16.12.2017   

MT

Il-Ġurnal Uffiċjali tal-Unjoni Ewropea

L 336/24


DEĊIŻJONI TA' IMPLIMENTAZZJONI TAL-KUNSILL (UE) 2017/2350

tad-9 ta' Awwissu 2016

dwar l-impożizzjoni ta' multa fuq il-Portugall minħabba nuqqas ta' azzjoni effettiva biex jindirizza defiċit eċċessiv

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea,

Wara li kkunsidra r-Regolament (UE) Nru 1173/2011 tal-Parlament Ewropew u tal-Kunsill tas-16 ta' Novembru 2011 dwar l-infurzar effettiv tas-sorveljanza baġitarja fiż-żona tal-euro (1), u b'mod partikolari l-Artikolu 6 tiegħu,

Billi:

(1)

Il-Kunsill, permezz ta' Deċiżjoni adottata fit-12 ta' Lulju 2016, taħt l-Artikolu 126(8) tat-Trattat, stabbilixxa li l-ebda azzjoni effettiva ma ġiet meħuda mill-Portugall sabiex jikkoreġi d-defiċit eċċessiv b'reazzjoni għar-Rakkomandazzjoni tal-Kunsill tal-21 ta' Ġunju 2013 taħtl-Artikolu 126(7) tat-Trattat.

(2)

Bħala segwitu għad-Deċiżjoni tal-Kunsill tat-12 ta' Lulju 2016 li l-Portugall ma ħax azzjoni effettiva biex jikkoreġi d-defiċit eċċessiv, il-Kummissjoni għandha tirrakkomanda li l-Kunsill jimponi multa.

(3)

Il-multa li għandha tiġi imposta fuq il-Portugall għandha fil-prinċipju tammonta għal 0,2 % tal-PDG tiegħu tul is-sena preċedenti iżda l-ammont tagħha jista' jitnaqqas jew jiġi kkanċellat abbażi ta' raġunijiet ta' ċirkostanzi ekonomiċi eċċezzjonali jew wara li ssir talba motivata mill-Istat Membru kkonċernat.

(4)

Il-PDG tal-Portugall fl-2015 kien EUR 179,37 biljun u l-ekwivalenti ta' 0,2 % ta' dak il-PDG jammonta għal EUR 358 738 200.

(5)

F'konformità mal-punt 3 tal-Artikolu 2 tar-Regolament (UE) Nru 1173/2011, “ċirkostanzi ekonomiċi eċċezzjonali” tfisser ċirkostanzi fejn eċċess ta' defiċit tal-gvern 'il fuq mill-valur ta' referenza jkun meqjus eċċezzjonali fis-sens tat-tieni inċiż tal-punt (a) tal-Artikolu 126(2) tat-Trattat, kif speċifikat fir-Regolament tal-Kunsill (KE) Nru 1467/97 (2). Skont ir-Regolament li jissemma l-aħħar, tali eċċess ikun eċċezzjonali meta dan jirriżulta (i) minn avveniment mhux tas-soltu li l-Istat Membru kkonċernat ma jkollux kontroll fuqu u b'impatt kbir fuq il-pożizzjoni finanzjarja tal-amministrazzjoni pubblika jew (ii) minn tnaqqis qawwi fir-ritmu ekonomiku, li jfisser rata negattiva tat-tkabbir tal-volum tal-PDG annwali jew telf ta' output akkumulat matul perjodu twil ta' tkabbir baxx ħafna tal-volum tal-PDG annwali fir-rigward tal-potenzjal tat-tkabbir tiegħu.

