AN COIMISIÚN EORPACH
An Bhruiséil,11.9.2024
COM(2024) 402 final
ATHBHREITHNIÚ BLIANTÚIL ÓN gCOIMISIÚN
Tuarascálacha Bliantúla na mBallstát maidir le Gníomhaíochtaí Creidmheasanna Onnmhairiúcháin de réir bhrí Rialachán (AE) Uimh. 1233/2011
AN COIMISIÚN EORPACH
An Bhruiséil,11.9.2024
COM(2024) 402 final
ATHBHREITHNIÚ BLIANTÚIL ÓN gCOIMISIÚN
Tuarascálacha Bliantúla na mBallstát maidir le Gníomhaíochtaí Creidmheasanna Onnmhairiúcháin de réir bhrí Rialachán (AE) Uimh. 1233/2011
1. Réamhrá:
An t‑athbhreithniú bliantúil don bhliain 2022 maidir le gníomhaíochtaí creidmheasa onnmhairiúcháin arna dtacú go hoifigiúil, déantar é de bhun Rialachán (AE) Uimh. 1233/2011 ó Pharlaimint na hEorpa agus ón gComhairle an 16 Samhain 2011 maidir le treoirlínte áirithe a chur i bhfeidhm i réimse na gcreidmheasanna onnmhairiúcháin arna dtacú go hoifigiúil. Cumhdaíonn sé gníomhaíochtaí creidmheasa onnmhairiúcháin arna dtacú go hoifigiúil a rinne gníomhaireachtaí creidmheasa onnmhairiúcháin na mBallstát agus tá sé bunaithe ar an bhfaisnéis a sholáthair na Ballstáit sna Tuarascálacha Bliantúla ar Ghníomhaíochtaí a chuireann siad ar fáil don Choimisiún, de bhun an Rialacháin freisin. Leanann na tuarascálacha teimpléad caighdeánaithe (ar a dtugtar ‘teimpléad seicliosta’ freisin) a ndearnadh athbhreithniú air agus a saibhríodh le himeacht ama. Bhí an teimpléad a d’úsáid na Ballstáit dá dtuarascálacha le haghaidh 2022 infheidhme ó bhí an bhliain tuairiscithe 2020 ann, agus bhí mionsonraí breise ann maidir le cearta an duine, le cosaint na haeráide agus an chomhshaoil i gcomparáid leis an leagan roimhe sin. Tá leagan nua den teimpléad infheidhme ó thús na bliana tuairiscithe 2023, agus leis an teimpléad sin beifear in ann athbhreithniú earnáil ar earnáil atá dírithe ar an aeráid a dhéanamh ar ghníomhaíochtaí creidmheasanna onnmhairiúcháin arna dtacú go hoifigiúil.
2. Tuarascálacha Bliantúla ar Ghníomhaíochtaí a fuarthas le haghaidh na bliana féilire 2022:
Sholáthair fiche Ballstát creidmheasanna onnmhairiúcháin arna dtacú go hoifigiúil in 2022 laistigh de raon feidhme chur i bhfeidhm an tSocraithe maidir leis na Creidmheasanna Onnmhairiúcháin arna dTacú go hOifigiúil: An Bheilg, an Chróit, an Danmhairg, an Eastóin, an Fhionlainn, an Fhrainc, an Ghearmáin, an Iodáil, an Ísiltír, Lucsamburg, an Ostair, an Pholainn, an Phortaingéil, an Rómáin, an tSeicia, an tSlóivéin, an tSlóvaic, an Spáinn, an tSualainn agus an Ungáir. Chuir gach ceann acu Tuarascáil Bhliantúil ar Ghníomhaíochtaí isteach don bhliain 2022.
Na sé Bhallstát atá fágtha, arb iad an Bhulgáir, an Chipir, Éire, an Ghréig, an Laitvia, an Liotuáin agus Málta iad, dhearbhaigh siad nár chuir siad creidmheasanna onnmhairiúcháin arna dtacú go hoifigiúil ar fáil le linn na bliana tuairiscithe.
