mill-BĊE biex jimmaniġġja s-sitwazzjoni b'mod effiċjenti.

… iżda biex il-proċess ikun operazzjonalment effiċjenti, jeħtieġ li jikkwantifika t-telf imġarrab jew probabbli

96

L-identifikazzjoni u l-valutazzjoni tal-impatt tal-iżviluppi negattivi fuq l-ekwità huma daqstant ieħor importanti għall-ġestjoni operazzjonalment effiċjenti ta’ kriżijiet. Billi l-intervent bikri għandu l-għan li jistabbilixxi mill-ġdid il-vijabbiltà ta’ bank, jeħtieġ li tiġi żviluppata idea tat-telf mhux rikonoxxut u probabbli kif ukoll ta’ fatturi oħra li għadhom mhumiex riflessi fiċ-ċifri tal-bank. Abbażi ta’ evidenza li ġiet ippreżentata lilna, aħna ma nistgħux nikkonfermaw li hemm proċess effiċjenti, li jinkludi gwida għat-TSK, biex jiżgura li l-kobor ta’ problema partikolari jiġi stmat qabel ma l-miżuri ta’ rispons għall-kriżi jiġu kkunsidrati. Id-deskrizzjoni tal-proċess tal-BĊE lanqas ma tirrifletti l-ħtieġa li jiġi kkunsidrat jekk il-banek għandhomx jiġu mitluba japplikaw politika speċifika ta’ proviżjonament fir-rigward tal-fondi proprji tagħhom jew li jiġi rinforzat ir-rekwiżit tal-Pilastru 2 fuq il-bażi ta’ valutazzjoni kwantifikata f’każijiet bħal dawn barra mill-proċess deċiżjonali annwali SREP.

97

Il-ġestjoni ta’ sitwazzjoni ta’ kriżi tirrikjedi wkoll informazzjoni aktar approfondita. Il-BĊE għandu għodda standard għall-monitoraġġ ta’ self improduttiv (NPLs) li tagħti ċertu idea. Skont il-linji gwida tal-EBA, fejn il-punteġġ SREP l-aktar baxx ikun ikkombinat ma’ preokkupazzjonijiet dwar il-kwalità tal-assi, jenħtieġ li l-BĊE jikkunsidra li jiġbor informazzjoni għall-valwazzjoni tal-assi ta’ bank, inkluż permezz ta’ spezzjonijiet fuq il-post fil-kuntest tal-valutazzjoni ta’ intervent bikri. Madankollu, aħna ma sibniex evidenza ta’ proċedura ta’ dan it-tip fil-BĊE. Fil-każijiet li fihom ikun meħtieġ teħid ta’ deċiżjonijiet urġenti, in-nuqqas ta’ informazzjoni bħal din jista’ jaffettwa b’mod negattiv l-effiċjenza tal-operazzjonijiet ta’ ġestjoni.

98

Il-BĊE għandu għadd limitat ta’ timijiet ta’ spezzjoni fuq il-post li huma faċilment disponibbli biex iwettqu analiżi dettaljata tal-kwalità tal-assi għall-banek li jinsabu fi kriżi. Anke fejn TSK ikun identifika problemi fil-portafoll tal-assi, il-proċess regolari ta’ spezzjoni fuq il-post jista’ jdum sena. Dan jillimita l-kapaċità operazzjonali tal-BĊE li jirreaġixxi rapidament għall-kriżi.

99

Ċerti banek għandhom punteġġ SREP għoli minħabba rata għolja ta’ NPLs jew problemi oħra relatati mal-kwalità tal-assi identifikati permezz ta’ eżerċizzji speċifiċi mwettqa mill-BĊE. Il-maniġment tal-BĊE ma għandux informazzjoni fil-qosor dwar il-punt sa fejn dawn il-problemi ġew ivvalutati permezz ta’ spezzjonijiet fuq il-post jew mezzi oħra, u ma għandux roċess prospettiv għall-ġbir ta’ informazzjoni b’dan il-mod.

Tinħtieġ aktar gwida dwar is-setgħat legali u l-miżuri prattiċi …

100

Biex jiżgura l-effiċjenza operazzjonali tal-ġestjoni tar-rispons tiegħu għall-kriżijiet, il-BĊE jeħtieġ:

1. fehim ċar tas-setgħat legali għad-dispożizzjoni tiegħu u gwida dwar l-użu tagħhom;
2. fehim ċar tal-firxa ta’ miżuri prattiċi disponibbli fi kwalunkwe xenarju partikolari;
3. mezz biex jiġi żgurat li s-sejbiet mill-valutazzjoni tal-pjanijiet ta’ rkupru jittieħdu debitament inkunsiderazzjoni;
4. gwida, għodod u taħriġ.

101

L-ewwel prerekwiżit għal ġestjoni operazzjonalment effiċjenti ta’ kriżijiet huwa fehim ċar tas-setgħat li l-BĊE għandu għad-dispożizzjoni tiegħu u l-kundizzjonijiet legali għall-użu tagħhom. Il-BĊE għandu proċeduri ġenerali għall-użu tas-setgħat superviżorji li jinkludu wkoll l-impożizzjoni ta’ miżuri f’sitwazzjoni ta’ kriżi. Huwa għandu wkoll abbozz ta’ mudell ta’ deċiżjoni u lista ta’ kontroll bil-mistoqsijiet li jridu jiġu koperti meta titwettaq valutazzjoni ta’ intervent bikri. Madankollu, dawn ma jipprovdux lis-superviżuri individwali gwida dwar l-użu tal-ġudizzju superviżorju tagħhom f’sitwazzjoni ta’ kriżi.

102

Barra minn hekk, hemm għadd ta’ sfidi speċifiċi għall-infurzar tal-qafas regolatorju f’sitwazzjoni ta’ kriżi. Il-formulazzjoni tar-Regolament MSU u tal-BRRD mhijiex konsistenti, hemm duplikazzjonijiet possibbli, u ma hemmx ġerarkija ċara bejn il-miżuri individwali. Barra minn hekk, hemm riskju li d-differenzi fil-mod kif il-BRRD ġiet trasposta fil-leġiżlazzjoni nazzjonali tal-pajjiżi parteċipanti aggravaw l-inkonsistenzi eżistenti. Ladarba dawn l-isfidi kienu ġew identifikati, il-BĊE wettaq stħarriġ tal-ANK fil-bidu tal-2016 u wara rrapporta lill-Kummissjoni l-konklużjoni li jenħtieġ li l-leġiżlazzjoni tikkjarifika aktar l-intervent bikri u r-rabta tiegħu mal-miżuri superviżorji regolari sabiex jiġi żgurat l-użu effiċjenti tiegħu. Madankollu, b’riżultat ta’ dan, l-ebda proċess jew gwida ma ġew żviluppati biex jgħinu lill-persunal tal-BĊE jaffaċċja l-isfidi identifikati.

