20.5.2014   

MT

Il-Ġurnal Uffiċjali tal-Unjoni Ewropea

L 148/21


REGOLAMENT TA' DELEGA TAL-KUMMISSJONI (UE) Nru 527/2014

tat-12 ta' Marzu 2014

li jissupplimenta d-Direttiva (UE) Nru 2013/36/UE tal-Parlament Ewropew u tal-Kunsill fir-rigward tal-istandards tekniċi regolatorji li jispeċifikaw il-klassijiet ta' strumenti li jirriflettu b'mod adegwat il-kwalità kredizja ta' istituzzjoni bħala negozju avvjat u li huma xierqa sabiex jintużaw għall-finijiet ta' remunerazzjoni varjabbli

(Test b'rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva (UE) Nru 2013/36/UE tal-Parlament Ewropew u tal-Kunsill tas-26 ta' Ġunju 2013 dwar l-aċċess għall-attività tal-istituzzjonijiet ta' kreditu u s-superviżjoni prudenzjali tal-istituzzjonijiet ta' kreditu u tad-ditti tal-investiment, li temenda d-Direttiva 2002/87/KE u li tħassar id-Direttivi 2006/48/KE u 2006/49/KE (1), u b'mod partikolari l-Artikolu 94(2) tagħha,

Billi:

(1)

Remunerazzjoni varjabbli mogħtija fi strumenti għandha tippromwovi mmaniġġjar sod u effettiv tar-riskji u ma għandhiex tħeġġeġ it-teħid ta' riskji li jaqbżu l-livell ta' riskju tollerat tal-istituzzjoni. Għaldaqstant, il-klassijiet ta' strumenti li jistgħu jintużaw għall-finijiet tar-remunerazzjoni varjabbli għandhom jallinjaw l-interessi tal-persunal mal-interessi tal-azzjonisti, il-kredituri u partijiet interessati oħrajn billi jipprovdu inċentivi sabiex il-persunal jaġixxi fl-interess fit-tul tal-istituzzjoni u ma jiħux riskji żejda.

(2)

Sabiex jiġi żgurat li hemm rabta soda mal-kwalità kredizja ta' istituzzjoni bħala negozju avvjat, l-istrumenti użati għall-finijiet ta' remunerazzjoni varjabbli għandu jkun fihom avvenimenti skattaturi xierqa għal-likwidazzjoni jew konverżjoni li jnaqqsu l-valur tal-istrumenti f'sitwazzjonijiet fejn tkun tgħarrqet il-kwalità kredizja tal-istituzzjoni bħala negozju avvjat. L-avvenimenti skattaturi użati għall-finijiet ta' remunerazzjoni ma għandhomx jibdlu l-livell ta' subordinazzjoni tal-istrumenti u għalhekk ma għandhomx iwasslu għal skwalifika ta' strumenti tal-Grad 1 jew tal-Grad 2 Addizzjonali bħala strumenti ta' fondi proprji.

(3)

Filwaqt li l-kundizzjonijiet li japplikaw għall-istrumenti tal-Grad 1 u tal-Grad 2 Addizzjonali huma speċifikati fl-Artikoli 52 u 63 tar-Regolament (UE) Nru 575/2013 tal-Parlament Ewropew u tal-Kunsill (2), l-istrumenti l-oħrajn imsemmijin fil-punt (l)(ii) tal-Artikolu 94(1) tad-Direttiva 2013/36/UE li jistgħu jiġu konvertiti bis-sħiħ fi strumenti tal-Grad 1 tal-Ekwità Komuni jew jitniżżlu fil-valur mhumiex soġġetti għal kundizzjonijiet speċifiċi skont dak ir-Regolament peress li ma humiex klassifikati bħala strumenti ta' fondi proprji għal skopijiet prudenzjali. Għalhekk, għandhom jiġu stabbiliti rekwiżiti speċifiċi għal klassijiet differenti ta' strumenti biex jiġi żgurat li huma xierqa sabiex jintużaw għall-finijiet ta' remunerazzjoni varjabbli, filwaqt li tittieħed f'kunsiderazzjoni l-għamla differenti tal-istrumenti. L-użu tal-istrumenti għall-finijiet ta' remunerazzjoni varjabbli ma għandux iżomm minnu nnifsu lill-istrumenti milli jikkwalifikaw bħala fondi proprji ta' istituzzjoni diment li jkunu ssodisfati l-kundizzjonijiet stabbiliti fir-Regolament (UE) Nru 575/2013. It-tali użu lanqas ma għandu jinftiehem huwa stess bħala wieħed li jipprovdi inċentiv ta' tifdija tal-istrument, peress li wara l-perjodi ta' diferiment u retenzjoni b'mod ġenerali l-membri tal-persunal ikunu jistgħu jirċievu fondi likwidi b'mezzi oħrajn apparti tifdija.

(4)

Strumenti Oħrajn jinkludu strumenti tad-dejn mhux fi flus jew strumenti marbutin mad-dejn li ma jikkwalifikawx bħala fondi proprji. Strumenti Oħrajn mhumiex limitati għal strumenti finanzjarji kif definiti fil-punt 50 tal-Artikolu 4(1) tar-Regolament (UE) Nru 575/2013, iżda jistgħu jinkludu wkoll strumenti differenti mhux fi flus, li jistgħu jiġu inklużi fil-ftehimiet bejn l-istituzzjoni u l-membri tal-persunal. Biex jiġi żgurat li dawn l-istrumenti jirriflettu l-kwalità kredizja ta' istituzzjoni bħala negozju avvjat, ir-rekwiżiti adatti għandhom jiżguraw li ċ-ċirkustanzi li fihom it-tali strumenti jitniżżlu fil-valur jew jiġu konvertiti jestendu lil hinn minn sitwazzjonijiet ta' rkupru jew riżoluzzjoni.

