SENTENZA TAL-QORTI TAL-ĠUSTIZZJA (it-Tieni Awla)

13 ta’ Ottubru 2022 ( *1 )

“Rinviju għal deċiżjoni preliminari – Sigurtà soċjali tal-ħaddiema migranti – Regolament (KE) Nru 883/2004 – Artikolu 11(3)(a) u (e) – Persuna residenti fi Stat Membru u li teżerċita attività bħala persuna impjegata fi Stat Membru ieħor – Kuntratt(i) ta’ xogħol konkluż(i) ma’ aġenzija għal xogħol temporanju waħda – Missjonijiet ta’ xogħol temporanju – Intervalli – Determinazzjoni tal-leġiżlazzjoni applikabbli matul l-intervalli bejn il-missjonijiet ta’ xogħol temporanju – Tmiem tar-relazzjoni ta’ xogħol”

Fil-Kawża C‑713/20,

li għandha bħala suġġett talba għal deċiżjoni preliminari abbażi tal-Artikolu 267 TFUE, imressqa miċ-Centrale Raad van Beroep (il-Qorti tal-Appell tas-Sigurtà Soċjali u tas-Servizz Pubbliku, Il-Pajjiżi l-Baxxi), permezz ta’ deċiżjoni tas‑17 ta’ Diċembru 2020, li waslet fil-Qorti tal-Ġustizzja fl‑24 ta’ Diċembru 2020, fil-proċedura

Raad van bestuur van de Sociale verzekeringsbank,

vs

X,

u

Y

vs

Raad van bestuur van de Sociale verzekeringsbank,

IL-QORTI TAL-ĠUSTIZZJA (it-Tieni Awla),

komposta minn A. Prechal, President tal-Awla, M. L. Arastey Sahún, F. Biltgen (Relatur), N. Wahl u J. Passer, Imħallfin,

Avukat Ġenerali: G. Pitruzzella,

Reġistratur: A. Calot Escobar,

wara li rat il-proċedura bil-miktub,

wara li kkunsidrat l-osservazzjonijiet ippreżentati:

–

għar-Raad van bestuur van de Sociale verzekeringsbank, minn G. J. Oudenes u H. van der Most, bħala aġenti,

–

għall-Gvern tal-Pajjiżi l-Baxxi, minn M. K. Bulterman u P. Huurnink, bħala aġenti,

–

għall-Kummissjoni Ewropea, minn D. Martin u F. van Schaik, bħala aġenti,

wara li semgħet il-konklużjonijiet tal-Avukat Ġenerali ppreżentati matul is-seduta tas‑17 ta’ Marzu 2022,

tagħti l-preżenti

Sentenza

1

It-talba għal deċiżjoni preliminari tirrigwarda l-interpretazzjoni tal- Artikolu 11(3)(a) u (e) tar-Regolament (KE) Nru 883/2004 tal-Parlament Ewropew u tal-Kunsill tad‑29 ta’ April 2004 dwar il-kordinazzjoni ta’ sistemi ta’ sigurtà soċjali (ĠU Edizzjoni Speċjali bil-Malti, Kapitolu 5, Vol. 5, p. 72).

2

Din it-talba tressqet fil-kuntest ta’ żewġ tilwimiet, għall-ewwel waħda, bejn ir-Raad van bestuur van de Sociale verzekeringsbank (il-Bord tad-Diretturi tal-Bank tal-Assigurazzjonijiet Soċjali, il-Pajjiżi l-Baxxi) (iktar ’il quddiem is-“SVB”) u X, u, għat-tieni waħda, bejn Y u s-SVB dwar ir-rifjut ta’ dan tal-aħħar li jagħti lil X u lil Y benefiċċji soċjali abbażi tal-iskema tas-sigurtà soċjali tal-Pajjiżi l-Baxxi.

Il‑kuntest ġuridiku

Id‑dritt tal‑Unjoni

3

L-għan tar-Regolament Nru 883/2004, li daħal fis-seħħ fl‑20 ta’ Mejju 2004, huwa l-koordinazzjoni tal-iskemi nazzjonali ta’ sigurtà soċjali. Konformement mal-Artikolu 91 tiegħu, dan huwa applikabbli b’effett mid-data tad-dħul fis-seħħ tar-Regolament (KE) Nru 987/2009 tal-Parlament Ewropew u tal-Kunsill tas‑16 ta’ Settembru 2009 li jistabbilixxi l-proċedura għall-implimentazzjoni tar-Regolament Nru 883/2004 (ĠU 2009, L 284, p. 1), jiġifieri l‑1 ta’ Mejju 2010.

4

L-Artikolu 1 tar-Regolament Nru 883/2004 jistipula:

“Għall-għanijiet ta’ dan ir-Regolament:

a)

‘attività bħala persuna impjegata’ tfisser kwalunkwe attività jew sitwazzjoni ekwivalenti meqjusa bħala attività għall-għanijiet tal-leġislazzjoni dwar is-sigurtà soċjali ta’ l-Istat Membru li fih teżisti din l-attività jew sitwazzjoni ekwivalenti;

b)

‘attività bħala persuna li taħdem għal rasha’ tfisser kwalunkwe attività jew sitwazzjoni ekwivalenti meqjusa bħala attività għall-għanijiet tal-leġislazzjoni dwar is-sigurtà soċjali ta’ l-Istat Membru li fih teżisti din l-attività jew sitwazzjoni ekwivalenti

[…]”.