103

Il-BĊE ma kkompilax lista komprensiva ta’ azzjonijiet speċifiċi li jistgħu jittieħdu f’ċirkustanzi speċifiċi, u s-setgħat legali li jistgħu jkunu bbażati fuqhom. Barra minn hekk, il-BĊE ma analizzax liema miżuri ta’ intervent bikri jew miżuri oħra huma l-aktar adatti għall-użu. Dan iżid ir-riskju li l-miżuri xierqa jistgħu ma jittiħdux. Dawn il-fatturi jippermettu li jsir titjib fil-konsistenza tat-teħid ta’ deċiżjonijiet mill-BĊE dwar l-eżerċizzju tiegħu ta’ dawn is-setgħat, u b’hekk tittejjeb l-effiċjenza operazzjonali fil-mod kif il-proċess jiġi mmaniġġjat. Dan jaffettwa b’mod negattiv l-effiċjenza operazzjonali fil-ġestjoni tiegħu tal-kapaċità ta’ rispons.

104

Ma hemmx evidenza ta’ proċedura li tiżgura li s-sejbiet li ttieħdu mill-valutazzjoni tal-pjanijiet ta’ rkupru li jikkonċernaw l-istudji tal-kredibbiltà u tal-fattibbiltà tal-banek qed jintużaw.

…. dwar il-monitoraġġ tal-implimentazzjoni ta’ miżuri superviżorji …

105

Meta jiġu imposti miżuri superviżorji, it-TSK huma mistennija li jimmonitorjaw l-implimentazzjoni tagħhom u jivvalutaw ir-riżultati. Ma hemmx gwida operazzjonali speċifika tal-BĊE f’dan ir-rigward. Pereżempju, ma hemmx deskrizzjoni espliċita tal-frekwenza tal-aġġornamenti meħtieġa, liema miżuri jkunu jeħtieġu monitoraġġ aktar intensiv, jew żieda fl-estensjoni tad-dati ta’ skadenza.

106

Rapport tal-awditjar intern ġibed l-attenzjoni għal dgħufijiet sinifikanti fis-sistema ġenerali għall-monitoraġġ ta’ miżuri jew rekwiżiti superviżorji previsti għall-mitigazzjoni tar-riskji, li ġew stabbiliti fis-superviżjoni kontinwa (ara l-paragrafu 87), u dan iqajjem dubji dwar in-natura sistematika tas-segwitu.

… dwar iċ-ċarezza tal-gwida dwar il-valutazzjonijiet FOLTF

107

Jekk is-sitwazzjoni tkompli tiddeterjora, pereżempju minħabba li l-miżuri jirriżultaw li ma jkunux effettivi, il-BĊE jista’ jkollu jwettaq valutazzjoni FOLTF tal-bank inkwistjoni. L-Artikolu 32(4) tal-BRRD jelenka ċ-ċirkustanzi li fihom jenħtieġ li bank jitqies bħala FOLTF. Linja gwida tal-EBA dwar il-valutazzjonijiet FOLTF tistipula għadd ta’ elementi oġġettivi li fuqhom jenħtieġ li tiġi bbażata din id-deċiżjoni superviżorja.

108

Il-BĊE pproduċa l-gwida interna proprja tiegħu dwar l-implimentazzjoni ta’ din il-linja gwida. Madankollu, l-ambitu tagħha huwa ferm aktar strett u hija ferm inqas dettaljata mil-linja gwida oriġinali. B’mod partikolari, ma jiġux indirizzati l-elementi oġġettivi li l-linji gwida tal-EBA jsemmu għall-iskop tal-valutazzjoni, u ma hemmx struzzjonijiet għall-persunal dwar kif dawn iridu jintużaw²⁸. Fil-fehma tagħna, il-BĊE jonqos ukoll milli jidentifika każijiet potenzjali ta’ nuqqas ta’ rispett tal-arranġamenti ta’ governanza korporattiva li, skont il-linji gwida tal-EBA, jenħtieġ li jiġu kkunsidrati f’dan ir-rigward.

109

Minħabba li l-gwida interna tal-BĊE hija intenzjonata li tispjega r-rekwiżiti tal-linji gwida tal-EBA minn perspettiva operazzjonali iżda ma tagħmilx dan bis-sħiħ, it-tfassil tal-proċess biex jiġu mmaniġġjati l-valutazzjonijiet FOLTF ma jistax jitqies li huwa operazzjonalment effiċjenti bis-sħiħ.

… u dwar l-attivitajiet ta’ taħriġ u l-eżerċizzji ta’ simulazzjoni biex isir titjib fl-effiċjenza operazzjonali tal-ġestjoni

110

Is-CRM organizzat taħriġ dwar il-ġestjoni ta’ kriżijiet, u l-feedback ġenerali mill-parteċipanti kien pożittiv. Madankollu, aktar enfasi kien imissha saret fuq it-taħriġ dwar il-qafas ta’ intervent bikri. Il-parteċipazzjoni tal-persunal tal-ANK f’ċerti TSK kienet fqira f’oqsma relatati mal-ġestjoni ta’ kriżijiet. Barra minn hekk, il-BĊE ma stabbiliex sessjonijiet strutturati ta’ feedback mat-TSK biex jidentifika ħtiġijiet ta’ taħriġ minbarra dawk imsemmija hawn fuq.

111

Bħala parti mit-tħejjija għall-kriżijiet, id-Diviżjoni tas-CRM hija responsabbli, f’kooperazzjoni mill-qrib mal-ANK, milll-organizzazzjoni ta’ eżerċizzji ta’ simulazzjoni tal-ġestjoni ta’ kriżijiet. Madankollu, sa issa, l-ebda eżerċizzju ta’ dan it-tip ma kopra l-istadji bikrija ta’ kriżi potenzjali jew il-fażi ta’ intervent bikri. Ma kienx hemm dokumentazzjoni li kienet tindika li l-BĊE fassal metodoloġija jew gwida speċifiċi f’dan ir-rigward, jew li qed jippjana li jagħmel dan fil-futur qrib.

Jeħtieġ li jsir titjib fid-dokumentazzjoni tar-rispons għall-kriżijiet fil-valutazzjonijiet ta’ intervent bikri

112

Fil-fatt, il-BĊE pprovdielna dokumentazzjoni u informazzjoni li tatna idea preċiża dwar il-proċessi rilevanti fir-rigward tal-ġestjoni ta’ proċessi ta’ intervent bikri, iżda b’limitazzjonijiet u redazzjonijiet. B’riżultat ta’ dan, aħna ma nistgħux nisiltu konklużjoni kumplessiva biex nikkonfermaw li l-BĊE stabbilixxa proċess ta’ ġestjoni operazzjonalment effiċjenti biex jiżgura li huwa juża s-setgħat ta’ intervent bikri skont il-qafas regolatorju u l-linji gwida rilevanti tal-EBA. Madankollu, aħna ltqajna ma’ każijiet fejn il-gwida operazzjonali tal-BĊE għall-valutazzjonijiet ta’ intervent bikri ma ġietx rispettata.

