(1)

Foráiltear le Rialachán (AE) 2016/429 nach mór coinsíneachtaí d’ainmhithe, de tháirgí geirmeacha agus de tháirgí de bhunadh ainmhíoch a theacht ó thríú tír nó ó chríoch, nó ó chrios nó ó dheighleog de thríú tír nó de chríoch, a liostaítear i gcomhréir le hAirteagal 230(1) den Rialachán sin chun teacht isteach san Aontas.

(2)

Le Rialachán Tarmligthe (AE) 2020/692 ón gCoimisiún (2) leagtar síos na ceanglais sláinte ainmhithe nach mór do choinsíneachtaí de speicis agus catagóirí áirithe d’ainmhithe, de tháirgí geirmeacha agus de tháirgí de bhunadh ainmhíoch a chomhlíonadh chun teacht isteach san Aontas ó thríú tíortha nó críocha, nó criosanna de thríú tír nó de chríoch, nó ó dheighleoga de thríú tír nó de chríoch i gcás ainmhithe uisceacha.

(3)

Le Rialachán Cur Chun Feidhme (AE) 2021/404 ón gCoimisiún (3) leagtar síos na liostaí de thríú tíortha nó críocha, nó criosanna de thríú tír nó de chríoch óna gceadaítear na speicis agus na catagóirí ainmhithe, táirgí geirmeacha agus táirgí de bhunadh ainmhíoch a thagann faoi raon feidhme Rialachán Tarmligthe (AE) 2020/692 teacht isteach san Aontas. Déantar na liostaí sin agus rialacha ginearálta áirithe maidir leis na liostaí sin a leagan amach in Iarscríbhinní II go XXII, agus Iarscríbhinn I, a ghabhann leis an Rialachán Cur Chun Feidhme sin, faoi seach.

(4)

Le hIarscríbhinn XIII a ghabhann le Rialachán Cur Chun Feidhme (AE) 2021/404, leagtar amach an liosta de thríú tíortha nó críocha, nó criosanna de thríú tír nó de chríoch, óna n-údaraítear coinsíneachtaí d’fheoil úr ó chrúbaigh, lena n-áirítear bó-ainmhithe, a theacht isteach san Aontas. I gcomhréir le hAirteagal 2, pointe (43), de Rialachán Tarmligthe (AE) 2020/692, áirítear scairteach sa sainmhíniú ar fheoil úr. Le caighdeáin idirnáisiúnta, amhail an Cód um Shláinte na nAinmhithe Talún (4) de chuid na hEagraíochta Domhanda um Shláinte Ainmhithe, ní mheastar gur tráchtearra sábháilte é scairteach i gcás ionfhabhtú le víreas ghalar an chraicinn chnapánaigh. Thairis sin, le hIarscríbhinn VII a ghabhann le Rialachán Tarmligthe (AE) 2020/687 ón gCoimisiún (5) déantar foráil maidir le cóireálacha maolaithe riosca le haghaidh táirgí de bhunadh ainmhíoch ón gcrios srianta agus a mhéid a bhaineann le feoil, i gcás ráig de ghalar an chraicinn chnapánaigh, maidir leis an scairteach a bhaint.

(5)

Thug an tSeapáin fógra don Choimisiún faoi ráigeanna deimhnithe de ghalar an chraicinn chnapánaigh i mbó-ainmhithe ar a críoch. Dá réir sin, ba cheart an coinníoll sonrach ‘Cosc ar scairteach’ a chur isteach san iontráil a bhaineann leis an tSeapáin i gcolún 5 den tábla i gCuid 1 d’Iarscríbhinn XIII a ghabhann le Rialachán Cur Chun Feidhme (AE) 2021/404 chun teacht isteach san Aontas scairteach ó bhó-ainmhithe de thionscnamh an tríú tír sin a chur ar fionraí. Dá bhrí sin, ba cheart Iarscríbhinn XIII a ghabhann le Rialachán Cur Chun Feidhme (AE) 2021/404 a leasú dá réir.

(6)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,