(1)

Is galar víreasach tógálach é an bholgach caorach agus an bholgach gabhar a bhíonn ar ainmhithe den chineál gabhair agus den chineál caorach agus d’fhéadfadh tionchar tromchúiseach a bheith aige ar an daonra ainmhithe lena mbaineann agus ar bhrabúsacht na feirmeoireachta, rud a chuirfeadh isteach ar ghluaiseachtaí choinsíneachtaí na n-ainmhithe sin agus a dtáirgí laistigh den Aontas agus ar onnmhairí go tríú tíortha.

(2)

I gcás ráig den bholgach caorach agus den bholgach gabhar in ainmhithe den chineál gabhair nó den chineál caorach, tá riosca tromchúiseach ann go leathfadh an galar sin go bunaíochtaí eile ainmhithe den chineál gabhair nó den chineál caorach.

(3)

Le Rialachán Tarmligthe (AE) 2020/687 ón gCoimisiún (2) forlíontar na rialacha maidir le rialú na ngalar liostaithe dá dtagraítear in Airteagal 9(1), pointí (a), (b) agus (c), de Rialachán (AE) 2016/429, agus a shainmhínítear mar ghalair de chatagóirí A, B agus C i Rialachán Cur Chun Feidhme (AE) 2018/1882 ón gCoimisiún (3). Go háirithe, foráiltear le hAirteagail 21 agus 22 de Rialachán Tarmligthe (AE) 2020/687 maidir le crios srianta a bhunú i gcás ráig de ghalar de chatagóir A, lena n-áirítear an bholgach caorach agus an bholgach gabhar, agus maidir le bearta áirithe a bheidh le cur i bhfeidhm ann. Ina theannta sin, foráiltear le hAirteagal 21(1) den Rialachán Tarmligthe sin go gcuimseofar leis an gcrios srianta crios cosanta, crios faireachais, agus, más gá, crios srianta breise timpeall na gcriosanna cosanta agus faireachais nó cóngarach dóibh.

(4)

Glacadh Cinneadh Cur Chun Feidhme (AE) 2024/2778 ón gCoimisiún (4) faoi chuimsiú Rialachán (AE) 2016/429 agus leagadh síos leis bearta éigeandála eatramhacha áirithe a bhaineann le hionfhabhtú leis an mbolgach caorach agus leis an mbolgach gabhar sa Bhulgáir.

(5)

Tar éis ghlacadh Chinneadh Cur Chun Feidhme (AE) 2024/2778, thug an Bhulgáir fógra don Choimisiún faoi ráig bhreise den bholgach caorach agus den bholgach gabhar i mbunaíocht ina raibh ainmhithe den chineál caorach agus den chineál gabhair ar coimeád. Mar thoradh air sin, le Cinneadh Cur Chun Feidhme (AE) 2024/2918 ón gCoimisiún (5) rinneadh Cinneadh Cur Chun Feidhme (AE) 2024/2778 a aisghairm agus Cinneadh Cur Chun Feidhme (AE) 2024/2918 ón gCoimisiún a chur ina ionad. Go sonrach, déantar foráil le Cinneadh Cur Chun Feidhme (AE) 2024/2918 maidir leis na criosanna cosanta, na criosanna faireachais agus na criosanna srianta breise atá le bunú ag an mBulgáir, i gcomhréir le Rialachán Tarmligthe (AE) 2020/687, go gcuimseoidh na criosanna sin ar a laghad na limistéir a liostaítear san Iarscríbhinn a ghabhann leis an gCinneadh Cur Chun Feidhme sin.

(6)

Tar éis ghlacadh Chinneadh Cur Chun Feidhme (AE) 2024/2918, thug an Bhulgáir fógra don Choimisiún faoi ráigeanna breise den bholgach caorach agus den bholgach gabhar i mbunaíochtaí ina raibh ainmhithe den chineál caorach ar coimeád. Dá bhrí sin, leasaíodh Cinneadh Cur Chun Feidhme (AE) 2024/2918 le Cinneadh Cur Chun Feidhme 2024/3111 ón gCoimisiún (6).