113

L-evidenza ma kinitx tinkludi eżempji ta’ eżaminar tal-awtorità legali għal miżura proposta, sew jekk skont ir-Regolament MSU jew skont il-leġislazzjoni nazzjonali, kif meħtieġ mill-gwida tal-BĊE. Skont informazzjoni miksuba, dan l-eżaminar se jitwettaq f’dokumenti li ma ġewx ippreżentati lilna.

114

Il-valutazzjonijiet ta’ intervent bikri li ġew ippreżentati lilna lanqas ma kien fihom xi eżaminar tal-miżuri disponibbli bħala parti minn proċess operazzjonalment effiċjenti biex jintgħażlu dawk l-aktar xierqa fosthom. Fil-biċċa l-kbira tal-każijiet, ma kienx ċar mill-valutazzjoni nfisha kif il-miżura proposta se tindirizza l-każijiet ta’ ksur jew il-każijiet ta’ ksur probabbli.

115

Il-gwida operazzjonali tal-BĊE dwar il-miżuri ta’ intervent bikri tiddikjara li jenħtieġ li jiġi kkunsidrat jekk miżura kinitx meħtieġa, adatta u adegwata. Dawn l-aspetti ma ġewx ivvalutati fl-evidenza li ġiet ippreżentata lilna. Lanqas ma twettaq eżaminar tal-miżuri preċedenti, anke fejn dawn kienu simili għall-proposti l-ġodda. Dan imur kontra rekwiżit espliċitu fil-gwida tal-BĊE.

116

Id-dokumenti li ġew pprovduti lilna ma spjegawx b’mod ċar u b’mod espliċitu għalfejn it-TSK kkunsidraw il-fatt li l-miżuri proposti kienu se jindirizzaw id-dgħufijiet identifikati fi żmien raġonevoli. Barra minn hekk, aħna lanqas ma sibna xi evidenza li l-BĊE kien ikkunsidra espliċitament azzjonijiet ta’ rkupru jew miżuri oħra speċifikati fi pjan ta’ rkupru f’dan ir-rigward, jew li kien lest li jiġbed l-attenzjoni għal każijiet fejn huwa ħass li l-ebda waħda mill-għażliet ta’ rkupru li ġew proposti ma setgħet tindirizza l-problema.

117

Fil-biċċa l-kbira tal-każijiet baqa’ mhux ċar jekk il-BĊE kienx fil-fatt ipprova jikkwantifika l-kobor ta’ problema identifikata qabel ir-rispons tiegħu għall-kriżi. B’mod partikolari, ma kienx hemm proċedura biex l-ispezzjonijiet fuq il-post jiġu mmirati lejn il-kwantifikazzjoni tal-impatt ta’ telf mhux rikonoxxut u probabbli kif ukoll ta’ fatturi oħra li jkunu għadhom ma ġewx riflessi fiċ-ċifri ta’ bank. Il-valutazzjonijiet li eżaminajna ma kinux ċari dwar jekk in-nuqqas ta’ rispett jew in-nuqqas ta’ rispett probabbli setax jiġi indirizzat b’mod f’waqtu mill-miżuri proposti, għalkemm dan huwa rekwiżit espliċitu fil-gwida tal-BĊE.

118

Fuq il-bażi tal-evidenza li eżaminajna, aħna ma stajniex nikkonfermaw li l-BĊE jimmonitorja b’mod effiċjenti l-implimentazzjoni tal-miżuri ta’ intervent bikri. B’mod partikolari, ma stajniex nistabbilixxu jekk hemmx segwitu rapidu, fil-forma ta’ miżuri addizzjonali jew fil-forma ta’ valutazzjoni FOLTF, kif previst fil-proċessi ta’ ġestjoni ta’ kriżijiet tal-BĊE.

119

L-evidenza pprovduta ippermettitilna biss li nawditjaw aspetti magħżula tal-effiċjenza operazzjonali tar-rispons tal-BĊE għall-kriżijiet. Aħna konna limitati għal dokumenti li l-BĊE għażel li jipprovdilna, u dawn ma kinux suffiċjenti għalina biex naslu għal konklużjoni kumplessiva dwar l-implimentazzjoni tal-proċessi operazzjonali tal-ġestjoni ta’ kriżijiet.

Konklużjonjiet u rakkomandazzjonijiet

120

Fir-rwol superviżorju tiegħu, il-BĊE stabbilixxa qafas sostanzjali għall-proċeduri ta’ ġestjoni ta’ kriżijiet, madankollu, għadu jeħtieġ li jsir titjib sinifikanti:

1. L-istruttura organizzattiva hija sodisfaċenti u tiżgura li, b’mod ġenerali, hemm fluss adegwat ta’ informazzjoni fi ħdan il-BĊE. Il-proċessi għall-kooperazzjoni u l-koordinazzjoni esterni jistgħu jittejbu.
2. Aħna identifikajna xi difetti fil-qafas operazzjonali għall-ġestjoni ta’ kriżijiet kif ukoll sinjali ta’ implimentazzjoni ineffiċjenti li huma deskritti f’aktar dettall fil-konklużjonijiet li ġejjin.

Struttura organizzattiva

121

L-istruttura organizzattiva hija sodisfaċenti, minkejja dgħufijiet fil-fażi tal-ippjanar inizjali (il-paragrafi 17 sa 23). B’mod ġenerali, ir-reklutaġġ għas-CRM kien effiċjenti (il-paragrafi 24 sa 25). Il-BĊE attwalment ma għandux proċeduri biex jivvaluta mill-ġdid il-ħtiġijiet tal-persunal u biex jiskjera mill-ġdid il-persunal għat-TSK li jkunu qed jiffaċċjaw sitwazzjoni ta’ kriżi (il-paragrafu 25).

Kooperazzjoni u koordinazzjoni fir-rigward tal-ġestjoni ta’ kriżijiet

122

L-istabbiliment tal-koordinazzjoni u l-kooperazzjoni ma' awtoritajiet oħra għadu mhuwiex komplet. Hemm biss gwida operazzjonali limitata biex jiġi żgurat li, f’sitwazzjoni ta’ kriżi, it-TSK ikunu jistgħu jimmaniġġjaw il-kompiti tagħhom relatati mal-kulleġġi superviżorji b’mod konsistenti u effiċjenti (il-paragrafi 29 sa 31). Barra minn hekk, għad ma hemmx qafas intern ta’ regoli għas-superviżjoni supplimentari tal-konglomerati finanzjarji (il-paragrafu 32).

