(1)

L-Artikolu 14 tat-Trattat dwar il-Funzjonament tal-Unjoni Ewropea (“it-Trattat”) jobbliga lill-Unjoni, bla ħsara għall-Artikoli 93, 106 u 107 tat-Trattat, li tuża l-poteri tagħha b’tali mod li jiġi żgurat li servizzi ta’ interess ekonomiku ġenerali (“SGEI”, services of general economic interest) joperaw abbażi ta’ prinċipji u kundizzjonijiet li jippermettulhom li jaqdu l-missjonijiet tagħhom.

(2)

Biex ċerti SGEI ikunu jistgħu joperaw abbażi ta’ prinċipji u kundizzjonijiet li jippermettulhom jaqdu l-missjonijiet tagħhom, jista’ jkun hemm il-ħtieġa li jingħata sostenn finanzjarju mill-Istat biex ikopri xi spejjeż speċifiċi, jew l-ispejjeż kollha, li joħorġu mill-obbligi ta’ servizz pubbliku. Skont l-Artikolu 345 tat-Trattat, huwa irrilevanti jekk dawn l-SGEI humiex operati minn impriżi pubbliċi jew privati.

(3)

L-Artikolu 106(2) tat-Trattat jistabbilixxi li impriżi responsabbli sabiex joperaw l-SGEI jew li jkollhom il-karattru ta’ monopolju li jipproduċi dħul huma suġġetti għar-regoli li hemm fit-Trattat, b’mod partikolari dawk li jirreferu għall-kompetizzjoni, safejn l-applikazzjoni ta’ dawk ir-regoli ma tostakolax, de jure jew de facto, it-twettiq tal-funzjonijiet li għalihom huma responsabbli. Dan madankollu m’għandux jaffettwa l-iżvilupp tal-kummerċ sal-punt li jkun kuntrarju għall-interessi tal-Unjoni.

(4)

Fis-sentenza tagħha Altmark (1), il-Qorti tal-Ġustizzja qatgħetha li kumpens għal servizzi pubbliċi ma jikkostitwixxix għajnuna mill-Istat skont it-tifsira tal-Artikolu 107 tat-Trattat sakemm jiġu sodisfatti erba’ kriterji kumulattivi. L-ewwel nett, l-impriża benefiċjarja fil-fatt irid ikollha obbligi ta’ servizz pubbliku xi twettaq, u dawn l-obbligi jridu jkunu definiti b’mod ċar. It-tieni, il-parametri li abbażi tagħhom jiġi kkalkulat il-kumpens iridu jiġu stabbiliti minn qabel b’mod oġġettiv u trasparenti. It-tielet, il-kumpens ma jridx ikun aktar minn dak li huwa meħtieġ sabiex ikopri l-ispejjeż kollha, jew parti minnhom, li jkunu ġew imġarrba fit-twettiq tal-obbligi ta’ servizz pubbliku, filwaqt li jitqiesu l-irċevuti rilevanti u profitt raġonevoli. Ir-raba’, meta l-għażla tal-impriża inkarigata li trid twettaq obbligi ta’ servizz pubbliku, f’xi każ speċifiku, ma ssirx fil-qafas ta’ proċedura ta’ akkwist pubbliku li tippermetti li jintgħażel l-offerent li jkun kapaċi jipprovdi dawk is-servizzi bl-inqas prezz għall-komunità, il-livell tal-kumpens neċessarju jrid ikun iddeterminat fuq bażi ta’ analiżi tal-ispejjeż li jkollha impriża tipika, immexxija sewwa u mgħammra adegwatament bil-mezzi rilevanti.

(5)

Fejn dawk l-erba’ kundizzjonijiet ma jiġux sodisfati u l-kundizzjonijiet ġenerali għall-applikazzjoni tal-Artikolu 107(1) tat-Trattat jintlaħqu, il-kumpens għal servizzi pubbliċi jikkostitwixxi għajnuna mill-Istat u huwa suġġett għall-Artikoli 93, 106, 107 u 108 tat-Trattat.

(6)

Flimkien ma’ din id-Deċiżjoni, hemm tliet strumenti li huma rilevanti għall-applikazzjoni tar-regoli dwar l-għajnuna mill-Istat għal kumpens mogħti għall-forniment tal-SGEI:

(7)

Id-Deċiżjoni tal-Kummissjoni 2012/21/UE (5) tispeċifika t-tifsira u l-firxa tal-eċċezzjoni skont l-Artikolu 106(2) tat-Trattat u tistabbilixxi regoli maħsuba biex jippermettu monitoraġġ effettiv tal-issodisfar tal-kriterji stabbiliti f’dik id-dispożizzjoni. Fid-dawl tal-esperjenza miksuba mill-applikazzjoni tad-Deċiżjoni 2012/21/UE, il-bidliet fil-kundizzjonijiet ekonomiċi, b’mod partikolari fir-rigward tal-kriżi tal-akkomodazzjoni, kif ukoll l-iżviluppi tas-suq, huwa meħtieġ li jiġu rieżaminati r-regoli previsti f’dik id-deċiżjoni.

(8)

Id-Deċiżjoni 2012/21/UE jenħtieġ, għalhekk, titħassar, u tinbidel b’din id-Deċiżjoni li tistabbilixxi l-kundizzjonijiet li taħthom l-għajnuna mill-Istat fil-forma ta’ kumpens għal SGEI hija eżenta mill-obbligu tan-notifika minn qabel skont l-Artikolu 108(3) tat-Trattat fejn tista’ titqies kompatibbli mal-Artikolu 106(2) tat-Trattat.

(9)

Għajnuna mill-Istat fil-forma ta’ kumpens għall-SGEI tista’ titqies kompatibbli biss jekk tingħata sabiex jiġi żgurat il-forniment tal-SGEI kif imfisser fl-Artikolu 106(2) tat-Trattat. Mill-ġurisprudenza (6) jidher ċar li, fin-nuqqas ta’ regoli settorjali tal-Unjoni li jirregolaw il-kwistjoni, l-Istati Membri għandhom marġini wiesa’ ta’ diskrezzjoni fid-definizzjoni ta’ servizzi li jistgħu jiġu kklassifikati bħala SGEI. Għaldaqstant, il-kompitu tal-Kummissjoni huwa li tiżgura li ma jkun hemm l-ebda żball evidenti rigward id-definizzjoni ta’ SGEI.

