L-awdituri eżaminaw jekk il-Kummissjoni Ewropea u l-Istati Membri jiżgurawx li l-proċeduri ta’ importazzjoni jipproteġu l-interessi finanzjarji tal-UE.

Sommarju eżekuttiv

Dwar dan ir-rapport

Il-merkanzija li tidħol fl-UE minn barra t-territorju tal-Unjoni Ewropea hija suġġetta għal kontrolli doganali mill-Istati Membri qabel ma tiġi rilaxxata għal ċirkolazzjoni libera fi ħdan l-UE. Aħna eżaminajna jekk il-Kummissjoni Ewropea u l-Istati Membri jiżgurawx li l-proċeduri ta’ importazzjoni jipproteġu l-interessi finanzjarji tal-UE. Sibna dgħufijiet u lakuni importanti li jindikaw li l-kontrolli ma jiġux applikati b’mod effettiv. Dan għandu effett negattiv fuq il-finanzi tal-UE. Aħna nagħmlu għadd ta' rakkomandazzjonijiet lill-Kummissjoni u lill-Istati Membri biex itejbu t-tfassil u l-implimentazzjoni tal-kontrolli.

Dwar il-kontrolli doganali

Il-kontrolli doganali jistgħu biss jiżguraw il-protezzjoni tal-interessi finanzjarji tal-UE jekk ikunu bbażati fuq regoli komuni u jekk l-Istati Membri japplikawhom b’mod armonizzat u standardizzat.

Malli tidħol il-merkanzija, jenħtieġ li l-awtoritajiet doganali tal-Istat Membru tal-importazzjoni jirrikjedu lill-importatur iħallas jew ikopri b’garanzija kwalunkwe dazju doganali dovut fuq il-merkanzija importata. Madankollu, l-importaturi jistgħu deliberatament inaqqsu jew jevadu l-obbligazzjoni tad-dazji doganali, pereżempju, billi jissottovalutaw il-merkanzija tagħhom, jiddikjaraw pajjiż ta’ oriġini falz jew jibdlu għal klassifikazzjoni tal-prodotti li jkollha rata ta’ dazju aktar baxxa.

Id-dazji doganali jikkostitwixxu 14 % tal-baġit tal-UE. L-evażjoni tagħhom iżżid in-nuqqas doganali u jrid isir kumpens għaliha permezz ta’ kontribuzzjonijiet ogħla tal-ING li jingħataw mill-Istati Membri. Fl-aħħar mill-aħħar, l-ispiża tintrefa’ mill-kontribwenti Ewropej.

Kif wettaqna l-awditu tagħna

Aħna eżaminajna jekk il-kontrolli doganali tal-UE jipproteġux l-interessi finanzjarji tagħha u jekk il-Kummissjoni u l-Istati Membri fasslux proċeduri ta’ importazzjoni robusti li jipproteġu dawk l-interessi.

X'sibna

Aħna sibna dgħufijiet serji li jindikaw li hemm nuqqasijiet fil-qafas legali doganali kif ukoll implimentazzjoni ineffettiva tal-kontrolli doganali fuq l-importazzjonijiet, u li dawn jaffettwaw l-interessi finanzjarji tal-UE b’mod negattiv.

L-Istati Membri ma jiġux imħeġġa biżżejjed, f’termini finanzjarji, biex iwettqu kontrolli doganali. Dawk li jwettqu kontrolli doganali iżda ma jirnexxilhomx jirkupraw it-telf għad-dħul tal-UE għandhom ir-riskju li jbatu konsegwenzi finanzjarji, filwaqt li dawk li ma jwettqux dawn il-kontrolli jista’ jkun li ma jġarrbux konsegwenzi ta’ dan it-tip.

L-Istati Membri għamlu progress lejn l-applikazzjoni uniformi tal-leġiżlazzjoni doganali. Iżda huma għandhom approċċi differenti f’dak li jirrigwarda kontrolli doganali biex jindirizzaw is-sottovalwazzjoni, id-deskrizzjoni skorretta tal-oriġini, u l-klassifikazzjoni skorretta, u biex jimponu pieni doganali. Kontrolli doganali onerużi jista’ jkollhom impatt fuq l-għażla li l-operaturi tas-suq jagħmlu dwar l-uffiċċju doganali tal-importazzjoni, u għalhekk l-ajruporti/portijiet b’inqas kontrolli doganali jistgħu jattiraw aktar traffiku.

Fl-Istati Membri għadhom jeżistu għadd ta’ lakuni fir-rigward tal-kontroll tal-importazzjonijiet.

X’nirrakkomandaw

Aħna nagħmlu r-rakkomandazzjonijiet li ġejjin lill-Kummissjoni Ewropea u lill-Istati Membri.

Jenħtieġ li l-Kummissjoni:

1. sabiex tkun tista’ tilqa’ t-talba tal-Parlament Ewropew, tiżviluppa metodoloġija u toħroġ stimi perjodiċi tan-nuqqas doganali mill-2019 ’il quddiem u tieħu inkunsiderazzjoni r-riżultati tagħha għall-allokazzjoni tar-riżorsi u għall-issettjar ta’ miri operazzjonali;
2. tqis il-possibbiltajiet disponibbli kollha biex issaħħaħ l-appoġġ għas-servizzi doganali nazzjonali fir-rwol importanti tagħhom, li l-Qafas Finanzjarju Pluriennali l-ġdid jikkonferilhom fir-rigward tal-UE, inkluż it-twettiq ta’ rieżami tar-rata xierqa tal-ispejjeż tal-ġbir;
3. fil-Qafas Finanzjarju Pluriennali li jmiss tipproponi li l-programmi ta’ azzjoni tal-UE li jmiss, li jappoġġaw l-Unjoni doganali, jintużaw biex jikkontribwixxu għas-sostenibbiltà finanzjarja tas-Sistemi tal-Informazzjoni Ewropej fil-qasam tad-dwana;
4. tkun aktar preċiża fit-talbiet li jkunu jinsabu f’komunikazzjoni ta' Assistenza Reċiproka biex tiżgura l-implimentazzjoni uniformi tagħhom mill-Istati Membri; u
5. tipproponi emendi għal-leġiżlazzjoni doganali fl-2018 li jkollhom l-għan li jagħmlu obbligatorja l-indikazzjoni tal-konsenjatur fid-dikjarazzjoni doganali tal-importazzjoni

Jenħtieġ li l-Istati Membri:

1. idaħħlu kundizzjoni li permezz tagħha l-evitar ta’ kontrolli ssuġġeriti minn filtru ta’ riskju partikolari jkun jirrikjedi approvazzjoni ġerarkika minn qabel jew minnufih;
2. jintroduċu kontrolli fis-sistemi elettroniċi tagħhom ta’ rilaxx biex jimblokkaw dikjarazzjonijiet tal-importazzjoni li jkun fihom applikazzjonijiet għal eżenzjoni mid-dazju fuq il-merkanzija li l-valur iddikjarat tagħha jkun ta’ aktar minn EUR 150, jew għal kunsinni kummerċjali ddikjarati bħala rigali; u
3. jifformulaw pjanijiet ta’ investigazzjoni biex jiġġieldu kontra l-abbuż li jsir minn din l-eżenzjoni fuq il-kummerċ elettroniku ta’ merkanzija ma’ pajjiżi mhux tal-UE.

Introduzzjoni

Fl-2018, l-UE se tiċċelebra l-50 anniversarju minn meta twaqqfet l-Unjoni Doganali. Unjoni Doganali tfisser in-nuqqas ta’ dazji doganali u kwoti fil-fruntieri interni bejn l-Istati Membri, kif ukoll l-istabbiliment ta’ dazji doganali komuni fuq l-importazzjonijiet minn pajjiżi terzi. L-Unjoni Doganali flimkien mal-Politika Kummerċjali Komuni huma oqsma ta’ kompetenza esklussiva tal-UE¹, li fi ħdanhom tiġi ddefinita l-biċċa l-kbira mill-politika doganali u tiġi adottata l-leġiżlazzjoni doganali. Madankollu, ir-responsabbiltà għall-implimentazzjoni tal-leġiżlazzjoni doganali hija primarjament f’idejn l-Istati Membri².

Għalkemm il-fruntieri interni tneħħew, il-merkanzija li tidħol fl-Istati Membri minn barra t-territorju doganali tal-UE hija suġġetta għal kontrolli doganali u għal pagament ta’ kwalunkwe dazju doganali qabel ma tiġi rilaxxata għal ċirkolazzjoni libera fi ħdan l-UE.

Ir-rilaxx ta’ merkanzija importata għal ċirkolazzjoni libera jfisser li l-merkanzija tista’ tiċċirkola b’mod liberu fi ħdan is-suq uniku tal-UE, bħal kwalunkwe prodott li jkun joriġina mill-UE³. Għaldaqstant, malli tidħol il-merkanzija, jenħtieġ li l-amministrazzjoni doganali tal-Istat Membru tal-importazzjoni tirrikjedi lill-importatur iħallas jew ikopri b’garanzija kwalunkwe dazju doganali dovut fuq il-merkanzija importata.

Id-dazji doganali, flimkien mal-imposti fuq il-produzzjoni taz-zokkor (kollettivament magħrufa bħala Riżorsi Proprji Tradizzjonali (RPT)), huma sors importanti ta’ dħul għall-baġit tal-UE. Huma jiġu ttrasferiti għall-baġit, wara li titnaqqas iż-żamma għall-ispejjeż tal-ġbir. Fl-2016, l-RPT kienu jikkostitwixxu 14 % tad-dħul tal-UE u ammontaw għal EUR 20.1 biljun.

L-awtoritajiet doganali jridu jilħqu bosta objettivi, u riżorsi skarsi jridu jiġu allokati għal kull wieħed minnhom. Huma jistinkaw biex jissodisfaw objettivi bħalma huma l-applikazzjoni ta’ miżuri mhux fiskali li għandhom l-għan li jtejbu s-sigurtà interna tal-UE, filwaqt li jipproteġu l-Unjoni minn kummerċ inġust u illegali, u l-protezzjoni tal-ambjent. Il-ġlieda kontra t-terroriżmu saret prijorità għall-awtoritajiet doganali. Huma responsabbli wkoll għall-ġbir tad-dazji doganali, tad-dazji tas-sisa, u tat-taxxa fuq il-valur miżjud (VAT) dovuta fl-importazzjoni.

Huwa diffikultuż għall-awtoritajiet doganali li jiksbu bilanċ bejn il-ħtieġa li jiġi ffaċilitat il-kummerċ, bi proċeduri ta’ importazzjoni li jkunu aktar rapidi u mingħajr xkiel, u l-ħtieġa li jitwettqu kontrolli doganali. Kontrolli doganali onerużi jista’ jkollhom impatt fuq l-għażla li l-operaturi tas-suq jagħmlu dwar l-uffiċċju doganali tal-importazzjoni, u għalhekk l-ajruporti/portijiet b’inqas kontrolli doganali jistgħu jattiraw aktar traffiku.

L-obbligazzjoni tad-dazji doganali fil-mument meta tiġi rilaxxata l-merkanzija tiddependi minn tliet fatturi: (i) il-valur doganali tal-merkanzija importata, meta d-dazju jiġi ssettjat bħala perċentwal ta’ dan il-valur (ad valorem); (ii) l-oriġini tal-merkanzija; u (iii) il-klassifikazzjoni tariffarja tal-merkanzija li, flimkien mal-oriġini, tiddetermina r-rata ta’ dazju doganali li trid tiġi applikata fuq il-valur doganali.

Kif isseħħ l-evażjoni tad-dazji doganali

L-importatur jista’ deliberatament inaqqas l-obbligazzjoni tad-dazji doganali permezz ta’:

1. sottovalwazzjoni, jiġifieri meta l-importatur jiddikjara valur tal-merkanzija importata li jkun inqas mill-valur reali, li spiss tkun akkumpanjata mill-preżentazzjoni ta’ dokumenti kummerċjali foloz;
2. deskrizzjoni skorretta tal-oriġini, fejn l-importatur jiddikjara pajjiż ta’ oriġini falz tal-merkanzija importata;
3. klassifikazzjoni skorretta, billi jibdel għal klassifikazzjoni tal-prodotti li jkollha rata ta’ dazju aktar baxxa; jew
4. kombinament ta’ dawn ta’ hawn fuq.

Fl-aħħar nett, l-importaturi jistgħu jabbużaw minn eżenzjoni mid-dazji doganali billi japplikaw għal eżenzjoni għall-merkanzija li ma tkunx eliġibbli.

In-nuqqas doganali u l-impatt tiegħu

L-evażjoni mid-dazji doganali żżid in-nuqqas doganali li, fi studju li sar mill-Parlament Ewropew⁴ (PE), huwa ddefinit bħala d-differenza bejn il-livell teoretiku tad-dazji tal-importazzjoni li għandhom jinġabru għall-ekonomija fl-intier tagħha u d-dazji tal-importazzjoni reali li jkunu nġabru. Kwalunkwe nuqqas fil-ġbir tad-dazji jrid jiġi kkumpensat permezz ta’ kontribuzzjonijiet ogħla tal-Introjtu Nazzjonali Gross (ING) mill-Istati Membri u li, fl-aħħar mill-aħħar, dawn jintrefgħu mill-kontribwenti Ewropej.

Kif għandha tiġi indirizzata l-evażjoni mid-dazji doganali: kontrolli doganali u skambji ta’ informazzjoni

Il-merkanzija importata fl-UE hija suġġetta għal kontrolli doganali. Dawn il-kontrolli doganali jistgħu biss jiżguraw il-funzjonament tajjeb tas-suq intern u l-protezzjoni tal-interessi finanzjarji tal-UE jekk ikunu bbażati fuq regoli komuni u jekk l-Istati Membri japplikawhom b’mod armonizzat u standardizzat.

Kontrolli doganali fuq l-importazzjonijiet jistgħu jitwettqu:

1. qabel il-wasla ta’ merkanzija fit-territorju tal-UE jew fil-post tal-ħatt, u f’dan il-każ ikunu magħrufin bħala kontrolli ta’ qabel il-wasla jew kontrolli ta’ qabel ir-rilaxx;
2. meta l-merkanzija tiġi importata, l-hekk imsejħa kontrolli tar-rilaxx; jew
3. wara l-importazzjoni tal-merkanzija, ladarba dawn ikunu f’ċirkolazzjoni libera. Dawn huma l-kontrolli ta’ wara r-rilaxx. Huma jistgħu jkunu jew kontrolli bbażati fuq l-awditi (awditi ta’ wara r-rilaxx) jew inkella kontrolli bbażati fuq it-tranżazzjonijiet (kontrolli oħra ta’ wara r-rilaxx).

Peress li l-UE ma għandhiex oqfsa armonizzati ta’ kontroll u ta’ ġestjoni tar-riskju, it-taħlita u l-prevalenza ta’ kull waħda minn dawn it-tliet forom ta’ kontroll ivarjaw minn Stat Membru wieħed għal ieħor. Kontrolli inqas effettivi fl-istadji ta’ qabel ir-rilaxx u waqt ir-rilaxx ifissru li jenħtieġ li r-riskji li jifdal, u li jaffettwaw il-ġbir tad-dazji doganali, jiġu mitigati fl-istadju ta’ wara r-rilaxx.

Jeħtieġ li l-awtoritajiet doganali jiskambjaw informazzjoni ma’ pajjiżi oħra dwar il-kummerċ internazzjonali biex jiżguraw il-konformità mad-dispożizzjonijiet doganali kif ukoll il-kompletezza tal-ġbir tad-dħul. Dan huwa magħruf bħala assistenza amministrattiva reċiproka.

L-iskambji ta’ informazzjoni jistgħu jseħħu fil-livell tal-UE bejn l-Istati Membri jew bejnhom u l-Kummissjoni, jew fil-livell internazzjonali ma’ pajjiżi mhux tal-UE. L-iskambji ta’ informazzjoni fil-livell tal-UE jsiru fil-qafas tar-regolament dwar l-assistenza reċiproka jew fil-qafas tas-sistema tal-ġestjoni tar-riskju doganali għal informazzjoni relatata mar-riskji.

