(1)

L-Artikolu 5(2) tal-Istatuti tal-Fond Ewropew tal-Investiment (il-‘Fond’) jipprovdi li l-kapital awtorizzat tal-Fond jista’ jiżdied b’deċiżjoni tal-Laqgħa Ġenerali tal-Fond (il-“Laqgħa Ġenerali”) li taġixxi b’maġġoranza ta’ -85 % tal-voti mitfugħa.

(2)

Meta jitqies l-impatt mistenni tal-kriżi tal-COVID-19 u bil-ħsieb li jikkontribwixxi għar-rispons tal-Unjoni u tal-Fond għall-kriżi permezz tal-implimentazzjoni tal-Proposta għal Regolament tal-Parlament Ewropew u tal-Kunsill li jistabbilixi l-Programm InvestEU bħala parti mill-Qafas Finanzjarju Pluriennali għas-snin 2021 sa 2027 u permezz ta’ aktar żvilupp tar-rwol tal-Fond fil-ġestjoni tal-programmi nazzjonali u reġjonali, huwa meħtieġ li jiżdied immedjatament il-kapital awtorizzat tal-Fond b’EUR 2 870 000 000.

(3)

Il-Bord tad-Diretturi tal-Fond (il-“Bord tad-Diretturi”) ddeċieda li jissottometti talba lil-Laqgħa Ġenerali għall-approvazzjoni sabiex iżżid il-kapital awtorizzat tal-Fond b’EUR 2 870 000 000 permezz tal-ħruġ ta’ 2 870 sehem ġdid u għall-approvazzjoni tal-arranġamenti, inkluż għall-ħlas, għal tali żieda fil-kapital. Jekk iż-żieda fil-kapital tiġi approvata, kull sehem ġdid ikollu valur nominali ta’ EUR 1 000 000 u kull sehem sottoskritt jitħallas sa 20 % tal-valur nominali tiegħu. Ikun possibbili li l-Laqgħa Ġenerali titlob il-ħlas tat-80 % li jifdal skont il-kundizzjonijiet stabbiliti fl-Artikolu 7(3) tal-Istatuti tal-Fond. L-ishma kollha, kemm jekk ikunu eżistenti kif ukoll jekk ikunu għadhom kif inħarġu, se jkunu ta’ valur ugwali u jkollhom drittijiet ugwali fl-aspetti kollha.

(4)

Il-Bord tad-Diretturi ppropona li l-ishma awtorizzati ġodda jkunu disponibbli għas-sottoskrizzjoni matul perjodu wieħed ta’ sottoskrizzjoni li jibda minnufih mal-approvazzjoni taż-żieda fil-kapital mil-Laqgħa Ġenerali u jintemm fit-30 ta’ Settembru 2021. L-Unjoni se tkun tista’ tipparteċipa fis-sottoskrizzjoni skont il-kundizzjonijiet stabbiliti fid-deċiżjoni tal-Laqgħa Ġenerali ladarba jidħol fis-seħħ l-att ġuridiku li japprova l-parteċipazzjoni tal-Unjoni fiż-żieda fil-kapital.

(5)

Sabiex ir-rappreżentant tal-Unjoni fil-Laqgħa Ġenerali jkun jista’ jivvota dwar iż-żieda fil-kapital malajr kemm jista’ jkun, jitqies li huwa xieraq li ssir eċċezzjoni għall-perjodi ta’ tmien ġimgħat u ta’ għaxart ijiem imsemmija fl-Artikolu 4 tal-Protokoll Nru 1 dwar ir-rwol tal-Parlamenti nazzjonali fl-Unjoni Ewropea anness mat-Trattat dwar l-Unjoni Ewropea, mat-Trattat dwar il-Funzjonament tal-Unjoni Ewropea u mat-Trattat li jistabbilixxi l-Komunità Ewropea tal-Enerġija Atomika. Għall-istess raġuni, jenħtieġ li din id-Deċiżjoni tidħol fis-seħħ fil-jum wara dak tal-pubblikazzjoni tagħha,