(1)

Le Cinneadh (CBES) 2021/509 ón gComhairle (1), bunaítear an tSaoráid Eorpach Síochána (SES) lena maoineodh Ballstáit gníomhaíochtaí an Aontais faoin gcomhbheartas eachtrach agus slándála chun an tsíocháin a chaomhnú, coinbhleachtaí a chosc agus an tslándáil idirnáisiúnta a neartú de bhun Airteagal 21(2), pointe (c), den Chonradh. Go háirithe, de bhun Airteagal 1(2) de Chinneadh (CBES) 2021/509, tá úsáid le baint as SES chun bearta cúnaimh a mhaoiniú, mar shampla gníomhaíochtaí chun acmhainneachtaí maidir le cúrsaí míleata agus cosanta atá ag tríú Stáit agus eagraíochtaí réigiúnacha agus idirnáisiúnta a neartú.

(2)

An 24 Deireadh Fómhair 2023, ghlac an Chomhairle conclúidí maidir le formheas a dhéanamh ar Straitéis Slándála Muirí athbhreithnithe an Aontais agus ar a Phlean Gníomhaíochta, lena leagtar amach creat don Aontas chun gníomhaíocht bhreise a dhéanamh chun a leasanna ar muir a choimirciú agus chun a shaoránaigh, a luachanna agus a gheilleagar a chosaint, agus rialacha idirnáisiúnta agus comhlíonadh iomlán ionstraimí idirnáisiúnta á gcur chun cinn ag an am céanna, go háirithe Coinbhinsiún na Náisiún Aontaithe maidir le Dlí na Farraige (UNCLOS).

(3)

Ó mhí Dheireadh Fómhair 2023 i leith, tá go leor ionsaithe dírithe ag na Houthi ar shoithí sa Mhuir Rua, i Murascaill Áidin, sa Mhuir Arabach agus i Murascaill Óman. Cuireann ionsaithe den sórt sin beatha mairnéalach ar shoithí i mbaol, agus is sárú iad ar an tsaoirse loingseoireachta ar an mórmhuir agus ar an gceart chun gluaiseachta idirthurais trí chaolais a úsáidtear le haghaidh loingseoireacht idirnáisiúnta a chumhdaítear in UNCLOS. Bíonn drochthionchar ag na hionsaithe sin freisin ar loingeas trádála agus ar gheilleagair go leor tíortha san Aontas agus sa réigiún.

(4)

An 10 Eanáir 2024, ghlac Comhairle Slándála na Náisiún Aontaithe Rún 2722 (2024), inar cáineadh go géar na hionsaithe a rinne na Houthi ar shoithí trádála agus tráchtála, inar leagadh béim ar a thábhachtaí atá sé cearta agus saoirsí loingseoireachta a bheith á bhfeidhmiú ag soithí na stát uile sa Mhuir Rua, lena n-áirítear soithí trádála agus tráchtála a dhéanann idirthuras trí Chaolas Baab al-Mandab, i gcomhréir leis an dlí idirnáisiúnta, inar éilíodh ar na Houthi deireadh a chur láithreach le gach ionsaí den sórt sin, inar dearbhaíodh gur gá urraim a thabhairt d’fheidhmiú cearta agus saoirsí loingseoireachta ag soithí trádála agus tráchtála, i gcomhréir leis an dlí idirnáisiúnta, agus inar tugadh aird ar cheart bhallstáit na Náisiún Aontaithe, i gcomhréir leis an dlí idirnáisiúnta, a soithí a chosaint ar ionsaithe, lena n-áirítear ionsaithe a bhaineann an bonn de na cearta agus na saoirsí loingseoireachta sin.

(5)

I gcomhthéacs ghéarchéim na Mara Rua, is gné tábhachtach é Fórsaí Armtha Djibouti a neartú chun rannchuidiú le coimirciú na slándála muirí sa réigiún.

(6)

An 8 Eanáir 2025, fuair Ardionadaí an Aontais do Ghnóthaí Eachtracha agus don Bheartas Slándála iarraidh ó Djibouti ar chúnamh ón Aontas d’Fhórsaí Armtha Djibouti maidir le trealamh, bonneagar agus seirbhísí barrthábhachtacha a sholáthar chun acmhainneachtaí a cabhlaigh a neartú.

(7)

Tá bearta cúnaimh le cur chun feidhme agus na prionsabail agus ceanglais a leagtar amach i gCinneadh (CBES) 2021/509 á gcur san áireamh, go háirithe go ndéantar Comhsheasamh 2008/944/CBES ón gComhairle (2) a chomhlíonadh, agus i gcomhréir leis na rialacha maidir le cur chun feidhme an ioncaim agus an chaiteachais a mhaoinítear faoi SES.

(8)

Athdhearbhaíonn an Chomhairle go bhfuil rún daingean aici cearta an duine, saoirsí bunúsacha agus prionsabail dhaonlathacha a chosaint, a chur chun cinn agus a chomhlíonadh, agus an smacht reachta agus an dea-rialachas a neartú, i gcomhréir le Cairt na Náisiún Aontaithe, le Dearbhú Uilechoiteann Chearta an Duine agus leis an dlí idirnáisiúnta, go háirithe an dlí idirnáisiúnta um chearta an duine agus an dlí daonnúil idirnáisiúnta,