L-awtoritajiet doganali jistgħu jikkooperaw ukoll ma’ xulxin u jiskambjaw informazzjoni u l-aħjar prattika permezz ta’ azzjonijiet konġunti, seminars, korsijiet ta' taħriġ, gruppi ta’ proġetti, żjarat ta’ ħidma, u operazzjonijiet transkonfinali ffinanzjati mill-programmi ta’ azzjoni tal-UE. Żewġ programmi ta’ azzjoni ewlenin tal-UE jiffinanzjaw l-iskambju ta’ informazzjoni u l-kooperazzjoni bejn l-awtoritajiet doganali biex jipproteġu l-interessi finanzjarji tal-UE: Dwana 2013/2020 u Hercule II/III.

Il-programm Dwana 2013 pprovda kważi EUR 325 miljun matul is-sitt snin tal-implimentazzjoni tiegħu biex “jappoġġa u jikkomplementa l-azzjoni li tittieħed mill-Istati Membri sabiex jiġi garantit il-funzjonament effikaċi tas-suq intern fis-settur doganali”⁵. Il-programm Dwana 2020 jappoġġa l-funzjonament tal-Unjoni Doganali. Ir-Regolament tiegħu jistabbilixxi bosta objettivi speċifiċi li għandhom l-għan li jappoġġaw lill-awtoritajiet doganali fil-protezzjoni tal-interessi finanzjarji u ekonomiċi tal-UE, u jipprovdi finanzjament ta’ kważi EUR 525 miljun għall-perjodu 2014-20.

Il-programm Hercule II kien programm ta’ azzjoni tal-UE li kien jiffinanzja azzjonijiet għall-prevenzjoni u l-ġlieda kontra l-frodi, il-korruzzjoni u kwalunkwe attività illegali oħra li taffettwa l-interessi finanzjarji tal-UE, u għamel disponibbli kważi EUR 100 miljun għall-azzjonijiet kontra l-frodi bejn l-2007 u l-2013. Is-suċċessur tiegħu kien il-programm Hercule III li għandu baġit ta’ EUR 105 miljun għall-perjodu 2014-20.

L-awtoritajiet doganali jiskambjaw informazzjoni u jikkooperaw ma’ pajjiżi mhux tal-UE fil-qafas ta’ ftehimiet internazzjonali bħalma huma arranġamenti kummerċjali preferenzjali (PTAs), ftehimiet ta’ assistenza reċiproka (MAAs), u arranġamenti ta’ kooperazzjoni amministrattiva (ACAs).

Permezz tal-PTAs, is-sħab kummerċjali jkunu jistgħu jagħtu termini preferenzjali fil-kuntest tal-kummerċ tagħhom ma' xulxin. Jistgħu jkunu reċiproċi jew unilaterali. Il-MAAs jipprovdu bażi legali biex tintalab informazzjoni minn pajjiżi mhux tal-UE, b’mod partikolari, sabiex ikun hemm prevenzjoni, investigazzjoni u ġlieda kontra l-operazzjonijiet li jiksru l-leġiżlazzjoni doganali.

L-Uffiċċju Ewropew Kontra l-Frodi (OLAF) tal-Kummissjoni Ewropea jikkonkludi l-ACAs mal-awtoritajiet ta’ pajjiżi mhux tal-UE u mas-servizzi investigattivi amministrattivi ta’ organizzazzjonijiet internazzjonali. L-ACAs huma intenzjonati biex jipprovdu linji gwida prattiċi għal kooperazzjoni operazzjonali tal-OLAF mal-awtoritajiet sħab, b’mod partikolari billi jiddeżinjaw punt ta’ kuntatt.

Ambitu u approċċ tal-awditjar

L-awditu eżamina jekk il-Kummissjoni u l-Istati Membri fasslux proċeduri ta’ importazzjoni robusti li jipproteġu l-interessi finanzjarji tal-UE.

Aħna żorna lill-awtoritajiet doganali ta’ ħames Stati Membri: Spanja, l-Italja, il-Polonja, ir-Rumanija u r-Renju Unit. L-għażla ta’ Stati Membri kienet ibbażata fuq il-kriterji tar-riskju li ġejjin: (i) id-daqs tal-kontribuzzjoni tal-RPT tagħhom għall-Baġit tal-UE; (ii) l-inċidenza tas-sottovalwazzjoni fl-Istat Membru; u (iii) il-proporzjon ta’ kontrolli bbażati fuq l-awditi fit-total tal-kontrolli ta’ wara r-rilaxx.

Il-perjodu awditjat jibda fl-2007 u jispiċċa fl-2017. Aħna wettaqna l-awditu f'żewġ stadji (ara aktar dettalji dwar l-approċċ tal-awditjar fl-Anness I u l-Anness II):

1. L-ewwel stadju: xogħol ta’ tħejjija fil-Kummissjoni u fl-Istati Membri, inkluża żjara lis-servizzi tal-Kummissjoni: id-DĠ Tassazzjoni u Unjoni Doganali, id-DĠ Baġit, l-OLAF u ċ-Ċentru Konġunt tar-Riċerka (JRC) kif ukoll lill-Organizzazzjoni Dinjija Doganali (WCO) sabiex niġbru informazzjoni u data li jistgħu jkunu utli għax-xogħol tal-awditjar fuq il-post fl-Istati Membri. Dan ippermettielna wkoll nagħmlu valutazzjoni komparattiva tal-leġiżlazzjoni u l-proċeduri doganali tal-UE bi tqabbil mal-istandards tad-WCO⁶. Biex nittestjaw jekk il-kontrolli doganali u l-proċeduri ta’ ġestjoni tar-riskju humiex qed joperaw mingħajr xkiel, qabel kull żjara lil Stat Membru, aħna għażilna erba’ kampjuni ta’ importazzjonijiet riskjużi u kampjun ta’ awditi mwettqa mill-awtoritajiet doganali.
2. It-tieni stadju: xogħol tal-awditjar fuq il-post kemm fil-Kummissjoni (id-Direttorat Ġenerali għat-Tassazzjoni u l-Unjoni Doganali (DĠ Tassazzjoni u Unjoni Doganali), id-Direttorat Ġenerali għall-Baġit (DĠ Baġit) u l-OLAF), u fl-Istati Membri magħżula, b’attenzjoni speċjali mogħtija lis-sistemi u l-kontrolli.

Osservazzjonijiet

Is-sistema attwali ma tagħtix prijorità lill-importanza tad-dazji doganali bħala sors tal-finanzjament mill-baġit tal-UE

Ir-rapport tal-Grupp ta' Livell Għoli dwar ir-Riżorsi Proprji⁷ jiġbed l-attenzjoni għall-RPT bħala valutazzjoni komparattiva tad-dħul effettiv tal-UE. Madankollu, l-UE għadha ma wettqitx stima tan-nuqqas doganali, hemm diżinċentivi għall-Istati Membri biex iwettqu kontrolli, u l-finanzjament tal-programmi doganali tal-UE ma jiżgurax bis-sħiħ is-sostenibbiltà finanzjarja tal-Unjoni Doganali jew ma jkunx dejjem marbut mal-protezzjoni tal-interessi finanzjarji tal-UE.

Il-Kummissjoni ma għamlitx stima tan-nuqqas doganali

Fl-2013, il-PE talab⁸ lill-Kummissjoni “tiġbor data affidabbli dwar id-differenza (nuqqas) doganali u tal-VAT fl-Istati Membri u tirrapporta kull sitt xhur lill-Parlament f’dan ir-rigward”. Il-Kummissjoni ma laqgħetx din it-talba fir-rigward tad-diskrepanza doganali, filwaqt li hija tiffinanzja regolarment studji dwar id-daqs u n-nuqqas tal-VAT. Il-Kummissjoni tippubblika tqabbil annwali bejn l-RPT addizzjonali li jkunu ġew stabbiliti, b’riżultat tal-attivitajiet ta’ spezzjoni li hija tkun wettqet, mal-ammont reali li jkun inġabar. Dan bl-ebda mod ma jista’ jitqies bħala n-nuqqas doganali kif iddefinit fil-paragrafu 10.

L-OLAF għamel kalkolu tat-telf potenzjali ta’ dazji doganali u ta’ VAT li jkun hemm b’kaġun tas-sottovalwazzjoni tal-importazzjonijiet tat-tessuti u x-xedd is-saqajn miċ-Ċina għar-Renju Unit. Ġie kkalkulat li t-telf potenzjali tad-dazji doganali kien qrib l-ammont ta’ EUR 2 biljun għall-perjodu 2013-16. L-OLAF qed jeżamina jekk hemmx xi telf potenzjali fi Stati Membri oħra, inklużi fl-erbgħa l-oħra kkampjunati mill-QEA.

Stima annwali tad-diskrepanza doganali tkun tippermetti li tiġi evalwata l-prestazzjoni tal-Unjoni Doganali f’termini tal-protezzjoni tal-interessi finanzjarji tal-UE. Din tkun tgħin ukoll lill-Kummissjoni u lill-Istati Membri jimmiraw ir-riżorsi lejn fejn jinħtieġu l-aktar.

Hemm diżinċentiv għall-Istati Membri biex iwettqu kontrolli doganali

L-awtoritajiet doganali tal-Istati Membri huma responsabbli għall-ġbir tad-dazji doganali: huma jridu jieħdu l-miżuri kollha biex jiżguraw li d-dazji jiġu debitament ittrasferiti għall-Baġit tal-UE u jipproteġu l-interessi finanzjarji tal-UE⁹. Biex tiżgura dan, il-Kummissjoni tispezzjona l-awtoritajiet doganali tal-Istati Membri kull sena.

Il-Kummissjoni tista’ żżomm lil Stat Membru finanzjarjament responsabbli f’każ ta’ żbalji amministrattivi¹⁰. Jista’ jkun li l-Istati Membri li ma jwettqux kontrolli doganali ma jiffaċċjawx dan ir-riskju, eż. aħna sibna li fir-Renju Unit, l-operaturi tas-suq li jkunu insolventi jiġu esklużi mill-popolazzjoni mmirata ta’ proġett ta’ kontroll ta’ wara r-rilaxx. Fil-fatt, Stat Membru wieħed ilmenta li, aktar ma huwa jindirizza l-frodi, ogħla jkun ir-riskju li l-Kummissjoni żżommu finanzjarjament responsabbli.

Jekk l-awtoritajiet doganali jwettqu kontroll ta’ wara r-rilaxx u jaqbdu pagament insuffiċjenti ta’ dazji doganali, huma jridu jiġbru d-dazji dovuti. L-awtoritajiet doganali jinnotifikaw l-ammont dovut lid-debitur bl-użu ta’ ordni għall-ħlas ta’ wara r-rilaxx. Statistika mill-Kummissjoni turi li, bl-eċċezzjoni tal-Polonja, l-Istati Membri magħżula raw tnaqqis fl-għadd ta’ ordnijiet għall-ħlas ta’ wara r-rilaxx¹¹ (ara l-Figura 1).

Sors: Id-database OWNRES.

Minħabba li ma hemmx stima tan-nuqqas doganali, mhuwiex possibbli li jiġi vvalutat jekk dan huwiex dovut għal xejra ta’ tnaqqis fl-effettività tal-kontrolli ta’ wara r-rilaxx jew għal tnaqqis f’dak in-nuqqas.

Il-finanzjament insuffiċjenti tas-sistemi tal-IT trans-Ewropej jista’ jdewwem l-implimentazzjoni tal-Kodiċi Doganali tal-Unjoni

L-implimentazzjoni sħiħa tal-Kodiċi Doganali tal-Unjoni (KDU) hija marbuta inseparabbilment mal-iżvilupp tas-sistemi tal-IT li jappoġġawha. L-użu sħiħ tas-sistemi elettroniċi kollha meħtieġa mill-KDU għandu jiġi kkompletat sal-31 ta’ Diċembru 2020. Wara din id-data, it-tekniki tal-ipproċessar elettroniku tad-data jridu jsiru r-regola, u d-dwana tal-UE se tibdel għal ambjent mingħajr karti.

Skont l-evalwazzjoni finali tal-programm ta’ azzjoni Dwana 2013¹², investimenti nazzjonali insuffiċjenti jistgħu jdewmu l-użu fl-UE kollha tas-sistemi doganali. Dan il-programm iffinanzja l-ispeċifikazzjonijiet tal-UE għas-sistemi tal-IT trans-Ewropej, u l-Istati Membri refgħu l-ispejjeż biex is-sistemi nazzjonali jsiru kompatibbli mal-ispeċifikazzjonijiet tal-UE.

L-istess evalwazzjoni tiddikjara li, skont l-uffiċjali tal-Istati Membri, l-ispejjeż għall-amministrazzjonijiet nazzjonali huma ta’ livell simili bħal dawk li l-Kummissjoni terfa’, u li l-implimentazzjoni u t-titjib tas-sistemi Ewopej jistgħu jkunu partikolarment għaljin għall-Istati Membri jekk is-sistemi nazzjonali jkunu kumplessi u jekk ikun hemm nuqqas ta’ integrazzjoni tas-sistemi nazzjonali. Madankollu, xi komponenti tas-Sistemi tal-Informazzjoni Ewropej mhumiex iffinanzjati minn Dwana 2020 u l-ispiża tagħhom tintrefa’ mill-Istati Membri¹³.

Ir-restrizzjonijiet tal-baġit nazzjonali jistgħu jipperikolaw l-implimentazzjoni korretta tas-sistemi Ewropej u xi Stati Membri rrappurtaw nuqqas ta’ baġit nazzjonali fl-2015. Barra minn hekk, l-Istati Membri kkonfermaw ir-riskju ta’ dewmien fir-risposti tagħhom għal kwestjonarju li l-Kummissjoni bagħtet fl-2016.

Bħalma osservat il-Kummissjoni, fl-2015, seba’ Stati Membri jiġbru aktar minn 80 % tal-RPT, u erba’ Stati Membri jiġbru kważi 60 % tal-RPT¹⁴. Jenħtieġ li dan jiġi kkuntrastat mal-ammonti tal-ispejjeż tal-ġbir li jinżammu billi, pereżempju, Stat Membru wieħed¹⁵ iżomm aktar minn EUR 1 000 000 000 u, fl-estrem l-ieħor, Stat Membru ieħor¹⁶ iżomm inqas minn EUR 10 miljun. Madankollu, hemm element ta’ spejjeż fissi fis-sistemi doganali, pereżempju għal dak li jirrigwarda s-sistemi tal-IT¹⁷.

Skont ir-rapport tal-Grupp ta' Livell Għoli dwar ir-Riżorsi Proprji “Countries where the main ports of entry are located (Belgium, the Netherlands) — and thus where significant TOR are collected — have sometimes voiced the argument that their share in TOR is too high” (Pajjiżi fejn jinsabu l-portijiet prinċipali ta’ dħul (il-Belġju, in-Netherlands) — u għaldaqstant fejn jinġabru RPT sinifikanti — xi kultant semmew l-argument li s-sehem tagħhom fl-RPT huwa għoli wisq). B’kuntrast ma’ dan, il-kontributuri żgħar tal-RPT qed iġarrbu piż relattivament akbar fil-finanzjament tal-komponenti tas-Sistemi tal-Informazzjoni Ewropej li ma jitħallsux mill-programm ta’ azzjoni Dwana 2020.

Il-finanzjment ta’ infrastrutturi doganali tal-Istati Membri taħt il-programm ta’ azzjoni Hercule ma jkunx dejjem marbut mal-protezzjoni tal-interessi finanzjarji tal-UE

Aħna eżaminajna eżempji ta’ rapporti finali ta’ implimentazzjoni pprovduti mill-benefiċjarji ta’ Hercule Il u sibna li mhux dejjem ikun hemm rabta ċara bejn l-eżitu tat-tagħmir iffinanzjat u l-protezzjoni tal-interessi finanzjarji tal-UE. Pereżempju, il-programm iffinanzja l-konfiska tal-ħaxixa bl-użu ta’ endoskopji, u ta’ kamera spija żgħira li tinuża fil-qbid ta’ vetturi ta’ valur għoli, eċċ.

Fl-Opinjoni Nru 3/2012 tagħna, aħna sibna¹⁸ li “t-tagħmir kofinanzjat mhux neċessarjament jintuża esklussivament għall-protezzjoni tal-interessi finanzjarji tal-UE, imma wkoll għal operazzjonijiet relatati ma’ droga, armi, ħarbiet mill-ħabs, traffikar tal-persuni, frodi fiskali, frodi tal-karti ta’ kreditu, falsifikazzjoni tal-flus u korruzzjoni fl-aġenziji nazzjonali tal-infurzar tal-liġi”. Dan jista’ jnaqqas l-effettività tad-dwana fil-protezzjoni tal-interessi finanzjarji tal-UE.

