|
Iris Oifigiúil |
GA Sraith C |
|
C/2024/1483 |
16.2.2024 |
Fógra tionscnaimh maidir le nós imeachta frith-fhóirdheontais a bhaineann le hallmhairí rothaí bóthair alúmanaim áirithe de thionscnamh Mharacó
(C/2024/1483)
Tá gearán faighte ag an gCoimisiún Eorpach (‘an Coimisiún’) de bhun Airteagal 10 de Rialachán (AE) 2016/1037 ó Pharlaimint na hEorpa agus ón gComhairle an 8 Meitheamh 2016 maidir le cosaint i gcoinne allmhairí ar tugadh fóirdheontas i leith, ar allmhairí iad ó thíortha nach baill den Aontas Eorpach (1) iad (‘an bun-Rialachán’), á líomhain go bhfuil fóirdheontas á thabhairt d’allmhairí rothaí bóthair alúmanaim áirithe de thionscnamh Mharacó agus, ar an gcaoi sin, go ndéanann siad díobháil (2) do thionscal an Aontais.
1. An Gearán
Chuir Comhlachas Mhonaróirí Rothaí na hEorpa (‘an gearánach’) an gearán isteach an 3 Eanáir 2024. Rinneadh an gearán thar ceann thionscal rothaí bóthair alúmanaim áirithe an Aontais de réir bhrí Airteagal 10(6) den bhun-Rialachán.
Tá leagan oscailte den ghearán mar aon le hanailís ar a mhéid a thacaíonn táirgeoirí de chuid an Aontais leis an ngearán ar fáil sa chomhad lena iniúchadh ag na páirtithe leasmhara. I roinn 5.6 den Fhógra seo, tá faisnéis le fáil faoi rochtain ar an gcomhad le haghaidh páirtithe leasmhara.
2. An táirge faoi imscrúdú
Is é táirge atá faoi réir an imscrúdaithe seo rothaí bóthair alúmanaim na mótarfheithiclí atá faoi cheannteidil 8701 go 8705, bíodh a ngabhálais feistithe orthu nó ná bíodh agus bíodh boinn feistithe orthu nó ná bíodh (‘an táirge lena mbaineann’).
Gach páirtí leasmhar ar mian leis faisnéis a chur isteach maidir le raon feidhme an táirge, ní mór dó é sin a dhéanamh laistigh de 10 lá ó dháta foilsithe an Fhógra seo (3).
3. Líomhain faoi fhóirdheonú
An táirge a líomhnaítear go bhfuil sé á fhóirdheonú, is é an táirge faoi imscrúdú é, is de thionscnamh Mharacó (‘na tíortha lena mbaineann’) é, agus tá sé faoi chóid AC ex 8708 70 10 agus ex 8708 70 50 (cóid TARIC 8708701015, 8708701050, 8708705015 agus 8708705050) faoi láthair. Is ar mhaithe le faisnéis amháin a thugtar na cóid AC agus TARIC agus gan dochar d’aon athrú a d’fhéadfaí a dhéanamh ar an aicmiú de réir taraife ina dhiaidh sin. Tá raon feidhme an imscrúdaithe seo faoi réir shainmhíniú an táirge faoi imscrúdú mar atá i Roinn 2.
Táirgeoirí an táirge atá faoi imscrúdú ón tír lena mbaineann, tá dóthain fianaise sa ghearán gur bhain siad tairbhe as roinnt fóirdheontas a dheonaigh Rialtas Mharacó.
Is éard atá sna cleachtais fóirdheontais líomhnaithe, inter alia, (i) aistriú díreach cistí agus aistrithe díreacha féideartha cistí nó dliteanas; (ii) ioncam rialtais atá ligthe thar ceal nó nár bailíodh, agus (iii) soláthar earraí nó seirbhísí ag an rialtas ar luach saothair nach leordhóthanach. I measc nithe eile, líomhain an gearánach gur ann, mar shampla, do dheontais agus do dhíolúintí ó cháin nó laghduithe ar cháin. Líomhain siad freisin gur chuir an rialtas talamh ar fáil ar luach saothair nach leordhóthanach.
Líomhnaíonn an gearánach thairis sin go dtairbhíonn ceann de tháirgeoirí an táirge atá faoi imscrúdú d’fhóirdheontais freisin i gcomhthéacs an chomhair idir Rialtas Mharacó agus Rialtas Dhaon-Phoblacht na Síne chun tacú le hinfheistíochtaí i Maracó mar chuid den tionscnamh nua ‘Bóthar Amháin, Crios Amháin’, sa bhreis ar na fóirdheontais a deonaíodh go díreach do Rialtas Mharacó. Tá fianaise sa ghearán maidir leis an gcomhar idir Rialtas Mharacó agus Rialtas na Síne, chomh maith le fianaise maidir le deontais dhíreacha arna soláthar ag Rialtas na Síne nó ag rialtais réigiúnacha eile (lena n-áirítear comhlachtaí poiblí), agus maoiniú fabhrach ó eintitis Shíneacha atá faoi úinéireacht Stáit nó atá faoi rialú an Stáit a deonaíodh go díreach nó go hindíreach don táirgeoir onnmhairiúcháin i Maracó,, agus maidir le soláthar earraí nó seirbhísí ar luach saothair nach leordhóthanach. I bhfianaise chomhthéacs an chomhair sin, líomhnaíonn an gearánach go dtéann na scéimeanna sin chun tairbhe don táirgeoir onnmhairiúcháin faoi úinéireacht na Síne atá bunaithe i Maracó. Tá tuairisc ar an gcomhar idir rialtas na Síne agus rialtas Mharacó agus ar na tionscadail nithiúla ag gabháil leis an líomhain sin.
