10.7.2023   

GA

Iris Oifigiúil an Aontais Eorpaigh

L 175/3


RIALACHÁN CUR CHUN FEIDHME (AE) 2023/1427 ÓN gCOIMISIÚN

an 4 Iúil 2023

maidir le haicmiú earraí áirithe san Ainmníocht Chomhcheangailte

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) Uimh. 952/2013 ó Pharlaimint na hEorpa agus ón gComhairle an 9 Deireadh Fómhair 2013 lena leagtar síos Cód Custaim an Aontais (1), agus go háirithe Airteagal 57(4) agus Airteagal 58(2) de,

De bharr an mhéid seo a leanas:

(1)

Chun a áirithiú go gcuirtear an Ainmníocht Chomhcheangailte atá i gceangal le Rialachán (CEE) Uimh. 2658/87 ón gComhairle (2) i bhfeidhm go haonfhoirmeach, is gá bearta a ghlacadh maidir le haicmiú na n-earraí dá dtagraítear san Iarscríbhinn a ghabhann leis an Rialachán seo.

(2)

Le Rialachán (CEE) Uimh. 2658/87, leagadh síos na rialacha ginearálta maidir le léirmhíniú na hAinmníochta Comhcheangailte. Tá feidhm ag na rialacha sin freisin maidir le haon ainmníocht eile atá bunaithe go hiomlán uirthi nó a bhfuil cuid di bunaithe uirthi nó a chuireann aon fhoroinn bhreise léi agus a bhunaítear le forálacha sonracha de chuid an Aontais, d’fhonn bearta taraife agus bearta eile i ndáil le trádáil in earraí a chur i bhfeidhm.

(3)

De bhun na rialacha ginearálta sin, na hearraí a bhfuil tuairisc orthu i gcolún (1) den tábla a leagtar amach san Iarscríbhinn, is earraí iad ba cheart a aicmiú faoin gcód AC a luaitear i gcolún (2), de bhua na gcúiseanna a leagtar amach i gcolún (3) den tábla sin.

(4)

Maidir le faisnéis taraife cheangailteach arna heisiúint i leith na n-earraí a bhaineann leis an Rialachán seo, ar faisnéis í nach bhfuil i gcomhréir leis an Rialachán seo, is iomchuí a fhoráil go bhféadfaidh an sealbhóir an fhaisnéis sin a agairt fós, go ceann tréimhse áirithe, i gcomhréir le hAirteagal 34(9) de Rialachán (AE) Uimh. 952/2013. Is tréimhse 3 mhí ba cheart a bheith sa tréimhse sin.

(5)

Tá na bearta dá bhforáiltear sa Rialachán seo i gcomhréir le tuairim an Choiste um an gCód Custaim,

TAR ÉIS AN RIALACHÁN SEO A GHLACADH:

Airteagal 1

Na hearraí a bhfuil tuairisc orthu i gcolún (1) den tábla a leagtar amach san Iarscríbhinn, aicmeofar iad faoi chuimsiú na hAinmníochta Comhcheangailte faoin gcód AC a luaitear i gcolún (2) den tábla sin.

Airteagal 2

Faisnéis taraife cheangailteach nach bhfuil i gcomhréir leis an Rialachán seo, féadfar í a agairt fós i gcomhréir le hAirteagal 34(9) de Rialachán (AE) Uimh. 952/2013 go ceann tréimhse 3 mhí ó dháta theacht i bhfeidhm an Rialacháin seo.

Airteagal 3

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, an 4 Iúil 2023.

Thar ceann an Choimisiúin,

Ar son an Uachtaráin,

Gerassimos THOMAS

An tArd-Stiúrthóir

Ard-Stiúrthóireacht an Chánachais agus an Aontais Chustaim


(1)   IO L 269, 10.10.2013, lch. 1.

(2)  Rialachán (CEE) Uimh. 2658/87 ón gComhairle an 23 Iúil 1987 maidir leis an ainmníocht taraife agus staidrimh agus leis an gComhtharaif Chustaim (IO L 256, 7.9.1987, lch. 1).


IARSCRÍBHINN

Tuairisc ar na hearraí

Aicmiú

(Cód AC)

Cúiseanna

(1)

(2)

(3)

Leatháin chothromrollta de chruach neamh-chóimhiotail, idir 1 060 mm agus 1 250 mm ar tiús, atá tochraiste ar spóil. Tá roinnt bratuithe ar na leatháin, ar an dá thaobh.

Is éard atá sa bhratú atá i dtadhall leis an gcruach ná cóimhiotal alúmanaim agus since (tá galbhánú teothumtha déanta ar na leatháin agus tiús tuairim is 4 μm de shraith Al-Zn ar a dhá dtaobh). Tugann an bratú sin breis frithsheasmhachta don chruach in aghaidh creimeadh atmaisféarach.

Anuas ar an mbratú sin, tá brat réamhphéinte. Tá siad brataithe ar thaobh amháin díobh le brat prímeála de phéint pholaiméireach (dar tiús tuairim is 5 μm) agus le brat uachtair de phéint pholaiméireach (dar tiús tuairim is 16 μm). Ar an taobh eile, tá brat de phéint sheachtrach pholaiméireach eapocsach (dar tiús tuairim is 5 μm).

Úsáidtear na leatháin san earnáil tógála.

7210 70 80

Cinntear an t-aicmiú le rialacha ginearálta 1 agus 6 maidir le léirmhíniú na hAinmníochta Comhcheangailte, Nóta 3 a ghabhann le Roinn XV, Nóta 1 (k) a ghabhann le Caibidil 72 agus le foclaíocht na gcód AC 7210 , 7210 70 agus 7210 70 80 .

I bhfianaise a saintréithe oibiachtúla agus a n-airíonna oibiachtúla, comhlíonann na hearraí téarmaí cheannteideal 7210 , lena gcumhdaítear táirgí cothromrollta atá cumhdaithe, plátáilte nó brataithe.

Chun críoch fho-cheannteidil cheannteideal 7210 , táirgí atá faoi réir níos mó ná cineál amháin brataithe, plátála nó cumhdaigh, is de réir an phróisis dheireanaigh atá siad le haicmiú (féach Nótaí Míniúcháin an Chórais Chomhchuibhithe a ghabhann le ceannteideal 7210 , Nótaí Míniúcháin na bhFo-cheannteideal).

Dá bhrí sin, is faoin gcód AC 7210 70 80 atá na leatháin le haicmiú, mar tháirgí cothromrollta de chruach neamh-chóimhiotail, atá 600 mm nó níos mó ar leithead, agus atá péinteáilte, vearnaiseáilte, nó brataithe le plaisteach de chineálacha éagsúla.