(10)

Sakemm jiġu sodisfati ċerti kundizzjonijiet, ammonti limitati ta’ kumpens mogħtija lil impriżi inkarigati bil-forniment ta’ SGEI ma jaffettwawx l-iżvilupp tal-kummerċ u l-kompetizzjoni sal-punt li jkunu kuntrarji għall-interessi tal-Unjoni. Għall-identifikazzjoni tar-riċevitur tal-għajnuna f’din id-Deċiżjoni, jenħtieġ li japplika l-kunċett ta’ “impriża unika” kif definit fl-Artikolu 2(2) tar-Regolament tal-Kummissjoni (UE) 2023/2832 (7). Notifika individwali ta’ għajnuna mill-Istat għandha għalhekk, sakemm jiġu ssodisfati ċerti kundizzjonijiet, ma tkunx meħtieġa għal kumpens li jkun inqas minn ammont annwali speċifikat ta’ kumpens. Huwa xieraq ukoll li jiżdied dak il-limitu ta’ kumpens ġenerali biex jirrifletti l-inflazzjoni mill-adozzjoni tad-Deċiżjoni 2012/21/UE.

(11)

Impriża tista’ tiġi fdata bl-operat ta’ SGEI multipli u tirċievi kumpens sal-limitu ta’ kumpens ġenerali għal kull SGEI fdat lilha. L-istess japplika meta impriża tkun fdata b’mod konġunt jew individwali bl-operat ta’ SGEI minn diversi Stati Membri. Għalhekk, dik l-impriża fdata għandha tkun tista’ tirċievi kumpens sal-limitu ġenerali minn kull Stat Membru ta’ inkarigu fejn jiġi pprovdut is-servizz.

(12)

L-isptarijiet u l-impriżi inkarigati b’servizzi soċjali, inklużi meta huma organizzati bħala entitajiet mingħajr skop ta' qligħ (8), fdati b’kompiti ta’ interess ekonomiku ġenerali, għandhom karatteristiċi speċifiċi li jridu jiġu kkunsidrati. B’mod partikolari, għandu jitqies il-fatt li, fil-kundizzjonijiet ekonomiċi attwali, is-servizzi soċjali jistgħu jirrikjedu ammont ta’ għajnuna li jmur lil hinn mil-limitu ta’ kumpens ġenerali stabbilit f’din id-Deċiżjoni biex jikkumpensa għall-ispejjeż tas-servizz pubbliku filwaqt li ammont akbar ta’ kumpens għas-servizzi soċjali mhux neċessarjament jipproduċi riskju akbar ta’ distorsjonijiet tal-kompetizzjoni. Għaldaqstant, l-impriżi inkarigati mis-servizzi soċjali għandhom jibbenefikaw ukoll mill-eżenzjoni min-notifika prevista f’din id-Deċiżjoni, anke jekk l-ammont ta’ kumpens li jirċievu jaqbeż il-limitu tal-kumpens ġenerali. L-eżenzjoni min-notifika jenħtieġ tapplika wkoll għall-isptarijiet li jipprovdu kura medika, inkluż, fejn applikabbli, servizzi ta’ emerġenza u servizzi anċillari direttament relatati mal-attivitajiet ewlenin tagħhom, b’mod partikolari fil-qasam tar-riċerka medika. Sabiex jibbenefikaw mill-eżenzjoni min-notifika, is-servizzi soċjali għandhom ikunu iddefiniti b’mod ċar u li jindirizzaw bżonnijiet soċjali fir-rigward tal-kura tas-saħħa u fit-tul, l-indukrar tat-tfal, l-aċċess għas-suq tax-xogħol u reintegrazzjoni fih u l-kura u l-inklużjoni soċjali ta’ gruppi vulnerabbli. Dik tinkludi servizzi li jappoġġaw l-għajxien indipendenti u l-inklużjoni fil-komunità ta’ persuni b’diżabilità, pereżempju assistenza personali, ċentri għal għajxien indipendenti, servizzi tat-teknoloġija ta’ assistenza, servizzi ta’ riabilitazzjoni u ta’ abilitazzjoni.

(13)

Għall-istess raġunijiet, il-kumpens għall-forniment ta’ akkomodazzjoni soċjali bħala l-SGEI għal unitajiet domestiċi żvantaġġati jew gruppi soċjalment inqas vantaġġati inklużi persuni mingħajr dar, li minħabba restrizzjonijiet ta’ solvenza ma jkunux jistgħu jaċċessaw akkomodazzjoni b’kundizzjonijiet tas-suq, jista’ jiġi eżentat minn rekwiżit ta’ notifika anke jekk jaqbeż il-limitu ta’ kumpens ġenerali. Għandu jkun possibbli li l-kumpens għas-servizzi tal-akkomodazzjoni soċjali jkopri, fost affarijiet oħra, l-ispejjeż tal-investiment għall-kostruzzjoni ta’ binjiet ġodda, inkluż l-akkwist tal-art, l-akkwist tal-appartamenti jew binjiet eżistenti li jridu jiġu ttrasformati jew rinnovati, it-trasformazzjoni jew ir-rinnovazzjoni tal-appartamenti jew il-binjiet eżistenti (jew elementi tal-binja individwali (9) tagħha), l-ispejjeż tal-iżgurar tal-konformità mar-rekwiżiti ta’ aċċessibbiltà għall-anzjani jew għall-persuni b’diżabilità, konformità mal-istandards ambjentali u l-ispejjeż tal-adattament għar-reżiljenza għat-tibdil fil-klima, inklużi reżiljenza tal-ilma, kif ukoll l-ispejjeż operatorji, fejn meħtieġ għall-operat tas-servizz.

(14)

Mill-adozzjoni tad-Deċiżjoni 2012/21/UE, l-affordabbiltà tal-akkomodazzjoni saret kwistjoni sinifikanti f’ħafna Stati Membri, mhux biss li taffettwa lill-unitajiet domestiċi żvantaġġati jew lill-gruppi soċjalment inqas vantaġġati iżda wkoll lill-gruppi b’introjtu medju, b’għadd dejjem akbar ta’ persuni li jiffaċċjaw diffikultajiet biex jiżguraw akkomodazzjoni ta’ kwalità bi prezz affordabbli. Il-kwistjonijiet tal-akkomodazzjoni jistgħu jkunu partikolarment akuti f’ċerti postijiet bħal bliet turistiċi u kbar b’domanda għolja, ċentri urbani u ekonomiċi li qed jikbru malajr, reġjuni ultraperiferiċi u iżolati remoti. Għalhekk huwa meħtieġ li jittieħdu miżuri biex tiżdied id-disponibbiltà tal-akkomodazzjoni, permezz ta’ akkomodazzjoni għall-kiri jew sjieda tad-djar, bi prezzijiet affordabbli biex tittaffa l-pressjoni fis-swieq tal-akkomodazzjoni lokali. Sabiex jiġu ffaċilitati l-inizjattivi pubbliċi li jappoġġaw akkomodazzjoni affordabbli, huwa xieraq li jiġu stabbiliti kundizzjonijiet speċifiċi għall-akkomodazzjoni affordabbli bħala SGEI li għandhom jiġu eżentati mir-rekwiżit ta’ notifika skont l-Artikolu 108(3) tat-Trattat.

