(1)

Il-Ftehim Internazzjonali dwar iż-Żejt taż-Żebbuġa u ż-Żebbuġ tal-Mejda, 2015 (il-“Ftehim”) ġie konkluż fmill-Unjoni permezz tad-Deċiżjoni tal-Kunsill (UE) 2019/848 (1).

(2)

Skont l-Artikolu 7(1), il-punt (b), tal-Ftehim, il-Kunsill tal-Membri tal-Kunsill Internazzjonali taż-Żebbuġ (IOC) (“il-Kunsill tal-Membri”) jista’ jieħu deċiżjonijiet u jadotta rakkomandazzjonijiet għall-applikazzjoni tad-dispożizzjonijiet tal-Ftehim.

(3)

Il-Kunsill tal-Membri, waqt il-123 sessjoni tiegħu f’Ġunju 2026, huwa skedat li jadotta żewġ deċiżjonijiet dwar il-metodu ta’ valutazzjoni organolettika għaż-żejt taż-żebbuġa verġni.

(4)

Id-deċiżjonijiet tal-IOC ser, jekk jiġu adottati, jipproduċu effetti legali għall-Unjoni fir-rigward tal-kummerċ internazzjonali mal-membri l-oħra tal-IOC u se jinfluwenzaw il-kontenut tad-dritt tal-Unjoni, jiġifieri regoli dwar il-kontrolli tal-konformità għaż-żejt taż-żebbuġa adottati mill-Kummissjoni skont l-Artikolu 90a tar-Regolament (UE) Nru 1308/2013 tal-Parlament Ewropew u tal-Kunsill (2).

(5)

Id-deċiżjonijiet li għandhom jiġu adottati ġew diskussi b’mod estensiv bejn l-esperti xjentifiċi u tekniċi tal-Kummissjoni u tal-Istati Membri dwar iż-żejt taż-żebbuġa. Dawk id-deċiżjonijiet se jikkontribwixxu għall-armonizzazzjoni internazzjonali tal-istandards taż-żejt taż-żebbuġa u se jistabbilixxu qafas li jenħtieġ li jiżgura kompetizzjoni ġusta fil-kummerċ tal-prodotti fis-settur taż-żejt taż-żebbuġa. Għaldaqstant, jenħtieġ li l-Unjoni tappoġġa l-adozzjoni ta’ dawk id-deċiżjonijiet.

(6)

Għalhekk huwa xieraq li tiġi stabbilita l-pożizzjoni li għandha tittieħed fi ħdan il-Kunsill tal-Membri fir-rigward tal-metodu tal-valutazzjoni organolettika għaż-żejt taż-żebbuġa verġni.

(7)

Jekk l-adozzjoni ta’ dawk id-deċiżjonijiet tiġi posposta sabiex isir skambju ta’ korrispondenza qabel il-124 sessjoni tal-Kunsill tal-Membri, minħabba li xi Membri ma jkunux f’pożizzjoni li jagħtu l-approvazzjoni tagħhom, il-pożizzjoni stabbilita f’din id-Deċiżjoni jenħtieġ li tittieħed f’isem l-Unjoni permezz ta’ skambju ta’ korrispondenza.

(8)

Madankollu, jenħtieġ li jkun possibbli għar-rappreżentanti tal-Unjoni fil-Kunsill tal-Membri li jaqblu dwar adattamenti tekniċi għal metodi jew għal dokumenti oħra tal-IOC mingħajr deċiżjoni ulterjuri tal-Kunsill jekk dawk l-adattamenti tekniċi jirriżultaw minn emendi relatati mad-deċiżjonijiet li għandhom jiġu adottati fir-rigward tal-metodu tal-valutazzjoni organolettika għaż-żejt taż-żebbuġa verġni.

(9)

Sabiex jitħarsu l-interessi tal-Unjoni, jenħtieġ madankollu li r-rappreżentanti tal-Unjoni fil-Kunsill tal-Membri jkunu jistgħu jitolbu li l-addozzjoni ta’ dawk id-deċiżjonijiet jiġu posposti, jekk il-pożizzjoni li għandha tittieħed f’isem l-Unjoni x’aktarx li tiġi affettwata minn informazzjoni xjentifika jew teknika ġdida ppreżentata qabel il-124 sessjoni tal-Kunsill tal-Membri,

—

Reviżjoni 3 tad-dokument COI/T.20/Doc. Nru 5 dwar it-“Tazza għad-dewqan taż-żejt”;

—

Reviżjoni 2 tad-dokument COI/T.20/Doc. Nru 6 dwar il-gwida għall-installazzjoni ta’ kamra għad-dewqan.