(6)

Evalwazzjoni tal-applikazzjoni tal-kundizzjonijiet li jissemmew hawn fuq għall-Portugall tipproduċi l-konklużjonijiet li ġejjin:

—

Minkejja li t-tkabbir tal-PDG tal-Portugall sofra tnaqqis b'pass aktar mgħaġġel milli mistenni fl-2011 u fl-2012, l-ekonomija ilha li qabdet tirpilja ftit mir-rebbiegħa tal-2013. Il-qgħad kiber ukoll kunsiderevolment sal-2013 iżda fl-2014 reġa' qabad it-triq tan-niżla, hekk kif l-ekonomija Portugiża reġgħet eventwalment qabdet tirpilja. Il-PDG ilu mill-2014 jikber ferm aktar mit-tkabbir tal-output potenzjali u din is-sitwazzjoni hija mistennija li tkompli fl-2016. Skont it-tbassir tar-rebbiegħa tal-2016 tal-Kummissjoni, il-PDG huwa previst li jkompli jikber b'1,5 % matul l-2016, u jiżdied aktar għal 1,7 % fl-2017. Konsegwentement, ma kien hemm l-ebda tnaqqis qawwi fir-ritmu ekonomiku tul il-perjodu kopert mir-Rakkomandazzjoni tal-Kunsill tal-21 ta' Ġunju 2013 (jiġifieri 2013-2015).

—

Barra minn hekk, ma seħħ l-ebda avveniment mhux tas-soltu li l-gvern ma kellux kontroll fuqu, b'impatt kbir fuq il-finanzi pubbliċi matul il-perjodu bejn l-2013 u l-2015.

(7)

Għaldaqstant, ma jeżistux ċirkostanzi ekonomiċi eċċezzjonali li jiġġustifikaw tnaqqis tal-ammont tal-multa.

(8)

Fit-18 ta' Lulju 2016, il-Portugall ippreżenta talba motivata lill-Kummissjoni biex tirrakkomanda li l-Kunsill jistabbilixxi li l-ammont tal-multa huwa ta' żero. Bħala sostenn għat-talba tiegħu, il-Portugall ta r-raġunijiet li ġejjin:

Il-Portugal ifakkar l-isforz sostanzjali ta' konsolidament fiskali u r-riformi strutturali implimentati matul il-programm ta' aġġustament ekonomiku ta' dan l-aħħar. Jisħaq mill-ġdid ukoll l-impenn qawwi li jikkoreġi d-defiċit eċċessiv fl-2016, inkluż l-impenn li jadotta miżuri meta meħtieġ sabiex jikkoreġi devjazzjonijiet baġitarji, u sabiex jimplimenta aġġustament fiskali fl-2017 f'konformità mar-rakkommandazzjoni fiskali speċifika għall-pajjiż adottata mill-Kunsill fit-12 ta' Lulju 2016. Il-Portugall jikkunsidra li l-applikazzjoni ta' sanzjonijiet tkun ta' detriment għall-kisba tal-miri baġitarji li jikkoreġu d-defiċit eċċessiv din is-sena. Jindika wkoll l-impenji tal-politika ekonomika b'mod partikolari fir-rigward tal-istabbilizzazzjoni tas-sistema finanzjarja u l-miżuri preżentati fil-Programm Nazzjonali ta' Riforma tal-2016. Fl-aħħar nett, il-Portugall jikkunsidra li kwalunkwe sanzjoni ma tkunx f'lokha fil-kuntest Ewropew u internazzjonali attwali, b'mod partikolari fid-dawl tal-inċertezzi kbar li jirriżultaw mill-eżitu tar-referendum fir-Renju Unit dwar is-sħubija fl-Unjoni.

(9)

Valutazzjoni tal-argumenti li jissemmew hawn fuq twassal għall-kunsiderazzjonijiet ta' hawn taħt.

(10)