Líomhnaíonn an gearánach gur fóirdheontais iad na bearta a dtugtar tuairisc orthu toisc go bhfuil ranníocaíocht airgeadais ó Rialtas Mharacó nó ó rialtais réigiúnacha (lena n-áirítear comhlachtaí poiblí) nó ó chomhlachtaí poiblí i gceist leo agus go dtéann siad chun tairbhe thairgeoirí an táirge faoi imscrúdú. Líomhnaítear go mbaineann na fóirdheontais sin go sonrach le fiontar nó le tionscal a spreagtar a ghníomhaíocht agus, dá bhrí sin, is fóirdheontais shonracha in-fhrithchúitithe iad.
I bhfianaise Airteagal 10(2) agus 10(3) den bhun-Rialachán, d’ullmhaigh an Coimisiún meabhrán i ndáil le leordhóthanacht na fianaise ina bhfuil measúnú an Choimisiúin ar an bhfianaise ar fad atá ar fáil dó maidir leis an tír lena mbaineann, agus arb ar a bonn a dhéanann an Coimisiún an t-imscrúdú a thionscnamh. Is féidir an meabhrán sin a fháil sa chomhad lena iniúchadh ag na páirtithe leasmhara.
Forchoimeádann an Coimisiún an ceart chun imscrúdú a dhéanamh ar fhóirdheontais ábhartha eile, a d’fhéadfaí a nochtadh le linn an imscrúdaithe.
4. Líomhain maidir le díobháil agus an nasc cúisíoch
Chuir an gearánach fianaise ar fáil gur tháinig méadú foriomlán ar allmhairí an táirge faoi imscrúdú ón tír lena mbaineann, i ndearbhthéarmaí agus ó thaobh sciar den mhargadh de, agus gur ráta mór a bhí sa mhéadú sin, rud a léiríonn gur dócha go dtiocfadh méadú mór ar allmhairí.
Léiríonn an fhianaise a sholáthair an gearánach gur imir méid agus praghsanna an táirge onnmhairithe faoi imscrúdú tionchar diúltach, i measc iarmhairtí eile, ar na cainníochtaí a dhíol tionscal an Aontais, ar leibhéal na bpraghsanna a ghearr sé agus ar an sciar den mhargadh a bhí aige, agus ba ann d’éifeachtaí díobhálacha substainteacha ar fheidhmíocht fhoriomlán thionscal an Aontais.
5. Nós imeachta
Tar éis dó na Ballstáit a chur ar an eolas, rinne an Coimisiún cinneadh go ndearna tionscal an Aontais an gearán a thaisceadh nó gur taisceadh an gearán thar ceann thionscal an Aontais, agus go bhfuil dóthain fianaise ann chun údar a thabhairt le himeachtaí a thionscnamh, leis seo tionscnaíonn an Coimisiún imscrúdú de bhun Airteagal 10 den bhun-Rialachán.
Cinnfear san imscrúdú cé acu atá nó nach bhfuil fóirdheontas á thabhairt don táirge atá faoi imscrúdú de thionscnamh na tíre lena mbaineann, agus cé acu a rinne nó nach ndearna na hallmhairí fóirdheonaithe díobháil do thionscal an Aontais.
Má bhíonn na conclúidí dearfach, déanfar scrúdú san imscrúdú féachaint an rud é nach mbeadh forchur na mbeart in aghaidh leas an Aontais.
Tugadh cuireadh chun comhairliúcháin do Rialtas Mharacó.
5.1. An tréimhse imscrúdúcháin agus an tréimhse faoi bhreathnú
Cumhdóidh an t-imscrúdú ar fhóirdheonú agus ar dhíobháil an tréimhse ón 1 Eanáir 2023 go dtí an 31 Nollaig 2023 (‘an tréimhse imscrúdúcháin’). Leis an scrúdú ar threochtaí atá ábhartha maidir le measúnú na díobhála, cumhdófar an tréimhse ón 1 Eanáir 2020 go dtí deireadh na tréimhse imscrúdúcháin (‘an tréimhse faoi bhreathnú’).
