(1)

Ir-Regolament (UE) 2019/1241 jistabbilixxi miżuri tekniċi reġjonali speċifiċi għall-ilmijiet tal-Unjoni fl-Ilmijiet tal-Majjistral u fl-Ilmijiet tal-Lbiċ.

(2)

L-Anness VI tar-Regolament (UE) 2019/1241 jipprevedi miżuri tekniċi għall-Ilmijiet tal-Majjistral u l-Anness VII jipprevedihom għall-Ilmijiet tal-Lbiċ.

(3)

L-Artikolu 18(1) tar-Regolament (UE) Nru 1380/2013 tal-Parlament Ewropew u tal-Kunsill (2) jistabbilixxi li l-Istati Membri li jkollhom interess ta’ ġestjoni dirett fil-miżuri ta’ konservazzjoni tal-Unjoni li japplikaw għal reġjun ġeografiku partikolari, jistgħu jippreżentaw rakkomandazzjonijiet konġunti biex jintlaħqu l-objettivi ta’ dawk il-miżuri. L-Artikolu 15(3) tar-Regolament (UE) 2019/1241 jippermetti lill-Istati Membri b’interess ta’ ġestjoni dirett jissottomettu rakkomandazzjonijiet konġunti bl-iskop tal-adozzjoni ta’ atti delegati li jemendaw, jissupplimentaw, iħassru jew jidderogaw mill-miżuri tekniċi reġjonali stabbiliti fl-Annessi ta’ dak ir-Regolament.

(4)

Il-Belġju, Spanja, Franza, in-Netherlands u l-Portugall (il-Grupp Reġjonali tal-Istati Membri tal-Ilmijiet tal-Lbiċ) u l-Belġju, Spanja, Franza, l-Irlanda u n-Netherlands (il-Grupp Reġjonali tal-Istati Membri tal-Ilmijiet tal-Majjistral) għandhom interess ta’ ġestjoni dirett għas-sajd fl-Ilmijiet tal-Lbiċ u tal-Majjistral rispettivament.

(5)

Fit-8 ta’ Novembru 2020, il-Grupp Reġjonali tal-Istati Membri tal-Ilmijiet tal-Lbiċ ippreżenta rakkomandazzjoni konġunta lill-Kummissjoni li tipproponi daqs minimu ta’ referenza għall-konservazzjoni (MCRS, minimum conservation reference size) imnaqqas ta’ 32 mm għall-gandoffla tal-għonq qasir, magħrufa wkoll bħala l-gandoffla ta’ Manila, (Venerupis philippinarum) fil-Baċir ta’ Arcachon.

(6)

Fis-seduta plenarja tat-22–26 ta’ Marzu 2021, il-Kumitat Xjentifiku, Tekniku u Ekonomiku għas-Sajd (STECF, Scientific, Technical and Economic Committee for Fisheries) evalwa r-rakkomandazzjoni konġunta u kkonkluda (3) li l-informazzjoni pprovduta ma kinitx tiġġustifika l-MCRS imnaqqas propost.

(7)

Fi Frar 2023, il-Grupp Reġjonali tal-Istati Membri tal-Ilmijiet tal-Lbiċ ippreżenta aktar informazzjoni dwar il-gandoffla tal-għonq qasir.

(8)

Fis-seduta plenarja tal-20–24 ta’ Marzu 2023, l-STECF ivvaluta dik l-informazzjoni ulterjuri u kkonkluda (4) li, minħabba li l-MCRS imnaqqas propost ta’ 32 mm huwa akbar mill-istima tad-daqs fl-ewwel maturità (26,7 mm) fil-baċir ta’ Arcachon, l-impatt fuq il-frieħ x’aktarx li jkun minimu. L-STECF ikkonkluda wkoll li filwaqt li frazzjoni akbar tal-popolazzjoni matura se tkun tista’ tinħasad, l-impatt tal-MCRS imnaqqas propost fuq il-popolazzjoni matura x’aktarx li jkun negliġibbli minħabba li, skont l-analiżi disponibbli, l-akbar proporzjon tal-popolazzjoni matura se jibqa’ protett mis-sajd. Barra minn hekk, l-STECF ikkonkluda li kwalunkwe effett fuq l-istatus ta’ konservazzjoni tal-istokk x’aktarx li jkun minuri għall-popolazzjoni sħiħa u li kwalunkwe benefiċċju ta’ konservazzjoni eżistenti fuq il-frieħ li jirriżulta mill-MCRS attwali ta’ 35 mm huwa mistenni li jibqa’ l-istess. Fl-aħħar nett, l-STECF innota li: (i) hemm żewġ riżervi tas-sajd magħluqa; (ii) bħalissa hemm 40 liċenzja tas-sajd attivi u sistema għat-tiġdid li għal diversi snin kellha l-għan li tkompli tnaqqas il-liċenzji l-ġodda; u (iii) l-istħarriġiet tal-istokk isiru kull sentejn.