L-għodod u l-programmi tal-UE għall-iskambju ta’ informazzjoni doganali u l-kooperazzjoni li qed tiżdied ma laħqux il-potenzjal sħiħ tagħhom

L-iskambji ta’ informazzjoni jistgħu jseħħu fil-livell tal-UE, bejn l-Istati Membri jew bejnhom u l-Kummissjoni, jew fil-livell internazzjonali ma’ pajjiżi mhux tal-UE. Aħna sibna li l-UE stabbiliet sistema li tippermetti li jsiru dawn l-iskambji ta’ informazzjoni, iżda dawn ma jiġux sfruttati bis-sħiħ.

L-UE stabbiliet kanali ta’ informazzjoni promettenti bejn l-Istati Membri u bejn il-Kummissjoni u l-Istati Membri, iżda hemm dgħufijiet fil-kontenut u fl-użu tagħhom

L-għodod għall-iskambju ta’ informazzjoni taħt ir-regolament dwar l-assistenza reċiproka ma jiġux sfruttati bis-sħiħ mill-Istati Membri

L-Istati Membri jistgħu jiskambjaw informazzjoni relatata mal-ksur tal-leġiżlazzjoni doganali bejniethom u mal-Kummissjoni bl-użu tal-għodod u d-databases previsti fir-regolament dwar l-assistenza reċiproka¹⁹. Dawn l-iskambji jsiru permezz tas-Sistema ta' Informazzjoni għal Kontra l-Frodi (AFIS) sekurizzata, li hija l-għodda ta’ komunikazzjoni elettronika li tassisti lill-Istati Membri biex jissodisfaw l-obbligi tagħhom ta’ rappurtar dwar l-irregolaritajiet.

Fuq il-bażi tal-informazzjoni mibgħuta mill-Istati Membri, il-Kummissjoni tista’ tiddeċiedi li tiftaħ investigazzjoni. Il-Kummissjoni tista’ tiddeċiedi wkoll li tiddissemina twissijiet ta’ frodi lill-Istati Membri bl-użu ta’ komunikazzjonijiet ta’ Assistenza Reċiproka (MA).

Aħna sibna li l-Istati Membri ma jimplimentawx b’mod uniformi t-talbiet li jsiru mill-OLAF fil-komunikazzjonijiet tal-MA li jintbagħtu biex tiġi indirizzata l-frodi rigward is-sottovalwazzjoni, id-deskrizzjoni skorretta tal-oriġini jew il-klassifikazzjoni skorretta. Aħna sibna wkoll każijiet fejn l-Istati Membri awditjati ma laqgħux it-talbiet li saru mill-OLAF.

L-Istati Membri jistgħu jużaw sistemi oħra tal-informazzjoni bħas-Sistema ta' Informazzjoni Doganali (SID) biex jassistuhom fil-prevenzjoni, l-investigazzjoni u l-prosekuzzjoni ta’ ksur doganali billi jrendu l-informazzjoni disponibbli aktar rapidament. Madankollu aħna sibna li, ħlief għall-Polonja, l-awtoritajiet doganali l-oħra tal-Istati Membri magħżula rarament jużaw is-SID²⁰ biex jiskambjaw informazzjoni dwar l-irregolaritajiet/il-frodi doganali mal-awtoritajiet kompetenti fi Stati Membri oħra.

L-Istati Membri lmentaw ukoll dwar il-problema ta’ rappurtar doppju fis-SID u fl-iskambju ta’ informazzjoni relatata mar-riskji f’Formola ta' Informazzjoni dwar ir-Riskju (RIF). Dan l-użu baxx tad-database tas-SID u d-duplikazzjonijiet tagħha jnaqqsu l-effettività ta’ dawn l-iskambji ta’ informazzjoni.

Biex tegħleb dawn id-duplikazzjonijiet, il-Kummissjoni ħolqot il-proġett “One Seizure One Report” (Qabda Waħda, Rapport Wieħed). Fl-2016, hija stiednet lill-Istati Membri jikkompletaw stħarriġ. Il-maġġoranza l-kbira tal-Istati Membri identifikaw ir-rappurtar multiplu bħala problema li jeħtieġ tiġi indirizzata. Barra minn hekk, taħt il-qafas tal-programm ta’ azzjoni Dwana 2020, inħoloq grupp ta’ proġett²¹ ikkostitwit minn rappreżentanti tal-Istati Membri u tal-Kummissjoni, biex jiddiskutu l-konklużjonijiet inizjali tal-istħarriġ u biex joħorġu rakkomandazzjonijiet biex tiġi indirizzata l-problema.

L-iskambju ta’ informazzjoni għall-indirizzar tas-sottovalwazzjoni jiffunzjona tajjeb

Biex tegħleb ir-riskju ta’ sottovalwazzjoni, il-Kummissjoni żviluppat metodoloġija biex tistma l-"prezzijiet ġusti”²², billi applikat proċedura tal-istatistika għal data dwar il-COMEXT²³ sabiex toħroġ stimi robusti għall-prezzijiet tal-merkanzija importata²⁴. L-OLAF jiddissemina dawn l-istimi fost l-awtoritajiet doganali tal-Istati Membri.

Din l-informazzjoni dwar il-prezzijiet ġusti hija għodda effettiva għal skopijiet ta’ ġestjoni tar-riskju biex tgħin lill-Istati Membri jidentifikaw każijiet potenzjali ta’ sottovalwazzjoni meta hemm ukoll riskji oħra jew indikaturi ta’ frodi, bħal operaturi tas-suq suspettużi involuti fl-importazzjoni (operaturi tas-suq ta’ fama ħażina). Din tista’ tintuża wkoll bħala bażi biex dik il-parti tan-nuqqas doganali dovuta għal sottovalwazzjoni tiġi stmata.

L-iskambju ta’ informazzjoni biex tiġi indirizzata d-deskrizzjoni skorretta tal-oriġini tjieb reċentement

L-importaturi jistgħu jnaqqsu wkoll l-obbligazzjoni tad-dazju doganali billi, rigward il-merkanzija importata, jiddikjaraw pajjiż ta’ oriġini żbaljat. B’dan il-mod huma jistgħu jilħqu r-rata mnaqqsa jew ir-rata żero ta’ dazju doganali ssettjata f’arranġament kummerċjali preferenzjali (PTA) u/jew jevitaw il-pagament ta’ dazji antidumping (ADD) jew kumpensatorji (CVD)²⁵ stabbiliti għall-pajjiż ta’ oriġini reali. Xi kultant, l-oriġini reali tal-merkanzija tiġi moħbija permezz ta’ trasbord frodulenti f’pajjiż intermedju fejn il-merkanzija tinħażen temporanjament u mbagħad tintbagħat fl-UE b’dokumentazzjoni falza. Fuq l-internet, aħna sibna bosta eżempji ta’ kumpaniji li joffru dan is-“servizz” ta’ trasbord frodulenti.

Biex tindirizza din il-frodi, il-Kummissjoni żviluppat is-sistema ConTraffic u l-Messaġġ dwar l-Istatus tal-Kontejner (MIK). Dawn l-għodod jipprovdu informazzjoni dwar ir-rotot tal-kontejners kif ukoll servizzi ta’ valutazzjoni tar-riskju lill-awtoritajiet doganali. Is-sistema awtomatikament tibgħat sinjali ta’ frodi lill-Istati Membri meta taqbad spariġġi bejn il-pajjiż ta’ oriġini ddikjarat mill-importatur u r-rotta tal-kontejner.

Skont il-JRC, fil-perjodu 2008-2015, permezz ta’ proġett pilota esperimentali mmexxi mill-OLAF u l-JRC f’kollaborazzjoni ma’ 12-il Stat Membru, ġiet analizzata l-oriġini ddikjarata ta’ 5 miljun oġġett għall-importazzjoni, bl-użu tas-sistema ConTraffic, u lill-Istati Membri ntbagħtu 1 187 sinjal ta’ frodi għal frodi potenzjali relatata mal-oriġini. Il-valur ekonomiku potenzjali ta’ dawn is-sinjali kien ta’ EUR 19-il miljun. B’mod ġenerali, għal 2 % tal-merkanzija analizzata ġie kklejmjat pajjiż ta’ oriġini u ta’ dipaċċ li ma kienx jaqbel mar-rotta tal-kontejners. Ibbażat fuq il-proġett ConTraffic, il-Kummissjoni kkonkludiet²⁷ li fl-2011, għall-EU27, bilfors kien hemm aktar minn 1 500 każ ta’ dikjarazzjonijiet foloz tal-oriġini li rriżultaw f’telf ta’ dħul għall-UE għall-valur totali ta’ mill-inqas EUR 25 miljun u li x’aktarx kien jaqbeż l-ammont ta’ EUR 100 miljun.

Madankollu, is-sistema ConTraffic għandha l-limitazzjonijiet tagħha u mhux dejjem tista’ tiddetermina l-oriġini reali tal-merkanzija.

Skambju ta’ informazzjoni relatata mar-riskji: Hemm wisq informazzjoni li hija kontroproduttiva

L-awtoritajiet doganali għandhom l-obbligu li jiskambjaw informazzjoni relatata mhux biss mar-riskji osservati iżda wkoll ma’ theddid li jippreżenta riskju għoli xi mkien ieħor fl-Unjoni²⁸, billi jużaw RIF. Madankollu, ir-rappreżentanti doganali li intervistajna esprimew it-tħassib tagħhom dwar ir-RIFs li waslu minn Stati Membri oħra billi dawn mhux dejjem ikun fihom dettalji biżżejjed biex ikunu utli. Issemmiet ukoll il-problema ta’ rappurtar doppju fis-Sistema Komuni tal-Ġestjoni tar-Riskju Doganali (CRMS) u fis-SID. Barra minn hekk, l-Istati Membri u l-OLAF mhux dejjem jipprovdu feedback xieraq.

Skont l-evalwazzjoni finali tal-programm Dwana 2013²⁹, xi Stati Membri rreġistraw ħafna RIFs għal riskji relattivament żgħar u lokali. Dan wassal għal informazzjoni eċċessiva kif ukoll għal diffikultajiet fl-identifikazzjoni tar-riskji ewlenin.

Il-kooperazzjoni u l-iskambju ta’ informazzjoni ma’ pajjiżi mhux tal-UE qed jitjiebu

Jekk Stat Membru jkollu dubji raġonevoli dwar il-validità u/jew l-awtentiċità tal prova tal-oriġini preferenzjali li tkun qed tiġi kklejmjata, huwa jista’ jibgħat talba għal kooperazzjoni amministrattiva lill-pajjiż benefiċjarju/sieħeb ta’ PTA għall-konferma tiegħu. Jistgħu jitqajmu dubji raġonevoli meta l-kampjun tat-timbru li jkun intuża il-prova tal-oriġini jew l-awtorità li tkun ħarġitu jkun differenti minn dawk li jidhru fid-database Sistema ta' Ġestjoni tal-Eżemplari³⁰ (SMS) immaniġġjata mill-Kummissjoni. Ir-risposta mill-awtoritajiet tal-pajjiżi mhux tal-UE jew, taħt ċerti ċirustanzi, in-nuqqas tagħha jistgħu jiġġustifikaw ir-rifjut tat-trattament tariffarju preferenzjali³¹.

Aħna wettaqna segwitu tal-implimentazzjoni mill-Kummissjoni tar-Rakkomandazzjonijiet Nri 5 sa 13 imwettqa mill-Qorti fir-Rapport Speċjali Nru 2/2014 tagħha “L-Arranġamenti kummerċjali preferenzjali huma ġestiti b’mod xieraq?” u sibna li l-Kummissjoni implimentat pjan ta’ azzjoni għall-monitoraġġ tat-tħaddim ta’ PTAs³² u stabbiliet rutina ta’ monitoraġġ permanenti (kwestjonarji, żjarat. eċċ.).

Madankollu, l-Istati Membri rrappurtaw problemi b’pajjiżi bħall-Indja, l-Indoneżja, l-Afganistan, in-Nepal, u l-Bangladesh rigward risposti tardivi u kwalità insuffiċjenti tar-risposti għat-talbiet għal kooperazzjoni amministrattiva (AC). Fl-awditu msemmi hawn fuq, il-Qorti diġà qabdet problemi rigward l-Indja u l-Vjetnam³³.

Il-Ftehimiet ta’ Assistenza Reċiproka (MAAs) jew il-Protokolli tal-MAAs għal ftehimiet internazzjonali jipprovdu bażi legali biex tintalab informazzjoni minn pajjiżi mhux tal-UE u jaqdu tajjeb l-iskop tagħhom. Madankollu, aħna sibna inċidenti ta’ kooperazzjoni insuffiċjenti miċ-Ċina: l-Istati Membri rrappurtaw problemi fil-ksib ta’ risposti għal talbiet li ntbagħtu bl-użu ta’ Assistenza Reċiproka. Skont l-OLAF, sa issa twieġbu biss terz minn madwar 150 talba għal verifikazzjoni li ntbagħtu ċ-Ċina wara l-JCO Snake³⁴. Ir-Renju Unit juża l-Uffiċjal ta' Kollegament mal-Awtoritajiet Doganali Barranin (FCLO) proprju tiegħu fiċ-Ċina biex jikseb informazzjoni dwar l-esportazzjonijiet għar-Renju Unit. L-OLAF għandu wkoll Uffiċjal ta' Kollegament extra-Ewropew (OLO) f’Beijing.

Fil-kuntest tal-“Pjan ta' Azzjoni dwar is-Sottovalwazzjoni” li jakkumpanja l-Ftehim ta' Kooperazzjoni Amministrattiva Strateġika tal-2015, l-awtoritajiet Ċiniżi għamlu dikjarazzjoni ta’ ċaħda ta’ responsabbiltà fuq id-dokumenti ppreżentati lill-UE, li tiddikjara li dawn ma jistgħux jintużaw fi proċedimenti amministrattivi. L-evidenza tal-prezzijiet tat-tessuti u x-xedd is-saqajn iddikjarati fl-esportazzjoni, tkun tagħmilha aktar faċli għall-awtoritajiet doganali tal-Istati Membri biex jirkupraw it-telf minħabba sottovalwazzjoni meta l-operaturi tas-suq jikkontestaw l-ordnijiet għall-ħlas ta’ wara r-rilaxx quddiem qorti.

Ibbażat fuq il-ħtiġijiet operazzjonali tiegħu, l-OLAF attwalment jinsab fil-proċess li jinnegozja għadd ta’ ACAs mal-awtoritajiet sħab f’pajjiżi mhux tal-UE u f’organizzazzjonijiet internazzjonali. L-ACAs bejn l-OLAF u l-awtoritajiet investigattivi tal-pajjiżi mhux tal-UE jirrappreżentaw għodda addizzjonali importanti għall-protezzjoni tal-interessi finanzjarji tal-Unjoni Ewropea li jikkomplementaw il-qafas legali eżistenti.

Il-programmi ta’ azzjoni tal-UE taw spinta lill-kondiviżjoni tal-għarfien u tal-kooperazzjoni bejn l-Istati Membri, iżda dawn ma kinux effettivi biex jiżguraw li l-amministrazzjonijiet doganali kollha jaġixxu daqslikieku kienu amministrazzjoni waħda

Il-programmi Dwana 2013/2020 u Hercule II/III jipprovdu fondi biex l-awtoritajiet doganali jkunu jistgħu jikkooperaw ma’ xulxin u jiskambjaw informazzjoni u l-aħjar prattika permezz ta’ (i) sistemi ta’ komunikazzjoni u ta’ skambju ta’ informazzjoni; u (ii) parteċipazzjoni f’azzjonijiet konġunti, bħal seminars, taħriġ, gruppi ta’ proġetti, żjarat ta’ ħidma, u operazzjonijiet transkonfinali. Aħna sibna li kemm Dwana 2013 kif ukoll Hercule II kienu effettivi fit-trawwim ta’ kondiviżjoni tal-għarfien u fil-kooperazzjoni fost l-Istati Membri.

Madankollu, skont ir-rapport mill-Kummissjoni lill-Parlament Ewropew u lill-Kunsill dwar il-kisba (ilħuq) tal-objettivi tal-programm Hercule II³⁵, “filwaqt li saru sforzi biex jiġi kkoordinat l-ippjanar tal-programmi differenti tal-Unjoni fil-qasam doganali pereżempju, jista’ jsir aktar biex tissaħħaħ il-kooperazzjoni bejn is-servizzi tal-Kummissjoni bil-għan li jittieħed benefiċċju minn sinerġiji bejn il-programmi u jiġu evitati duplikazzjonijiet bejn il-Programmi u l-inizjattivi tal-UE”.

