(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fin-nutrizzjoni tal-annimali u r-raġunijiet u l-proċeduri għall-għoti ta’ tali awtorizzazzjoni.

(2)

L-aċidu gwanidinoaċetiku u preparat tal-aċidu gwanidinoaċetiku (“l-addittivi”) ġew awtorizzati bħala addittivi tal-għalf għall-użu fl-għalf għat-tiġieġ tas-simna, għall-ħnienes miftuma u għall-ħnieżer tas-simna bir-Regolament ta’ Implimentazzjoni tal-Kummissjoni (UE) 2016/1768 (2).

(3)

F’konformità mal-Artikolu 7 tar-Regolament (KE) Nru 1831/2003, ġew ippreżentati żewġ applikazzjonijiet għall-awtorizzazzjoni ta’ użi ġodda tal-addittivi. Mal-applikazzjonijiet intbagħtu d-dettalji u d-dokumenti meħtieġa skont l-Artikolu 7(3) tar-Regolament (KE) Nru 1831/2003.

(4)

L-ewwel applikazzjoni oriġinarjament kienet tikkonċerna l-awtorizzazzjoni taż-żewġ addittivi għall-ispeċijiet kollha tal-annimali għall-użu fl-għalf u fl-ilma tax-xorb, bit-talba li dawk l-addittivi jiġu kklassifikati fil-kategorija “addittivi nutrittivi” u fil-grupp funzjonali “aċidi amminiċi, l-imlieħ u l-analogi tagħhom”.

(5)

Fis-6 ta’ Mejju 2022, l-applikant irtira l-ewwel applikazzjoni għall-awtorizzazzjoni tal-addittivi għall-ispeċijiet kollha tal-annimali għajr il-ħnieżer li jkunu għadhom qed jikbru u l-ispeċijiet tat-tjur li jkunu għadhom qed jikbru. Barra minn hekk, fit-23 ta’ Jannar 2023, l-applikant irtira dik l-applikazzjoni għall-ispeċijiet kollha li kien fadal għajr it-tiġieġ tas-simna għall-użu fl-ilma, għat-tiġieġ imrobbija għat-tnissil/għall-bajd għall-użu fl-għalf u fl-ilma, u għall-ħnienes miftuma u għall-ħnieżer tas-simna għall-użu fl-ilma.

(6)

Ir-Regolament ta’ Implimentazzjoni tal-Kummissjoni (UE) 2023/2628 (3) awtorizza l-addittivi għat-tiġieġ imrobbija għat-tnissil u għat-tiġieġ imrobbija għall-bajd fl-għalf u fl-ilma tax-xorb, u għat-tiġieġ tas-simna fl-ilma tax-xorb. Għalhekk, l-ewwel applikazzjoni għadha tikkonċerna biss l-użu tal-addittivi fl-ilma tax-xorb għall-ħnienes miftuma u għall-ħnieżer tas-simna.

(7)

Fl-opinjoni tagħha tat-28 ta’ Settembru 2022 (4), l-Awtorità Ewropea dwar is-Sigurtà fl-Ikel (“l-Awtorità”) kienet ikkonkludiet li, fil-kundizzjonijiet tal-użu proposti, l-addittivi huma sikuri fil-livell ta’ 1 200 mg ta’ aċidu gwanidinoaċetiku/kg ta’ għalf komplet jew ta’ 600 mg ta’ aċidu gwanidinoaċetiku/l ilma għall-ħnienes u għall-ħnieżer tas-simna, għall-konsumaturi u għall-ambjent. L-Awtorità kkonkludiet ukoll li l-addittivi mhumiex tossiċi meta jinġibdu man-nifs, mhumiex irritanti għall-ġilda u għall-għajnejn u mhumiex sensitizzaturi dermali. L-Awtorità qalet ukoll li jitqies li l-livelli sikuri massimi proposti tal-addittivi kienu dderivati mis-suppożizzjoni li l-għalf ikun fih biżżejjed ammonti ta’ donaturi tal-metil (għajr il-metijonina, eż. il-kolina, il-betaina u l-aċidu foliku) u tal-vitamina B12.

