(1)

Il-ġidri tan-nagħaġ u l-ġidri tal-mogħoż huwa marda virali infettiva li taffettwa lill-annimali kaprini u ovini u li jista’ jkollha impatt serju fuq il-popolazzjoni tal-annimali kkonċernati u fuq il-profittabbiltà tat-trobbija tal-annimali, u tikkawża tfixkil għall-movimenti tal-kunsinni ta’ dawk l-annimali u tal-prodotti tagħhom fl-Unjoni u għall-esportazzjonijiet lejn pajjiżi terzi.

(2)

F’każ ta’ tifqigħa tal-ġidri tan-nagħaġ u tal-ġidri tal-mogħoż f’annimali kaprini u ovini, hemm riskju serju li dik il-marda tinxtered fi stabbilimenti oħra ta’ annimali kaprini jew ovini.

(3)

Ir-Regolament Delegat tal-Kummissjoni (UE) 2020/687 (2) jissupplimenta r-regoli għall-kontroll tal-mard elenkat imsemmi fl-Artikolu 9(1), il-punti (a), (b) u (c), tar-Regolament (UE) 2016/429, u definit bħala mard tal-kategoriji A, B u C fir-Regolament ta’ Implimentazzjoni tal-Kummissjoni (UE) 2018/1882 (3). B’mod partikolari, l-Artikoli 21 u 22 tar-Regolament Delegat (UE) 2020/687 jipprevedu l-istabbiliment ta’ żona ristretta f’każ ta’ tifqigħa ta’ marda tal-kategorija A, inkluż il-ġidri tan-nagħaġ u l-ġidri tal-mogħoż, kif ukoll ċerti miżuri li jridu jiġu applikati fiha. Barra minn hekk, l-Artikolu 21(1) ta’ dak ir-Regolament Delegat jipprevedi li ż-żona ristretta trid tinkludi żona ta’ protezzjoni, żona ta’ sorveljanza, u jekk ikun meħtieġ, żona ristretta ulterjuri madwar iż-żoni ta’ protezzjoni u ta’ sorveljanza jew maġenbhom.

(4)

Id-Deċiżjoni ta’ Implimentazzjoni tal-Kummissjoni (UE) 2024/2778 (4) ġiet adottata fil-qafas tar-Regolament (UE) 2016/429 u tistabbilixxi ċerti miżuri interim ta’ emerġenza relatati mal-infezzjoni tal-ġidri tan-nagħaġ u tal-ġidri tal-mogħoż fil-Bulgarija.

(5)

Wara l-adozzjoni tad-Deċiżjoni ta’ Implimentazzjoni (UE) 2024/2778, il-Bulgarija nnotifikat lill-Kummissjoni dwar tifqigħa addizzjonali tal-ġidri tan-nagħaġ u tal-ġidri tal-mogħoż fi stabbiliment li kien iżomm l-annimali ovini u kaprini. B’hekk, id-Deċiżjoni ta’ Implimentazzjoni tal-Kummissjoni (UE) 2024/2918 (5) ħassret u sostitwiet id-Deċiżjoni ta’ Implimentazzjoni (UE) 2024/2778. B’mod iktar partikolari, id-Deċiżjoni ta’ Implimentazzjoni (UE) 2024/2918 tipprevedi li ż-żoni ta’ protezzjoni, iż-żoni ta’ sorveljanza u żoni ristretti ulterjuri li jridu jiġu stabbiliti mill-Bulgarija, f’konformità mar-Regolament Delegat (UE) 2020/687, iridu jinkludu mqar iż-żoni elenkati fl-Anness ta’ dik id-Deċiżjoni ta’ Implimentazzjoni.

(6)

Wara l-adozzjoni tad-Deċiżjoni ta’ Implimentazzjoni (UE) 2024/2918, il-Bulgarija nnotifikat lill-Kummissjoni dwar tifqigħat addizzjonali tal-infezzjoni tal-ġidri tan-nagħaġ u tal-ġidri tal-mogħoż fi stabbilimenti li kienu jżommu annimali ovini. Id-Deċiżjoni ta’ Implimentazzjoni (UE) 2024/2918 ġiet għalhekk emendata bid-Deċiżjoni ta’ Implimentazzjoni tal-Kummissjoni 2024/3111 (6).