3. Anailís ar na Tuarascálacha Bliantúla ar Ghníomhaíochtaí:
(a)Faisnéis ghinearálta:
In 2022, ba sholáthraithe cumhdaigh fhoirfe iad na fiche Ballstát go léir a sholáthair creidmheasanna onnmhairiúcháin arna dtacú go hoifigiúil, is é sin creidmheasanna onnmhairiúcháin i bhfoirm ráthaíochtaí agus/nó tháirgí árachais. Astu sin, chuir trí Bhallstát déag (an Bheilg, an Chróit, an Danmhairg, an Fhionlainn, an Fhrainc, an Ghearmáin, an Iodáil, an Pholainn, an tSeicia, an tSlóvaic, an Spáinn, an tSualainn, agus an Ungáir) tacaíocht mhaoiniúcháin oifigiúil ar fáil freisin, is é sin maoiniú díreach, athmhaoiniú iasachtaí tráchtála le haghaidh idirbhearta onnmhairiúcháin nó tacaíocht ráta úis. Thuairiscigh líon beag Ballstát (an Ostair, an Pholainn, an Phortaingéil, an Spáinn, an Ungáir) gur soláthraithe cabhrach ceangailte iad, ar foirm creidmheasanna onnmhairiúcháin í a bhfuil gné lamháltais léi agus a rialaítear i gcomhthéacs Shocrú ECFE.
An socrú maidir leis na Creidmheasanna Onnmhairiúcháin arna dTacú go hOifigiúil agus Moltaí ECFE maidir le conas dul i ngleic le rioscaí a bhaineann le creidmheasanna onnmhairiúcháin arna dtacú go hoifigiúil, áirithíonn siad comhchuibhiú cleachtas ar fud an Aontais. Laistigh den chreat sin, áfach, déanann na rialtais a mbeartais féin a dhearadh. Tá rialacha de bhreis orthu sin sna treoirlínte ECFE ag formhór GCOnna, mar shampla a mhéid a bhaineann le hábhar náisiúnta agus áitiúil, agus caighdeáin níos láidre i bhfeidhm, lena n‑áirítear caighdeáin a léiríonn a gcuid beartas náisiúnta agus gealltanas idirnáisiúnta féin, go háirithe maidir le cosaint na haeráide. Cinneann roinnt GCOnna cláir atá saincheaptha d’earnálacha áirithe nó do chuspóirí áirithe a thairiscint. D’fhéadfadh gur léiriú iad sin ar shainiúlachtaí na dtuiscintí earnála ar leith sa Socrú, struchtúir comhárachais, nó tosaíochtaí straitéiseacha.
Tá struchtúr eagrúcháin GCOnna agus an rialachas maidir le cumhdach a thairiscint éagsúil ar fud an Aontais. Tá creidmheasanna onnmhairiúcháin arna dtacú go hoifigiúil faoi stiúir breis agus 26 chomhlacht ar fud na mBallstát ar gníomhaireachtaí poiblí iad nó cuideachtaí príobháideacha a oibríonn faoi shainordú poiblí agus maoirseacht rialtais. Liostaítear iad in Iarscríbhinn 1. Na Ballstáit a sholáthraíonn cumhdach agus maoiniú araon, de ghnáth bíonn institiúid thiomnaithe ar leith acu a phléann leis an maoiniú, institiúid ar a dtugtar banc EXIM (le haghaidh allmhairí - onnmhairí) uaireanta.
(b)Méid na tacaíochta oifigiúla:
Sna Tuarascálacha Bliantúla ar Ghníomhaíochtaí, tugtar faisnéis airgeadais ábhartha maidir le tacaíocht oifigiúil arna soláthar ag GCOnna, i gcomhréir le creataí reachtacha agus struchtúr eagraíochtúil náisiúnta na mBallstát féin. Níl aon bharúil le cur in iúl ag an gCoimisiún maidir leis na gnéithe airgeadais de Thuarascálacha Bliantúla ar Ghníomhaíochtaí 2022.
