Eagrán sealadach
BREITHIÚNAS NA CÚIRTE (an Chéad Dlísheomra)
18 Meitheamh 2026 (*)
(Tarchur chun réamhrialú – Daoine nádúrtha a chosaint i ndáil le sonraí pearsanta a phróiseáil – Rialachán (AE) 2016/679 – Airteagail 77 agus 79 – Leigheasanna – Beart comhuaineach – An gaol idir gearán a thaisceadh le húdarás maoirseachta náisiúnta agus leigheas breithiúnach a fheidhmiú – Baol cinntí contrártha – Prionsabal na cosanta breithiúnaí éifeachtaí – Neamhspleáchas nós imeachta na mBallstát – Prionsabal na héifeachtachta – Prionsabal na coibhéise)
I gCás C‑414/24,
IARRAIDH ar réamhrialú faoi Airteagal 267 CFAE, ón Verwaltungsgerichtshof (an Chúirt Riaracháin Uachtarach, an Ostair), trí bhreith an 17 Bealtaine 2024, a fuarthas ag an gCúirt an 13 Meitheamh 2024, sna himeachtaí
Datenschutzbehörde,
Dr. G S
idiragraithe:
Bundesministerin für Justiz,
D GmbH,
tugann AN CHÚIRT (an Chéad Dlísheomra),
agus í comhdhéanta mar seo a leanas: F. Biltgen, Uachtarán Dlísheomra, I. Ziemele (Rapóirtéir), A. Kumin, S. Gervasoni agus M. Bošnjak, Breithiúna,
Abhcóide Ginearálta: J. Richard de la Tour,
Cláraitheoir: A. Calot Escobar,
ag féachaint don nós imeachta i scríbhinn,
tar éis breithniú a dhéanamh ar na barúlacha arna dtíolacadh thar ceann na bpáirtithe seo a leanas:
– Datenschutzbehörde, ag M. Schmidl agus E. Wagner,
– Dr. G S, ag S. Binder-Novak, Rechtsanwältin,
– D GmbH, ag S. Korab, Rechtsanwalt,
– Rialtas na hOstaire, ag A. Posch, J. Schmoll agus C. Gabauer, i gcáil Gníomhairí,
– Rialtas na hIodáile, ag S. Fiorentino, i gcáil Gníomhaire, le cúnamh ó E. De Bonis, avvocato dello Stato,
– Rialtas na hUngáire, ag Zs. Biró-Tóth agus M. Z. Fehér, i gcáil Gníomhairí,
– an Coimisiún Eorpach, ag A. Bouchagiar, M. Heller agus H. Kranenborg, i gcáil Gníomhairí,
tar éis éisteacht le Tuairim an Abhcóide Ghinearálta ag éisteacht an 4 Meán Fómhair 2025,
an Breithiúnas seo a leanas:
Breithiúnas
1 Baineann an iarraidh ar réamhrialú le léiriú Airteagail 77 agus 79 de Rialachán (AE) 2016/679 ó Pharlaimint na hEorpa agus ón gComhairle an 27 Aibreán 2016 maidir le daoine nádúrtha a chosaint i ndáil le sonraí pearsanta a phróiseáil agus maidir le saorghluaiseacht sonraí den sórt sin, agus lena n‑aisghairtear Treoir 95/46/CE (an Rialachán Ginearálta maidir le Cosaint Sonraí) (IO 2016 L 119, lch. 1, ‘RGCS’).
2 Rinneadh an iarraidh seo in imeachtaí idir Dr. G S agus an Datenschutzbehörde (an tÚdarás um Chosaint Sonraí, an Ostair) (‘DSB’) maidir le diúltú an údaráis sin don ghearán a thaisc Dr. G S, ar bhonn sárú líomhnaithe ar a ceart go ndéanfar sonraí pearsanta a bhaineann léi a chosaint, ar an bhforas gur thionscain an duine lena mbaineann imeachtaí roimhe sin a bhaineann leis an ábhar céanna agus atá fós ar feitheamh os comhair na cúirte ar tugadh na himeachtaí os a comhair.
An dlí lena mbaineann
Dlí an Aontais Eorpaigh
3 Foráiltear le haithrisí 10, 11, 129 agus 141 de RGCS mar seo a leanas:
‘(10) Chun leibhéal comhsheasmhach cosanta agus ardleibhéal cosanta a áirithiú do dhaoine nádúrtha agus chun na bacainní ar shreabhadh sonraí pearsanta laistigh den Aontas a bhaint, ba cheart an leibhéal céanna cosanta a bheith i ngach Ballstát do chearta agus saoirsí daoine nádúrtha i ndáil le próiseáil sonraí den sórt sin. Ba cheart a áirithiú go gcuirtear na rialacha maidir le cosaint ceart bunúsach agus saoirsí bunúsacha daoine nádúrtha i bhfeidhm go comhsheasmhach agus go haonchineálach ar fud an Aontais i ndáil le sonraí pearsanta a phróiseáil. [...]
(11) D’fhonn sonraí pearsanta a chosaint go héifeachtach ar fud an Aontais, tá gá le cearta na n‑ábhar sonraí agus oibleagáidí na ndaoine sin a dhéanann sonraí pearsanta a phróiseáil, nó a chinneann an phróiseáil sin a dhéanamh, a neartú agus a shoiléiriú [...]
[...]
(129) D'fhonn faireachán agus forfheidhmiú comhsheasmhach an Rialacháin seo a áirithiú ar fud an Aontais, ba cheart na cúraimí céanna agus na cumhachtaí éifeachtacha céanna a bheith ag na húdaráis mhaoirseachta i ngach Ballstát, lena n‑áirítear cumhachtaí imscrúdaithe, cumhachtaí ceartaitheacha agus pionóis, agus cumhachtaí údaraithe agus comhairliúcháin, go háirithe i gcásanna gearán ó dhaoine nádúrtha, agus gan dochar do chumhachtaí na n‑údarás ionchúisimh faoi dhlí Ballstáit, chun na húdaráis bhreithiúnacha a chur ar an eolas faoi aon sárú a dhéantar ar an Rialachán seo agus chun imeachtaí dlíthiúla a thionscnamh. Ba cheart a áireamh ar chumhachtaí den sórt sin freisin an chumhacht teorainn shealadach nó teorainn bhuan, lena n‑áirítear toirmeasc, a fhorchur ar phróiseáil. Féadfaidh na Ballstáit cúraimí eile a shonrú a bhaineann le cosaint sonraí pearsanta faoin Rialachán seo. Maidir leis na cumhachtaí sin atá ag na húdaráis mhaoirseachta, ba cheart iad a fheidhmiú i gcomhréir le coimircí iomchuí nós imeachta a leagtar amach i ndlí an Aontais agus i ndlí Ballstáit, ar bhealach atá neamhchlaon agus cóir agus laistigh de thréimhse réasúnach ama. Ba cheart, go háirithe, gach beart a bheith iomchuí, riachtanach agus comhréireach d'fhonn a áirithiú go gcomhlíontar an Rialacháin seo, agus aird á tabhairt ar dhálaí gach cáis faoi leith, an ceart atá gach duine chun éisteacht a fháil a urramú sula nglactar aon bheart aonair a dhéanfadh dochar dó nó di agus costais iomarcacha agus míchaoithiúlachtaí thar meán a sheachaint do na daoine lena mbaineann. Ba cheart cumhachtaí imscrúdaithe a bhaineann le rochtain ar áitreabh a fheidhmiú i gcomhréir le ceanglais shonracha i ndlí nós imeachta Ballstáit, amhail an ceanglas maidir le réamhúdarú breithiúnach a fháil. Maidir le gach beart a dhéanann an t‑údarás maoirseachta atá ceangailteach de réir dlí, ba cheart dó a bheith i scríbhinn agus a bheith soiléir agus gan athbhrí, ba cheart a shonrú leis an t‑údarás maoirseachta a d'eisigh an beart agus dáta eisiúna an bhirt, ba cheart é a bheith sínithe ag ceannaire an údaráis mhaoirseachta nó ag comhalta de chuid an údaráis mhaoirseachta arna údarú ag an gceannaire, ba cheart na cúiseanna leis an mbeart a thabhairt, agus ba cheart freisin tagairt a dhéanamh don cheart chun leigheas éifeachtach a fháil. Níor cheart, leis an méid sin, cosc a chur ar cheanglais bhreise de bhun dlí nós imeachta Ballstáit. Le cinneadh ceangailteach de réir dlí a ghlacadh, tugtar le tuiscint go bhféadfadh sé a bheith ina chúis le hathbhreithniú breithiúnach i mBallstát an údaráis mhaoirseachta a ghlac an cinneadh.