5.2. Barúlacha maidir leis an ngearán agus tionscnamh an imscrúdaithe
Gach páirtí leasmhar ar mian leis barúil a thabhairt maidir leis an ngearán (lena n-áirítear ábhair a bhaineann le díobháil agus cúisíocht) nó maidir le haon ghné a bhaineann le tionscnamh an imscrúdaithe (lena n-áirítear a mhéid a thacaítear leis an ngearán), ní mór dó déanamh amhlaidh laistigh de 37 lá ó dháta foilsithe an Fógra seo.
Aon iarraidh ar éisteacht maidir le tionscnamh an imscrúdaithe, ní mór í a chur isteach laistigh de 15 lá ó dháta foilsithe an Fhógra seo.
5.3. Nós imeachta chun a chinneadh an bhfuil fóirdheonú i gceist
Iarrtar ar tháirgeoirí onnmhairúcháin (4) an táirge atá faoi imscrúdú ón tír lena mbaineann agus ar údaráis na tíre lena mbaineann páirt a ghlacadh in imscrúdú an Choimisiúin. I bhfianaise na líomhaintí maidir leis an dlúthchomhar idir Rialtas Mharacó agus Rialtas na Síne chun tacú le hinfheistíochtaí san earnáil mótarfheithiclí i Maracó, iarrann an Coimisiún freisin ar údaráis na Síne páirt a ghlacadh san imscrúdú sin mar pháirtí leasmhar.
5.3.1. Imscrúdú a dhéanamh ar tháirgeoirí onnmhairiúcháin
5.3.1.1.
(a) Sampláil
Ó tharla go bhféadfadh líon mór táirgeoirí onnmhairiúcháin sa tír lena mbaineann a bheith bainteach leis na himeachtaí seo, agus chun an t-imscrúdú a thabhairt chun críche le linn teorainneacha ama reachtúla, féadfaidh an Coimisiún teorainn a chur leis an líon tairgeoirí a ndéanfar imscrúdú orthu, trí shampla a roghnú, chun go mbeidh líon réasúnta ann (tugtar ‘sampláil’ ar an bpróiseas sin). Is i gcomhréir le hAirteagal 27 den bhun-Rialachán a dhéanfar an tsampláil.
Chun gur féidir leis an gCoimisiún a chinneadh an bhfuil gá le sampláil agus, má tá, chun sampla a roghnú, iarrtar ar gach táirgeoir onnmhairiúcháin, nó ionadaithe atá ag gníomhú thar a cheann, faisnéis faoina chuideachta nó faoina chuideachtaí a chur ar fáil don Choimisiún laistigh de 7 lá tar éis dháta foilsithe an Fhógra seo. Maidir leis na fóirdheontais líomhnaithe a dheonaigh an tSín mar chuid den tionscnamh ‘Bóthar Amháin, Crios Amháin’ i Maracó, féadfar a iarraidh ar an táirgeoir onnmhairiúcháin lena mbaineann faisnéis ábhartha a chur ar fáil a mheastar a bheith riachtanach sa chomhthéacs sin maidir lena eintitis chomhlachaithe atá bunaithe sa tSín. Ní mór an fhaisnéis sin a chur ar fáil trí TRON.tdi ag an seoladh seo a leanas: https://tron.trade.ec.europa.eu/tron/tdi/form/AS703_SAMPLING_FORM_FOR_EXPORTING_PRODUCER. I roinn 5.8 thíos, tá faisnéis le fáil faoi rochtain ar Tron.
An fhaisnéis a mheasann an Coimisiún a bheith riachtanach chun sampla na dtáirgeoirí a roghnú, chun an fhaisnéis sin a fháil, rinne sé teagmháil le húdaráis na tíre lena mbaineann freisin agus d’fhéadfadh sé go ndéanfaidh sé teagmháil le haon chomhlachas aitheanta de tháirgeoirí onnmhairiúcháin.
Má tá gá le sampla, féadfar na tairgeoirí onnmhairiúcháin a roghnú ar bhonn an mhéid ionadaíoch is mó d'allmhairí chuig an Aontais ar féidir imscrúdú a dhéanamh air go réasúnta le linn an ama atá ar fáil. Gach táirgeoir onnmhairiúcháin aitheanta, údaráis na tíre lena mbaineann, agus comhlachais táirgeoirí onnmhairiúcháin, tabharfaidh an Coimisiún fógra dóibh, trí údaráis na tíre lena mbaineann más iomchuí, faoi na cuideachtaí a roghnaíodh le bheith sa sampla.
Nuair a gheobhaidh an Coimisiún an fhaisnéis is gá chun sampla de na táirgeoirí onnmhairiúcháin a roghnú, cuirfidh sé na páirtithe lena mbaineann ar an eolas faoina chinneadh iad a roghnú nó gan iad a roghnú le bheith sa sampla. Beidh ar na táirgeoirí onnmhairiúcháin sampláilte ceistneoir comhlánaithe a chur isteach laistigh de 30 lá ón dáta a tugadh fógra dóibh faoin gcinneadh iad a roghnú le bheith sa sampla, mura sonraítear a mhalairt.