123

Il-kooperazzjoni tal-BĊE mal-SRB hija bbażata fuq il-kondiviżjoni u l-iskambju ta’ informazzjoni rilevanti għat-twettiq tal-kompiti tagħhom. L-SRB jirċievi aċċess għal ġabra aktar ġenerali ta’ informazzjoni fil-fażi ta’ intervent bikri, meta jitqies li jkun xieraq mill-BĊE jew kull meta dan jintalab mill-SRB. Madankollu, il-livell ta’ informazzjoni li hija disponibbli ma jiżdiedx awtomatikament meta l-kundizzjoni finanzjarja ta’ bank tiddeterjora (il-paragrafi 34 sa 39).

Rakkomandazzjoni 1

Jenħtieġ li l-BĊE jtejjeb il-kooperazzjoni tiegħu ma’ atturi esterni billi:

1. ikompli bl-isforzi tiegħu biex jikkonkludi d-WCCAs għall-kulleġġi superviżorji kollha li għalihom il-BĊE huwa s-superviżur konsolidanti, u jtejjeb l-iskambju ta’ informazzjoni mal-SRB. Jenħtieġ li dan tal-aħħar jiġi indirizzat fil-proċess attwali ta’ reviżjoni tal-memorandum ta’ qbil bejn iż-żewġ istituzzjonijiet.
2. jadotta qafas intern għas-superviżjoni supplimentari tal-FICOs.

Data mmirata għall-implimentazzjoni: ir-raba’ trimestru tal-2018.

Ippjanar ta’ rkupru

124

Il-BĊE fassal proċeduri xierqa ta’ monitoraġġ intern għall-proċess ta’ valutazzjoni tal-pjanijiet ta’ rkupru (il-paragrafu 51) u stabbilixxa kronoloġija konsistenti għall-preżentazzjoni tal-pjanijiet ta’ rkupru (il-paragrafu 47). Għad baqa’ xi sfidi inerenti fil-kuntest tal-kulleġġi superviżorji (il-paragrafi 48 sa 49). Il-valutazzjoni tal-pjanijiet tista’ tinvolvi esperti nazzjonali, li jistgħu jfissru riskji għall-governanza (il-paragrafu 50). Ġiet ipprovduta gwida suffiċjenti dwar il-biċċa l-kbira mill-aspetti, bl-eċċezzjoni ta’ indikaturi tal-ippjanar ta’ rkupru (il-paragrafi 51 sa 54). Il-BĊE ħaddem ir-rekwiżiti legali kollha f’għodda ta’ valutazzjoni effiċjenti, iżda ma sibna l-ebda rapport ta’ sinteżi addizzjonali u l-ebda proċedura sistematika għall-użu ta’ valutazzjonijiet fis-superviżjoni kontinwa tal-kompiti ta’ identifikazzjoni u ġestjoni ta’ kriżijiet (il-paragrafi 55 sa 61). B’mod ġenerali, il-feedback li wasal mill-entitajiet sorveljati kien pożittiv (il-paragrafi 62 sa 64). Madankollu, minħabba l-limitazzjonijiet tad-dokumentazzjoni li stajna niksbu, ma nistgħux nisiltu konklużjonijiet dwar l-effiċjenza operazzjonali tal-proċess ta’ valutazzjoni tal-pjanijiet ta’ rkupru fil-prattika (il-paragrafi 65 sa 66).

Rakkomandazzjoni 2

Għall-ippjanar ta’ rkupru, jenħtieġ li l-BĊE:

1. itejjeb il-konsistenza tal-approċċ tiegħu fir-rigward ta’ banek b’mudelli kummerċjali simili u/jew li joperaw f’ġurisdizzjonijiet komuni permezz ta’ gwida addizzjonali, inkluż għall-kalibrazzjoni tal-indikaturi.
2. jimmira outputs addizzjonali fil-forma ta’ rapporti ta’ sinteżi u jagħmel arranġamenti għat-TSK biex jużaw b’mod sistematiku l-valutazzjonijiet tal-pjanijiet ta’ rkupru fl-identifikazzjoni u l-ġestjoni ta’ kriżijiet.

Data mmirata għall-implimentazzjoni: ir-raba’ trimestru tal-2018.

Identifikazzjoni ta’ kriżijiet

125

Il-gwida attwali dwar l-identifikazzjoni ta’ kriżijiet mhijiex żviluppata biżżejjed u ma tispeċifikax kriterji oġġettivi li jkunu jikkontribwixxu għall-effiċjenza operazzjonali tal-ġestjoni (il-paragrafi 67 sa 72). Ġew stabbiliti proċeduri ta’ identifikazzjoni ta’ kriżijiet, iżda ma hemmx sett ta’ indikaturi b’sollijiet ċari biex jiġi ddeterminat id-deterjorament ta’ entità sorveljata. Dan ukoll jaffettwa b’mod negattiv l-effiċjenza operazzjonali tal-ġestjoni ta’ kriżijiet (il-paragrafi 73 sa 79). L-effiċjenza operazzjonali tal-ġestjoni, mill-BĊE, tal-identifikazzjoni ta’ kriżijiet hija barra minn hekk affettwata mill-fatt li l-valutazzjonijiet ta’ intervent bikri jitwettqu prinċipalment fil-kuntest taċ-ċiklu annwali tal-SREP, u mhux bħala reazzjoni għall-evidenza ta’ deterjorament materjali fil-kundizzjoni finanzjarja ta’ bank, (il-paragrafi 89 sa 91), u d-dokumentazzjoni ta’ bażi ma tikkonformax kompletament mal-elementi stabbiliti fil-gwida eżistenti.

Rakkomandazzjoni 3

Jenħtieġ li l-BĊE:

1. ikompli jiżviluppa l-gwida tiegħu dwar il-valutazzjonijiet ta’ intervent bikri u jiddefinixxi sett ta’ indikaturi b’sollijiet ċari biex jiġi ddeterminat id-deterjorament potenzjali fil-kundizzjoni finanzjarja ta’ bank, billi jagħmel użu minn xi wħud mill-indikaturi u l-iskattaturi li ġew ivvalutati bħala adatti fil-kuntest tal-valutazzjoni tal-pjan ta’ rkupru tal-bank ikkonċernat, u jorbothom ma’ proċessi ċari ta’ eskalazzjoni biex jippermetti l-użu operazjonalment effiċjenti tal-informazzjoni disponibbli;
2. jippromwovi l-użu rapidu u sistematiku tal-valutazzjonijiet ta’ intervent bikri hekk kif ikun hemm evidenza ta’ deterjorament materjali fil-kundizzjoni finanzjarja ta’ bank;
3. jenfasizza l-aċċertament tal-kwalità tal-valutazzjonijiet ta’ intervent bikri sabiex jiġi żgurat li l-proċessi u l-gwida interni tiegħu jkunu qed jiġu segwiti.