[...]
(141) Ba cheart an ceart a bheith ag gach ábhar sonraí gearán a thaisceadh le húdarás maoirseachta aonair, go háirithe sa Bhallstát sin ina bhfuil gnáthchónaí air nó uirthi, agus ba cheart an ceart chun leigheas breithiúnach éifeachtach a fháil a bheith aige nó aici i gcomhréir le hAirteagal 47 den [Chairt um Chearta Bunúsacha an Aontais Eorpaigh, [‘an Chairt’] má mheasann an t‑ábhar sonraí go bhfuil a chearta nó a cearta faoin Rialachán seo á sárú nó mura ngníomhaíonn an t‑údarás maoirseachta i leith gearáin, má dhiúltaíonn sé do ghearán go páirteach nó go hiomlán nó má dhíbheann sé go páirteach nó go hiomlán é nó mura ngníomhaíonn sé i gcás inar gá dul i mbun gníomhaíocht den sórt sin chun cearta an ábhair sonraí a chosaint [...] Ba cheart an t‑imscrúdú i ndiaidh gearáin a dhéanamh, faoi réir athbhreithniú breithiúnach, a mhéid is iomchuí sa chás sonrach sin. Ba cheart don údarás maoirseachta an t‑ábhar sonraí a chur ar an eolas faoin dul chun cinn a dhéantar maidir leis an ngearán agus faoi thoradh an ghearáin laistigh de thréimhse réasúnta.
[…]’
4 Foráiltear le hAirteagal 17(1)(d) de RGCS, dar teideal ‘An ceart go ndéanfaí léirscriosadh (“an ceart go ndéanfaí ligean i ndearmad”)’ mar seo a leanas:
‘Beidh sé de cheart ag an ábhar sonraí go léirscriosfaidh an rialaitheoir sonraí pearsanta a bhaineann leis nó léi gan mhoill mhíchuí agus beidh sé d'oibleagáid ar an rialaitheoir sonraí pearsanta a léirscriosadh gan mhoill mhíchuí i gcás go mbeidh feidhm ag ceann de na forais seo a leanas:
[...]
(d) rinneadh próiseáil mhídhleathach ar na sonraí pearsanta;’
5 Áirítear i gCaibidil VI de RGCS, dar teideal ‘Údaráis mhaoirseachta neamhspleácha’, Airteagail 51 go 59.
6 Foráiltear le hAirteagal 57(1)(f) den Chaibidil sin, dar teideal ‘Cúraimí’, mar seo a leanas:
‘Gan dochar do chúraimí eile a leagtar amach faoin Rialachán seo, déanfaidh gach údarás maoirseoireachta an méid seo a leanas ina chríoch féin:
[...]
(f) láimhseálfaidh sé gearáin arna dtaisceadh ag ábhar sonraí, nó ag comhlacht, eagraíocht nó comhlachas i gcomhréir le hAirteagal 80, agus déanfaidh sé imscrúdú, a mhéid is iomchuí, ar ábhar an ghearáin agus cuirfidh sé an gearánaí ar an eolas maidir leis an dul chun cinn agus maidir le toradh an imscrúdaithe laistigh de thréimhse réasúnta, go háirithe más gá imscrúdú breise a dhéanamh nó más gá comhordú a dhéanamh le húdarás maoirseachta eile.
7 Foráiltear le hAirteagal 58(2) de RGCS, dar teideal ‘Cumhachtaí’ mar seo a leanas:
‘Beidh na cumhachtaí ceartaitheacha uile seo a leanas ag gach údarás maoirseachta:
(a) fógraí rabhaidh a thabhairt do rialaitheoir nó do phróiseálaí ina gcuirtear in iúl gur dóchúil go sárófar forálacha an Rialacháin seo leis na hoibríochtaí próiseála a bheartaítear;
(b) iomarduithe a eisiúint do rialaitheoir nó do phróiseálaí i gcás ina bhfuil oibríochtaí próiseála tar éis forálacha an Rialacháin seo a shárú;
(c) ordú a thabhairt don rialaitheoir nó don phróiseálaí iarrataí an ábhair sonraí a chomhlíonadh maidir lena chearta a fheidhmiú de bhun an Rialacháin seo;
(d) ordú a thabhairt don rialaitheoir nó don phróiseálaí oibríochtaí próiseála a chur i gcomhréir le forálacha an Rialacháin seo agus, nuair is iomchuí, ar bhealach sonraithe agus laistigh de thréimhse shonraithe;
(e) ordú a thabhairt don rialaitheoir sárú i ndáil le sonraí pearsanta a chur in iúl don ábhar sonraí;
(f) teorainn shealadach nó bhuan a fhorchur lena n‑áirítear cosc ar phróiseáil;
(g) ordú a thabhairt go ndéanfaí sonraí pearsanta a cheartú nó a léirscriosadh nó go ndéanfaí próiseáil a shrianadh de bhun Airteagal 16, Airteagal 17 agus Airteagal 18 agus go gcuirfí na faighteoirí ar nochtadh na sonraí pearsanta sin dóibh ar an eolas faoi na gníomhaíochtaí sin de bhun Airteagal 17(2) agus Airteagal 19;
(h) deimhniú a tharraingt siar nó ordú a thabhairt don chomhlacht deimhniúcháin deimhniú a tharraingt siar ar deimhniú é a eisíodh de bhun Airteagal 42 agus Airteagal 43, nó ordú a thabhairt don chomhlacht deimhniúcháin gan deimhniú a eisiúint mura bhfuil na ceanglais don deimhniú á gcomhlíonadh nó mura bhfuil siad á gcomhlíonadh a thuilleadh;
(i) fíneáil riaracháin a ghearradh de bhun Airteagal 83, de bhreis ar na bearta dá dtagraítear sa mhír seo nó ina n‑ionad, ag brath ar dhálaí gach cáis faoi leith; agus
(j) ordú a thabhairt sreabha sonraí chuig faighteoir i dtríú tír nó chuig eagraíocht idirnáisiúnta a fhionraí.’
