European flag

Iris Oifigiúil
an Aontais Eorpaigh

GA

Sraith L


2024/2382

10.9.2024

RIALACHÁN CUR CHUN FEIDHME (AE) 2024/2382 ÓN gCOIMISIÚN

an 9 Meán Fómhair 2024

lena leasaítear Rialachán Cur Chun Feidhme (AE) 2022/1195 a mhéid a bhaineann leis an teimpléad le haghaidh na suirbhéanna ar Synchytrium endobioticum (Schilbersky) Percival, ainmniú na láithreán táirgthe inmhíolaithe agus cúlghairm na mbeart i limistéir inmhíolaithe

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) 2016/2031 ó Pharlaimint na hEorpa agus ón gComhairle an 26 Deireadh Fómhair 2016 maidir le bearta cosantacha i gcoinne lotnaidí plandaí, lena leasaítear Rialacháin (AE) Uimh. 228/2013, (AE) Uimh. 652/2014 agus (AE) Uimh. 1143/2014 ó Pharlaimint na hEorpa agus ón gComhairle agus lena n-aisghairtear Treoracha 69/464/CEE, 74/647/CEE, 93/85/CEE, 98/57/CE, 2000/29/CE, 2006/91/CE agus 2007/33/CE ón gComhairle (1), agus go háirithe Airteagal 28(1), pointí (a) go (h), de,

De bharr an mhéid seo a leanas:

(1)

Le Rialachán Cur Chun Feidhme (AE) 2022/1195 ón gCoimisiún (2) bunaítear bearta chun Synchytrium endobioticum (Schilbersky) Percival (‘an lotnaid shonraithe’) a dhíothú agus chun a leathadh a chosc i gcríoch an Aontais. Tháinig sé i gcomharbas ar Threoir 69/464/CEE ón gComhairle (3), Treoir a aisghaireadh le Rialachán (AE) 2016/2031 ón 1 Eanáir 2022 ar aghaidh.

(2)

I gcomhréir le hAirteagal 4(1) de Rialachán Cur Chun Feidhme (AE) 2022/1195, tá na húdaráis inniúla le láithreán táirgthe a ainmniú mar láithreán inmhíolaithe i gcás inar deimhníodh go hoifigiúil láithreacht na lotnaide sonraithe sa láithreán sin leis na tástálacha dá dtagraítear in Airteagal 3(2) den Rialachán Cur Chun Feidhme sin.

(3)

Maidir le limistéir a chríochnaigh na húdaráis inniúla mar dháileachtaí talún éillithe leis an lotnaid shonraithe, de bhun Airteagal 2(1) de Threoir 69/464/CEE, roimh an 1 Eanáir 2022, bhí amhras ann ar cheart iad a mheas a bheith ainmnithe mar láithreáin táirgthe inmhíolaithe freisin de bhun Airteagal 4(1) de Rialachán Cur Chun Feidhme (AE) 2022/1195. Chun a áirithiú go gcosnófar críoch an Aontais ón lotnaid shonraithe ar an leibhéal is airde is féidir, ba cheart na dáileachtaí talún sin a bheith faoi réir na gceanglas céanna leis na láithreáin táirgthe inmhíolaithe a ainmnítear de bhun Rialachán Cur Chun Feidhme (AE) 2022/1195. Ar an gcúis sin, in Airteagal 4(1) den Rialachán Cur Chun Feidhme sin, ba cheart a shoiléiriú gur cheart a mheas go bhfuil dáileachtaí talún a críochnaíodh mar dháileachtaí talún éillithe de bhun Airteagal 2(1) de Threoir 69/464/CEE roimh an 1 Eanáir 2022 le bheith ainmnithe mar láithreáin táirgthe inmhíolaithe freisin.

