1. 

Prinċipalment, ir-Repubblika tal-Polonja titlob lill-Qorti tal-Ġustizzja, għall-annullament ta’ diversi dispożizzjonijiet tad-Direttiva (UE) 2018/957 ( 2 ), li temenda d-Direttiva 96/71/KE ( 3 ) dwar l-istazzjonar ta’ ħaddiema fil-qafas ta’ prestazzjoni ta’ servizzi. Sussidjarjament, hija titlob l-annullament tad-Direttiva 2018/957 fl-intier tagħha.

2. 

F’din l-istess data, ser nippreżenta l-konklużjonijiet tiegħi dwar ir-rikors parallel (C‑620/18, L‑Ungerija vs Il‑Parlament u Il‑Kunsill) ( 4 ) li l-Ungerija tippreżenta kontra l-istess direttiva, għal raġunijiet simili. Ser nerġa’ nirreferi għall-kontenut tiegħu, jekk ikun neċessarju sabiex jiġu evitati repetizzjonijiet inutli, jew ser nittraskrivihom.

3.

Nirreferi għad-deskrizzjoni tad-dispożizzjonijiet rilevanti tad-Direttivi 2018/957 u 96/71 li tinsab fil-konklużjonijiet C‑620/18.

4.

Ir-Repubblika tal-Polonja titlob li l-Qorti tal-Ġustizzja tiddikjara l-invalidità tal-punt 2(a) u (b) tal-Artikolu 1 u tal-Artikolu 3(3) tad-Direttiva 2018/957. Barra minn hekk, huwa ta’ interess li l-Parlament Ewropew u l-Kunsill jiġu kkundannati għall-ispejjeż.

5.

Sussidjarjament, jekk il-Qorti tal-Ġustizzja ssib li dawn id-dispożizzjonijiet tad-Direttiva 2018/957 ma jistgħux jiġu sseparati, mingħajr ma tinbidel is-sustanza tagħhom, mill-kumplament ta’ dawk li jinsabu fiha, ir-Repubblika tal-Polonja titlob l-annullament tad-Direttiva 2018/957 fl-intier tagħha.

6.

Il-Parlament Ewropew u l-Kunsill jitolbu lill-Qorti tal-Ġustizzja tiċħad ir-rikors u tikkundanna lir-Repubblika tal-Polonja għall-ispejjeż.

7.

Franza, il-Ġermanja, il-Pajjiżi l-Baxxi, l-Isvezja u l-Kummissjoni tħallew jintervjenu fil-proċedura, insostenn tat-talbiet tal-Parlament u tal-Kunsill. Il-gvernijiet kollha ppreżentaw osservazzjonijiet bil-miktub minbarra l-Gvern tal-Pajjiżi l-Baxxi li aderixxa lilu nnifsu mal-argumenti tal-Parlament Ewropew u tal-Kunsill.

8.

Waqt is-seduta li saret fit‑3 ta’ Marzu 2020 flimkien ma’ dik tal-Kawża C‑620/18, ipparteċipaw il-Kunsill, il-Parlament, il-Kummissjoni kif ukoll il-Gvern Pollakk, Franċiż, Ġermaniż, Svediż u dak tal-Pajjiżi l-Baxxi.

9.

Il-Parlament Ewropew iqis li d-dispożizzjonijiet tad-Direttiva 2018/957 prinċipalment ikkontestati mir-Repubblika tal-Polonja ma jistgħux jiġu sseparati mill-kumplament ta’ din id-direttiva. Konsegwentement, l-annullament parzjali mitlub ma jkunx fattibbli.

10.

Madankollu, peress li r-Repubblika tal-Polonja sussidjarjament talbet lill-Qorti tal-Ġustizzja tannulla din id-direttiva fl-intier tagħha, il-Parlament Ewropew iqis li r-rikors huwa ammissibbli.

11.

Skont ġurisprudenza stabbilita tal-Qorti tal-Ġustizzja, l-annullament parzjali ta’ att tal-Unjoni huwa possibbli biss jekk l-elementi li jirreferi għalihom ikunu jistgħu jiġu sseparati mill-kumplament tal-att. Dan ir-rekwiżit ma jiġix issodisfatt meta l-annullament parzjali jkollu l-effett li jbiddel is-sustanza ta’ dan l-att. Il-verifika ta’ jekk ċerti elementi jistgħux jiġu sseparati teħtieġ li tiġi eżaminata l-portata tagħhom sabiex jiġi evalwat jekk l-invalidazzjoni tagħhom tbiddilx l-ispirtu u s-sustanza tal-imsemmi att ( 5 ).

12.

Fil-fehma tiegħi, ir-Repubblika tal-Polonja tikkontesta żewġ dispożizzjonijiet li jistgħu jitqiesu bħala ewlenin fid-Direttiva 2018/957, kemm minħabba l-portata kif ukoll minħabba l-għan tagħhom.

13.

L-invalidità li ġiet proposta prinċipalment tkun taffettwa, fil-fatt, żewġ miżuri ewlenin tar-regolament il-ġdid: a) is-sostituzzjoni tal-kunċett ta’ “rati minimi ta’ ħlas” b’dak ta’ “remunerazzjoni”; u b) l-iskema tal-ħaddiema kkollokati fit-tul.

14.

Dawn iż-żewġ regoli ġodda huma, preċiżament, l-emendi prinċipali li huma introdotti fid-Direttiva 96/71 mid-Direttiva 2018/957. It-tnejn li huma għandhom l-għan li jibdlu l-bilanċ tal-interessi previsti fid-Direttiva 96/71 sabiex tingħata protezzjoni ikbar lill-ħaddiema kkollokati fil-qafas tal-provvista transnazzjonali ta’ servizzi. L-annullament tagħhom b’mod iżolat ikun iwassal għal tibdil fis-sustanza tad-Direttiva 2018/957.