8 I gCaibidil VIII de RGCS, dar teideal ‘Leigheasanna, dliteanas agus pionóis’, atá Airteagail 77 go 84 den Rialachán sin.
9 Foráiltear le hAirteagal 77 de RGCS, dar teideal ‘An ceart chun gearán a thaisceadh le húdarás maoirseachta’ mar seo a leanas:
‘1. Gan dochar d’aon leigheas riaracháin nó breithiúnach eile, beidh sé de cheart ag gach ábhar sonraí gearán a thaisceadh le húdarás maoirseachta, go háirithe sa Bhallstát ina bhfuil gnáthchónaí air nó uirthi, ina (h)áit oibre nó áit an tsáraithe a líomhnaítear, má mheasann an t‑ábhar sonraí go sáraíonn an phróiseáil a dhéantar ar shonraí pearsanta a bhaineann leis nó léi an Rialachán seo.
2. Cuirfidh an t‑údarás maoirseachta ar taisceadh an gearán leis an gearánach ar an eolas maidir le dul chun cinn agus toradh an ghearáin, lena n‑áirítear an fhéidearthacht leigheas breithiúnach a fháil de bhun Airteagal 78.’
10 Foráiltear le hAirteagal 78(1) agus (2) de RGCS, dar teideal ‘An ceart chun leigheas breithiúnach éifeachtach a fháil i gcoinne údarás maoirseachta’ mar seo a leanas:
‘1. Gan dochar do leigheas riaracháin nó neamhbhreithiúnach ar bith eile, beidh an ceart ag gach duine nádúrtha nó dlíthiúil leigheas éifeachtach breithiúnach a fháil i gcoinne cinneadh a bhaineann leo a dhéanann údarás maoirseachta agus atá ina cheangal de réir dlí.
2. Gan dochar d'aon leigheas riaracháin nó neamhbhreithiúnach ar bith eile, beidh an ceart ag gach ábhar sonraí leigheas éifeachtach breithiúnach a bheith aige i gcás nach láimhseálann an t‑údarás maoirseachta atá inniúil de bhun Airteagal 55 agus Airteagal 56 gearán nó i gcás nach gcuireann sé an t‑ábhar sonraí ar an eolas laistigh de thrí mhí maidir le dul chun cinn nó le toradh an ghearáin arna thaisceadh de bhun Airteagal 77.’
11 Foráiltear le hAirteagal 79 de RGCS, dar teideal ‘An ceart chun leigheas breithiúnach éifeachtach a fháil i gcoinne rialaitheora nó próiseálaí’:
‘1. Gan dochar d'aon leigheas riaracháin nó neamhbhreithiúnach atá ar fáil, lena n‑áirítear an ceart gearán a thaisceadh le húdarás maoirseachta de bhun Airteagal 77, beidh an ceart chun leigheas breithiúnach éifeachtach a fháil ag gach ábhar sonraí i gcás ina measann sé nó sí gur sáraíodh a gcearta faoin Rialachán seo mar thoradh ar phróiseáil a shonraí paearsanta nó a sonraí pearsanta i neamhchomhlíonadh an Rialacháin seo.
2. Tionscnófar imeachtaí i gcoinne rialaitheoir nó próiseálaí os comhair na gcúirteanna sa Bhallstát ina bhfuil bunaíocht ag an rialaitheoir nó ag an bpróiseálaí. De rogha air sin, féadfar na himeachtaí sin a thionscnamh os comhair na gcúirteanna sa Bhallstát ina bhfuil gnáthchónaí ar an ábhar sonraí, ach amháin más údarás poiblí de chuid Ballstáit é an rialaitheoir nó an próiseálaí atá ag gníomhú i bhfeidhmiú a chumhachtaí poiblí.’
12 Foráiltear le hAirteagal 81(2) agus (3) de RGCS, dar teideal ‘Imeachtaí a chur ar fionraí’ mar seo a leanas:
‘2. I gcás ina mbeidh imeachtaí ar feitheamh i gcúirt i mBallstát eile, ar imeachtaí iad a bhaineann leis an ábhar céanna i ndáil le próiseáil ag an rialaitheoir céanna nó ag an bpróiseálaí céanna, féadfaidh aon chúirt inniúil, seachas an chéad chúirt ar tugadh na himeachtaí os a comhair, na himeachtaí sin a chur ar fionraí.
3. I gcás ina mbeidh na himeachtaí sin ar feitheamh ag an gcéad chéim, féadfaidh cúirt ar bith seachas an chéad chúirt ar tugadh na himeachtaí os a comhair dlínse a dhiúltú freisin, ar iarratas ó cheann de na páirtithe, má bhíonn dlínse ag an gcéad chúirt ar tugadh na himeachtaí os a comhair i leith na gcaingne atá i gceist agus má cheadaíonn a dlí a gcomhdhlúthú.’
Dlí na hOstaire
13 Foráiltear le hAirteagal 94(1) den Bundes-Verfassungsgesetz (an Dlí Bunreachtúil Cónaidhme), arna athfhoilsiú an 2 Eanáir 1930 (BGBl. 1/1930), sa leagan is infheidhme maidir leis na fíorais sna príomhimeachtaí mar seo a leanas:
‘Tá na breithiúna neamhspleách ar an rialtas i ngach cás.
[…]’
14 Foráiltear le hAirteagal 24(1) agus (4) den Bundesgesetz zum Schutz natürlicher Personen bei der Verarbeitung personenbezogener Daten (Datenschutzgesetz – DSG) [Dlí cónaidhme maidir le daoine aonair a chosaint i ndáil le sonraí pearsanta a phróiseáil (an Dlí maidir le cosaint sonraí - DSG)] an 17 Lúnasa 1999 (BGBl. I, 165/1999), sa leagan is infheidhme maidir le fíorais na díospóide sna príomhimeachtaí, dar teideal ‘Gearáin chuig an údarás um chosaint sonraí’ mar seo a leanas:
‘1. Tá sé de cheart ag gach ábhar sonraí gearán a thaisceadh leis an Údarás um Chosaint Sonraí má tá an t‑ábhar sonraí den tuairim go sáraítear RGCS nó Airteagal 1 nó Airteagal 2 den chéad chuid phríomha le próiseáil na sonraí pearsanta a bhaineann leis an ábhar sonraí.
[...]
4. Téann an ceart chun déileáil le gearán in éag mura ndéanann an t‑idiragraí an gearán a thaisceadh laistigh de bhliain amháin tar éis dó eolas a fháil ar an teagmhas ba chúis leis an ngearán, ach tráth nach déanaí ná laistigh de 3 bliana tar éis an teagmhais a líomhnaítear a tharla. Diúltófar do ghearáin dhéanacha.
[...]’