(7)

Ina dhiaidh sin, thug an Bhulgáir fógra don Choimisiún faoi dhá ráig bhreise den bholgach caorach agus den bholgach gabhar i mbunaíochtaí ina raibh ainmhithe den chineál caorach agus den chineál gabhar ar coimeád, bunaíochtaí atá lonnaithe i réigiúin Sliven agus Haskovo. Tá ceann de na ráigeanna ann lasmuigh de na criosanna srianta a bunaíodh cheana féin mar thoradh ar ráigeanna a tharla roimhe sin.

(8)

Dá bhrí sin, na limistéir a liostaítear mar chriosanna cosanta, criosanna faireachais agus criosanna srianta breise sa Bhulgáir san Iarscríbhinn a ghabhann le Cinneadh Cur Chun Feidhme (AE) 2024/2918, ba cheart iad a choigeartú ó thaobh spáis agus ama de, chun leathadh breise an ghalair sa Bhulgáir agus sa chuid eile den Aontas a chosc, agus ba cheart fad na mbeart atá le cur i bhfeidhm sna criosanna sin a choigeartú. Thairis sin, is gá tuilleadh criosanna cosanta, criosanna faireachais agus criosanna srianta breise a bhunú agus fad na mbeart atá le cur i bhfeidhm iontu a leagan síos maidir leis an ráig a deimhníodh i réigiún Sliven. Dá bhrí sin, an liosta de chriosanna cosanta agus fad na mbeart atá le cur i bhfeidhm iontu, ar liosta é a leagtar amach san Iarscríbhinn a ghabhann le leis an gCinneadh Cur Chun Feidhme sin, ba cheart é a leasú dá réir sin.

(9)

Méid na gcriosanna agus fad na mbeart atá le cur i bhfeidhm sna criosanna cosanta, criosanna faireachais agus criosanna srianta breise, tá siad bunaithe ar na critéir a leagtar amach in Airteagal 64(1) de Rialachán (AE) 2016/429 agus ar na rialacha a leagtar síos i Rialachán Tarmligthe (AE) 2020/687, lena n-áirítear an staid eipidéimeolaíoch a mhéid a bhaineann leis an mbolgach caorach agus leis an mbolgach gabhar sna limistéir atá buailte ag an ngalar sin agus staid eipidéimeolaíoch fhoriomlán na bolgaí caorach agus na bolgaí gabhar sa Bhulgáir mar aon leis an leibhéal riosca maidir le leathadh breise an ghalair. Cuirtear caighdeáin idirnáisiúnta an Chóid um Shláinte na nAinmhithe Talún ón Eagraíocht Dhomhanda um Shláinte Ainmhithe (WOAH (7)) san áireamh freisin agus fad na mbeart á chinneadh. Sa staid eipidéimeolaíoch atá ann faoi láthair, tá riosca ard ann go leathfaidh an galar a thuilleadh ós rud é gur tharla ráig nua den bholgach caorach agus den bholgach gabhar, agus gur deimhníodh an chéad ráig i réigiún Sliven. Tugann sé sin le fios go bhfuil an galar fós ann agus ag leathadh thar achair fhada, d’ainneoin na mbeart atá i bhfeidhm cheana.

(10)

Dá bhrí sin, ba cheart an Iarscríbhinn a ghabhann le Cinneadh Cur Chun Feidhme (AE) 2024/2918 a leasú dá réir sin.

(11)

Agus aird á tabhairt ar an staid eipidéimeolaíoch atá ann faoi láthair san Aontas a mhéid a bhaineann le bolgach caorach agus bolgach gabhar, ba cheart tréimhse chur i bhfeidhm Chinneadh Cur Chun Feidhme (AE) 2024/2918 a fhadú go dtí an 1 Márta 2025.

(12)

Tá na bearta dá bhforáiltear sa Chinneadh seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha.

1.

in Airteagal 4, cuirtear ‘1 Márta 2025’ in ionad an dáta ‘28 Feabhra 2025’;

2.

cuirtear an téacs a leagtar amach san Iarscríbhinn a ghabhann leis an gCinneadh seo in ionad na hIarscríbhinne.