European flag

Iris Oifigiúil
an Aontais Eorpaigh

GA

Sraith L


2026/1046

7.5.2026

RIALACHÁN (AE) 2026/1046 Ó PHARLAIMINT NA hEORPA AGUS ÓN gCOMHAIRLE

an 29 Aibreán 2026

lena leasaítear Rialachán (AE) 2019/1242 a mhéid a bhaineann le ríomh na gcreidmheasanna astaíochta i gcás feithiclí tromshaothair le haghaidh thréimhsí tuairiscithe na mblianta 2025 go 2029

(Téacs atá ábhartha maidir le LEE)

TÁ PARLAIMINT NA hEORPA AGUS COMHAIRLE AN AONTAIS EORPAIGH,

Ag féachaint don Chonradh ar Fheidhmiú an Aontais Eorpaigh, agus go háirithe Airteagal 192(1) de,

Ag féachaint don togra ón gCoimisiún Eorpach,

Tar éis dóibh an dréachtghníomh reachtach a chur chuig na parlaimintí náisiúnta,

Ag féachaint don tuairim ó Choiste Eacnamaíoch agus Sóisialta na hEorpa (1),

Tar éis dul i gcomhairle le Coiste na Réigiún,

Ag gníomhú dóibh i gcomhréir leis an ngnáthnós imeachta reachtach (2),

De bharr an mhéid seo a leanas:

(1)

Leagtar amach i Rialachán (AE) 2019/1242 ó Pharlaimint na hEorpa agus ón gComhairle (3) na spriocanna CO2 d’fheithiclí tromshaothair. Is cuid lárnach iad na spriocanna sin de chreat an Aontais chun laghdú 55 % faoi bhun leibhéil 1990 ar a laghad a dhéanamh ar ghlanastaíochtaí gás ceaptha teasa faoi 2030 agus chun aeráidneodracht ar fud an gheilleagair a bhaint amach faoi 2050.

(2)

Leagtar síos le Rialachán (AE) 2019/1242 spriocanna laghdaithe astaíochtaí CO2 a éiríonn níos déine de réir a chéile do mhonaróirí. Leis na spriocanna sin, soláthraítear cinnteacht agus intuarthacht fhadtéarmach d’infheisteoirí feadh an tslabhra luacha, agus an tráth céanna tugtar aga tionscanta leordhóthanach le haghaidh aistriú cóir i dtreo na haeráidneodrachta. Tá sé ríthábhachtach, dá bhrí sin, nach n-athródh leibhéal na spriocanna laghdaithe astaíochtaí CO2 a bunaíodh faoi Rialachán (AE) 2019/1242.

(3)

Chun comhlíonadh na spriocanna is infheidhme ó 2030 agus ar aghaidh a éascú agus i bhfianaise na moille ar imscaradh an bhonneagair luchtaithe phoiblí feadh mótarbhealaí le haghaidh feithiclí tromshaothair, ba cheart do mhonaróirí a bheith in ann níos mó creidmheasanna astaíochta a ghiniúint roimh an mbliain sin, rud a d’fhéadfadh imscaradh níos luaithe feithiclí tromshaothair astaíochtaí nialasacha a dhreasú chomh maith.

(4)

Le linn thréimhsí tuairiscithe na mblianta 2025 go 2029, ba cheart do mhonaróirí creidmheasanna astaíochta a bhailiú má tá a n-astaíochtaí sonracha CO2 faoi bhun na sprice i leith astaíochtaí sonracha CO2 seachas faoi bhun na conaire laghdaithe astaíochtaí CO2.

(5)

Ós rud é go bhfuil dul chun cinn déanta cheana féin maidir le húsáid busanna uirbeacha astaíochtaí nialasacha agus nach bhfuil tionchar diúltach ar a n-úsáid de bharr easpa a d’fhéadfadh a bheith ar an mbonneagar luchtaithe phoiblí feadh mótarbhealaí, níor cheart feidhm a bheith ag an Rialachán seo maidir le busanna uirbeacha.