Tá cóip den cheistneoir le haghaidh táirgeoirí onnmhairiúcháin ar fáil sa chomhad atá lena iniúchadh ag na páirtithe leasmhara agus ar shuíomh gréasáin Ard-Stiúrthóireacht na Trádála https://tron.trade.ec.europa.eu/investigations/case-view?caseId=2716
Cuirfidh an Coimisiún nóta a léiríonn roghnú an tsampla leis an gcomhad lena iniúchadh ag na páirtithe leasmhara. Aon bharúil maidir le roghnú an tsampla, ní mór í a bheith faighte laistigh de 3 lá tar éis an dáta a fhógraítear an cinneadh faoin sampla.
Cuirfear an ceistneoir ar fáil freisin d’aon chomhlachas aitheanta de tháirgeoirí onnmhairiúcháin, agus d’údaráis na tíre sin lena mbaineann.
Gan dochar do chur i bhfeidhm Airteagal 28 den bhun-Rialachán, na cuideachtaí a bhí toilteanach a bheith sa sampla ach nár roghnaíodh iad le bheith ann, measfar gur cuideachtaí comhoibríocha atá iontu (‘táirgeoirí onnmhairiúcháin comhoibríocha neamhshampláilte’). Gan dochar do roinn (b) thíos, an dleacht frithchúitimh is féidir a chur i bhfeidhm ar allmhairí ó tháirgeoirí onnmhairiúcháin comhoibríocha neamhshampláilte, is dleacht í nach rachaidh thar an meánchorrlach ualaithe fóirdheonaithe arna bhunú i dtaca leis na táirgeoirí onnmhairiúcháin sa sampla (5).
(b) Méid aonair an fhóirdheonaithe in-fhrithchúitithe le haghaidh cuideachtaí nach gcuimsítear sa sampla
De bhun Airteagal 27(3) den bhun-Rialachán, táirgeoirí onnmhairiúcháin comhoibríocha neamhshampláilte, féadfaidh siad a iarraidh ar an gCoimisiún a méid aonair d’fhóirdheonú in-fhrithchúitithe a shocrú. Táirgeoirí onnmhairiúcháin ar mian leo méid aonair d’fhóirdheonú in-fhrithchúitithe a éileamh, ní mór dóibh an ceistneoir a líonadh isteach agus é a chur ar ais laistigh de 30 lá tar éis dáta a thabharfar fógra faoi roghnú an tsampla, mura sonrófar a mhalairt. Tá cóip den cheistneoir le haghaidh táirgeoirí onnmhairiúcháin ar fáil sa chomhad atá lena iniúchadh ag na páirtithe leasmhara agus ar shuíomh gréasáin Ard-Stiúrthóireacht na Trádála https://tron.trade.ec.europa.eu/investigations/case-view?caseId=2716
Déanfaidh an Coimisiún scrúdú féachaint an féidir méid aonair d’fhóirdheonú in-fhrithchúitithe a dheonú do tháirgeoirí onnmhairiúcháin comhoibríocha neamh-sampláilte i gcomhréir le hAirteagal 27(3) den bhun-Rialachán.
I gcás táirgeoirí onnmhairiúcháin comhoibríocha neamhshampláilte atá ag éileamh méid aonair d’fhóirdheonú in-fhrithchúitithe, áfach, ba cheart a fhios a bheith acu go bhféadfadh sé go mbeartóidh an Coimisiún mar sin féin gan a méid aonair d’fhóirdheonú in-fhrithchúitithe a chinneadh, más amhlaidh, cuir i gcás, go bhfuil líon na dtáirgeoirí onnmhairiúcháin comhoibríocha atá le himscrúdú, lena n-áirítear na táirgeoirí sampláilte, chomh mór sin go mbeadh ualach míchuí ag baint leis an gcinneadh sin agus go gcuirfeadh sé bac ar thabhairt i gcrích tráthúil an imscrúdaithe.
5.3.2. Imscrúdú a dhéanamh ar allmhaireoirí neamhchomhlachaithe (6)
Allmhaireoirí neamhchomhlachaithe an táirge faoi imscrúdú ó Mharacó chuig an Aontas, iarrtar orthu a bheith rannpháirteach san imscrúdú seo.
Ó tharla go bhféadfadh líon mór allmhaireoirí neamhchomhlachaithe a bheith bainteach leis na himeachtaí seo, agus chun an t-imscrúdú a thabhairt chun críche le linn na dteorainneacha ama reachtúla, féadfaidh an Coimisiún teorainn a chur leis an líon allmhaireoirí neamhchomhlachaithe a ndéanfar imscrúdú orthu, trí shampla a roghnú, chun go mbeidh líon réasúnta ann (tugtar ‘sampláil’ ar an bpróiseas sin freisin). Is i gcomhréir le hAirteagal 27 den bhun-Rialachán a dhéanfar an tsampláil.
Chun gur féidir leis an gCoimisiún a chinneadh an bhfuil gá le sampláil agus, má tá, chun sampla a roghnú, gach allmhaireoir neamhchomhlachaithe, nó ionadaithe atá ag gníomhú thar a cheann, iarrtar orthu an fhaisnéis faoina chuideachta nó faoina chuideachtaí a iarrtar san Iarscríbhinn a ghabhann leis an bhFógra seo a chur ar fáil don Choimisiún laistigh de 7 lá tar éis dháta foilsithe an Fhógra seo.