5

It-Titolu II ta’ dan ir-regolament, intitolat “Determinazzjoni ta’ liema leġislazzjoni tapplika”, jinkludi, b’mod partikolari, l-Artikolu 11 tal-imsemmi regolament, intitolat, min-naħa tiegħu, “Regoli ġenerali”, u li jipprevedi, fil-paragrafi (1) sa (3) tiegħu:

“1.   Il-persuni li għalihom japplika dan ir-Regolament għandhom ikunu suġġetti għal-leġislazzjoni ta’ Stat Membru wieħed biss. Din il-leġislazzjoni għandha tkun determinata skond dan it-Titolu.

2.   Għall-għanijiet ta’ dan it-Titolu, persuni li qegħdin jirċievu benefiċċji fi flus minħabba jew bħala konsegwenza ta’ l-attività tagħhom bħala persuni impjegati jew bħala persuni impjegati għal rashom, għandhom jitqiesu bħallikieku qegħdin iwettqu din l-attività. Dan ma japplikax għal pensjonijiet marbuta ma’ l-invalidità, pensjonijiet ta’ l-età, pensjonijiet tas-superstiti jew għal pensjonijiet marbutin ma inċidenti fuq il-post tax-xogħol jew ma’ mard marbut max-xogħol jew għal benefiċċji fi flus marbutin ma’ mard li jkopru trattament għal perjodu mhux determinat.

3.   Bla ħsara għall-Artikolu 12 sa 16:

a)

persuna li twettaq attività bħala persuna impjegata jew bħala persuna li taħdem għal rasha fi Stat Membru għandha tkun suġġetta għal-leġislazzjoni ta’ dak l-Istat Membru;

b)

persuna impjegata maċ-ċivil għandha tkun suġġetta għal-leġislazzjoni ta’ l-Istat Membru li għalih hija suġġetta l-amministrazzjoni li timpjegah jew li timpjegaha;

ċ)

persuna li tirċievi benefiċċji minħabba li ma taħdimx skond l-Artikolu 65 taħt il-leġislazzjoni ta’ l-Istat Membru fejn għandha r-residenza tagħha, għandha tkun suġġetta għal-leġislazzjoni ta’ dak l-Istat Membru;

d)

persuna msejħa jew imsejħa mill-ġdid biex isservi fil-forzi armati jew biex tagħmel servizz maċ-ċivil fi Stat Membru, għandha tkun suġġetta għal-leġislazzjoni ta’ dak l-Istat Membru;

e)

kull persuna oħra li għaliha ma japplikawx is-subparagrafi (a) sa (d) għandha tkun suġġetta għal-leġislazzjoni ta’ l-Istat Membru fejn għandha r-residenza tagħha: dan iżda mingħajr ħsara għal disposizzjonijiet oħra ta’ dan ir-Regolament li jiggarantixxu benefiċċji taħt il-leġislazzjoni ta’ Stat Membru ieħor jew ta’ Stati Membri oħra.”

Id‑dritt tal‑Pajjiżi l‑Baxxi

L-AOW

6

L-Artikolu 6(1) u (3) tal-Algemene Ouderdomswet (il-Liġi dwar l-assigurazzjoni ġenerali tax-xjuħija), tal‑31 ta’ Mejju 1956 (Stb. 1956, Nru 281), fil-verżjoni tiegħu applikabbli għall-fatti fil-kawża prinċipali (iktar ’il quddiem l-“AOW”), jipprevedi:

“1.   Skont id-dispożizzjonijiet ta’ din il-liġi, persuna għandha tkun assigurata jekk għadha ma għalqitx l-età pensjonabbli u:

a.

hija residenti;

b.

ma hijiex residenti iżda hija suġġetta għat-taxxa fuq id-dħul għax-xogħol imwettaq fil-Pajjiżi l-Baxxi jew fuq il-blata kontinentali.

[…]

3.   B’deroga mill-paragrafi 1 u 2, il-kategorija tal-persuni assigurati tista’ tiġi mwessgħa jew limitata minn miżura amministrattiva ġenerali.”

7

L-Artikolu 6a tal-AOW jistipula:

“Fil-każ ta’ deroga mill-Artikolu 6 u mid-dispożizzjonijiet li jirriżultaw minnu:

a.

għandha titqies bħala assigurata l-persuna li l-assigurazzjoni tagħha skont din il-liġi tirriżulta mill-applikazzjoni tad-dispożizzjonijiet ta’ trattat jew ta’ deċiżjoni ta’ organizzazzjoni internazzjonali;

b.

għandha titqies bħala mhux assigurata l-persuna li għaliha tapplika l-leġiżlazzjoni ta’ Stat ieħor bis-saħħa ta’ trattat jew deċiżjoni ta’ organizzazzjoni internazzjonali.”

8

Mill-Artikolu 13(1) tal-AOW jirriżulta li tnaqqis ta’ 2 % huwa applikabbli fuq l-ammont tal-pensjoni għal kull sena kalendarja li matulha, wara li jkun laħaq l-età ta’ 15-il sena iżda qabel ma jkun laħaq l-età ta’ 65 sena, id-detentur tal-pensjoni ma kienx assigurat.

L-AKW

9

L-Artikolu 6 tal-Algemene Kinderbijslagwet (il-Liġi li Tistabbilixxi Skema Ġenerali tal-Allowances tal-Familja), tas‑26 ta’ April 1962 (Stb. 1962, Nru 160), fil-verżjoni tiegħu applikabbli għall-fatti fil-kawża prinċipali (iktar ’il quddiem l-“AKW”), jirriproduċi, f’termini identiċi. Il-formulazzjoni tal-Artikolu 6 tal-AOW.

