—

ag féachaint do chinneadh uaithi maidir le hurscaoileadh i leith chur chun feidhme bhuiséad an Chomhghnóthais Eochairtheicneolaíochtaí Digiteacha don bhliain airgeadais 2022,

—

ag féachaint do Riail 100 agus d’Iarscríbhinn IV dá Rialacha Nós Imeachta,

—

ag féachaint don tuarascáil ón gCoiste um Rialú Buiséadach (A9-0101/2024),

A.

de bhrí, i mí na Samhna 2021, gur bunaíodh an Comhghnóthas Eochairtheicneolaíochtaí Digiteacha (‘Comhghnóthas KDT’), atá lonnaithe sa Bhruiséil, don tréimhse a chríochnóidh an 31 Nollaig 2031 faoin gclár Fís Eorpach le Rialachán (AE) 2021/2085 ón gComhairle (1);

B.

de bhrí gur tháinig Comhghnóthas KDT in ionad agus i gcomharbas ar an gComhghnóthas Comhpháirteanna agus Córais Leictreonacha le haghaidh Ceannaireacht Eorpach (ECSEL) a cuireadh ar bun faoin gclár Fís 2020 i mí na Bealtaine 2014 le Rialachán (AE) Uimh. 561/2014 ón gComhairle (2) ar feadh tréimhse go dtí an 31 Nollaig 2024; de bhrí, an 26 Meitheamh 2014, gur tháinig Comhghnóthas ECSEL in ionad agus i gcomharbas ar an gComhairle Chomhairleach Eorpach um an Tionscnamh Nanaileictreonaice agus ar an gComhghnóthas um Thaighde agus Theicneolaíocht Ardfhorbartha le haghaidh Córais agus Faisnéis Neadaithe;

C.

de bhrí gur comhpháirtíocht phoiblí-príobháideach é Comhghnóthas KDT a bhíonn ag díriú isteach ar thaighde agus nuálaíocht in eochairtheicneolaíochtaí digiteacha atá bunriachtanach le go mbainfidh an Eoraip ceannaireacht iomaíoch amach sa gheilleagar digiteach, go sonrach in earnáil na gcomhpháirteanna agus na gcóras leictreonach;

D.

de bhrí gurb iad na comhaltaí bunaidh ná an tAontas Eorpach, a ndéanann an Coimisiún ionadaíocht thar a cheann, na Stáit Rannpháirteacha, agus trí chomhlachas tionsclaíochta, is é sin an Comhlachas Eorpach um Lánpháirtiú Córas Cliste, an Comhlachas um Ghníomhaíochtaí Eorpacha Nanaileictreonaice, agus an Comhlachas Tionscail Inside, atá ionadaíoch ar gheallsealbhóirí i micrileictreonaic agus nanaileictreonaic, córais chliste chomhtháite agus córais leabaithe agus chibirfhisiciúla;

E.

de bhrí, i mí Iúil 2023, de bhun Rialachán (AE) 2023/1782 ón gComhairle (3), go ndearnadh Comhghnóthas KDT a aistriú ina Chomhghnóthas um Shliseanna; de bhrí, de réir an leasaithe, gurb é an réimse sainchúraimí feabhsaithe atá ag an gComhghnóthas um Shliseanna ná forbairt teicneolaíochtaí leathsheoltóra nuálacha den chéad ghlúin eile a chothú agus acmhainneachtaí táirgthe sliseanna san Eoraip faoin ‘Tionscnamh Sliseanna don Eoraip’ a neartú; de bhrí go méadóidh na ranníocaíochtaí ón Aontas le Comhghnóthas KDT ó EUR 1,8 billiún go dtí EUR 4,2 billiún, agus go bhfuil EUR 2,7 billiún le cistiú as an gclár ‘Fís Eorpach’ agus EUR 1,5 billiún as an gclár don Eoraip Dhigiteach;

F.

de bhrí, chun trédhearcacht a mhéadú, gur cheart do Chomhghnóthas KDT faisnéis ábhartha maidir le ranníocaíochtaí na gcomhaltaí ar leibhéal an chláir a nochtadh ina chuntais bhliantúla; de bhrí, le haghaidh gach clár a bhfuil siad ag oibriú fúthu, gur cheart don Chomhghnóthas KDT gach faisnéis ábhartha, lena n-áirítear na spriocanna dlíthiúla do na ranníocaíochtaí atá socraithe don chlár ar leith, méid na ranníocaíochtaí atá faighte agus méid na ngealltanas dlíthiúil, a chur i láthair in aghaidh na ballchatagóire suas go dtí deireadh na bliana; de bhrí gur cheart do Chomhghnóthas KDT leanúint den trédhearcacht a fheabhsú;