(15)

Filwaqt li l-unitajiet domestiċi żvantaġġati jew il-gruppi soċjalment inqas vantaġġati, inklużi l-persuni mingħajr dar, jistgħu jibbenefikaw mill-SGEI tal-akkomodazzjoni soċjali, tali SGEI jista’ jinkludi wkoll sehem limitat ta’ unitajiet domestiċi mhux żvantaġġati biex jiġu evitati konċentrazzjonijiet spazjali ta’ faqar.

(16)

Meta l-Istati Membri jkollhom bżonn jipprovdu akkomodazzjoni lil unitajiet domestiċi prinċipalment mhux żvantaġġati, jistgħu jistabbilixxu l-SGEI tal-akkomodazzjoni affordabbli li prinċipalment ikun ta’ benefiċċju għall-unitajiet domestiċi li ma jistgħux jaċċessaw akkomodazzjoni bi prezzijiet affordabbli minħabba l-kundizzjonijiet fis-swieq rilevanti iżda li mhumiex żvantaġġati. Madankollu, l-SGEI għall-akkomodazzjoni affordabbli xorta jista’ jinkludi sehem ta’ unitajiet domestiċi żvantaġġati. Il-benefiċjarji tal-akkomodazzjoni affordabbli bħala SGEI għandhom jiġu ddeterminati billi jitqiesu primarjament l-introjtu tal-unitajiet domestiċi meta mqabbel mal-prezzijiet tas-suq tal-akkomodazzjoni u l-kompożizzjoni tal-unità domestika kkombinati, jekk meħtieġ, ma’ fatturi oħra. Pereżempju, il-ħtieġa għal akkomodazzjoni affordabbli tista’ titnaqqas meta l-membri ta’ unitajiet domestiċi ikunu proprjetarji jew koproprjetarji ta’ proprjetà residenzjali. Hemm bżonn li l-Istati Membri jkunu jistgħu wkoll jagħtu prijorità lil akkomodazzjoni affordabbli lil persuni li x’aktarx ikollhom diffikultajiet biex jaċċessaw is-swieq tal-akkomodazzjoni, inklużi, pereżempju, persuni li jissodisfaw rwol essenzjali tas-soċjetà, persuni b’diżabilità, anzjani jew studenti, jew ġenituri waħedhom.

(17)

Barra minn hekk, l-Istati Membri għandhom ikunu jistgħu jippromwovu viċinati inklużivi permezz ta’ mudelli ta’ akkomodazzjoni bħalma, pereżempju, il-Bauhaus Ewropea l-Ġdida (10) li jagħtu prijorità lill-aċċess għal akkomodazzjoni sussidjata abbażi ta’ għanijiet ta’ taħlita soċjali, u mudelli li jikkombinaw akkomodazzjoni sussidjata (akkomodazzjoni soċjali jew affordabbli) u akkomodazzjoni fis-suq, kif ukoll billi jagħmlu l-ambjent tal-akkomodazzjoni u l-viċinati aċċessibbli għall-inklużjoni ta’ persuni b’diżabilità.

(18)

Biex tiġi indirizzata b’mod effettiv il-kriżi tal-akkomodazzjoni, l-akkomodazzjoni affordabbli bħala SGEI ta’ spiss tista’ tirrikjedi ammont ta’ għajnuna lil hinn mil-limitu ta’ kumpens ġenerali f’din id-Deċiżjoni biex jikkumpensa għall-ispejjeż tas-servizz pubbliku. Tabilħaqq, biex jitnaqqas id-distakk bejn il-provvista u d-domanda matul l-għaxar snin li ġejjin, il-Kummissjoni Ewropea (11) tistma li l-Ewropa se jkollha bżonn iżżid madwar 650 000 abitazzjoni fis-sena mal-1.6 miljun abitazzjoni attwalment mibnija. It-twettiq ta’ dawk l-unitajiet ta’ akkomodazzjoni żejda jiswa madwar EUR 153 biljun fis-sena. Investimenti sinifikanti f’akkomodazzjoni affordabbli mhux neċessarjament jinvolvu riskji sinifikanti ta’ distorsjoni. Għaldaqstant, il-kumpens għall-forniment tal-akkomodazzjoni affordabbli bħala SGEI għall-unitajiet domestiċi, li ma jistgħux jaċċessaw akkomodazzjoni affordabbli, għandu jiġi eżentat mir-rekwiżit ta’ notifika anke jekk jaqbeż il-limitu ġenerali ta’ kumpens dment li biżżejjed salvagwardji, kif stabbilit f’din id-Deċiżjoni u l-Anness tagħha, jiġu stabbiliti biex tiġi limitata d-distorsjoni tal-kompetizzjoni.

(19)

Il-kumpens għall-forniment ta’ akkomodazzjoni affordabbli bħala SGEI m’għandux iwassal għal interferenza bla bżonn fil-kundizzjonijiet normali tas-suq, li tista’ teskludi l-investiment privat u tfixkel b’mod sinifikanti l-kompetizzjoni. Fl-istess ħin, huwa importanti li ċ-ċittadini l-aktar vulnerabbli jkomplu jibbenefikaw minn akkomodazzjoni soċjali bħala SGEI. Għalhekk, meta jfasslu l-SGEI għal akkomodazzjoni soċjali u affordabbli, l-Istati Membri għandhom jikkonformaw ma’ sett speċifiku ta’ rekwiżiti.