Maidir le tacaíocht oifigiúil i bhfoirm cumhdaigh fhoirfe, sa tábla thíos liostaítear neamhchosaint ainmniúil chomhiomlán ar riosca ón 31 Nollaig 2022 i leith le haghaidh na soláthraithe is mó san Aontas Eorpach:
|
Tábla 1. Tacaíocht oifigiúil i bhfoirm cumhdach foirfe in 2022 (EUR billiún) Na rannchuiditheoirí is mó de chuid an Aontais de réir neamhchosaint ainmniúil chomhiomlán ar riosca |
|
|
Neamhchosaint cumhdaigh fhoirfe iomlán san Aontas |
350 |
|
an Ghearmáin |
83 |
|
an Iodáil |
72 |
|
an Fhrainc |
66 |
|
an tSualainn |
38 |
|
an Ísiltír |
28 |
I gcás tacaíocht oifigiúil mhaoiniúcháin, liostaítear sa tábla thíos luach ainmniúil tuairiscithe na punainne iasachtaí arna tacú go hoifigiúil ón 31 Nollaig 2022 i leith le haghaidh soláthraithe móra san Aontas:
|
Tábla 2. Tacaíocht oifigiúil i bhfoirm tacaíocht mhaoiniúcháin oifigiúil in 2022 (EUR billiún) Na ranníocóirí is mó de chuid an Aontais de réir luach ainmniúil na punainne iasachtaí a fhaigheann tacaíocht oifigiúil |
|
|
Punann iasachtaí iomlán san Aontas |
92 |
|
an Iodáil |
38 |
|
an Ghearmáin |
16 |
|
an Fhrainc |
15 |
|
an tSualainn |
8 |
|
an Fhionlainn |
8 |
Tabhair faoi deara: Níor cheart na figiúirí i dTáblaí 1 agus 2 a charnadh le chéile. Ní hamháin go bhfuil cineál na hionstraime difriúil, ach féadfaidh an Ballstát céanna tacú leis an idirbheart onnmhairiúcháin céanna le maoiniú díreach agus cumhdach foirfe araon.
(c)Rioscaí comhshaoil a láimhseáil:
Sa Mholadh ó ECFE maidir le Cur Chuige Coiteann i ndáil le Creidmheasanna Onnmhairiúcháin arna dTacú go hOifigiúil agus le Dícheall Cuí Comhshaoil agus Sóisialta, leagtar síos comhphrionsabail chun tabhairt faoi dhícheall cuí comhshaoil agus sóisialta. Cloíonn Ballstáit uile an Aontais leis an Moladh, faoina shainaithníonn siad na tionchair agus rioscaí a d’fhéadfadh a bheith ann a bhaineann le hiarratais ar thacaíocht oifigiúil agus faoina dtéann siad i ngleic leo. Braitheann an moladh sin ar chaighdeáin dea-bhunaithe ar nós Chaighdeáin Feidhmíochta Comhshaoil agus Shóisialta na Corparáide Airgeadais Idirnáisiúnta, ar Threoirlínte Comhshaoil, Sláinte agus Sábháilteachta Ghrúpa an Bhainc Dhomhanda, ar Bheartais Chosanta an Bhainc Dhomhanda agus ar Chaighdeáin Chomhshaoil agus Shóisialta an Bhainc Dhomhanda. Cumhdaítear sa Mholadh príomhcheisteanna comhshaoil, ar nós astaíochtaí aeir, lena n‑áirítear astaíochtaí gás ceaptha teasa, éifeachtúlacht acmhainní, bainistiú dramhaíola, torann agus creathanna, bainistiú ábhar guaiseach, tionchair ar éiceachórais, cosaint bithéagsúlachta, agus úsáid shuntasach acmhainní nádúrtha. Áirítear leis freisin riachtanais maidir le hullmhacht agus freagairt i gcás éigeandála, ionas go bhfuil úinéirí na dtionscadal in ann freagairt do thionóiscí agus cásanna éigeandála ar bhealach a bheadh iomchuí chun tionchair chomhshaoil agus shóisialta a chosc agus a mhaolú.
Tá beartais díchill chuí agus nósanna imeachta um measúnú riosca atá ag GCOnna de chuid an Aontais, den chuid is mó, bunaithe ar an Moladh, fiú má tá ról neamheisiach aige agus má tá beartais bunaithe ar chaighdeáin eile agus ar acquis an Aontais. Na Ballstát uile a chuireann creidmheasanna onnmhairiúcháin arna dtacú go hoifigiúil ar fáil, tuairiscíonn siad go gcomhlíontar an ghné chomhshaoil a bhaineann leis an Mholadh agus gur cuid lárnach é dá gcórais díchill chuí agus dá gcórais bainistithe riosca agus dá bpróiseas cinnteoireachta. Braitheann na nósanna imeachta um measúnú ex ante ar chineál, ar mhéid agus ar chatagóir iarratais ar leith ar chreidmheas onnmhairiúcháin arna thacú go hoifigiúil. Déantar rioscaí a shainaithint, a aicmiú agus a mheas, agus d’fhéadfadh iarmhairtí a bheith acu ar incháilitheacht maidir le tacaíocht a fháil. Dhearbhaigh gach GCO de chuid an Aontais go ndearna sé scagadh ar gach iarratas ar chreidmheasanna onnmhairiúcháin arna dtacú go hoifigiúil agus é mar aidhm aige a shainaithint ar cheart athbhreithniú comhshaoil a dhéanamh.