Il-programm Dwana 2013 għandu bħala l-objettiv speċifiku tiegħu “li tinżamm sistema ta' evalwazzjoni (kejl) tal-prestazzjoni tal-amministrazzjonijiet doganali tal-Istati Membri sabiex jittejbu l-effiċjenza u l-effikaċjà (effettività) tagħhom”³⁶. Madankollu, aħna ma sibna l-ebda indikatur tal-prestazzjoni la għall-kejl tal-ilħuq tal-objettiv, tal-programm Dwana 2013, li l-amministrazzjonijiet doganali kollha tal-Istati Membri “jaġixxu daqslikieku kienu amministrazzjoni waħda”, filwaqt li jiżguraw li l-kontrolli jkollhom riżultati ekwivalenti f’kull punt tat-territorju doganali tal-UE, u lanqas għall-kejl tal-ilħuq tal-objettiv tal-programm Dwana 2013 li jiġu protetti l-interessi finanzjarji tal-UE. Aħna sibna li l-programm Dwana 2013 ma laħaqx l-objettiv tiegħu li jiżgura li l-amministrazzjonijiet doganali kollha jaġixxu daqslikieku kienu amministrazzjoni waħda (ara l-paragrafi 89 sa 110).

Il-konklużjoni mill-evalwazzjoni finali tal-programm Dwana 2013, relatata mal-protezzjoni tal-interessi finanzjarji tal-UE, kienet ibbażata fuq il-feedback li wasal minn maġġoranza ta’ amministrazzjonijiet nazzjonali. Dawn kellhom opinjoni pożittiva dwar is-sistema tal-ġestjoni tar-riskju doganali u l-kontribuzzjonijiet tas-sistema Sorveljanza 2 għall-ġestjoni tar-riskju. Madankollu, aħna sibna dgħufijiet li kienu jaffettwaw iż-żewġ sistemi ta’ skambju ta’ informazzjoni. Aħna sibna wkoll li l-amministrazzjonijiet tal-Istati Membri ma jaġixxux daqslikieku kienu amministrazzjoni waħda.

Fir-rigward tal-azzjonijiet konġunti, il-programm ikkontribwixxa għall-bini u s-sostenn ta’ netwerks. Skont l-evalwazzjoni finali, kien hemm evidenza qawwija li l-programm ikkontribwixxa sinifikattivament għat-tixrid ta’ informazzjoni rilevanti, prattika tajba, u metodi u proċeduri ta’ ħdima bejn l-Istati Membri tal-UE, partikolarment fir-rigward tal-iżvilupp ta’ speċifikazzjonijiet nazzjonali għas-sistemi tal-IT u l-implimentazzjoni tagħhom.

Fir-rigward ta’ Dwana 2020, minkejja li l-evalwazzjoni finali tal-programm Dwana 2013 irrakkomandat li jiġi żviluppat qafas ta’ monitoraġġ komprensiv għas-segwitu tal-prestazzjoni u biex jiġu identifikati problemi preokkupanti b’mod f’waqtu, aħna ma sibna l-ebda evidenza li l-Istati Membri qed jiġbru l-indikaturi tal-prestazzjoni biex ikejlu l-livell ta’ konverġenza bejn l-Istati Membri (jiġifieri jaħdmu bħala amministrazzjoni waħda).

Skont l-Artikolu 1(2)(a) tad-Deċiżjoni dwar Hercule II³⁷, wieħed mill-objettivi tal-programm kien li jtejjeb il-kooperazzjoni transnazzjonali u multidixxiplinarja bejn l-awtoritajiet tal-Istati Membri, il-Kummissjoni u l-OLAF. Madankollu, l-evalwazzjoni finali tikkonkludi li l-Programm Hercule II primarjament itejjeb il-kooperazzjoni transnazzjonali u multidixxiplinarja bejn l-Istati Membri³⁸. Taħriġ fil-ġlieda kontra l-frodi kif ukoll taħriġ, seminars u konferenzi b’fokus legali kienu l-motivaturi prinċipali li wasslu biex jintlaħaq dan l-objettiv.

Informazzjoni dwar il-livell ta’ ksib tal-indikaturi tal-impatti tal-programm Dwana 2020 mhijiex disponibbli. Barra minn hekk, lanqas ma hemm informazzjoni dwar il-ksib tal-indikaturi tal-output, tar-riżultati jew tal-impatti rigward il-programm Hercule III. Dan ma jħallina nwettqu l-ebda valutazzjoni proviżorja tal-effettività ta’ dawn il-programmi.

L-UE għamlet progress lejn l-applikazzjoni uniformi tal-leġiżlazzjoni doganali

Bħala Unjoni doganali, jeħtieġ li l-UE tapplika t-Tariffa doganali komuni u l-leġiżlazzjoni doganali tal-UE b’mod uniformi, filwaqt li tiżgura l-protezzjoni tal-interessi finanzjarji tal-UE u kundizzjonijiet ekwivalenti ta' kompetizzjoni għall-operaturi tas-suq li joperaw fis-suq intern.

It-tariffa hija l-isem li jingħata lil kombinament tan-nomenklatura (jew klassifikazzjoni tal-merkanzija) u r-rati ta’ dazju li japplikaw għal kull klassi tal-merkanzija. Din hija komuni għall-Istati Membri kollha tal-UE, iżda r-rati ta’ dazju jiddependu min-natura tal-merkanzija importata u mill-oriġini tagħhom. Hija tinkludi l-leġiżlazzjoni l-oħra kollha tal-UE li għandha effett fuq il-livell ta’ dazju doganali li jista’ jitħallas fuq importazzjoni partikolari, pereżempju l-politika kummerċjali komuni³⁹.

B’mod ġenerali, it-TARIC tiżgura l-applikazzjoni uniformi tal-miżuri tariffarji

It-TARIC, it-tariffa doganali integrata tal-UE, hija database multilingwi li fiha huma integrati l-miżuri kollha relatati mat-Tariffa doganali komuni u mal-leġiżlazzjoni kummerċjali u agrikola. Hija tgħin biex tiġi żgurata l-applikazzjoni uniformi mill-Istati Membri kollha u tagħti lill-operaturi ekonomiċi stampa ċara tal-miżuri kollha li għandhom jittieħdu meta jkunu qed jimportaw merkanzija għall-UE jew jesportawha mill-UE⁴⁰.

Il-Kummissjoni timmonitorja jekk id-database TARIC hijiex integrata jew marbuta mas-sistemi ta’ rilaxx doganali fl-Istati Membri b’żewġ modi: (i) permezz ta’ żjarat ta’ monitoraġġ lill-awtoritajiet doganali tal-Istati Membri u (ii) permezz ta’ monitoraġġ kontinwu tal-kwalità/korrettezza (kontrolli tal-kredibbiltà) tad-dikjarazzjonijiet doganali ppreżentati fl-Istati Membri, permezz tad-database Sorveljanza 2.

Aħna sibna li r-Renju Unit mhuwiex juża l-verżjoni attwali tat-TARIC, it-TARIC 3, minħabba li t-TARIC 1 hija l-unika verżjoni li s-sistema elettronika ta’ rilaxx doganali tar-Renju Unit hija kapaċi tapplika. Id-data tat-TARIC 3 tinbidel manwalment għal dik tat-TARIC 1 u tittella’ fis-sistema. Barra minn hekk, xi miżuri ta’ restrizzjoni tat-TARIC huma neqsin mis-sistema nazzjonali tat-TARIC tar-Renju Unit. Fl-aħħar nett, ir-Renju Unit juża kodiċijiet ta’ proċedura doganali differenti minn dawk ta’ Stati Membri oħra⁴¹.

Barra minn hekk, għad-database Sorveljanza 2, ir-Renju Unit ma jirrappurtax separatament lill-Kummissjoni reġistri tad-dikjarazzjonijiet tal-importazzjoni inqas minn EUR 1 000⁴² għal proċeduri simplifikati, minħabba li huwa japplika soll issettjat għall-forniment ta’ statistika lill-Eurostat dwar il-kummerċ estern ma’ pajjiżi mhux tal-UE. Taħt dan is-soll, oġġetti għall-importazzjoni jiġu aggregati f’kodiċi speċjali tal-prodott bażiku, li dwaru jkun intlaħaq qbil mal-Eurostat, biex dan l-aspett tal-leġiżlazzjoni jiġi ssodisfat. Fl-2014 u l-2015, 88 % tad-dikjarazzjonijiet tal-importazzjoni fil-livell tal-artikoli ġew ippreżentati bl-użu ta’ proċeduri simplifikati fir-Renju Unit.

L-operaturi tas-suq li jimportaw merkanzija fir-Renju Unit jiffaċċjaw riskju għoli li l-leġiżlazzjoni tal-UE ma tkunx applikata b’mod uniformi, minħabba:

1. l-aġġornament manwali tat-TARIC fis-sistema elettronika ta’ rilaxx doganali, li jinvolvi riskju ta’ impreċiżjonijiet u ġbir tad-dħul inkomplet;
2. in-nuqqas ta’ miżuri ta’ restrizzjoni fit-TARIC tar-Renju Unit, li jinvolvi riskji ta’ sikurezza u ta’ sigurtà;
3. in-nuqqas ta’ kontrolli tal-kredibbiltà mwettqa fuq ir-reġistri tad-dikjarazzjonijiet tal-importazzjoni ta’ inqas minn EUR 1 000, li jkompli jżid ir-riskju ta’ applikazzjoni żbaljata tat-TARIC; u
4. l-użu ta’ kodiċijiet ta’ proċedura doganali differenti għall-importazzjoni, li jirrappreżenta piż għall-operaturi tas-suq li joperaw fi Stati Membri differenti kif ukoll riskju ta’ applikazzjoni żbaljata tad-dispożizzjonijiet doganali.

Barra minn hekk, il-Kummissjoni twettaq aġġornamenti tat-TARIC b’effett retroattiv, u dawn jistgħu jaffettwaw l-interessi finanzjarji tal-UE. Madankollu, dawn l-aġġornamenti ma jiġux ikkomunikati b’mod sistematiku lid-DĠ Baġit biex b’hekk ikunu jistgħu jwettqu segwitu tal-applikazzjoni uniformi tagħhom fl-Istati Membri.

Il-liċenzji u d-dokumenti ta’ sorveljanza huma essenzjali fl-applikazzjoni ta’ miżuri ta’ politika kummerċjali bħal sospensjonijiet tariffarji⁴³, kwoti tariffarji, kwoti, limiti massimi tariffarji⁴⁴, u miżuri ta’ sorveljanza⁴⁵. Fl-applikazzjoni ta’ dawn il-miżuri, huwa essenzjali li jittieħed kont tal-volum tal-merkanzija importata li f’xi każijiet ma jistax jinqabeż jew, meta jinqabeż, rati standard ta’ dazju jkunu japplikaw.

Il-liċenzji u d-dokumenti ta’ sorveljanza jinħarġu għal kwantità fissa ta’ merkanzija. Sabiex jiġi garantit li l-ebda merkanzija ma tiġi rilaxxata fis-suq tal-UE mingħajr dokument validu, il-kwantitajiet iridu jinkitbu fuq il-liċenzja u jiġu ċċertifikati mid-dwana għal kull importazzjoni individwali fil-mument tar-rilaxx⁴⁶.

Fir-Rapport Speċjali Nru 1/2010 tagħha, “Il-Proċeduri Ssimplifikati Doganali għall-importazzjoni huma kkontrollati b’mod effettiv?”, il-Qorti rrakkomandat⁴⁷ li jenħtieġ li l-Kummissjoni tinkoraġġixxi lill-Istati Membri kollha jikkompjuterizzaw l-ipproċessar tal-proċeduri simplifikati inkluża l-ġestjoni elettronika (reġistrazzjoni ta’ data online waqt ir-rilaxx tal-merkanzija) ta’ liċenzji u ta’ dokumenti simili u tal-użu ta’ profili tar-riskju bbażati fuq l-IT li jkopru t-TOR (RPT) u kwistjonijiet tal-politika kummerċjali komuni.

Huwa skedat li din ir-rakkomandazzjoni tiġi implimentata sa tmiem l-2020, bl-applikazzjoni sħiħa tad-dispożizzjonijiet tal-KDU dwar il-proċeduri simplifikati⁴⁸. Madankollu, hija mhijiex se tkopri r-reġistrazzjoni ta’ data online ta’ liċenzji u ta’ dokumenti simili fil-mument tar-rilaxx tal-merkanzija fl-Istati Membri kollha. L-importazzjonijiet mingħajr dokument validu jaffettwaw l-interessi tal-produtturi tal-UE b’mod negattiv li l-miżura ta’ politika kummerċjali hija intenzjonata li tipproteġi. Barra minn hekk, dan jista’ jaffettwa l-interessi finanzjarji tal-UE fil-każ ta’ sospensjonijiet tariffarji, kwoti tariffarji, kwoti, limiti massimi tariffarji.

Il-Kummissjoni implimentat ir-rakkomandazzjonijiet tal-QEA dwar l-Informazzjoni Vinkolanti dwar it-Tariffi

Informazzjoni Vinkolanti dwar it-Tariffi (BTI) hija deċiżjoni uffiċjali bil-miktub, li hija valida għal tliet snin, maħruġa minn awtorità doganali li tipprovdi lill-applikant valutazzjoni tal-klassifikazzjoni tal-merkanzija fin-nomenklatura tariffarja tal-UE qabel importazzjoni (jew esportazzjoni). Il-BTI torbot lill-awtoritajiet doganali kollha tal-UE u lid-detentur tad-deċiżjoni. Meta l-importatur ikun id-detentur ta’ BTI, jenħtieġ li dan jiġi indikat fid-dikjarazzjoni doganali rigward l-importazzjoni tal-merkanzija tat-tip inkluż fil-kamp ta’ applikazzjoni tal-BTI. Il-BTI tagħti ċertezza lill-operaturi tas-suq u tikkontribwixxi għall-applikazzjoni uniformi tal-leġiżlazzjoni doganali.

Aħna wettaqna segwitu tal-implimentazzjoni mill-Kummissjoni tar-rakkomandazzjonijiet tagħna li għamilna f’Rapport Speċjali⁴⁹ preċedenti. Aħna sibna li, minkejja li hemm xi żviluppi tal-IT⁵⁰, li se jkunu disponibbli biss minn Ottubru 2017 'il quddiem, ir-rakkomandazzjonijiet kollha ġew indirizzati permezz tad-dħul fis-seħħ tal-KDU u tal-Atti ta’ Implimentazzjoni u Delegati tiegħu fl-1 ta’ Mejju 2016.

Madankollu, waqt ir-rilaxx, l-awtoritajiet doganali tal-Istati Membri magħżula minna ma jivverifikawx il-fatt li d-detentur ta’ BTI, fil-fatt, jużaha għall-importazzjonijiet tal-merkanzija tat-tip indikat fil-BTI. Id-dikjarazzjonijiet tal-importazzjoni, li jiddikjaraw kodiċi TARIC differenti iżda simili għal dak indikat fil-BTI, lanqas ma jiġu identifikati mis-sistema tal-ġestjoni tar-riskju biex isirilhom kontroll ta’ wara r-rilaxx. Għaldaqstant, detentur tal-BTI li ma jkunx issodisfat bid-deċiżjoni dwar il-BTI jista’ b’mod skorrett jikklassifika l-importazzjonijiet biex jevita d-deċiżjoni jekk l-Istati Membri ma jivverifikawx l-applikazzjoni tagħha, u jevita li jħallas id-dazji ogħla stipulati fil-BTI.

Għad ma hemm l-ebda deċiżjoni dwar il-valwazzjoni fl-UE kollha

Deċiżjoni dwar il-valwazzjoni fl-UE kollha tkun deċiżjoni uffiċjali bil-miktub maħruġa minn awtorità doganali li tipprovdi lill-applikant valutazzjoni tat-trattament li għandu jiġi applikat fuq ċertu element tal-valur doganali, qabel importazzjoni, għal perjodu speċifikat. Id-deċiżjoni tkun tindika kif, pereżempju, għandu jiġi ttrattat pagament ta’ kummissjonijiet, pagament tar-royalties jew aspetti ta’ ftehim ta’ pprezzar ta’ trasferiment għal skopijiet ta’ valwazzjoni doganali⁵¹.