(20)

L-Istati Membri għandhom ikunu jistgħu jkejlu l-affordabbiltà tal-akkomodazzjoni permezz ta’ indikaturi varji, bħalma hu , il-proporzjon bejn il-kera u l-introjtu (12), il-proporzjon bejn il-ħlas tal-ipoteka u l-introjtu (13), il-proporzjon bejn prezz u l-introjtu (14), ir-rata tal-piż eċċessiv tal-kost tal-akkomodazzjoni jew is-snin ta’ introjtu biex tinxtara dar (15). Il-valuri tal-parametri referenzjarji ta’ dawn l-indikaturi, li jidentifikaw sitwazzjonijiet ta’ inabbiltà ta’ aċċess għal akkomodazzjoni affordabbli fuq il-livell nazzjonali, reġjonali jew lokali, għandhom jiġu stabbiliti mill-Istati Membri. Il-kostijiet tal-enerġija jenħtieġ li jitqiesu meta tiġi ddeterminata l-affordabbiltà. L-Istati Membri għandhom ikunu jistgħu juru li l-identifikazzjoni tal-ħtiġijiet ta’ akkomodazzjoni affordabbli hija bbażata fuq dawn l-indikaturi.

(21)

Il-kumpens għall-akkomodazzjoni affordabbli bħala SGEI għandu fil-prinċipju jiffoka fuq l-ispejjeż tal-investiment għall-kostruzzjoni ta’ binjiet ġodda, inkluż l-akkwist tal-art, l-akkwist tal-appartamenti jew binjiet eżistenti li jridu jiġu ttrasformati jew rinnovati, it-trasformazzjoni jew ir-rinnovazzjoni ta’ appartamenti jew binjiet eżistenti (jew elementi tal-binja individwali tagħha), il-konformità mar-rekwiżiti ta’ aċċessibbiltà għall-anzjani jew għall-persuni b’diżabilità, komformità mal-istandards ambjentali u l-adattament għar-reżiljenza għat-tibdil fil-klima, ir-reżiljenza tal-ilma. Fejn ikun meħtieġ għall-operat tas-servizz, dan il-kumpens jista’ jkopri wkoll kostijiet operazzjonali.

(22)

Sabiex jiġi evitat l-użu ħażin ta’ akkomodazzjoni affordabbli, pereżempju, għal residenza sekondarja jew kiri għal żmien qasir, l-Istati Membri jenħtieġ li jiżguraw li l-akkomodazzjoni tintuża u tibqa’ tintuża għall-iskop it-tajjeb.

(23)

Il-prezzijiet għall-SGEI ta’ akkomodazzjoni affordabbli għandhom ikunu f’firxa li tiżgura l-affordabbiltà tal-akkomodazzjoni filwaqt li ma jmorrux lil hinn minn dak l-objettiv biex tiġi evitata distorsjoni bla bżonn tal-kompetizzjoni. L-Istati Membri jistgħu jqisu wkoll l-ispejjeż tal-enerġija u spejjeż oħra relatati mal-akkomodazzjoni meta jiddeterminaw il-prezzijiet għall-akkomodazzjoni affordabbli biex jirriflettu l-piż finanzjarju totali fuq l-unitajiet domestiċi.

(24)

Sabiex jiġi żgurat li l-SGEI tal-akkomodazzjoni soċjali u affordabbli jiġu adattati għall-ħtiġijiet tal-unitajiet domestiċi, l-Istati Membri għandhom japplikaw kriterji minimi ta’ kwalità, ambjentali u ta’ aċċessibbiltà għal tali servizzi. Tali kriterji jinkludu pereżempju, l-aċċessibbiltà għall-persuni b’diżabilità u għall-anzjani, ir-reżiljenza għat-tibdil fil-klima, l-erja minima tas-superfiċje, it-tisħin u t-tkessiħ, il-ventilazzjoni, ir-rendiment fl-użu tal-enerġija, il-faċilitajiet sanitarji u l-provvista tal-ilma, l-istabbiltà tal-kostruzzjoni tal-bini u s-sikurezza kontra n-nirien, u l-prontezza tal-broadband tal-bini. L-Istati Membri jistgħu jikkunsidraw ukoll l-aċċessibbiltà, inkluż għall-persuni b’diżabilità, ta’ trasport affordabbli għal servizzi essenzjali bħall-kura tas-saħħa, l-edukazzjoni u s-servizzi finanzjarji meta jiddeterminaw il-postijiet għall-proġetti ta’ akkomodazzjoni soċjali u affordabbli.

(25)

Sabiex tiġi ppreservata l-kompetizzjoni fis-segment tas-suq tal-akkomodazzjoni affordabbli, il-SGEI tal-akkomodazzjoni affordabbli għandu jkun miftuħ fuq termini ugwali għall-parteċipanti kollha fis-suq li jkunu jistgħu jipprovdu tali servizzi.

(26)

Il-binjiet ta’ akkomodazzjoni soċjali jew affordabbli ssussidjati fi ħdan l-SGEI għandhom jibqgħu deżinjati għall-finijiet ta’ forniment ta’ akkomodazzjoni soċjali jew affordabbli għal perjodu twil, ta’ mill-anqas ta’ 20 sena, biżżejjed biex tiġi evitata l-ispekulazzjoni. Fl-istess ħin, f’ċirkostanzi speċifiċi debitament ġustifikati, bħall-forniment ta’ akkomodazzjoni temporanja fil-każ ta’ avvenimenti estremi tat-temp u tal-klima jew diżastri naturali oħra, skemi ta’ għajnuna operazzjonali jew skemi ta’ investiment b’appoġġ pubbliku baxx, skemi b’durata iqsar jistgħu jiġu ġġustifikati. Barra minn hekk, huwa ġġustifikat li jiġu eżentati minn dan l-obbligu li jirrispettaw durata minima ta’ 20 snin, il-fornituri ta’ SGEI tal-akkomodazzjoni soċjali u affordabbli li l-attivitajiet tagħhom huma essenzjalment limitati għall-forniment ta’ dak l-SGEI, possibbilment bi dħul kummerċjali annwali li ma jaqbiżx il-5 % tad-dħul annwali totali matul il-perjodu ta’ inkarigu, li jista’ jitqies anċillari għall-SGEI, u li huma legalment obbligati li jinvestu mill-ġdid il-profitti kollha tagħhom fil-forniment ta’ dak is-servizz. L-għan ta’ din l-eżenzjoni huwa li tippermetti lil dawn il-fornituri ta’ SGEI tal-akkomodazzjoni jbigħu unitajiet ta’ akkomodazzjoni soċjali jew affordabbli, sabiex jinvestu mill-ġdid f’akkomodazzjoni soċjali jew affordabbli aktar adatta meta dan jidher meħtieġ. Meta japplikaw din l-eżenzjoni, l-Istati Membri għandhom jiżguraw li d-dħul kummerċjali jibqa’ anċillari pereżempju permezz ta’ kontrolli aleatorji, b’mod partikolari f’każ ta’ suspett ta’ abbuż.