De bhun an Mholta, tá sé de cheangal ar GCOnna na hiarratais sin a aicmiú, ag brath ar an tionchar diúltach a d’fhéadfadh a bheith ann ar an gcomhshaol, de réir trí chatagóir riosca: ard (Catagóir A), meánach (Catagóir B) nó íseal (Catagóir C). Tuairiscíonn a lán Ballstát go gcuireann siad an Moladh i bhfeidhm ar bhealach níos leithne ná a raon feidhme. Áirítear leis sin aicmiú na n‑idirbheart go léir, lena n‑áirítear na hidirbhearta sin ina dtacaíonn siad le sciar a bhfuil luach aige faoi bhun SDR 10 milliún, rud nach ndéanfaí, i bprionsabal, a chuimsiú sa chéim scagtha. Tuairiscíonn na Ballstáit go ndearnadh Measúnú ar an Tionchar ar an gComhshaol agus ar an Tionchar Sóisialta (MTCS) i gcomhréir le hAirteagal 18 den Mholadh le haghaidh gach iarratais de Chatagóir A ar ina leith a thug GCO gealltanas deiridh. I gcás iarratais de Chatagóir B, tuairiscíonn na Ballstáit gur chuir iarratasóirí faisnéis leordhóthanach ar fáil i gcónaí maidir le tionchair ábhartha an tionscadail ar an gcomhshaol i gcomhréir le hAirteagal 19 den Mholadh. Sula ndéanfaidh siad cinneadh tacaíocht a chur ar fáil do thionscadail de Chatagóir A nó de Chatagóir B, thuairiscigh GCOnna go ndearna siad meastóireacht i gcónaí ar an bhfaisnéis a thagann as scagadh agus athbhreithniú na n‑idirbheart. Fuarthas faisnéis ábhartha trí thuarascálacha MTCS, ach bailíodh freisin, a bhuí le foirmeacha iarratais agus ceistneoirí GCOnna, taighde deisce, cuairteanna ar an láthair, taighde a rinne comhairleoirí seachtracha agus teagmháil dhíreach leis na hiarratasóirí.
Níor thuairiscigh na Ballstáit cásanna buana neamh-chomhlíontachta, cé go mbíonn mionchásanna neamh-chomhlíontachta ann , ar nós sprioc-amanna caillte chun faisnéis nó tuarascálacha a chur isteach. Déantar cásanna neamh-chomhlíontachta a réiteach i gcomhar le hurraitheoirí an tionscadail, trí ghníomhaíochtaí ceartaitheacha agus bearta maolúcháin a dhearadh a ndéantar faireachán orthu le himeacht ama, nó trí thacaíocht a tharraingt siar nó trí shlánú a dhiúltú. Thuairiscigh GCO amháin go raibh cásanna ann inar imíodh ó ghníomhaíochtaí comhaontaithe agus ó chaighdeáin idirnáisiúnta le linn na céime faireacháin ar idirbhirt áirithe agus maidir leis an gcaoi ar chuir sí bearta i bhfeidhm ar bhonn cás ar chás.
(d)Cuspóirí maidir leis an athrú aeráide a mheas:
In 2022, ghlac formhór na mBallstát beartas aeráide sonrach a raibh feidhm aige maidir lena GCO, chomh maith leis na rialacha earnála a bhaineann leis an aeráid ó Shocrú ECFE a chur i bhfeidhm.
