“9503 00 41

Bréagáin stuáilte

Bréagáin stuáilte faoin bhfo-cheannteideal seo, is gnách fabraic sheachtrach d’ábhar bog a bheith orthu agus is gnách iad a bheith stuáilte le hábhar solúbtha/bog a fhágann go mbíonn pléisiúr le baint as greim a bhreith orthu. Ní mheastar gur ábhar stuála modúil cheoil, feirí ceallraí ná creatlacha. Ní gá bréagán stuáilte a bheith stuáilte go hiomlán, fad agus go dtugann na codanna atá stuáilte saintréith an bhréagáin stuáilte don bhréagán.

Féach Rialachán Cur Chun Feidhme (AE) 2015/352 ón gCoimisiún* agus Rialachán (CE) Uimh. 2184/97 ón gCoimisiún** maidir le bréagáin atá le haicmiú faoi fho-cheannteideal 9503 00 41 .

Samplaí eile de bhréagáin atá le haicmiú faoi fho-cheannteideal 9503 00 41 mar bhréagáin stuáilte ar chuma ainmhithe nó créatúr neamhdhaonna:

Bréagán stuáilte ar chuma béir, é déanta as fabraic bhog, é faoi thuairim 30 cm ar airde, ceann stuáilte air atá measartha mór i gcoibhneas na coda eile de, cosa agus sciatháin stuáilte air agus modúl fuaime ionsuite sa chabhail ann. De bhreis ar an modúl fuaime, tá roinnt bheag stuála sa chabhail.

Teidí beag a chanann ceol agus ag a bhfuil gnéithe idirghníomhacha, é faoi thuairim 19 cm ar airde.

As plaisteach atá an chabhail déanta, tá modúl fuaime ceallra-chumhachtaithe ann agus tá trí chnaipe solais air lena mbrú.

Tá cloigeann stuáilte air, cosa stuáilte, troithe stuáilte, sciatháin agus lámha stuáilte. Na codanna stuáilte uile arna n-áireamh le chéile, is iontu atá an chuid is mó den líonadh ábhair inmheánach.

Bréagán ar chuma cloiginn capaill, é stuáilte agus greamaithe de mhaide adhmaid (60 go 100 cm ar fad) ar a bhfuil dhá roth feistithe ag an mbun.

Samplaí de bhréagáin atá le haicmiú faoi fho-cheannteideal 9503 00 49 mar bhréagáin eile ar chuma ainmhithe nó créatúr neamhdhaonna:

Bréagán ar chuma madra, é faoi thuairim 25 cm ar airde, agus é cumhdaithe le fabraic phluise chniotáilte bhog. As plaisteach atá an chabhail agus an chreatlach déanta agus tá mótar ceallra-chumhachtaithe agus modúl fuaime ann. Ar na ceithre lapa, ar thaobh an ghabhail díobh, tá sraith líneála greamaithe, agus tá an cloigeann stuáilte.

Bréagán ar chuma láma, é faoi thuairim 17 cm ar airde, agus é cumhdaithe le fabraic phluise bhog. As plaisteach atá an chabhail, an cloigeann agus an chreatlach déanta. Tá sraith de phillíní stuála idir an cloigeann plaistigh agus an fhabraic phluise bhog a chumhdaíonn an cloigeann, ach níl aon ábhar stuáilte sa chabhail. Tá mótar ceallra-chumhachtaithe sa bhréagán, lena mbogtar na cosa agus an t-eireaball, agus tá modúl fuaime ann.

Bréagán ar chuma piscín cait, é faoi thuairim 15 cm ar airde, agus é cumhdaithe le fabraic phluise chniotáilte bhog. As plaisteach atá an chabhail agus an chreatlach déanta agus tá mótar ceallra-chumhachtaithe agus modúl fuaime ann. Tá stuáil sna ceithre lapa.

Bréagán ar chuma madra tarrthála, é faoi thuairim 30 cm ar airde, agus é cumhdaithe le fabraic phluise chniotáilte bhog. As plaisteach atá an chabhail agus an chreatlach déanta agus tá mótar ceallra-chumhachtaithe agus modúl fuaime ann. Tá stuáil sna ceithre lapa agus i gcuid den soc.”