European flag

Iris Oifigiúil
an Aontais Eorpaigh

GA

Sraith C


C/2024/1810

29.2.2024

Foilsiú teachtaireachta maidir le formheas leasaithe chaighdeánaigh ar shonraíocht táirge le haghaidh ainm in earnáil an fhíona dá dtagraítear in Airteagal 17(2) agus (3) de Rialachán Tarmligthe (AE) 2019/33 ón gCoimisiún

(C/2024/1810)

Foilsítear an teachtaireacht seo i gcomhréir le hAirteagal 17(5) de Rialachán Tarmligthe (AE) 2019/33 ón gCoimisiún (1).

FORMHEAS LEASAITHE CHAIGHDEÁNAIGH A CHUR IN IÚL

‘Grignan-les-Adhémar’

PDO-FR-A0929-AM03

Dáta na teachtaireachta: 7 Nollaig 2023

TUAIRISC AR AN LEASÚ FORMHEASTA AGUS CÚISEANNA LEIS

1.   Limistéar geografach agus limistéar díreach in aice láimhe

Leasaíodh an tsonraíocht le haghaidh an ainmniúcháin ‘Grignan-Lès-Adhémar’ chun tagairt don Chód Geografach Oifigiúil a chur leis i gCaibidil 1, Roinn VI ‘Limistéir agus áiteanna ina ndéantar na hoibríochtaí éagsúla’, pointe 1 ‘Limistéar geografach’ agus pointe 3 ‘Limistéar Díreach in Aice Láimhe’, gan aon athrú breise.

Leis an leasú eagarthóireachta sin, beifear in ann an limistéar geografach aithint le tagairt do leagan 2023 den Chód Geografach Oifigiúil, a choinníonn an Institiúid Náisiúnta Staidrimh agus Staidéar Eacnamaíoch (INSEE) cothrom le dáta agus a thugann deimhneacht dhlíthiúil don sainiú ar an limistéar geografach.

Tá an tagairt chéanna curtha isteach sa doiciméad aonair faoi na ceannteidil ‘Limistéar geografach’ agus ‘Coinníollacha breise - limistéar díreach in aice láimhe’.

2.   Limistéar dáileachta críochaithe

Leasaíodh an tsonraíocht le haghaidh an ainmniúcháin ‘Grignan-Lès-Adhémar’ i gCaibidil 1, Roinn IV, ‘Limistéir agus áiteanna ina ndéantar na hoibríochtaí éagsúla’, pointe (2) ‘Limistéar dáileachta críochaithe’, chun an dáta a d’fhormheas an t-údarás náisiúnta inniúil an limistéar dáileachta críochaithe laistigh den limistéar geografach táirgthe a cheartú, gan aon athrú breise. Déantar dáileachtaí a chríochú, trí na dáileachtaí laistigh den limistéar geografach táirgthe a shainaithint, ar dáileachtaí iad atá oiriúnach chun an táirge a tháirgeadh ar táirge é a chumhdaítear leis an ainmniúchán tionscnaimh faoi chosaint. Níor modhnaíodh an limistéar geografach.

Ní dhéanann an leasú sin difear don doiciméad aonair.

3.   Bearta idirthréimhseacha

Cuireadh beart idirthréimhseach le Caibidil 1, Roinn XI ‘Bearta idirthréimhseacha’ den tsonraíocht, tar éis athbhreithniú a dhéanamh ar an limistéar dáileachta críochaithe. Déantar é sin chun cur ar chumas oibreoirí ar cuireadh a gcuid dáileachtaí roimh an athbhreithniú, agus atá eisiata anois ó limistéar dáileachta críochaithe an ainmniúcháin, chun leas a bhaint as an gceart chun an ainmniúcháin, suas le fómhar 2053 agus é sin san áireamh, ar choinníoll go gcomhlíonfaidh siad na forálacha eile sa tsonraíocht.

Ní dhéanann an leasú sin difear don doiciméad aonair.