Sna Conclúidí uaithi maidir le creidmheasanna onnmhairiúcháin an 15 Márta 2022, d’fhógair Comhairle an Aontais Eorpaigh go raibh sé ar intinn ag na Ballstáit a spriocdhátaí féin atá bunaithe ar an eolaíocht a chinneadh ina mbeartais náisiúnta faoi dheireadh 2023 chun deireadh a chur le creidmheasanna onnmhairiúcháin arna dtacú go hoifigiúil do thionscadail san earnáil fuinnimh breosla iontaise, ach amháin in imthosca teoranta a shaineofar go soiléir agus atá comhsheasmhach le teorainn téimh 1.5° C agus le spriocanna Chomhaontú Pháras. Dá réir sin, tá beartais nua nó cothrom le dáta glactha ag na Ballstáit, sin nó tá siad ag smaoineamh ar bheartais den chineál sin a ghlacadh, le haghaidh a ngníomhaíochtaí creidmheasanna onnmhairiúcháin arna dtacú go hoifigiúil. Le teimpléad tuairiscithe nua le haghaidh Tuarascálacha Bliantúla ar Ghníomhaíochtaí, a bheidh infheidhme ó thús na bliana tuairiscithe 2023, beidh an Coimisiún in ann faisnéis mhionsonraithe a bhailiú maidir leis na beartais náisiúnta a bhaineann leis an aeráid, sin beartais a bhfuil feidhm acu maidir le GCOnna an Aontais, agus tuairisc a thabhairt ar na beartais sin i gcomhthéacs an chéad athbhreithnithe bhliantúil eile ón gCoimisiún, lena gcumhdófar bliain tuairiscithe 2023.
(e)Dícheall cuí sóisialta agus dícheall cuí chearta an duine:
Sa bhreis ar an ngné chomhshaoil atá aige, ó bhí 2012 ann, tá prionsabail leagtha síos i Moladh ECFE maidir le Cur Chuige Coiteann maidir le dícheall cuí sóisialta a chur i bhfeidhm. Cumhdaíonn sé na príomhthionchair shóisialta a d’fhéadfadh a bheith ag baint le tionscadail, lena n‑áirítear ar dhálaí saothair agus oibre (e.g. cóir chothrom, idirdhealú, saoirse comhlachais, cómhargáil, cóiríocht d’oibrithe), sláinte, sábháilteacht agus slándáil an phobail, (e.g. nochtadh pobail do ghalair, úsáid pearsanra slándála), sealbhú talún agus athlonnú neamhdheonach (e.g. díláithriú fisiceach, díláithriú eacnamaíoch), rannpháirtíocht leordhóthanach le pobail a ndéantar difear dóibh (e.g. comhairliúchán feasach agus próiseas rannpháirtíochta, sásra casaoide), pobail dhúchasacha (e.g. próiseas réamhthoilithe feasach saor), oidhreacht chultúrtha. Cumhdaíonn sé freisin na príomhthionchair ar chearta an duine a bhaineann le tionscadail, lena n‑áirítear saothar éigeantais, saothar leanaí, saincheisteanna inscne agus staideanna sláinte agus sábháilteachta ceirde a d’fhéadfadh a bheith bagrach don bheatha. Tugtar aird ar leith ar ghrúpaí leochaileacha.
Tá cleachtais díchill chuí atá tuairiscithe ag GCOnna an Aontais cosúil leis na cleachtais le haghaidh rioscaí comhshaoil. Léiríonn an fiche Ballstát tuairiscithe uile a chuireann tacaíocht oifigiúil ar fáil go bhfuil gné shóisialta agus gné chearta an duine de Mholadh ECFE maidir le Cur Chuige Comhchoiteann á comhlíonadh acu, agus gur dlúthchuid dá gcórais chinnteoireachta, córais díchill chuí agus córais bainistithe riosca é. Dhearbhaigh siad ar fad go ndearna siad scagadh ar gach iarratas agus é mar aidhm acu a shainaithint ar cheart athbhreithniú sóisialta agus athbhreithniú um chearta an duine a dhéanamh. Thuairiscigh siad go ndearnadh Measúnú ar an Tionchar ar an gComhshaol agus ar an Tionchar Sóisialta (MTCS) i gcás gach iarratais de Chatagóir A. I gcás iarratais de Chatagóir B, thuairiscigh siad gur chuir iarratasóirí faisnéis leordhóthanach ar fáil i gcónaí chun dul i ngleic le tionchair ábhartha an tionscadail. Sula ndéanfaidh siad cinneadh tacaíocht oifigiúil a chur ar fáil do thionscadail de Chatagóir A nó de Chatagóir B a d’fhéadfadh drochthionchar sóisialta nó drochthionchar ar chearta an duine a bheith acu, tuairiscíonn na Ballstáit go ndearna a gcuid GCOnna meastóireacht i gcónaí ar an bhfaisnéis a thagann as an scagadh agus an athbhreithniú, mar a rinne le haghaidh rioscaí comhshaoil.
