(1)

Id-Deċiżjoni ta’ Implimentazzjoni tal-Kunsill (UE) 2018/593 (2) awtorizzat lill-Italja tintroduċi sal-31 ta’ Diċembru 2021 miżura speċjali ta’ deroga mill-Artikoli 218 u 232 tad-Direttiva 2006/112/KE (il-“miżura speċjali”) sabiex timplimenta fatturazzjoni elettronika obbligatorja għall-persuni taxxabbli kollha stabbiliti fit-territorju tal-Italja, għajr għall-persuni taxxabbli li jibbenefikaw mill-eżenzjoni għall-intrapriżi ż-żgħar imsemmija fl-Artikolu 282 ta’ dik id-Direttiva.

(2)

Id-Deċiżjoni ta’ Implimentazzjoni tal-Kunsill (UE) 2021/2251 (3), awtorizzat lill-Italja biex tkompli tapplika dik il-miżura speċjali sal-31 ta’ Diċembru 2024, u wessgħet l-ambitu tal-miżura speċjali ’ biex tinkludi l-persuni taxxabbli li jibbenefikaw mill-eżenzjoni għall-intrapriżi ż-żgħar imsemmija fl-Artikolu 282 tad-Direttiva 2006/112/KE.

(3)

B’ittra rreġistrata mal-Kummissjoni fil-11 ta’ April 2024, l-Italja talbet awtorizzazzjoni, f’konformità mal-Artikolu 395(2), l-ewwel subparagrafu, tad-direttiva 2006/112/KE, biex tkompli tapplika l-miżura speċjali (it-“talba”).

(4)

F’konformità mal-Artikolu 395(2), it-tieni subparagrafu, tad-Direttiva 2006/112/KE, il-Kummissjoni bagħtet it-talba lill-Istati Membri l-oħra b’ittra ddatata t-12 ta’ Settembru 2024. B’ittra ddatata t-13 ta’ Settembru 2024, il-Kummissjoni nnotifikat lill-Italja li kellha l-informazzjoni kollha meħtieġa biex tivvaluta t-talba.

(5)

Skont l-Italja, is-sistema implimentata tal-fatturazzjoni elettronika obbligatorja, li tgħaddi l-fatturi kollha maħruġin mis-sistema “Sistema di Interscambio” ġestita mill-Aġenzija Taljana għad-Dħul, laħqet l-objettivi tagħha bis-sħiħ, jiġifieri l-ġlieda kontra l-frodi u l-evażjoni tat-taxxa, is-simplifikazzjoni tal-konformità mar-regoli tat-taxxa u t-titjib tal-effiċjenza tal-ġbir tat-taxxi, u b’hekk naqset il-kostijiet amministrattivi għan-negozji.

(6)

Jenħtieġ għaldaqstant li l-Italja tiġi awtorizzata tkompli tapplika l-miżura speċjali sal-31 ta’ Diċembru 2027. F’każ li l-Italja tqis li estensjoni tal-miżura speċjali lil hinn mill-2027 hija neċessarja, jenħtieġ li tippreżenta talba għal estensjoni lill-Kummissjoni. Dik it-talba jenħtieġ li tkun akkumpanjata minn rapport dwar l-applikazzjoni tal-miżura speċjali, i inkluż valutazzjoni tal-miżura speċjali rigward l-effettività tagħha fil-ġlieda kontra l-frodi u l-evażjoni tal-VAT u s-simplifikazzjoni tal-ġbir tat-taxxi. Barra minn hekk, jenħtieġ li dak ir-rapport jevalwa l-impatt tal-miżura fuq il-persuni taxxabbli, b’mod partikolari dawk li jibbenefikaw mill-eżenzjoni għall-intrapriżi ż-żgħar imsemmija fl-Artikolu 282 tad-Direttiva 2006/112/KE.

(7)

Madankollu, jenħtieġ li l-miżura speċjali tieqaf tapplika mid-data tal-applikazzjoni ta’ sistema ġenerali għall-fatturazzjoni elettronika adottata mill-Kunsill abbażi tal-Artikolu 113 tat-Trattat dwar il-Funzjonament tal-Unjoni Ewropea jew abbażi jew ta’ kwalunkwe dispożizzjoni rilevanti oħra ta’ dak it-Trattat, jekk tali sistema ġenerali ssir applikabbli qabel il-31 ta’ Diċembru 2027.

(8)

Jenħtieġ li l-miżura speċjali ma taffettwax id-dritt tal-konsumaturi li jirċievu fatturi stampati fil-każ ta’ tranżazzjonijiet intra-Komunitarji.

(9)

Skont l-informazzjoni pprovduta mill-Italja, il-miżura speċjali ser ikollha biss effett negliġibbli fuq l-ammont kumplessiv tad-dħul mit-taxxa li l-Italja tiġbor fl-istadju tal-konsum finali, u mhux ser ikollha effett negattiv fuq ir-riżorsi proprji tal-Unjoni akkumulati mill-VAT.

(10)

Għaldaqstant, jenħtieġ li d-Deċiżjoni ta’ Implimentazzjoni (UE) 2018/593 tiġi emendata skont dan,