(1)

L-Artikolu 4(2) tal-Att ta’ Adeżjoni tal-2005 tar-Repubblika tal-Bulgarija u tar-Rumanija jipprevedi li d-dispożizzjonijiet tal-acquis ta’ Schengen mhux imsemmija fl-Artikolu 4(1) ta’ dak l-Att għandhom japplikaw biss f’kull wieħed minn dawk l-Istati Membri skont deċiżjoni tal-Kunsill għal dan l-għan, wara verifika f’konformità mal-proċeduri ta’ evalwazzjoni ta’ Schengen applikabbli, li l-kundizzjonijiet meħtieġa għall-applikazzjoni tal-partijiet kollha tal-acquis ikkonċernati jkunu ġew issodisfati f’dawk l-Istati Membri.

(2)

Permezz tad-Deċiżjoni (UE) 2024/210 (2), il-Kunsill, wara verifika li l-kundizzjonijiet meħtieġa kienu ntlaħqu, għamel id-dispożizzjonijiet tal-acquis ta’ Schengen mhux imsemmija fl-Artikolu 4(1) tal-Att tal-Adeżjoni tal-2005, kif elenkati fl-Anness ta’ dik id-Deċiżjoni, applikabbli għall-Bulgarija u r-Rumanija mill-31 ta’ Marzu 2024, u, għal raġunijiet tekniċi u operazzjonali, tneħħew bħala l-ewwel stadju ta’ kontrolli fuq persuni fil-fruntieri interni tal-ajru u tal-baħar ma’ u bejn il-Bulgarija u r-Rumanija minn dik id-data.

(3)

Jenħtieġ li tittieħed deċiżjoni oħra mill-Kunsill filwaqt li jaġixxi skont l-Artikolu 4(2) tal-Att tal-Adeżjoni tal-2005, li jistabbilixxi data għat-tneħħija tal-kontrolli fuq persuni fil-fruntieri interni tal-art ma’ u bejn il-Bulgarija u r-Rumanija.

(4)

Fir-rigward tal-Iżlanda u n-Norveġja, din id-Deċiżjoni tikkostitwixxi żvilupp tad-dispożizzjonijiet tal-acquis ta’ Schengen fis-sens tal-Ftehim konkluż mill-Kunsill tal-Unjoni Ewropea u r-Repubblika tal-Iżlanda u r-Renju tan-Norveġja dwar l-assoċjazzjoni ta’ dawk iż-żewġ Stati mal-implimentazzjoni, l-applikazzjoni u l-iżvilupp tal-acquis (3) ta’ Schengen, li jaqgħu fil-qasam imsemmi fl-Artikolu 1, il-punti B, C, D u F, tad-Deċiżjoni tal-Kunsill 1999/437/KE (4).

(5)

Fir-rigward tal-Iżvizzera, din id-Deċiżjoni tikkostitwixxi żvilupp tad-dispożizzjonijiet tal-acquis ta’ Schengen, fis-sens tal-Ftehim bejn l-Unjoni Ewropea, il-Komunità Ewropea u l-Konfederazzjoni Żvizzera dwar l-assoċjazzjoni tal-Konfederazzjoni Żvizzera mal-implimentazzjoni, l-applikazzjoni u l-iżvilupp tal-acquis (5) ta’ Schengen li jaqgħu fil-qasam imsemmi fl-Artikolu 1, il-punti B, C, D u F, tad-Deċiżjoni 1999/437/KE moqri flimkien mal-Artikolu 3 tad-Deċiżjoni tal-Kunsill 2008/146/KE (6).

(6)

Fir-rigward tal-Liechtenstein, din id-Deċiżjoni tikkostitwixxi żvilupp tad-dispożizzjonijiet tal-acquis ta’ Schengen fis-sens tal-Protokoll bejn l-Unjoni Ewropea, il-Komunità Ewropea, il-Konfederazzjoni Żvizzera u l-Prinċipat tal-Liechtenstein dwar l-adeżjoni tal-Prinċipat tal-Liechtenstein mal-Ftehim bejn l-Unjoni Ewropea, il-Komunità Ewropea u l-Konfederazzjoni Żvizzera dwar l-assoċjazzjoni tal-Konfederazzjoni Żvizzera mal-implimentazzjoni, l-applikazzjoni u l-iżvilupp tal-acquis (7) ta’ Schengen li jaqgħu fil-qasam imsemmi fl-Artikolu 1, il-punti B, C, D u F, tad-Deċiżjoni 1999/437/KE moqri flimkien mal-Artikolu 3 tad-Deċiżjoni tal-Kunsill 2011/350/UE (8),