(27)

Mediċina kritika hija prodott mediċinali l-provvista insuffiċjenti tagħha tirriżulta fi ħsara serja, jew f’riskju ta’ ħsara serja, għall-pazjenti. Jista’ jkun hemm riskji u dgħufijiet fil-katina tal-provvista ta’ ċerti mediċini kritiċi, li jistgħu jikkompromettu l-provvista kontinwa ta’ mediċini kritiċi lill-pazjenti fl-Unjoni, b’mod partikolari f’sitwazzjonijiet ta’ kriżi, bħal pandemija. Tali riskji u dgħufijiet potenzjalment jiġġustifikaw intervent pubbliku mmirat, inkluż il-finanzjament, b’mod partikolari fil-kapaċitajiet tal-manifattura għal mediċini kritiċi, is-sustanzi attivi tagħhom u inputs ewlenin oħra. Meta falliment tas-suq rigward is-sigurtà tal-provvista ta’ mediċina kritika speċifika jiġi identifikat fil-livell tal-Unjoni jew fil-livell ta’ Stat Membru wieħed jew aktar permezz ta’ valutazzjoni tal-vulnerabbiltà bir-reqqa, l-Istati Membri kkonċernati kollha jew uħud minnhom għandhom ikunu jistgħu jagħżlu li jafdaw obbligi speċifiċi ta’ servizz pubbliku lill-operaturi biex itejbu s-sigurtà tal-provvista għal tali mediċini kritiċi u jipprovdu kumpens sal-limitu ta’ kumpens ġenerali stabbilit f’din id-Deċiżjoni. Għalhekk, il-kumpens għall-SGEI tal-mediċini kritiċi taħt il-limitu tal-kumpens ġenerali għandu jiġi eżentat mir-rekwiżit ta’ notifika skont l-Artikolu 108(3) tat-Trattat.

(28)

L-Artikolu 93 tat-Trattat jikkostitwixxi lex specialis fir-rigward tal-Artikolu 106(2) tat-Trattat. L-Artikolu 93 jistipula r-regoli applikabbli għall-kumpens ta’ servizz pubbliku fis-settur tat-trasport fuq l-art. Fir-rigward tat-trasport tal-passiġġieri, l-Artikolu 93 huwa implimentat bir-Regolament (KE) 1370/2007 tal-Parlament Ewropew u tal-Kunsill (16), li jistabbilixxi r-regoli applikabbli għall-kumpens tal-obbligi ta’ servizz pubbliku fit-traffiku pubbliku tal-passiġġieri. L-applikazzjoni tar-Regolament (KE) Nru 1370/2007 għat-traffiku tal-passiġġieri fuq l-ilmijiet interni huwa fid-diskrezzjoni tal-Istati Membri. Ir-Regolament (KE) 1370/2007 jeżenta min-notifika skont l-Artikolu 108(3) tat-Trattat kull kumpens fis-settur tat-trasport fuq l-art li jkun jissodisfa l-kundizzjonijiet ta’ dak ir-Regolament. Fir-rigward tat-trasport tal-merkanzija, il-Komunikazzjoni tal-Kummissjoni, Linji Gwida dwar l-għajnuna mill-Istat għat-trasport fuq l-art u multimodali, li jistabbilixxi l-kundizzjonijiet li skonthom l-għajnuna mill-Istat li tirrappreżenta rimborż għat-twettiq ta’ ċerti obbligi inerenti fil-kunċett ta’ servizz pubbliku fis-settur tat-trasport tal-merkanzija bil-ferrovija tista’ tinstab kompatibbli mas-suq intern skont l-Artikolu 93 tat-Trattat, jipprovdi interpretazzjoni ta’ dak l-Artikolu. Skont is-sentenza f’Altmark, il-kumpens fis-settur tat-trasport fuq l-art li ma jkunx jissodisfa d-dispożizzjonijiet tal-Artikolu 93 tat-Trattat ma jistax jiġi ddikjarat kompatibbli mat-Trattat buq il-bażi tal-Artikolu 106(2) tat-Trattat, jew fuq il-bażi ta’ xi dispożizzjoni oħra tat-Trattat. Għaldaqstant, din id-Deċiżjoni m’għandhiex tapplika għas-settur tat-trasport fuq l-art.

(29)

Għall-kuntrarju tat-trasport fuq l-art, is-setturi tat-trasport bil-baħar u bl-ajru huma soġġetti għall-Artikolu 106(2) tat-Trattat. Ċerti regoli applikabbli għall-kumpens ta’ servizz pubbliku fis-setturi tat-trasport bl-ajru u marittimu jinsabu fir-Regolament (KE) Nru 1008/2008 tal-Parlament Ewropew u tal-Kunsill (17) u fir-Regolament tal-Kunsill (KEE) 3577/92 (18). Madankollu, b’differenza mir-Regolament (KE) 1370/2007, dawk ir-Regolamenti ma jagħmlux referenza għall-kompatibbiltà ta’ elementi possibbli ta’ għajnuna mill-Istat, u lanqas ma jipprovdu eżenzjoni mill-obbligu ta’ notifika skont l-Artikolu 108(3) tat-Trattat. Għaldaqstant, din id-Deċiżjoni għandha tapplika għall-kumpens għal servizzi pubbliċi fis-setturi tat-trasport bl-ajru u bil-baħar sakemm, barra li jkun jissodisfa l-kundizzjonijiet stabbiliti minn din id-Deċiżjoni, tali kumpens ikun konformi wkoll mar-regoli settorjali li hemm fir-Regolament (KE) Nru 1008/2008 u fir-Regolament (KEE) 3577/92, fejn ikun applikabbli.