(9)

Minħabba li (i) l-MCRS imnaqqas x’aktarx li jkollu impatt negliġibbli fuq il-popolazzjonijiet maturi u impatt minimu fuq il-frieħ; (ii) il-benefiċċji ta’ konservazzjoni eżistenti mistennija li jibqgħu l-istess; (iii) l-MCRS imnaqqas ikun akkumpanjat minn miżuri ta’ ġestjoni li jinkludu ż-żewġ riżervi tas-sajd magħluqa u sistema ta’ liċenzji; u (iv) l-istħarriġiet dwar il-popolazzjoni ta’ dan l-istokk isiru kull sentejn, il-Kummissjoni tqis li r-rekwiżiti tal-Artikoli 15 u 18 tar-Regolament (UE) 2019/1241 huma ssodisfati.

(10)

Fit-13 ta’ Ġunju 2024 u fit-28 ta’ Ġunju 2024, il-Gruppi Reġjonali tal-Istati Membri tal-Ilmijiet tal-Lbiċ u tal-Ilmijiet tal-Majjistral, rispettivament, talbu estensjoni sal-31 ta’ Diċembru 2026 għall-miżuri li ilhom japplikaw għall-paġella ħamra (Pagellus bogaraveo) minn Lulju 2022 (5). Bl-estensjoni jinżammu kemm l-MCRS attwali għall-paġella ħamra fiż-żewġ baċiri tal-baħar, kif ukoll l-għeluq (i) għall-bastimenti li jtajru l-bandiera Franċiża fis-subżoni 6 sa 8 tal-ICES mill-1 ta’ Jannar sat-30 ta’ Ġunju u (ii) fuq bażi staġjonali għas-sajd kummerċjali u s-sena kollha għas-sajd rikreattiv f’żoni ġeografiċi speċifiċi tas-subżona 8 tal-ICES.

(11)

Fis-26 ta’ Settembru 2024, l-Istati Membri ppreżentaw rakkomandazzjoni konġunta aġġornata lill-Kummissjoni li tillimita d-durata tal-estensjoni mitluba sa Diċembru 2025.

(12)

Il-Grupp ta’ Esperti dwar is-Sajd u l-Akkwakultura ġie kkonsultat fis-27 ta’ Settembru 2024.

(13)

L-STECF preċedentement ivvaluta dawn il-miżuri fl-2021 u kkonkluda li dawn kellhom il-potenzjal li jnaqqsu l-qabdiet tal-paġella ħamra (6).

(14)

Peress li: (i) il-miżuri huma l-istess bħal dawk li ilhom japplikaw għall-paġella ħamra minn Lulju 2022; (ii) id-data għal dan l-istokk għadha skarsa u l-ICES ħareġ parir li l-qabdiet għall-2025 u l-2026 għandhom ikunu żero (7); u (iii) il-miżuri għadhom aktar stretti mill-miżuri bażi, il-Kummissjoni tqis li r-rekwiżiti tal-Artikolu 15 tar-Regolament (UE) 2019/1241 huma ssodisfati.

(15)

Billi l-miżuri previsti f’dan ir-Regolament għandhom impatt dirett fuq l-ippjanar tal-istaġun tas-sajd tal-bastimenti tal-Unjoni u fuq l-attivitajiet ekonomiċi relatati, jenħtieġ li dan ir-Regolament jidħol fis-seħħ mill-aktar fis possibli. Peress li l-perjodu ta’ applikazzjoni tal-miżuri introdotti bir-Regolament Delegat tal-Kummissjoni (UE) 2024/491 (8) jiskadi fil-31 ta’ Diċembru 2024, il-miżuri li jikkonċernaw il-paġella ħamra jenħtieġ li japplikaw mill-1 ta’ Jannar 2025 sabiex tiġi żgurata l-kontinwità legali.

(16)

Il-miżuri introdotti b’dan ir-Regolament applikabbli għall-ilmijiet tal-Unjoni għandhom l-għan li jilħqu l-objettivi stabbiliti fl-Artikolu 494(1) u (2) tal-Ftehim dwar il-Kummerċ u l-Kooperazzjoni bejn l-Unjoni Ewropea u l-Komunità Ewropea tal-Enerġija Atomika, min-naħa waħda, u r-Renju Unit tal-Gran Brittanja u l-Irlanda ta’ Fuq, min-naħa l-oħra (9) u jikkunsidraw il-prinċipji msemmija fl-Artikolu 494(3) ta’ dak il-ftehim. Dawn huma mingħajr preġudizzju għal kwalunkwe miżura applikabbli fl-ilmijiet tar-Renju Unit tal-Gran Brittanja u tal-Irlanda ta’ Fuq.

(17)

Għaldaqstant, jenħtieġ li r-Regolament (UE) 2019/1241 jiġi emendat kif xieraq,