15.

Madankollu, kif jirrikonoxxi l-Parlament Ewropew, ir-rikors huwa ammissibbli, għaliex jinkludi t-talba sussidjarja għall-annullament tad-Direttiva 2018/957 fl-intier tagħha.

16.

Ser nipproċedi għall-analiżi tar-raġunijiet għal invalidità billi nibda bit-tieni waħda, li jidhirli li hija iktar koerenti mill-perspettiva sistematika.

17.

Fir-rigward tal-eżami tal-ġurisprudenza tal-Qorti tal-Ġustizzja f’dan il-qasam, tal-proċess ta’ armonizzazzjoni tad-direttivi li jikkonċernaw il-ħaddiema kkollokati fil-kuntest tal-provvista transnazzjonali ta’ servizzi u, b’mod ġenerali, tal-evoluzzjoni tas-sistema legali tal-Unjoni dwar l-iskema ta’ dawn il-ħaddiema, nirreferi għall-konklużjonijiet C‑620/18 ( 6 ).

18.

Il-Gvern Pollakk jiċħad l-użu tal-Artikoli 53(1) TFUE u 62 TFUE bħala bażi legali tad-Direttiva 2018/957, minħabba li din, kuntrarjament għad-Direttiva 96/71, toħloq restrizzjonijiet għal-libertà li jiġu pprovduti servizzi minn impriżi li jikkollokaw il-ħaddiema.

19.

F’dan ir-rigward, hija ssostni li:

20.

Il-Kunsill, il-Parlament Ewropew kif ukoll il-Gvern Ġermaniż, Franċiż u Svediż iqisu li l-bażi legali tad-Direttiva 2018/957 (Artikoli 53(1) TFUE u 62 TFUE) hija dik korretta.

21.

Sabiex jiġu evitati repetizzjonijiet, nirreferi għall-konklużjonijiet C‑620/18, fir-rigward tal-ġurisprudenza tal-Qorti tal-Ġustizzja dwar il-bażijiet legali tal-atti tal-Unjoni ( 7 ), kif ukoll għall-analiżi tal-għanijiet, tal-kontenut u tal-kuntest tad-Direttiva 2018/957 ( 8 ).

22.

Wara li ssir din l-analiżi, ma narax għalfejn għandu jiġi kkunsidrat li l-bażi legali tad-Direttiva 2018/957 (Artikoli 53(1) TFUE u 62 TFUE) hija żbaljata.

23.

Id-Direttiva 2018/957 twettaq emenda importanti iżda limitata tad-Direttiva 96/71. Skont il-ġurisprudenza tal-Qorti tal-Ġustizzja, att li jemenda ieħor preċedenti normalment ikollu l-istess bażi legali ( 9 ), fatt li jidhirli li huwa loġiku. Għalhekk, l-Artikoli 53(1) TFUE u 62 TFUE jistgħu jikkostitwixxu l-bażi legali xierqa għad-Direttiva 2018/957, bħalma kienu preċedentement għad-Direttiva 96/71 li qiegħda tiġi emendata permezz tagħhom.

24.

Id-Direttiva 2018/957 tadatta s-soluzzjoni leġiżlattiva mogħtija mid-Direttiva 96/71 għall-fenomenu tal-kollokament (li qiegħed jiżdied) transnazzjonali tal-ħaddiema, sabiex tiffaċilita l-libertà li jiġu pprovduti servizzi tal-impriżi li jirrikorru għal dan il-metodu ta’ mobilizzazzjoni tal-element ta’ xogħol.

25.

Dan l-adattament kien neċessarju minħabba l-evoluzzjoni tas-swieq tax-xogħol tal-Unjoni u kien imfassal għal protezzjoni ikbar tal-kundizzjonijiet tax-xogħol tal-ħaddiema kkollokati. Jista’ jkun li, f’ċerti każijiet, ikun hemm tnaqqis korrelattiv tal-kompetittività tal-impriżi sabiex jiġu pprovduti servizzi fi Stati Membri oħra bl-użu ta’ dan il-mezz, iżda din hija l-għażla (leġittima) mixtieqa mil-leġiżlatur Ewropew.

26.

Meta jadotta regola ta’ armonizzazzjoni, il-leġiżlatur tal-Unjoni ma jistax jiġi mċaħħad mill-possibbiltà li jadatta dan l-att għal kull bidla fiċ-ċirkustanzi jew għal kull evoluzzjoni tal-konjizzjonijiet, peress li huwa għandu l-obbligu li jiżgura l-protezzjoni tal-interessi ġenerali rrikonoxxuti mit-Trattat ( 10 ).

27.

Dan huwa preċiżament dak li ġara bl-approvazzjoni tad-Direttiva 2018/957. Il-leġiżlatur tal-Unjoni introduċa tibdiliet fid-Direttiva 96/17 sabiex jadatta l-bilanċ tal-interessi rifless fiha għas-sitwazzjoni l-ġdida ġġenerata mill-moviment transnazzjonali ta’ ħaddiema. L-interessi li qegħdin jikkompetu jibqgħu l-istess, iżda l-punt ewlieni u l-punt ta’ bilanċ bejniethom xaqilbu lejn protezzjoni ikbar tad-drittijiet tax-xogħol ta’ dawn il-ħaddiema. Dan l-ibbilanċjar mill-ġdid ma jiġġustifikax il-bidla tal-bażi legali fir-rigward tad-Direttiva 96/71.