(30)

Fil-każijiet speċifiċi ta’ kumpens għal servizzi pubbliċi għal konnessjonijiet bl-ajru jew bil-baħar ma’ gżejjer u ma’ ajruporti u portijiet li jikkostitwixxu SGEI kif imsemmi fl-Artikolu 106(2) tat-Trattat, huwa xieraq li jiġu stabbiliti wkoll limiti alternattivi bbażati fuq l-għadd medju annwali ta’ passiġġieri. Barra minn hekk, meta l-konnessjonijiet marittimi mal-gżejjer jinkludu t-traffiku tal-merkanzija, huwa xieraq li jiġu pprovduti limiti bbażati fuq volum annwali medju ta’ merkanzija li jrid jiġi stabbilit abbażi tal-proporzjon tipiku bejn il-kapaċità tal-passiġġieri u l-kapaċità tal-vetturi. Dawn il-limiti jirriflettu r-realtà ekonomika ta’ attivitajiet bħal dawn u l-karattru tagħhom ta’ SGEI. Barra minn hekk, abbażi tal-esperjenza miksuba skont il-Linji Gwida dwar l-Avjazzjoni tal-2014 (19), anke ajruporti bi traffiku annwali tal-passiġġieri ta’ aktar minn 200 000 passiġġier spiss ma jkunux jistgħu jkunu profittabbli. Biex tiġi riflessa din ir-realtà ekonomika, huwa xieraq li l-limitu minimu tal-passiġġieri stabbilit bid-Deċiżjoni 2012/21/UE jiżdied minn 200 000 passiġġier għal 500 000 passiġġier. Fl-aħħar nett, meta jitqies ir-rwol tal-portijiet u speċjalment il-portijiet għar-reġjuni insulari u ultraperiferiċi, il-limitu attwali għandu jiżdied minn 300 000 għal 400 000 passiġġier. Il-portijiet fir-reġjuni ultraperiferiċi, minħabba r-rwol kruċjali tagħhom għall-konnettività minħabba d-distanza ġeografika tagħhom mill-kontinent tal-Istati Membri għandhom jibbenifikaw mill-eżenzjoni mir-rekwiżit ta’ notifika irrispettivament mit-traffiku annwali tal-passiġġieri jew tal-merkanzija.

(31)

Il-punt sa fejn miżura partikolari ta’ kumpens ikollha impatt fuq il-kummerċ u l-kompetizzjoni jiddependi mhux biss fuq l-ammont medju ta’ kumpens irċevut kull sena u s-settur ikkonċernat, iżda wkoll fuq it-tul tal-perjodu kollu ta’ inkarigu tal-SGEI. Sakemm ma jkunx ġustifikat perjodu itwal minħabba l-ħtieġa ta’ investiment qawwi, pereżempju fil-qasam tal-akkomodazzjoni soċjali jew affordabbli, fejn l-investimenti huma tipikament amortizzati għal aktar minn 20 sena, l-applikazzjoni ta’ din id-Deċiżjoni għandha tkun limitata għal perjodi ta’ inkarigu li ma jeċċedux l-10 snin.

(32)

Sabiex ikun jista’ jiġi applikat l-Artikolu 106(2) tat-Trattat, l-impriża konċernata għandha tkun inkarigata mill-Istat Membru b’mod speċifiku bl-operazzjoni tal-SGEI.

(33)

Sabiex jiġi żgurat li l-kriterji stipulati fl-Artikolu 106(2) tat-Trattat ikunu sodisfati, huwa meħtieġ li jiġu stabbiliti kundizzjonijiet u rekwiżiti aktar preċiżi li għandhom ikunu mwettqa fejn jidħol l-inkarigu tal-operazzjoni tal-SGEI. L-ammont ta’ kumpens jista’ jiġi kkalkolat u vverifikat biss jekk l-obbligi ta’ servizz pubbliku li jkunu qed iġorru l-impriżi, u kull obbligu li jkun qed iġorr l-Istat, ikunu stipulati b’mod ċar f’att wieħed jew aktar tal-awtoritajiet pubbliċi kompetenti fl-Istat Membru kkonċernat. Il-forma tal-istrument tista’ tvarja minn Stat Membru għal ieħor iżda għandha tispeċifika, mill-inqas, l-impriżi kkonċernati, preċiżament il-kontenut u l-perjodu u fejn xieraq, it-territorju kkonċernat mill-obbligi ta’ servizz pubbliku imposti, l-għotja ta’ kwalunkwe drittijiet esklużivi jew speċjali, u għandha tiddeskrivi l-mekkaniżmu ta’ kumpens u l-parametri biex jiġi kkalkulat il-kumpens u biex jiġi evitat u rkuprat kwalunkwe kumpens żejjed possibbli.

(34)

Sabiex jiġu evitati distorsjonijiet mhux ġustifikati tal-kompetizzjoni, il-kumpens m’għandux jeċċedi dak li hu neċessarju biex jiġu koperti l-ispejjeż netti li teħel impriża biex topera s-servizz, inkluż profitt xieraq.

(35)

L-ispiża netta li għandha tittieħed inkunsiderazzjoni għandha tiġi kkalkulata bħala d-differenza bejn l-ispiża involuta fl-operazzjoni tal-SGEI u d-dħul li jsir mill-SGEI jew, alternattivament, bħala d-differenza bejn l-ispiża netta tal-operazzjoni bl-obbligu ta’ servizz pubbliku u l-ispiża netta jew il-profitt tal-operazzjoni mingħajr l-obbligu ta’ servizz pubbliku. B’mod partikolari, jekk l-obbligu ta’ servizz pubbliku jwassal għal tnaqqis fid-dħul, pereżempju minħabba tariffi regolati, iżda li ma jaffettwax l-ispejjeż, għandu jkun possibbli li l-ispiża netta involuta fit-twettiq tal-obbligu ta’ servizz pubbliku tiġi determinata fuq il-bażi tad-dħul mitluf. Sabiex jiġu evitati distorsjonijiet mhux ġustifikati tal-kompetizzjoni, id-dħul kollu mill-SGEI, jiġifieri kwalunkwe dħul li l-fornitur ma kienx jaqla’ li kieku ma ġiex inkarigat bl-obbligu għandu jiġi kkunsidrat għall-finijiet ta’ kalkolu tal-ammont tal-kumpens. Jekk l-impriża inkwistjoni jkollha drittijiet speċjali jew esklużivi marbutin ma’ attivitajiet, minbarra l-SGEI li għalih tingħata l-għajnuna, li jiġġeneraw profitti ogħla mill-profitt raġonevoli, jew benefiċċji minn vantaġġi oħra mogħtija mill-Istat, dawk il-profitti jew il-benefiċċji għandhom jiġu inklużi fid-dħul tagħha, irrispettivament mill-klassifikazzjoni tagħhom għall-finijiet tal-Artikolu 107 tat-Trattat.

