|
12.10.2021 |
MT |
Il-Ġurnal Uffiċjali tal-Unjoni Ewropea |
L 362/1 |
DEĊIŻJONI TAL-KUMMISSJONI (EURATOM) 2021/1802
tal-10 ta’ Ġunju 2021
skont l-Artikolu 83 tat-Trattat li jistabbilixxi l-Komunità Ewropea dwar l-Enerġija Atomika — Sommarju tad-dispożizzjonijiet ewlenin tad-Deċiżjoni jinsab hawn taħt, mingħajr preġudizzju għall-effett sħiħ tad-Deċiżjoni nnifisha
(notifikata fid-dokument numru C(2021) 3889)
Din id-Deċiżjoni hija indirizzata liċ-Ċentru Nazzjonali għar-Riċerka Nukleari (Instituto Superior Técnico, Campus Tecnológico e Nuclear – CTN, il-Portugall) u ġiet notifikata lis-CTN fl-10 ta’ Ġunju 2021.
Artikolu 1
1. Iċ-Ċentru Nazzjonali għar-Riċerka Nukleari (Instituto Superior Técnico, Campus Tecnológico e Nuclear – CTN) kiser id-dispożizzjonijiet tal-ewwel paragrafu tal-Artikolu 78 tat-Trattat Euratom u tal-Artikoli 3 u 4 tar-Regolament tal-Kummissjoni (Euratom) Nru 302/2005 tat-8 ta’ Frar 2005 dwar l-applikazzjoni tas-salvagwardji tal-Euratom (1) meta ma kkomunikax fil-ħin lill-Kummissjoni d-dikjarazzjoni korretta u sħiħa tal-karatteristiċi tekniċi bażiċi.
2. Iċ-Ċentru Nazzjonali għar-Riċerka Nukleari (Instituto Superior Técnico, Campus Tecnológico e Nuclear – CTN) kiser id-dispożizzjonijiet tal-Artikolu 79 tat-Trattat Euratom u tal-Artikoli 7, 8 u 9 tar-Regolament (Euratom) Nru 302/2005 dwar l-applikazzjoni tas-salvagwardji tal-Euratom meta naqas milli jwaqqaf u jħaddem sistema affidabbli tal-akkontabbiltà li kapaċi tirrapporta inventarju sħiħ tal-materjali nukleari.
Artikolu 2
1. Il-Kummissjoni toħroġ twissija liċ-Ċentru Nazzjonali għar-Riċerka Nukleari (Instituto Superior Técnico, Campus Tecnológico e Nuclear – CTN).
2. It-twissija hija imposta bil-fehim li n-nuqqasijiet elenkati fl-Artikolu 1 jiġu rettifikati malajr kemm jista’ jkun.
3. Abbażi tar-rapport imsemmi fl-Artikolu 3 l-verifiki tagħha stess, il-Kummissjoni se tivvaluta l-konformità tas-CTN mar-rekwiżiti stabbiliti fil-paragrafu 2.
Artikolu 3
Is-CTN għandu jipprovdi rapport lill-Kummissjoni, fi żmien tliet xhur mid-data ta’ din id-Deċiżjoni, li jiddeskrivi l-miżuri meħuda biex jiġu rettifikati n-nuqqasijiet elenkati fl-Artikolu 1. Is-CTN għandu jwettaq miżuri biex jeskludi okkorrenzi simili fil-futur.
Artikolu 4
1. Din id-Deċiżjoni hija indirizzata liċ-Ċentru Nazzjonali għar-Riċerka Nukleari (Instituto Superior Técnico, Campus Tecnológico e Nuclear – CTN, il-Portugall).
2. Din id-Deċiżjoni għandha tiġi kkomunikata lir-Repubblika Portugiża.
Magħmul fi Brussell, l-10 ta’ Ġunju 2021.