(8)

Fl-opinjonijiet tagħha tat-28 ta’ Settembru 2022 u tat-18 ta’ Marzu 2025 (5), l-Awtorità kkonkludiet ukoll li l-użu tal-addittivi fl-ilma tax-xorb għandu l-potenzjal li jkun effikaċi fit-titjib tal-prestazzjoni żooteknika tal-ħnienes miftuma u tal-ħnieżer tas-simna fil-kundizzjonijiet tal-użu proposti.

(9)

Fl-opinjonijiet tagħha dwar l-aċidu gwanidinoaċetiku adottati fis-27 ta’ Jannar 2016 (6) u fit-28 ta’ Settembru 2022, l-Awtorità ddikjarat li l-addittivi jenħtieġ li ma jitqisux li jagħmlu parti mill-grupp funzjonali “aċidi amminiċi, l-imlieħ u l-analogi tagħhom”, minħabba li l-aċidu gwanidinoaċetiku jiġi kkonvertit esklużivament fi kreatina u ma jistax jiġi kkonvertit lura għal aċidu amminiku, filwaqt li l-grupp funzjonali “aċidi amminiċi, l-imlieħ u l-analogi tagħhom” jinkludi sustanzi li finalment jidħlu fil-metaboliżmu tal-ġisem u bħala tali jieħdu sehem fil-mogħdijiet tas-sinteżi tal-proteini.

(10)

Fl-opinjoni tagħha tat-28 ta’ Settembru 2022, l-Awtorità ma dehrilhiex li hemm bżonn ta’ rekwiżiti speċifiċi ta’ monitoraġġ ta’ wara l-introduzzjoni fis-suq.

(11)

It-tieni applikazzjoni tikkonċerna l-awtorizzazzjoni tal-addittivi għad-dundjani tas-simna u mrobbija għat-tnissil, speċifikament tal-aċidu gwanidinoaċetiku fl-għalf u fl-ilma tax-xorb u tal-preparat tal-aċidu gwanidinoaċetiku fl-għalf, bit-talba li dawk l-addittivi jiġu kklassifikati fil-kategorija tal-addittivi “addittivi żootekniċi” u fil-grupp funzjonali “addittivi żootekniċi oħra”.

(12)

Fl-opinjoni tagħha tat-18 ta’ Marzu 2025 (7), l-Awtorità kkonkludiet li l-addittivi huma sikuri għad-dundjani tas-simna u mrobbija għat-tnissil, għall-konsumaturi u għall-ambjent fil-livell ta’ 1 200 mg ta’ aċidu gwanidinoaċetiku/kg ta’ għalf komplet jew ta’ 600 mg ta’ aċidu gwanidinoaċetiku/l ilma, bis-suppożizzjoni li l-għalf fih ammonti suffiċjenti ta’ donaturi tal-metil (għajr il-metijonina, eż. il-kolina, il-betaina u l-aċidu foliku) u ta’ vitamina B12. Tenniet ukoll il-konklużjoni tagħha f’valutazzjonijiet preċedenti li l-addittivi mhumiex tossiċi meta jinġibdu man-nifs, mhumiex irritanti għall-ġilda u għall-għajnejn u mhumiex sensitizzaturi dermali. L-Awtorità kkonkludiet ukoll li l-addittivi għandhom il-potenzjal li jkunu effikaċi fid-dundjani tas-simna u fid-dundjani mrobbija għat-tnissil f’livell minimu ta’ użu ta’ 600 mg ta’ aċidu gwanidinoaċetiku/kg ta’ għalf komplet jew ta’ 300 mg ta’ aċidu gwanidinoaċetiku/l ta’ ilma. Hija ma qisitx li hemm il-ħtieġa ta’ rekwiżiti speċifiċi ta’ monitoraġġ għal wara l-introduzzjoni fis-suq.