Níor thuairiscigh Ballstáit cásanna buana neamh-chomhlíontachta in 2022 maidir lena gcuid próiseas díchill chuí shóisialta agus díchill chuí chearta an duine. Thuairiscigh GCO amháin go raibh cásanna ann inar imíodh ó ghníomhaíochtaí comhaontaithe agus ó chaighdeáin idirnáisiúnta le linn na céime faireacháin ar idirbhirt áirithe agus go raibh bearta curtha i bhfeidhm aici ar bhonn cás ar chás.
Ní raibh próiseas comhairliúcháin rannpháirteach ná sásra casaoide ag gach GCO san Aontas do na pobail a ndéantar difear dóibh, cé go bhfuil ceann i bhfeidhm ag a bhformhór. Ní chiallaíonn sin nach ann d’aon chomhairliúchán, mar is féidir iarraidh ar urraitheoirí na dtionscadal sásraí a chur ar bun gan beann ar rannpháirtíocht GCOnna, ach réimse is ea í a bhfuil feabhas le cur uirthi. Na Ballstáit a bhfuil sásra casaoide i bhfeidhm acu ar leibhéal GCO, níor thuairiscigh siad aon ghearán don Choimisiún ina dTuarascálacha Bliantúla ar Ghníomhaíochtaí le haghaidh 2022.
(f)Bearta frithbhreabaireachta:
Na Ballstát uile a sholáthraíonn creidmheasanna onnmhairiúcháin arna dtacú go hoifigiúil, tuairiscíonn siad comhlíontacht i gcomhréir le Moladh ECFE maidir le Breabaireacht agus Creidmheasanna Onnmhairiúcháin arna dTacú go hOifigiúil. Sa mholadh sin tá bearta maidir le scagadh, le dícheall cuí a chur i gcrích, le meastóireacht agus cinneadh a dhéanamh maidir le tacaíocht d’fhonn breabaireacht a dhíspreagadh i gcás creidmheasanna onnmhairiúcháin arna dtacú go hoifigiúil. Go háirithe, ní mór a fhíorú nach bhfuil na páirtithe a bhfuil baint acu le hidirbhearta liostaithe i liostaí toirmeasc na nInstitiúidí Airgeadais Iltaobhacha.
(g)Cleachtais iasachtaithe inbhuanaithe:
Na Ballstát uile a sholáthraíonn creidmheasanna onnmhairiúcháin arna dtacú go hoifigiúil, tuairiscíonn siad comhlíontacht le Moladh ECFE maidir le Cleachtais Iasachtaithe Inbhuanaithe agus Creidmheasanna Onnmhairiúcháin arna dTacú go hOifigiúil. Tá sé mar aidhm leis an Moladh a áirithiú go mbainfear leas as maoiniú na riachtanas forbartha atá ag tíortha ísealioncaim gan fiacha iomarcacha a mhéadú amach anseo sna tíortha sin. Comhlíonadh an Mholta sin, is rud é sin a théann go dlúth le beartais an Bhainc Dhomhanda agus an Chiste Airgeadaíochta Idirnáisiúnta (CAI) maidir le coinníollacha fiachais le haghaidh iasachtaí neamh-lamháltais, agus a mhéid a bhaineann le hiasachtú inbhuanaithe. Faoin Moladh, chomhaontaigh na daoine a thacaíonn leis bearta trédhearcachta tábhachtacha lena n‑áirítear faisnéis a chur ar fáil don Bhanc Domhanda agus do CAI. I bhformhór na gcásanna, tá measúnuithe ar inbhuanaitheacht fiachais mar chuid de mheasúnuithe foriomlána ar riosca tíre a mbíonn tionchar acu ar bheartais faoi chumhdach tíortha GCOnna.
(h)Faisnéis eile atá sna Tuarascálacha Bliantúla ar Ghníomhaíochtaí:
Tuairiscíonn na Ballstáit go n‑áirithíonn siad go bhfeidhmeoidh GCOnna ar bhealach chomh trédhearcach agus is féidir agus rúndacht na faisnéise íogaire gnó á hurramú ag an am céanna. De bhun Mholadh ECFE maidir le Cur Chuige Coiteann, is éard atá sa nós imeachta comhchuibhithe ar fud an Aontais faisnéis mhionsonraithe a nochtadh go poiblí le haghaidh tionscadail a d’fhéadfadh drochthionchar a bheith acu ar an gcomhshaol nó ar an tsochaí. Nochtann GCOnna i gcónaí an fhaisnéis go léir a éilítear de bhun Airteagal 39 agus Airteagal 41 den Mholadh, is é sin le rá faisnéis ábhartha ex ante maidir le tionscadail Chatagóir A, lena n‑áirítear MTCSanna, agus faisnéis ex post do gach tionscadal de Chatagóir A agus de Chatagóir B a dtacaítear leis, trí leathanaigh thiomnaithe ar a suíomh gréasáin, dá dtagraítear in Iarscríbhinn 2.