(5)

Meta l-istrumenti użati għall-finijiet ta' remunerazzjoni varjabbli jiġu eżerċitati, jinfdew, jiġu riakkwistati jew konvertiti, b'mod ġenerali t-tali tranżazzjonijiet ma għandhomx iżidu l-valur tar-remunerazzjoni mogħtija bil-ħlas tal-ammonti li huma ogħla mill-valur tal-istrument jew billi jiġu konvertiti fi strumenti li għandhom valur ogħla mill-istrument mogħti għall-ewwel. Dan huwa sabiex jiġi żgurat li r-remunerazzjoni ma titħallasx permezz ta' veikoli jew metodi li jħaffu n-nuqqas ta' konformità mal-Artikolu 94(1) tad-Direttiva 2013/36/UE.

(6)

Meta tingħata remunerazzjoni varjabbli u meta l-istrumenti użati għal remunerazzjoni varjabbli jinfdew, jiġu eżerċitati, riakkwistati jew konvertiti, dawk it-tranżazzjonijiet għandhom ikunu bbażati fuq valuri li ġew stabbiliti skont l-istandard kontabilistiku applikabbli. Għalhekk għandha tkun meħtieġa valwazzjoni tal-istrumenti f'dawn is-sitwazzjonijiet kollha sabiex jiġi żgurat li ma jiġux evitati r-rekwiżiti tad-Direttiva 2013/36/UE dwar ir-remunerazzjoni, b'mod partikolari fir-rigward tal-proporzjon bejn il-komponenti varjabbli u fissi tar-remunerazzjoni u l-allinjament mat-teħid ta' riskji.

(7)

L-Artikolu 54 tar-Regolament (UE) Nru 575/2013 jistabbilixxi l-mekkaniżmi ta' tniżżil fil-valur u konverżjoni għal strumenti tal-Grad 1 Addizzjonali. Barra minn hekk, il-punt (l)(ii) tal-Artikolu 94(1) tad-Direttiva 2013/36/UE jeħtieġ li l-Istrumenti l-Oħrajn ikunu jistgħu jiġu konvertiti fi strumenti tal-Grad 1 tal-Ekwità Komuni jew jitniżżlu fil-valur. Peress li l-eżitu ekonomiku ta' konverżjoni jew tniżżil fil-valur ta' Strumenti Oħrajn huwa l-istess bħal dak għal strumenti tal-Grad 1 Addizzjonali, il-mekkaniżmi ta' tniżżil fil-valur jew konverżjoni għal Strumenti Oħrajn għandu jieħu f'kunsiderazzjoni l-mekkaniżmi li japplikaw għal strumenti tal-Grad 1 Addizzjonali, bl-adattamenti biex jieħdu kont tal-fatt li Strumenti Oħrajn ma jikkwalifikawx bħala strumenti tal-fondi proprji minn perspettiva prudenzjali. Strumenti tal-Grad 2 mhumiex soġġetti għal rekwiżiti regolatorji rigward it-tniżżil fil-valur u l-konverżjoni skont ir-Regolament (UE) Nru 575/2013. Biex jiġi żgurat li l-valur tat-tali strumenti kollha, meta użati għal remunerazzjoni varjabbli, jonqos meta tiddgħajjef il-kwalità kredizja tal-istituzzjoni, iridu jiġu speċifikati s-sitwazzjonijiet li fihom tniżżil fil-valur jew konverżjoni tal-istrument ikunu neċessarji. Il-mekkaniżmi ta' tniżżil fil-valur, tlugħ fil-valur u konverżjoni għal Strumenti tal-Grad 2 u Strumenti Oħrajn għandhom jiġu speċifikati sabiex tiġi żgurata applikazzjoni konsistenti.

(8)

Distribuzzjonijiet li ġejjin minn strumenti jistgħu jieħdu diversi forom. Jistgħu jkunu varjabbli jew fissi u jistgħu jitħallsu b'mod perjodiku jew fil-maturità finali ta' strument. B'konformità mal-linji gwida dwar il-politiki u l-prattiki ta' remunerazzjoni maħruġin mill-Kumitat ta' Superviżuri Bankarji Ewropej (3), sabiex jiġi promoss immaniġġjar sod u effettiv tar-riskji ma għandha titħallas ebda distribuzzjoni lill-persunal matul il-perjodi ta' diferiment. Il-membri tal-persunal għandhom jirċievu biss distribuzzjonijiet fir-rigward tal-perjodi ta' wara l-investiment tal-istrument. Għalhekk, huma biss l-istrumenti b'distribuzzjonijiet li jitħallsu b'mod perjodiku lis-sid tal-istrument li huma xierqa sabiex jintużaw bħala remunerazzjoni varjabbli; bonds bla kupun jew strumenti li jżommu l-qligħ ma għandhomx jingħaddu fis-sehem sostanzjali tar-remunerazzjoni li jrid ikun jikkonsisti f'bilanċ tal-istrumenti msemmijin fil-punt (l) tal-Artikolu 94(1) tad-Direttiva 2013/36/UE. Dan għaliex il-persunal jibbenefika matul il-perjodu ta' diferiment minn valuri li jiżdiedu, u dan jista' jinftiehem bħala ekwivalenti għar-riċevuta ta' distribuzzjonijiet.