10

L-Artikolu 6a tal-AKW jistipula:

“Fil-każ ta’deroga mill-Artikolu 6 u mid-dispożizzjonijiet li jirriżultaw minnu:

a)

għandha titqies wkoll bħala assigurata l-persuna li l-assigurazzjoni tagħha skont din il-liġi tirriżulta mill-applikazzjoni tad-dispożizzjonijiet ta’ trattat jew ta’ deċiżjoni ta’ organizzazzjoni internazzjonali;

b)

għall-għanijiet tal-Kapitolu 3 ta’ din il-liġi, għandha titqies bħala ‘assigurata’ anki persuna li ma hijiex assigurata u li akkwistat dritt għall-allowances tal-familja skont ir-Regolament [Nru 883/2004];

c)

ma għandhiex titqies bħala assigurata l-persuna li hija suġġetta għal-leġiżlazzjoni ta’ Stat ieħor bis-saħħa ta’ trattat jew ta’ deċiżjoni ta’ organizzazzjoni internazzjonali.”

Il-BUB

11

L-Artikolu 6 tal-Besluit uitbreiding en beperking kring verzekerden volksverzekeringen 1999 (id-Digriet tal‑1999 li jestendi u li jillimita l-kategorija ta’ persuni assigurati abbażi tal-assigurazzjonijiet soċjali), tal‑24 ta’ Diċembru 1998 (Stb. 1998, Nru 746) (iktar ’il quddiem il-“BUB”), intitolat “Interruzzjoni temporanja tax-xogħol fil-Pajjiżi l-Baxxi”, jipprevedi:

“Persuna li ma tirrisjedix fil-Pajjiżi l-Baxxi, iżda li taħdem esklużivament fil-Pajjiżi l-Baxxi u li x-xogħol tagħha huwa interrott temporanjament, tibqa’ assigurata taħt l-assigurazzjoni soċjali:

a.

għal mard, diżabbiltà, tqala, maternità jew qagħad; jew

b.

minħabba leave, strajk jew lock-out.”

Il‑fatti fil‑kawża prinċipali u d‑domandi preliminari

Il‑kawża relatata ma’ X

12

B’effett mill‑14 ta’ Jannar 2013, X, ċittadina tal-Pajjiżi l-Baxxi residenti fil-Ġermanja, bdiet teżerċita attività bħala persuna impjegata fil-Pajjiżi l-Baxxi permezz ta’ impriża ta’ xogħol temporanju. Il-kuntratt ta’ xogħol konkluż ma’ din l-impriża kien jipprevedi li r-relazzjoni ta’ xogħol kellha tibda fil-mument tal-bidu effettiv tal-missjoni ta’ xogħol u kellha tintemm ipso jure hekk kif, fuq talba tal-impriża utenti, tintemm l-imsemmija missjoni.

13

Fil-kuntest ta’ dan il-kuntratt, X wettqet diversi missjonijiet ta’ xogħol temporanju, b’xi intervalli bejniethom, l-itwal wieħed, mid‑19 ta’ Ottubru 2013 sat‑30 ta’ Marzu 2014 u, l-iqsar perijodi, mill‑20 sal‑25 ta’ Settembru 2014, kif ukoll mit‑23 sat‑28 ta’ Jannar 2015.

14

Matul dawn l-intervalli, X kienet volontarja fil-Pajjiżi l-Baxxi u wettqet kompiti mingħajr remunerazzjoni ta’ kura tal-familja. Hija wettqet ukoll xogħol tad-dar għand uliedha, li għalihom hija rċeviet remunerazzjoni baxxa ħafna.

15

Permezz ta’ deċiżjoni tas‑6 ta’ Lulju 2015, is-SVB, fuq talba ta’ X, ikkomunikalha r-rendikont tad-drittijiet għall-irtirar tagħha abbażi tal-AOW li minnu jirriżulta li, fit‑30 ta’ Jannar 2015, il-persuna kkonċernata kienet ikkostitwixxiet 82 % tal-pensjoni tax-xjuħija kkompletata abbażi tal-AOW. Is-SVB qies, f’dan ir-rigward, li sa fejn hija kienet residenti fil-Ġermanja, X kienet assigurata abbażi tal-iskema tas-sigurtà soċjali tal-Pajjiżi l-Baxxi biss matul il-perijodi li matulhom hija kienet effettivament ħadmet għall-impriża ta’ xogħol temporanju fil-Pajjiżi l-Baxxi iżda mhux matul l-intervalli bejn il-missjonijiet tagħha ta’ xogħol temporanju.

16

Peress li l-ilment tagħha kontra din id-deċiżjoni ġie miċħud bħala infondat permezz ta’ deċiżjoni tas-SVB tal‑21 ta’ Diċembru 2015, X ressqet kawża quddiem ir-rechtbank Amsterdam (il-Qorti ta’ Amsterdam, il-Pajjiżi l-Baxxi).

17

Permezz ta’ sentenza tat‑3 ta’ Ottubru 2016, l-imsemmija qorti ordnat lis-SVB jadotta deċiżjoni ġdida. Hija ddeċidiet, billi għamlet riferiment, b’mod partikolari, għas-sentenza tat‑23 ta’ April 2015, Franzen et (C‑382/13, EU:C:2015:261), li l-intervalli bejn il-missjonijiet ta’ xogħol temporanju mwettqa minn X kellhom jitqiesu bħala perijodi ta’ leave jew ta’ qagħad, fis-sens tal-Artikolu 6 tal-BUB, b’tali mod li, matul l-imsemmija intervalli, X kienet koperta mil-leġiżlazzjoni tal-Pajjiżi l-Baxxi.

18

Is-SVB appella minn din is-sentenza quddiem iċ-Centrale Raad van Beroep (il-Qorti tal-Appell tas-Sigurtà soċjali u tas-Servizz Pubbliku, il-Pajjiżi l-Baxxi), il-qorti tar-rinviju f’din il-kawża.

19

L-imsemmija qorti tar-rinviju tindika li, sa fejn X ma wettqitx perijodi ta’ assigurazzjoni fil-Ġermanja, hija ma tistax tinvoka d-dritt għal pensjoni tax-xjuħija f’dan l-Istat Membru.

Il‑kawża relatata ma’ Y

20

B’effett mis‑16 ta’ Lulju 2007, Y, ċittadin Pollakk residenti mal-familja tiegħu fil-Polonja, beda jeżerċità attività bħala persuna impjegata fil-Pajjiżi l-Baxxi, permezz ta’ impriża ta’ xogħol temporanju li magħha huwa kkonkluda kuntratti ta’ xogħol suċċessivi, b’diversi intervalli bejniethom.

21

Fl‑20 ta’ Lulju 2015, Y ikkonkluda kuntratt ta’ xogħol għal żmien determinat ta’ tmien xhur mal-imsemmija impriża, li kien jipprevedi li, jekk ix-xogħol mal-impriża utenti jintemm, Y ikun obbligat, matul il-perijodu tal-imsemmi kuntratt, li jaċċetta xogħol xieraq ta’ sostituzzjoni u li dan il-kuntratt jintemm jekk huwa jirrifjuta jew jekk ma jkunx iktar dispost li jaħdem. Peress li din l-aħħar każ immaterjalizza ruħu, l-imsemmi kuntratt intemm fil‑31 ta’ Diċembru 2015.

22

Y, li ma kienx ħadem bejn l‑1 ta’ Jannar u s‑7 ta’ Frar 2016, ikkonkluda, fit‑8 ta’ Frar 2016, kuntratt ta’ xogħol ġdid mal-istess impriża.

23

Permezz ta’ deċiżjoni tad‑29 ta’ Marzu 2016, is-SVB informa lil Y li huwa ma kellux dritt għall-allowances tal-familja abbażi tal-iskema tas-sigurtà soċjali tal-Pajjiżi l-Baxxi għax-xahar ta’ Jannar u għal dak ta’ Frar 2016 peress li huwa ma kienx jeżerċità attività professjonali fil-Pajjiżi l-Baxxi l-ewwel jum tax-xogħol ta’ kull wieħed minn dawn ix-xhur.

24

Sa fejn l-ilment tiegħu kien ġie miċħud permezz ta’ deċiżjoni tas-SVB tal‑20 ta’ Mejju 2016, Y ressaq rikors quddiem ir-rechtbank Amsterdam (il-Qorti ta’ Amsterdam).

25

Permezz ta’ sentenza tal‑5 ta’ Jannar 2017, dik il-qorti ċaħdet ir-rikors bħala infondat. Hija qieset li l-kuntratt ta’ xogħol tal‑20 ta’ Lulju 2015 kien intemm matul l-intervall ta’ bejn l‑1 ta’ Jannar u s‑7 ta’ Frar 2016 u tippreċiża li ma kienx ġie stabbilit li fil-kuntest ta’ dan il-kuntratt kienu ġie previst leave imħallas jew mingħajr ħlas. Għalhekk, dan l-intervall ma setgħax jikkostitwixxi interruzzjoni temporanja ta’ xogħol, fis-sens tal-Artikolu 6 tal-BUB.

26

Y appella minn din is-sentenza quddiem iċ-Centrale Raad van Beroep (il-Qorti tal-Appell tas-Sigurtà Soċjali u tas-Servizz Pubbliku).

Kunsiderazzjonijiet komuni għaż‑żewġ tilwimiet fil‑kawża prinċipali

27

Il-qorti tar-rinviju tosserva li X u Y kienu assigurati abbażi, rispettivament, tal-AOW u tal-AKW matul il-perijodi li matulhom huma wettqu missjonijiet ta’ xogħol temporanju fil-Pajjiżi l-Baxxi u li t-tilwimiet fil-kawża prinċipali jirrigwardaw il-kwistjoni dwar jekk l-affiljazzjoni tagħhom mas-sigurtà soċjali tal-Pajjiżi l-Baxxi ntemmitx matul l-intervalli bejn l-imsemmija missjonijiet. Dik il-qorti tqis li huwa neċessarju, għal dan il-għan, li tiġi ddeterminata l-leġiżlazzjoni applikabbli matul dawn l-intervalli abbażi tar-Regolament Nru 883/2004.

28

Hija tfakkar, f’dan ir-rigward, li, skont l-Artikolu 11(1) tar-Regolament Nru 883/2004, il-persuni li fir-rigward tagħhom huwa applikabbli dan ir-regolament huma suġġetti biss għal-leġiżlazzjoni ta’ Stat Membru wieħed, leġiżlazzjoni li tiġi ddeterminata konformement mad-dispożizzjonijiet tal-Artikolu 11(3) tal-imsemmi regolament.

29

Il-qorti tar-rinviju tqis li, sabiex l-Artikolu 11(3)(a) tar-Regolament Nru 883/2004 jkun applikabbli, għandu jkun hemm attività jew sitwazzjoni ekwivalenti fis-sens tal-Artikolu 1(a) ta’ dan ir-regolament, li titqies bħala tali għall-applikazzjoni tal-leġiżlazzjoni tas-sigurtà soċjali tal-Istat Membru li fih tiġi eżerċitata din l-attività jew fejn isseħħ is-sitwazzjoni ekwivalenti.

