(1)

Ir-Regolament (UE) 2016/429 jistabbilixxi regoli speċifiċi għall-mard elenkat f’konformità mal-Artikolu 5(1) tiegħu, u jispeċifika kif dawk ir-regoli jridu jiġu applikati għall-kategoriji differenti tal-mard elenkat. Ir-Regolament (UE) 2016/429 jipprevedi wkoll l-approvazzjoni jew l-irtirar mill-Kummissjoni tal-istatus ta’ ħelsien mill-mard tal-Istati Membri jew taż-żoni jew tal-kompartimenti tagħhom rigward ċertu mard elenkat imsemmi fl-Artikolu 9(1), il-punti (a), (b) u (c), tiegħu. Barra minn hekk, ir-Regolament (UE) 2016/429 jipprevedi li l-Istati Membri jistabbilixxu programmi tal-eradikazzjoni obbligatorji għall-mard elenkat imsemmi fl-Artikolu 9(1), il-punt (b), tiegħu u programmi tal-eradikazzjoni fakultattivi għall-mard elenkat imsemmi fl-Artikolu 9(1), il-punt (c), tiegħu, u għall-approvazzjoni ta’ dawn il-programmi mill-Kummissjoni.

(2)

Ir-Regolament Delegat tal-Kummissjoni (UE) 2020/689 (2) jissupplimenta r-Regolament (UE) 2016/429 u jistabbilixxi l-kriterji għall-għoti, għaż-żamma, għas-sospensjoni u għall-irtirar tal-istatus ta’ ħelsien mill-mard għall-Istati Membri jew għaż-żoni jew għall-kompartimenti tagħhom, u r-rekwiżiti għall-approvazzjoni tal-programmi tal-eradikazzjoni għall-Istati Membri jew għaż-żoni jew għall-kompartimenti tagħhom.

(3)

Ir-Regolament ta’ Implimentazzjoni tal-Kummissjoni (UE) 2021/620 (3) jistabbilixxi r-regoli ta’ implimentazzjoni għall-mard elenkat, imsemmi fl-Artikolu 9(1), il-punti (a), (b) u (c), tar-Regolament (UE) 2016/429, tal-annimali, fir-rigward tal-istatus ta’ ħelsien mill-mard u tal-istatus ta’ mingħajr tilqim ta’ ċerti Stati Membri jew taż-żoni jew tal-kompartimenti tagħhom, u l-approvazzjoni tal-programmi tal-eradikazzjoni għal dak il-mard elenkat. B’mod aktar partikolari, dan jelenka fl-Annessi tiegħu, l-Istati Membri jew iż-żoni jew il-kompartimenti tagħhom bi status approvat ta’ ħelsien mill-mard, u bil-programmi tal-eradikazzjoni obbligatorji jew fakultattivi approvati eżistenti. Peress li s-sitwazzjoni epidemjoloġika ta’ ċertu mard fl-Unjoni qed kulma jmur tinbidel, jeħtieġ jiġu emendati ċerti Annessi tar-Regolament ta’ Implimentazzjoni (UE) 2021/620 biex jiġi approvat l-istatus ta’ ħelsien mill-mard ta’ ċerti Stati Membri jew taż-żoni tagħhom, biex tiġi rtirata l-approvazzjoni ta’ ċerti żoni tal-Istati Membri fejn ikunu ġew ikkonfermati xi tifqigħat tal-mard jew fejn il-kundizzjonijiet għaż-żamma tal-istatus ta’ ħelsien mill-mard ma għadhomx jiġu ssodisfati, u biex tiġi approvata l-emenda ta’ ċerti programmi tal-eradikazzjoni.

(4)

Għall-infezzjoni tal-Brucella abortus, B. melitensis u B. suis, għall-infezzjoni tal-Mycobacterium tuberculosis complex (MTBC) u għad-dijarea virali bovina (BVD), diversi Stati Membri dan l-aħħar ressqu applikazzjoni quddiem il-Kummissjoni biex ikollhom status ta’ ħelsien mill-mard jew għal emendi fil-programmi tal-eradikazzjoni approvati għal ċerti żoni fit-territorju tagħhom. Żewġ Stati Membri nnotifikaw ukoll tifqigħat tal-infezzjoni tal-virus tal-ilsien blu (is-serotipi 1-24) (BTV). Dawn l-iżviluppi jeħtieġ jiġu riflessi fl-Annessi rilevanti tar-Regolament ta’ Implimentazzjoni (UE) 2021/620.