28.

Fl-aħħar nett, infakkar li r-Repubblika tal-Polonja ssostni (permezz ta’ argumenti limitati) li d-Direttiva 2018/957 kellha tkun sostnuta fuq il-bażijiet legali tal-politika soċjali, b’mod partikolari fuq l-Artikolu 153 TFUE. Għar-raġunijiet li esponejt fil-konklużjonijiet C‑620/18 ( 11 ), lanqas ma naqbel ma’ dan l-argument.

29.

Il-Gvern Pollakk isostni li d-Direttiva 2018/957 toħloq restrizzjonijiet għal-libertà li jiġu pprovduti servizzi fi ħdan l-Unjoni li jmorru kontra l-Artikolu 56 TFUE. B’mod partikolari, dawn ir-restrizzjonijiet joriġinaw minn żewġ elementi ġodda li din id-direttiva tintroduċi fid-Direttiva 96/71, billi timponi fuq l-Istati Membri l-obbligu li jiżguraw lill-ħaddiema kkollokati:

30.

Konformement ma’ dan l-approċċ, il-Gvern Pollakk jaqsam l-ewwel motiv f’żewġ partijiet. Ser nanalizzahom wara li nagħmel kunsiderazzjoni preliminari tal-istħarriġ ġudizzjarju tad-direttivi ta’ armonizzazzjoni fil-qasam tal-libertà li jiġu pprovduti servizzi.

31.

Ir-Repubblika tal-Polonja tittratta r-regoli li d-Direttiva 2018/957 timponi fuq il-kollokament tal-ħaddiema (fil-kuntest tal-provvista transnazzjonali ta’ servizzi) bl-istess parametri bħal dawk użati mill-Qorti tal-Ġustizzja sabiex tistħarreġ il-miżuri nazzjonali li jirrestrinġu dan it-tip ta’ relazzjonijiet ġuridiċi.

32.

Nirreferi għall-istudju li sar fil-konklużjonijiet tiegħi C‑620/18 dwar din il-ġurisprudenza, relatat mal-istħarriġ tal-kompatibbiltà tad-direttivi ta’ armonizzazzjoni mal-libertà li jiġu pprovduti servizzi billi jiġi applikat il-prinċipju ta’ proporzjonalità ( 12 ).

33.

Dan l-istudju jwassalni sabiex nikkonferma li l-ġurisprudenza tal-Qorti tal-Ġustizzja dwar miżuri nazzjonali li jillimitaw il-kollokamenti tal-ħaddiema fil-kuntest tal-provvista transnazzjonali ta’ servizzi ma tistax tiġi trasposta, mingħajr ebda dubju, għall-eżami tal-kompatibbiltà ta’ leġiżlazzjoni tal-Unjoni li tarmonizza dan il-fenomenu (bħad-Direttiva 2018/957), mal-Artikolu 56 TFUE.

34.

Kuntrarjament għal dak li jsostni l-Gvern Pollakk, direttiva ta’ armonizzazzjoni tista’ toħloq restrizzjonijiet għall-moviment liberu tas-servizzi li, jekk jiġu adottati minn Stat Membru wieħed biss, imorru kontra l-Artikolu 56 TFUE.

35.

Fil-fatt, kull miżura ta’ armonizzazzjoni li tipproteġi interess soċjali fundamentali, bħad-drittijiet tal-ħaddiema kkollokati, tirrendi b’xi mod diffiċli l-libertà li jiġu pprovduti servizzi tal-impriżi li jużawhom. Madankollu din ir-restrizzjoni għandha impatt ħafna inqas importanti fuq is-suq intern minn miżura nazzjonali ekwivalenti, peress li l-ewwel waħda hija implimentata fit-territorju kollu tal-Unjoni. L-eżistenza u l-effetti restrittivi tagħha jistgħu jisparixxu biss fil-każ ta’ ekwivalenza tal-kundizzjonijiet tax-xogħol bejn l-Istati Membri kollha, li fir-rigward tagħhom l-Unjoni ma hijiex kompetenti.

36.

Fid-dawl tal-ġurisprudenza tiegħu dwar l-istħarriġ tal-proporzjonalità tar-regoli ta’ armonizzazzjoni, il-leġiżlatur tal-Unjoni kellu setgħa diskrezzjonali wiesgħa f’qasam daqstant kumpless bħal dak tal-kollokamenti transnazzjonali ta’ ħaddiema. Il-kwistjoni li tqum hija dik dwar jekk huwa għamilx użu manifestament mhux xieraq minn din is-setgħa meta biddel il-bilanċ tal-interessi li għalih kien wasal fid-Direttiva 96/71, billi introduċa l-bidliet li tinkludi d-Direttiva 2018/957.

37.

L-Artikolu 3(1) il-ġdid tad-Direttiva 96/71 jissostitwixxi r-“rati minimi ta’ ħlas” bir-“remunerazzjoni”, bħala kundizzjoni tax-xogħol tal-Istat ospitanti li għandu japplika għall-ħaddiema kkollokati.

38.

Il-Gvern Pollakk jikkunsidra li bis-saħħa ta’ din ir-regola l-ġdida l-impriżi li jikkollokaw il-ħaddiema għandhom iħallsuhom l-istess remunerazzjoni bħal dik li jirċievu l-ħaddiema lokali. Għaldaqstant il-prinċipju ta’ paga ndaqs jissostitwixxi l-obbligu li jitħallas is-salarju minimu.