30

Issa, f’dan il-każ, is-sitwazzjonijiet ta’ X u ta’ Y matul l-intervalli bejn il-missjonijiet ta’ xogħol tagħhom ma jikkostitwixxux attivitajiet bħala persuna impjegata, fis-sens tal-Artikolu 1(a) tar-Regolament Nru 883/2004. Fil-fatt, abbażi tad-dritt tal-Pajjiżi l-Baxxi, l-attivitajiet eżerċitati minn X fil-Pajjiżi l-Baxxi matul dawn l-intervalli ma jistgħux jitqiesu bħala attivitajiet bħala persuna impjegata. Bl-istess mod, abbażi tal-imsemmi dritt tal-Pajjiżi l-Baxxi, Y ma kienx eżerċita attività bħala persuna impjegata matul l-imsemmija intervalli għaliex il-kuntratt ta’ xogħol tiegħu kien intemm f’dak iż-żmien. Barra minn hekk, ma kien ġie miftiehem minn qabel ebda leave mingħajr ħlas u l-kuntratt ta’ xogħol tat‑8 ta’ Frar 2016 kien ġie konkluż għal perijodu li jaqbeż id-data ta’ tmiem inizjalment prevista fil-kuntratt ta’ xogħol preċedenti.

31

Il-qorti tar-rinviju tistaqsi, għalhekk, jekk is-sitwazzjonijiet ta’ X u ta’ Y matul l-intervalli bejn il-missjonijiet ta’ xogħol temporanju tagħhom jistgħux jitqiesu bħala “sitwazzjoni[jiet] ekwivalenti”, fis-sens tal-Artikolu 1(a) tar-Regolament Nru 883/2004.

32

Hija tosserva, f’dan ir-rigward, li ma kinitx għadha teżisti relazzjoni ta’ xogħol matul l-intervalli bejn il-missjonijiet ta’ xogħol temporanju ta’ X u ta’ Y, b’tali mod li dawn ma setgħux jitqiesu bħala li kienu, matul dawn il-perijodi, ħaddiema fis-sens tad-dritt tal-Pajjiżi l-Baxxi.

33

Il-qorti tar-rinviju tkompli tesponi, hekk kif jirriżulta mis-sentenza tad‑19 ta’ Settembru 2019, van den Berg et (C‑95/18 u C‑96/18, EU:C:2019:767), l-Istat Membru ta’ impieg ma huwiex obbligat li jissuġġetta għal-leġiżlazzjoni dwar is-sigurtà soċjali lill-ħaddiem migranti residenti fit-territorju ta’ Stat Membru ieħor għall-perijodi li matulhom dan tal-aħħar huwa suġġett, abbażi tat-Titolu II tar-Regolament Nru 883/2004, għal-leġiżlazzjoni dwar is-sigurtà soċjali tal-Istat Membru msemmi l-aħħar, minkejja li l-leġiżlazzjoni tal-Istat Membru ta’ impjieg ma tagħti lil dan il-ħaddiem ebda dritt għal pensjoni tax-xjuħija jew għall-allowances tal-familja. Għaldaqstant, il-fatt li l-persuni kkonċernati ma kellhomx dritt għal benefiċċji simili fl-Istat Membru ta’ residenza tagħhom huwa irrilevanti.

34

Madankollu, il-qorti tar-rinviju għandha dubji dwar jekk il-leġiżlazzjoni applikabbli matul l-intervalli bejn il-missjonijiet ta’ xogħol temporanju ta’ X u ta’ Y għandhiex tiġi ddeterminata abbażi tal-Artikolu 11(3)(e) tar-Regolament Nru 883/2004.

35

Hija ssostni, f’dan ir-rigward, mill-ġurisprudenza tal-Qorti tal-Ġustizzja, b’mod partikolari mill-punt 50 tas-sentenza tat‑23 ta’ April 2015, Franzen et (C‑382/13, EU:C:2015:261), mogħtija fil-kuntest tar-Regolament tal-Kunsill (KEE) Nru 1408/71 tal‑14 ta’ Ġunju 1971 dwar l-applikazzjoni ta’ l-iskemi tas-Sigurtà Soċjali għall-persuni impjegati, għall-persuni li jaħdmu għal rashom u għall-membri tal-familji tagħhom li jiċċaqilqu fil-Komunità, fil-verżjoni tiegħu kif emendata u aġġornata bir-Regolament tal-Kunsill (KE) Nru 118/97 tat‑2 ta’ Diċembru 1996 (ĠU Edizzjoni Speċjali bil-Malti, Kapitolu 5, Vol. 3, p. 3), kif emendat bir-Regolament (KE) Nru 1992/2006 tal-Parlament Ewropew u tal-Kunsill tat‑18 ta’ Diċembru 2006 (ĠU 2006, L 392, p. 1), li hija trasponibbli fil-kuntest tar-Regolament Nru 883/2004, jirriżulta li l-persuni li normalment jeżerċitaw l-attività professjonali tagħhom fi Stat Membru huma koperti mill-kamp ta’ applikazzjoni tal-Artikolu 11(3)(a) tar-Regolament Nru 883/2004 sakemm huma ma jkunux definittivament jew temporanjament temmu din l-attività u li huma jibqgħu suġġetti għal din il-leġiżlazzjoni anki fil-ġranet meta huma ma jeżerċitawx effettivament din l-attività. Għalhekk, iċ-ċirkustanza li teżisti relazzjoni ta’ xogħol ma hijiex deċiżiva f’dan ir-rigward. Il-qorti tar-rinviju ma teskludix, għalhekk, li l-intervalli bejn il-missjonijiet ta’ xogħol temporanju ta’ X u ta’ Y, b’mod partikolari ta’ X, ma jikkostitwixxux effettivament tmiem tal-attività tagħhom bħala persuni impjegati fil-Pajjiżi l-Baxxi. Hija tistaqsi liema huma l-elementi rilevanti li għandhom jittieħdu inkunsiderazzjoni f’dan ir-rigward, b’mod partikolari dwar it-terminu li lil hinn minnu għandu jitqies li persuna li, bħal X, ma għandhiex iktar relazzjoni ta’ xogħol, temmet l-attività tagħha fl-Istat Membru ta’ impieg.