(4)

I gcomhréir le hAirteagal 3(3) de Rialachán Cur Chun Feidhme (AE) 2022/1195, ní mór do na Ballstáit tuairisciú don Choimisiún agus do na Ballstáit eile faoin 30 Aibreán gach bliain maidir le torthaí na suirbhéanna dá dtagraítear i mír 1 den Airteagal sin, ar suirbhéanna iad a cuireadh i gcrích i gcaitheamh na bliana féilire roimhe sin. Ní mór dóibh na torthaí sin a thuairisciú i gcomhréir leis an teimpléad a leagtar amach in Iarscríbhinn II a ghabhann leis an Rialachán Cur Chun Feidhme sin.

(5)

Tá sé níos praiticiúla tagairt a dhéanamh sa teimpléad do mhéid an limistéir inmhíolaithe sa bhliain a chumhdaítear sa tuarascáil agus sa bhliain roimhe sin freisin, seachas an limistéar críochaithe, mar is é an limistéar inmhíolaithe an limistéar lena n-éilítear an tuairisciú is mionsonraithe ar thorthaí. Thairis sin, ní sholáthraítear faisnéis shuntasach chun críocha an tsuirbhé trí shonraí a thuairisciú maidir le samplaí le haghaidh amharc-chigireacht ar thiúbair, ná trí mhionsonraí maidir le modheolaíocht na tástála i dtástálacha saotharlainne a thuairisciú. Dá bhrí sin, ba cheart na colúin faoi seach a bhaint den teimpléad suirbhé.

(6)

Thairis sin, is gá a shoiléiriú sa chéad abairt d’Iarscríbhinn II go bhfuil an teimpléad le torthaí na suirbhéanna a dhéantar le linn na bliana féilire roimh bhliain an tuairiscithe a chur i láthair.

(7)

In Iarscríbhinn IV a ghabhann le Rialachán Cur Chun Feidhme (AE) 2022/1195 leagtar amach na coinníollacha maidir leis na bearta a chúlghairm mar a thagraítear dóibh in Airteagal 9 den Rialachán Cur Chun Feidhme sin.

(8)

Thairis sin, agus chun an leibhéal is airde deimhneachta is féidir a áirithiú maidir leis an riosca fíteashláintíochta faoi seach a dhíothú, is gá a chur le pointe 1.1 d’Iarscríbhinn IV a ghabhann le Rialachán Cur Chun Feidhme (AE) 2022/1195, i gcás inar úsáideadh an crios inmhíolaithe mar fhéarthalamh buan, ní féidir na bearta a chúlghairm ach amháin i gcás nár aimsíodh aon chomhartha ionfhabhtaithe leis an lotnaid shonraithe i samplaí ithreach, ar samplaí iad a glacadh tríd an scéim atá le húsáid chun an ithir a fháil le haghaidh na tástála a chur i bhfeidhm mar a leagtar amach i bpointe 1.2 d’Iarscríbhinn IV a ghabhann le Rialachán Cur Chun Feidhme (AE) 2022/1195.

(9)

Dá bhrí sin, ba cheart Rialachán Cur Chun Feidhme (AE) 2022/1195 a leasú dá réir sin.

(10)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,

TAR ÉIS AN RIALACHÁN SEO A GHLACADH:

Airteagal 1

Leasuithe ar Rialachán Cur Chun Feidhme (AE) 2022/1195

Leasaítear Rialachán Cur Chun Feidhme (AE) 2022/1195 mar a leanas:

(1)

in Airteagal 4(1), cuirtear an fomhír seo a leanas leis:

‘Dáileachtaí talún a chríochnaigh na húdaráis inniúla mar dháileachtaí talún éillithe, i gcomhréir le hAirteagal 2(1) de Threoir 69/464/CEE, roimh an 1 Eanáir 2022, measfar iad a bheith ainmnithe mar láithreáin táirgthe inmhíolaithe.’;

(2)

Leasaítear Iarscríbhinn II mar a leagtar amach san Iarscríbhinn a ghabhann leis an Rialachán seo;

(3)

In Iarscríbhinn IV, cuirtear an méid seo a leanas in ionad phointe 1.1:

‘1.1.