An díospóid sna príomhimeachtaí agus na ceisteanna arna dtarchur chun réamhrialú
15 An 3 Iúil 2017, chuir Dr. G S, dochtúir, iarratas faoi bhráid chuideachta D, a fheidhmíonn ardán cuardaigh do dhochtúirí a ligeann do thríú páirtithe measúnuithe agus teistiméireachtaí a chur ar fáil maidir le dochtúirí, ar léirscriosadh roinnt sonraí pearsanta a bhaineann léi, agus í ag brath ar an staid dhlíthiúil a bhí ann roimh theacht i bhfeidhm an RGCS. An 10 Iúil 2017, dhiúltaigh an chuideachta D don iarratas léirscriosta sin.
16 Tar éis an diúltaithe sin, thug Dr. G S caingean, i mí na Samhna 2017, os comhair cúirte sibhialta i gcoinne na cuideachta sin, ag líomhain, inter alia, sárú ar a ceart chun sonraí pearsanta agus ag iarraidh go ndéanfaí na sonraí a foilsíodh ina leith a léirscriosadh. D’iarr sí freisin go n‑ordófaí don chuideachta sin staonadh ó aon phróiseáil bhreise a dhéanamh ar na sonraí sin.
17 An 22 Meitheamh 2018, tar éis theacht i bhfeidhm RGCS, chuir Dr. G S iarratas faoi bhráid chuideachta D arís go scriosfaí na sonraí pearsanta a bhaineann léi a foilsíodh ar an ardán arna fheidhmiú ag an gcuideachta sin. Diúltaíodh don iarratas sin freisin i litir dar dáta an 6 Iúil 2018.
18 Sna himthosca sin, an 26 Iúil 2018, thaisc Dr. G S gearán de bhun Airteagal 77(1) de RGCS le DSB, ag brath, inter alia, ar Airteagal 17 den Rialachán sin, lena gcumhdaítear an ceart chun léirscriosadh. Leis an ngearán sin, d’iarr sí ar an DSB a dhearbhú gur sáraíodh a ceart chun sonraí pearsanta a chosaint, a ordú do chuideachta D na sonraí pearsanta go léir a bhaineann léi ar a hardán a scriosadh agus staonadh ó aon phróiseáil bhreise a dhéanamh ar na sonraí sin.
19 Le cinneadh an 4 Eanáir 2019, dhiúltaigh DSB don ghearán sin ar an gcúis gur raibh an gearán sin agus an chaingean shibhialta a tugadh i mí na Samhna 2017, dá dtagraítear i mír 16 den bhreithiúnas seo, den ábhar céanna, is é sin léirscriosadh na sonraí pearsanta a bhaineann le Dr. G S mar a foilsíodh ar an ardán sin.
20 I ndáil leis sin, mheas DSB go mbeadh seoladh comhuaineach nó comhleanúnach imeachtaí os comhair údarás maoirseachta agus imeachtaí breithiúnacha, ó thaobh córasach de, contrártha leis an sásra cosanta dlíthiúla arna bhunú le RGCS. Is é a thuairim, i gcás den sórt sin, gur cheart don údarás maoirseachta rialú a thabhairt ar an gceist chéanna leis an gceist a tarchuireadh chuig an gcúirt shibhialta. Mar sin féin, ní fhéadfaí glacadh le feidhmiú comhuaineach an chirt chun gearán a thaisceadh le húdarás maoirseachta agus an chirt chun imeachtaí a thionscnamh a bhaineann leis an ábhar céanna.
21 Rinne Dr. G S agóid i gcoinne chinneadh DSB an 4 Eanáir 2019 os comhair an Bundesverwaltungsgericht (an Chúirt Chónaidhme Riaracháin, an Ostair), a dhibh, le breithiúnas an 4 Nollaig 2020, a caingean tráth nach raibh an breithiúnas a thug an chúirt shibhialta an 23 Iúil 2020, lenar diúltaíodh d’iarratas Dr. G S, críochnaitheach go fóill.
22 I ndáil leis sin, bhí an Bundesverwaltungsgericht (an Chúirt Chónaidhme Riaracháin) den tuairim gur bhunaigh RGCS déchóras cosanta dlíthiúla d’aon ghnó. Chuir sí in iúl, ós rud é go raibh an Rialachán sin infheidhme go díreach, gur ghá na forálacha náisiúnta contrártha a fhágáil gan feidhm. Dá bhrí sin, ní fhéadfaí diúltú don ghearán a thaisc Dr. G S faoi Airteagal 77(1) den Rialachán sin ar na forais ar a bhfuil DSB ag brath, agus mar thoradh air sin ba ghá, os a choinne sin, inniúlacht an údaráis maoirseachta sin a dheimhniú i bprionsabal chun rialú a thabhairt ar an ngearán sin.
23 Sa chomhthéacs sin, áfach, chinn an chúirt sin go raibh an gearán sin as am a mhéid nár chomhlíon sé an tréimhse theorann bliana a leagtar síos in Airteagal 24(4) den Dlí maidir le cosaint sonraí, sa leagan is infheidhme maidir leis na fíorais sna príomhimeachtaí. Ós rud é go bhfuil diúltú don ghearán sin i gceist freisin le gearán a thaisc go déanach faoi Airteagal 77(1) de RGCS, diúltaíodh, mar is ceart, do ghearán Dr. G S.
24 Ina dhiaidh sin, dhiúltaigh Dr. G S, tar éis an Verfassungsgerichtshof (an Chúirt Bhunreachtúil, an Ostair) scrúdú a dhéanamh ar a caingean, agus rinne DSB achomharc ar phointe dlí i gcoinne bhreithiúnas an Bundesverwaltungsgericht (an Chúirt Chónaidhme Riaracháin) os comhair an Verwaltungsgerichtshof (an Chúirt Riaracháin Uachtarach, an Ostair), arb í an chúirt a rinne an tarchur í.
25 Ní aontaíonn an chúirt sin le measúnú an Bundesverwaltungsgericht (an Chúirt Chónaidhme Riaracháin) go raibh gearán Dr. G S as am. Mar sin féin, tá sé beartaithe aici scrúdú a dhéanamh an bhféadfadh diúltú an ghearáin sin a bheith bunaithe go dleathach ar fhorais eile. Tar éis di an cásdlí a eascraíonn as breithiúnais an 12 Eanáir 2023, Nemzeti Adatvédelmi és Információszabadság Hatóság (C‑132/21, EU:C:2023:2), agus an 7 Nollaig 2023, SCHUFA Holding (Urscaoileadh na bhfiachas gan íoc) (C‑26/22 agus C‑64/22, EU:C:2023:958) a mheabhrú, fiafraíonn an chúirt sin, inter alia, faoin bhforas a chuir DSB chun cinn, lena líomhnaítear go bhfuil imeachtaí ar feitheamh ann a bhaineann leis an ábhar céanna agus a bhaineann leis an ngearán sin. I ndáil leis sin, tugann sí faoi deara go bhforáiltear le hAirteagal 94(1) de Dhlí Bunreachtúil na Cónaidhme, sa leagan is infheidhme maidir leis na fíorais sna príomhimeachtaí, go bhfuil na breithiúna neamhspleách ar an rialtas i ngach cás. De réir na faisnéise a chuir an chúirt a rinne an tarchur ar fáil, cumhdaítear leis an bhforáil sin prionsabal na deighilte idir an ceartas agus an rialtas, rud a chiallaíonn nach mór cás a shannadh, ina iomláine, do na cúirteanna nó do na húdaráis riaracháin chun críocha a láimhseála. Dá bhrí sin, cuirtear cosc leis an bhforáil sin ar chúirteanna agus ar údaráis riaracháin rialú a thabhairt, i gcomhthráth nó i ndiaidh a chéile, ar an díospóid chéanna.