An fhaisnéis a mheasann an Coimisiún a bheith riachtanach chun sampla na n-allmhaireoirí neamhchomhlachaithe a roghnú, chun an fhaisnéis sin a fháil, féadfaidh sé teagmháil a dhéanamh le haon chomhlachas aitheanta d’allmhaireoirí atá ann.
Má tá gá le sampla, féadfar na tairgeoirí onnmhairiúcháin a roghnú ar bhonn an mhéid ionadaíoch is mó de dhíolacháin an táirge faoi imscrúdú san Aontais ar féidir imscrúdú a dhéanamh air go réasúnta le linn an ama atá ar fáil. Tabharfaidh an Coimisiún fógra do gach allmhaireoir neamhchomhlachaithe agus do gach comhlachas aitheanta d’allmhaireoirí faoi na cuideachtaí a roghnaíodh le bheith sa sampla.
Nuair a gheobhaidh an Coimisiún an fhaisnéis is gá chun sampla a roghnú, cuirfidh sé na páirtithe lena mbaineann ar an eolas faoina chinneadh maidir le sampla na n-onnmhaireoirí. Cuirfidh an Coimisiún nóta a léiríonn roghnú an tsampla leis an gcomhad lena iniúchadh ag na páirtithe leasmhara. Aon bharúil maidir le roghnú an tsampla, ní mór í a bheith faighte laistigh de 3 lá tar éis an dáta a fhógraítear an cinneadh faoin sampla.
An fhaisnéis a mheasann an Coimisiún a bheith riachtanach le haghaidh a imscrúdaithe, chun an fhaisnéis sin a fháil, cuirfidh sé ceistneoirí ar fáil do na hallmhaireoirí neamhchomhlachaithe sampláilte. Ní mór do na páirtithe sin ceistneoir comhlánaithe a chur isteach laistigh de 30 lá ón dáta a tugadh fógra faoin sampla, mura sonraítear a mhalairt.
Tá cóip den cheistneoir le haghaidh táirgeoirí onnmhairiúcháin ar fáil sa chomhad atá lena iniúchadh ag na páirtithe leasmhara agus ar shuíomh gréasáin Ard-Stiúrthóireacht na Trádála https://tron.trade.ec.europa.eu/investigations/case-view?caseId=2716
5.4. Nós imeachta um dhíobháil a chinneadh agus um imscrúdú a dhéanamh ar tháirgeoirí Aontais
Is ar fhianaise dheimhneach a bhunaítear cinneadh díobhála, agus cuid de is ea imscrúdú oibiachtúil ar mhéid na n-allmhairí fóirdheonaithe, ar a n-éifeacht ar phraghsanna ar mhargadh an Aontais agus ar thionchar na n-allmhairí ina dhiaidh sin ar thionscal an Aontais. Chun a shuí ar bhain díobháil do thionscal an Aontais, iarrtar ar tháirgeoirí an táirge faoi imscrúdú a bheith rannpháirteach in imscrúdú an Choimisiúin.
Ó tharla go bhfuil líon mór táirgeoirí de chuid an Aontais lena mbaineann ann, agus chun an t-imscrúdú a thabhairt chun críche laistigh de na teorainneacha ama reachtúla, chinn an Coimisiún teorainn a chur leis an líon táirgeoirí de chuid an Aontais a ndéanfar imscrúdú orthu, trí shampla a roghnú, chun go mbeidh líon réasúnta ann (tugtar ‘sampláil’ ar an bpróiseas seo freisin). Is i gcomhréir le hAirteagal 27 den bhun-Rialachán a dhéantar an tsampláil.
Roghnaigh an Coimisiún sampla de tháirgeoirí de chuid an Aontais go sealadach. Is féidir na sonraí a fháil sa chomhad lena iniúchadh ag páirtithe leasmhara. Leis seo, iarrtar ar na páirtithe leasmhara barúlacha a thabhairt ar an sampla sealadach. Sa bhreis air sin, táirgeoirí eile de chuid an Aontais, nó ionadaithe atá ag gníomhú thar a gceann, a mheasann gur ann do chúiseanna ar cheart dóibh a chuimsiú sa tsampláil, ní mór dóibh teagmháil a dhéanamh leis an gCoimisiún laistigh de 7 lá ó lá foilsithe an Fhógra seo. Na barúlacha uile maidir leis an sampla sealadach, ní mór iad a bheith faighte laistigh de 7 lá ó dháta foilsithe an fhógra seo, mura sonraítear a mhalairt.
Tabharfaidh an Coimisiún fógra do gach allmhaireoir aitheanta de chuid an Aontais agus do gach comhlachas aitheanta allmhaireoirí de chuid an Aontais faoi na cuideachtaí a roghnaíodh le bheith sa sampla.
