27.5.2015   

MT

Il-Ġurnal Uffiċjali tal-Unjoni Ewropea

L 129/28


DEĊIŻJONI TA' IMPLIMENTAZZJONI TAL-KUMMISSJONI (UE) 2015/819

tat-22 ta' Mejju 2015

li temenda l-Anness F tad-Direttiva tal-Kunsill 64/432/KEE rigward il-format tal-mudell taċ-ċertifikati tas-saħħa għall-kummerċ ta' annimali bovini u suwini ġewwa l-Unjoni

(notifikata bid-dokument C(2015) 3304)

(Test b'rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva tal-Kunsill 64/432/KEE tas-26 ta' Ġunju 1964 dwar il-problemi tas-saħħa tal-annimali li jaffetwaw il-kummerċ ta' annimali bovini u suwini ġewwa l-Komunità (1), u b'mod partikolari l-Artikolu 16 tagħha,

Billi:

(1)

Id-Direttiva tal-Kunsill 64/432/KEE tistabbilixxi l-kundizzjonijiet tas-saħħa tal-annimali li jirregolaw il-kummerċ tal-annimali bovini u ta' suwini fl-Unjoni. Din tipprovdi, fost l-oħrajn, li waqt it-trasport lejn id-destinazzjoni tagħhom, l-annimali bovini u suwini għandu jkollhom magħhom ċertifikat tas-saħħa li jikkonforma mal-Mudell 1 jew 2 kif xieraq, kif stabbilit fl-Anness F tagħha.

(2)

L-Anness F tad-Direttiva 64/432/KEE ġie emendat reċentement mid-Deċiżjoni ta' Implimentazzjoni tal-Kummissjoni 2014/798/UE (2) sabiex, fost oħrajn, jadatta l-format tal-mudell taċ-ċertifikati tas-saħħa għall-mudell armonizzat anness mar-Regolament tal-Kummissjoni (KE) Nru 599/2004 (3).

(3)

B'konformità mal-Artikolu 6(1)(b) tar-Regolament (KE) Nru 1760/2000 tal-Parlament Ewropew u tal-Kunsill (4), l-annimali bovini għandhom ikunu akkumpanjati minn passaport bbażat fuq l-informazzjoni miżmuma fil-bażi ta' dejta kompjuterizzata stabbilita fl-Istat Membru ta' oriġini b'konformità mal-Artikolu 14 tad-Direttiva 64/432/KEE, sakemm l-Istat Membru ta' oriġini ma jiskambjax dejta elettronika fl-Istat Membru tad-destinazzjoni permezz ta' sistema ta' skambju elettroniku msemmija fl-Artikolu 5 ta' dak ir-Regolament.

(4)

B'konformità mal-Artikolu 6(2) tar-Regolament tal-Kummissjoni (KE) Nru 911/2004 (5), għoġġiela ta' anqas minn erba ġimgħat jistgħu jkunu akkumpanjati waqt il-moviment tagħhom lejn Stat Membru ieħor b'passaport temporanju li jkun fih tal-inqas it-tagħrif stipulat fil-paragrafu 1 ta' dak l-Artikolu f'format approvat mill-awtorità kompetenti tal-Istat Membru tad-dispaċċ.

(5)

Madankollu, xi Stati Membri nnotifikaw lill-Kummissjoni dwar problemi relatati ma' xogħol amministrattiv addizzjonali kkawżati mill-obbligu li jipprovdu xi dettalji fil-punt I. 31 tal-mudell taċ-ċertifikat tas-saħħa għall-kummerċ ta' annimali bovini, bħad-data tat-twelid u s-sess tal-annimali li jiffurmaw il-kunsinna. Għalhekk, u billi din l-informazzjoni diġà hija inkluża fid-dokumenti ta' identifikazzjoni li, minbarra ċ-ċertifikat tas-saħħa, għandhom jakkompanjaw il-konsenja ta' annimali bovini, huwa xieraq li jitħassru dawk l-entrati minn dak il-punt u li jkunu emendati kif jixraq id-deskrizzjonijiet rilevanti fin-Noti ta' dak il-mudell taċ-ċertifikat tas-saħħa.

