(1)

Leagtar síos le Rialachán (CE) Uimh. 273/2004 bearta maidir le faireachán ar thrádáil na réamhtheachtaithe drugaí laistigh den Aontas, agus rialaítear le Rialachán (CE) Uimh. 111/2005 trádáil na réamhtheachtaithe drugaí idir an tAontas agus tríú tíortha. Iarscríbhinn I a ghabhann le Rialachán (CE) Uimh. 273/2004 agus an Iarscríbhinn a ghabhann le Rialachán (CE) Uimh. 111/2005, i ngach ceann de na hIarscríbhinní sin tá liosta de shubstaintí sceidealaithe, substaintí atá faoi réir bearta rialaithe agus faireacháin dá bhforáiltear leis na Rialacháin sin.

(2)

Tá sé curtha in iúl ag údaráis inniúla náisiúnta gur urghabhadh alfa-feinilaicéataicéatáit eitile (EAPA) agus 3-ocsó-2-(3,4-meitiléindé-ocsaifeinil)bútánóáit meitile (MAMDPA) i gcomhthéacs mhonaraíocht aindleathach drugaí támhshuanacha.

(3)

Úsáidtear EAPA chun 1-feinil-2-própánón (P-2-P), nó céatón meitile beinsile (BMK) mar a thugtar air freisin, a tháirgeadh. Is réamhtheachtaí de chuid an amfataimín agus an mheitiolamfataimín é BMK.

(4)

Úsáidtear MAMDPA chun 3,4-meitiléindé-ocsaifeinilprópán-2-ón (PMK) a tháirgeadh, agus is réamhtheachtaí é sin de chuid 3,4-meitiléindé-ocsaimeitilamfataimín (MDMA), rud a dtugtar “eacstais” air go coitianta.

(5)

Tá an t-amfataimín, an meitiolamfataimín agus MDMA ar na drugaí is coitianta a tháirgtear go haindleathach san Aontas. Bíonn iarmhairtí tromchúiseacha acu ar shláinte an duine agus is cúis iad le fadhbanna tromchúiseacha sóisialta agus fadhbanna tromchúiseacha sláinte poiblí i roinnt réigiún den Aontas.

(6)

Dá bhrí sin, ba cheart EAPA agus MAMDPA a sceidealú ar leibhéal an Aontais chun an rialú agus an faireachán orthu a threisiú.

(7)

Na substaintí sceidealaithe a liostaítear in Iarscríbhinn I a ghabhann le Rialachán (CE) Uimh. 273/2004 agus san Iarscríbhinn a ghabhann le Rialachán (CE) Uimh. 111/2005, roinntear iad ina gcatagóirí, catagóirí dá gcuirtear bearta éagsúla i bhfeidhm, ionas go mbainfear cothromaíocht chomhréireach amach idir leibhéal na bagartha a bhaineann le gach substaint faoi seach agus an t-ualach ar an trádáil dhleathach. Cuirtear na bearta rialaithe agus faireacháin is doichte i bhfeidhm maidir leis na substaintí i gCatagóir 1.

(8)

Ós réamhtheachtaithe de chuid an amfataimín, an mheitiolamfataimín agus MDMA iad EAPA agus MAMDPA, is bagairtí móra sláinte sóisialta agus sláinte poiblí iad san Aontas. Ní heol aon táirgeadh, trádáil ná úsáid dhleathach a bheith i gceist leo, ach amháin chun críocha an taighde. Dá bhrí sin, dá gcuirfí iad le Catagóir 1 d’Iarscríbhinn I a ghabhann le Rialachán (CE) Uimh. 273/2004 agus le Catagóir 1 den Iarscríbhinn a ghabhann le Rialachán (CE) Uimh. 111/2005, is freagairt leordhóthanach a bheadh ansin chun a n-úsáid i dtáirgeadh neamhdhleathach na ndrugaí támhshuanacha a sheachaint agus, san am céanna, ní chuirfí ualach mór riaracháin breise ar na hoibreoirí eacnamaíocha ná ar na húdaráis inniúla san Aontas.

(9)

Dá bhrí sin, ba cheart Rialacháin (CE) Uimh. 273/2004 agus (CE) Uimh. 111/2005 a leasú dá réir.

(10)

Le comhéifeacht Rialacháin (CE) Uimh. 273/2004 agus (CE) Uimh. 111/2005, cuirtear i bhfeidhm forálacha áirithe de Choinbhinsiún na Náisiún Aontaithe i gcoinne Gáinneáil Aindleathach Drugaí Támhshuanacha agus Substaintí Síceatrópacha, arna dhéanamh i Vín an 20 Nollaig 1988 agus arna fhormheas le Cinneadh 90/611/CEE ón gComhairle (3). I bhfianaise an dlúthcheangail shubstaintigh idir na cumhachtuithe atá sa dá Rialachán sin, is iomchuí na leasuithe a ghlacadh trí bhíthin aon ghnímh tharmligthe amháin,