L_202502349GA.000101.fmx.xml

RIALACHÁN CUR CHUN FEIDHME (AE) 2025/2349 ÓN gCOIMISIÚN

an 14 Samhain 2025

maidir le haicmiú earraí áirithe san Ainmníocht Chomhcheangailte

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) Uimh. 952/2013 ó Pharlaimint na hEorpa agus ón gComhairle an 9 Deireadh Fómhair 2013 lena leagtar síos Cód Custaim an Aontais (1), agus go háirithe Airteagal 57(4) agus Airteagal 58(2) de,

De bharr an mhéid seo a leanas:

(1)	Chun a áirithiú go gcuirtear an Ainmníocht Chomhcheangailte atá i gceangal le Rialachán (CEE) Uimh. 2658/87 ón gComhairle (2) i bhfeidhm go haonfhoirmeach, is gá bearta a ghlacadh maidir le haicmiú na n-earraí dá dtagraítear san Iarscríbhinn a ghabhann leis an Rialachán seo.

(2)

Le Rialachán (CEE) Uimh. 2658/87 leagadh síos na rialacha ginearálta maidir le léirmhíniú na hAinmníochta Comhcheangailte. Tá feidhm ag na rialacha sin freisin maidir le haon ainmníocht eile atá bunaithe go hiomlán uirthi nó a bhfuil cuid di bunaithe uirthi nó a chuireann aon fhoroinn bhreise léi agus a bhunaítear le forálacha sonracha de chuid an Aontais, d’fhonn bearta taraife agus bearta eile i ndáil le trádáil in earraí a chur i bhfeidhm.

(3)	De bhun na rialacha ginearálta sin, na hearraí a bhfuil tuairisc orthu i gcolún (1) den tábla a leagtar amach san Iarscríbhinn, ba cheart iad a aicmiú faoin gcód AC a luaitear i gcolún (2), de bhua na gcúiseanna a leagtar amach i gcolún (3) den tábla sin.

(4)

Is iomchuí a fhoráil, i ndáil le faisnéis taraife cheangailteach arna heisiúint i leith na n-earraí a bhaineann leis an Rialachán seo ar faisnéis í nach bhfuil i gcomhréir leis an Rialachán seo, go bhféadfaidh an sealbhóir, ar feadh tréimhse áirithe, leanúint den fhaisnéis sin a agairt i gcomhréir le hAirteagal 34(9) de Rialachán (AE) Uimh. 952/2013. Is tréimhse 3 mhí ba cheart a bheith sa tréimhse sin.

(5)	Tá na bearta dá bhforáiltear sa Rialachán seo i gcomhréir leis an tuairim ón gCoiste um an gCód Custaim,

TAR ÉIS AN RIALACHÁN SEO A GHLACADH:

Airteagal 1

Na hearraí a bhfuil tuairisc orthu i gcolún (1) den tábla a leagtar amach san Iarscríbhinn, aicmeofar iad san Ainmníocht Chomhcheangailte faoin gcód AC a luaitear i gcolún (2) den tábla sin.

Airteagal 2

Faisnéis taraife cheangailteach nach bhfuil i gcomhréir leis an Rialachán seo, féadfar í a agairt fós i gcomhréir le hAirteagal 34(9) de Rialachán (AE) Uimh. 952/2013 go ceann tréimhse 3 mhí ó dháta theacht i bhfeidhm an Rialacháin seo.

Airteagal 3

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, an 14 Samhain 2025.

Thar ceann an Choimisiúin,

Ar son an Uachtaráin,

Gerassimos THOMAS

An tArd-Stiúrthóir

Ard-Stiúrthóireacht an Chánachais agus an Aontais Chustaim

(1) IO L 269, 10.10.2013, lch. 1, ELI: http://data.europa.eu/eli/reg/2013/952/oj.