39.

Skont dan il-Gvern dan l-obbligu jillimita l-libertà li jiġu pprovduti servizzi ta’ impriżi li jikkollokaw ħaddiema għal dan il-għan. Dawn tal-aħħar huma suġġetti għal piż addizzjonali li jelimina l-vantaġġ kompetittiv marbut mal-eżistenza ta’ remunerazzjoni iktar baxxa fl-Istat fejn jinsabu. Din hija diskriminazzjoni li tmur kontra l-Artikolu 56 TFUE, li tista’ tiġi ġġustifikata biss mill-motivi tal-Artikolu 52 TFUE.

40.

Il-Gvern Pollakk isostni, barra minn hekk, li, anki li kieku ma kinux diskriminatorji, dawn ir-restrizzjonijiet jostakolaw il-libertà li jiġu pprovduti servizzi mingħajr ma jiġu pprovduti raġunijiet imperattivi ta’ interess ġenerali, għaliex:

41.

Il-Parlament Ewropew, il-Kunsill, il-Kummissjoni u l-Gvernijiet intervenjenti jqisu li l-ewwel parti ta’ dan il-motiv għal annullament hija infondata.

42.

Għall-Gvern Pollakk, is-sostituzzjoni tar-“rati minimi ta’ ħlas” b’“remunerazzjoni”, imwettqa mid-Direttiva 2018/957, tiddiskrimina bejn il-fornituri ta’ servizzi transkonfinali li jikkollokaw il-ħaddiema, fit-termini msemmija iktar ’il fuq.

43.

Dawn il-fornituri ta’ servizzi jkunu suġġetti għal piż doppju (osservanza tar-regoli tal-Istat ta’ oriġini u dawk tal-Istat ospitanti), u għandhom, barra minn hekk, iħallsu spejjeż addizzjonali, pereżempju, it-traduzzjoni ta’ dokumenti jew dawk li jirriżultaw mill-pussess ta’ rappreżentant fl-Istat ta’ destinazzjoni. Peress li l-impriżi lokali jinsabu f’pożizzjoni differenti minn dawk li jikkollokaw ħaddiema, l-impożizzjoni ta’ trattament ugwali fir-remunerazzjoni twassal għal diskriminazzjoni.

44.

Naħseb li dan ir-raġunament huwa bbażat fuq interpretazzjoni inadegwata tad-Direttiva 2018/957.

45.

L-ewwel nett, ir-remunerazzjoni hija waħda mill-kundizzjonijiet tax-xogħol elenkati b’mod restrittiv fit-tielet subparagrafu tal-Artikolu 3(1) il-ġdid tad-Direttiva 96/71. Huwa minnu li l-applikazzjoni tiegħu għall-ħaddiema kkollokati hija obbligatorja u li taqa’ fil-kamp ta’ applikazzjoni tar-regoli imperattivi ta’ protezzjoni minima ( 13 ). Madankollu, dan ma jimplikax ugwaljanza sħiħa fit-trattament tal-ħaddiema kkollokati u dawk lokali: il-kontribuzzjonijiet għas-sigurtà soċjali u t-tassazzjoni applikabbli għall-ħaddiema kkollokati ma humiex koperti mid-Direttiva 96/71 u huma rregolati mir-regoli tal-Istat ta’ oriġini. Din iċ-ċirkustanza twassal għal differenzi bejn ir-remunerazzjoni effettiva li jirċievu l-ħaddiema kkollokati u dawk lokali.

46.

It-tieni nett, skont it-tielet subparagrafu tal-Artikolu 3(1) il-ġdid tad-Direttiva 96/71, il-kunċett ta’ remunerazzjoni huwa marbut biss mal-elementi obbligatorji tagħha ( 14 ). Għaldaqstant, id-dmir li ħaddiema jitħallsu b’intestaturi oħra mhux obbligatorji skont id-dritt nazzjonali ma huwiex estiż għall-ħaddiema kkollokati. Għalhekk, id-Direttiva 2018/957 ma timponix remunerazzjoni identika, meqjusa kollha kemm hi, bejn il-ħaddiem lokali u l-ħaddiem ikkollokat.

47.

Kif ġie ddikjarat fl-analiżi tal-impatt imnedija mill-Kummissjoni fid-dawl tal-adozzjoni tad-Direttiva 2018/957, l-għażla ta’ ugwaljanza sħiħa fit-trattament bejn il-ħaddiema lokali u l-ħaddiema kkollokati ġiet espressament imwarrba ( 15 ).

48.

Billi l-introduzzjoni tal-kunċett ta’ “remunerazzjoni” minflok dik preċedenti ta’ “rati minima ta’ ħlas” ma hijiex diskriminatorja, din lanqas ma hija, kuntrarjament għal dak li qiegħed isostni l-Gvern Pollakk, ibbażata fuq il-motivi tal-Artikolu 52 TFUE (ordni pubblika, sigurtà pubblika u saħħa pubblika.).

49.

Il-Gvern Pollakk isostni, kif diġà indikajt, li, anki jekk id-Direttiva 2018/957 ma introduċietx miżuri diskriminatorji, ir-restrizzjonijiet li hija toħloq għall-kollokament tal-ħaddiema, billi tuża l-kunċett il-ġdid ta’ remunerazzjoni, ma huma ġġustifikati minn ebda rekwiżit imperattiv ta’ interess ġenerali.

50.