(6)

Barra minn hekk, kien ukoll mitlub mill-Istati Membri biex titħassar xi entrata relatata mas-sess tal-annimali minn punt I.31. tal-mudell taċ-ċertifikat tas-saħħa għall-kummerċ ta' ħnieżer billi din l-informazzjoni ma kinitx meħtieġa f'mudell taċ-ċertifikat tas-saħħa stipulat fl-Anness F tad- Direttiva 64/432/KEE, qabel l-emendi introdotti bid-Deċiżjoni ta' Implimentazzjoni 2014/798/UE. Għalhekk, huwa xieraq li titħassar dik l-entrata minn dan il-punt u li tiġi emendata kif jixraq id-deskrizzjoni rilevanti fin-Noti tal-mudell taċ-ċertifikat tas-saħħa għall-kummerċ ta' ħnieżer.

(7)

Barra minn hekk, sabiex ikomplu jitnaqqsu l-piżijiet amministrattivi għall-veterinarju uffiċjali, jixraq li titneħħa l-informazzjoni dwar l-ispeċi ta' annimali negozjati minn punt I.31 taż-żewġ mudelli taċ-ċertifikati tas-saħħa stabbiliti fl-Anness F għad-Direttiva 64/432/KEE billi din l-informazzjoni hija diġà ddikjarata fil-punt I.19. ta' dawk il-mudelli ta' ċertifikati tas-saħħa.

(8)

Għaldaqstant, l-Anness F tad-Direttiva 64/432/KEE għandu jiġi emendat skont dan.

(9)

Il-miżuri previsti f'din id-Deċiżjoni huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

ADOTTAT DIN ID-DEĊIŻJONI:

Artikolu 1

L-Anness F tad-Direttiva 64/432/KEE huwa mibdul bit-test fl-Anness ta' din id-Deċiżjoni.

Artikolu 2

Din id-Deċiżjoni hija indirizzata lill-Istati Membri.

Magħmul fi Brussell, it-22 ta' Mejju 2015.

Għall-Kummissjoni

Vytenis ANDRIUKAITIS

Membru tal-Kummissjoni


(1)   ĠU 121, 29.7.1964, p. 1977/64.

(2)  Id-Deċiżjoni ta' Implimentazzjoni 2014/798/UE tal-Kummissjoni tat-13 ta' Novembru 2014 li temenda l-Anness F tad-Direttiva tal-Kunsill Nru 64/432/KEE rigward il-format tal-mudell taċ-ċertifikati tas-saħħa għall-kummerċ ta' annimali bovini u suwini ġewwa l-Unjoni u r-rekwiżiti addizzjonali tas-saħħa relatati mat-Trichinella għall-kummerċ tas-suwini domestiċi ġewwa l-Unjoni (ĠU L 330, 15.11.2014, p. 50).

(3)  Ir-Regolament tal-Kummissjoni (KE) Nru 599/2004 tat-30 ta' Marzu 2004 li jikkonċerna l-adozzjoni ta' mudell armonizzat ta' ċertifikat u rapport tal-ispezzjoni marbuta mal-kummerċ intra-Komunitarju fl-annimali u l-prodotti li joriġinaw mill-annimali (ĠU L 94, 31.3.2004, p. 44).

(4)  Regolament (KE) Nru 1760/2000 tal-Parlament Ewropew u tal-Kunsill tas-17 ta' Lulju 2000 li jistabbilixxi sistema għall-identifikazzjoni u r-reġistrazzjoni tal-bhejjem tal-fart u dwar it-tikkettjar tal-laħam taċ-ċanga u tal-prodotti tal-laħam taċ-ċanga u li jħassar ir-Regolament tal-Kunsill (KE) Nru 820/97 (ĠU L 204, 11.8.2000, p. 1).

(5)  Ir-Regolament tal-Kummissjoni (KE) Nru 911/2004 tad-29 ta' April 2004 li jimplementa r-Regolament (KE) Nru 1760/2000 tal-Parlament Ewropew u tal-Kunsill fir-rigward tal-lametti tal-widnejn, tal-passaporti u tar-reġistri (ĠU L 163, 30.4.2004, p. 65):


ANNESS

“ANNESS F

MUDELL 1

Ċertifikat tas-saħħa tal-annimali għal annimali tal-ispeċi bovina għat-tgħammir/il-produzzjoni/il-qatla

Image 1

Test ta 'immaġni

Image 2

Test ta 'immaġni

Image 3

Test ta 'immaġni

Image 4

Test ta 'immaġni

Image 5

Test ta 'immaġni

Image 6

Test ta 'immaġni

MUDELL 2

Ċertifikat tas-saħħa tal-annimali għal suwini għat-tgħammir/il-produzzjoni/il-qatla

Image 7

Test ta 'immaġni

Image 8

Test ta 'immaġni

Image 9

Test ta 'immaġni

Image 10

Test ta 'immaġni
Image 11
Test ta 'immaġni ”