Beidh ar na táirgeoirí sampláilte de chuid an Aontais ceistneoir comhlánaithe a chur isteach laistigh de 30 lá ón dáta a tugadh fógra dóibh faoin gcinneadh iad a roghnú le bheith sa sampla, mura sonraítear a mhalairt.
Tá cóip den cheistneoir le haghaidh táirgeoirí onnmhairiúcháin de chuid an Aontais ar fáil sa chomhad atá lena iniúchadh ag na páirtithe leasmhara agus ar shuíomh gréasáin Ard-Stiúrthóireacht na Trádála https://tron.trade.ec.europa.eu/investigations/case-view?caseId=2716
5.5. Nós imeachta um measúnú a dhéanamh ar leas an Aontais
Má chinntear dá bhrí sin gur ann don bhfóirdheonú agus don díobháil mar gheall air sin, déanfar cinneadh, de bhun Airteagal 31 den bhun-Rialachán, féachaint an é nach mbeadh glacadh bearta frithchúitimh i bhfeidhm, nach mbeadh sé in aghaidh leas an Aontais. Táirgeoirí de chuid an Aontais agus a gcomhlachais ionadaíocha, úsáideoirí agus a gcomhlachais ionadaíocha, ceardchumainn agus eagraíochtaí tomhaltóirí ionadaíocha, iarrfar orthu faisnéis a thabhairt don Choimisiún maidir le leas an Aontais.
Aon fhaisnéis a bhaineann leis an measúnú ar leas an Aontais, ní mór í a sholáthar laistigh de 37 lá ó dháta foilsithe an Fhógra seo, mura sonraítear a mhalairt. Féadfar an fhaisnéis sin a chur in iúl i bhformáid shaor, sin nó trí cheistneoir arna ullmhú ag an gCoimisiún a líonadh isteach. Tá cóip de na ceistneoirí, lena n-áirítear an ceistneoir le haghaidh úsáideoirí an táirge faoi imscrúdú, ar fáil sa chomhad lena iniúchadh ag na páirtithe leasmhara agus ar shuíomh gréasáin Ard-Stiúrthóireacht na Trádála https://tron.trade.ec.europa.eu/investigations/case-view?caseId=2716. An fhaisnéis a chuirtear isteach de bhun Airteagal 31 den bhun-Rialachán, ní chuirfear san áireamh í ach amháin má tá fianaise fhíorasach ag teacht léi tráth a chuirtear isteach í.
5.6. Páirtithe leasmhara
Chun bheith rannpháirteach san imscrúdú, ní mór do pháirtithe leasmhara, amhail táirgeoirí onnmhairiúcháin, táirgeoirí de chuid an Aontais, allmhaireoirí agus a gcomhlachais ionadaíocha, úsáideoirí agus a gcomhlachais ionadaíocha, ceardchumainn agus eagraíochtaí tomhaltóirí ionadaíocha, ní mór dóibh a léiriú i dtús báire gur ann do nasc oibiachtúil idir a gcuid gníomhaíochtaí agus an táirge faoi imscrúdú.
Táirgeoirí onnmhairiúcháin, táirgeoirí de chuid an Aontais, allmhaireoirí agus comhlachais ionadaíocha a chuir faisnéis ar fáil i gcomhréir leis na nósanna imeachta a shonraítear i ranna 5.3.1, 5.3.2 agus 5.4 thuas, measfar gur páirtithe leasmhara iad má bhíonn nasc oibiachtúil idir a gcuid gníomhaíochtaí agus an táirge faoi imscrúdú.
Beidh páirtithe eile in ann a bheith rannpháirteach san imscrúdú mar pháirtithe leasmhara ón uair a chuirfidh siad iad féin in aithne agus ón uair sin amháin, ar choinníoll gur ann do nasc oibiachtúil idir a gcuid gníomhaíochtaí agus an táirge faoi imscrúdú. Is gan dochar do chur i bhfeidhm Airteagal 28 den bhun-Rialachán a mheastar go bhfuil páirtí ina pháirtí leasmhar.
Is féidir an comhad lena iniúchadh ag na páirtithe leasmhara a rochtain trí Tron.tdi ag an seoladh seo a leanas: https://tron.trade.ec.europa.eu/tron/TDI. https://tron.trade.ec.europa.eu/tron/TDI Lean na treoracha ar an leathanach sin chun rochtain a fháil (7).
5.7. An deis éisteacht a fháil le seirbhísí imscrúdúcháin an Choimisiúin
Féadfaidh gach páirtí leasmhar éisteacht a iarraidh le seirbhísí imscrúdúcháin an Choimisiún.
Aon iarraidh ar éisteacht, ní mór í a dhéanamh i scríbhinn agus ní mór cúiseanna na hiarrata a shonrú inti mar aon le hachoimre ar an méid ar mian leis an bpáirtí leasmhar a phlé le linn na héisteachta. Beidh an éisteacht teoranta do na saincheisteanna arna leagan amach ag na páirtithe leasmhara i scríbhinn roimh ré.