L-argument tal-Gvern Pollakk f’dan ir-rigward huwa bbażat fuq premessa li jiena ma nikkondividix. Kif diġà indikajt, l-istħarriġ ġudizzjarju ta’ miżura ta’ armonizzazzjoni, bħad-Direttiva 2018/957, ma jistax jiġi eżerċitat b’applikazzjoni tal-parametri żviluppati mill-ġurisprudenza tal-Qorti tal-Ġustizzja għall-miżuri nazzjonali li jirrestrinġu l-kollokament tal-ħaddiema u l-ġustifikazzjoni eventwali tagħhom fuq rekwiżiti imperattivi ta’ interess ġenerali.

51.

L-istħarriġ tad-direttivi ta’ armonizzazzjoni (fosthom id-Direttiva 2018/957) fir-rigward tad-dritt oriġinali, f’dan il-każ l-Artikolu 56 TFUE, għandu jsir konformement mal-prinċipju ta’ proporzjonalità, skont il-ġurisprudenza tal-Qorti tal-Ġustizzja li inkludejt fil-konklużjonijiet tiegħi fil-Kawża C‑620/18 ( 16 ).

52.

Lardarba saret din il-kjarifika, ser nanalizza l-motivi mressqa mill-Gvern Pollakk sabiex nikkunsidra li ma hemmx lok li l-kunċett ta’ rati minimi ta’ ħlas jiġi ssostitwit b’dak ta’ remunerazzjoni. Essenzjalment, dawn huma:

53.

Kuntrarjament għal dak li jsostni l-Gvern Pollakk, l-użu tat-terminu “rati minimi ta’ ħlas” fid-Direttiva 96/71 ma kienx xieraq sabiex tiġi ggarantita l-protezzjoni tal-ħaddiema kkollokati u l-kompetizzjoni leali bejn l-impriżi lokali u dawk ta’ Stati Membri oħra li jikkollokaw ħaddiema. Dan kien ir-raġunament tal-Parlament Ewropew u tal-Kunsill, li jiena naqbel magħhom.

54.

L-ewwel nett, l-interpretazzjoni tat-terminu “rati minimi ta’ ħlas” qajmet diffikultajiet prattiċi ( 17 ), kif turi l-ġurisprudenza tal-Qorti tal-Ġustizzja u, b’mod partikolari, is-sentenza tagħha Sähköalojen ammattiliitto ( 18 ), li fiha tingħata interpretazzjoni wiesgħa tal-kunċett ta’ salarju minimu tad-Direttiva 96/71, li influwenzat ir-riforma tad-Direttiva 2018/957 ( 19 ).

55.

Il-leġiżlatur tal-Unjoni ħa inkunsiderazzjoni dawn id-diffikultajiet ermenewtiċi, kif ukoll l-interpretazzjoni wiesgħa proposta mill-Qorti tal-Ġustizzja, billi adotta d-Direttiva 2018/957 u inkluda l-kunċett ta’ remunerazzjoni fl-Artikolu 3(1) u (7) tad-Direttiva 96/71.

56.

It-tieni nett, l-istabbiliment tar-rati minimi ta’ ħlas skont it-tieni subparagrafu tal-Artikolu 3(1) tad-Direttiva 96/71 huwa l-kompitu tal-leġiżlazzjoni jew tal-prattiki nazzjonali tal-Istat Membru ospitanti ( 20 ). Il-metodu ta’ kalkolu ta’ dawn ir-rati u l-kriterji magħżula f’dan ir-rigward huma wkoll ir-responsabbiltà ta’ dan l-Istat Membru ( 21 ). Il-leġiżlazzjonijiet jew il-prattiki nazzjonali għall-kalkolu tas-salarju minimu huma eteroġenji ħafna (u mhux dejjem trasparenti) fl-Istati Membri tal-Unjoni, liema fatt jagħmel diffiċli l-kollokament tal-ħaddiema taħt kundizzjonijiet tax-xogħol ġusti u paragunabbli ma’ dawk tal-ħaddiema lokali ( 22 ).

57.

It-tielet nett, ġiet identifikata prattika inadegwata mill-impriżi li, billi jikkollokaw il-ħaddiema tagħhom, jista’ jkollhom it-tendenza li jħallsuhom is-salarju minimu, irrispettivament mill-kategorija tagħhom, il-funzjonijiet tagħhom, il-kwalifiki professjonali tagħhom u l-anzjanità tagħhom, li twassal għal differenza fir-remunerazzjoni meta mqabbla mal-ħaddiema lokali li jinsabu f’sitwazzjoni simili ( 23 ).

58.

Waqt is-seduta, il-Kummissjoni reġgħet tenniet dak li kien diġà kkonstatat fl-analiżi tal-impatt tagħha: li l-identifikazzjoni tar-“rati minimi ta’ ħlas” tad-Direttiva 96/71 bis-salarju minimu legalment iffissat mil-leġiżlazzjoni nazzjonali tal-Istat ospitanti kienet, fil-prattika, ħolqot distakk fis-salarju bejn il-ħaddiema lokali u l-ħaddiema kkollokati, b’mod partikolari f’setturi bħalma hija l-kostruzzjoni ( 24 ).

59.

Sabiex tirrimedja din is-sitwazzjoni, il-Kummissjoni studjat is-soluzzjonijiet possibbli u l-konsegwenzi ekonomiċi tagħhom. Hija għażlet dik li hija qieset l-iktar xierqa, jiġifieri li twettaq riforma limitata tad-Direttiva 96/71, li seħħet permezz tal-adozzjoni tad-Direttiva 2018/957, billi eskludiet il-pubblikazzjoni ta’ komunikazzjoni interpretattiva jew in-nuqqas ta’ emenda tad-Direttiva 96/71 ( 25 ).