Data mmirata għall-implimentazzjoni: it-tieni trimestru tal-2018.

126

Il-BĊE ma għandux proċeduri u sistemi ddefiniti b’mod ċar għall-ġbir, il-valutazzjoni, ir-rappurtar ’il fuq fil-ġerarkija u t-teħid ta’ azzjoni b’mod komprensiv dwar l-ammont kbir ta’ informazzjoni li għandu għad dispożizzjoni tiegħu, u l-monitoraġġ u s-segwitu ċentralizzati tiegħu tas-sejbiet mhumiex sistematikament dokumentati (il-paragrafi 80 sa 86).

Rakkomandazzjoni 4

Jenħtieġ li l-BĊE jissimplifika l-proċessi tiegħu għall-ittrattar tal-informazzjoni kollha (inkluża l-informazzjoni dwar ir-riskju sistemiku) biex b’hekk jimmassimizza l-kapaċità tiegħu li jidentifika l-banek li jinsabu fi kriżi fi stadju bikri. Dan jenħtieġ li jinkludi l-introduzzjoni ta’ sistema ta’ informazzjoni maniġerjali għar-rappurtar sistematiku ta’ nuqqas ta’ rispett jew ta’ kważi nuqqas ta’ rispett tar-rekwiżiti regolatorji, u l-implimentazzjoni ta’ kontrolli ċentralizzati.

Data mmirata għall-implimentazzjoni: l-ewwel trimestru tal-2019.

Rispons għall-kriżijiet

127

L-approċċ attwali tal-BĊE għall-ġestjoni operazzjonali tar-rispons għall-kriżijiet ma jinkludix proċedura biex jiġi żgurat li l-kobor ta’ problema partikolari jiġi kkwantifikat qabel ma jiġu kkunsidrati miżuri superviżorji. B’mod partikolari, il-BĊE ma għandux timijiet ta’ spezzjoni fuq il-post li huma faċilment disponibbli biex iwettqu analiżi dettaljata tal-kwalità tal-assi għall-banek li jinsabu fi kriżi (il-paragrafu 96 sa 99).

Rakkomandazzjoni 5

Jenħtieġ li l-BĊE:

1. ikompli jiżviluppa l-gwida tiegħu dwar l-intervent bikri sabiex jiġi żgurat li s-sejbiet superviżorji rilevanti kollha jiġu kkwantifikati qabel ma l-miżuri ta’ rispons jiġu kkunsidrati.
2. jistabbilixxi proċessi ċari biex jinkiseb aċċertament dwar il-kwalità tal-assi tal-istituzzjonijiet li l-kundizzjoni finanzjarja tagħhom tkun iddeterjorat b’mod konsiderevoli, fejn ikun għad hemm inċertezza rigward il-valwazzjoni tal-assi. B’mod partikolari, jenħtieġ li jkollu għad-dispożizzjoni mmedjata tiegħu timijiet ta’ spezzjoni fuq il-post biex iwettqu analiżi dettaljata tal-kwalità tal-assi għall-banek li jinsabu fi kriżi.
3. jipproduċi rapporti regolari ta’ progress għall-maniġment superjuri li jkunu jagħtu sommarju b’mod sistematiku, komprensiv u prospettiv tal-mod kif il-banek bi problemi identifikati fil-kwalità tal-assi jkunu qed jiġu indirizzati permezz ta’ spezzjonijiet fuq il-post jew mezzi oħra.

Data mmirata għall-implimentazzjoni: ir-raba’ trimestru tal-2018.

128

Il-BĊE identifika diffikultajiet fl-applikazzjoni tal-miżuri ta’ intervent bikri (inkluża duplikazzjoni ta’ miżuri oħra) disponibbli għar-rispons għall-kriżijiet. Huwa avviċina lil-leġiżlatur biex ifittex bidliet legali, iżda ma pprovdiex gwida lilll-persunal tal-BĊE biex ikunu jistgħu jiffaċċjaw dawn id-diffikultajiet. Barra minn hekk, ma hemmx deskrizzjoni tal-azzjonijiet speċifiċi li jistgħu jiġu kkunsidrati f’firxa ta’ xenarji, u s-setgħat legali li jistgħu jkunu bbażati fuqhom. F’dan ir-rigward, meta jkun qed jiddetermina liema setgħat u miżuri jridu jiġu kkunsidrati f’xenarju partikolari, huwa ma jisfruttax l-għarfien siewi li jkun kiseb, minn valutazzjonijiet ta’ pjanijiet ta’ rkupru u sitwazzjonijiet ta’ kriżi preċedenti,. L-użu bir-reqqa ta’ dan l-għarfien jista’ sinifikattivament iżid l-effiċjenza operazzjonali billi jiżgura li l-miżuri kollha applikati jkunu xierqa u proporzjonati (il-paragrafi 101 sa 104).

Rakkomandazzjoni 6

Jenħtieġ li l-BĊE jkompli jiżviluppa l-gwida operazzjonali tiegħu dwar il-valutazzjonijiet ta’ intervent bikri sabiex:

1. jindirizza d-diffikultajiet identifikati fl-applikazzjoni tas-setgħat tiegħu billi jistieden lill-Kummissjoni tikkunsidra bidliet leġiżlattivi biex jiġu indirizzati dgħufijiet potenzjali fil-qafas eżistenti.
2. jintroduċi deskrizzjoni komprensiva tal-azzjonijiet speċifiċi li jridu jiġu kkunsidrati f’firxa ta’ xenarji u s-setgħat legali li jridu jiġu applikati. Għal din il-fini, jenħtieġ li huwa jagħmel użu sistematiku mill-għarfien li kiseb permezz tal-valutazzjoni tal-pjanijiet ta’ rkupru tal-banek u s-sitwazzjonijiet ta’ kriżi preċedenti.

Data mmirata għall-implimentazzjoni: ir-raba’ trimestru tal-2018.

129

Il-gwida tal-BĊE dwar l-implimentazzjoni tal-linji gwida tal-EBA dwar il-FOLTF għandha kamp ta’ applikazzjoni limitat wisq u mhijiex daqstant dettaljata, u ma tipprovdix ċarezza dwar kif għandhom jintużaw l-elementi oġġettivi deskritti fil-linji gwida tal-EBA fil-kuntest ta’ valutazzjoni FOLTF (il-paragrafi 107 sa 109).

