(1)

Ir-Regolament (KE) Nru 999/2001 jistabbilixxi r-regoli għall-prevenzjoni, il-kontroll u l-eradikazzjoni ta’ ċertu enċefalopatiji sponġiformi li jinxterdu (TSEs) f’annimali bovini, ovini u kaprini. L-Artikolu 15(1) ta’ dak ir-Regolament jipprevedi, inter alia, li t-tqegħid fis-suq jew, jekk meħtieġ, l-esportazzjoni ta’ annimali bovini, ovini jew kaprini u s-semen, l-embrijuni u l-ova tagħhom huma soġġetti għall-kundizzjonijiet stabbiliti fl-Anness VIII tiegħu.

(2)

It-Taqsima A tal-Kapitolu A tal-Anness VIII tar-Regolament (KE) Nru 999/2001 fiha, inter alia, il-kundizzjonijiet li japplikaw għat-tqegħid fis-suq tal-annimali ovini u kaprini u s-semen u l-embrijuni tagħhom. Il-punt 2.1 ta’ dik it-Taqsima jikkonċerna l-każ fejn Stat Membru jqis li t-territorju tiegħu jew parti mit-territorju tiegħu jippreżenta riskju negliġibbli tal-iscrapie klassika. F’każ bħal dan, l-Istat Membru kkonċernat għandu jippreżenta lill-Kummissjoni dokumentazzjoni ta’ sostenn xierqa li turi li l-kriterji stabbiliti f’dak il-punt huma ssodisfati. Barra minn hekk, il-punt 2.2 ta’ dik it-Taqsima jistipula li l-Kummissjoni tista’ tapprova l-istatus ta’ riskju negliġibbli tal-iscrapie klassika tal-Istat Membru jew taż-żona tal-Istat Membru. Il-punt 2.2 ta’ dik it-Taqsima jipprevedi wkoll li l-Istat Membru għandu jinnotifika lill-Kummissjoni bi kwalunkwe bidla fl-informazzjoni ppreżentata f’konformità mal-punt 2.1 tagħha relatata ma’ dik il-marda. Barra minn hekk, il-punt 2.3 ta’ dik it-Taqsima jelenka l-Istati Membri li għalihom ġie approvat l-istatus ta’ riskju negliġibbli tal-iscrapie klassika.

(3)

Fis-26 ta’ Ġunju 2023, is-Slovenja ppreżentat applikazzjoni lill-Kummissjoni biex tiġi rikonoxxuta bħala li għandha status ta’ riskju negliġibbli tal-iscrapie klassika. Il-Kummissjoni tat opinjoni favorevoli dwar l-applikazzjoni tas-Slovenja fir-rigward tal-kriterji stabbiliti fil-Kapitolu A, it-Taqsima A, il-punt 2.1(a), (b), (d), (e) u (f) tal-Anness VIII tar-Regolament (KE) Nru 999/2001, iżda ma lestietx il-valutazzjoni tagħha fir-rigward tal-punt 2.1(c) ta’ dik it-Taqsima. Fid-29 ta’ Frar 2024, il-Kummissjoni talbet l-għajnuna xjentifika u teknika tal-Awtorità Ewropea dwar is-Sigurtà fl-Ikel (EFSA) biex tevalwa jekk dak l-Istat Membru, fl-applikazzjoni tiegħu, weriex konformità mat-Taqsima A, il-punt 2.1(c) u l-punt 2.2, tal-Kapitolu A tal-Anness VIII tar-Regolament (KE) Nru 999/2001.

(4)

Fil-21 ta’ Ottubru 2024, l-EFSA ppubblikat rapport xjentifiku dwar l-“Evalwazzjoni tal-applikazzjoni tas-Slovenja biex tiġi rikonoxxuta bħala li għandha riskju negliġibbli tal-iscrapie klassika” (2) bi tweġiba għat-talba tal-Kummissjoni (ir-rapport tal-EFSA). Ir-rapport tal-EFSA jikkonkludi li, abbażi tas-sensittività dijanjostika pprovduta mill-EFSA u mill-Istitut taċ-Ċentru Konġunt tar-Riċerka għall-Materjali u l-Kejl ta’ Referenza (IRMM) għat-testijiet dijanjostiċi tal-iskrinjar użati mill-awtorità kompetenti tas-Slovenja għad-detezzjoni tal-iscrapie klassika, u abbażi tal-għadd u t-tip ta’ annimali ovini u kaprini ttestjati għal dak l-għan bejn l-2016 u l-2023, is-sensittività ġenerali tas-sistema ta’ sorveljanza applikata għad-detezzjoni tal-marda hija konformi mal-kundizzjonijiet stabbiliti fit-Taqsima A, il-punt 2.1(c), tal-Kapitolu A tal-Anness VIII tar-Regolament (KE) Nru 999/2001 għal kull waħda minn dawk is-seba’ snin.

(5)

Ir-rapport tal-EFSA jikkonkludi wkoll li, abbażi tas-sensittività tal-ittestjar ipprovduta mill-evalwazzjoni tal-passat tat-testijiet tal-iskrinjar dijanjostiku mill-EFSA u mill-IRMM, l-intenzjonijiet tas-Slovenja li jikkonċernaw is-sorveljanza tal-iscrapie klassika fil-futur jkomplu jkunu konformi mat-Taqsima A, il-punt 2.2 tal-Kapitolu A tal-Anness VIII tar-Regolament (KE) Nru 999/2001.

(6)

Filwaqt li jitqies ir-rapport tal-EFSA u l-eżitu favorevoli tal-valutazzjoni tal-Kummissjoni ta’ din l-applikazzjoni mal-kriterji l-oħra stabbiliti fit-Taqsima A, il-punt 2.1, tal-Kapitolu A tal-Anness VIII tar-Regolament (KE) Nru 999/2001, jenħtieġ li s-Slovenja tiġi elenkata bħala Stat Membru b’riskju negliġibbli tal-iscrapie klassika.

(7)

Għalhekk, jenħtieġ li t-Taqsima A, il-punt 2.3 tal-Kapitolu A tal-Anness VIII tar-Regolament (KE) Nru 999/2001 tiġi emendata sabiex is-Slovenja tiżdied mal-lista ta’ Stati Membri bi status ta’ riskju negliġibbli tal-iscrapie klassika.

(8)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,