Filwaqt li l-Portugall ma ħax azzjoni effettiva biex jindirizza d-defiċit eċċessiv f'konformità mar-Rakkomandazzjoni tal-Kunsill tal-21 ta' Ġunju 2013, l-aġġustament fiskali kumplessiv mill-2010 sal-2014 kien tabilħaqq konsiderevoli. It-tnaqqis tad-defiċit nominali nett mill-miżuri ta'darba b'aktar minn 5 % tal-PDG kien xprunat mit-titjib tal-bilanċ strutturali b'aktar minn 6 %. Madankollu, dan ir-ritmu waqaf ħesrem wara l-konklużjoni tal-programm ekonomiku kif ġie misħuq fid-Deċiżjoni tal-Kunsill tat-12 ta' Lulju 2016. L-aġġustament fiskali sar id f'id ma' ġabra komprensiva ta' riformi strutturali fl-ambitu tal-programm ta' aġġustament li ntemmew b'suċċess f'Ġunju 2014, u wittew it-triq għal irkupru ekonomiku aktar fis-sod. Għad hemm sfidi importanti, billi l-livelli ta' dejn privat u pubbliku li għadhom għoljin huma piż għall-ekonomija, u l-qgħad li għadu għoli jxekkel l-aġġustament ekonomiku.

(11)

L-impenn mill-awtoritajiet Portugiżi li jikkoreġu d-defiċit eċċessiv fl-2016 u jirrispettaw r-rakkomandazzjoni fiskali speċifika għall-pajjiż fl-2017 huwa sinjal importanti tal-intenzjoni tal-gvern li jikkonforma mal-Patt ta' Stabbiltà u Tkabbir. Għall-2016, il-gvern itenni l-impenn tiegħu mogħti fil-Grupp tal-Euro tal-11 ta' Frar 2016 li jadotta, meta jkun meħtieġ, miżuri fiskali biex jikkoreġi kull devjazzjoni potenzjali ta' eżekuzzjoni tal-baġit. Barra dan, il-Gvern jimpenja ruħu li jżomm l-iffriżar ta' ċerti approprjazzjonijiet li jammontaw għal 0,2 % tal-PDG kif jissemma fil-Programm ta' Stabbiltà. L-anness għat-talba motivata tat-18 ta' Lulju 2016 jagħti informazzjoni addizzjonali dwar il-mod li permezz tiegħu dawn l-approprjazzjonijiet jistgħu jintużaw, li jagħmel l-impenn li dawn ma jintefqux sakemm ikun hemm bżonn tal-iffriżar, aktar kredibbli. L-ewwel nett, dan jindika li l-approprjazzjonijiet ġew allokati għall-istituzzjonijiet pubbliċi li l-finanzjament tagħhom diġà żdied meta mqabbel mal-2015; b'hekk jistgħu eventwalment ma jitolbux aktar finanzjament. It-tieni nett, sabiex ikollu aċċess għal dawn l-approvazzjonijiet, kull servizz pubbliku jrid jippreżenta awtorizzazzjonijiet ta' nfiq li jirrikjedu l-approvazzjoni espliċita tal-Ministeru tal-Finanzi. Fl-aħħar nett, dawn l-approprjazzjonijiet jiżdiedu ma' dawk li diġà ddaħħlu fil-baġit u fir-riżervi li wkoll huma soġġetti għall-approvazzjoni.

(12)

Fir-rigward tal-korrezzjoni duratura tad-defiċit eċċessiv u, b'mod partikolari, il-baġit għall-2017, it-talba motivata tat-18 ta' Lulju 2016 tirreferi prinċipalment għall-Abbozz ta' Pjan Baġitarju li jmiss li għandu jiġi ppreżentat f'Ottubru 2016 u jimpenja ruħu li jikkonforma mar-rakkomandazzjoni fiskali speċifika għall-pajjiż, li tirrikjedi aġġustament strutturali ta' minn tal-anqas 0,6 % tal-PDG. Dan huwa titjib meta mqabbel mal-aġġustament strutturali ta' 0,35 % biss tal-PDG stipulat fil-Programm ta' Stabbiltà għall-2017 filwaqt li l-miżuri speċifiċi ta' aġġustament għadhom iridu jiġu definiti.

(13)

Fir-rigward tal-effett allegat ta' detriment tas-sanzjonijiet għall-korrezzjoni tad-defiċit eċċessiv fl-2016, il-multa hija limitata permezz tal-Artikolu 6(1) tar-Regolament (UE) Nru 1173/2011 għal 0,2 % tal-PDG, ammont żgħir biżżejjed biex ikun kompatibbli mal-korrezzjoni tad-defiċit eċċessiv. Barra minn hekk, l-ebda multa potenzjali ma jkollha impatt fuq il-varjazzjoni tal-bilanċ strutturali.