60.

L-istituzzjonijiet tal-Unjoni għandhom marġni ta’ diskrezzjoni wiesa’ sabiex ibiddlu regola, fost każijiet oħra, meta l-applikazzjoni tagħha tkun żvelat li jkun sar tibdil fil-qasam irregolat jew li kien hemm xi żbilanċi fl-implimentazzjoni tagħha. F’dan il-każ, l-issodisfar ta’ dawn iż-żewġ premessi, li huma suffiċjenti sabiex tiġi ġġustifikata l-ħtieġa li jiġi ssostitwit il-kunċett ta’ “rati minimi ta’ ħlas” b’dak ta’ “remunerazzjoni”, ġie debitament ipprovat.

61.

Mill-kunsiderazzjonijiet preċedenti jista’ jiġi dedott li l-leġiżlatur tal-Unjoni kkonforma ruħu mar-rekwiżiti tal-prinċipju ta’ proporzjonalità, mingħajr ma eċċeda manifestament is-setgħa diskrezzjonali wiesgħa tiegħu f’qasam tekniku u kumpless bħal dan, meta għażel miżura (l-introduzzjoni tal-kunċett ta’ remunerazzjoni) xierqa għat-twettiq tal-għanijiet li jridu jintlaħqu. Din il-miżura tiffaċilita, min-naħa tagħha, l-aħjar protezzjoni tal-ħaddiema kkollokati u l-garanzija ta’ diversi kundizzjonijiet ekwi ta’ kompetizzjoni bejn l-impriżi lokali u dawk li jikkollokaw il-ħaddiema tagħhom.

62.

Għall-Gvern Pollakk, l-eżistenza ta’ differenzi kbar bejn is-salarju minimu fid-diversi Stati Membri lanqas ma hija ġustifikazzjoni valida. Jekk tali ġustifikazzjoni tiġi aċċettata, dan ikun ifisser l-eliminazzjoni ta’ vantaġġ kompetittiv tal-pajjiżi tal-Unjoni b’salarji iktar baxxi u jiġi injorat il-fatt li l-ħaddiem ikkollokat jibqa’ marbut mal-Istat ta’ oriġini tiegħu ( 26 ).

63.

Id-differenzi fir-remunerazzjoni tal-ħaddiema bejn Stati Membri u Stati oħrajn joriġinaw mill-iffissar tas-salarji, li jaqa’ taħt il-kompetenza esklużiva tal-Istati Membri u tal-imsieħba soċjali. L-eċċezzjoni tal-Artikolu 153(5) TFUE tikkorrobora dan il-fatt, meta teskludi r-remunerazzjonijiet tax-xogħol mill-kompetenza ta’ armonizzazzjoni tal-istituzzjonijiet tal-Unjoni.

64.

Għal dan il-għan, it-tielet subparagrafu tal-Artikolu 3(1) il-ġdid tad-Direttiva 96/71 jorbot “il-kunċett ta’ remunerazzjoni” mal-leġiżlazzjoni jew mal-prattikia nazzjonali tal-Istat Membru li fit-territorju tiegħu l-ħaddiem ikun ikkollokat, fit-termini traskritti iktar ’il fuq ( 27 ).

65.

Id-diverġenzi bejn ir-regoli applikabbli għar-remunerazzjonijiet tal-ħaddiema kkollokati huma, għaldaqstant, inevitabbli sakemm l-Unjoni jkollha kompetenza ta’ armonizzazzjoni fir-rigward tagħhom. L-istess kien japplika, kif diġà esponejt, għall-kunċett ta’ “rati minimi ta’ ħlas” użat fil-verżjoni inizjali tad-Direttiva 96/71.

66.

F’din iċ-ċirkustanza, id-Direttiva 2018/957 tiċċara dak li għandhom jitħallsu l-ħaddiema kkollokati: il-kunċett ta’ remunerazzjoni jopera bħala regola ta’ kunflitt, li permezz tagħha l-elementi ta’ remunerazzjoni li huma obbligatorji għall-ħaddiema lokali huma ggarantiti għall-ħaddiem ikkollokat fl-Istat ospitanti.

67.

Din l-għażla leġiżlattiva tosserva l-prinċipju ta’ proporzjonalità u dak tal-Artikolu 56 TFUE. Hija ma timponix, kif isostni l-Gvern Pollakk, li l-ħaddiem ikkollokat għandu jirċievi s-salarju minimu fl-Istat ospitanti, minħabba li ħajtu (u l-ekonomija domestika tiegħu) tibqa’ fundamentalment marbuta mal-Istat ta’ oriġini tiegħu.

68.

Id-Direttiva 2018/957 ma tneħħix l-inugwaljanzi salarjali bejn l-Istati Membri. Il-ħaddiema kkollokati jistgħu jirċievu remunerazzjonijiet differenti minn dawk li jirċievu l-ħaddiema lokali (ħlief fir-rigward tal-elementi obbligatorji tagħhom) u l-impriża li timpjegahom tista’, jekk ikun il-każ, iġġorr inqas spejjeż ta’ tassazzjoni u ta’ sigurtà soċjali. Dak li għamel il-leġiżlatur tal-Unjoni huwa li jtejjeb il-protezzjoni tal-ħaddiema kkollokati meta mqabbla mas-sitwazzjoni inizjali tad-Direttiva 96/71.

69.