36

Madankollu, il-qorti tar-rinviju tosserva wkoll li mill-punt 51 tal-imsemmija sentenza jirriżulta li persuna hija l-ewwel u qabel kollox suġġetta għal-leġiżlazzjoni tal-Istat ta’ residenza jekk hija ma teżerċitax xogħol bi ħlas u ma għandhiex relazzjoni ta’ xogħol, anki jekk hija temmet biss temporanjament l-attività tagħha fl-Istat ta’ impieg, fejn l-unika eċċezzjoni hija meta l-persuna kkonċernata tirċievi benefiċċju fis-sens tal-Artikolu 11(2) tar-Regolament Nru 883/2004.

37

Fid-dawl ta’ dawn l-elementi, iċ-Centrale Raad van Beroep (il-Qorti tal-Appell tas-Sigurtà Soċjali u tas-Servizz Pubbliku) iddeċidiet li tissospendi l-proċeduri quddiemha u li tagħmel lill-Qorti tal-Ġustizzja d-domandi preliminari li ġejjin:

“1)

L-Artikolu 11(3)(a) tar-Regolament [Nru 883/2004] għandu jiġi interpretat fis-sens li l-ħaddiem li jirrisjedi fi Stat Membru u jaħdem fit-territorju ta’ Stat Membru ieħor abbażi ta’ kuntratt ta’ xogħol temporanju li jipprevedi li r-relazzjoni ta’ xogħol tintemm mat-tmiem tal-missjoni u hija sussegwentement stabbilita mill-ġdid, jibqa’ suġġett, fil-perijodi bejn wieħed u l-ieħor, għal-leġiżlazzjoni ta’ dan l-aħħar Stat Membru, sakemm ma jkunx waqaf temporanjament minn dan ix-xogħol?

2)

Liema huma l-fatturi rilevanti sabiex jiġi evalwat, f’tali każijiet, jekk kienx hemm jew le waqfien temporanju mill-attività tiegħu?

3)

Wara liema perijodu ta’ żmien ħaddiem li ma għadx għandu relazzjoni kuntrattwali ta’ xogħol għandu, ħlief meta jeżistu indikazzjonijiet kuntrarji konkreti, jitqies li jkun waqqaf temporanjament l-attività tiegħu fl-Istat ta’ impjieg?”

Fuq id‑domandi preliminari

38

Permezz tat-tliet domandi preliminari tagħha, li għandhom jiġu eżaminati flimkien, il-qorti tar-rinviju tistaqsi, essenzjalment, jekk l-Artikolu 11(3)(a) u (e) tar-Regolament Nru 883/2004 għandux jiġi interpretat fis-sens li persuna residenti fi Stat Membru u li twettaq, permezz ta’ impriża ta’ xogħol temporanju stabbilita fi Stat Membru ieħor, missjonijiet ta’ xogħol temporanju fit-territorju ta’ dan l-Istat Membru l-ieħor hija suġġetta, matul l-intervalli bejn l-imsemmija missjonijiet ta’ xogħol temporanju, għal-leġiżlazzjoni nazzjonali tal-Istat Membru tagħha ta’ impieg jew inkella fis-sens li tali persuna hija suġġetta, matul l-imsemmija intervalli, għal-leġiżlazzjoni nazzjonali tal-Istat Membru tagħha ta’ residenza.

39

Skont ġurisprudenza stabbilita, id-dispożizzjonijiet tat-Titolu II tar-Regolament Nru 883/2004, li fosthom hemm l-Artikolu 11(3) tiegħu, jikkostitwixxu sistema sħiħa u uniformi ta’ regoli dwar il-kunflitt tal-liġijiet li l-għan tagħhom huwa li jissuġġettaw lill-ħaddiema li jiċċaqilqu fi ħdan l-Unjoni għall-iskema ta’ sigurtà soċjali ta’ Stat Membru wieħed biss, b’tali mod li jiġu evitati l-kumuli ta’ leġiżlazzjonijiet nazzjonali applikabbli u l-komplikazzjonijiet li jistgħu jirriżultaw minn dan (ara, f’dan is-sens, is-sentenza tal‑20 ta’ Mejju 2021, FORMAT Urządzenia i Montaże Przemysłowe, C‑879/19, EU:C:2021:409, punt 30 u l-ġurisprudenza ċċitata).

40

Għal dan il-għan, l-Artikolu 11(3)(a) tar-Regolament Nru 883/2004 jimponi l-prinċipju li jgħid li l-persuna li teżerċita attività bħala persuna impjegata jew bħala persuna li taħdem għal rasha fi Stat Membru hija suġġetta għal-leġiżlazzjoni fil-qasam tas-sigurtà soċjali ta’ dan l-Istat Membru.

41

Hekk kif osserva l-Avukat Ġenerali fil-punt 63 tal-konklużjonijiet tiegħu, l-eżistenza ta’ tali relazzjoni ta’ xogħol tkun irrilevanti biss fil-każ tal-possibbiltà eċċezzjonali prevista fl-Artikolu 11(2) tar-Regolament Nru 883/2004, li tassimila lill-persuni li jwettqu attività bħala persuna impjegata jew bħala persuna li taħdem għal rasha ma’ dawk li jirċievu benefiċċju fi flus għal jew bħala konsegwenza ta’ tali attività.

42

Issa, f’dan il-każ, mid-deċiżjoni tar-rinviju jirriżulta li, matul l-intervalli bejn il-missjonijiet tagħhom ta’ xogħol temporanju, X u Y ma bbenefikawx mill-vantaġġi msemmija fl-Artikolu 11(2) tar-Regolament Nru 883/2004.

43

Għandu, għalhekk, jiġi ddeterminat jekk X u Y għandhomx jitqiesu bħala li eżerċitaw, matul l-imsemmija intervalli, attività bħala persuna impjegata jew bħala persuna li taħdem għal rasha, fis-sens tal-Artikolu 11(3)(a) tar-Regolament Nru 883/2004.

44

F’dan ir-rigward, għandu jitfakkar li l-Artikolu 1(a) tar-Regolament Nru 883/2004 jiddefinixxi t-termini “attività bħala persuna impjegata” bħala attività jew sitwazzjoni ekwivalenti meqjusa bħala attività għall-għanijiet tal-leġislazzjoni dwar is-sigurtà soċjali ta’ l-Istat Membru li fih teżisti din l-attività jew sitwazzjoni ekwivalenti.

45

F’dan il-każ, mill-proċess għad-dispożizzjoni tal-Qorti tal-Ġustizzja jirriżulta li X kienet teżerċita l-attività tagħha fuq il-bażi ta’ kuntratt ta’ xogħol temporanju għal żmien determinat, li kien jinkludi klawżola li abbażi tagħha r-relazzjoni ta’ xogħol tibda meta hija effettivament tibda l-attività tagħha u tispiċċa meta din l-attività tintemm. Minn dan isegwi li, matul l-intervalli bejn il-missjonijiet tagħha ta’ xogħol temporanju, ma kinitx teżisti relazzjoni ta’ xogħol bejn X u l-impriża ta’ xogħol temporanju.

46

Barra minn hekk, għalkemm, matul dawn l-intervalli, X kienet iskritta ma’ diversi impriżi ta’ xogħol temporanju tal-Pajjiżi l-Baxxi, hija ma wettqet ebda missjoni ta’ xogħol temporanju f’isem dawn tal-aħħar. Fir-rigward tal-attivitajiet ta’ volontarjat u tax-xogħol tad-dar li X wettqet fil-Pajjiżi l-Baxxi matul l-imsemmija intervalli, huwa biżżejjed li jiġi osservat li dawn ma jistgħux, skont il-qorti tar-rinviju, jitqiesu bħala attività bħala persuna impjegata jew sitwazzjoni ekwivalenti, fis-sens tal-leġiżlazzjoni tal-Pajjiżi l-Baxxi.

47

F’dak li jirrigwarda Y, mid-deċiżjoni tar-rinviju jirriżulta li dan kien eżerċita l-attività tagħha f’isem impriża ta’ xogħol temporanju permezz ta’ kuntratt ta’ xogħol għal żmien determinat li beda fl‑20 ta’ Lulju 2015 u ntemm fil‑31 ta’ Diċembru 2015 u li ma’ din l-istess impriża huwa kkonkluda kuntratt ġdid ta’ xogħol li beda fit‑8 ta’ Frar 2016. Għalhekk, matul l-intervall bejn dawn iż-żewġ kuntratti, jiġifieri mill‑1 ta’ Jannar 2016 sas‑7 ta’ Frar 2016, ir-relazzjoni ta’ xogħol bejn Y u l-impriża ta’ xogħol temporanju kienet intemmet.

48

Minn dan isegwi li, minħabba t-tmiem tal-attività professjonali tagħhom, X u Y ma kinux jeżerċitaw, matul l-intervalli bejn il-missjonijiet tagħhom ta’ xogħol temporanju, attività bħala persuna impjegata u lanqas ma kienu jinsabu f’sitwazzjoni ekwivalenti, fis-sens tal-leġiżlazzjoni tal-Pajjiżi l-Baxxi. Konsegwentement, huma ma kinux koperti mill-kamp ta’ applikazzjoni tal-Artikolu 11(3)(a) tar-Regolament Nru 883/2004, b’tali mod li huma ma kinux suġġetti għal-leġiżlazzjoni tal-Pajjiżi l-Baxxi.

49

Din il-konstatazzjoni ma hijiex ikkonfutata mis-sentenza tat‑23 ta’ April 2015, Franzen et (C‑382/13, EU:C:2015:261), li għaliha jagħmlu riferiment il-Kummissjoni u l-qorti tar-rinviju. Fil-fatt, fil-punti 50 u 51 ta’ dik is-sentenza, il-Qorti tal-Ġustizzja ddeċidiet li l-leġiżlazzjoni tal-Istat Membru ta’ impieg tibqa’ applikabbli sakemm il-persuna kkonċernata tibqa’ teżerċita l-attività professjonali tagħha fit-territorju ta’ dan l-Istat Membru iżda li, min-naħa l-oħra, il-persuni li temmew, definittivament jew temporanjament, l-attività professjonali tagħhom huma suġġetti għal-leġiżlazzjoni tal-Istat Membru fejn huma jirrisjedu. minn dan jirriżulta li, hekk kif osserva l-Avukat Ġenerali fil-punti 82 u 84 tal-konklużjonijiet tiegħu, għall-finijiet tal-applikazzjoni tal-leġiżlazzjoni tal-Istat Membru ta’ impieg, l-eżistenza ta’ relazzjoni kontinwa ta’ xogħol hija dejjem neċessarja. Il-modalitajiet konkreti tal-eżerċizzju tal-provvista ta’ xogħol, bħal ma hija ċ-ċirkustanza li x-xogħol jitwettaq part-time jew b’mod okkażjonali jew li l-obbligi konkreti li jirriżultaw minnu huma sospiżi, huma irrilevanti peress li dawn ma jaffettwawx in-natura kontinwa ta’ relazzjoni ta’ xogħol.

50

F’dawn iċ-ċirkustanzi, u fid-dawl tal-konstatazzjoni mwettqa fil-punt 48 ta’ din is-sentenza, matul l-intervalli l-missjonijiet tagħhom ta’ xogħol temporanju, X u Y kienu koperti mill-kamp ta’ applikazzjoni tal-Artikolu 11(3)(e) tar-Regolament Nru 883/2004, li jikkostitwixxi regola residwa, li hija maħsuba sabiex tapplika għall-persuni kollha li jinsabu f’sitwazzjoni li ma hijiex irregolata b’mod speċifiku minn dispożizzjonijiet oħra tal-imsemmi regolament, li jistabbilixxi sistema sħiħa għad-determinazzjoni tal-leġiżlazzjoni applikabbli (ara, f’dan is-sens, is-sentenza tat‑8 ta’ Mejju 2019, Inspecteur van de Belastingdienst, C‑631/17, EU:C:2019:381, punt 31).

51

Fil-fatt, din id-dispożizzjoni tipprevedi li l-persuni l-oħra għajr dawk imsemmija fil-punti (a) sa (d) tal-imsemmi paragrafu huma suġġetti għal-leġiżlazzjoni tal-Istat Membru ta’ residenza, bla ħsara għal dispożizzjonijiet oħra ta’ dan ir-regolament li jiggarantixxulhom benefiċċji abbażi tal-leġiżlazzjoni ta’ Stat Membru jew ta’ diversi Stati Membri. Din tapplika kemm għall-persuni li jkunu definittivament temmu l-attività professjonali tagħhom kif ukoll għal dawk li jkunu temmewha biss temporanjament (ara, b’analoġija, is-sentenza tal‑11 ta’ Novembru 2004, Adanez-Vega, C‑372/02, EU:C:2004:705, punt 24).

52

Issa, f’dan il-każ, is-sitwazzjoni ta’ X u ta’ Y matul l-intervalli bejn il-missjonijiet tagħhom ta’ xogħol temporanju la tikkorrispondi għas-sitwazzjoni prevista fl-Artikolu 11(3)(a) tar-Regolament Nru 883/2004 hekk kif ġie espost fil-punti 45 sa 48 ta’ din is-sentenza, u lanqas għal dawk previsti fl-Artikolu 11(3)(b) sa (d) ta’ dan ir-regolament, sa fejn dawn tal-aħħar jirrigwardaw il-persuni impjegati maċ-ċivil, il-persuni qiegħda u l-persuni msejħa jew imsejħa mill-ġdid biex isservi fil-forzi armati jew biex iwettqu s-servizz ċivili.

53

B’konsegwenza ta’ dan, ir-risposta li għandha tingħata għad-domandi magħmula għandha tkun li l-Artikolu 11(3)(a) u (e) tar-Regolament Nru 883/2004 għandu jiġi interpretat fis-sens li persuna residenti fi Stat Membru u li twettaq, permezz ta’ impriża ta’ xogħol temporanju stabbilita fi Stat Membru ieħor, missjonijiet ta’ xogħol temporanju fit-territorju ta’ dan l-Istat Membru l-ieħor hija suġġetta, matul l-intervalli bejn l-imsemmija missjonijiet ta’ xogħol, għal-leġiżlazzjoni nazzjonali tal-Istat Membru ta’ residenza tagħha, kemm-il darba, skont il-kuntratt temporanju, ir-relazzjoni ta’ xogħol tintemm matul dawn l-intervalli.

Fuq l‑ispejjeż

54

Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija dik il-qorti li għandha tiddeċiedi dwar l-ispejjeż. L-ispejjeż sostnuti għas-sottomissjoni ta’ osservazzjonijiet lill-Qorti tal-Ġustizzja, minbarra dawk tal-imsemmija partijiet, ma jistgħux jitħallsu lura.

 

Għal dawn il-motivi, il-Qorti tal-Ġustizzja (it-Tieni Awla) taqta’ u tiddeċiedi:

 

L-Artikolu 11(3)(a) u (e) tar-Regolament (KE) Nru 883/2004 tal-Parlament Ewropew u tal-Kunsill tad‑29 ta’ April 2004 dwar il-kordinazzjoni ta’ sistemi ta’ sigurtà soċjali,

 

għandu jiġi interpretat fis-sens li:

 

persuna residenti fi Stat Membru u li twettaq, permezz ta’ impriża ta’ xogħol temporanju stabbilita fi Stat Membru ieħor, missjonijiet ta’ xogħol temporanju fit-territorju ta’ dan l-Istat Membru l-ieħor hija suġġetta, matul l-intervalli bejn l-imsemmija missjonijiet ta’ xogħol, għal-leġiżlazzjoni nazzjonali tal-Istat Membru ta’ residenza tagħha, kemm il-darba, skont il-kuntratt temporanju, ir-relazzjoni ta’ xogħol tintemm matul dawn l-intervalli.

 

Firem


( *1 ) Lingwa tal-kawża: l-Olandiż.