(14)

Jintlaqa' l-impenn li jitkomplew ir-riformi strutturali f'setturi ewlenin tal-politika ekonomika kif ukoll il-miżuri sabiex is-sistema bankarja tkun stabbilizzata billi tabilħaqq dawn ikunu wkoll parti mir-rakkomandazzjonijiet rilevanti speċifiċi għall-pajjiż indirizzati lill-Portugall. Fir-rigward ta' riformi strutturali oħra ppjanati għall-2016 u lil hinn, bħal dawk bl-għan li jtejbu l-ambjent tan-negozju jew jindirizzaw is-sottokapitalizzazzjoni tad-ditti, il-miżuri indikati ma jitbiegħdux sostanzjalment minn dak li ġie diġà ppreżentat fil-Programm Nazzjonali ta' Riforma tal-2016. Filwaqt li fil-prinċipju dawn ir-riformi huma sodi, huma soġġetti għal riskji ta' implimentazzjoni. Fl-aħħar nett, l-anness għat-talba motivata tat-18 ta' Lulju 2016 jirreferi espliċitament għall-ħtieġa li jkun definit programm biex jitnaqqas is-self improduttiv.

(15)

Rigward kemm huwa f'waqtu li tiġi adottata d-Deċiżjoni fil-kuntest Ewropew u internazzjonali attwali, il-Kunsill jinsab konxju bis-sħiħ tal-inċertezzi u taż-żieda tagħhom fil-kuntest attwali, b'mod partikolari fid-dawl tal-eżitu tar-referendum fir-Renju Unit dwar is-sħubija fl-Unjoni.

(16)

Fid-dawl tat-talba motivata tal-Portugall tat-18 ta' Lulju 2016 u wara li jitqiesu l-punti mogħtija hawn fuq, b'mod partikolari l-aġġustament fiskali li sar matul il-programm ta' aġġustament ekonomiku li kien akkumpanjat minn ġabra komprensiva ta' riformi strutturali; l-impenji (i) li jiġu adotatti, meta jkun meħtieġ, miżuri fiskali biex jikkoreġi kull devjazzjoni potenzjali ta' eżekuzzjoni tal-baġit fl-2016, (ii) li jiġi implimentat aġġustament strutturali addizzjonali ta' 0,25 % tal-PDG fl-2017 meta mqabbel mal-aġġustament ta' 0,35 % tal-PDG stipulat fil-Programm ta' Stabbiltà ta' April 2016, u (iii) li jiġu implimentati riformi strutturali f'setturi ewlenin fid-dawl ta' sfidi preżenti inklużi miżuri sabiex is-sistema bankarja tkun stabbilizzata, ir-raġunijiet imressqa mill-Portugall jitqiesu li jiġġustifikaw kanċellazzjoni tal-multa ta' 0,2 % tal-PDG,

ADOTTA DIN ID-DEĊIŻJONI:

Artikolu 1

Il-multa ta' 0,2 % tal-PDG li għandha tiġi imposta fuq il-Portugall minħabba nuqqas ta' azzjoni effettiva b'reazzjoni għar-Rakkomandazzjoni tal-Kunsill tal-21 ta' Ġunju 2013 hija kkanċellata.

Artikolu 2

Din id-Deċiżjoni hija indirizzata lir-Repubblika Portugiża.

Magħmul fi Brussell, id-9 ta' Awwissu 2016.

Għall-Kunsill

Il-President

M. LAJČÁK


(1)   ĠU L 306, 23.11.2011, p. 1.

(2)  Regolament tal-Kunsill (KE) Nru 1467/97 tas-7 ta' Lulju 1997 dwar li titħaffef u li tiġi ċċarata l-implimentazzjoni tal-proċedura ta' defiċit eċċessiv (ĠU L 209, 2.8.1997, p. 6).