(7)

Għaldaqstant, il-Bulgarija nnotifikat lill-Kummissjoni dwar żewġ tifqigħat addizzjonali tal-ġidri tan-nagħaġ u tal-ġidri tal-mogħoż fi stabbilimenti fejn kienu jinżammu l-annimali ovini u kaprini, li jinsabu fir-reġjuni ta’ Sliven u Haskovo. Waħda mit-tifqigħat tinsab barra miż-żoni ristretti li kienu diġà ġew stabbiliti b’riżultat ta’ tifqigħat preċedenti.

(8)

Għalhekk, iż-żoni elenkati bħala żoni ta’ protezzjoni, żoni ta’ sorveljanza u żoni ristretti ulterjuri għall-Bulgarija fl-Anness tad-Deċiżjoni ta’ Implimentazzjoni (UE) 2024/2918 jenħtieġ li jiġu aġġustati, bħala spazju u bħala żmien, sabiex jiġi evitat iktar tixrid tal-marda fil-Bulgarija u fil-bqija tal-Unjoni, u jenħtieġ li tiġi aġġustata wkoll id-durata tal-miżuri li jridu jiġu applikati fihom. Barra minn hekk, jeħtieġ li jiġu stabbiliti żoni addizzjonali ta’ protezzjoni, żoni ta’ sorveljanza u żoni ristretti oħra u li tiġi stabbilita d-durata tal-miżuri li jridu jiġu applikati fihom fir-rigward tat-tifqigħa kkonfermata fir-reġjun ta’ Sliven. Għalhekk, jenħtieġ li jiġu emendati kif xieraq il-lista taż-żoni ristretti u d-durata tal-miżuri li għandhom jiġu applikati fihom stabbiliti fl-Anness ta’ dik id-Deċiżjoni ta’ Implimentazzjoni.

(9)

Id-daqs taż-żoni, id-durata tal-miżuri li jridu jiġu applikati fiż-żoni ta’ protezzjoni, fiż-żoni ta’ sorveljanza u fiż-żoni ristretti ulterjuri huma bbażati fuq il-kriterji stabbiliti fl-Artikolu 64(1) tar-Regolament (UE) 2016/429 u r-regoli stabbiliti fir-Regolament Delegat (UE) 2020/687, inkluż is-sitwazzjoni epidemjoloġika fir-rigward tal-ġidri tan-nagħaġ u tal-ġidri tal-mogħoż fiż-żoni affettwati minn dik il-marda u s-sitwazzjoni epidemjoloġika kumplessiva tal-ġidri tan-nagħaġ u tal-ġidri tal-mogħoż fil-Bulgarija kif ukoll il-livell tar-riskju biex il-marda tinxtered iżjed. Id-durata tal-miżuri tqis ukoll l-istandards internazzjonali tal-Kodiċi tas-Saħħa tal-Annimali Terrestri tal-Organizzazzjoni Dinjija għas-Saħħa tal-Annimali (WOAH, World Organisation for Animal Health (7)). Fis-sitwazzjoni epidemjoloġika attwali, hemm riskju għoli li l-marda tinxtered iżjed minħabba l-fatt li faqqgħet tifqigħa ġdida tal-ġidri tan-nagħaġ u tal-ġidri tal-mogħoż u l-ewwel tifqigħa ġiet ikkonfermata fir-reġjun ta’ Sliven. Dan jindika li l-marda għadha tippersisti u tinfirex fuq distanzi twal, minkejja l-miżuri diġà fis-seħħ.

(10)

Għalhekk, jenħtieġ li l-Anness tad-Deċiżjoni ta’ Implimentazzjoni (UE) 2024/2918 jiġi emendat kif xieraq.

(11)

Filwaqt li titqies is-sitwazzjoni epidemjoloġika attwali fl-Unjoni rigward il-ġidri tan-nagħaġ u l-ġidri tal-mogħoż, il-perjodu ta’ applikazzjoni tad-Deċiżjoni ta’ Implimentazzjoni (UE) 2024/2918 jenħtieġ li jiġi estiż sal-1 ta’ Marzu 2025.

(12)

Il-miżuri previsti f’din id-Deċiżjoni huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf.

1.

fl-Artikolu 4, id-data tat-“28 ta’ Frar 2025” hija sostitwita bid-data tal-“1 ta’ Marzu 2025”;

2.

l-Anness huwa sostitwit bit-test stabbilit fl-Anness ta’ din id-Deċiżjoni.