(13)

Il-Laboratorju ta’ Referenza stabbilit bir-Regolament (KE) Nru 1831/2003 qies li l-konklużjonijiet u r-rakkomandazzjonijiet li ntlaħqu fil-valutazzjoni preċedenti dwar l-istess addittivi u vverifikati mill-Awtorità fl-opinjoni tagħha tas-27 ta’ Jannar 2016, huma validi u applikabbli għaż-żewġ applikazzjonijiet. Għalhekk, f’konformità mal-Artikolu 5(4), il-punt (a), tar-Regolament tal-Kummissjoni (KE) Nru 378/2005 (8), mhuwiex meħtieġ rapport ta’ evalwazzjoni tal-Laboratorju ta’ Referenza.

(14)

Fid-dawl ta’ dan ta’ hawn fuq, il-Kummissjoni tqis li l-addittivi jissodisfaw il-kundizzjonijiet previsti fl-Artikolu 5 tar-Regolament (KE) Nru 1831/2003. Għaldaqstant, l-użu tal-addittiv jenħtieġ li jiġi awtorizzat. Huwa xieraq, fir-rigward tal-applikazzjoni għall-awtorizzazzjoni tal-addittivi għall-ħnienes miftuma u għall-ħnieżer tas-simna, li jiġu awtorizzati l-addittivi fil-kategorija “addittivi żootekniċi” u l-grupp funzjonali “addittivi żootekniċi oħra”, filwaqt li jitqiesu l-kunsiderazzjonijiet mill-Awtorità fir-rigward tal-effetti ta’ dawk l-addittivi fuq il-prestazzjoni żooteknika fil-ħnienes u fil-ħnieżer tas-simna u l-fatt li ma jikkorrispondux mat-tip ta’ prodotti inklużi fil-grupp funzjonali “aċidi amminiċi, l-imlieħ u l-analogi tagħhom”. Barra minn hekk, minħabba l-awtorizzazzjoni tal-aċidu gwanidinoaċetiku u tal-preparat tal-aċidu gwanidinoaċetiku għall-użu kemm fl-għalf kif ukoll fl-ilma tax-xorb, jixraq li jiġi previst li l-użu simultanju tal-addittivi fl-għalf u fl-ilma tax-xorb ma jkunx permess, sabiex jiġi evitat kwalunkwe riskju li jinqabżu l-livelli sikuri tal-użu għall-annimali fil-mira.

(15)

Barra minn hekk, meta jitqies li skont l-opinjonijiet tal-Awtorità tas-27 ta’ Jannar 2016, tat-28 ta’ Settembru 2022 u tat-18 ta’ Marzu 2025, il-konċentrazzjonijiet sikuri u effikaċi tal-addittivi huma primarjament stabbiliti fl-għalf u mbagħad estrapolati għall-ilma tax-xorb, u li l-konsum tal-ilma fil-ħnieżer u fil-pollam jista’ jvarja minn 2 sa 3 darbiet dak tal-konsum tal-għalf (f’materja niexfa) (9), huwa xieraq li jiġi żgurat li l-ammont ta’ aċidu gwanidinoaċetiku amministrat permezz tal-ilma tax-xorb jibqa’ fil-medda awtorizzata fl-għalf abbażi tal-konsum reali mill-annimali tal-ilma tax-xorb meta mqabbel mal-għalf.

(16)

Għalhekk, jenħtieġ li r-Regolament ta’ Implimentazzjoni (UE) 2023/2628 jiġi emendat kif xieraq.

(17)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

“6.

B’kont meħud tal-ilma tax-xorb li jiġi effettivament ikkunsmat mill-annimali meta mqabbel mal-għalf, għandu jiġi żgurat li l-ammont ta’ aċidu gwanidinoaċetiku amministrat permezz tal-ilma tax-xorb ma jkunx ogħla minn dak li kieku jiġi mitmugħ fil-kontenut massimu ta’ 1 200 mg/kg ta’ għalf komplet.”