26 Sa chomhthéacs sin, tá amhras ar an gcúirt sin an féidir gearán ar thaisceadh leis an údarás maoirseachta faoi Airteagal 77(1) de RGCS a dhiúltú ar an bhforas gur taisceadh leigheas breithiúnach éifeachtach, de réir bhrí Airteagal 79 den Rialachán sin a bhaineann leis an ábhar céanna, roimhe sin agus go bhfuil na himeachtaí gaolmhara fós ar feitheamh os comhair na cúirte ar tugadh na himeachtaí os a comhair.
27 I ndáil leis sin, chun cinntí contrártha a sheachaint, measann an chúirt a rinne an tarchur, agus inspioráid á fáil aici ón sásra dá bhforáiltear in Airteagal 81(2) agus (3) de RGCS, go bhféadfaí a mheas, i gcás ina bhfuil díospóid ar feitheamh os comhair na gcúirteanna sibhialta agus na n‑údarás riaracháin, go gceanglaítear ar an dara comhlacht ar tugadh na himeachtaí os a chomhair, mar gheall ar phrionsabal na tosaíochta, diúltú d’iarratas an duine lena mbaineann.
28 Mar sin féin, cuireann sí in iúl freisin, i gcás ina ndiúltaítear do ghearán arna thaisceadh faoi Airteagal 77(1) de RGCS ar an bhforas amháin go bhfuil imeachtaí ar feitheamh, nach bhfuil cinneadh déanta fós maidir le substaint an tsáraithe líomhnaithe ar chosaint sonraí pearsanta tráth an diúltaithe sin, agus mar thoradh air sin nach bhfuil an baol ann go mbeadh cinntí contrártha ann go fóill.
29 Ar bhonn an mhéid sin roimhe seo, tagann an cheist chun cinn an gá idirdhealú a dhéanamh idir cás ina bhfuil imeachtaí ar feitheamh agus cás inar tugadh cinneadh cheana féin maidir le substaint an cháis, fiú mura bhfuil sé críochnaitheach go fóill.
30 Sna himthosca sin, chinn an Verwaltungsgerichtshof (an Chúirt Riaracháin Uachtarach) bac a chur ar na himeachtaí agus na ceisteanna seo a leanas a tharchur chuig an gCúirt Bhreithiúnais le haghaidh réamhrialú:
‘1. An bhfuil Airteagail 77 agus 79 de [RGCS, arna léamh] i bhfianaise réasúnaíocht na Cúirte Breithiúnais i mbreithiúnas an 12 Eanáir 2023, Nemzeti Adatvédelmi és Információszabadság Hatóság (C‑132/21, EU:C:2023:2) agus an 7 Nollaig 2023, SCHUFA Holding (Urscaoileadh na bhfiachas gan íoc) (Cásanna Uamtha C‑26/22 agus C‑64/22, EU:C:2023:958), le léiriú sa chaoi gur ionann an fhéidearthacht dá bhforáiltear go náisiúnta diúltú do ghearán arna thaisceadh le húdarás maoirseachta faoi Airteagal 77 [den Rialachán sin] ar bhonn leigheas breithiúnach tugtha roimh ré os comhair cúirte faoi Airteagal 79 den Rialachán sin sa chás céanna agus go bhfuil an leigheas sin ar feitheamh os comhair cúirte, agus modhúlacht incheadaithe chun idirghníomhú na leigheasanna sin a rialáil (de réir bhrí chásdlí thuasluaite na Cúirte Breithiúnais)?
2. Más freagra diúltach a thabharfar ar an gcéad cheist, [an bhfuil Airteagail 77 agus 79 de RGCS, arna léamh i bhfianaise thorthaí na Cúirte i mbreithiúnais an 12 Eanáir 2023, Nemzeti Adatvédelmi és Információszabadság Hatóság (C‑132/21, EU:C:2023:2) agus an 7 Nollaig 2023, SCHUFA Holding (Urscaoileadh na bhfiachas gan íoc) (Cásanna Uamtha C‑26/22 agus C‑64/22, EU:C:2023:958), le léiriú sa chaoi gur] ionann an fhéidearthacht dá bhforáiltear go náisiúnta diúltú do ghearán arna thaisceadh le húdarás maoirseachta faoi Airteagal 77 de [RGCS] ar an bhforas gur glacadh cinneadh substainteach (cé nach bhfuil sé críochnaitheach go fóill) cheana féin sna himeachtaí a bhaineann leis an leigheas breithiúnach arna thionscnamh sa chás céanna faoi Airteagal 79 den Rialachán sin, agus modhúlacht incheadaithe chun idirghníomhú na leigheasanna sin a rialáil (de réir bhrí chásdlí thuasluaite na Cúirte Breithiúnais)?’
Na ceisteanna a tharchuirtear le haghaidh réamhrialú
31 Lena dhá cheist, ar cheart iad a scrúdú le chéile, fiafraíonn an chúirt a rinne an tarchur, go bunúsach, an gá Airteagal 77(1) agus Airteagal 79(1) de RGCS a léiriú sa chaoi go gcuirtear leo cosc ar údarás maoirseachta, ar cuireadh gearán faoina bhráid de bhun Airteagal 77(1), an gearán sin a dhiúltú ar an gcúis amháin gur tionscnaíodh roimhe sin, i gcomhréir le hAirteagal 79(1), leigheas breithiúnach éifeachtach a bhaineann leis an ábhar céanna, fiú mura bhfuil an cinneadh a tugadh i gcomhthéacs an leighis sin críochnaitheach go fóill.
32 Mar réamhbharúil, is iomchuí a mheabhrú, i gcomhréir le cásdlí socair, nach mór, chun foráil de dhlí an Aontais a léiriú, aird a thabhairt ní hamháin ar théarmaí na forála sin, ach freisin ar an gcomhthéacs ina bhfuil sí agus ar na cuspóirí atá á saothrú leis an rialáil ar cuid di í (breithiúnas an 12 Eanáir 2023, Nemzeti Adatvédelmi és Információszabadság Hatóság, C‑132/21, EU:C:2023:2, mír 32).
33 Sa chéad áit, ba cheart a thabhairt faoi deara go dtagann Airteagail 77 agus 79 de RGCS faoi Chaibidil VIII den Rialachán sin, lena rialaítear, inter alia, na leigheasanna chun cearta an ábhair sonraí a chosaint i gcás inar próiseáladh sonraí pearsanta a bhaineann leis a líomhnaítear a bheith contrártha d’fhorálacha an Rialacháin sin. Dá bhrí sin, féadfaidh an t‑ábhar sonraí cosaint na gceart sin a lorg, go háirithe, go díreach, de bhun Airteagail 77 go 79 den Rialachán sin (féach, chuige sin, breithiúnas an 4 Deireadh Fómhair 2024, Lindenapotheke, C‑21/23, EU:C:2024:846, mír 47 agus an cásdlí dá dtagraítear).
34 I ndáil leis sin, maidir le foclaíocht Airteagail 77 go 79, ba cheart a mheabhrú, ar dtús, go bhforáiltear le hAirteagal 77(1) de RGCS, gan dochar d’aon leigheas riaracháin nó breithiúnach eile, go bhfuil sé de cheart ag gach ábhar sonraí gearán a thaisceadh le húdarás maoirseachta. De réir Airteagal 78(1) den Rialachán sin, beidh an ceart ag gach duine nádúrtha nó dlítheanach leigheas éifeachtach breithiúnach a fháil i gcoinne cinneadh údaráis maoirseachta a bhaineann leo agus atá ina cheangal de réir dlí, gan dochar do leigheas riaracháin nó neamhbhreithiúnach ar bith eile. Ar deireadh, ráthaítear le hAirteagal 79(1) den Rialachán sin an ceart chun leigheas breithiúnach éifeachtach a fháil do gach ábhar sonraí, gan dochar d’aon leigheas riaracháin nó neamhbhreithiúnach atá ar fáil, lena n‑áirítear an ceart gearán a thaisceadh le húdarás maoirseachta faoi Airteagal 77(1) den Rialachán sin (breithiúnas an 4 Deireadh Fómhair 2024, Lindenapotheke, C‑21/23, EU:C:2024:846, mír 48 agus an cásdlí dá dtagraítear).
35 Chinn an Chúirt cheana féin go dtugann na forálacha sin de RGCS leigheasanna éagsúla do dhaoine a líomhnaíonn sárú ar an Rialachán sin, ar an tuiscint nach mór gach ceann de na leigheasanna sin a fheidhmiú ‘gan dochar’ do na leigheasanna eile (breithiúnas an 12 Eanáir 2023, Nemzeti Adatvédelmi és Információszabadság Hatóság, C‑132/21, EU:C:2023:2, mír 34).
36 Dá bhrí sin, mar a thug an tAbhcóide Ginearálta faoi deara i mír 46 dá Thuairim, ní fhoráiltear le RGCS do thosaíocht ná do dhlínse eisiach agus nach leagtar síos léi aon riail maidir le tosaíocht an mheasúnaithe arna dhéanamh ag an údarás nó ag na cúirteanna dá dtagraítear ann maidir le sárú ar na cearta a thugtar leis an Rialachán sin. Chinn an Chúirt cheana féin go bhféadfar an leigheas dá bhforáiltear le hAirteagal 78(1) den Rialachán sin, arb é is cuspóir dó scrúdú a dhéanamh ar dhlíthiúlacht cinnidh ó údarás maoirseachta arna ghlacadh ar bhonn Airteagal 77 den Rialachán sin, agus an leigheas dá bhforáiltear in Airteagal 79(1) den Rialachán sin a fheidhmiú i gcomhthráth agus go neamhspleách freisin (féach breithiúnas an 12 Eanáir 2023, Nemzeti Adatvédelmi és Információszabadság Hatóság, C‑132/21, EU:C:2023:2, mír 35).
37 Sa dara háit, maidir le comhthéacs na bhforálacha sin de RGCS, ba cheart a mheabhrú, faoi Airteagal 57(1)(f) den Rialachán sin, go gceanglaítear ar gach údarás maoirseachta, ar a chríoch, gearáin a láimhseáil a bhfuil aon duine i dteideal a thaisceadh, i gcomhréir le hAirteagal 77(1) den Rialachán sin, i gcás ina measann an duine sin go sáraíonn próiseáil sonraí pearsanta a bhaineann leis an duine sin an Rialachán céanna, an t‑ábhar a scrúdú, a mhéid is gá, agus an gearánach a chur ar an eolas faoi dhul chun cinn agus toradh an imscrúdaithe laistigh de thréimhse réasúnta. Ní mór don údarás maoirseachta gearán den sórt sin a phróiseáil leis an gcúram cuí (féach, i ndáil leis sin, breithiúnas an 26 Mean Fómhair 2024, Land Hessen (Oibleagáid gníomhú an údaráis um chosaint sonraí), C‑768/21, EU:C:2024:785, mír 32 agus an cásdlí dá dtagraítear). Mar a dheimhnítear le haithris 129 de RGCS, tá ról fíor-riachtanach ag an údarás sin sa chóras cosanta sonraí pearsanta, agus cuireann sé le cur i bhfeidhm comhsheasmhach an Rialacháin sin ar fud na mBallstát.
38 Sa tríú háit, tacaítear leis an léiriú comhthéacsúil sin leis na cuspóirí a shaothraítear le RGCS. I ndáil leis sin, ba cheart a thabhairt faoi deara go bhfuil rogha reachtóir an Aontais an fhéidearthacht a thabhairt d’ábhair sonraí lena mbaineann próiseáil sonraí pearsanta na leigheasanna dá bhforáiltear le hAirteagal 77(1) agus le hAirteagal 79(1) den Rialachán sin a fheidhmiú go comhuaineach agus go neamhspleách i gcomhréir leis an gcuspóir atá á shaothrú leis an Rialachán sin, arb é atá ann, mar is léir ó aithris 10 de, ardleibhéal cosanta a áirithiú do dhaoine nádúrtha maidir le próiseáil sonraí pearsanta san Aontas Eorpach. Dearbhaítear, thairis sin, in aithris 11 den Rialachán céanna go bhfuil gá le cearta na n‑ábhar sonraí a neartú d’fhonn sonraí pearsanta a chosaint go héifeachtach.
39 Chinn an Chúirt cheana féin go dtreisíonn foráil roinnt leigheasanna an cuspóir a leagtar amach in aithris 141 de RGCS chun a áirithiú go bhfuil an ceart chun leigheas breithiúnach éifeachtach a fháil ag gach ábhar sonraí a mheasann go sáraítear a chearta faoin Rialachán sin i gcomhréir le hAirteagal 47 den Chairt (breithiúnas an 12 Eanáir 2023, Nemzeti Adatvédelmi és Információszabadság Hatóság, C‑132/21, EU:C:2023:2, mír 44).
40 Chuir an Chúirt in iúl freisin go bhfuil an rogha a rinne reachtas an Aontais cead a thabhairt d’ábhair sonraí na leigheasanna dá bhforáiltear, ar an gcéad dul síos, in Airteagal 77(1) agus in Airteagal 78(1) de RGCS agus, ar an dara dul síos, in Airteagal 79(1) den Rialachán sin, comhsheasmhach le cuspóir an Rialacháin sin (féach breithiúnas an 12 Eanáir 2023, Nemzeti Adatvédelmi és Információszabadság Hatóság, C‑132/21, EU:C:2023:2, mír 42).
41 É sin ráite, in éagmais rialacha an Aontais maidir leis an ábhar sin, is faoi gach Ballstát atá sé, i gcomhréir le prionsabal neamhspleáchas nós imeachta na mBallstát, rialacha mionsonraithe a leagan síos maidir le nósanna imeachta riaracháin agus breithiúnacha atá beartaithe chun ardleibhéal cosanta a áirithiú do na cearta a fhaigheann daoine aonair ó dhlí an Aontais (breithiúnas an 12 Eanáir 2023, Nemzeti Adatvédelmi és Információszabadság Hatóság, C‑132/21, EU:C:2023:2, mír 45).
42 Dá bhrí sin, is faoin gcúirt a rinne an tarchur atá sé, ar bhonn na bhforálacha nós imeachta náisiúnta, cinneadh a dhéanamh maidir leis an gcaoi nach mór na leigheasanna dá bhforáiltear in Airteagail 77 go 79 de RGCS a chur chun feidhme (féach breithiúnas an 12 Eanáir 2023, Nemzeti Adatvédelmi és Információszabadság Hatóság, C‑132/21, EU:C:2023:2, mír 46).
43 Go háirithe, ní féidir leis na rialacha lena rialaítear feidhmiú leigheasanna comhthráthacha agus neamhspleácha amhras a chaitheamh ar éifeachtacht agus ar chosaint éifeachtach na gceart a ráthaítear leis an Rialachán sin (breithiúnas an 12 Eanáir 2023, Nemzeti Adatvédelmi és Információszabadság Hatóság, C‑132/21, EU:C:2023:2, mír 47).
44 I ndáil leis sin, ní fhéadfaidh na rialacha sin a bheith níos mífhabhraí ná na rialacha lena rialaítear leigheasanna náisiúnta comhchosúla (prionsabal na coibhéise) ná beagnach dodhéanta nó ródheacair na cearta a thugtar le dlí an Aontais a fheidhmiú (prionsabal na héifeachtachta) (breithiúnas an 12 Eanáir 2023, Nemzeti Adatvédelmi és Információszabadság Hatóság, C‑132/21, EU:C:2023:2, mír 48).
45 Sa chomhthéacs sin, shonraigh an Chúirt, i gcás ina leagann na Ballstáit síos rialacha mionsonraithe nós imeachta lena rialaítear leigheasanna chun na cearta a thugtar le RGCS a chosaint, nach mór dóibh a áirithiú go gcomhlíonfar an ceart chun leigheas éifeachtach agus triail chóir a fháil, a chumhdaítear in Airteagal 47 den Chairt, arb ionann é agus athdhearbhú ar phrionsabal na cosanta breithiúnaí éifeachtaí (breithiúnas an 12 Eanáir 2023, Nemzeti Adatvédelmi és Információszabadság Hatóság, C‑132/21, EU:C:2023:2, mír 50).
46 Sa chás seo, is léir ón iarraidh ar réamhrialú go gcuireann an córas leigheasanna dá bhforáiltear le dlí na hOstaire cosc ar chúirteanna agus ar údaráis riaracháin rialú a dhéanamh go comhuaineach nó go comhleanúnach ar an díospóid chéanna. Sa chomhthéacs sin, tagann an cheist chun cinn an féidir gearán a thaisceadh leis an údarás maoirseachta faoi Airteagal 77(1) de RGCS a dhiúltú ar an bhforas amháin gur tionscnaíodh leigheas breithiúnach roimhe sin, bunaithe ar Airteagal 79 den Rialachán sin agus a bhaineann leis an ábhar céanna, agus go bhfuil na himeachtaí gaolmhara fós ar feitheamh.
47 De réir na cúirte a rinne an tarchur, chuideodh struchtúr leigheasanna den sórt sin le glacadh cinntí contrártha maidir leis an iarratas céanna a sheachaint. Mar sin féin, cuireann sí in iúl, i gcás ina ndiúltaíonn DSB do ghearán arna thaisceadh faoi Airteagal 77(1) de RGCS ar an bhforas go bhfuil leigheas breithiúnach arna thabhairt i gcomhréir le hAirteagal 79(1) den Rialachán sin ar feitheamh os comhair na cúirte ar tugadh an chaingean os a comhair, nach féidir leis an údarás sin a bheith cinnte go dtabharfar cinneadh maidir leis an tsubstaint i gcomhthéacs an leighis sin. B’amhlaidh a bheadh, go háirithe, dá ndíbhfí an chaingean sin toisc í a bheith do-ghlactha, gan cinneadh a thabhairt ar an tsubstaint.
48 I ndáil leis sin, ba cheart a mheabhrú, mar a luaitear i mír 37 den bhreithiúnas seo, faoi Airteagal 57(1)(f) de RGCS, go gceanglaítear ar gach údarás maoirseachta, ar a chríoch, gearáin a láimhseáil a bhfuil aon duine i dteideal a thaisceadh, i gcomhréir le hAirteagal 77(1) den Rialachán sin, i gcás ina measann an duine sin go sáraíonn próiseáil sonraí pearsanta a bhaineann leis an duine sin an Rialachán sin, agus ábhar na ngearán sin a scrúdú a mhéid is gá. Ní mór don údarás maoirseachta gearán den sórt sin a phróiseáil leis an gcúram cuí (féach, i ndáil leis sin, breithiúnas an 7 Nollaig 2023, SCHUFA Holding (Urscaoileadh na bhfiachas gan íoc), C‑26/22 agus C‑64/22, EU:C:2023:958 mír 56 agus an cásdlí dá dtagraítear).
49 I gcomhthéacs na próiseála sin, tá corrlach lánroghnach ag an údarás sin, maidir leis na bearta ceartaitheacha a liostaítear le hAirteagal 58(2) de RGCS, maidir le rogha na modhanna iomchuí agus riachtanacha (breithiúnas an 7 Nollaig 2023, SCHUFA Holding (Urscaoileadh na bhfiachas gan íoc), C‑26/22 agus C‑64/22, EU:C:2023:958, mír 68 agus an cásdlí dá dtagraítear).
50 I ndáil leis sin, chinn an Chúirt go bhfuil sé i gceist leis an nós imeachta gearán, nach bhfuil cosúil le hachainí, a bheith ina shásra atá in ann cearta agus leasanna na ndaoine lena mbaineann a chosaint go héifeachtach (breithiúnas an 7 Nollaig 2023, SCHUFA Holding (Urscaoileadh na bhfiachas gan íoc), C‑26/22 agus C‑64/22, EU:C:2023:958, mír 58).
51 Ceanglaítear ar an údarás maoirseachta idiragairt a dhéanamh i gcás ina bhfuil glacadh ceann amháin nó níos mó de na bearta ceartaitheacha dá bhforáiltear in Airteagal 58(2) RGCS iomchuí, riachtanach agus comhréireach chun an t‑easnamh a sainaithníodh a leigheas agus chun comhlíonadh iomlán an Rialacháin sin a áirithiú (féach breithiúnas an 30 Aibreán 2025, Inspektorat kam Visshia sadeben savet, C‑313/23, C‑316/23 agus C‑332/23, EU:C:2025:303, mír 132).
52 Is fíor go gceanglaítear leis an oibleagáid idiragartha sin, i gcás ina bhfaigheann an t‑údarás maoirseachta gearán faoi Airteagal 77(1) de RGCS agus ina gcuirtear in iúl dó gurb ann d’imeachtaí breithiúnacha arna dtionscnamh ar bhonn Airteagal 79(1) den Rialachán sin agus a bhaineann leis an ábhar céanna, nach mór dó aird chuí a thabhairt, agus an gearán sin á scrúdú aige, ar an gcinneadh lena gcuirtear clabhsúr cinntitheach leis na himeachtaí sin.