Is mar seo a leanas a bheidh an tráthchlár le haghaidh na n-éisteachtaí:
|
— |
Chun aon éisteacht a reáchtáil roimh fhorchur na mbeart sealadach, ní mór iarraidh a dhéanamh i scríbhinn laistigh de 15 lá ó dháta foilsithe an Fhógra seo agus reáchtálfar an éisteacht de ghnáth laistigh de 60 lá ó dháta foilsithe an Fhógra seo. |
|
— |
Tar éis na céime sealadaí, ba cheart iarraidh a dhéanamh laistigh de 5 lá ó dháta foilsithe an nochta shealadaigh nó an doiciméid faisnéise, agus reáchtálfar an éisteacht de ghnáth laistigh de 15 lá ó dháta fhógra an nochta nó ó dháta an doiciméid faisnéise. |
|
— |
Ag an gcéim chinntitheach, ba cheart iarraidh a dhéanamh laistigh de 3 lá ó dháta an nochta deiridh, agus is le linn na tréimhse a chinnfear maidir le barúlacha a thabhairt faoin nochtadh deiridh a reáchtálfar an éisteacht de ghnáth. Más ann do nochtadh deiridh breise, ba cheart iarraidh a dhéanamh láithreach a luaithe a gheofar an nochtadh deiridh breise sin, agus reáchtálfar an éisteacht roimh an sprioc-am i ndáil le barúlacha a thabhairt maidir leis an nochtadh sin. |
Tá an creat ama sonraithe gan dochar do cheart sheirbhísí an Choimisiúin glacadh le héisteachtaí lasmuigh den tráthchlár i gcásanna a bhfuil údar cuí leo agus tá sé gan dochar do cheart an Choimisiúin diúltú d’éisteachtaí i gcásanna a bhfuil údar cuí leo. I gcás ina ndiúltóidh seirbhísí an Choimisiúin d’iarraidh ar éisteacht, cuirfear na cúiseanna leis an diúltú sin in iúl don pháirtí lena mbaineann.
I bprionsabal, ní úsáidfear éisteachtaí chun faisnéis fhíorasach nach bhfuil sa chomhad go fóill a chur i láthair. Mar sin féin, ar mhaithe le dea-riarachán agus chun gur féidir le seirbhísí an Choimisiúin dul ar aghaidh leis an imscrúdú, féadfar a iarraidh ar pháirtithe leasmhara faisnéis fhíorasach nua ábhartha a chur ar fáil tar éis na héisteachta.
5.8. Treoracha maidir le haighneachtaí i scríbhinn a dhéanamh agus maidir le ceistneoirí comhlánaithe agus comhfhreagras a sheoladh
Maidir le faisnéis a chuirfear faoi bhráid an Choimisiúin chun críche imscrúduithe cosanta trádála, beidh an fhaisnéis sin saor ó chóipcheart. Ní mór do pháirtithe leasmhara, sula gcuirfidh siad faisnéis agus/nó sonraí atá faoi réir cóipcheart tríú páirtí faoi bhráid an Choimisiúin, cead a iarraidh go sonrach ar shealbhóir an chóipchirt le go mbeidh an Coimisiún a) an fhaisnéis agus na sonraí a úsáid chun críoch an nós imeachta cosanta trádála seo agus b) an fhaisnéis agus/nó na sonraí a chur ar fáil do pháirtithe leasmhara san imscrúdú sin i bhfoirm a fhágfaidh go mbeidh siad in ann a gcearta chun cosanta a fheidhmiú.
Gach aighneacht i scríbhinn, lena n-áirítear an fhaisnéis a iarrtar san fhógra seo, ceistneoirí comhlánaithe agus comhfhreagras arna gcur ar fáil ag na páirtithe leasmhara a n-iarrtar gur i modh rúin a chaithfear leo, cuirfear an lipéad ‘Íogair’ orthu (8). Páirtithe a chuireann faisnéis isteach le linn an imscrúdaithe seo, iarrtar orthu cúis a thabhairt lena n-iarraidh go gcaithfear i modh rún leo.
Ní mór do pháirtithe a sholáthraíonn faisnéis ‘Íogair’ achoimrí neamhrúnda uirthi a chur ar fáil de bhun Airteagal 29(2) den bhun-Rialachán, achoimrí ar a gcuirfear an lipéad ‘Le hiniúchadh ag páirtithe leasmhara’. Ba cheart do na hachoimrí sin a bheith mionsonraithe ar bhealach leordhóthanach chun go bhféadfar bunús na faisnéise a cuireadh isteach faoi rún a thuiscint go réasúnta.
Mura féidir leis an bpáirtí a sholáthraíonn faisnéis rúnda cúis mhaith a thaispeáint lena iarraidh gur i modh rúin a gcaithfí léi nó mura dtugann sé achoimre neamhrúnda uirthi san fhormáid agus sa cháilíocht a iarradh, féadfaidh an Coimisiún neamhaird a thabhairt ar an bhfaisnéis sin mura féidir a thaispeáint go sásúil ó fhoinsí iomchuí go bhfuil an fhaisnéis ceart.