(36)

Sabiex ikun hemm kontroll fuq sussidju inkroċjat possibbli bejn is-servizzi, fejn impriża twettaq attivitajiet li jaqgħu kemm fi ħdan kif ukoll barra l-ambitu ta’ SGEI partikolari jew diversi SGEI, il-kontijiet interni għandhom juru b’mod separat l-ispejjeż u d-dħul marbuta ma’ kull SGEI u dawk ta’ servizzi oħra, kif ukoll il-parametri li bihom jiġu allokati l-ispejjeż u d-dħul.

(37)

Kumpens li jkun aktar minn dak li hu neċessarju biex jiġu koperti l-ispejjeż li teħel l-impriża konċernata li topera l-SGEI għandhom jikkostitwixxi għajnuna mill-Istat inkompatibbli li għandhom jitħallsu lura b’imgħax lill-Istat. Il-kumpens mogħti għall-operazzjoni ta’ SGEI iżda li fil-konkret jiġi użat mill-impriża konċernata biex topera f’suq ieħor għall-finijiet lil hinn minn dawk stabbiliti fl-att ta’ inkarigu mhuwiex neċessarju għall-operazzjoni tal-SGEI, u għaldaqstant jista’ jikkostitwixxi wkoll għajnuna mill-Istat li hija inkompatibbli u li għandha titħallas lura lill-Istat.

(38)

Profitt tal-fornitur tas-servizz li ma jaqbiżx ir-rata rilevanti ta’ tpartit u 100 punt bażi magħdudin magħha m’għandux jiġi kkunsidrat bħala mhux raġonevoli. F’dak il-kuntest, ir-rata rilevanti ta’ tpartit hija kkunsidrata bħala rata ta’ redditu xierqa għal investiment ħieles mir-riskju. Il-primjum ta’ 100 punt bażi jservi, fost affarijiet oħra, biex jikkumpensa għar-riskju ta’ likwidità relatat mal-forniment ta’ kapital li hu impenjat għall-operazzjoni tas-servizz matul il-perjodu ta’ inkarigu.

(39)

F’każijiet fejn l-fornitur tas-servizz ma jġorrx ammont sostanzjali ta’ riskju kummerċjali, pereżempju minħabba li tieħu kumpens sħiħ tal-ispejjeż biex topera s-servizz, il-profitti li jaqbżu l-limitu tar-rata ta’ swap rilevanti u 100 punt bażi magħdudin magħha m’għandhomx ikunu jitqiesu raġonevoli.

(40)

Fejn, minħabba ċirkustanzi speċifiċi, ma jkunx xieraq li tintuża r-rata ta’ redditu fuq il-kapital, l-Istati Membri għandhom ikunu jistgħu jserrħu fuq indikaturi oħrajn tal-livell tal-profitt, biex jiddeterminaw liema għandu jkun il-profitt raġonevoli, bħar-redditu medju fuq l-ishma, ir-redditu fuq il-kapital imħaddem, ir-redditu fuq l-assi jew ir-redditu fuq il-bejgħ.

(41)

Biex jiddeterminaw x’jikkostitwixxi profitt raġonevoli, l-Istati Membri għandhom ikunu kapaċi jintroduċu kriterji ta’ inċentiv relatati, b’mod partikolari, mal-kwalità tas-servizz ipprovdut u mal-kisbiet fl-effiċjenza fil-produzzjoni. Il-kisbiet fl-effiċjenza ma għandhomx inaqqsu l-kwalità tas-servizz ipprovdut. Pereżempju, l-Istati Membri għandhom ikunu jistgħu, fl-att ta’ inkarigu, jistabbilixxu miri għall-effiċjenza fil-produzzjoni li bihom il-livell tal-kumpens jiddipendi fuq sa liema punt ikunu ġew sodisfati dawn il-miri għall-effiċjenza fil-produzzjoni. L-att ta’ inkarigu jista’ jipprevedi li jekk l-impriża ma tilħaqx l-objettivi, il-kumpens jitnaqqas billi jiġi applikat metodu ta’ kalkolu li jkun speċifikat fl-att ta’ inkarigu, filwaqt li jekk l-impriża tmur lil hinn mill-objettivi, il-kumpens ikun jista’ jiżdied billi jiġi applikat metodu speċifikat fl-att ta’ inkarigu. Kwalunkwe ppremjar marbut mal-kisbiet fl-effiċjenza fil-produzzjoni għandu jkun iffissat f’livell li jippermetti li dawk il-kisbiet jinqasmu b’mod ibbilanċjat bejn l-impriża u l-Istat Membru u/jew l-utenti.

(42)

Abbażi tal-esperjenza miksuba fl-applikazzjoni tad-Deċiżjoni 2012/21/UE, l-obbligu li jkun hemm kontrolli ex post ta’ kumpens żejjed għandhom jiġu aġġustati wkoll biex jittaffa l-piż amministrattiv għall-Istati Membri. Għalhekk, il-frekwenza tagħhom hemm bżonn li titnaqqas u l-Istati Membri għandhom jiġu eżentati minn tali kontrolli meta l-kumpens jiġi ffissat minn qabel abbażi ta’ pjan ta’ direzzjoni tan-negozju kredibbli. Barra minn hekk, meta l-attività tal-fornitur tal-SGEI tkun essenzjalment limitata għall-forniment ta’ dak l-SGEI, possibbilment bi dħul kummerċjali annwali li ma jaqbiżx il-5 % tad-dħul annwali totali matul il-perjodu ta’ inkarigu, li jista’ jitqies anċillari għall-SGEI, u l-fornitur ikun legalment obbligat li jinvesti mill-ġdid il-profitti kollha tiegħu f’dak l-SGEI, ir-riskju ta’ distorsjonijiet bla bżonn marbuta ma’ kumpens żejjed potenzjali huwa limitat. F’dak il-każ, it-twettiq ta’ kontrolli ex post biex jiġi vverifikat in-nuqqas ta’ kumpens żejjed m’għandu jkun ukoll meħtieġ. Madankollu, meta japplikaw din l-eżenzjoni, l-Istati Membri jenħtieġ li jiżguraw li d-dħul kummerċjali jibqa’ anċillari pereżempju permezz ta’ kontrolli aleatorji, b’mod partikolari f’każ ta’ suspett ta’ abbuż.