Rakkomandazzjoni 7

Jenħtieġ li l-BĊE jkompli jiżviluppa l-gwida operazzjonali tiegħu għall-valutazzjonijiet FOLTF, b’mod partikolari billi jkompli jelabora dwar l-użu tal-elementi oġġettivi deskritti fil-linji gwida tal-EBA.

Data mmirata għall-implimentazzjoni: l-ewwel trimestru tal-2018.

130

Il-BĊE rrifjuta li jagħtina aċċess għal dokumenti u informazzjoni li kienu meħtieġa biex inwettqu l-kompitu tagħna. Fuq il-bażi tad-dokumenti li rċevejna, aħna ma stajna nivvalutaw kemm it-tfassil tal-attivitajiet ta’ valutazzjoni tal-pjanijiet ta’ rkupru u l-attivitajiet ta’ ġestjoni ta’ kriżijiet ikkontribwew għall-effiċjenza operazzjonali. Madankollu, l-evidenza pprovduta mill-BĊE dwar l-implimentazzjoni ta’ dawk l-attivitajiet kienet estremament limitata u għalhekk ma stajniex nisiltu konklużjonijiet dwar l-effiċjenza operazzjonali tagħhom fir-rigward tal-ġestjoni ta’ kriżijiet fil-prattika (ara l-Anness I).

Rakkomandazzjoni 8

Jenħtieġ li l-BĊE jagħti lill-Qorti tal-Awdituri aċċess għad-dokumenti jew l-informazzjoni kollha li hija titlob sabiex twettaq il-kompitu tagħha, fl-interessi tal-obbligu ta’ rendikont.

Data mmirata għall-implimentazzjoni: minnufih.

Dan ir-Rapport ġie adottat mill-Awla IV, immexxija mis-Sur Baudilio TOMÉ MUGURUZA, Membru tal-Qorti tal-Awdituri, fil-Lussemburgu fil-laqgħa tagħha tat-12 ta’ Diċembru 2017.

Abbrevjazzjonijiet

AMD: Ammont Massimu Distribwibbli

ANK: Awtorità Nazzjonali Kompetenti

BĊE: Bank Ċentrali Ewropew

BCBS: Kumitat ta’ Basel dwar is-Superviżjoni Bankarja

BERS: Bord Ewropew dwar ir-Riskju Sistemiku

BRRD: Direttiva dwar l-Irkupru u r-Riżoluzzjoni tal-Banek

BS: Bord Superviżorju

CMG: Grupp għall-Ġestjoni ta’ Kriżijiet

CMN: Netwerk għall-Ġestjoni ta’ Kriżijiet

CMT: Tim ta’ Livell Għoli għall-Ġestjoni ta’ Kriżijiet

CRD: Direttiva dwar ir-Rekwiżiti ta’ Kapital

CRM: Diviżjoni tal-Ġestjoni ta’ Kriżijiet

DĠ Statistika: Direttorat Ġenerali tal-Istatistika

EAP: Pjan ta’ Azzjoni ta’ Emerġenza

EBA: Awtorità Bankarja Ewropea

ESMA: Awtorità Ewropea tat-Titoli u s-Swieq

FICOs: Konglomerati Finanzjarji

FOLTF: Qed ifalli jew probabbilment se jfalli

FSB: Bord għall-Istabbiltà Finanzjarja

G-SIBs: Banek ta’ Importanza Sistemika Globali

G-SIFIs: Istituzzjonijiet Finanzjarji Sistemikament Importanti Globali

ICAAP: Proċess ta’ Valutazzjoni Interna dwar l-Adegwatezza tal-Kapital

ILAAP: Proċess ta’ Valutazzjoni Interna dwar l-Adegwatezza tal-Likwidità

IMAS: Sistema ta’ Ġestjoni tal-Informazzjoni

IS-CMT: Tim għall-Ġestjoni ta’ Kriżijiet Speċifiku għall-Istituzzjoni

KG: Kunsill Governattiv

LSI: Istituzzjoni Inqas Sinifikanti

MSU: Mekkaniżmu Superviżorju Uniku

MtQ: Memorandum ta' Qbil

NPLs: Self improduttiv

PoC: Punt ta’ Kuntatt

QEA: Qorti Ewropea tal-Awdituri

RAS: Sistema ta’ valutazzjoni tar-riskju

Regolament MSU: Regolament dwar il-Mekkaniżmu Superviżorju Uniku

RIA: Diviżjoni tal-analiżi tar-riskju

RTS: Standards Tekniċi Regolatorji

SEBĊ: Sistema Ewropea ta’ Banek Ċentrali

SI: Istituzzjoni Sinifikanti

SM: Stati Membri

SRB: Bord Uniku ta’ Riżoluzzjoni

SREP: Proċess ta’ Reviżjoni u Evalwazzjoni Superviżorji

SRM: Mekkaniżmu Uniku ta’ Riżoluzzjoni

TFUE: Trattat dwar il-Funzjonament tal-UE

TSK: Timijiet superviżorji konġunti

UE: Unjoni Ewropea

WCCAs: Arranġamenti bil-Miktub ta’ Koordinazzjoni u Kooperazzjoni

Glossarju

Ammont Massimu Distribwibbli (AMD): L-ammont massimu li bank jista’ jħallas, pereżempju għal bonusijiet u dividendi.

Awtorità Nazzjonali Kompetenti (ANK): Awtorità Nazzjonali Kompetenti (ANK) hija awtorità nazzjonali responsabbli għas-superviżjoni bankarja. Din tista’ tkun jew bank ċentrali nazzjonali jew entità speċifika ddedikata għas-superviżjoni bankarja, jew mudell b’żewġ livelli. Dan it-terminu jintuża biex jinkorpora t-tipi differenti ta’ istituzzjonijiet li jwettqu superviżjoni bankarja madwar l-Ewropa.

Bord Ewropew dwar ir-Riskju Sistemiku (BERS): Il-Bord Ewropew dwar ir-Riskju Sistemiku għandu l-kompitu li jissorvelja r-riskji fis-sistema finanzjarja fi ħdan l-UE fl-intier tagħha (sorveljanza makroprudenzjali).

Bord Uniku ta’ Riżoluzzjoni (SRB): Taħt mekkaniżmu ġdid ta’ riżoluzzjoni bankarja għaż-żona tal-euro, ġew iitrasferiti setgħat sinifikanti lill-Bord Uniku ta’ Riżoluzzjoni (SRB). L-objettiv tal-SRB huwa li jiżgura li sseħħ riżoluzzjoni ordnata ta' banek li jkunu qed ifallu b'impatt minimu fuq l-ekonomija reali u l-finanzi pubbliċi. Huwa jistabbilixxi regoli u proċeduri uniformi għal banek sinifikanti li jkunu qed ifallu taħt is-superviżjoni tal-BĊE u gruppi transkonfinali oħra. Huwa jneħħi l-ostakoli għar-riżoluzzjoni, eż. dawk relatati mal-organizzazzjoni interna u mal-operazzjonijiet tal-banek jew mar-rikonoxximent transkonfinali tal-miżuri ta’ riżoluzzjoni.

