(1)

Skond id-Deċiżjoni tal-Kunsill 91/666/KEE tal-11 ta’ Diċembru 1991 li tistabbilixxi r-riżervi tal-Komunità tal-vaċċini kontra l-marda ta’ l-ilsien u d-dwiefer (3), ħażniet ta’ l-antiġeni ġew stabbiliti għall-formulazzjoni rapida ta’ vaċċini kontra l-marda ta’ l-ilsien u d-dwiefer u dawn jinżammu, għal raġunijiet ta’ sikurezza, f’postijiet speċifiċi magħzula għal dan il-għan fl-istabbiliment tal-manifattur.

(2)

Skond id-Direttiva tal-Kummissjoni 2003/85/KE, il-Kummissjoni għandha tiżgura li r-riżervi Komunitarji ta’ l-antiġeni mhux attivati kkonċentrati għall-produzzjoni tal-vaċċini kontra l-marda ta’ l-ilsien u d-dwiefer jinżammu fl-istabbiliment tal-bank Komunitarju ta’ l-antiġeni u l-vaċċini.

(3)

Għal dak il-għan, l-għadd ta’ dożi u d-diversità tas-serotipi u l-varjetajiet ta’ antiġeni tal-viruses tal-marda ta’ l-ilsien u d-dwiefer maħżuna fil-bank Komunitarju ta’ l-antiġeni u l-vaċċini għandu jiġi deċiż billi jitqiesu l-ħtiġijiet kif ġie stmat fil-kuntest tal-pjanijiet ta’ kontinġenza u s-sitwazzjoni epidemjoloġika u fejn xieraq wara konsultazzjoni mal-Laboratorju Komunitarju ta’ Referenza.

(4)

Bid-Deċiżjoni tal-Kummissjoni 93/590/KE tal-5 ta’ Novembru 1993 għax-xiri mill-Komunità ta’ antiġeni tal-marda ta’ l-ilsien u d-dwiefer fil-kwadru ta’ l-azzjoni Komunitarja li tirrigwarda r-riservi ta’ vaċċini tal-marda ta’ l-ilsien u d-dwiefer (4), saru arranġamenti għax-xiri ta’ antiġeni A5 Ewropej, A22 Lvant Nofsani u O1 Ewropej, tal-marda ta’ l-ilsien u d-dwiefer.

(5)

Bid-Deċiżjoni tal-Kummissjoni 97/348/KE tat-23 ta’ Mejju 1997 għax-xiri mill-Komunità ta’ antiġeni tal-marda ta’ l-ilsien u d-dwiefer u għall-formulazzjoni, il-produzzjoni, l-ibbottiljar u t-tqassim ta’ vaċċini kontra l-marda ta’ l-ilsien u d-dwiefer (5), saru arranġamenti għax-xiri ta’ antiġeni A22-Iraq, C1 u AŻJA1 tal-marda ta’ l-ilsien u d-dwiefer.

(6)

Bid-Deċiżjoni tal-Kummissjoni 2000/77/KE tas-17 ta’ Diċembru 1999 għax-xiri mill-Komunità ta’ antiġeni tal-marda ta’ l-ilsien u d-dwiefer u għall-formulazzjoni, il-produzzjoni, l-ibbottiljar u t-tqassim ta’ vaċċini kontra l-marda ta’ l-ilsien u d-dwiefer (6), saru arranġamenti għax-xiri ta’ ċerti dożi ta’ antiġeni A Iran 96, A Iran 99, A Malażja 97, SAT 1, SAT 2 (il-varjetajiet ta’ l-Afrika tal-Lvant u ta’ l-Afrika ta’ Isfel) u SAT 3 tal-marda ta’ l-ilsien u d-dwiefer.

(7)

Bid-Deċiżjoni tal-Kummissjoni 2000/569/KE tat-8 ta’ Settembru 2000 għax-xiri mill-Komunità ta’ antiġeni tal-marda ta’ l-ilsien u d-dwiefer u għall-formulazzjoni, il-produzzjoni, l-ibbottiljar u t-tqassim ta’ vaċċini kontra l-marda ta’ l-ilsien u d-dwiefer (7), saru arranġamenti għax-xiri ta’ ċerti dożi ta’ antiġeni A 22 Iraq, A Malażja 97, O1 Manisa, AŻJA 1, SAT 1, SAT 2 (il-varjetajiet ta’ l-Afrika tal-Lvant u ta’ l-Afrika ta’ Isfel) u SAT 3 tal-marda ta’ l-ilsien u d-dwiefer.

(8)

Fl-2003 u bi qbil mad-Deċiżjoni tal-Kummissjoni C(2002) 4326 (8) dwar ix-xiri u l-ħażna ta’ antiġeni kontra l-marda ta’ l-ilsien u d-dwiefer inxtraw kwantitajiet addizzjonali ta’ antiġeni epidemjoloġikament rilevanti.

(9)

Skond l-Artikolu 14 tad-Deċiżjoni 90/424/KEE, il-livell ta’ parteċipazzjoni Komunitarja biex jiġu stabbiliti dawn il-ħażniet ta’ riżerva ta’ antiġeni u l-kondizzjonijiet li għalihom tista’ tkun soġġetta din il-parteċipazzjoni għandhom jiġu stipulati wkoll.

(10)

L-antiġeni kollha li għandhom aktar minn 5 snin iridu jiġu ttestjati għall-potenza.

(11)

Mill-2005, ma teżisti ebda rabta legali għat-tul bejn il-kuntrattur u l-Kummissjoni għall-ħażna, il-formulazzjoni, it-tqassim, l-ibbottiljar, l-ittikkettjar u l-ġarr ta’ antiġeni FMD mixtrija bejn l-1993 u l-2005.

(12)

L-ispejjeż ta’ ħażna għall-antiġeni FMD għas-sena 2005, 2006 u 2007 huma koperti minn impenn finanzjarju skond ir-Regolament Finanzjarju.

(13)

Bejn l-2005 u l-2007 ma kienx hemm ebda spejjeż marbuta ma’ dawn l-antiġeni FMD għajr għal spejjeż ta’ ħażna.

(14)

Il-miżuri stipulati f’din id-Deċiżjoni huma skond l-opinjoni tal-Kumitat Permanenti għall-Katina Alimentari u s-Saħħa ta’ l-Annimali,