Tá Beartas Freagrachta Sóisialta Corparáidí ag roinnt mhaith GCOnna de chuid an Aontais arb é atá i gceist leis ní hamháin iarrachtaí inmheánacha ach dlúth-idirphlé le cliaint CIE freisin. Sa chomhthéacs sin, tá meastóireacht mhéadaitheach á déanamh ag GCOnna ar a gcleachtais féin agus tá pleananna á bhforbairt acu chun a dtionchar féin ar an gcomhshaol a laghdú lena n‑áirítear meastacháin ar lorg carbóin.
4. Comhlíontacht GCOnna le cuspóirí agus oibleagáidí an Aontais:
In Airteagal 3 de Chonradh ar an Aontas Eorpach (CAE), liostaítear cuspóirí ginearálta an Aontais Eorpaigh; leagann Airteagal 21 amach prionsabail agus cuspóirí ghníomhaíocht sheachtrach an Aontais. De réir Airteagal 3 mír 5 CAE, ina chaidreamh leis an domhan mór go ‘rannchuideoidh [an tAontas] le [...] forbairt inbhuanaithe na Cruinne, leis an dlúthpháirtíocht agus leis an meas frithpháirteach idir na pobail, leis an tsaorthrádáil chóir, le deireadh a chur leis an mbochtaineacht, agus cearta an duine agus cearta an linbh go háirithe a chosaint, leis an dlí idirnáisiúnta a urramú go docht agus a fhorbairt, lena n‑áirítear prionsabail Chairt na Náisiún Aontaithe a urramú’. A mhéid a bhaineann le comhbheartas tráchtála an Aontais, déantar tagairt do phrionsabail agus do chuspóirí ghníomhaíochtaí seachtracha an Aontais in Airteagal 206 agus sa chéad mhír d’Airteagal 207 den Chonradh ar Fheidhmiú an Aontais Eorpaigh.
D’iarr Parlaimint na hEorpa ar an gCoimisiún ráiteas a dhéanamh maidir le cé acu a chomhlíonann nó nach gcomhlíonann na Ballstáit cuspóirí agus oibleagáidí an Aontais agus na creidmheasanna onnmhairiúcháin arna dtacú go hoifigiúil á gcur ar fáil acu. Rinne an Coimisiún a athbhreithniú bliantúil i gcomhréir le Rialachán (AE) Uimh. 1233/2011. Dá bhrí sin, tá an t‑athbhreithniú ón gCoimisiún bunaithe ar na Tuarascálacha Bliantúla ar Ghníomhaíochtaí a chuir na Ballstáit isteach, agus ní féidir a mheas go bhfuil sé uileghabhálach.
Measann an Coimisiún go soláthraíonn an fhaisnéis atá ar fáil fianaise gur i gcomhréir le hAirteagal 3 agus le hAirteagal 21 CAE atá gníomhaíochtaí creidmheasa onnmhairiúcháin arna dtacú go hoifigiúil san Aontas. Soláthraíonn moltaí ECFE creat maidir le cláir creidmheasa onnmhairiúcháin na mBallstát a bhainistiú. Bunaíonn na Ballstáit a gcuid beartas féin bunaithe ar na moltaí sin agus i gcomhréir le cuspóirí an Aontais. A mhéid a bhaineann le comhlíonadh oibleagáidí idirnáisiúnta agus oibleagáidí faoi dhlí iomaíochta Aontais, ní raibh aon díospóid ann ag an Eagraíocht Dhomhanda Trádála maidir le gníomhaíochtaí creidmheasanna onnmhairiúcháin Ballstáit den Aontas le haghaidh 2022, agus níl aon ghearán faighte ag an gCoimisiún faoi sháruithe a d’fhéadfadh a bheith ar rialachán de chuid an Aontais a bhfuil baint acu le GCOnna an Aontais.