(1)

L-Unjoni approvat il-Protokoll għall-Konvenzjoni dwar l-Interessi Internazzjonali fit-Tagħmir Mobbli dwar Kwistjonijiet speċifiċi għall-Vetturi Ferrovjarji (“il-Konvenzjoni ta’ Cape Town”), adottat fil-Lussemburgu fit-23 ta’ Frar 2007 (“il-Protokoll tal-Lussemburgu”), permezz tad-Deċiżjoni tal-Kunsill 2014/888/UE (1) u kisbet l-istatus ta’ Organizzazzjoni Reġjonali għall-Integrazzjoni Ekonomika skont dak il-Protokoll

(2)

Matul it-tieni sessjoni tagħha tat-23 ta’ April 2025, fost punti oħra fl-aġenda, l-Awtorità Superviżorja stabbiliet skont l-Artikolu XII tal-Protokoll tal-Lussemburgu (l-“Awtorità Superviżorja”) hija mistennija tirrevedi l-Istatuti u r-Regoli ta’ Proċedura tagħha u tapprova r-Regoli Mudell dwar l-Identifikazzjoni Permanenti tal-Vetturi Ferrovjarji, żviluppati fil-qafas tal-Kumitat tat-Trasport Intern tal-Kummissjoni Ekonomika għall-Ewropa tan-Nazzjonijiet Uniti. (ir-“Regoli Mudell”) kif emendata fit-13 ta’ Novembru 2024 (Reviżjoni 2).

(3)

Jixraq li tiġi stabbilita l-pożizzjoni li għandha tittieħed f’isem l-Unjoni fit-tieni sessjoni tal-Awtorità Superviżorja, peress li r-reviżjoni proposta tar-Regoli Mudell mill-Awtorità Superviżorja tista’ tinfluwenza b’mod determinanti l-kontenut tal-leġiżlazzjoni tal-Unjoni, jiġifieri d-Direttiva (UE) 2016/797 tal-Parlament Ewropew u tal-Kunsill (2), ir-Regolament ta’ Implimentazzjoni tal-Kummissjoni (UE) 2019/773 (3) u d-Deċiżjoni ta’ Implimentazzjoni tal-Kummissjoni (UE) 2018/1614 (4). Barra minn hekk, l-emendi tal-Istatuti u r-Regoli ta’ Proċedura li għandhom jiġu adottati mill-Awtorità Superviżorja jistgħu jinfluwenzaw b’mod determinanti l-parteċipazzjoni tal-Unjoni f’dak il-korp.

(4)

L-Awtorità Superviżorja hija mistennija temenda l-Istatuti tagħha, li jiddefinixxu aspetti bħall-personalità ġuridika, il-kompiti u l-qafas amministrattiv tagħha, kif meħtieġ mill-Konvenzjoni ta’ Cape Town u mill-Protokoll tal-Lussemburgu. L-emendi previsti tal-Istatuti jiċċaraw id-definizzjoni ta’ Stat Parti billi jiċċaraw li kwalunkwe referenza għal Stat Parti fl-Istatuti hija wkoll referenza għal Organizzazzjoni reġjonali, li taffettwa l-parteċipazzjoni tal-Unjoni f’dak il-korp, u għalhekk jenħtieġ li jiġu appoġġati.

(5)

L-Awtorità Superviżorja hija mistennija temenda r-Regoli ta’ Proċedura tagħha, sabiex tiċċara r-regoli dwar l-eżerċizzju tal-votazzjoni b’maġġoranza kwalifikata u tintroduċi regoli ġodda dwar l-organizzazzjoni ta’ laqgħat urġenti interim. Il-possibbiltà li d-dokumenti jiġu ċċirkolati għal laqgħat urġenti 3 ġimgħat biss qabel ma jingħata bidu għal-laqgħa tista’ madankollu twassal għal diffikultajiet sinifikanti fil-proċedura għall-koordinazzjoni tal-pożizzjonijiet tal-Unjoni, u l-istabbiliment ta’ lista ta’ kwistjonijiet urġenti tista’ awtomatikament tagħti natura urġenti lil kwistjonijiet li fil-prattika mhumiex urġenti. Għalhekk, jenħtieġ li l-emendi tar-Regoli ta’ Proċedura tal-Awtorità Superviżorja jiġu appoġġati, ħlief għall-bidla fl-iskadenzi għat-twassil tad-dokumenti għal-laqgħa u mingħajr ma jiġu speċifikati l-kwistjonijiet li jistgħu jiġu kkwalifikati bħala urġenti, sabiex jiġi żgurat li l-possibbiltajiet għall-Unjoni li tikkoordina l-pożizzjonijiet dwar kwistjonijiet ta’ rilevanza għall-Unjoni jiġu żgurati b’mod effettiv.

(6)

Il-Protokoll tal-Lussemburgu jeħtieġ li jibbaża fuq sistema ċara ta’ identifikazzjoni u ta’ mmarkar tal-vetturi ferrovjarji bbażata fuq standards internazzjonali. Ir-Regoli Mudell jipprovdu qafas għall-assenjazzjoni tal-identifikatur URVIS u għall-immarkar tiegħu fuq il-vetturi ferrovjarji. Huma proposti aġġornamenti żgħar għal dawk ir-regoli u huma fl-interess tal-operazzjoni tal-Protokoll tal-Lussemburgu. Għalhekk, jenħtieġ li l-approvazzjoni tar-Regoli Mudell kif emendati fit-13 ta’ Novembru 2024 (Reviżjoni 2) għall-finijiet tar-Regolamenti għar-Reġistru Internazzjonali ta’ Interessi fil-Vetturi Ferrovjarji tiġi appoġġata,