Il-Gvern Pollakk jikkunsidra wkoll li l-kunċett ta’ remunerazzjoni introdott mid-Direttiva 2018/957 ma huwiex iġġustifikat minħabba li dan jobbliga lill-persuna li timpjega tħallas allowances sproporzjonati lill-ħaddiema kkollokati tagħha peress li dawn għandhom jinkludu kontribuzzjonijiet li dawn tal-aħħar ma jistgħux jibbenefikaw minnhom.

70.

Kif diġà indikajt, il-formulazzjoni l-ġdida tat-tielet subparagrafu tal-Artikolu 3(1) tad-Direttiva 96/71 testendi għall-ħaddiema kkollokati biss l-elementi obbligatorji tar-remunerazzjoni tal-ħaddiema lokali. Il-kontribuzzjonijiet soċjali l-oħra mħallsa mill-persuni li jimpjegaw lokali favur l-impjegati tagħhom ma għandhomx jittieħdu inkunsiderazzjoni jew jitħallsu mill-persuna li timpjega li tikkolloka l-ħaddiema. Dawn il-kontribuzzjonijiet soċjali addizzjonali għandhom jitħallsu, jekk ikun il-każ, lill-ħaddiema kkollokati skont il-leġiżlazzjoni tal-Istat ta’ oriġini.

71.

Ir-riferiment għall-premessa 18 tad-Direttiva 2018/957 għall-ammont gross tar-remunerazzjoni ma huwiex intiż sabiex jinkludi fiha l-kontribuzzjonijiet soċjali li ma jifformawx parti mill-elementi ta’ remunerazzjoni obbligatorji tal-Istat ospitanti. Huwa intiż sabiex jittieħdu inkunsiderazzjoni l-allowances kollha mħallsa mill-persuna li timpjega lill-ħaddiem ikkollokat sabiex dan l-ammont jiġi pparagunat mar-remunerazzjoni obbligatorja tal-pajjiż ospitanti ( 28 ).

72.

Essenzjalment, ma narax li l-għażla leġiżlattiva li jiġi ssostitwit il-kunċett ta’ “rati minimi ta’ ħlas” b’dak ta’ “remunerazzjoni” hija inġustifikata jew sproporzjonata meta mqabbla mal-għan ta’ protezzjoni tal-ħaddiema kkollokati. Huwa minnu li hija tista’ tnaqqas, iżda ma teliminax, il-vantaġġi kompetittivi tal-impriżi ta’ pajjiżi tal-Unjoni li għandhom spejjeż tax-xogħol iktar baxxi u li jikkollokaw il-ħaddiema lejn Stati Membri bi spejjeż tax-xogħol ogħla. Madankollu, tali tnaqqis huwa koerenti mal-għan tad-Direttiva 2018/957 li jinbidel il-bilanċ sottostanti tad-Direttiva 96/71, billi issa tenfasizza iktar il-protezzjoni tal-ħaddiema kkollokati, mingħajr ma tirrinunzja għall-għanijiet intiżi li jiżguraw kompetizzjoni leali bejn l-impriżi u li tiġi ffaċilitata l-libertà li jiġu pprovduti servizzi transnazzjonali.

73.

L-Artikolu 3(1a) l-ġdid jistabbilixxi l-kategorija tal-ħaddiema kkollokati fit-tul u jiddistingwiha minn dik tal-ħaddiema kkollokati “ordinarji”: dawk tal-ewwel huma dawk li l-kollokament tagħhom jaqbeż it‑12‑il xahar (b’mod eċċezzjonali 18).

74.

Skont il-Gvern Pollakk, l-istatus il-ġdid tal-ħaddiema kkollokati fit-tul joħloq restrizzjonijiet mhux iġġustifikati u sproporzjonati għal-libertà li jiġu pprovduti servizzi li jmorru kontra l-Artikolu 56 TFUE. Huwa jsostni, f’dan ir-rigward, li:

75.

Il-kategorija l-ġdida tal-ħaddiema kkollokati fit-tul hija differenti minn dik tal-ħaddiema kkollokati “ordinarji”. Il-kriterju li jiddistingwi huwa d-durata effettiva tal-kollokament: jekk hija iktar minn 12‑il xahar (b’mod eċċezzjonali 18), is-sitwazzjoni ta’ ħaddiem ikkollokat ordinarju tinbidel f’dik ta’ ħaddiem ikkollokat fit-tul.

76.

Ladarba jiddekorri dan il-perijodu, il-ħaddiem ikkollokat (issa, fit-tul) igawdi minn skema legali differenti: minbarra l-kundizzjonijiet tax-xogħol imsemmija fl-Artikolu 3(1), ikunu japplikaw għalih il-kundizzjonijiet tal-Istat Membru fejn jitwettaq ix-xogħol.

77.

Madankollu, kif jirriżulta mill-premessa 9 tagħha ( 30 ), id-Direttiva 2018/957 ma twassalx għal assimilazzjoni assoluta tal-ħaddiema kkollokati fit-tul mal-ħaddiema lokali (ċittadini nazzjonali jew minn Stati Membri oħra li eżerċitaw il-libertà ta’ moviment tagħhom).

78.

Il-ħaddiema kkollokati fit-tul jibqgħu jżommu sitwazzjoni legali stabbilita (koperta) mil-libertà li jiġu pprovduti servizzi, kif tindika l-premessa 10 tad-Direttiva 2018/957 ( 31 ).

79.

Kuntrarjament għat-teżi sostnuta mill-Gvern Pollakk, l-Artikolu 3(1a) l-ġdid tad-Direttiva 96/71 ma jġibx lill-ħaddiema kkollokati fit-tul fuq l-istess livell ta’ dawk lokali, peress li:

80.

