MISE & AN tAONTAS EORPACH
Má tá tú idir 15 agus 18 mbliana d’aois agus fonn ort tuilleadh a fhoghlaim i dtaobh an Aontais Eorpaigh, gheobhaidh tú eolas fónta sa leabhrán seo. Míneofar sa leabhrán seo duit conas a tógadh an tAontas Eorpach — nó “an tAontas” nó “AE” mar ghiorrúchán. Míneofar ann freisin cé na luachanna coiteanna atá againn, conas a roinntear na cúraimí san Aontas agus cén bhaint atá ag an méid sin ar fad le do shaol laethúil. Chomh maith leis sin, foghlaimeoidh tú faoi conas a théann an tAontas i ngleic le dúshláin mhóra an lae inniu, mar shampla an t‑athrú aeráide, an saol digiteach agus COVID‑19. Déanfaidh obair an Aontais inniu difear dá bhfuil i ndán duit amach anseo.
Tá an tAontas a bhfuil aithne anois againn air á thógáil leis na blianta. Is obair í atá fós idir lámha agus is gearr go dtosóidh do ghlúin féin ag stiúradh na forbartha sin. Mar sin, is mithid duit anois cruth áirithe a chur ar do thuairimí féin i dtaobh an Aontais. Beidh tú in ann sin a dhéanamh le cuidiú an leabhráin seo agus na gcleachtaí atá ann: europa.eu/learning-corner/eu-me_ga
Tá tráth na gceist ar líne ag gabháil leis an leabhrán seo. Is bealach taitneamhach é sin chun athspléachadh a thabhairt ar roinnt de na saincheisteanna a phléitear ann. europa.eu/learning-corner/quiz_ga
Tá tuilleadh ábhair faoin Aontas le fáil freisin i ngach ceann de theangacha oifigiúla an Aontais ar an suíomh gréasáin Cúinne na Foghlama: europa.eu/learning-corner/learning-corner_ga
Má tá aon mholadh le déanamh agat faoin bhfoilseachán seo, nó aon ní le rá agat ina thaobh, cuir chugainn iad ag an seoladh a leanas: comm-publi-feedback@ec.europa.eu