Direttiva dwar ir-Rekwiżiti ta’ Kapital (CRD): Id-Direttiva dwar ir-Rekwiżiti ta’ Kapital (id-Direttiva 2013/36/UE tal-Parlament Ewropew u tal-Kunsill tas-26 ta’ Ġunju 2013 dwar l-aċċess għall-attività tal-istituzzjonijiet ta’ kreditu u s-superviżjoni prudenzjali tal-istituzzjonijiet ta’ kreditu u tad-ditti tal-investiment, li temenda d-Direttiva 2002/87/KE u li tħassar id-Direttivi 2006/48/KE u 2006/49/KE) (ĠU L 176, 27.6.2013, p. 338).

Direttiva dwar l-Irkupru u r-Riżoluzzjoni tal-Banek (BRRD): Id-Direttiva dwar l-Irkupru u r-Riżoluzzjoni tal-Banek (id-Direttiva 2014/59/UE tal-Parlament Ewropew u tal-Kunsill tal-15 ta’ Mejju 2014 li tistabbilixxi qafas għall-irkupru u r-riżoluzzjoni ta’ istituzzjonijiet ta’ kreditu u ditti ta’ investiment u li temenda d-Direttiva tal-Kunsill 82/891/KEE, u d-Direttivi 2001/24/KE, 2002/47/KE, 2004/25/KE, 2005/56/KE, 2007/36/KE, 2011/35/UE, 2012/30/UE u 2013/36/UE, u r-Regolamenti (UE) Nru 1093/2010 u (UE) Nru 648/2012, tal-Parlament Ewropew u tal-Kunsill (ĠU L 173, 12.6.2014, p. 190)).

Grupp għall-Ġestjoni ta’ Kriżijiet (CMG): Jenħtieġ li l-awtoritajiet ta’ domiċilju u ospitanti ewlenin tal-G-SIFIs kollha jżommu CMGs bl-objettiv li jtejbu l-istat ta’ tħejjija għal, u jiffaċilitaw il-ġestjoni u r-riżoluzzjoni ta’ kriżi finanzjarja transkonfinali li taffettwa d-ditta. Jenħtieġ li s-CMGs jinkludu l-awtoritajiet superviżorji, il-banek ċentrali, l-awtoritajiet ta’ riżoluzzjoni, il-ministeri tal-finanzi u l-awtoritajiet pubbliċi responsabbli għall-iskemi ta’ garanzija tal-ġurisdizzjonijiet li jkunu ta’ domiċilju jew ospitanti għal entitajiet tal-grupp li jkunu materjali għar-riżoluzzjoni tiegħu, u jenħtieġ li jikkooperaw mill-qrib ma’ awtoritajiet f’ġurisdizzjonijiet oħra fejn id-ditti jkollhom preżenza sistemika.

Istituzzjonijiet Finanzjarji Sistemikament Importanti Globali (G-SIFIs): F’Novembru 2011, il-Bord għall-Istabbiltà Finanzjarja (FSB) ippubblika sett integrat ta’ miżuri ta’ politika biex jindirizza r-riskji sistemiċi u ta’ periklu morali assoċjati ma’ banek ta’ importanza sistemika. F’din il-pubblikazzjoni, l-FSB identifika grupp inizjali ta’ banek kbar bħala Istituzzjonijiet Finanzjarji Sistemikament Importanti Globali (G-SIFIs), billi uża metodoloġija żviluppata mill-Kumitat ta’ Basel dwar is-Superviżjoni Bankarja (BCBS).

Mekkaniżmu Superviżorju Uniku (MSU): Il-Mekkaniżmu Superviżorju Uniku (MSU) jirreferi għas-sistema ta’ superviżjoni bankarja fiż-żona tal-euro. Huwa jinkludi l-BĊE u l-awtoritajiet superviżorji nazzjonali tal-pajjiżi parteċipanti. L-għanijiet prinċipali tiegħu huma li:

• jiżgura s-sikurezza u s-solidità tas-sistema bankarja Ewropea
• iżid l-integrazzjoni u l-istabbiltà finanzjarja
• jiżgura superviżjoni konsistenti

L-MSU huwa wieħed miż-żewġ pilastri tal-unjoni bankarja tal-UE, flimkien mal-Mekkaniżmu Uniku ta’ Riżoluzzjoni.

Mekkaniżmu Uniku ta’ Riżoluzzjoni (SRM): Il-Mekkaniżmu Uniku ta’ Riżoluzzjoni (SRM) huwa wieħed mill-pilastri tal-unjoni bankarja, flimkien mal-MSU. Dan ġie stabbilit biex jiċċentralizza l-kompetenzi u r-riżorsi ewlenin għall-ġestjoni tal-falliment ta’ xi istituzzjoni ta’ kreditu fl-Istati Membri parteċipanti.

Netwerk għall-Ġestjoni ta’ Kriżijiet (CMN): Netwerk ta’ funzjonijiet relatati mal-ġestjoni ta’ kriżijiet fl-awtoritajiet nazzjonali kompetenti (ANK)

Proċess ta’ Reviżjoni u Evalwazzjoni Superviżorji (SREP): Il-Proċess ta’ Reviżjoni u Evalwazzjoni Superviżorji (SREP) għall-banek li jaqgħu taħt is-superviżjoni diretta tal-BĊE jitwettaq fi ħdan TSK biex jiżgura li l-istituzzjonijiet sorveljati jkollhom arranġamenti, strateġiji, proċessi u mekkaniżmi adegwati stabbiliti, li jżommu livell adegwat ta’ kapital u likwidità skont ir-regoli rilevanti, u li jkollhom ġestjoni soda u kopertura tar-riskji li għalihom ikunu jew jistgħu jkunu esposti. Il-proċess SREP jirriżulta f’punteġġ individwali għal kull bank.

Qed ifalli jew probabbilment se jfalli: Valutazzjoni mwettqa mill-awtorità superviżorja jew ta’ riżoluzzjoni jekk bank jikser, jew probabbilment fil-futur qrib jikser ir-rekwiżiti għall-kontinwazzjoni tal-awtorizzazzjoni, li tista’ tiskatta proċeduri ta’ insolvenza jew ta’ riżoluzzjoni. Ir-raġunijiet għal determinazzjoni ta’ dan it-tip jinkludu, fost oħrajn: l-entità ġarrbet jew probabbilment se ġġarrab telf li se jnaqqas il-fondi proprji tagħha; l-assi tagħha jkunu, jew probabbilment fil-futur qrib se jkunu, inqas mill-obbligazzjonijiet tagħha; l-entità mhijiex, jew probabbilment fil-futur qrib mhijiex se tkun tista’ tħallas l-obbligazzjonijiet meta dawn ikunu dovuti.

