|
23.3.2023 |
GA |
Iris Oifigiúil an Aontais Eorpaigh |
L 85/48 |
CINNEADH Ó CHOMHCHOISTE LEE Uimh. 226/2022
an 8 Iúil 2022
lena leasaítear Prótacal 31 (comhar i réimsí ar leith lasmuigh de na ceithre shaoirse) agus Prótacal 32 (módúlachtaí airgeadais maidir le hAirteagal 82 a chur chun feidhme) a ghabhann le Comhaontú LEE [2023/643]
TÁ COMHCHOISTE LEE,
Ag féachaint don Chomhaontú ar an Limistéar Eorpach Eacnamaíoch (‘Comhaontú LEE’), agus go háirithe Airteagail 86 agus 98 de,
De bharr an mhéid seo a leanas:
|
(1) |
Is iomchuí comhar na bPáirtithe Conarthacha i gComhaontú LEE a leathnú chun Rialachán (AE) 2021/523 ó Pharlaimint na hEorpa agus ón gComhairle an 24 Márta 2021, lena mbunaítear Clár InvestEU agus lena leasaítear Rialachán (AE) 2015/1017 (1), a chumhdach. |
|
(2) |
De bhun Airteagal 5 de Rialachán (AE) 2021/523, ceadaítear ranníocaíochtaí le ráthaíocht AE ó Stáit CSTE, chun críche rannpháirtíochta i dtáirgí airgeadais áirithe faoi urrann AE de Chiste InvestEU. Féadfaidh ráthaíocht chomhuaineach lena gcumhdófar an dliteanas teagmhasach faoi seach i ndáil le ráthaíocht AE a bheith ag gabháil le ranníocaíochtaí Stáit CSTE le soláthar ráthaíocht AE. De rogha air sin, féadfaidh siad an ranníocaíocht iomlán do Chiste InvestEU a sholáthar in airgead tirim. |
|
(3) |
I gComhaontú LEE agus go háirithe in Airteagal 81 de, leagtar amach na coinníollacha maidir le rannpháirtíocht Stáit CSTE agus rannpháirtíocht a n-institiúidí, a ngnóthas, a n-eagraíochtaí agus a náisiúnach i gcláir an Aontais Eorpaigh. |
|
(4) |
Maidir le Rialachán (AE) 2020/2094 ón gComhairle an 14 Nollaig 2020 lena mbunaítear Ionstraim Théarnaimh an Aontais Eorpaigh chun tacú leis an téarnamh i ndiaidh ghéarchéim COVID-19 (2), leithdháiltear ioncam sannta seachtrach breise ar an gClár InvestEU arna bhunú le Rialachán (AE) 2021/523. I bPrótacal 32 maidir le módúlachtaí airgeadais maidir le hAirteagal 82 de Chomhaontú LEE a chur chun feidhme, is iomchuí a shoiléiriú, chun críche ranníocaíochtaí airgeadais Stáit CSTE leis an gClár InvestEU a ríomh, gur cheart an bonn atá leis an ríomh a mhéadú trí leithreasuithe a chomhfhreagraíonn d’ioncam sannta seachtrach faoi Airteagal 3(1) de Rialachán (AE) 2020/2094 ón gComhairle i ndáil lena rannpháirtíocht sa chlár sin. |
|
(5) |
Dá bhrí sin, ba cheart Prótacail 31 agus 32 a ghabhann le Comhaontú LEE a leasú dá réir sin chun go mbeidh an comhar leathnaithe sin in ann a bheith ann ón 1 Eanáir 2022, |
TAR ÉIS AN CINNEADH SEO A GHLACADH:
Airteagal 1
Cuirfear an tAirteagal seo a leanas isteach i ndiaidh Airteagal 19 (Laghdú ar éagothromaíochtaí eacnamaíocha agus sóisialta) de Phrótacal 31 a ghabhann le Comhaontú LEE:
‘Airteagal 20
Feabhas a chur ar an iomaíochas agus ar an gcóineasú socheacnamaíoch agus ar an gcomhtháthú faoin gClár InvestEU
1. Beidh Stáit CSTE rannpháirteach, amhail ón 1 Eanáir 2022, sna gníomhaíochtaí a d’fhéadfadh teacht as an ngníomh seo a leanas de chuid an Aontais:
|
— |
32021 R 0523: Rialachán (AE) 2021/523 ó Pharlaimint na hEorpa agus ón gComhairle an 24 Márta 2021 lena mbunaítear Clár InvestEU agus lena leasaítear Rialachán (AE) 2015/1017 (IO L 107, 26.3.2021, lch. 30). |
2. Ní bheidh Stáit CSTE rannpháirteach i Mol Comhairleach InvestEU.
3. Féadfaidh Stáit CSTE rogha a dhéanamh páirt a ghlacadh i dtáirge airgeadais amháin nó níos mó faoi urrann an Aontais de Chiste InvestEU. Beidh ranníocaíocht Stáit CSTE bunaithe ar phróifíl riosca na dtáirgí airgeadais ina roghnaíonn siad a bheith rannpháirteach. Méadóidh ranníocaíocht na Stát CSTE ráthaíocht AE.