(2) Rialachán (CEE) Uimh. 2658/87 ón gComhairle an 23 Iúil 1987 maidir leis an ainmníocht taraife agus staidrimh agus leis an gComhtharaif Chustaim (IO L 256, 7.9.1987, lch. 1, ELI: http://data.europa.eu/eli/reg/1987/2658/oj).

IARSCRÍBHINN

Tuairisc ar na hearraí

Aicmiú

(Cód AC)

Cúiseanna

(1)

(2)

(3)

Aonad folctha, ar a dtugtar spá snámha, le haghaidh úsáid amuigh faoin aer, atá déanta as plaisteach ABS, agus atá thart ar 420 × 225 × 127 cm. Tá glanmheáchan 800 kg san earra, agus tá toirt 5 000 lítear ann.

Tá an spá snámha feistithe leis na nithe seo a leanas:

—	buinní suathaireachta,

—	buinní frithshreibhe ina bhfuil scairdeanna cumhachtacha,

—	caidéil suathaireachta,

—	córais téimh,

—	córas scagtha,

—	caidéal imshruthaithe,

—	aer-rialtán,

—	cuasán nite ózóin,

—	soilsiú LED,

—	lámhráille agus pillín muiníl,

—	insliú iomlán agus cumhdra adhmaid.

Tá báisín céimnithe ag an earra, ina bhfuil 6 áit le haghaidh suathaireachta le 36 bhuinne san iomlán (áit amháin ina bhfuil 12 bhuinne, áit amháin ina bhfuil 8 mbuinne, áit amháin ina bhfuil 6 bhuinne, 2 áit ina bhfuil 4 bhuinne agus áit amháin ina bhfuil 2 bhuinne). Tá spás ann freisin atá thart ar 3 mhéadar ar fad le haghaidh snámha do dhuine amháin, ina bhfuil 4 bhuinne (ina bhfuil scairdeanna cumhachtacha, le haghaidh snámh frithshreibhe/ ‘mar a bhfuil tú’)

Tá sé deartha lena úsáid mar fhearas hidreasuathaireachta agus mar linn snámha le haghaidh snámha agus cineálacha eile aclaíochta san uisce.

(Féach an íomhá) (*1)

9506 99 90

Cinntear an t-aicmiú le rialacha ginearálta 1, 3(c) agus 6 maidir le léirmhíniú na hAinmníochta Comhcheangailte agus le foclaíocht na gcód AC 9506, 9506 99 agus 9506 99 90.

Meastar gur earraí ilchodacha atá sa táirge de réir bhrí riail ghinearálta 3(b), ina bhfuil fearas hidreasuathaireachta a thagann faoi cheannteideal 9019 agus linn snámha/lapadaíola a thagann faoi cheannteideal 9506. Déanfar an táirge a aicmiú amhail is dá mba é an chomhpháirt é a thugann an tsaintréith dó.

Ós rud é go bhfuil an t-earra deartha go sonrach chun feidhmiú go comhuaineach mar fhearas hidreasuathaireachta agus mar linn snámha, ní féidir an chomhpháirt a thugann an tsaintréith don táirge a chinneadh. Na buinní agus na caidéil speisialta is gá chun an hidreasuathaireacht/spátheiripe a dhéanamh agus an linn snámha atá feistithe leis na buinní speisialta ina bhfuil scairdeanna cumhachtacha, le haghaidh an tsnámha frithshreibhe nó na gcineálacha eile aclaíochta san uisce, tá an tábhacht chéanna ag baint leo uile.

Dá réir sin, tá an táirge le haicmiú faoin gceannteideal a thagann ar deireadh in ord uimhriúil as measc na gceannteideal sin ar fiú iad a bhreithniú freisin, mar atá, ceannteideal 9506, mar linn snámha.

Dá bhrí sin, is faoi chód AC 9506 99 90 atá an táirge le haicmiú, mar linn snámha.

(*1) Is le faisnéis a thabhairt, agus lena aghaidh sin amháin, atá na híomhánna ann.