(43)

Sabiex jitnaqqas il-piż amministrattiv, l-obbligi ta’ rappurtar imposti bid-Deċiżjoni 2012/21/UE għandhom jitneħħew. Bl-istess mod, għall-finijiet ta’ simplifikazzjoni, l-obbligu li ssir referenza għal dik id-Deċiżjoni fl-att ta’ inkarigu għandu jitneħħa wkoll. Sabiex jinżamm livell suffiċjenti ta’ trasparenza fir-rigward tal-kumpens mogħti għal SGEI, l-obbligi ta’ trasparenza stabbiliti fid-Deċiżjoni 2012/21/UE għandhom jiġu aġġustati. F’dak li jirrigwarda l-pubblikazzjoni ta’ informazzjoni dwar l-għotjiet individwali ta’ għajnuna huwa xieraq li jiġu stabbiliti limiti li, ’il fuq minnhom, dik il-pubblikazzjoni tista’ tiġi kkunsidrata bħala proporzjonata filwaqt li titqies l-ammont tal-għajnuna.

(44)

L-eżenzjoni mir-rekwiżit ta' notifika minn qabel għal ċerti SGEI m’għandux jeskludi l-possibbiltà għall-Istati Membri li jinnotifikaw xi miżura speċifika ta’ għajnuna. Fil-każ ta’ tali notifika, jew jekk il-Kummissjoni tevalwa l-kompatibilità ta’ miżura ta’ għajnuna speċifika wara li jkun sar ilment jew ex officio, il-Kummissjoni għandha tevalwa jekk il-kundizzjonijiet rilevanti jkunux sodisfati. Jekk dak ma jkunx il-każ, il-miżura għandha tiġi evalwata skont il-prinċipji stipulati fil-Komunikazzjoni tal-Kummissjoni dwar qafas ta’ għajnuna mill-Istat fil-forma ta’ kumpens għal servizzi pubbliċi (20).

(45)

Din id-Deċiżjoni għandha tapplika mingħajr ħsara għad-dispożizzjonijiet tad-Direttiva tal-Kummissjoni 2006/111/KE (21).

(46)

Din id-Deċiżjoni għandha tapplika bla ħsara għad-dispożizzjonijiet tal-Unjoni fil-qasam tal-kompetizzjoni, b’mod partikolari l-Artikoli 101 u 102 tat-Trattat.

(47)

Din id-Deċiżjoni għandha tapplika bla ħsara għad-dispożizzjonijiet tal-Unjoni fil-qasam tal-akkwist pubbliku.

(48)

Din id-Deċiżjoni għandha tapplika bla ħsara għal dispożizzjonijiet aktar stretti marbuta ma’ obbligi ta’ servizz pubbliku li jinsabu fil-leġiżlazzjoni settorjali tal-Unjoni.

(49)

Skemi ta’ għajnuna li jkunu ddaħħlu fis-seħħ skont id-Deċiżjoni 2012/21/UE qabel id-dħul fis-seħħ ta’ din id-Deċiżjoni għandhom jibqgħu jkunu kompatibbli mas-suq intern kif ukoll eżentati mir-rekwiżit ta’ notifika għal perjodu ulterjuri ta’ sentejn. Għajnuna li tkun iddaħħlet fis-seħħ qabel id-dħul fis-seħħ ta’ din id-Deċiżjoni u li ma kinitx ingħatat skont id-Deċiżjoni 2012/21/UE iżda li tissodisfa l-kundizzjonijiet stipulati f’din id-Deċiżjoni għandha titqies li hi kompatibbli mas-suq intern kif ukoll eżentata mir-rekwiżit ta’ notifika. Billi din id-Deċiżjoni tintroduċi kundizzjonijiet ġodda, limitati għall-effett tagħhom, għall-SGEI soċjali, b’deroga, u sabiex jitħarsu l-benefiċjarji ta’ dawn l-SGEI soċjali eżistenti, filwaqt li jitqies ukoll l-potenzjal limitat għal distorsjonijiet marbuta ma’ tali SGEI, skema ta’ għajnuna jew għajnuna individwali għal kwalunkwe SGEI soċjali li daħlet fis-seħħ qabel id-dħul fis-seħħ ta’ din id-Deċiżjoni li kienet kompatibbli mas-suq intern u eżenti mir-rekwiżit ta’ notifika għandha tibqa’ kompatibbli mas-suq intern sa tmiem id-durata tal-att ta’ inkarigu.

(50)

Il-Kummissjoni għandha tagħmel eżami mill-ġdid ta’ din id-Deċiżjoni kif meħtieġ filwaqt li tqis l-esperjenza miksuba fl-implimentazzjoni tagħha.

(a)

il-kontenut u d-durata tal-obbligi ta’ servizz pubbliku;

(b)

l-impriża u, fejn applikabbli, it-territorju kkonċernat;

(c)

in-natura ta’ kwalunkwe dritt esklużiv jew speċjali assenjat lill-impriża mill-awtorità awtorizzanti;

(d)

deskrizzjoni tal-mekkaniżmu ta’ kumpens u l-parametri għall-kalkolu, il-kontroll u r-reviżjoni tal-kumpens;

(e)

l-arranġamenti biex jiġi evitat u rkuprat kwalunkwe kumpens żejjed.

(a)

kwalunkwe għajnuna li daħlet fis-seħħ qabel id-dħul fis-seħħ ta’ din id-Deċiżjoni li kienet kompatibbli mas-suq intern u eżenti mir-rekwiżit ta’ notifika skont id-Deċiżjoni 2012/21/UE għandha tibqa’ kompatibbli mas-suq intern u eżenti mir-rekwiżit ta’ notifika għal perjodu ulterjuri ta’ sentejn mid-dħul fis-seħħ ta’ din id-Deċiżjoni;

(b)

kwalunkwe skema ta’ għajnuna jew għajnuna individwali għall-SGEI soċjali li daħlet fis-seħħ qabel id-dħul fis-seħħ ta’ din id-Deċiżjoni li kienet kompatibbli mas-suq intern u eżenti mir-rekwiżit ta’ notifika skont id-Deċiżjoni 2012/21/UE għandha tibqa’ kompatibbli mas-suq intern sa tmiem id-durata tal-att ta’ inkarigu;

(c)

kwalunkwe skema ta’ għajnuna jew għajnuna individwali li daħlet fis-seħħ qabel id-dħul fis-seħħ ta’ din id-Deċiżjoni li la kienet kompatibbli mas-suq intern u lanqas ma kienet eżenti mir-rekwiżit ta’ notifika skont id-Deċiżjoni 2012/21/UE imma li tissodisfa l-kundizzjonijiet stabbilit f’din id-Deċiżjoni, b’mod partikolari dawk stabbiliti fl-Artikolu 2(3), għandha titqies kompatibbli mas-suq intern u eżenti mir-rekwiżit ta’ notifika minn qabel.