Regolament dwar il-Mekkaniżmu Superviżorju Uniku (Regolament MSU): Ir-Regolament dwar il-Mekkaniżmu Superviżorju Uniku (ir-Regolament tal-Kunsill (UE) Nru 1024/2013 tal-15 ta’ Ottubru 2013 li jikkonferixxi kompiti speċifiċi lill-Bank Ċentrali Ewropew fir-rigward ta’ politiki relatati mas-superviżjoni prudenzjali ta’ istituzzjonijiet ta’ kreditu) (ĠU L 287, 29.10.2013, p. 63).

Timijiet Superviżorji Konġunti (TSK): Is-superviżjoni ta’ kuljum, fi ħdan l-MSU, ta’ istituzzjonijiet sinifikanti titwettaq mit-Timijiet Superviżorji Konġunti (TSK). It-TSK jinkludu persunal kemm mill-BĊE kif ukoll mill-ANK tal-pajjiżi li fihom jiġu stabbiliti l-istituzzjonijiet ta’ kreditu, is-sussidjarji bankarji jew il-fergħat transkonfinali sinifikanti ta’ grupp bankarju partikolari. TSK jiġi stabbilit għal kull istituzzjoni sinifikanti.

Tim tal-awditjar

Ir-rapporti speċjali tal-QEA jippreżentaw ir-riżultati tal-awditi tal-prestazzjoni u tal-konformità tagħha f'dak li jirrigwarda oqsma baġitarji jew suġġetti ta' ġestjoni speċifiċi. Il-QEA tagħżel u tfassal dawn il-kompiti tal-awditjar biex timmassimizza l-impatt tagħhom billi tqis ir-riskji għall-prestazzjoni jew għall-konformità, il-livell ta' introjtu jew ta' nfiq involut, l-iżviluppi li jkunu għad iridu jseħħu u l-interess politiku u pubbliku.

Dan ir-rapport twettaq mill-Awla IV tal-Awditjar li hija mmexxija minn Baudilio Tomé Muguruza, Membru tal-QEA, u li tiffoka fuq l-oqsma ta’ regolamentazzjoni tas-swieq u ekonomija kompetittiva. L-awditu tmexxa mill-Membru tal-QEA Kevin Cardiff. Fit-tħejjija tar-rapport, huwa ngħata appoġġ minn Gediminas Mačys Kap tal-kabinett u Shane Enright, Attaché; Tony Murphy, Direttur, Zacharias Kolias, Direttur, Mirko Gottmann, Kap tal-kompitu. It-tim tal-awditjar kien magħmul minn Paraskevi Demourtzidou, Jörg Genner, Violeta Radu u Giorgos Tsikkos.

Kuntatt

IL-QORTI EWROPEA TAL-AWDITURI
12, rue Alcide De Gasperi
1615 Luxembourg
LUXEMBOURG

Tel. +352 4398-1
Mistoqsijiet: eca.europa.eu/mt/Pages/ContactForm.aspx
Sit web: eca.europa.eu
Twitter: @EUAuditors

Ħafna informazzjoni addizzjonali dwar l-Unjoni Ewropea hija disponibbli fuq l-Internet.
Jista’ jsir aċċess għaliha permezz tas-server Europa (http://europa.eu).

Il-Lussemburgu: L-Uffiċċju tal-Pubblikazzjonijiet tal-Unjoni Ewropea, 2018

PDF	ISBN 978-92-872-9123-3	ISSN 1977-5741	doi:10.2865/140978	QJ-AB-17-027-MT-N
HTML	ISBN 978-92-872-9104-2	ISSN 1977-5741	doi:10.2865/711652	QJ-AB-17-027-MT-Q

© L-Unjoni Ewropea, 2018

Għal kull użu jew riproduzzjoni ta’ ritratti jew materjal ieħor li ma jaqax taħt id-drittijiet tal-awtur tal-Unjoni Ewropea, irid jintalab il-permess direttament mingħand id-detenturi tad-drittijiet tal-awtur.

KIF TIKKUNTATTJA LILL-UE

Personalment
Madwar l-Unjoni Ewropea kollha hemm mijiet ta’ ċentri ta’ informazzjoni tal-Europe Direct. Tista’ ssib l-indirizz tal-eqreb ċentru għalik f’dan is-sit: https://europa.eu/european-union/contact_mt

Bit-telefown jew bil-posta elettronika
Europe Direct huwa servizz li jwieġeb il-mistoqsijiet tiegħek dwar l-Unjoni Ewropea. Tista’ tikkuntattja dan is-servizz:

• bit-telefown bla ħlas: 00 800 6 7 8 9 10 11 (ċerti operaturi jafu jimponu ħlas għal dawn it-telefonati),
• fuq dan in-numru standard: +32 22999696, jew
• bil-posta elettronika permezz: https://europa.eu/european-union/contact_mt

KIF ISSIB TAGĦRIF DWAR L-UE

Onlajn
L-informazzjoni dwar l-Unjoni Ewropea bil-lingwi uffiċjali kollha tal-UE hija disponibbli fuq is-sit web Europa fuq: http://europa.eu

Pubblikazzjonijiet tal-UE
Tista’ tniżżel mill-internet jew tordna l-pubblikazzjonijiet tal-UE, li xi wħud minnhom huma bla ħlas u xi oħrajn bil-ħlas, mill-EU Bookshop fl-indirizz li ġej: http://bookshop.europa.eu. Kopji multipli ta’ pubblikazzjonijiet bla ħlas tista’ tiksibhom billi tikkuntattja lil Europe Direct jew liċ-ċentru tal-informazzjoni lokali tiegħek (ara https://europa.eu/european-union/contact_mt).

Il-liġi tal-UE u dokumenti relatati
Għal aċċess għall-informazzjoni legali tal-UE, inkluż il-liġijiet kollha tal-UE mill-1951 ’l hawn, fil-verżjonijiet lingwistiċi uffiċjali kollha, żur is-sit EUR-Lex hawnhekk: http://eur-lex.europa.eu

Dejta Miftuħa mill-UE
Il-portal tad-Dejta Miftuħa mill-UE (http://data.europa.eu/euodp/mt/data) jipprovdi aċċess għal settijiet tad-dejta mill-UE. Id-dejta tista’ titniżżel mill-internet u tintuża mill-ġdid bla ħlas, kemm għal skopijiet kummerċjali kif ukoll mhux kummerċjali.