4. Chun críche ranníocaíocht airgeadais Stáit CSTE le Ciste InvestEU a ríomh, ní bheidh feidhm ag an bhfachtóir comhréireachta a leagtar síos in Airteagal 82(1) de Chomhaontú LEE maidir le línte buiséid. I gcomhréir le hAirteagal 8 de Phrótacal 32, déanfaidh Stáit CSTE comhaontuithe ranníocaíochta leis an Aontas, agus an Coimisiún ina ionadaí don Aontas. Leis na comhaontuithe ranníocaíochta, bunófar méideanna ranníocaíocht airgeadais Stáit CSTE le ráthaíocht AE, leagfar síos téarmaí agus coinníollacha maidir le húsáid na ranníocaíochta sin, bunófar minicíocht agus méideanna íocaíocht na ranníocaíochta agus bunófar rialacha maidir le cistí agus ioncaim nár úsáideadh a aisíoc le Stáit CSTE.
5. Nuair nach bhfuil ranníocaíocht Stáit CSTE le ráthaíocht AE ag cur soláthar iomlán in airgead tirim ar fáil, i.e. socraítear an soláthar ag ráta níos lú ná 100 %, geallfaidh Stáit CSTE an dliteanas teagmhasach ina thaobh sin a chumhdach le ráthaíocht comhuaineach atá neamh-inchúlghairthe, neamhchoinníollach agus ar éileamh. Cuirfear an ráthaíocht chomhuaineach ar fáil i gcomhthráth le síniú comhaontaithe ranníocaíochta.
6. Díolmhófar Lichtinstéin ó bheith rannpháirteach sa chlár seo agus ón ranníocaíocht airgeadais a bhaineann leis.’
Airteagal 2
Cuirtear an méid seo a leanas in ionad théacs Airteagal 1(10) de Phrótacal 32 a ghabhann le Comhaontú LEE:
‘10. Chun an ranníocaíocht oibríochtúil de bhun Airteagal 82(a) agus (b) den Chomhaontú a ríomh, maidir leis na leithreasuithe faoi chomhair gealltanas agus na leithreasuithe íocaíochta a iontráladh i mbuiséad an Aontais Eorpaigh a glacadh go cinntitheach do na blianta is infheidhme maidir leis na cláir seo a leanas a mhaoiniú: Clár Fís Eorpach (arna bhunú le Rialachán (AE) 2021/695 ó Pharlaimint na hEorpa agus ón gComhairle), Clár InvestEU (arna bhunú le Rialachán (AE) 2021/523 ó Pharlaimint na hEorpa agus ón gComhairle) agus an Sásra Aontais um Chosaint Shibhialta (arna rialú le Cinneadh Uimh. 1313/2013/AE ó Pharlaimint na hEorpa agus ón gComhairle), déanfar na leithreasuithe sin a mhéadú leis na leithreasuithe a chomhfhreagraíonn d’ioncam sannta seachtrach a shanntar do na gníomhaíochtaí sin faoi Airteagal 3(1) de Rialachán (AE) 2020/2094 ón gComhairle an 14 Nollaig 2020 lena mbunaítear Ionstraim Théarnaimh de chuid an Aontais Eorpaigh chun tacú leis an téarnamh i ndiaidh ghéarchéim COVID-19 (3).’
Airteagal 3
Tiocfaidh an Cinneadh seo i bhfeidhm an lá tar éis an fhógra dheireanaigh faoi Airteagal 103(1) de Chomhaontú LEE (*).
Beidh feidhm aige ón 1 Eanáir 2022.
Airteagal 4
Foilseofar an Cinneadh seo i Roinn LEE, agus i bhForlíonadh LEE, d’Iris Oifigiúil an Aontais Eorpaigh.
Arna dhéanamh sa Bhruiséil, an 8 Iúil 2022.
Thar ceann Chomhchoiste LEE
An tUachtarán
Kristján Andri STEFÁNSSON
(1) IO L 107, 26.3.2021, lch. 30.
(2) IO L 433I, 22.12.2020, lch. 23.
(3) IO L 433I, 22.12.2020, lch. 23.
(*) Ní shonraítear aon cheanglas bunreachtúil.