Deċiżjoni dwar il-valwazzjoni fl-UE kollha tkun tipprovdi ċertezza tad-dritt u tiżgura kundizzjonijiet ekwivalenti ta' kompetizzjoni għall-operaturi tas-suq li joperaw f’bosta Stati Membri. Aħna rrakkomandajna⁵² li jenħtieġ li l-Kummissjoni tieħu azzjoni leġiżlattiva u amministrattiva xierqa biex tegħleb in-nuqqas ta’ dispożizzjonijiet tad-dritt Komunitarju li jippermettu l-istabbiliment ta’ deċiżjonijiet, fil-Komunità kollha, dwar il-valwazzjoni.

Il-KDU⁵³ ta s-setgħa lill-Kummissjoni biex, permezz ta’ att delegat, testendi l-ambitu tad-deċiżjonijiet relatati ma’ informazzjoni vinkolanti biex ikopri wkoll “fatturi oħra li abbażi tagħhom jkunu applikati dazji tal-importazzjoni jew l-esportazzjoni u miżuri oħra li jikkonċernaw il-kummerċ tal-merkanzija”, u għalhekk ġew inklużi kwistjonijiet ta’ valwazzjoni. Madankollu, sa issa, il-Kummissjoni għadha ma użatx din is-setgħa.

Il-Kummissjoni għadha ma implimentatx ir-rakkomandazzjoni tal-Qorti. Għaddew 17-il sena u għadu mhuwiex possibbli li jinħarġu deċiżjonijiet dwar il-valwazzjoni fl-UE kollha.

L-Istati Membri ma jsegwux approċċ uniformi għall-kontroll doganali tal-importazzjonijiet, u dan jista’ jwassal għal pagament insuffiċjenti ta’ dazji doganali

L-awtoritajiet doganali tal-Istati Membri suppost jaġixxu “daqslikieku kienu amministrazzjoni waħda”. Dan kien wieħed mill-objettivi tal-programm Dwana 2013. Meta l-Istati Membri ma jsegwux approċċ uniformi għall-kontrolli doganali, il-frodaturi jistgħu jagħżlu l-ħolqa l-aktar dgħajfa fil-katina biex iwettqu l-importazzjonijiet frodulenti tagħhom.

Aħna sibna li ma hemm l-ebda applikazzjoni armonizzata u standardizzata tal-kontrolli doganali mill-Istati Membri, biex tiżgura livell ekwivalenti ta’ kontroll doganali fl-Unjoni kollha sabiex ma titfaċċax imġiba antikompetittiva fid-diversi punti ta’ dħul u ta’ ħruġ tal-Unjoni.

In-nuqqas ta’ approċċ uniformi għall-kontrolli doganali fuq is-sottovalwazzjoni jfixkel l-għażla tal-Istat Membru fir-rigward tal-importazzjoni

L-Istati Membri jiffaċċjaw l-isfida li tiġi indirizzata l-frodi relatata ma’ sottovalwazzjoni. Jenħtieġ li l-kontrolli tar-rilaxx jiġu prijoritizzati f’dawn il-każijiet ta’ frodi potenzjali minħabba li l-importaturi jistgħu sussegwentement isiru insolventi jew jiġu neqsin. Meta jkun hemm dubji raġonevoli dwar jekk il-valur iddikjarat jirrappreżentax il-valur reali tat-tranżazzjoni, l-awtoritajiet doganali jistgħu, meta jkunu qed iwettqu kontrolli tar-rilaxx, jitolbu informazzjoni addizzjonali u li jiġu ppreżentati dokumenti addizzjonali. Dubji raġonevoli jistgħu jeżistu, b’mod partikolari, meta l-valur iddikjarat ma jkunx daqs valur ta’ limitu tar-riskju ddefinit.

Għal skopijiet ta’ ġestjoni tar-riskju, il-valur ta’ limitu tar-riskju jista’ jiġi ddeterminat fuq il-bażi ta’ prezzijiet ġusti (ara l-paragrafu 48). F’ċerti każijiet, l-importaturi jippreżentaw evidenza ta’ sostenn (fatturi, kuntratti tal-bejgħ, rendikonti bankarji) li kollha kemm hi tkun taqbel mal-valuri baxxi (foloz) iddikjarati. Kollox ikun jaqbel ma’ dak imniżżel fid-dokumenti ppreżentati lid-dwana, u s-sottovalwazzjoni hija diffiċli biex tinqabad. F’każijiet bħal dawn, jista’ jkun hemm pagamenti oħra, jew fi flus kontanti jew inkella permezz ta’ pajjiżi terzi għad-differenza bejn il-prezz iddikjarat (sottovalwat) u dak reali. Il-Figura 2 hawn taħt turi eżempju ta’ sottovalwazzjoni b’pagament fi flus kontanti bil-quddiem.

Sors: Il-QEA, ibbażat fuq eżempju tad-WCO.

Il-proċedura doganali 42 (CP 42) hija s-sistema li importatur juża sabiex jikseb eżenzjoni mill-VAT meta l-merkanzija importata tiġi ttrasportata għal Stat Membru ieħor. F’dan il-każ, il-VAT tkun dovuta fl-Istat Membru tad-destinazzjoni⁵⁴. Meta l-importazzjoni ssir taħt is-CP 42, jenħtieġ li, bl-użu ta’ assistenza reċiproka, tintalab informazzjoni addizzjonali dwar il-valur reali tat-tranżazzjoni mingħand l-awtoritajiet doganali tal-Istat Membru tad-destinazzjoni jitolbu , minħabba li f’dawn il-każijiet ir-riċevitur finali tal-merkanzija jista’ jagħmel pagament lil, eż. il-fornitur Ċiniż, li jkun ħafna ogħla mill-valur tal-fattura li r-rappreżentant doganali juri lill-awtoritajiet doganali tal-Istat Membru tal-importazzjoni. Madankollu, dan jista’ jieħu l-ħin jew ma jirnexxix minħabba li l-akkwirent iddikjarat jista’ jkun differenti mir-riċevitur finali tal-merkanzija jew jista’ jkun operatur nieqes tas-suq⁵⁵.

Meta jkun għad hemm dubji, jistgħu jittieħdu kampjuni tal-merkanzija importata u tista’ tintalab li tingħata garanzija⁵⁶ biex tkopri t-telf potenzjali tad-dazji. Il-Kummissjoni pprovdiet linji gwida ċari lill-Istati Membri dwar kif għandha tiġi indirizzata s-sottovalwazzjoni matul l-implimentazzjoni tal-Iskont taż-Żona ta' Kontroll Prijoritarja (PCA) fuq is-sottovalwazzjoni tat-tessuti u x-xedd is-saqajn minn pajjiżi Asjatiċi. Madankollu, diffikultajiet prattiċi għadhom jippersistu.

F’kull wieħed mill-Istati Membri li saritilhom żjara, aħna għażilna kampjun ta’ 30 importazzjoni potenzjalment sottovalwati, tat-tessuti u x-xedd is-saqajn mill-Asja, li twettqu fl-2015, sabiex nivverifikaw jekk kinux ġew aċċettati t-talbiet li kienu jinsabu fil-komunikazzjonijiet tal-MA mill-OLAF li kienu rilevanti għas-sottovalwazzjoni. Aħna sibna li l-Istati Membri kienu implimentaw il-komunikazzjonijiet tal-MA b’modi differenti u li t-talbiet li saru mill-OLAF ma ġewx issodisfati fil-każijiet kollha. Aħna sibna wkoll li l-oġġetti fil-kampjun kienu sinifikattivament sottovalwati. F’xi każijiet, il-prezzijiet tal-qoton ipproċessat iddikjarati fl-importazzjoni kienu saħansitra inqas mill-prezz tal-qoton mhux ipproċessat. Il-Figura 3 u l-Figura 4 hawn taħt juru tqabbil bejn il-valuri ta’ limitu tar-riskju tal-qoton ipproċessat, il-prezzijiet tal-qoton mhux ipproċessat u l-prezzijiet iddikjarati fl-importazzjoni, fil-kampjuni tar-Renju Unit u tal-Polonja:

Sors: Il-QEA, ibbażat fuq data mir-riżorsa bbażata fuq il-web, THESEUS (https://theseus.jrc.ec.europa.eu) u minn http://www.finanzen.net/rohstoffe/baumwollpreis/euro/historisch.

Sors: Il-QEA, ibbażat fuq data mir-riżorsa bbażata fuq il-web, THESEUS (https://theseus.jrc.ec.europa.eu) u minn http://www.finanzen.net/rohstoffe/baumwollpreis/euro/historisch.

Aħna sibna wkoll li l-Istati Membri li jwettqu inqas kontrolli tar-rilaxx doganali jattiraw aktar importazzjonijiet. Dawn huwa partikolarment evidenti fil-każ ta’ kontrolli relatati mas-sottovalwazzjoni tat-tessuti u x-xedd is-saqajn miċ-Ċina, fejn l-Istati Membri li ma jwettqux kontrolli tar-rilaxx doganali jattiraw traffiku minn Stati Membri oħra.

Ir-Renju Unit ma japplikax il-limiti tar-riskju deskritti fil-paragrafu 92 u lanqas ma jitlob, waqt ir-rilaxx, garanzija għar-rilaxx ta’ merkanzija ddikjarata b’valur doganali potenzjalment sottovalwat sabiex tkopri t-telf ta’ dazju potenzjali. Madankollu, l-OLAF talab lill-Istati Membri kollha jieħdu l-miżuri prekawzjonarji kollha xierqa biex jipproteġu l-interessi finanzjarji tal-UE u jieħdu dazju fuq id-depożitu li jsir fuq kunsinni suspettużi identifikati sabiex jipprevienu t-telf futur ta’ dazji doganali.

Aħna sibna li n-nuqqas ta’ talba għal garanzija fir-Renju Unit fir-rigward ta’ merkanzija potenzjalment sottovalwata wassal għal devjazzjonijiet tat-traffiku: importazzjonijiet ta’ merkanzija Ċiniża sinifikattivament sottovalwata li tkun ġejja fi tranżitu minn Stati Membri oħra li, wara li tiġi żdoganata taħt is-CP 42 fir-Renju Unit, tiġi ttrasportata lura għall-Ewropa kontinentali, eż. tessuti jew xedd is-saqajn miċ-Ċina mibgħuta taħt proċedura ta’ tranżitu estern minn Hamburg għal Dover, fejn din tiġi rilaxxata għal ċirkolazzjoni libera taħt is-CP 42 mingħajr it-twettiq ta’ kontrolli tar-rilaxx u mbagħad tiġi ttrasportata lura għal, pereżempju, il-Polonja jew is-Slovakkja. Il-Figura 5 turi eżempju ta’ din l-“għażla tal-punt ta’ importazzjoni” bl-użu tas-CP 42:

Sors: Il-QEA.

L-operazzjoni Octopus twettqet fl-2016 mid-Dwana Franċiża bil-kooperazzjoni tal-OLAF. Din kienet iffukata fuq l-importazzjonijiet taħt is-CP 42. Din l-azzjoni ta’ kooperazzjoni amministrattiva ġibdet l-attenzjoni għall-fatt li l-frodi relatata ma’ sottovalwazzjoni seħħet prinċipalment fir-Renju Unit u ġiet aggravata aktar mill-fatt li l-VAT ma tħallsitx fl-Istati Membri tad-destinazzjoni. Il-valuri ddikjarati fuq il-bażi ta’ fatturi foloz kienu sottovalwati minn 5 sa 10 darbiet b’impatt sinifikanti fuq id-dazji doganali u t-taxxi miġbura⁵⁷.

Fir-rigward tal-impatt tal-użu frodulenti tas-CP 42 fuq it-telf tal-VAT u tad-dazji doganali, skont il-paragrafu 83 tar-Rapport Speċjali Nru 24/2015⁵⁸ tagħna, “Fir-Renju Unit aħna sibna żewġ każijiet ta’ importazzjonijiet sottovalwati taħt il-proċedura doganali 42, li kienu diġà ġew identifikati mill-HMRC b’riżultat tal-JCO tal-OLAF. L-HMRC stama li l-impatt fuq il-ġbir tal-VAT fir-Renju Unit huwa ta’ GBP 0.5 miljun, u ta’ GBP 10.6 miljun fi Stati Membri oħra. L-impatt stmat fuq il-ġbir doganali fir-Renju Unit jammonta għal GBP 81 miljun. Dawn l-impatti ġew stmati mill-HMRC għall-oġġetti kollha importati miż-żewġ nnegozjanti identifikati fil-kampjun f'perjodu ta' tliet snin”.

Il-Figura 6 turi data mill-Eurostat mill-perjodu 2007-2016 dwar il-ħames Stati Membri magħżula mill-Qorti. L-Istati Membri li implimentaw kontrolli tar-rilaxx bir-reqqa fuq is-sottovalwazzjoni tat-tessuti u x-xedd is-saqajn miċ-Ċina raw żieda fil-prezzijiet medji ddikjarati tal-importazzjonijiet iżda esperjenzaw tnaqqis fil-volum tal-importazzjonijiet. Iż-żieda fil-volum tal-importazzjonijiet fir-Renju Unit kienet ta’ 358 000 tunnellata, filwaqt li t-tnaqqis kumplessiv fl-erba’ Stati Membri l-oħra kien ta’ 264 000 tunnellata.

Sors: L-Eurostat.

Dan huwa kkorroborat aktar mill-istimi ta’ telf potenzjali tad-dazji minħabba sottovalwazzjoni tat-tessuti u x-xedd is-saqajn li saret mill-OLAF għall-perjodu 2013-16.

Skont l-OLAF⁵⁹, ir-Renju Unit kien imissu għamel disponibbli ammont stmat ta’ EUR 1.9874 biljun (gross), jew EUR 1.5736 biljun (nett), aktar riżorsi proprji tradizzjonali milli għamel mill-2013 sal-2016. Il-kwantifikazzjoni tat-telf possibbli (f’termini netti, wara t-tnaqqis tal-ispejjeż tal-ġbir) bi tqabbil mar-riżorsi proprji totali u r-riżorsi proprji tradizzjonali, li fil-fatt saru disponibbli mill-Istati Membri matul l-istess perjodu, jinstabu hawn taħt fil-Figura 7.

Sors: Id-DĠ Baġit, Ir-Rapport Annwali tal-Attività 2016.

Dan ikompli jikkorrobora s-sejbiet tagħna tar-Rapport Speċjali Nru 23/2016 li "differenzi fil-prattiki tal-kontroll doganali bejn l-Istati Membri jistgħu jagħmlu port wieħed aktar attraenti mill-oħrajn għal-linji globali tat-tbaħħir"⁶⁰.

L-Istati Membri għandhom approċċi differenti biex jindirizzaw il-frodi tal-oriġini u tal-klassifikazzjoni

L-OLAF jista’ jiddissemina twissijiet ta’ frodi lill-Istati Membri bl-użu ta’ mezzi ta’ komunikazzjoni ta’ Assistenza Reċiproka (MA). Dawn it-twissijiet fihom talbiet lill-awtoritajiet doganali tal-Istati Membri biex jissalvagwardjaw l-interessi finanzjarji tal-UE.

Aħna sibna li l-ħames Stati Membri magħżula segwew approċċi differenti rigward is-segwitu għall-komunikazzjonijiet tal-MA 2015/15, mill-OLAF, dwar il-klassifikazzjoni skorretta, u dwar id-deskrizzjoni skorretta tal-oriġini. Operaturi tas-suq diżonesti jistgħu jisfruttaw kwalunkwe approċċ differenti għall-kontrolli doganali biex jevadu l-pagament ta’ dazji doganali.

Aħna sibna wkoll li huwa aktar faċli li jitwettaq is-segwitu għall-komunikazzjonijiet tal-MA f’dawk l-Istati Membri fejn l-indikazzjoni ta’ min huwa l-konsenjatur tkun obbligatorja fid-dikjarazzjoni doganali tal-importazzjoni (DAU).

L-Istati Membri għandhom approċċi differenti rigward is-sistemi ta’ penali

Fl-UE, l-infurzar tal-leġiżlazzjoni doganali huwa obbligu min-naħa tal-Istati Membri⁶¹, li jistgħu jużaw varjetà ta’ penali ċivili, amministrattivi u/jew kriminali bħala deterrent għall-ksur tar-regoli. Dan jista’ jfixkel il-kompetizzjoni fis-suq intern bejn l-operaturi tas-suq leġittimi filwaqt li l-frodaturi jistgħu jisfruttaw dawn id-differenzi u jagħmlu ħsara lill-interessi finanzjarji tal-UE.

Aħna sibna li fil-Polonja, fil-Belġju u fi Franza, il-ksur doganali jitqies li huwa ta’ natura kriminali u b’mod sistematiku jwassal għal proċedimenti kriminali. Fil-Polonja la hemm penali amministrattivi u lanqas dawk ċivili għall-ksur doganali.

Il-Kummissjoni ppreżentat proposta għal Direttiva li tistabbilixxi qafas ġuridiku tal-Unjoni għal ksur doganali u sanzjonijiet⁶², li attwalment qed tiġi eżaminata mill-Kunsill u mill-Parlament Ewropew. Il-proposta għal Direttiva hija r-riżultat ta’ studju⁶³ dwar l-oqfsa legali tal-Istati Membri għal ksur doganali u sanzjonijiet.

Hemm lakuni fil-kontroll doganali tal-importazzjonijiet

Il-ġestjoni tar-riskju tal-awtoritajiet doganali tal-Istati Membri tinkludi l-identifikazzjoni, il-valutazzjoni, l-analiżi u l-mitigazzjoni tat-tipi u l-livelli differenti ta’ riskji assoċjati mal-kummerċ internazzjonali tal-merkanzija.

Il-ġestjoni tar-riskju doganali tal-UE topera taħt il-prinċipju “ivvaluta minn qabel, ikkontrolla fejn meħtieġ”. Skont xi jkunu r-riskji involuti, dawn jistgħu jiġu indirizzati qabel it-tagħbija tal-merkanzija fil-pajjiż tal-esportazzjoni, qabel il-wasla tagħha fit-territorju tal-UE jew fil-post tal-ħatt, fil-mument tal-importazzjoni jew wara li l-merkanzija tkun ġiet rilaxxata għal ċirkolazzjoni libera⁶⁴.

L-importazzjonijiet jistgħu jseħħu bl-użu ta’ proċeduri normali jew simplifikati. L-importazzjoni tal-merkanzija bl-użu ta’ proċeduri simplifikati tiffaċilita l-kummerċ billi żżid ir-rapidità tar-rilaxx tal-merkanzija. Kull sena, il-Kummissjoni tipproduċi rapport dwar il-Prestazzjoni tal-Unjoni Doganali (CUP), li jagħti ħarsa ġenerali lejn il-frekwenza u l-effettività tat-tipi differenti ta’ kontrolli doganali mwettqa.

L-Istati Membri ma jwettqux kontrolli ta’ qabel il-wasla biex jipproteġu l-interessi finanzjarji tal-UE

Fl-istadju ta’ qabel il-wasla, l-awtoritajiet doganali jistgħu jiksbu informazzjoni bil-quddiem dwar il-wasliet imminenti tal-merkanzija permezz ta’ manifesti tat-tbaħħir u sorsi oħra. Fl-UE, it-trasportaturi jew ir-rappreżentanti awtorizzati tagħhom jistgħu jippreżentaw dikjarazzjonijiet fil-qosor tad-dħul elettroniċi (ENS) fl-ewwel ajruport/port ta’ dħul fit-territorju doganali tal-UE f’ħin preskritt qabel il-wasla tal-merkanzija. It-timijiet tal-analiżi tar-riskju doganali jistgħu janalizzaw din id-data u jagħmlu għażliet ta’ mmirar preliminari. Madankollu, informazzjoni limitata tkun disponibbli f’dak l-istadju biex ikunu jistgħu jsiru kontrolli dettaljati għal skopijiet fiskali, eż. rigward il-valwazzjoni jew il-klassifikazzjoni tal-merkanzija importata⁶⁵.

Il-ħames awtoritajiet doganali tal-Istati Membri magħżula argumentaw li huma ma jistgħux jwettqu kontrolli ta’ qabel il-wasla fuq l-ENS għal skopijiet fiskali minħabba n-nuqqas ta’ data rilevanti. Madankollu, operaturi tas-suq suspettużi (ta’ fama ħażina) jistgħu jiskattaw kontrolli ta’ qabel il-wasla li jkunu rilevanti għal skopijiet fiskali jekk l-ENS tkun turi data dwar il-konsenjatur u l-konsenjatarju. Filwaqt li dan ikun regolarment il-każ, din id-data tista’ tkun nieqsa⁶⁶.

L-Istati Membri mhux dejjem iwettqu l-kontrolli ssuġġeriti mis-sistemi tagħhom tal-ġestjoni tar-riskju

Il-kontrolli tar-rilaxx issuġġeriti mis-sistema tal-ġestjoni tar-riskju jistgħu jkunu fiżiċi, dokumentarji, jew jikkonsistu fit-teħid ta’ kampjun tal-merkanzija għal aktar analiżi, inkluża analiżi fil-laboratorju.

Aħna sibna li fl-Istati Membri li saritilhom żjara mill-Qorti, ħlief għar-Renju Unit, uffiċjal doganali jista’ jevita miżura ta’ kontroll issuġġerita minn filtru ta’ riskju mingħajr ma jkollu approvazzjoni jew konferma ġerarkika. Dan jirrappreżenta lakuna fis-sistema ta’ kontroll intern li ddgħajjef l-effettività tas-sistema ta' ġestjoni tar-riskju doganali.

Fir-Renju Unit, kontrolli dokumentarji u fiżiċi japplikaw biss għal proċeduri normali ta’ importazzjoni, li jirrappreżentaw 12 % tad-dikjarazzjonijiet tal-importazzjoni. Aħna sibna li 99.77 % tal-importazzjonijiet iddikjarati taħt proċeduri normali fl-2015 ġew żdoganati fi żmien siegħa; u li l-kontrolli dokumentarji biex tiġi indirizzata d-deskrizzjoni skorretta tal-oriġini waqt ir-rilaxx la jiċċekkjaw il-provi oriġinali tal-oriġini u lanqas ma jiċċekkjaw id-database ConTraffic għal spariġġi. Dan jixħet dubju fuq l-effettività tal-kontrolli tar-rilaxx fir-Renju Unit. It-88% tal-dikjarazzjonijiet tal-importazzjoni li jifdal ġew ippreżentati bl-użu ta’ proċeduri simplifikati u ma kinux suġġetti għal kontrolli tar-rilaxx.

Il-livell tal-kontrolli ta’ wara r-rilaxx ma jpattix għat-tnaqqis fil-kontrolli tal-iżdoganar fuq il-proċeduri simplifikati

Operaturi tas-suq li huma awtorizzati biex jużaw proċeduri doganali simplifikati għall-importazzjonijiet jibbenefikaw minn proċess ta’ rilaxx doganali aċċellerat. Id-dwana sserraħ fuq il-korrettezza tad-dikjarazzjonijiet tal-importazzjoni tagħhom u twettaq inqas kontrolli qabel ir-rilaxx. Jenħtieġ li dawn il-kontrolli jiġu kkumpensati permezz ta’ awtorizzazzjoni minn qabel u minn awditi ex post⁶⁷. Fl-2015, kważi erbgħa minn ħamsa tal-importazzjonijiet kollha tal-UE twettqu bl-użu ta’ proċeduri simplifikati, li minnhom 0.2 % kienu suġġetti għal kontrolli tar-rilaxx.

Madankollu, aħna sibna li fi Spanja u fir-Renju Unit ma jitwettqux kontrolli tar-rilaxx fuq il-proċeduri simplifikati. Dan il-fatt huwa partikolarment serju fil-każ tar-Renju Unit minħabba li l-maġġoranza l-kbira tad-dikjarazzjonijiet tal-importazzjoni jiġu ppreżentati bl-użu ta’ proċeduri simplifikati.

Operatur Ekonomiku Awtorizzat (AEO) huwa operatur tas-suq affidabbli li jibbenefika minn inqas kontrolli fiżiċi u minn kontrolli bbażati fuq id-dokumenti waqt l-iżdoganar. L-awtorizzazzjoni tal-AEO tingħata mid-dwana dment li l-operatur tas-suq ikun jissodisfa ċerti kriterji⁶⁸.

Waħda mis-simplifikazzjonijiet previsti fil-KDU tippermetti li tiġi ppreżentata dikjarazzjoni tal-importazzjoni permezz ta’ entrata fir-rekords tad-detentur tal-awtorizzazzjoni. F’dan il-każ, l-operatur tas-suq għandu l-obbligu li jinnotifika l-preżentazzjoni tal-merkanzija lid-dwana, iżda l-ebda data relatata mal-oriġini, mal-klassifikazzjoni tariffarja u mal-valur tal-merkanzija ma tkun inkluża f’din in-notifika⁶⁹ li jkun jippermetti lid-dwana twettaq analiżi tar-riskju sinifikattiva għal skopijiet fiskali. Barra minn hekk, l-awtoritajiet doganali jistgħu jirrinunzjaw l-obbligu, tal-AEO, li jippreżenta l-merkanzija lid-dwana⁷⁰.

Aħna sibna każijiet ta’ AEOs li joperaw fis-settur tal-kurriera li jabbużaw mill-eżenzjoni mid-dazji doganali għal kunsinni ta’ valur baxx, u każijiet oħra ta’ AEOs li ma ssodisfawx il-kundizzjonijiet għall-AEOs fi żmien iż-żjara tagħna, jew li ppreżentaw importazzjonijiet sottovalwati tat-tessuti u ż-żraben miċ-Ċina bħala dikjarant jew bħala rappreżentanti.

Aħna sibna li l-Italja ma twettaqx awditi ta’ wara r-rilaxx kif iddefinit fil-Gwida għall-Awditjar Doganali, u lanqas fir-rigward tal-AEO. Fir-Renju Unit aħna eżaminajna 10 fajls tal-awditjar ta’ wara r-rilaxx relatati tmal-AEOs iżda l-ebda wieħed minnhom ma kien fil-fatt awditu ta’ wara r-rilaxx iżda pjuttost kien valutazzjoni jew monitoraġġ imwettaq wara li l-kundizzjonijiet għall-AEOs ġew issodisfati f’livell kontinwat.

Fl-aħħar nett, f’Lulju 2016 il-Kummissjoni osservat li sitt Stati Membri⁷¹ jew ma wettqux awditi ta’ wara r-rilaxx jew inkella ma pprovdewx informazzjoni dwar dawn l-awditi. Dawn l-Istati Membri kienu s-sors ta’ madwar 20 % tal-ammont totali ta’ dazji doganali li nġabru fl-UE⁷². L-awditi ta’ wara r-rilaxx huma intenzjonati li jindirizzaw riskji residwi wara r-rilaxx u kontrolli oħra ta’ wara r-rilaxx, iżda meta dawn ma jitwettqux ikun għad hemm dawn ir-riskji.

Il-kontrolli ta’ wara r-rilaxx rarament ikopru l-importazzjonijiet fi Stati Membri oħra

Fejn importatur li jkollu s-sede tiegħu fi Stat Membru wieħed (Stat Membru 2) iwettaq operazzjoni ta’ importazzjoni fi Stat Membru ieħor (Stat Membru 1), il-kontrolli doganali jridu jitwettqu minn dan tal-aħħar⁷³.

Aħna sibna li l-awtoritajiet doganali tal-Istat Membru 1 ma jindirizzawx lill-awtoritajiet doganali tal-Istat Membru 2 biex jitolbu r-rekords kontabilistiċi, il-kontijiet tal-bank, eċċ. tal-operatur tas-suq li jkun jinsab fit-territorju tagħhom, u li l-awtoritajiet doganali tal-Istat Membru 2 mhumiex konxji tal-importazzjonijiet li jkunu saru, billi ma hemm l-ebda obbligu għall-awtoritajiet tal-Istat Membri 1 li jinnotifikawhom.

Dan huwa aggravat mill-fatt li l-informazzjoni inkluża fid-database eżistenti tal-importazzjonijiet fl-Istati Membri, “Sorveljanza 2”, hija ta’ użu limitat għal awditi ta’ wara r-rilaxx, billi ma tinkludix l-isem tal-importatur u/jew tad-dikjarant. It-tnedija (użu) sħiħa⁷⁴ ta’ database imsejħa“Sorveljanza 3”, li tinkludi din l-informazzjoni u informazzjoni rilevanti oħra, mhijiex mistennija qabel l-1 ta’ Ottubru 2018.

Aħna sibna li din is-sitwazzjoni tapplika b’mod partikolari għas-CP42. Taħt din il-proċedura, l-importatur li jkun ibbażat fl-Istat Membru 2 jista’ jaħtar rappreżentant fl-Istat Membru 1 biex iwettaq l-importazzjoni hemm, u dan jagħmilha aktar diffiċli biex jitwettaq il-kontroll ta’ wara r-rilaxx.

Skont l-OLAF, madwar 57 % tal-importazzjonijiet kollha ssuspettati li huma sottovalwati u li ġejjin miċ-Ċina fil-qasam tat-tessuti u x-xedd is-saqajn jiġu żdoganati taħt is-CP42, minkejja li 16 % biss tal-importazzjonijiet jiġu rilaxxati taħt din il-proċedura.

Il-Kummissjoni sabet ukoll, matul spezzjoni li twettqet fis-Slovakkja f’Diċembru 2016, li r-riskju prinċipali ta’ sottovalwazzjoni nqabad fl-importazzjonijiet koperti mis-CP42, fejn l-importatur ikun normalment jinsab fi Stat Membru ieħor, u dan għamilha aktar diffiċli biex jiġi miġġieled dan ir-riskju permezz ta’ kontrolli ta’ wara r-rilaxx.

In-nuqqas ta’ kontrolli fuq l-eżenzjoni mid-dazji doganali għal kunsinni ta’ valur baxx qed iwassal għal pagament insuffiċjenti ta’ dazji doganali

Il-leġiżlazzjoni doganali tipprevedi eżenzjoni jew eżenzjoni mid-dazji doganali għal kunsinni ta’ valur negliġibbli. Il-merkanzija li l-valur tagħha ma jaqbiżx ċertu soll tiġi eżentata minn dazji doganali u minn taxxi oħra. Dan għaliex il-ġbir ta’ dħul potenzjali żgħir ta’ kunsinni ta’ valur baxx ma jagħmilx tajjeb għall-ispejjeż amministrattivi u tan-negozju li huma meħtieġa biex il-konformità mar-regoli doganali tiġi żgurata.

L-espansjoni rapida tal-kummerċ elettroniku biddlet dan ix-xenarju. Bħalma tirrikonoxxi l-Organizzazzjoni għall-Kooperazzjoni u l-Iżvilupp Ekonomiċi (OECD)⁷⁵, fiż-żmien meta ġew introdotti l-biċċa l-kbira mill-eżenjonijiet mid-dazji ta’ importazzjonijiet ta’ valur baxx, ix-xiri minn fuq l-internet ma kienx jeżisti u l-livell ta’ importazzjonijiet li kienu jibbenefikaw mill-eżenzjoni kien relattivament baxx.

Il-provvisti, min-negozju għall-konsumatur (B2C), ta’ merkanzija mixtrija minn pajjiżi mhux tal-UE għandhom eżenzjoni mill-VAT (u dazji doganali) għal kunsinni ta’ valur baxx, meta l-valur tagħha ma jaqbiżx is-soll ta’ EUR 10 sa EUR 22. Minbarra l-VAT, meta l-valur tal-merkanzija jkun ogħla minn EUR 150, għandhom jiġu imposti dazji doganali. Rigal li jkun intbagħat minn individwu privat lil individwu privat ieħor (P2P) jiġi eżentat minn dazji doganali u mill-VAT meta l-valur tiegħu ma jkunx jaqbeż l-EUR 45. Meta l-valur tiegħu jkun jaqbeż l-ammont ta’ EUR 45 iżda ma jkunx ogħla minn EUR 700, eskluża l-VAT, tista’ tiġi applikata rata standard u fissa ta’ dazju doganali ta’ 2.5 %. Dawn l-eżenzjonijiet kollha japplikaw ukoll għal merkanzija mixtrija online minn pajjiżi mhux tal-UE.

Aħna sibna li s-sistemi elettroniċi ta’ rilaxx doganali fl-Istati Membri magħżula aċċettaw (i) importazzjonijiet li kienu japplikaw għal eżenzjonijiet mid-dazji doganali għal merkanzija ta’ valur negliġibbli minkejja li l-valur⁷⁶ iddikjarat tagħha kien ogħla minn EUR 150, u (ii) importazzjonijiet ta’ kunsinni kummerċjali ddikjarati bħala rigali.

