(1)

Il-fluworur tas-sulfuril ġie inkluż fl-Anness I tad-Direttiva 98/8/KE tal-Parlament Ewropew u tal-Kunsill (2) bħala sustanza attiva għall-użu fil-prodotti bijoċidali tat-tipi ta’ prodott 8 u 18. Għalhekk, skont l-Artikolu 86 tar-Regolament (UE) Nru 528/2012, tqies approvat sal-31 ta’ Diċembru 2018 għall-użu fil-prodotti bijoċidali tat-tip ta’ prodott 8 u sat-30 ta’ Ġunju 2021 għall-użu fil-prodotti bijoċidali tat-tip ta’ prodott 18 skont dak ir-Regolament, soġġett għar-rekwiżiti stabbiliti fl-Anness I tad-Direttiva 98/8/KE.

(2)

Fit-28 ta’ Ġunju 2017, l-applikazzjonijiet tressqu f’konformità mal-Artikolu 13(1) tar-Regolament (UE) Nru 528/2012 għat-tiġdid tal-approvazzjoni tal-fluworur tas-sulfuril għall-użu fil-prodotti bijoċidali tat-tipi ta’ prodott 8 u 18 (“l-applikazzjonijiet”). L-applikazzjonijiet ġew evalwati mill-awtorità kompetenti tal-Iżvezja (“l-awtorità kompetenti tal-evalwazzjoni”).

(3)

Skont id-Deċiżjoni ta’ Implimentazzjoni tal-Kummissjoni (UE) 2018/1479 (3), id-data tal-iskadenza tal-approvazzjoni tal-fluworur tas-sulfuril għall-użu fil-prodotti bijoċidali tat-tip ta’ prodott 8 ġiet posposta għat-30 ta’ Ġunju 2021, sabiex ikun hemm biżżejjed żmien għall-eżami tal-applikazzjoni. Id-Deċiżjoni ta’ Implimentazzjoni tal-Kummissjoni (UE) 2021/713 (4) ipposponiet għal darb’oħra d-data tal-iskadenza tal-approvazzjoni tal-fluworur tas-sulfuril għall-użu fil-prodotti bijoċidali tat-tipi ta’ prodott 8 u 18 għall-31 ta’ Diċembru 2023. Dik l-iskadenza reġgħet ġiet posposta bid-Deċiżjoni ta’ Implimentazzjoni tal-Kummissjoni (UE) 2023/2101 (5) għall-31 ta’ Diċembru 2024.

(4)

Id-Deċiżjoni ta’ Implimentazzjoni tal-Kummissjoni (UE) 2024/2402 (6) ma ġedditx l-approvazzjoni tal-fluworur tas-sulfuril għall-użu fil-prodotti bijoċidali tat-tipi ta’ prodott 8 u 18. Għalhekk, huwa xieraq li titħassar id-Deċiżjoni ta’ Implimentazzjoni tal-Kummissjoni (UE) 2023/2101 li tipposponi d-data ta’ skadenza tal-approvazzjoni tal-fluworur tas-sulfuril,