(9)

Distribuzzjonijiet għoljin ħafna jistgħu jnaqqsu l-inċentiv fit-tul għat-teħid ta' riskji prudenti peress li effettivament iżidu l-parti varjabbli tar-remunerazzjoni. B'mod partikolari, id-distribuzzjonijiet ma għandhomx jitħallsu f'intervalli itwal minn sena peress li dan ikun iwassal għal distribuzzjonijiet li jakkumulaw effettivament matul il-perjodi ta' diferiment u li jitħallsu mal-vestiment tar-remunerazzjoni varjabbli. Akkumulazzjoni ta' distribuzzjonijiet tkun qed tevita l-punt (g) tal-Artikolu 94(1) tad-Direttiva 2013/36/UE rigward il-proporzjon bejn il-komponenti varjabbli u fissi tar-remunerazzjoni u l-prinċipju fil-punt (m) ta' dak l-Artikolu li r-remunerazzjoni pagabbli skont arranġamenti ta' diferiment ma tiġix vestita b'rata ogħla minn bażi prorata. Għaldaqstant, distribuzzjonijiet li jsiru wara l-vestiment tal-istrument ma għandhomx jaqbżu r-rati tas-suq. Dan għandu jiġi żgurat billi jintalab li l-istrumenti użati għar-remunerazzjoni varjabbli, jew l-istrumenti li huma marbutin magħhom, jinħarġu l-iktar għal investituri oħrajn, jew billi jintalab li t-tali strumenti jkunu soġġetti għal limitu massimu fuq id-distribuzzjonijiet.

(10)

Ir-rekwiżiti ta' diferiment u retenzjoni li japplikaw għall-għotjiet ta' remunerazzjoni varjabbli skont l-Artikolu 94(1) tad-Direttiva 2013/36/UE jridu jiġu ssodisfati kull meta jkun urelevanti, inkluż meta l-istrumenti użati għar-remunerazzjoni varjabbli jiġu eżerċitati, jinfdew, jiġu riakkwistati jew konvertiti. Għalhekk, f'dawn is-sitwazzjonijiet l-istrumenti għandhom jitpartu ma' Strumenti tal-Grad 1 Addizzjonali, strumenti tal-Grad 2 u Strumenti Oħrajn li jirriflettu l-kwalità kredizja tal-istituzzjoni bħala negozju avvjat, għandhom karatteristiċi ekwivalenti għal dawk tal-istrument mogħti fil-bidu, u huma tal-istess valur, filwaqt li jiġi kkunsidrat kwalunkwe ammont li tniżżel fil-valur. Meta strumenti li mhumiex strumenti tal-Grad 1 Addizzjonali jkollhom data ta' maturità fissa, għandhom jiġu stabbiliti rekwiżiti minimi għall-maturità li jifdal tat-tali strumenti li taw sabiex jiġi żgurat li huma konsistenti mar-rekwiżiti dwar il-perjodi ta' diferiment u retenzjoni għal remunerazzjoni varjabbli.

(11)

Id-Direttiva 2013/36/UE ma tillimitax il-klassijiet ta' strumenti li jistgħu jintużaw għal remunerazzjoni varjabbli lil klassi speċifika ta' strumenti finanzjarji. Għandu jkun possibbli li jintużaw strumenti sintetiċi jew kuntratti bejn membri tal-persunal u istituzzjonijiet li huma marbutin ma' strumenti tal-Grad 1 u tal-Grad 2 Addizzjonali li jistgħu jiġu konvertiti jew jitniżżlu fil-valur bis-sħiħ. Dan jippermetti sabiex jiddaħħlu kundizzjonijiet speċifiċi fit-termini tat-tali strumenti li japplikaw biss għal strumenti mogħtijin lill-persunal, mingħajr il-bżonn li jiġu imposti kundizzjonijiet fuq investituri oħrajn.

(12)

F'kuntest ta' grupp, il-ħarġiet jistgħu jiġu mmaniġġjati b'mod ċentrali fi ħdan impriża prinċipali. L-istituzzjonijiet fi ħdan it-tali grupp ma jistgħux, għalhekk, dejjem joħorġu strumenti li huma xierqa sabiex jintużaw għall-fini ta' remunerazzjoni varjabbli. Ir-Regolament (UE) Nru 575/2013 jippermetti sabiex strumenti tal-Grad 1 u tal-Grad 2 Addizzjonali maħruġin minn entità fi ħdan il-kamp ta' applikazzjoni tal-konsolidazzjoni jagħmlu parti mill-fondi proprji ta' istituzzjoni soġġetti għal ċerti kundizzjonijiet. Għalhekk, għandu jkun possibbli li tali strumenti jintużaw għall-fini ta' remunerazzjoni varjabbli, diment li jkun hemm rabta ċara bejn il-kwalità kredizja tal-istituzzjoni li tuża dawn l-istrumenti għall-fini ta' remunerazzjoni varjabbli u l-kwalità kredizja tal-emittent tal-istrument. Normalment jista' jiġi supponut li rabta bħal din teżiti bejn impriża prinċipali u sussidjarja. Strumenti oħrajn li mhumiex strumenti tal-Grad 1 u tal-Grad 2 li ma jinħarġux direttament minn istituzzjoni għandhom ikunu kapaċi jintużaw għal remunerazzjoni varjabbli, soġġetti għal kundizzjonijiet ekwivalenti. Strumenti li huma marbutin ma' strumenti ta' referenza maħruġin minn impriżi prinċipali f'pajjiżi terzi u li huma ekwivalenti għal strumenti tal-Grad 1 jew tal-Grad 2 Addizzjonali għandhom ikunu eliġibbli sabiex jintużaw għall-finijiet ta' remunerazzjoni varjabbli jekk l-event skattatur jirreferi għall-istituzzjoni li tuża strument sintetiku bħal dan.