Fil-fehma tiegħi, ir-regolamentazzjoni ta’ din il-kategorija l-ġdida ta’ ħaddiema kkollokati fit-tul hija ġġustifikata u tinvolvi restrizzjonijiet proporzjonati għal-libertà li jiġu pprovduti servizzi, li huma kompatibbli mal-Artikolu 56 TFUE.

81.

L-istabbiliment ta’ terminu ta’ 12‑il xahar (b’mod eċċezzjonali 18‑il xahar) jelimina l-inċertezza li teżisti fil-verżjoni inizjali tad-Direttiva 96/71, li l-Artikolu 2(1) tagħha kien jikkunsidra lill-ħaddiem li kien iwettaq ix-xogħol tiegħu f’pajjiż li ma huwiex l-Istat ta’ oriġini tiegħu “għall-perjodu limitat” bħala ħaddiem ikkollokat. Nistqarr li r-regola l-ġdida ċċarat din l-inċertezza billi ċċarat li ħaddiem ikun jitqies bħala ħaddiem ikkollokat fit-tul jekk ikompli l-kollokament tiegħu għal iktar minn 12‑il xahar (jew 18‑il xahar).

82.

L-istatus ta’ ħaddiem ikkollokat fit-tul jidhirli li huwa wkoll raġonevoli peress li jadatta ruħu għas-sitwazzjoni tal-ħaddiema li jirrisjedu fl-istat ospitanti għal perijodu twil, peress li l-parteċipazzjoni tagħhom fis-suq tax-xogħol ta’ dan l-Istat hija ikbar. Huwa loġiku (u proporzjonat) li, f’din is-sitwazzjoni, japplika għalihom numru ikbar ta’ regoli tax-xogħol tal-Istat ta’ destinazzjoni, filwaqt li tinżamm ir-rabta tagħhom mal-Istat ta’ oriġini tal-impriża li timpjegahom.

83.

Lanqas ma naqbel mal-opinjoni tal-Gvern Pollakk li l-iskema l-ġdida ta’ ħaddiema kkollokati fit-tul hija inkompatibbli mal-Artikolu 9 tar-Regolament Ruma I.

84.

Dan l-artikolu jirreferi għall-“applikazzjoni tad-dispożizzjonijiet obbligatorji prevalenti tal-liġi tal-forum”, iżda l-Artikolu 3(1a) l-ġdid tad-Direttiva 96/71 ma huwiex liġi ta’ dan it-tip.

85.

Ir-relazzjoni ta’ din id-direttiva mar-Regolament Ruma I hija stabbilita fl-Artikoli 8 (“Kuntratti individwali ta’ impjieg”) u 23 (“Relazzjoni ma’ dispożizzjonijiet oħrajn tal-liġi Komunitarja”) ta’ dan tal-aħħar ( 33 ).

86.

Fl-aħħar nett, il-Gvern Pollakk isostni li t-tielet subparagrafu tal-Artikolu 3(1a) l-ġdid tad-Direttiva 96/71 joħloq restrizzjoni sproporzjonata li hija inkompatibbli mal-Artikolu 56 TFUE, peress li, għall-kalkolu tal-akkumulazzjoni ta’ żmien, huwa jieħu inkunsiderazzjoni x-xogħol u mhux is-sitwazzjoni tal-ħaddiem. Barra minn hekk, huwa ma jiffissa ebda limitu ratione temporis sabiex isir il-kalkolu taż-żmien.

87.

Kif isostnu l-Kunsill u l-Parlament Ewropew, u bħalma huwa ddikjarat fil-premessa 11 tad-Direttiva 2018/957, din id-dispożizzjoni hija intiża sabiex tipprevjeni l-evażjoni u l-abbuż tal-istatus ta’ ħaddiem ikkollokat fit-tul. Li kieku kien mod ieħor, dan l-istatus ikun jista’ jiġi evitat bis-sostituzzjoni ta’ ħaddiema kkollokati minn oħrajn fl-istess xogħol.

88.

Huwa minnu li, kif jafferma l-Gvern Pollakk, hemm ċerta impreċiżjoni fil-formulazzjoni tagħha, peress li ma jistabbilixxix limitu ratione temporis għat-twettiq tal-akkumulazzjoni tal-perijodi li matulhom il-ħaddiema kkollokati jeżerċitaw l-istess xogħol.

89.

Madankollu, fl-osservazzjonijiet tiegħu, il-Gvern Pollakk ma jurix li jeżistu alternattivi inqas restrittivi sabiex jiġi evitat l-aġir frawdolenti. Huwa jirreferi biss għall-fatt li l-miżuri ta’ identifikazzjoni tal-kollokamenti reali u ta’ prevenzjoni tal-abbuż u tal-evażjoni msemmija fl-Artikolu 4 tad-Direttiva 2014/67 ( 34 ) huma biżżejjed. Madankollu, dawn il-miżuri huma maħsuba iktar sabiex tiġi evitata l-frodi fil-kollokamenti uniċi milli fil-kollokamenti ta’ ħaddiema tal-assemblaġġ sabiex jeżerċitaw l-istess xogħol.

90.

Għalhekk nissuġġerixxi li l-ewwel motiv għandu jiġi miċħud fl-intier tiegħu.

91.

Peress li l-argumenti ta’ dan il-motiv huma simili għal dawk tal-Kawża C‑620/18 ( 35 ), nirreferi għall-konklużjonijiet C‑620/18, li skonthom dan għandu jiġi miċħud.

92.

Fid-dawl tal-kunsiderazzjonijiet preċedenti, nissuġġerixxi li l-Qorti tal-Ġustizzja: