European flag

Iris Oifigiúil
an Aontais Eorpaigh

GA

Sraith L


2023/2410

25.10.2023

CINNEADH CUR CHUN FEIDHME (AE) 2023/2410 ÓN gCOMHAIRLE

an 19 Deireadh Fómhair 2023

maidir le Cathaoirleach Bhord Maoirseachta BCE a cheapadh

TÁ COMHAIRLE AN AONTAIS EORPAIGH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) Uimh. 1024/2013 ón gComhairle an 15 Deireadh Fómhair 2013, lena dtugtar cúraimí sonracha don Bhanc Ceannais Eorpach maidir le beartais a bhaineann le maoirseacht stuamachta ar institiúidí creidmheasa (1), agus go háirithe Airteagal 26(3) de,

Ag féachaint don togra ón mBanc Ceannais Eorpach,

Ag féachaint don fhormheas ó Pharlaimint na hEorpa,

De bharr an mhéid seo a leanas:

(1)

An 15 Deireadh Fómhair 2013, ghlac an Chomhairle Rialachán (AE) Uimh. 1024/2013 lena dtugtar cúraimí sonracha don Bhanc Ceannais Eorpach (BCE) maidir le beartais a bhaineann le maoirseacht stuamachta ar institiúidí creidmheasa.

(2)

Tá an Bord Maoirseachta le tabhairt go hiomlán faoi phleanáil agus faoi fhorghníomhú na gcúraimí a thugtar do BCE, ar a bhfuil an Cathaoirleach, an leas-Chathaoirleach agus ceathrar ionadaithe ó BCE chomh maith le hionadaí amháin ón údarás inniúil náisiúnta i ngach Ballstát rannpháirteach.

(3)

Is comhlacht sár-riachtanach é an Bord Maoirseachta agus cúraimí maoirseachta á bhfeidhmiú ag BCE. Dá bhrí sin, le Rialachán (AE) Uimh 1024/2013, tugadh de chumhacht don Chomhairle Cathaoirleach agus Leas-Chathaoirleach ar an mBord Maoirseachta a cheapadh.

(4)

An 6 Nollaig 2018, cheap an Chomhairle an Cathaoirleach reatha ar an mBord Maoirseachta trí bhíthin Chinneadh Cur Chun Feidhme (AE) 2018/1958 ón gComhairle (2). De bhun Airteagal 26(3) de Rialachán (AE) Uimh. 1024/2013, is é 5 bliana téarma oifige Chathaoirleach an Bhoird Maoirseachta agus ní féidir é a athnuachan.

(5)

An 13 Meán Fómhair 2023, i gcomhréir le hAirteagal 26(3) de Rialachán (AE) Uimh. 1024/2013, ar bhonn nós imeachta roghnúcháin oscailte i measc daoine aonair a bhfuil seasamh agus taithí aitheanta acu i gcúrsaí baincéireachta agus airgeadais agus tar éis éisteacht a thabhairt don Bhord Maoirseachta, chuir BCE togra maidir le Claudia-Maria BUCH a cheapadh ina Cathaoirleach an Bhoird Maoirseachta faoi bhráid Pharlaimint na hEorpa lena fhormheas. D’fhormheas Parlaimint na hEorpa an togra sin an 3 Deireadh Fómhair 2023,

TAR ÉIS AN CINNEADH SEO A GHLACADH:

Airteagal 1

Ceaptar Claudia-Maria BUCH mar Chathaoirleach Bhord Maoirseachta an Bhainc Ceannais Eorpaigh ar feadh tréimhse 5 bliana ón 1 Eanáir 2024.

Airteagal 2

Tiocfaidh an Cinneadh seo i bhfeidhm lá a fhoilsithe in Iris Oifigiúil an Aontais Eorpaigh.

Beidh feidhm aige ón 1 Eanáir 2024.

Arna dhéanamh i Lucsamburg, an 19 Deireadh Fómhair 2023.

Thar ceann na Comhairle

An tUachtarán

F. GRANDE-MARLASKA GÓMEZ


(1)   IO L 287, 29.10.2013, lch. 63.

(2)  Cinneadh Cur Chun Feidhme (AE) 2018/1958 ón gComhairle an 6 Nollaig 2018 maidir le Cathaoirleach Bhord Maoirseachta BCE a cheapadh (IO L 315, 12.12.2018, lch. 25).


ELI: http://data.europa.eu/eli/dec_impl/2023/2410/oj

ISSN 1977-0839 (electronic edition)