(13)

Dan ir-Regolament huwa msejjes fuq l-abbozzi tal-istandards tekniċi regolatorji sottomessi mill-Awtorità Bankarja Ewropea (ABE) lill-Kummissjoni Ewropea.

(14)

L-ABE organizzat konsultazzjonijiet pubbliċi miftuħin dwar l-abbozzi tal-istandards tekniċi regolatorji, analizzat il-kostijiet u l-benefiċċji relatati potenzjali u talbet l-opinjoni tal-Grupp tal-Partijiet Interessati Bankarji stabbilit skont l-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (4),

ADOTTAT DAN IR-REGOLAMENT:

Artikolu 1

Klassijiet ta' strumenti li jirriflettu b'mod adegwat il-kwalità kredizja ta' istituzzjoni bħala negozju avvjat u li huma xierqa sabiex jintużaw għall-finijiet ta' remunerazzjoni varjabbli

1.   Dawn li ġejjin se jkunu l-klassijiet ta' strumenti li jissodisfaw il-kundizzjonijiet stabbiliti fil-punt (l)(ii) tal-Artikolu 94(1) tad-Direttiva 2013/36/UE:

(a)

klassijiet tal-istrumenti tal-Grad 1 Addizzjonali meta dawk il-klassijiet jissodisfaw il-kundizzjonijiet imsemmija fil-paragrafu 2 u l-Artikolu 2, u jikkonformaw mal-Artikolu 5(9) u l-punt (c) tal-Artikolu 5(13);

(b)

klassijiet tal-istrumenti tal-Grad 2 meta dawk il-klassijiet jissodisfaw il-kundizzjonijiet imsemmija fil-paragrafu 2 u l-Artikolu 3, u jikkonformaw mal-Artikolu 5;

(c)

klassijiet ta' strumenti li jistgħu jiġu konvertiti bis-sħiħ fi strumenti tal-Grad 1 tal-Ekwità Komuni jew li jistgħu jitniżżlu fil-valur u li la huma strumenti tal-Grad 1 u lanqas tal-Grad 2 Addizzjonali (”Strumenti Oħrajn”) fil-każijiet imsemmijin fl-Artikolu 4 meta dawk il-klassijiet jissodisfaw il-kundizzjonijiet imsemmija fil-paragrafu 2 u jikkonformaw mal-Artikolu 5.

2.   Il-klassijiet ta' strumenti msemmijin fil-paragrafu 1 għandhom jissodisfaw il-kundizzjonijiet li ġejjin:

(a)

l-istrumenti ma għandhomx ikunu ggarantiti jew soġġetti għal garanzija li żżid is-senjorità tal-pretensjonijiet tad-detentur;

(b)

meta d-dispożizzjonijiet li jirregolaw strument jippermettu l-konverżjoni tiegħu, dak l-istrument għandu jintuża biss għall-finijiet ta' għoti ta' remunerazzjoni varjabbli meta r-rata jew il-medda ta' konverżjoni tkun stabbilita f'livell li jiżgura li l-valur tal-istrument li fih l-istrument inizjalment mogħi huwa konvertit ma jkunx ogħla mill-valur tal-istrument mogħti inizjalment fi żmien l-għotja tiegħu bħala remunerazzjoni varjabbli;

(c)

id-dispożizzjonijiet li jirregolaw strumenti konvertibbli li jintużaw għall-uniku skop ta' remunerazzjoni varjabbli għandhom jiżguraw li l-valur tal-istrument li fih l-istrument mogħti inizjalment ġie konvertit ma jkunx ogħla mill-valur, fil-ħin ta' dik il-konverżjoni mill-istrument mogħti oriġinalment;

(d)

id-dispożizzjonijiet li jirregolaw l-istrument għandhom jistipulaw li kwalunkwe distribuzzjoni titħallas fuq tal-inqas bażi annwali u titħallas lid-detentur tal-istrument;

(e)

l-istrumenti għandhom jiġu pprezzati bil-valur tagħhom fi żmien l-għoti tal-istrument, skont l-istandard kontabilistiku applikabbli. Il-valwazzjoni għandha tqis il-kwalità kredizja tal-istituzzjoni u għandha tkun soġġetta għal reviżjoni indipendenti;

(f)

id-dispożizzjonijiet li jirregolaw l-istrumenti maħruġin għall-uniku skop ta' remunerazzjoni varjabbli għandhom jeħtieġu t-twettiq ta' valwazzjoni skont l-istandard kontabilistiku applikabbli f'każ li l-istrument jinfeda, jiġi eżerċitat, riakkwistat jew konvertit.

