(1)

Le hAirteagal 20(2) de Rialachán(AE) 2026/2108, suitear táille láimhseála de chuid an Aontais is infheidhme i leith trádáil le tríú tíortha. Is éard a bheidh sa táille sin méid socraithe in aghaidh an earra le haghaidh na seirbhísí a sholáthrófar chun iarraidh a láimhseáil maidir le hearraí a chur faoin nós imeachta um scaoileadh i saorchúrsaíocht i gcás ina ndíoltar na hearraí sin i gciandíolachán le custaiméir i gcríoch chustaim an Aontais mar a shainmhínítear in Airteagal 3 den Rialachán sin, lena n-áirítear custaiméir sna codanna sin den chríoch chustaim nach bhfuil feidhm ag Treoracha 2006/112/CE (2) ná (AE) 2020/262 ón gComhairle (3) maidir leo (críocha fioscacha speisialta).

(2)

De bhun Airteagal 20(3) de Rialachán(AE) 2026/2108, comhfhreagróidh méid tháille láimhseála an Aontais do neaschostais na seirbhísí a sholáthrófar, go háirithe an costas a bhaineann le fíorú sonraí, anailís riosca, rialuithe agus bonneagar ábhartha, lena n-áirítear seirbhísí ábhartha arna soláthar ag Údarás Custaim an Aontais. Leagfar amach na costais sin i dtuarascáil a ullmhóidh an Coimisiún gach 2 bhliain i gcomhréir le hAirteagal 20(8) de Rialachán (AE) 2026/2108. Tá gá leis an tuarascáil sin chun a áirithiú go léirítear le méid tháille láimhseála an Aontais na neaschostais arna dtabhú ag na húdaráis chustaim, rud a chuireann ar a chumas don Choimisiún leibhéal na táille a athbhreithniú agus a choigeartú go tréimhsiúil.

(3)

Sa 2 bhliain atá amach romhainn, cuimsítear sa chéad tuarascáil ón gCoimisiún lena gcumhdaítear an tréimhse 2026-2028 meastacháin ar na costais le haghaidh nam Ballstát agus an Choimisiúin araon i ndáil le córais chustaim dhigiteacha ábhartha, chomh maith leis an gcion den fhoireann chustaim a bhíonn ag déileáil le himréiteach, rialuithe custaim, iniúchtaí agus próisis iarscaoilte, a mhéid a shanntar dóibh sonraí a sheiceáil, anailís riosca a dhéanamh agus na rialuithe custaim is gá a dhéanamh ar earraí a dhíoltar i gciandíolachán. Déanfaidh na Ballstáit infheistíocht freisin i dtrealamh ríomhthráchtála tar éis na nglaonna ar dheontais ón Aontas chun trealamh custaim a mhaoiniú. Tá an maoiniú sin ón Aontas san áireamh sa mheastachán costais. Os a choinne sin, ní áirítear ar na costais atá le cur san áireamh infheistíocht na mBallstát i mbonneagar rialuithe a mhaoinítear ón mbuiséad náisiúnta go heisiach ná costais arna dtabhú ag údaráis um fhaireachas margaidh agus seiceálacha comhlíontachta á ndéanamh acu ar earraí a thagann isteach i margadh an Aontais i gcás nach bhfuil na húdaráis sin ag gníomhú mar údarás ainmnithe faoi Airteagal 25 de Rialachán (AE) 2019/1020 ó Pharlaimint na hEorpa agus ón gComhairle (4). Meastar go bhfuil an measúnú ar na heilimintí costais measartha toisc go bhfuil sé bunaithe ar thoimhdí coimeádacha. Ina theannta sin, ba cheart méid na táille a bheith bunaithe ar shonraí stairiúla agus ar na sonraí is déanaí atá ar fáil. Ar an gcaoi chéanna, rinneadh réamh-mheastachán réasúnta atá chomh réadúil agus is féidir ar mhéid na n-earraí allmhairithe ó chiandíolachán a bhfuil coinne leo sna blianta atá romhainn. Ar an mbonn sin, meastar go bhfuil táille láimhseála de chuid an Aontais de EUR 2 in aghaidh an earra i gcomhréir leis na neaschostais a bhaineann go dlúth le maoirseacht chustaim na n-earraí sin.

(4)

Leagtar síos le hAirteagal 287(4) de Rialachán (AE) 2026/2108 go mbeidh feidhm ag táille láimhseála an Aontais ó 10 lá tar éis theacht i bhfeidhm an ghnímh tharmligthe ón gCoimisiún lena suitear méid na táille. Ar chúiseanna soiléireachta dlíthiúla agus comhleanúnachais, is gá, dá bhrí sin, dáta chur i bhfeidhm an Rialacháin seo a ailíniú leis an gceanglas sin. Chun a áirithiú go mbeidh feidhm ag an Rialachán seo gan mhoill agus chun aon chur isteach ar chur i bhfeidhm tháille láimhseála an Aontais a sheachaint, ba cheart an Rialachán seo a theacht i bhfeidhm lá a fhoilsithe in Iris Oifigiúil an Aontais Eorpaigh agus ba cheart feidhm a bheith aige an 10ú lá tar éis an teacht i bhfeidhm,