4.   Tagairt don chomhlacht cigireachta

Leasaíodh an tsonraíocht i gCaibidil 3, Roinn II ‘Tagairt don chomhlacht cigireachta’ chun a shonrú go seiceáiltear comhlíontacht leis an tsonraíocht táirge faoi údarás na hInstitiúide Náisiúnta Tionscnaimh agus Cáilíochta (INAO) ar bhonn plean iniúchta formheasta.

Ní dhéanann an soiléiriú sin difear don doiciméad aonair.

DOICIMÉAD AONAIR

1.   Ainm(ainmnneacha)

Grignan-les-Adhémar

2.   An cineál táisc gheografaigh

ATFC – Ainmniúchán Tionscnaimh Faoi Chosaint

3.   Catagóirí na dtáirgí fíniúna

1.

Fíon

4.   Tuairisc ar an bhfíon nó ar na fíonnta

1.   Tuairisc anailíseach

TUAIRISC ACHOMAIR I SCRÍBHINN

Is fíonta socra iad na fíonta a bhfuil an t-ainmniúchán tionscnaimh ‘Grignan-les-Adhémar’ acu ar féidir a bheith ina bhfíonta dearga, rosé nó geala. Is ionann an neart alcóil nádúrtha íosta de réir toirte i gcás na bhfíonta dearga agus 12 %, agus is ionann agus 11.5 % é i gcás na bhfíonta rosé.

Tar éis iad a choipeadh, tá méid siúcra coiptheach (glúcós agus fruchtós) sna fíonta nach mó ná na méideanna a leanas:

—

Fíonta geala agus rosé 4 g/l;

—

Fíonta dearga ag a bhfuil neart alcóil nádúrtha de réir toirte níos lú ná nó cothrom le 14 %: 3 g/l;

—

Fíonta dearga ag a bhfuil neart alcóil nádúrtha de réir toirte níos mó ná 14 %: 4 g/l.

Tráth an phacáistithe, is lú nó cothrom leis na figiúirí seo a leanas é cion aigéid sho-ghalaithe na bhfíonta:

—

18.37 milleachoibhéis in aghaidh an lítir le haghaidh fíonta dearga;

—

14.28 milleachoibhéis in aghaidh an lítir le haghaidh fíonta rosé. Tráth an phacáistithe, i gcás na bhfíonta dearga:

tá innéacs iomlán polaifeanól (OD 280 nm) níos mó ná 40 nó cothrom leis acu;

tá déine mhodhnaithe dathanna (OD 420 nm + OD 520 nm + OD 620 nm) níos mó ná 5 acu;

tá méid aigéid mhalaigh uasta 0.4 gram in aghaidh an lítir acu.

Tar éis an tsaibhrithe, ní mór nach mó ná 13 % neart alcóil iomlán na bhfíonta de réir toirte.

Comhlíonann na critéir anailíseacha eile na luachanna a bhunaítear i reachtaíocht an Aontais.

Saintréithe anailíseacha ginearálta

Uasmhéid nirt alcóil iomláin (mar % den toirt)

 

Íosmhéid nirt alcóil iarbhír (mar % den toirt)

 

Íosmhéid aigéadachta iomláine

 

Uasmhéid aigéadachta luainí (mar mhilleachoibhéisí in aghaidh an lítir)

 

Uasmhéid dé-ocsaíde sulfair iomláine (mar mhilleagraim in aghaidh an lítir)

 

2.   Tuairisc orgánaileipteach

TUAIRISC ACHOMAIR I SCRÍBHINN

Le saintréithe céadfacha na dtáirgí sin go léir, nasctar iad le mórfhine fíonta Ghleann an Rhône, a mhéid a bhfuil ithreacha agus cineálacha fíona comhchosúla ann.