Artikolu 2

Kundizzjonijiet għall-klassijiet tal-istrumenti tal-Grad 1 Addizzjonali

Il-klassijiet tal-istrumenti tal-Grad 1 Addizzjonali għandhom ikunu konformi mal-kundizzjonijiet li ġejjin:

(a)

id-dispożizzjonijiet li jirregolaw l-istrument għandhom jispeċifikaw event skattatur għall-fini tal-punt (n) tal-Artikolu 52(1) tar-Regolament (UE) Nru 575/2013;

(b)

l-event skattatur imsemmi fil-punt (a) iseħħ meta l-proporzjon tal-kapital tal-Grad 1 tal-Ekwità Komuni tal-istituzzjoni li toħroġ l-istrument, imsemmi fil-punt (a) tal-Artikolu 92(1) tar-Regolament (UE) Nru 575/2013, jaqa' taħt livell minn dawn li ġejjin:

(i)

7 %;

(ii)

livell ogħla minn 7 %, meta jkun determinat mill-istituzzjoni u speċifikat fid-dispożizzjonijiet li jirregolaw l-istrument;

(c)

ikun issodisfat wieħed mir-rekwiżiti li ġejjin:

(i)

l-istrumenti jinħarġu għall-uniku skop li jingħataw bħala remunerazzjoni varjabbli u d-dispożizzjonijiet li jirregolaw l-istrument jiżguraw li kwalunkwe distribuzzjoni titħallas b'rata li hija konsistenti mar-rati tas-suq għal strumenti simili maħrġuin mill-istituzzjoni jew mill-istituzzjonijiet ta' għamla, skala, kumplessità u kwalità kredizja paragunabbli u li fi kwalunkwe każ, fiż-żmien li tingħata r-remunerazzjoni, ma tkunx ogħla minn 8 punti perċentwali ogħla mir-rata medja annwali tal-bidla għall-Unjoni ppubblikata mill-Kummissjoni (Eurostat) fl-Indiċijiet Armonizzati tagħha tal-Prezzijiet għall-Konsumatur ippubblikati skont l-Artikolu 11 tar-Regolament tal-Kunsill (KE) Nru 2494/95 (5). Meta l-istrumenti jingħataw lil membri tal-persunal li jwettqu s-sehem predominanti tal-attivitajiet professjonali tagħhm barra l-Unjoni u l-istrumenti jkunu denominati f'munita maħruġa minn pajjiż terz, l-istituzzjonijiet jistgħu jużaw indiċi simili kkalkolat b'mod indipendenti tal-prezzijiet għall-konsumatur fir-rigward ta' dak il-pajjiż terz;

(ii)

fi żmien l-għoti tal-istrumenti bħala remunerazzjoni varjabbli, tal-inqas 60 % tal-istrumenti fil-ħruġ ma nħarġux bħala għotja ta' remunerazzjoni varjabbli u mhumiex miżmuma minn dawn li ġejjin jew minn xi impriża li għandha rabtiet mill-qrib ma' dawn li ġejjin:

—

l-istituzzjoni jew is-sussidjarji tagħha,

—

l-impriża prinċipali tal-istituzzjoni jew is-sussidjarji tagħha,

—

il-kumpanija azzjonarja finanzjarja prinċipali jew is-sussidjarji tagħha,

—

il-kumpannija holding ta' attivitajiet imħallta jew is-sussidjarji tagħha,

—

il-kumpanija azzjonarja finanzjarja mħallta u s-sussidjarji tagħha.

Artikolu 3

Kundizzjonijiet għall-klassijiet tal-istrumenti tal-Grad 2

Il-klassijiet tal-istrumenti tal-Grad 2 għandhom jikkonformaw mal-kundizzjonijiet li ġejjin:

(a)

fi żmien l-għotja tal-istrumenti bħala remunerazzjoni varjabbli, il-perjodu li jifdal qabel il-maturità tal-istrument għandu jkun daqs jew jaqbeż is-somma tal-perjodi ta' diferiment u l-perjodi ta' ritenzjoni li japplikaw għal remunerazzjoni varjabbli fir-rigward tal-għoti ta' dawk l-istrumenti;

(b)

id-dispożizzjonijiet li jirregolaw l-istrument jistipulaw li, malli jseħħ event skattatur, l-ammont prinċipali tal-istrumenti għandu jitniżżel fil-valur fuq bażi permanenti jew temporanja jew inkella l-istrument għandu jiġi konvertit fi strumenti tal-Grad 1 tal-Ekwità Komuni;

(c)

l-event skattatur imsemmi fil-punt (b) iseħħ fejnil-proporzjon tal-kapital tal-Grad 1 tal-Ekwità Komuni tal-istituzzjoni li toħroġ l-istrument, imsemmi fil-punt (a) tal-Artikolu 92(1) tar-Regolament (UE) Nru 575/2013, jaqa' taħt wieħed mil-livelli li ġejjin:

(i)

7 %;

(ii)

livell ogħla minn 7 %, meta jkun determinat mill-istituzzjoni u speċifikat fid-dispożizzjonijiet li jirregolaw l-istrument;

(d)

ikun issodisfat wieħed mir-rekwiżiti fil-punt (c) tal-Artikolu 2.

Artikolu 4

Kundizzjonijiet għall-klassijiet ta' Strumenti Oħrajn

1.   Bil-kundizzjonijiet stipulati fil-punt (c) tal-Artikolu 1(1), Strumenti Oħrajn jissodisfaw il-kundizzjonijiet stabbiliti fil-punt (l)(ii) tal-Artikolu 94(1) tad-Direttiva 2013/36/UE f'kull wieħed mill-każijiet li ġejjin:

(a)

l-Istrumenti l-Oħrajn jissodisfaw il-kundizzjonijiet imsemmijin fil-paragrafu 2;

(b)

l-Istrumenti l-Oħrajn huma marbutin ma' strument tal-Grad 1 jew strument tal-Grad 2 Addizzjonali u jissodisfaw il-kundizzjonijiet imsemmijin fil-paragrafu 3;

(c)

l-Istrumenti l-Oħrajn huma marbutin ma' strument li jkun strument tal-Grad 1 jew strument tal-Grad 2 Addizzjonali iżda għall-fatt li huwa maħruġ minn impriża prinċipali tal-istituzzjoni li hija barra l-kamp ta' applikazzjoni tal-konsolidazzjoni skont il-Kapitolu 2 tat-Titolu II tal-Ewwel Parti tar-Regolament (UE) Nru 575/2013 u l-Istrumenti l-Oħrajn jissodisfaw il-kundizzjonijiet fil-paragrafu 4.