(6)

Ós rud é nach féidir leis na Ballstáit cuspóir an Rialacháin seo, eadhon solúbthacht bhreise a thabhairt do mhonaróirí feithiclí maidir lena gcomhlíonadh agus leibhéal uaillmhéine na spriocanna laghdaithe CO2 á choinneáil ar bun san am céanna, a ghnóthú go leordhóthanach agus, de bharr fhairsinge agus éifeachtaí na gníomhaíochta, gur fearr is féidir é a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun an cuspóir sin a ghnóthú.

(7)

Ba cheart, dá bhrí sin, Rialachán (AE) 2019/1242 a leasú dá réir,

TAR ÉIS AN RIALACHÁN SEO A GHLACADH:

Airteagal 1

Leasaítear Rialachán (AE) 2019/1242 mar a leanas:

(1)

in Airteagal 7(1), cuirtear an méid seo a leanas in ionad phointe (a):

‘(a)

an difríocht idir conair laghdaithe astaíochtaí CO2 dá dtagraítear i mír 2 do thréimhse thuairiscithe na bliana 2025 agus a mheánastaíochtaí sonracha CO2 an mhonaróra sin le haghaidh thréimhsí tuairiscithe na mblianta 2025 go 2029; agus an difríocht idir conair laghdaithe astaíochtaí CO2 do thréimhsí tuairiscithe na mblianta seachas 2025 go 2029 agus meánastaíochtaí sonracha CO2 an mhonaróra sin don tréimhse tuairiscithe chéanna, má tá an difríocht sin dearfach (“creidmheasanna astaíochta”); nó’

;

(2)

leasaítear Iarscríbhinn I i gcomhréir leis an Iarscríbhinn a ghabhann leis an Rialachán seo.

Airteagal 2

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh in Strasbourg, an 29 Aibreán 2026.

Thar ceann Pharlaimint na hEorpa

An tUachtarán

R. METSOLA

Thar ceann na Comhairle

An tUachtarán

M. RAOUNA


(1)  Tuairim an 18 Márta 2026 (nár foilsíodh fós san Iris Oifigiúil).

(2)  Seasamh ó Pharlaimint na hEorpa an 12 Márta 2026 (nár foilsíodh fós san Iris Oifigiúil) agus cinneadh ón gComhairle an 30 Márta 2026.

(3)  Rialachán (AE) 2019/1242 ó Pharlaimint na hEorpa agus ón gComhairle an 20 Meitheamh 2019 lena socraítear na caighdeáin feidhmíochta maidir le hastaíochtaí CO2 d’fheithiclí nua tromshaothair agus lena leasaítear Rialacháin (CE) Uimh. 595/2009 agus (AE) 2018/956 ó Pharlaimint na hEorpa agus ón gComhairle agus Treoir 96/53/CE ón gComhairle (IO L 198, 25.7.2019, lch. 202, ELI: http://data.europa.eu/eli/reg/2019/1242/oj).


IARSCRÍBHINN

Leasaítear Iarscríbhinn I a ghabhann le Rialachán (AE) 2019/1242 mar a leanas:

(1)

cuirtear an méid seo a leanas in ionad an tábla i bpointe 5.2:

 

‘2019 ≤ Y< 2025

2025 ≤ Y< 2030

2030 ≤ Y< 2040

cCO2(NO)Y

[ET(2025)Y – CO2(2025)Y]× VY

[ET2025(NO)Y – CO2(NO)Y]× VY

[ET(NO)Y – CO2(NO)Y]× VY

dCO2(NO)Y

0

[CO2(2025)Y – T(2025)Y]× VY

[CO2(NO)Y – T(NO)Y]× VY

cCO2(M)Y

0

[ET2025(M)Y – CO2(M)Y]× VY

[ET(M)Y – CO2(M)Y]× VY

dCO2(M)Y

0

0

[CO2(M)Y – T(M)Y]× VY ’

(2)

i bpointe 5.2, cuirtear isteach an méid seo a leanas leis:

‘I gcás ina sainmhínítear ET2025(NO)Y agus ET2025(M)Y mar a leanas:

 

Image 1

 

Image 2

 

Image 3
’.


ELI: http://data.europa.eu/eli/reg/2026/1046/oj

ISSN 1977-0839 (electronic edition)