53 Mar sin féin, bheadh sé contrártha leis an oibleagáid chéanna tairbhe sásra cosanta den sórt sin a bhaint d’ábhar sonraí lena mbaineann próiseáil sonraí pearsanta trí chead a thabhairt don údarás maoirseachta a ghearán a dhiúltú ar an bhforas amháin gur tugadh leigheas breithiúnach, arna thionscnamh i gcomhréir le hAirteagal 79(1) de RGCS agus a bhaineann leis an ábhar céanna, roimhe sin agus cé nach bhfuil an cinneadh a tugadh i gcomhthéacs an leighis sin críochnaitheach go fóill.
54 Sa chomhthéacs sin, maidir leis an mbaol go nglacfaí cinntí contrártha i ndáil leis an bpróiseáil chéanna ar shonraí pearsanta laistigh den Bhallstát céanna, mar a thug an tAbhcóide Ginearálta faoi deara, go bunúsach, i míreanna 55 agus 56 dá Thuairim, d’fhéadfadh an Ballstát sin, i gcás amhail na príomhimeachtaí, foráil a dhéanamh, mar shampla, maidir le sásra fionraíochta a bhunú faoina mbeadh sé de chumhacht nó faoi cheangal ag an údarás maoirseachta, a éisteann gearán faoi Airteagal 77(1) de RGCS, na himeachtaí atá ar feitheamh os a chomhair a chur ar fionraí i gcás ina dtugtar leigheas breithiúnach, arna fheidhmiú i gcomhréir le hAirteagal 79(1) den Rialachán sin agus a bhaineann leis an ábhar céanna, roimh ré. D’fhéadfaí fionraí den sórt sin a choinneáil i bhfeidhm go dtí go dtabharfaí an chéad bhreithiúnas sa chaingean sin agus, i gcás ina ndéanfaí achomharc i gcoinne an bhreithiúnais sin, go dtí go gcuirfí deireadh go críochnaitheach leis an díospóid lena mbaineann le cinneadh breithiúnach.
55 I ndáil leis sin, ba cheart a thabhairt faoi deara gur cosúil go gcomhlíonann fionraí fhéideartha an scrúdaithe ar ghearán a thaisceadh le húdarás maoirseachta faoi Airteagal 77(1) den Rialachán sin go dtí go ndéanfar cinneadh breithiúnach an ceanglas maidir leis an gceart chun leigheas breithiúnach éifeachtach a ráthú agus an ceanglas maidir leis na cearta a ráthaítear le RGCS a chosaint go héifeachtach agus glacadh cinntí contrártha a d’fhéadfadh an bonn a bhaint den deimhneacht dhlíthiúil a sheachaint.
56 Os a choinne sin, i gcás ina ndiúltaíonn an t‑údarás maoirseachta do ghearán ar an bhforas amháin go bhfuil imeachtaí arna thionscnamh ar bhonn Airteagal 79(1) den Rialachán sin ar feitheamh, ar an gcéad dul síos, mar a luaitear i mír 47 den bhreithiúnas seo, ní féidir leis an údarás sin a bheith cinnte go dtabharfar cinneadh iarbhír maidir leis na tuillteanais i gcomhthéacs an leighis bhreithiúnaigh sin. Ar an dara dul síos, d’fhéadfadh sé a bheith dodhéanta gearán nua a thaisceadh i gcás ina gcuireann an dlí náisiúnta é faoi réir teorainn ama inghlacthachta a chomhlíonadh, mar is amhlaidh sa chás seo, agus go bhfuil an teorainn ama sin imithe in éag cheana féin. Dá bhrí sin, ní féidir a chur as an áireamh go mbaintear gach cosaint éifeachtach den ábhar sonraí lena mbaineann próiseáil sonraí pearsanta i gcás ina ndíbhtear dá chaingean ar fhoras nós imeachta gan cinneadh a thabhairt ar an tsubstaint nó más mian leis tarraingt siar as an gcaingean.
57 Dá bhrí sin, mar a thug an tAbhcóide Ginearálta faoi deara, go bunúsach, i mír 57 dá Thuairim, tá diúltú do ghearán a thaisceadh le húdarás maoirseachta i gcás amhail cás na díospóide sna príomhimeachtaí contrártha do phrionsabal na héifeachtachta, ós rud é go bhféadfadh an modh sin chun na leigheasanna a struchtúrú dochar a dhéanamh do chosaint éifeachtach na gceart a ráthaítear le RGCS.
58 Dá bhri sin, is faoin gcúirt a rinne an tarchur atá sé a fháil amach an bhfuil forálacha an dlí náisiúnta atá i gceist sna príomhimeachtaí de chineál a áirithíonn cosaint éifeachtach na gceart a ráthaítear le RGCS, go háirithe maidir leis an ngaol idir na leigheasanna iomaíocha agus neamhspleácha atá ar fáil d’ábhair sonraí chun sonraí pearsanta a phróiseáil.
59 I bhfianaise na mbreithnithe go léir roimhe seo, is é an freagra ar an gcéad cheist agus ar an dara ceist nach mór Airteagal 77(1) agus Airteagal 79(1) de RGCS a léiriú sa chaoi go gcuirtear cosc leo ar údarás maoirseachta, ar cuireadh gearán faoina bhráid de bhun Airteagal 77(1), an gearán sin a dhiúltú ar an gcúis amháin gur tionscnaíodh leigheas breithiúnach roimhe sin, i gcomhréir le hAirteagal 79(1), a bhaineann leis an ábhar céanna, agus cé nach bhfuil an cinneadh a tugadh i gcomhthéacs an leighis sin críochnaitheach go fóill.
Costais
60 Os rud é, a mhéid a bhaineann sé leis na páirtithe sna príomhimeachtaí, go bhfuil na himeachtaí mar chéim sa chás os comhair na cúirte a rinne an tarchur, baineann ceist na gcostas leis an gcúirt sin. Níl na costais a tabhaíodh trí bharúlacha a chur faoi bhráid na Cúirte, seachas costais na bpáirtithe sin, inghnóthaithe.
Ar na forais sin, rialaíonn an Chúirt (an Chéad Dlísheomra) mar seo a leanas:
Maidir le hAirteagal 79(1) de Rialachán 2016/679 ó Pharlaimint na hEorpa agus ón gComhairle an 27 Aibreán 2016 maidir le daoine nádúrtha a chosaint i ndáil le sonraí pearsanta a phróiseáil agus maidir le saorghluaiseacht sonraí den sórt sin, agus lena n‑aisghairtear Treoir 95/46/CE (an Rialachán Ginearálta maidir le Cosaint Sonraí),
ní mór léiriú a dhéanamh mar seo a leanas:
cuirtear cosc leo ar údarás maoirseachta, ar cuireadh gearán faoina bhráid de bhun Airteagal 77(1), an gearán sin a dhiúltú ar an gcúis amháin gur tionscnaíodh leigheas breithiúnach roimhe sin, i gcomhréir le hAirteagal 79(1), a bhaineann leis an ábhar céanna, agus cé nach bhfuil an cinneadh a tugadh i gcomhthéacs an leighis sin críochnaitheach go fóill.
Sínithe
* Teanga an cháis: an Ghearmáinis.