2.   Il-kundizzjonijiet imsemmijin fil-punt (a) tal-paragrafu 1 huma dawn li ġejjin:

(a)

l-Istrumenti l-Oħrajn għandhom jinħarġu direttament jew minn entità inkluża fi ħdan il-konsolidazzjoni tal-grupp skont il-Kapitolu 2 tat-Titolu II tal-Ewwel Parti tar-Regolament (UE) Nru 575/2013, diment li bidla fil-kwalità kredizja tal-emittent tal-istrument tista' tkun raġonevolment mistennija li twassal għal bidla simili fil-kwalità kredizja tal-istituzzjoni billi jintużaw l-Istrumenti l-Oħrajn għall-fini ta' remunerazzjoni varjabbli;

(b)

id-dispożizzjonijiet li jirregolaw l-Istrumenti l-Oħrajn ma jagħtux id-dritt lid-detentur li jħaffef il-pagament skedat tad-distribuzzjonijiet jew il-kapital ħlief fil-każ ta' insolvenza jew il-likwidazzjoni tal-istituzzjoni;

(c)

fi żmien l-għoti tal-Istrumenti l-Oħrajn bħala remunerazzjoni varjabbli, il-perjodu li jifdal qabel il-maturità tal-Istrumenti l-Oħrajn huwa daqs jew jaqbeż is-somma tal-perjodi ta' diferiment u l-perjodi ta' ritenzjoni li japplikaw fir-rigward tal-għoti ta' dawk l-istrumenti;

(d)

id-dispożizzjonijiet li jirregolaw l-istrument jistipulaw li, malli jseħħ event skattatur, l-ammont prinċipali tal-istrumenti jitniżżel fil-valur fuq bażi permanenti jew temporanja jew l-istrument jiġi konvertit fi strumenti tal-Grad 1 tal-Ekwità Komuni;

(e)

l-event skattatur imsemmi fil-punt (d) iseħħ meta l-proporzjon tal-kapital tal-Grad 1 tal-Ekwità Komuni tal-istituzzjoni li toħroġ l-istrument imsemmi fil-punt (a) tal-Artikolu 92(1) tar-Regolament (UE) Nru 575/2013 ikun jaqa' taħt wieħed mil-livelli li ġejjin:

(i)

7 %

(ii)

livell ogħla minn 7 %, meta jkun determinat mill-istituzzjoni u speċifikat fid-dispożizzjonijiet li jirregolaw l-istrument;

(f)

ikun issodisfat wieħed mir-rekwiżiti fil-punt (c) tal-Artikolu 2.

3.   Il-kundizzjonijiet imsemmijin fil-punt (b) tal-paragafu 1 huma dawn li ġejjin:

(a)

l-Istrumenti l-Oħrajn jissodisfaw il-kundizzjonijiet fil-punti (a) sa (e) tal-paragrafu 2;

(b)

l-Istrumenti l-Oħrajn huma marbutin ma' strument tal-Grad 1 jew tal-Grad 2 Addizzjonali maħruġin minn entità inkluża fi ħdan il-konsolidazzjoni tal-grupp skont il-Kapitolu 2 tat-Titolu II tal-Ewwel Parti tar-Regolament (UE) Nru 575/2013 (l-“istrument ta' referenza”);

(c)

fi żmien l-għoti tal-istrument bħala remunerazzjoni varjabbli l-istrument ta' referenza jissodisfa l-kundizzjonijiet tal-punti (c) u (f) tal-paragrafu 2;

(d)

il-valur ta' Strument Ieħor huwa marbut mal-istrument ta' referenza b'tali mod li qatt ma jkun ikbar mill-valur tal-istrument ta' referenza;

(e)

il-valur ta' kwalunkwe distribuzzjoni mħallsa wara l-vestiment tal-Istrument l-Ieħor huwa marbut mal-istrument ta' referenza b'tali mod li d-distribuzzjonijiet imħallsin qatt ma jkunu ikbar mill-valur ta' kwalunkwe distribuzzjoni mħallsa taħt l-istrument ta' referenza;

(f)

id-dispożizzjonijiet li jirregolaw l-Istrumenti l-Oħrajn jipprovdu li jekk l-istrument ta' referenza jiġi eżerċitat, konvertit, riakkwistat jew jinfeda fi ħdan il-perjodu ta' diferiment jew ritenzjoni, l-Istrumenti l-Oħrajn għandhom jintrabtu ma' strument ta' referenza ekwivalenti li jissodisfa l-kundizzjonijiet f'dan l-Artikolu b'tali mod li l-valur totali tal-Istrumenti l-Oħrajn ma jiżdiedx.

4.   Il-kundizzjonijiet imsemmijin fil-punt (c) tal-paragrafu 1 huma dawn li ġejjin:

(a)

l-awtoritajiet kompetenti ddeterminaw għall-fini tal-Artikolu 127 tad-Direttiva 2013/36/UE li l-istituzzjoni li toħroġ l-istrument li miegħu huma marbutin l-istrumenti l-oħrajn hija soġġetta għal superviżjoni konsolidata minn awtorità ta' sorveljanza ta' pajjiż terz li hija ekwivalenti għal dik irregolata mill-prinċipji stipulati f'dik id-Direttiva u r-rekwiżiti tal-Kapitolu 2 tat-Titolu II tal-Ewwel Parti tar-Regolament (UE) Nru 575/2013;

(b)

l-Istrumenti l-Oħrajn jissodisfaw il-kundizzjonijiet imsemmija fil-punti (a) u l-punti (c) sa (f) tal-paragrafu 3.