(5)

Għall-infezzjoni tal-Brucella abortus, B. melitensis u B. suis fl-annimali ovini u kaprini, l-Italja ressqet informazzjoni lill-Kummissjoni li turi li l-kundizzjonijiet għar-rikonoxximent tal-istatus ta’ ħelsien mill-mard stabbiliti fir-Regolament Delegat (UE) 2020/689 huma ssodisfati fil-provinċja ta’ Matera fir-reġjun tal-Basilicata. Wara l-valutazzjoni mill-Kummissjoni, ħareġ li l-applikazzjoni tikkonforma mal-kriterji stabbiliti fil-Parti II, il-Kapitolu 4, tar-Regolament Delegat (UE) 2020/689 għall-approvazzjoni tal-istatus ta’ ħelsien mill-mard. Għalhekk, dik il-provinċja jenħtieġ li tiġi elenkata bħala ħielsa mill-Brucella abortus, B. melitensis u B. suis fl-annimali ovini u kaprini fil-Parti I, il-Kapitolu 2, tal-Anness I tar-Regolament ta’ Implimentazzjoni (UE) 2021/620.

(6)

Għall-infezzjoni tal-MTBC, l-Italja ressqet informazzjoni lill-Kummissjoni li turi li l-kundizzjonijiet għar-rikonoxximent tal-istatus ta’ ħelsien mill-mard stabbiliti fir-Regolament Delegat (UE) 2020/689 huma ssodisfati fil-provinċja ta’ Sassari fir-reġjun ta’ Sardinja. Wara l-valutazzjoni mill-Kummissjoni, ħareġ li l-applikazzjoni tikkonforma mal-kriterji stabbiliti fil-Parti II, il-Kapitolu 4, tar-Regolament Delegat (UE) 2020/689 għall-approvazzjoni tal-istatus ta’ ħelsien mill-mard. Għalhekk, dik il-provinċja jenħtieġ li tiġi elenkata bħala ħielsa mill-infezzjoni tal-MTBC fil-Parti I tal-Anness II tar-Regolament ta’ Implimentazzjoni (UE) 2021/620.

(7)

Għall-BVD, il-Ġermanja ressqet informazzjoni lill-Kummissjoni li turi li l-kundizzjonijiet għar-rikonoxximent tal-istatus ta’ ħelsien mill-mard għall-BVD stabbiliti fir-Regolament Delegat (UE) 2020/689 huma ssodisfati fir-reġjun ta’ Oldenburg fl-istat ta’ Niedersachsen, u fir-reġjun ta’ Rendsburg-Eckernförde fl-istat ta’ Schleswig-Holstein. Wara l-valutazzjoni mill-Kummissjoni, ħareġ li dawn l-applikazzjonijiet jikkonformaw mal-kriterji stabbiliti fil-Parti II, il-Kapitolu 4, tar-Regolament Delegat (UE) 2020/689 għall-għoti tal-istatus ta’ ħelsien mill-mard għall-BVD. Għalhekk, dawk ir-reġjuni jenħtieġ li jiġu elenkati bi status ta’ ħelsien mill-mard għall-BVD fil-Parti I tal-Anness VII tar-Regolament ta’ Implimentazzjoni (UE) 2021/620.

(8)

Fir-rigward tal-infezzjoni tal-BTV, il-Ġermanja nnotifikat lill-Kummissjoni b’tifqigħat ta’ infezzjoni tas-serotip 3 tal-BTV fl-istati ta’ Hessen u tar-Rheinland-Pfalz, u Spanja nnotifikat lill-Kummissjoni b’tifqigħat tal-infezzjoni bis-serotip 8 tal-BTV fil-Komunità Awtonoma tal-Katalonja. Peress li dawn iż-żoni għandhom status ta’ ħelsien mill-mard u huma elenkati fil-Parti I tal-Anness VIII tar-Regolament ta’ Implimentazzjoni (UE) 2021/620, l-approvazzjoni tal-istatus ta’ ħelsien mill-mard għall-infezzjoni tal-BTV jenħtieġ li tiġi rtirata għall-istati kollha ta’ Hessen u tar-Rheinland-Pfalz, u għall-Komunità Awtonoma tal-Katalonja, u l-entrati għall-Ġermanja u għal Spanja f’dik il-lista jenħtieġ li tiġi emendata skont dan.

(9)

Spanja infurmat lill-Kummissjoni wkoll li estendiet l-ambitu territorjali tal-programm tal-eradikazzjoni fakultattiv għall-infezzjoni tal-BTV diġà approvat għaż-żoni elenkati fil-Parti II tal-Anness VIII tar-Regolament ta’ Implimentazzjoni (UE) 2021/620, biż-żieda ta’ żona li tinkludi lill-Komunità Awtonoma tal-Katalonja. Għalhekk, dik iż-żona jenħtieġ li tiġi miżjuda mal-entrata għal Spanja fil-Parti II tal-Anness VIII tar-Regolament ta’ Implimentazzjoni (UE) 2021/620, u tiġi approvata l-emenda proposta għall-programm tal-eradikazzjoni fakultattiv għall-infezzjoni tal-BTV.

(10)

Għalhekk, l-Annessi I, II, VII u VIII tar-Regolament ta’ Implimentazzjoni (UE) 2021/620 jenħtieġ li jiġu emendati skont dan.

(11)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,