(1)

Le Rialachán (CE) Uimh. 1831/2003 foráiltear maidir le húdarú breiseán a bhfuiltear lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú.

(2)

I gcomhréir le hAirteagal 7 de Rialachán (CE) Uimh. 1831/2003, cuireadh isteach iarratas chun coimpléasc copar(II)-béitín a údarú. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas.

(3)

Baineann an t-iarratas sin le coimpléasc copar(II)-béitín a údarú mar bhreiseán beathaithe le haghaidh gach speicis ainmhíoch agus iarradh ann go n-aicmeofaí an breiseán sin sa chatagóir ‘breiseáin chothaitheacha’ agus san fheidhmghrúpa ‘comhdhúile de riandúile’.

(4)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sa tuairim uaidh an 11 Eanáir 2023 (2) go bhfuil coimpléasc copar(II)-béitín sábháilte do gach speiceas ainmhíoch agus do thomhaltóirí. Maidir leis an gcomhshaol, tháinig an tÚdarás ar an gconclúid go meastar ag na leibhéil úsáide atá beartaithe go bhfuil an tsubstaint sábháilte do na speicis talún agus do na córais dobharshaothraithe ar talamh. Leis na sonraí a bhí ar fáil, ní rabhthas in ann conclúid a dhéanamh maidir le sábháilteacht an bhreiseáin le haghaidh dríodair mhuirí, nuair a úsáidtear i gcaighin mhara é. Tháinig an tÚdarás ar an gconclúid freisin gur dócha go dtarlóidh nochtadh ar an mbreiseáin trí ionanálú. Is greannaitheoir súl é an breiseán, agus ní greannaitheoir craicinn é. Meastar gur íogróir craicinn agus riospráide é an breiseán, os rud é go bhfuil nicil ann. Tháinig an tÚdarás ar an gconclúid thairis sin, ar bhonn na sonraí atá ar fáil, nach féidir éifeachtúlacht an bhreiseáin a léiriú. Sa dara tuairim uaidh an 15 Samhain 2023 (3), tháinig an tÚdarás ar an gconclúid nach mbaineann riosca le húsáid an bhreiseáin faoi na coinníollacha úsáide atá beartaithe sa deighleog dobharshaothraithe mhuirí. Tháinig an tÚdarás ar an gconclúid thairis sin, ar bhonn na sonraí atá ar fáil, nach féidir éifeachtúlacht an bhreiseáin a léiriú. Sa tríú tuairim uaidh an 6 Bealtaine 2025 (4), tháinig an tÚdarás ar an gconclúid go bhfuil an breiseán éifeachtúil mar fhoinse copair le haghaidh gach speicis ainmhíoch. Níor mheas sé go raibh gá le ceanglais shonracha maidir le faireachán iarmhargaidh. D’fhíoraigh an tÚdarás freisin an tuarascáil ar an modh anailíse ar an mbreiseán beathaithe i mbeatha arna cur isteach ag an tSaotharlann Tagartha a bunaíodh le Rialachán (CE) Uimh. 1831/2003.

(5)

I bhfianaise an mhéid thuas, measann an Coimisiún go gcomhlíonann coimpléasc copar(II)-béitín na coinníollacha dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid na substainte sin a údarú le haghaidh gach speicis ainmhíoch. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc.

(6)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,