Artikolu 5

Proċeduri ta' tniżżil fil-valur, tlugħ fil-valur u konverżjoni

1.   Għall-fini tal-punt (b) tal-Artikolu 3 u l-punt (d) tal-Artikolu 4(2), id-dispożizzjonijiet li jirregolaw lstrumenti tal-Grad 2 u Strumenti Oħrajn għandhom ikunu konformi mal-proċeduri u t-twaqqit stipulati fil-paragrafi 2 sa 14 għall-kalkolu tal-proporzjon tal-kapital tal-Grad 1 tal-Ekwità Komuni u l-ammonti li jridu jitniżżlu fil-valur, jittellgħu fil-valur jew jiġu konvertiti. Id-dispożizzjonijiet li jirregolaw l-istrumenti tal-Grad 1 Addizzjonali għandhom jikkonformaw mal-proċeduri stipulati fil-paragrafu 9 u l-punt (c) tal-paragrafu 13 fir-rigward tal-ammonti li jridu jitniżżlu fil-valur, jittellgħu fil-valur jew jiġu konvertiti.

2.   Meta d-dispożizzjonijiet li jirregolaw Strumenti tal-Grad 2 u Strumenti Oħrajn jeħtieġu li l-istrumenti jiġu konvertiti fi strumenti tal-Grad 1 tal-Ekwità Komuni wara li jseħħ event skattatur, dawk id-dispożizzjonijiet għandhom jispeċifikaw waħda minn dawn li ġejjin:

(a)

ir-rata ta' dik il-konverżjoni u limitu fuq l-ammont permess ta' konverżjoni;

(b)

medda li fiha l-istrumenti ser jikkonvertu fistrumenti tal-Grad 1 tal-Ekwità Komuni.

3.   Meta d-dispożizzjonijiet li jirregolaw l-istrumenti jistipulaw li l-ammont prinċipali tagħhom għandu jitniżżel fil-valur meta jseħħ event skattatur, it-tniżżil fil-valur għandu jnaqqas b'mod permanenti jew temporanju dawn kollha li ġejjin:

(a)

il-pretensjoni tad-detentur tal-istrument fl-insolvenza jew il-likwidazzjoni tal-istituzzjoni;

(b)

l-ammont li jrid jitħallas fil-każ tal-eżerċitar jew it-tifdija tal-istrument;

(c)

id-distribuzzjonijiet li saru fuq l-istrument.

4.   Kwalunkwe distribuzzjoni pagabbli wara tniżżil fil-valur għandha tkun imsejsa fuq l-ammont imnaqqas tal-kapital.

5.   Tniżżil fil-valur jew konverżjoni tal-istrumenti għandhom, skont il-qafas kontabilistiku applikabbli, jiġġeneraw entrati li jikkwalifikaw bħala entrati tal-Grad 1 tal-Ekwità Komuni.

6.   Meta l-istituzzjoni tkun stabbilixxiet li l-proporzjon tal-Grad 1 tal-Ekwità Komuni jkun niżel taħt il-livell li jniedi l-konverżjoni jew it-tniżżil fil-valur tal-istrument, il-korp maniġerjali jew kwalunkwe korp relevanti ieħor tal-istituzzjoni għandu jkun meħtieġ jiddetermina bla dewmien li seħħ event skattatur u għandu jkun hemm obbligu irrevokabbli ta' tniżżil fil-valur jew konverżjoni tal-istrument.

7.   L-ammont aggregat tal-istrumenti li huwa meħtieġ li jitniżżel fil-valur jew jiġi konvertit meta jseħħ event skattatur ma għandux ikun inqas mill-inqas wieħed minn fost dawn li ġejjin:

(a)

l-ammont meħtieġ biex il-proporzjon tal-Grad 1 tal-Ekwità Komuni tal-istituzzjoni jitreġġa' lura għall-perċentwal stabbilit bħala avveniment skattatur fid-dispożizzjonijiet li jirregolaw l-istrument;

(b)

l-ammont sħiħ ta' kapital tal-istrument.

8.   Meta jseħħ event skattatur, l-istituzzjonijiet għandhom ikunu meħtieġa jagħmlu dawn li ġejjin:

(a)

jgħarrfu lill-membri tal-persunal li ngħataw l-istrumenti bħala remunerazzjoni varjabbli u l-persuni li jkun għad għandhom it-tali strumenti;

(b)

jniżżlu l-valur tal-ammont ta' kapital tal-istrumenti, jew jikkonvertu l-istrumenti fi strumenti tal-Graad 1 tal-Ekwità Komuni malajr kemm jista' jkun u fi ħdan perjodu massimu ta' xahar skont ir-rekwiżiti stabbiliti f'dan l-Artikolu.

9.   Meta strumenti tal-Grad 1 Addizzjonali, strumenti tal-Grad 2 u Strumenti Oħrajn jinkludu l-istess livell skattatur, l-ammont ta' kapital għandu jitniżżel fil-valur jew jiġi konvertit fuq bażi prorata għad-detenturi kollha tat-tali strumenti li għandhom jintużaw għall-finijiet ta' remunerazzjoni varjabbli.

10.   L-ammont tal-istrument li jrid jitniżżel fil-valur jew jiġi konvertit għandu jkun soġġett għal reviżjoni indipendenti. Ir-reviżjoni għandha titlesta malajr kemm jista' jkun u ma għandhiex toħloq xkiel għall-istituzzjoni sabiex tniżżel fil-valur jew tikkonverti l-istrument.

11.   Istituzzjoni li toħroġ strumenti li jikkonvertu għal Grad 1 tal-Ekwità Komuni meta jseħħ event skattatur għandha tkun meħtieġa tiżgura li l-kapital azzjonarju tagħha jibqa' biżżejjed il-ħin kollu biex jikkonverti t-tali strumenti konvertibbli kollha f'ishma jekk iseħħ event skattatur. L-istituzzjoni għandha tkun meħtieġa jkollha l-ħin kollu l-awtorizzazzjoni minn qabel meħtieġa biex toħroġ l-istrumenti tal-Grad 1 tal-Ekwità Komuni li fihom jiġu konvertiti t-tali strumenti meta jseħħ event skattatur.

12.   Istituzzjoni li toħroġ l-istrumenti li jikkonvertu Grad 1 tal-Ekwità Komuni meta jseħħ event skattatur għandha tkun meħtieġa tiżgurra li ma hemm ebda xkiel proċedurali għal dik il-konverżjoni minħabba l-inkorporazzjoni tagħha jew statuti jew arranġamenti kuntrattwali.

13.   Sabiex it-tniżżil fil-valur ta' strument jitqies temporanju, għandhom jiġu ssodisfati l-kundizzjonijiet kollha li ġejjin:

(a)

tniżżiliet fil-valur għandhom ikunu bbażati fuq profitti wara li l-emittent tal-istrument ikun ħa deċiżjoni formali li tikkonferma l-profitti finali;

(b)

kwalunkwe tniżżil fil-valur tal-istrument jew pagament ta' kupuni fuq l-ammont imnaqqas tal-kapital għandu jiġi operat bid-diskrezzjoni sħiħa tal-istituzzjoni soġġett għar-restrizzjonijiet tal-punti (c), (d), u (e) u l-istituzzjoni m'għandhiex tkun obbligata sabiex topera jew tħaffef tniżżil fil-valur f'ċirkustanzi speċifiċi;

(c)

tniżżil fil-valur għandu jkun operat fuq bażi prorata fost strumenti tal-Grad 1 Addizzjonali, strumenti tal-Grad 2 u Strumenti Oħrajn użati għall-fini ta' remunerazzjoni varjabbli li kienu soġġetti għal tniżżil fil-valur;

(d)

l-ammont massimu li jrid jiġi attrbiwit għas-somma tat-tniżżil fil-valur tal-Istrumenti tal-Grad 2 u Oħrajn flimkien mal-pagament ta' kupuni fuq l-ammont imnaqqas tal-kapital għandu jkun daqs il-profitt tal-istituzzjoni moltiplikat bl-ammont miksub bid-diviżjoni tal-ammont determinat fil-punt (i) bl-ammont determinat fil-punt (ii):

(i)

is-somma tal-ammont nominali tal-istrumenti kollha tal-Grad 2 u strumenti oħrajn tal-istituzzjoni qabel it-tniżżil fil-valur li kienu soġġetti għal tniżżil fil-valur;

(ii)

is-somma tal-fondi proprji u tal-ammont nominali tal-Istrumenti l-Oħrajn użati għall-fini ta' remunerazzjoni varjabbli tal-istituzzjoni;

(e)

is-somma ta' kwalunkwe ammont tat-tniżżil fil-valur u pagamenti ta' kupuni fuq l-ammont imnaqqas tal-kapital għandha tiġi ttrattata bħala pagament li jirriżulta fi tnaqqis tal-Grad 1 tal-Ekwità Komuni u għandha tkun soġġetta, flimkien ma' distribuzzjonijiet oħrajn fuq l-istrumenti tal-Grad 1 tal-Ekwità Komuni, għar-restrizzjonijiet relatati mal-Ammont Massimu Distribwibbli kif stipulat fl-Artikolu 141(2) tad-Direttiva 2013/36/UE.

14.   Għall-finijiet tal-punt (d) tal-paragrafu 13, il-kalkolu għandu jsir fil-waqt li fih jiġi operat it-tniżżil fil-valur.

Artikolu 6

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-12 ta' Marzu 2014.

Għall-Kummissjoni

Il-President

José Manuel BARROSO


(1)   ĠU L 176, 27.6.2013, p. 338.

(2)  Ir-Regolament (UE) Nru 575/2013 tal-Parlament Ewropew u tal-Kunsill tas-26 ta' Ġunju 2013 dwar ir-rekwiżiti prudenzjali għall-istituzzjonijiet ta' kreditu u d-ditti tal-investiment u li jemenda r-Regolament (UE) Nru 648/2012 (ĠU L 176, 27.6.2013, p. 1).

(3)  Kumitat ta' Superviżuri Bankarji Ewropej: Linjigwida dwar il-Prattiki u Politiki ta' Remunerazzjoni tal-10 ta' Diċembru 2010.

(4)  Ir-Regolament (UE) Nru 1093/2010 tal-Parlament Ewropew u tal-Kunsill tal-24 ta' Novembru 2010 li jistabbilixxi Awtorità Superviżorja Ewropea (Awtorità Bankarja Ewropea) u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/78/KE (ĠU L 331, 15.12.2010, p. 12).

(5)  Ir-Regolament tal-Kunsill (KE) Nru 2494/95 tat-23 ta' Ottubru 1995 dwar l-indiċijiet armonizzati tal-prezzijiet għall-konsumatur (ĠU L 257, 27.10.1995, p. 1).