Mar sin féin, is díol suntais iad na fíonta dearga, go háirithe a bhuí le húsáid an chineáil Grenache N, cineál a chuirtear sna tailte is sia inar féidir leis aibiú agus a thugann foirfeacht, galántacht torthaí agus maothlachas don fhíon. Is leis an gcineál Syrah N a mhínítear an cumasc, lena n-áirithítear struchtúr na tainnine, déine an datha agus dea-bholaithe galánta bláthacha agus plandúla. Is féidir na fíonta dearga sin a ól mar fhíonta úra, agus baineann mianach iontach lena dtabhairt chun cineáil a bhuí leis an gcion suntasach den chineál Syrah N a úsáidtear san ainmniúchán tionscnaimh cláraithe ó fhíonghoirt i ndeisceart Ghleann an Rhône.

Is de dhéantús an mhodha fáiscthe nó an mhodha fuilithe iad na fíonta rosé, ar torthaí agus galánta iad, le dath idir bándearg éadrom agus dearg éadrom orthu. Is suntasach iad a n-úire agus a mboige ar an mbéal, le dea-bholaithe torthaí dearga in uachtar iontu.

Is de chumasc cineálacha fíona deisceartacha (lena n-áirítear Bourboulenc B, Grenache B agus Clairette B) agus cinn níos tuaisceartaí (amhail Marsanne B, Roussanne B nó Viognier B) a dhéantar na fíonta geala. Leis an raon cineálacha sin, ceadaítear ilmheascáin agus tagann fíonta geala tirime dá thoradh ina bhforbraítear castacht mhór ó thaobh dea-bholaithe de (cinn bhláthacha, torthaí, mhianracha, etc.) agus ina bhfaightear aigéadacht ar an mbéal ar le maothlachas an fhíona a aimsítear cothromaíocht eatarthu i gcónaí.

Saintréithe anailíseacha ginearálta

Uasmhéid nirt alcóil iomláin (mar % den toirt)

 

Íosmhéid nirt alcóil iarbhír (mar % den toirt)

 

Íosmhéid aigéadachta iomláine

 

Uasmhéid aigéadachta luainí (mar mhilleachoibhéisí in aghaidh an lítir)

 

Uasmhéid dé-ocsaíde sulfair iomláine (mar mhilleagraim in aghaidh an lítir)

 

5.   Cleachtais maidir le fíonóireacht

5.1.   Cleachtais fhíoneolaíocha shonracha

1)   An modh saothraithe

Dlús plandaithe

—

Is é dlús plandála íosta na bhfíniúnacha 4 000 planda in aghaidh an heicteáir. Níor cheart an fad idir na línte a bheith níos mó ná 2.50 méadar.

Ní mór gur 1 mhéadar ar a laghad í an spásáil idir na plandaí sa tsraith chéanna, agus ní mór nach mó ná 1.50 méadar í.

Rialacha prúnála

Forálacha ginearálta:

—

Déantar prúnáil mheasctha ar na fíniúnacha (ag úsáid na modhanna cuachphrúnála nó cordon de Royat), agus 12 bachlóg ar a mhéad in aghaidh an phlanda i gceist.

—

Ceadaítear prúnáil Guyot a dhéanamh le linn na tréimhse is gá chun an tródam Royat a mhúnlú, tréimhse nach mó ná 2 bhliain í.

—

I gcás dáileachtaí a phlandaítear i ndiaidh 1 Lúnasa 2022, ní féidir airde an tródaim a bheith níos mó ná 70 cm.

Forálacha speisialta:

—

Féadfar na cineálacha Viognier B agus Syrah N a phrúnáil leis an modh prúnála aonair Guyot freisin, le huasmhéid 10 mbachlóg ar an ngas agus dhá bhachlóg ar an spor.

Rialacha maidir le treilísiú

Ní mór fíniúnacha na gcineálacha Marsanne B, Marselan N, Roussanne B, Syrah N agus Viognier B a bheith treoraithe le sreang thaca amháin agus sraith amháin de shreanga duilliúir ar a laghad (modh treoraithe fíniúnacha: suíomh péacán).

Féadfar uisciú a údarú.

2)   Cleachtas fíoneolaíochta sonrach

—

Ceadaítear teicnící laghdúcháin chun fíon a shaibhriú i gcás fíonta dearga a bhfuil ráta tiúchana suas le 10 % acu.

—

Chun fíonta rosé a tháirgeadh, ceadaítear do dhéantóirí fíona gualach fíonóireachta a úsáid go heisiach (ina aonar nó measctha in ullmhóidí) ar úrfhíonta fáisceáin, ar 20 % ar a mhéad den toirt as a ndéanann an t-oibritheoir fíon le haghaidh na buainte sin;

Chomh maith leis na forálacha thuas, ní mór do na cleachtais fíoneolaíochta a ghlactar le haghaidh na bhfíonta na ceanglais a chomhlíonadh a leagtar síos i reachtaíocht an Aontais agus leis an gCód Tuaithe agus Iascach.

5.2.   Uastáirgeacht

58 heictilítear in aghaidh an heicteáir

6.   Limistéar geografach críochaithe

Buaintear na fíonchaora agus déantar agus forbraítear na fíonta sna bardais a leanas i roinn Drôme, bunaithe ar Chód Geografach Oifigiúil 2023:

Allan, La Baume-de-Transit, Chamaret, Chantemerle-lès-Grignan, Châteauneuf-du-Rhône, Clansayes, Colonzelle, Donzère, La Garde-Adhémar, Les Granges-Gontardes, Grignan, Malataverne, Montségur-sur-Lauzon, Réauville, Roche-Saint-Secret-Béconne, Roussas, Saint-Paul-Trois-Châteaux, Saint-Restitut, Salles-sous-Bois, Solérieux agus Valaurie.

7.   Cineál(acha) fíonchaoire

Bourboulenc B – Doucillon blanc

Carignan N

Cinsaut N – Cinsault

Clairette B

Grenache N

Grenache blanc B

Marsanne B

Marselan N

Mourvèdre N – Monastrell

Roussanne B

Syrah N – Shiraz

Viognier B

8.   Tuairisc ar an nasc (na naisc)

8.1.   Tosca stairiúla agus daonna is ábhartha don nasc

Tuairisc ar na tosca nádúrtha is ábhartha don nasc

Tá limistéar geografach an ainmniúcháin ‘Grignan-les-Adhémar’ suite i gcroílár an réigiúin Drôme Provençale, ar idirchrios agus traschrios é idir bunchnoic Dauphiné agus Comtat abhus agus bunchnoic an Massif Central agus na nAlp thall. Is ar bhruach clé abhainn an Rhône atá sé, ó dheas ó Montelimar agus ó thuaidh ó Bollène, i roinn Drôme. Clúdaítear 21 bhardas leis atá suite idir an Rhône thiar agus Enclave des Papes thoir. Tá idir cheantair chothroma agus chnocacha le fáil sa tírdhreach ann, agus é ar airde mheasartha 200 méadar os cionn leibhéal na mara ar an meán.

Is foirmíochtaí ó Lár an Mhéicéinigh atá mar shubstráit faoin gcuid is mó den réigiún uile. In oirthear an réigiúin, is foirmíochtaí gaineamh agus moláis mharlaigh den chuid is mó atá iontu (bardais Grignan agus Colonzelle), ar a dtugtar ‘Molasses de Grignan’. I lár an réigiúin, déantar gaineamh buíscothach agus gaineamhchloch (‘Saffres’) Valréas de na sil-leagain Eilvéiseacha sin. Faightear ithir éadrom ghainmheach iontu ag a bhfuil doimhneacht éagsúil agus atá ar bheagán cúltaiscí mianracha.

I ndeisceart an réigiúin, sainítear bardas La Baume-de-Transit lena léibhinn Würm d’ithreacha aolchloiche créúla agus breaclacha arna ndeascadh ag abhainn Aygues, agus in iarthar an réigiúin faightear léibhinn abhann atá múnlaithe ag an Róin.

I dtuaisceart an réigiúin, tá na cnoic aolchloiche taobh leis na léibhinn abhann is sine le cois Ghleann na Róine, agus tá siad páirtchumhdaithe le scileach aolchloiche de bhunadh na screathan úd. Is sna críocha úd ag a bhfuil drochithreacha agus ithreacha tearca atá Domaine la Garrigue (Bois des Mattes). Níor leath na fíonghoirt thar an gceantar ach le roinnt deichbhlianta anuas, thiar sna 1960í.

Tá teorainn aeráide le sonrú in aeráid ghinearálta an cheantair. Is í aeráid na Meánmhara a fhaightear sa chuid is mó de, ach éiríonn sí níos laige i dtreo thuaisceart an cheantair, atá comhtheagmhasach leis an teorainn thuaisceartach do shaothrú na gcrann olóige agus an chineáil fíonchaoire Grenache N araon.

Frasaíocht neamhrialta a thiteann ann. Tá an mhéanbháisteach bhliantúil idir 700 mm agus 1 000 mm.

Teochtaí séimhe a bhraitear ann, agus an mheánteocht bhliantúil thart ar 13 °C, agus tá méid suntasach de sholas na gréine ann (thart ar 2 500 uair an chloig in aghaidh na bliana). Le minice na gaoithe (go háirithe gaoth Mistral), cuirtear le tuire na gcnoc ar a saothraítear na fíonghoirt.

Tá miondifríochtaí breise san aeráid ó thionchair ilchríochacha, de bharr shraith cnoc thar Ghleann na Róine a fhágann geimhrí níos crua.

Tagann imthosca áitiúla contrártha de thoradh phlandú na bhfíonghort ag an teorainn aeráide seo, imthosca a bhraitheann ar na dálaí ó thaobh airde agus topagrafaíochta de.

Tuairisc ar na tosca daonna is ábhartha don nasc

I measc na n-iarsmaí iomadúla Rómhánacha lena gcruthaítear go mbíodh fíonghoirt agus fíonta sa réigiún seo ón anallód, tá fionnadh fíonlann mhór thiar in 1983 i mbardas Donzère, ag ceartlár an cheantair, ina chuid thábhachtach dhoshéanta de sheanchas agus dinnseanchas na bhfíonghort áitiúil.

Tá borradh gan staonadh ar na fíonghoirt sin óna mbunús ársa anall. 2 500 heicteár a bhí ina n-achar iomlán thiar in 1850. Fearacht fíonghoirt eile na Fraince, áfach, bhuail géarchéim na míolta fíniúna go trom iad in 1885. D’ainneoin gur cailleadh roinnt spéise san fhíonóireacht, tá grúpa beag déantóirí fíona a bhfuil dúspéis acu san fhíonóireacht, a chloígh le modhanna traidisiúnta fíonóireachta áitiúla, dírithe ar fhíonta ar ardchaighdeán a tháirgeadh.

Chun na críche sin, ba thiar in 1962 a chuir siad iarraidh faoi bhráid na hInstitiúide Náisiúnta maidir le Bunú agus Cáilíocht, le haitheantas a fháil d’fhíonta an réigiúin i bhfoirm shonrúchán tionscnaimh lena bhfianófaí ardcháilíocht an fhíona: ‘Coteaux du Tricastin’.

Glacadh leis an iarraidh go hoifigiúil san fhoraithne ó 13 Márta 1964, inar leagan na coinníollacha maidir leis na ceanglais táirgthe.

10 mbliana ina dhiaidh sin, bhí na déantóirí fíona tar éis mionathruithe a phórú ina gcineálacha fíniúnacha lena n-oiriúnú do na dálaí fíonóireachta áitiúla, agus bhí siad tar éis a gcuid teicnící táirgthe a chur in oiriúint agus a fheabhsú. Fuair siad aitheantas i bhfoirm shonrúchán tionscnaimh cláraithe an 27 Iúil 1973.

Chonacthas athbheochan na bhfíonghort agus borradh mear faoin táirgeacht sna 1970í, ó 53 000 heictilítear in 1976 go 78 000 heictilítear in 1983.

Bhí na déantóirí fíona ag dréim le fada leis an athrú ar ainm an ainmniúcháin tionscnaimh chláraithe ó ‘Coteaux du Tricastin’ go ‘Grignan-les-Adhémar’, agus glacadh go hoifigiúil leis, i bhfoirm foraithne, an 16 Samhain 2010.

In 2010, chlúdaigh na fíonghoirt 2 600 heicteár, agus tháirg siad 55 000 heictilítear ar an meán arna dháileadh idir thart ar 40 fíonlann neamhspleácha agus 12 chomhfhíonlann. Tá fíonta an ainmniúcháin tionscnaimh chláraithe ‘Grignan-les-Adhémar’ ar fáil i dtrí dhath, cé gur fíon dearg é an chuid is mó den fhíon a tháirgtear, arb ionann é agus thart ar 75 % den toirt iomlán in 2008.

Tá plandálacha deireanacha na bhfíniúnacha ag druidim de réir a chéile i dtreo táirgeadh fíona ghil thirim a fhorbairt, arbh ionann é agus 7 % den toirt iomlán fíona a táirgeadh in 2008.

8.2.   Idirghníomhaíochtaí cúisíocha

Suite idir na réigiúin Dauphiné agus Provence, ar bhruach clé an Rhône, tá limistéar fíonsaothrúcháin a thairbhíonn de na tionchair Mheánmhara i réigiún Drôme Provençale. Déantar an limistéar fíonsaothrúcháin a phlandú le cineálacha deisceartacha, go minic sna háiteanna is faide ó thuaidh inar féidir leo aibiú. Baineann léiriú an-uathúil leo atá ceangailte leis na ceantair atá roghnaithe ag déantóirí fíona ar fearr leo an airde mheánach agus deisiúir na gréine chun a bhfíonghoirt a bhunú.

Tá fianaise ann de bhunús ársa an limistéir fíonsaothrúcháin sin, agus thar aon ní eile, de shaineolas fíonóireachta a bhí ann roimh choncas na Rómhánach ar an nGaill, a bhuí le fionnadh cheann de na tithe móra fíonóireachta is sine ón seansaol.

Seachadadh an saineolas sin ar aghaidh thar an ré stairiúil ar fud réigiún Tricastin, agus bhí glúnta na ndéantóirí fíona in ann a gcuid fíonghort a choinneáil ar bun d’ainneoin na mbagairtí tromchúiseacha. Áiríodh na míolta fíniúna orthu sin, míol ba chúis le cruthú na n-aontas fíonóireachta inar cuireadh eolas ar rialacha comhchoiteanna a chothú le fíonta d’ardcháilíocht a fhorbairt.

Ba léiriú ar dhul chun cinn an chomhair sin é an t-aitheantas a tugadh d’fhíonta na háite leis an ainmnichán tionscnaimh ‘ vin délimité de qualité supérieure ’ [fíon a bhfuil ainmniúchán tionscnaimh ardcháilíochta aige], agus ina dhiaidh sin leis an ainmniúchán tionscnaimh cláraithe ‘Coteaux du Tricastin’. Tharla an méid sin tráth a bheadh údar níos fusa le méadú ar tháirgeacht seachas tosaíocht a thabhairt do cháilíocht fhíonta na háite.

Tagann na fíonta uile ó fhíonchaora a bhuaintear ó dháileachtaí a roghnaítear go cúramach agus ó chumaisc d’ilchineálacha, a phlandaítear ar dháileachtaí drochithreacha ar minic iad a bheith teolaí agus dea-dhálaí draenála le fáil iontu. Is leis na tosca sin a thugtar saintréithe uathúla na bhfíonta. Bíonn na fíonta dearga bog agus torthaí, ach is fíonta tathagacha mar sin féin iad. Faightear réimse dea-bholaithe as cuimse i measc na bhfíonta geala tirime, arb iondúil iad a bheith ina bhfíonta deisceartacha. Is cosúil leis na fíonta dearga iad na fíonta rosé: saintréithe boga agus torthaí le fáil iontu.

Is seanbhunaithe iad cáilíocht agus clú na bhfíonta sin, cé gur tháinig athrú ar a bhféiniúlacht le himeachta ama, óir ainmníodh iad as bardas ar leith nó as an réigiún féin.

In 2010, de réir mar a bhí na déantóirí fíona ag súil leis le roinnt blianta roimhe sin, athraíodh ainm an ainmniúcháin tionscnaimh chláraithe chuig ‘Grignan-les-Adhémar’, rud a leag an bhéim an athuair ar cheartlár an réigiúin agus ar na fíonta i mbardas Grignan, a bhfuil dlúthnasc idir a stair agus an teaghlach ‘Adhémar de Grignan’. Ba é François de Castellane Adhémar (cúnta Grignan agus gobharnóir Provence sa 17ú haois, a phós iníon le Madame de Sévigné in 1669) a chuidigh chun an ceangal idir sloinne a theaghlaigh agus bardas Grignan a bhuanú.

In 1781, scríobhann Faujas de Saint-Fonds ina shaothar Histoire naturelle de la province de Dauphiné [stair an dúlra i réigiún Dauphiné] mar gheall ar fhíonta ar a raibh dea-cháil agus ar a dtugtaí ‘fíonta Donzère’, a tháirgtí sa bhardas leis an ainm sin: ‘is iad na ceantair is iomráití iad Les Roussettes, Le Suel, La Figerasse agus Javalin, ina gclúdaítear fánaí éagsúla cnoic, timpeall leathléig ar fhad, ina bhfaightear ithreacha creagacha agus méarógacha’. Agus níos faide síos sa téacs: ‘Táirgtear fíonta maithe ar eachréidh Grès freisin... dála mar a tháirgtear i gceantair Opplilias, Borillon agus Lerminas, nach foláir an fíon a lagú le ceann Grès ann’. I sliocht eile níos faide síos arís sa téacs, tuigtear don léitheoir go bhfuil clú agus go bhfaightear dea-bhlas ar na fíonta sin cheana lasmuigh den limistéar geografach, agus ar uairibh i bhfad i gcéin: ‘Onnmhairítear fíonta Donzère chuig Páras, Lyon, Grenoble agus réigiúin Velay agus Vivarais. Sheasfaidís turas farraige; seoladh chun Cathair Chonstaintín iad, áit ar éirigh go mór leo’. Sa saothar céanna, measann an t-údar faoi na cineálacha fíonchaoire a plandaíodh lena linn (Clairette, Picardin, Rosani) ‘go gcruthaítear fíon geal sobhlasta leo’.

In 1896, ar chlár fógra a crochadh ag fíonghort Château-Bizard, atá suite in Allan, rinneadh aicmiúchán ar na fíonta ó bhardais Allan, Roussas agus La Garde-Adhémar mar fhíonta gan sárú ag na fíonta eile ar de bhunadh ‘an’ Côte du Rhône a maíodh fúthu. Luadh na fíonta ó Allan freisin i ndinnseanchas na bhfíonghort Francach le Jullien (1822). Aicmíonn an t-údar go díreach i ndiaidh ‘Ermitage’ agus ‘Côte-Rôtie’ iad. Ar leathanach 811 den saothar le G. Foex ‘ Traité de viticulture ’ [tráchtas um an bhfíonóireacht] (1895), luann an t-údar fíonghort Allan, agus cuireann sé i gcomparáid le ceann ‘Châteauneuf-du-Pape’ é.

Tá bardas Grignan, ag croílár cheantar an ainmniúcháin tionscnaimh chláraithe, agus a luaitear go minic i stair an fhíonghoirt, tar éis a cháil as an bhfíonóireacht a athbheochan a bhuí le hiarrachtaí cáilíochtúla na ndéantóirí fíona. Léirítear an méid sin i bhfianaise an iliomad imeachtaí a reáchtáiltear ann agus bhunú ‘Áras na bhFíonta’ in ‘Grignan-les-Adhémar’.

9.   Coinníollacha breise fíor-riachtanacha (pacáistiú, lipéadú, ceanglais eile)

Limistéar díreach in aice láimhe

Creat dlíthiúil :

Reachtaíocht náisiúnta

Cineál an choinníll bhreise :

Maolú maidir le táirgeadh sa limistéar geografach críochaithe

Tuairisc ar an gcoinníoll :

Is é atá sa limistéar atá díreach in aice leis, a shainítear de mhaolú chun na fíonta a dhéanamh agus a fhorbairt, críoch na mbardas seo a leanas, bunaithe ar Chód Geografach Oifigiúil 2023:

—

Roinn Ardèche: Alba-la-Romaine, Aubignas, Bidon, Bourg-Saint-Andéol, Gras, Larnas, Ruoms, Saint-Just-d’Ardèche, Saint-Marcel-d’Ardèche, Saint-Martin-d’Ardèche, Saint-Montan, Saint-Remèze, Saint-Thomé, Le Teil, Valvignières agus Viviers;

—

Roinn Drôme: Aleyrac, Arpavon, Aubres, La Bégude-de-Mazenc, Bouchet, Châteauneuf-de-Bordette, Condorcet, Curnier, Dieulefit, Espeluche, Eyroles, Eyzahut, Mirabel-aux-Baronnies, Montaulieu, Montboucher-sur-Jabron, Montbrison-sur-Lez, Montélimar, Montjoux, Montjoyer, Nyons, Le Pègue, Piégon, Pierrelatte, Les Pilles, Le Poët-Laval, Pont-de-Barret, Portes-en-Valdaine, Puygiron, Rochebaudin, Rochefort-en-Valdaine, Rochegude, Rousset-les-Vignes, Saint-Ferréol-Trente-Pas, Saint-Gervais-sur-Roubion, Sainte-Jalle, Saint-Maurice-sur-Eygues, Saint-Pantaléon-les-Vignes, Salettes, Souspierre, Suze-la-Rousse, Taulignan, Teyssières, La Touche, Tulette, Valouse, Venterol, Vesc agus Vinsobres.

—

Roinn Gard: Pont-Saint-Esprit agus Saint-Paulet-de-Caisson;

—

Roinn Vaucluse: Bollène, Buisson, Cairanne, Entrechaux, Faucon, Gigondas, Grillon, Lagarde-Paréol, Lamotte-du-Rhône, Lapalud, Mondragon, Mornas, Puyméras, Rasteau, Richerenches, Roaix, Sablet, Saint-Marcellin-lès-Vaison, Saint-Romain-en-Viennois, Saint-Roman-de-Malegarde, Sainte-Cécile-les-Vignes, Séguret, Travaillan, Vacqueyras, Vaison-la-Romaine, Valréas, Villedieu, Violès and Visan.

Lipéadú

Creat dlíthiúil :

Reachtaíocht náisiúnta

Cineál an choinníll bhreise :

Forálacha breise a bhaineann le lipéadú

Tuairisc ar an gcoinníoll :

Féadfar an t-aonad geografach níos mó ‘Vignobles de la Vallée du Rhône’ a shonrú ar lipéid na bhfíonta ag a bhfuil an t-ainmniúchán tionscnaimh cláraithe, i gcomhréir leis na coinníollacha a shonraítear sa chomhaontú a síníodh idir na comhlachtaí caomhnaithe agus bainistíochta éagsúla lena mbaineann.

Nasc chuig an tsonraíocht táirge

https://info.agriculture.gouv.fr/gedei/site/bo-agri/document_administratif-f57bb70c-e0a8-44c0-bc75-3aeca81c658d


(1)   OJ L 9, 11.1.2019, p. 2.


ELI: http://data.europa.eu/eli/C/2024/1810/oj

ISSN 1977-107X (electronic edition)