Tar éis 50 bliain ar a laghad ón uair dheireanach a braitheadh an lotnaid shonraithe, má tá taifead gan bhearna ann de bharra sa chrios inmhíolaithe, rud a léiríonn gur comhlíonadh forálacha Airteagal 6(2) agus (3) le linn an ama ar fad agus nár úsáideadh an crios inmhíolaithe mar fhéarthalamh buan.

I gcás inar úsáideadh an crios inmhíolaithe mar fhéarthalamh buan, ní féidir na bearta a chúlghairm ach amháin i gcás nár aimsíodh aon chomhartha ionfhabhtaithe leis an lotnaid shonraithe i samplaí ithreach, ar samplaí iad a glacadh tríd an scéim atá le húsáid chun an ithir a fháil le haghaidh na tástála a chur i bhfeidhm, scéim a leagtar amach i bpointe 1.2;

nó’.

Airteagal 2

Teacht i bhfeidhm

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, an 9 Meán Fómhair 2024.

Thar ceann an Choimisiúin

An tUachtarán

Ursula VON DER LEYEN


(1)   IO L 317, 23.11.2016, lch. 4, ELI: http://data.europa.eu/eli/reg/2016/2031/oj.

(2)  Rialachán Cur Chun Feidhme (AE) 2022/1195 ón gCoimisiún an 11 Iúil 2022 lena mbunaítear bearta chun Synchytrium endobioticum (Schilbersky) Percival a dhíothú agus chun a leathadh a chosc (IO L 185, 12.7.2022, lch. 65, ELI: http://data.europa.eu/eli/reg_impl/2022/1195/oj).

(3)  Treoir 69/464/CEE ón gComhairle an 8 Nollaig 1969 maidir le Galar Fadharcáin Phrátaí a rialú (IO L 323, 24.12.1969, lch. 1, ELI: http://data.europa.eu/eli/dir/1969/464/oj).


IARSCRÍBHINN

Cuirtear an méid seo a leanas in ionad Iarscríbhinn II a ghabhann le Rialachán (AE) 2022/1195:

‘‘IARSCRÍBHINN II

An teimpléad suirbhé dá dtagraítear in Airteagal 3

Teimpléad chun torthaí na suirbhéanna ar ghalar fadharcáin prátaí a rinneadh le linn na bliana féilire roimh bhliain an tuairiscithe a chur i láthair.

Ná húsáid an tábla seo ach amháin le haghaidh thorthaí an tsuirbhé i leith prátaí a sábháladh i do thír féin.

An Ballstát

Catagóir

Limistéar faoi bharr (ha)

Amharc-chigireacht ar thiúbair

Tástáil saotharlainne

Méid tosaigh an limistéir inmhíolaithe (1) (ha)

Méid nuashonraithe an limistéir inmhíolaithe (2) (ha)

Uimhir fógartha na ráigeanna ar tugadh fógra ina leith, de réir mar is infheidhme, i gcomhréir le Rialachán Cur Chun Feidhme (AE) 2019/1715

Faisnéis bhreise

An líon baisceanna

An líon baisceanna amhrasacha

An líon samplaí a tástáladh

An líon samplaí deimhneacha

 

Tiúbair prátaí le haghaidh plandú

 

 

 

 

 

 

 

 

 

Tiúbair prátaí cé is moite de na tiúbair prátaí le haghaidh plandú

 

 

 

 

 

 

 

 

 

’ ’

(1)  Méid iomlán an limistéir inmhíolaithe roimh an mbliain a chumhdaítear leis an tuarascáil.

(2)  Méid iomlán an limistéir inmhíolaithe sa bhliain a chumhdaítear leis an tuarascáil.


ELI: http://data.europa.eu/eli/reg_impl/2024/2382/oj

ISSN 1977-0839 (electronic edition)