Aħna sibna wkoll li anke l-kurriera li kellhom awtorizzazzjoni tal-AEO abbużaw minn dawn l-eżenzjonijiet mid-dazji doganali fuq l-importazzjonijiet li twettqu wara d-dħul fis-seħħ tal-Atti Delegati u ta’ Implimentazzjoni tal-KDU⁷⁷ fl-1 ta’ Mejju 2016. Dan huwa partikolarment serju billi l-AEOs huma meħtieġa jkollhom kontrolli interni li jkunu kapaċi jipprevienu u jaqbdu tranżazzjonijiet illegali jew irregolari⁷⁸.

Evidenza miġbura mir-Renju Unit dwar il-kummerċ elettroniku tindika sottovalwazzjoni massiva ta’ merkanzija importata mil-Lvant Imbiegħed u, dejjem aktar, mill-Istati Uniti tal-Amerka, b’fattur ta’ bejn 10 darbiet sa 100 darba inqas mill-valwazzjoni korretta.

Skont id-Dwana Belġjana, merkanzija li tinxtara permezz ta’ ċerti siti web mhux tal-UE tiġi sistematikament iddikjarata bħala merkanzija b’valur ta’ inqas minn EUR 22, filwaqt li fil-fatt il-konsumatur ikun ħallas aktar⁷⁹.

Fl-aħħar nett, skont studju li sar minn Copenhagen Economics⁸⁰, id-dazji tal-importazzjoni jiġu imposti biss fuq 47 % tal-vjeġġi postali dazjabbli u din l-impożizzjoni inkompleta ta’ dazju tal-importazzjoni tiġi kkonkretizzata direttament f’telf ta’ dazji doganali, fl-UE, ta’ bejn wieħed u ieħor EUR 0.25 biljun.

Għalhekk, it-telf tad-dazji doganali jitwettaq b’żewġ modi: (i) permezz ta’ sottovalwazzjoni ta’ merkanzija, u b’hekk il-merkanzija tiġi ddikjarata b’mod skorrett bħala eliġibbli għall-eżenzjoni mid-dazji doganali għal kunsinni ta’ valur baxx; u (ii) permezz tal-applikazzjoni tal-eżenzjoni mid-dazji doganali għal merkanzija mhux eliġibbli, eż. merkanzija ddikjarata b’valur ogħla minn EUR 150 u aċċettata mis-sistema ta’ rilaxx doganali minħabba li jkun hemm lakuna fiha jew kunsinni kummerċjali (B2C) iddikjarati bħala rigali (P2P) minħabba li ma jiġux ikkontrollati mid-dwana.

Fil-każ tal-kurriera li jkollhom awtorizzazzjoni tal-AEO, dan huwa partikolarment possibbli minħabba li huma jibbenefikaw minn inqas kontrolli fiżiċi u minn inqas kontrolli bbażati fuq id-dokumenti, u dan jinkludi inqas kontrolli fil-punt tal-importazzjoni u jista’ jittieħed inkunsiderazzjoni koll għall-kontrolli ta’ wara r-rilaxx⁸¹.

Konklużjonjiet u rakkomandazzjonijiet

L-awditu indirizza l-kwistjoni ta’ jekk il-proċeduri ta’ importazzjoni tal-UE jipproteġux l-interessi finanzjarji tagħha. Aħna sibna dgħufijiet serji li jindikaw li hemm nuqqasijiet fil-qafas legali kif ukoll implimentazzjoni ineffettiva tal-kontrolli doganali mwettqa mill-Istati Membri fuq l-importazzjonijiet, fatt li jaffettwa l-interessi finanzjarji tal-UE b’mod negattiv.

Il-fatt li ma hemmx stima tan-nuqqas doganali jaffettwa l-evalwazzjoni tal-prestazzjoni tal-Unjoni Doganali b’mod negattiv f’termini tal-protezzjoni tal-interessi finanzjarji tal-UE, u jipprevieni milli ssir allokazzjoni effiċjenti tar-riżorsi għal ċerti oqsma eż. is-sottovalwazzjoni, jew għal Stati Membri fejn jiġi identifikat l-ogħla telf potenzjali (ara l-paragrafi 26 sa 28).

Rakkomandazzjoni 1

Sabiex tkun tista’ tilqa’ t-talba tal-Parlament Ewropew, jenħtieġ li l-Kummissjoni tiżviluppa metodoloġija u toħroġ stimi perjodiċi tan-nuqqas doganali mill-2019 ’il quddiem u tieħu inkunsiderazzjoni r-riżultati tagħha għall-allokazzjoni tar-riżorsi u għall-issettjar ta’ miri operazzjonali.

Data mmirata għall-implimentazzjoni: l-2019.

L-Istati Membri ma jiġux imħeġġa biżżejjed, f’termini finanzjarji, biex iwettqu kontrolli doganali u biex itejbu l-ġbir ta’ dazji doganali għall-Baġit tal-UE: l-Istati Membri li jwettqu kontrolli doganali iżda mingħajr suċċess fl-azzjoni ta’ rkupru tagħhom, għandhom ir-riskju li jbatu l-konsegwenzi finanzjarji ta’ dan it-telf, filwaqt li b’mod pervers l-Istati Membri li ma jwettqux dawn il-kontrolli jista’ jkun li ma jġarrbu l-ebda konsegwenza negattiva. Barra minn hekk, Stat Membru wieħed ilmenta li, aktar ma huwa jindirizza l-frodi, ogħla jkun ir-riskju li l-Kummissjoni żżommu finanzjarjament responsabbli (ara l-paragrafi 29 sa 32).

Anke jekk il-finanzjament jiġi pprovdut permezz ta’ programmi ta’ azzjoni tal-UE, dan ma jkunx dejjem marbut mal-protezzjoni tal-interessi finanzjarji tal-UE. L-Istati Membri mhux dejjem jipprovdu r-riżorsi finanzjarji meħtieġa għall-implimentazzjoni ta’ komponenti, mhux tal-Unjoni, tas-sistemi tal-Informazzjoni Ewropej li ma jiġux iffinanzjati mill-programmi ta’ azzjoni, u dan iwassal għal dewmien possibbli fl-implimentazzjoni tal-KDU. Xi Stati Membri fejn jinsabu l-portijiet prinċipali ta’ dħul jaċċettaw li s-sehem tagħhom taż-żamma tal-RPT huwa għoli wisq (ara l-paragrafi 33 sa 40).

Rakkomandazzjoni 2

Jenħtieġ li l-Kummissjoni tqis il-possibbiltajiet disponibbli kollha biex issaħħaħ l-appoġġ għas-servizzi doganali nazzjonali fir-rwol importanti tagħhom, li l-Qafas Finanzjarju Pluriennali (QFP) l-ġdid jikkonferilhom fir-rigward tal-UE, inkluż it-twettiq ta’ rieżami tar-rata xierqa tal-ispejjeż tal-ġbir.

Data mmirata għall-implimentazzjoni: għall-bidu tal-QFP li jmiss.

Rakkomandazzjoni 3

Jenħtieġ li l-Kummissjoni tipproponi li l-programmi ta’ azzjoni tal-UE li jmiss, li jappoġġaw l-Unjoni doganali, jintużaw biex jikkontribwixxu għas-sostenibbiltà finanzjarja tas-Sistemi tal-Informazzjoni Ewropej fil-qasam tad-dwana.

Data mmirata għall-implimentazzjoni: għall-bidu tal-QFP li jmiss.

L-iskambju ta’ informazzjoni u l-kooperazzjoni fi kwistjonijiet doganali jiffunzjonaw mingħajr xkiel. Iżda l-awditu wera li għad hemm dgħufijiet fl-għodod għall-iskambju ta’ informazzjoni, kemm f’termini ta’ kontenut kif ukoll ta’ użu tagħhom (ara l-paragrafi 41 sa 69).

Rakkomandazzjoni 4

Jenħtieġ li l-Kummissjoni:

1. tipproponi emendi għal-leġiżlazzjoni doganali fl-2018 li jkollhom l-għan li jagħmlu obbligatorja l-indikazzjoni tal-konsenjatur fid-dikjarazzjoni doganali tal-importazzjoni (DAU); u
2. tkun aktar preċiża fit-talbiet li jkunu jinsabu f’komunikazzjoni ta' Assistenza Reċiproka biex tiżgura l-implimentazzjoni uniformi tagħhom mill-Istati Membri.

Data mmirata għall-implimentazzjoni: minnufih.

Rakkomandazzjoni 5

Jenħtieġ li, fl-2018, il-Kummissjoni taħtar uffiċjal ta' kollegament extra-Ewropew tal-OLAF f’pajjiżi mhux tal-UE fejn iseħħu t-trasbordi l-aktar frodulenti f’żoni ħielsa.

F’termini ta’ applikazzjoni uniformi tal-leġiżlazzjoni doganali tal-UE, it-Tariffa integrata tal-Unjoni Ewropea (TARIC) tiġi implimentata b’mod uniformi f’erbgħa mill-ħames Stati Membri awditjati. Madankollu, hemm bidliet retroattivi fit-TARIC li għandhom impatt finanzjarju u jeħtieġ li l-Istati Membri jimplimentawhom b’attenzjoni. L-Istati Membri ma jiċċekkjawx sew jekk, fil-mument tal-importazzjoni, id-detenturi, fil-fatt, jużawx id-deċiżjonijiet li jkunu nħarġu dwar l-Informazzjoni Vinkolanti dwar it-Tariffi (BTI). Għalkemm il-KDU ta mandat lill-Kummissjoni biex din tagħmel possibbli l-ħruġ ta’ deċiżjonijiet dwar il-valwazzjoni fl-UE kollha, il-Kummissjoni ma għamlitx dan (ara l-paragrafi 70 sa 88).

Rakkomandazzjoni 6

Jenħtieġ li l-Kummissjoni:

1. twettaq, b’attenzjoni, segwitu fl-Istati Membri tal-kontrolli li dawn iwettqu fuq il-konformità tad-deċiżjonijiet dwar il-BTI sal-2020; u
2. tagħmel possibbli l-ħruġ ta’ deċiżjonijiet dwar il-valwazzjoni fl-UE kollha mingħajr aktar dewmien, kif irrakkomandajna fir-Rapport Speċjali Nru 23/2000.

L-Istati Membri għandhom approċċi differenti f’dak li jirrigwarda kontrolli doganali biex jindirizzaw is-sottovalwazzjoni, id-deskrizzjoni skorretta tal-oriġini, u l-klassifikazzjoni skorretta, kif ukoll biex jimponu pieni. Huwa diffikultuż għall-awtoritajiet doganali li jiksbu bilanċ bejn il-ħtieġa li jiġi ffaċilitat il-kummerċ, bi proċeduri ta’ importazzjoni li jkunu aktar rapidi u mingħajr xkiel, u l-ħtieġa li jitwettqu kontrolli doganali. Kontrolli doganali onerużi jista’ jkollhom impatt fuq l-għażla li l-operaturi tas-suq jagħmlu dwar l-uffiċċju doganali tal-importazzjoni, u għalhekk l-ajruporti/portijiet b’inqas kontrolli doganali jistgħu jattiraw aktar traffiku. Il-Qorti sabet każijiet ta’ “għażla tal-punt ta’ importazzjoni”, jiġifieri l-operaturi tas-suq jagħżlu li jimportaw il-merkanzija sottovalwata fl-Istati Membri li jkollhom kontrolli inqas stretti (ara l-paragrafi 89 sa 110).

Rakkomandazzjoni 7

Jenħtieġ li l-Kummissjoni tipproponi bidliet leġiżlattivi li jkunu jippermettulha timponi korrezzjonijiet finanzjarji, mill-2021 ’il quddiem, fuq dawk l-Istati Membri li ma jkunux qed jindirizzaw b’mod adegwat ir-riskji u li possibbilment ikunu qed iħeġġu l-“għażla tal-punt ta’ importazzjoni”.

Minħabba nuqqas ta’ data suffiċjenti, l-Istati Membri ma jwettqux analiżi tar-riskju għal raġunijiet fiskali fl-istadju ta’ qabel il-wasla jew inkella man-notifika mill-operaturi tas-suq dwar il-wasla ta’ merkanzija fil-bini tagħhom. Barra minn hekk, fil-ħames Stati Membri awditjati, l-uffiċjali doganali jistgħu jinjoraw il-kontrolli ssuġġeriti mis-sistema nazzjonali tal-ġestjoni tar-riskju, mingħajr ma ssir l-ebda approvazzjoni ġerarkika. Fir-rigward ta’ proċeduri simplifikati, l-Istati Membri ma jpattux għal-livell inqas ta’ kontrolli tar-rilaxx, b’kontrolli ta’ wara r-rilaxx. Barra minn hekk, jekk operatur tas-suq jimporta fi Stat Membru li ma jkunx dak li huwa jkun ibbażat fih, dawn l-importazzjonijiet rarament jiġu ċċekkjati ex post. L-Istati Membri jiffaċċjaw diffikultajiet fl-iżgurar tal-konformità tal-operaturi tas-suq mal-eżenzjoni mid-dazji doganali għal kunsinni ta’ valur baxx, u dan iwassal għal telf għall-Baġits nazzjonali u tal-UE. Aħna sibna li l-AEOs li joperaw fis-settur tal-kurriera qed jabbużaw minn din l-eżenzjoni (ara l->paragrafi 111 sa 141).

Rakkomandazzjoni 8

Jenħtieġ li, fl-2018, il-Kummissjoni:

1. tipproponi azzjoni leġiżlattiva biex tagħmel obbligatorju l-għoti ta’ elementi ta’ data addizzjonali, li jkunu jippermettu t-twettiq ta’ analiżi tar-riskju finanzjarju fl-istadju ta’ qabel il-wasla u man-notifika mill-operaturi tas-suq dwar il-wasla ta’ merkanzija fil-bini tagħhom;
2. ittejjeb id-database Sorveljanza biex tidentifika r-riċevitur tal-merkanzija meta l-proċedura doganali 42 tintuża; u
3. tinvestiga l-abbuż li jsir mill-eżenzjonijiet mid-dazji doganali għal kunsinni ta’ valur baxx fuq il-kummerċ elettroniku ta’ merkanzija ma’ pajjiżi mhux tal-UE.

Rakkomandazzjoni 9

Jenħtieġ li l-Istati Membri immedjatament:

1. idaħħlu kundizzjoni li permezz tagħha l-evitar ta’ kontrolli ssuġġeriti minn filtru ta’ riskju partikolari jkun jirrikjedi approvazzjoni ġerarkika minn qabel jew minnufih;
2. jintroduċu kontrolli fis-sistemi elettroniċi tagħhom ta’ rilaxx doganali biex jimblokkaw l-aċċettazzjoni ta’ dikjarazzjonijiet tal-importazzjoni li jkun fihom applikazzjonijiet għal eżenzjoni mid-dazji doganali għal kunsinni ta’ valur baxx tal-merkanzija li l-valur intrinsiku tagħha jkun ogħla minn EUR 150, jew għal kunsinni kummerċjali (B2C) ddikjarati bħala rigali (P2P);
3. jivverifikaw ex post il-konformità tal-operaturi tas-suq mal-eżenzjoni mid-dazji doganali għal kunsinni ta’ valur baxx, inklużi l-AEOs;
4. jifformulaw pjanijiet ta’ investigazzjoni biex jiġġieldu kontra l-abbuż li jsir minn dawn l-eżenzjonijiet fuq il-kummerċ elettroniku ta’ merkanzija ma’ pajjiżi mhux tal-UE.

Dan ir-Rapport ġie adottat mill-Awla IV, immexxija mis-Sur Baudilio TOMÉ MUGURUZA, Membru tal-Qorti tal-Awdituri, fil-Lussemburgu fil-laqgħa tagħha tas-7 ta’ Novembru 2017.

Għall-Qorti tal-Awdituri

Klaus-Heiner LEHNE
President

Glossarju

Assistenza reċiproka: Kwalunkwe azzjoni mwettqa minn amministrazzjoni doganali f’isem jew f’kollaborazzjoni ma’ amministrazzjoni Doganali oħra għall-applikazzjoni korretta tal-liġijiet doganali u għall-prevenzjoni, l-investigazzjoni u t-trażżin ta’ reati doganali.

Awditu ta’ wara r-rilaxx: Kontroll tal-operaturi tas-suq permezz ta’ eżaminar tal-kontijiet, tar-rekords u tas-sistemi tagħhom sabiex tiġi żgurata l-konformità mar-regoli doganali u biex jiġu evalwati r-riskji marbuta man-negozju tagħhom.

Awtoritajiet doganali: L-amministrazzjonijiet doganali tal-Istati Membri u kwalunkwe awtorità oħra li huma responsabbli biex japplikaw leġiżlazzjoni doganali.

Dazju tal-importazzjoni: Dazju doganali dovut (pagabbli) fuq l-importazzjoni ta’ merkanzija.

Deċiżjoni: Kwalunkwe att mill-awtoritajiet doganali marbut mal-leġiżlazzjoni doganali li jagħti deċiżjoni dwar każ partikolari, u li jkollu effetti legali fuq il-persuna jew persuni kkonċernati.

Dikjarazzjoni doganali: L-att li bih persuna tindika, fil-forma u l-mod preskritti, li tixtieq tqiegħed merkanzija taħt proċedura doganali speċifika, b’indikazzjoni, fejn ikun xieraq, ta’ kwalunkwe arranġament speċifiku li għandu jiġi applikat.

Dikjarazzjoni fil-qosor tad-dħul: L-att li bih persuna tinforma lill-awtoritajiet doganali, fil-forma u l-mod preskritti, u f’limitu ta’ żmien speċifiku, li se tiddaħħal merkanzija fit-territorju doganali tal-Unjoni.

Ġestjoni tar-riskju: L-identifikazzjoni sistematika tar-riskju, inkluża dik permezz ta’ kontrolli każwali (aleatorji), u l-implimentazzjoni tal-miżuri kollha meħtieġa biex tiġi limitata l-espożizzjoni għar-riskju.

Għażla tal-punt ta’ importazzjoni: L-att li bih jintgħażel il-punt doganali tal-importazzjoni b’inqas kontrolli sabiex, b’mod illegali, jitħallas inqas dazju doganali.

Kontroll dokumentarju: Kontroll tal-korrettezza, il-kompletezza u l-validità ta’ informazzjoni mdaħħla fid-dikjarazzjoni doganali (eż. deskrizzjoni tal-merkanzija, valur, u kwantità) jew f’dokumenti oħra (eż. liċenzji tal-importazzjoni, ċertifikati tal-oriġini).

Kontroll fiżiku: Eżaminar tal-merkanzija, li jinkludi l-għadd dettaljat u t-teħid ta’ kampjuni, biex jiġi ċċekkjat jekk dawn jaqblux mad-dikjarazzjoni doganali li takkumpanja l-merkanzija.

Kontrolli doganali: Atti speċifiċi mwettqin mill-awtoritajiet doganali sabiex jiżguraw il-konformità mal-leġiżlazzjoni doganali u leġiżlazzjoni oħra li tirregola d-dħul, il-ħruġ, it-tranżitu, il-moviment, il-ħżin u l-użu aħħari ta’ merkanzija trasportata bejn it-territorju doganali tal-Unjoni u pajjiżi jew territorji barra minn dak it-territorju, u l-preżenza u l-moviment fit-territorju doganali tal-Unjoni ta’ merkanzija mhux tal-Unjoni u merkanzija mqiegħda taħt il-proċedura tal-użu aħħari.

Kontrolli oħra ta’ wara r-rilaxx: Kontrolli tal-korrettezza, il-kompletezza u l-validità ta’ informazzjoni mdaħħla fid-dikjarazzjonijiet doganali (eż. deskrizzjoni tal-merkanzija, valur, u kwantità) jew f’dokumenti oħra (eż. liċenzji tal-importazzjoni, ċertifikati tal-oriġini), li jitwettqu wara l-importazzjoni tal-merkanzija.

Leġiżlazzjoni doganali: Il-korp leġiżlattiv magħmul minn dan kollu li ġej: il-Kodiċi u l-provvedimenti (dispożizzjonijiet) li jissupplimentawh jew jimplimentawh adottati fil-livell tal-Unjoni jew fil-livell nazzjonali, it-Tariffa Doganali Komuni, il-leġiżlazzjoni li tistabbilixxi sistema tal-Unjoni ta’ eżenzjonijiet minn dazju doganali, u ftehimiet internazzjonali li jinkludu provvedimenti doganali sa fejn dawn ikunu applikabbli fl-Unjoni.

Merkanzija mhux tal-Unjoni: Merkanzija oħra barra dik tal-Unjoni jew li tilfet l-istatus doganali tagħha bħala merkanzija tal-Unjoni.

Merkanzija tal-Unjoni: Merkanzija li taqa’ taħt kwalunkwe kategorija minn dawn li ġejjin:

1. merkanzija miksuba għalkollox fit-territorju doganali tal-Unjoni u li ma tinkorporax merkanzija importata minn pajjiżi jew territorji barra t-territorju doganali tal-Unjoni;
2. merkanzija miġjuba fit-territorju doganali tal-Unjoni minn pajjiżi jew territorji barra minn dak it-territorju u rilaxxata għal ċirkolazzjoni libera;
3. merkanzija miksuba jew prodotta fit-territorju doganali tal-Unjoni, kemm biss minn merkanzija msemmija fil-punt (b) jew minn merkanzija msemmija fil-punti (a) u (b). Preżentazzjoni tal-merkanzija lid-dwana: In-notifika lill-awtoritajiet doganali tal-wasla ta’ merkanzija fl-uffiċċju doganali jew fi kwalunkwe post ieħor indikat jew approvat mill-awtoritajiet doganali.

Proċedura doganali 42: Is-sistema li importatur juża sabiex jikseb eżenzjoni mill-VAT meta l-merkanzija importata tiġi ttrasportata lejn Stat Membru ieħor. Il-VAT hija dovuta fl-Istat Membru tad-destinazzjoni.

Proċedura doganali: Kwalunkwe waħda mill-proċeduri li ġejjin, li taħtha tista’ titqiegħed il-merkanzija skont il-Kodiċi: rilaxx għal ċirkolazzjoni ħielsa (libera), proċeduri speċjali, esportazzjoni.

Proċedura ta’ importazzjoni: Applikazzjoni tal-proċedura doganali “rilaxx għal ċirkolazzjoni libera”, li warajha l-merkanzija tista’ tinbiegħ jew tiġi kkonsmata fis-suq tal-UE.

Profil tar-riskju: Kombinament ta’ kriterji tar-riskju u oqsma ta’ kontroll (eż. tip ta’ merkanzija, pajjiż ta’ oriġini) li jkun jindika li hemm riskju u li jwassal għal proposta biex titwettaq miżura ta’ kontroll.

Rilaxx tal-merkanzija: L-att li bih l-awtoritajiet doganali jagħmlu merkanzija disponibbli għall-għanijiet speċifikati għall-proċedura doganali li taħtha hija tqiegħdet.

Riskju Doganali: Il-probabbiltà pponderata mill-impatt ta’ avveniment li jista’ jiġri, fir-rigward ta’ dħul, ħruġ, tranżitu, moviment jew użu aħħari ta’ merkanzija trasportata bejn it-territorju doganali tal-Unjoni u l-pajjiżi jew territorji barra dak it-territorju, u l-preżenza fit-territorju doganali tal-Unjoni ta’ merkanzija mhux tal-Unjoni, li jkun jimpedixxi l-applikazzjoni korretta ta’ miżuri tal-Unjoni jew nazzjonali, jikkomprometti l-interessi finanzjarji tal-Unjoni u tal-Istati Membri tagħha, jew ikun ta’ theddida għas-sigurtà u s-sikurezza tal-Unjoni u r-residenti tagħha, għal saħħet il-bniedem, l-annimali jew il-pjanti, għall-ambjent jew għall-konsumaturi.

Stat Membru tal-importazzjoni: L-Istat Membru fejn il-merkanzija tiġi importata fiżikament fl-UE u rilaxxata għal ċirkolazzjoni libera.

Status doganali: L-istatus ta’ merkanzija bħala merkanzija tal-Unjoni jew merkanzija mhux tal-Unjoni.

Unjoni Doganali: Arranġament kummerċjali preferenzjali li permezz tiegħu s-sħab kummerċjali jagħtu lil xulxin aċċess preferenzjali għall-prodotti u s-servizzi tagħhom sabiex jiffaċilitaw il-kummerċ bejniethom. Dan iwassal għall-eliminazzjoni reċiproka ta’ tariffi u kwoti fit-territorji kostitwenti, id-diskriminazzjoni għall-kummerċ bejn il-pajjiżi mhux Membri, u l-istabbiliment ta’ tariffa doganali komuni fosthom.

Żdoganar tal-merkanzija: Il-proċess li permezz tiegħu l-formalitajiet doganali jiġu ssodisfati, biex b’hekk l-applikant ikun jista’ jkollu l-merkanzija għad-dispożizzjoni tiegħu.

Żoni ta’ kontroll prijoritarji: Il-parti tal-Qafas Komuni ta’ Mmaniġġjar tar-Riskju li tkopri proċeduri doganali partikolari, tipi ta’ merkanzija, rotot tat-traffiku, mezzi ta’ trasport jew operaturi ekonomiċi li jkunu suġġetti għal livelli ogħla ta’ analiżi tar-riskju u kontrolli doganali matul ċertu perjodu.

Abbrevjazzjonijiet

AC: Kooperazzjoni amministrattiva

ACAs: Arranġamenti ta’ kooperazzjoni amministrattiva

AD KDU: Att Delegat tal-Kodiċi Doganali tal-Unjoni

ADD: Dazji antidumping

AEO: Operatur Ekonomiku Awtorizzat

AFIS: Sistema ta' Informazzjoni għal Kontra l-Frodi

AI KDU: Att ta’ implimentazzjoni tal-Kodiċi Doganali tal-Unjoni

B2C: Min-negozju għall-konsumatur

BTI: Informazzjoni vinkolanti dwar it-tariffi

CP 42: Proċedura doganali 42

CRMS: Sistema Komuni tal-Ġestjoni tar-Riskju Doganali

CUP: Prestazzjoni tal-Unjoni Doganali

CVD: Dazji kumpensatorji

DAU: Dokument amministrattiv uniku

DĠ BUDG: Direttorat Ġenerali għall-Baġit

DĠ TAXUD: Direttorat Ġenerali għat-Tassazzjoni u l-Unjoni Doganali

ENS: Dikjarazzjoni fil-qosor tad-dħul

FCLO: Uffiċjal ta' Kollegament mal-Awtoritajiet Doganali Barranin

HMRC: Her Majesty Revenue and Customs (Amministrazzjoni Doganali tar-Renju Unit)

ING: Introjtu Nazzjonali Gross

JRC: Ċentru Konġunt tar-Riċerka

KDU: Kodiċi Doganali tal-Unjoni

MA: Assistenza Reċiproka

MAAs: Ftehimiet ta’ assistenza reċiproka

MIK: Messaġġ dwar l-istatus tal-kontejner

OECD: L-Organizzazzjoni għall-Kooperazzjoni u l-Iżvilupp Ekonomiċi

OLAF: Uffiċċju Ewropew Kontra l-Frodi, tal-Kummissjoni Ewropea

OLO: Uffiċjal ta' Kollegament extra-Ewropew

P2P: Mill-privat għall-privat

PE: Parlament Ewropew

PTA: Arranġament kummerċjali preferenzjali

RIF: Formola ta' Informazzjoni dwar ir-Riskju

RPT: Riżorsi Proprji Tradizzjonali

SID: Sistema ta' Informazzjoni Doganali

SMS: Sistema ta' Ġestjoni tal-Eżemplari

TARIC: Tariffa doganali integrata tal-Komunità Ewropea

UE: Unjoni Ewropea

VAT: Taxxa fuq il-valur miżjud

WCO: Organizzazzjoni Dinjija Doganali

Tim tal-awditjar

Ir-rapporti speċjali tal-QEA jippreżentaw ir-riżultati tal-awditi tagħha f’dak li jirrigwarda l-politiki u l-programmi tal-UE jew suġġetti ta' ġestjoni relatati ma’ oqsma baġitarji speċifiċi. Il-QEA tagħżel u tfassal dawn il-kompiti tal-awditjar biex timmassimizza l-impatt tagħhom billi tqis ir-riskji għall-prestazzjoni jew għall-konformità, il-livell ta' introjtu jew ta' nfiq involut, l-iżviluppi li jkunu għad iridu jseħħu u l-interess politiku u pubbliku.

Dan ir-rapport ġie prodott mill-Awla IV tal-Awditjar, li hija mmexxija minn Baudilio Tomé Muguruza, Membru tal-QEA, u li tiffoka fuq l-oqsma ta’ regolamentazzjoni tas-swieq u ekonomija kompetittiva. L-awditu tmexxa mill-Membru tal-QEA Pietro Russo. Fit-tħejjija tar-rapport, huwa kien appoġġat minn Chiara Cipriani, Kap tal-kabinett, Benjamin Jakob, Attaché, Paul Stafford, Maniġer prinċipali u Carlos Soler Ruiz, Kap tal-kompitu. It-tim tal-awditjar kien magħmul minn Dan Danielescu, Maria Echanove, Josef Edelmann, Benny Fransen u Francois Gautier.

Kuntatt

IL-QORTI EWROPEA TAL-AWDITURI
12, rue Alcide De Gasperi
1615 Luxembourg
LUXEMBOURG

Tel. +352 4398-1
Mistoqsijiet: eca.europa.eu/mt/Pages/ContactForm.aspx
Sit web: eca.europa.eu
Twitter: @EUAuditors

Ħafna informazzjoni addizzjonali dwar l-Unjoni Ewropea hija disponibbli fuq l-Internet.
Jista’ jsir aċċess għaliha permezz tas-server Europa (http://europa.eu).

Il-Lussemburgu: L-Uffiċċju tal-Pubblikazzjonijiet tal-Unjoni Ewropea, 2017

© L-Unjoni Ewropea, 2017

Għal kull użu jew riproduzzjoni ta’ ritratti jew materjal ieħor li ma jaqax taħt id-drittijiet tal-awtur tal-Unjoni Ewropea, irid jintalab il-permess direttament mingħand id-detenturi tad-drittijiet tal-awtur.

KIF TIKKUNTATTJA LILL-UE

Personalment
Madwar l-Unjoni Ewropea kollha hemm mijiet ta’ ċentri ta’ informazzjoni tal-Europe Direct. Tista’ ssib l-indirizz tal-eqreb ċentru għalik f’dan is-sit: http://europa.eu/contact

Bit-telefown jew bil-posta elettronika
Europe Direct huwa servizz li jwieġeb il-mistoqsijiet tiegħek dwar l-Unjoni Ewropea. Tista’ tikkuntattja dan is-servizz:

• bit-telefown bla ħlas: 00 800 6 7 8 9 10 11 (ċerti operaturi jafu jimponu ħlas għal dawn it-telefonati),
• fuq dan in-numru standard: +32 22999696, jew
• bil-posta elettronika permezz: http://europa.eu/contact

KIF ISSIB TAGĦRIF DWAR L-UE

Onlajn
L-informazzjoni dwar l-Unjoni Ewropea bil-lingwi uffiċjali kollha tal-UE hija disponibbli fuq is-sit web Europa fuq: http://europa.eu

Pubblikazzjonijiet tal-UE
Tista’ tniżżel mill-internet jew tordna l-pubblikazzjonijiet tal-UE, li xi wħud minnhom huma bla ħlas u xi oħrajn bil-ħlas, mill-EU Bookshop fl-indirizz li ġej: http://bookshop.europa.eu. Kopji multipli ta’ pubblikazzjonijiet bla ħlas tista’ tiksibhom billi tikkuntattja lil Europe Direct jew liċ-ċentru tal-informazzjoni lokali tiegħek (ara http://europa.eu/contact).

Il-liġi tal-UE u dokumenti relatati
Għal aċċess għall-informazzjoni legali tal-UE, inkluż il-liġijiet kollha tal-UE mill-1951 ’l hawn, fil-verżjonijiet lingwistiċi uffiċjali kollha, żur is-sit EUR-Lex hawnhekk: http://eur-lex.europa.eu

Dejta Miftuħa mill-UE
Il-portal tad-Dejta Miftuħa mill-UE (http://data.europa.eu/euodp/mt/data) jipprovdi aċċess għal settijiet tad-dejta mill-UE. Id-dejta tista’ titniżżel mill-internet u tintuża mill-ġdid bla ħlas, kemm għal skopijiet kummerċjali kif ukoll mhux kummerċjali.