Iarrtar ar pháirtithe leasmhara gach aighneacht agus iarraidh a dhéanamh trí TRON.tdi (https://tron.trade.ec.europa.eu/tron/TDI) lena n-áirítear cóipeanna scanta de chumhachtaí aturnae agus de bhileoga deimhniúcháin. Trí úsáid a bhaint as TRON.tdi nó ríomhphost, cuireann páirtithe leasmhara in iúl go n-aontaíonn siad leis na rialacha is infheidhme maidir le haighneachtaí leictreonacha atá sa doiciméad ‘COMHFHREAGRAS LEIS AN gCOIMISIÚN EORPACH I gCÁSANNA COSANTA TRÁDÁLA’, doiciméad a foilsíodh ar shuíomh gréasáin Ard-Stiúrthóireacht na Trádála: https://europa.eu/!7tHpY3 Ní mór do na páirtithe leasmhara a n-ainm, a seoladh, a n-uimhir theileafóin agus a seoladh ríomhphoist bailí a thabhairt, agus ba cheart dóibh a áirithiú gur ríomhphost oifigiúil feidhmiúil gnó é an seoladh ríomhphoist a chuirtear ar fáil, seoladh a sheiceáiltear ar bhonn laethúil. Tráth a chuirfear sonraí teagmhála ar fáil, ní dhéanfaidh an Coimisiún cumarsáid le páirtithe leasmhara ach amháin trí TRON.tdi nó ríomhphost, seachas sa chás go n-iarrfaidh siad na doiciméid uile a fháil ón gCoimisiún trí mheán eile cumarsáide go sainráite, nó mura rud é gur gá post cláraithe a úsáid mar gheall ar chineál an doiciméid atá le seoladh. Le haghaidh tuilleadh rialacha agus faisnéise maidir le comhfhreagras leis an gCoimisiún, lena n-áirítear prionsabail a bhaineann le haighneachtaí trí TRON.tdi nó ríomhphost, ba cheart do pháirtithe leasmhara féachaint ar na treoracha maidir le cumarsáid le páirtithe leasmhara dá dtagraítear thuas.
Seoladh an Choimisiúin le haghaidh comhfhreagrais:
|
European Commission |
|
Directorate-General for Trade |
|
Directorate G |
|
Oifig: CHAR 04/039 |
|
1049 Bruxelles/Brussel |
|
BELGIQUE/BELGIË |
Ríomhphost le haghaidh ábhair a bhaineann le fóirdheontas: TRADE-AS703-ARW-SUBSIDY@ec.europa.eu
Ríomhphost maidir le hábhair a bhaineann le díobháil: TRADE-AS703-ARW-INJURY@ec.europa.eu
6. Sceideal an imscrúdaithe
De bhun Airteagal 11(9) den bhun-Rialachán, cuirfear an t-imscrúdú i gcrích laistigh de 12 mhí nuair is féidir sin, agus i gcás ar bith tráth nach déanaí ná 13 mhí tar éis dháta foilsithe an Fhógra seo. I gcomhréir le hAirteagal 12(1) den bhun-Rialachán, féadfar bearta sealadacha a fhorchur tráth nach déanaí ná 9 mhí tar éis fhoilsiú an Fhógra seo.
I gcomhréir le hAirteagal 29a den bhun-Rialachán, is gá don Choimisiún faisnéis a sholáthar maidir le forchur na ndleachtanna sealadacha atá beartaithe 4 seachtaine sula bhforchuirtear na bearta sealadacha. Féadfaidh páirtithe leasmhara an fhaisnéis seo a iarraidh i scríbhinn laistigh de 4 mhí tar éis fhoilsiú an Fhógra seo. Tabharfar 3 lá oibre do pháirtithe leasmhara chun barúlacha i scríbhinn a thabhairt maidir le cruinneas na ríomhanna.
Sna cásanna ina bhfuil sé beartaithe ag an gCoimisiún gan dleachtanna sealadacha a fhorchur ach ina bhfuil sé beartaithe aige dul ar aghaidh leis an imscrúdú, cuirfear na páirtithe leasmhara ar an eolas i scríbhinn nach bhforchuirfear dleachtanna, agus déanfar é sin 4 seachtaine roimh dhul in éag an sprioc-ama faoi Airteagal 12(1) den bhun-Rialachán.
I bprionsabal, tabharfar 15 lá do na páirtithe leasmhara barúlacha a thabhairt i scríbhinn maidir leis na torthaí sealadacha nó maidir leis an doiciméad faisnéise, agus tabharfar 10 lá dóibh barúlacha a thabhairt i scríbhinn maidir leis na torthaí cinntitheacha, mura sonraítear a mhalairt. I gcás inarb infheidhme, sonróidh na nochtaí deiridh breise an sprioc-am le haghaidh barúlacha i scríbhinn ó na páirtithe leasmhara.
7. Faisnéis a chur isteach
Go hiondúil, ní fhéadfaidh na páirtithe leasmhara faisnéis a chur isteach ach amháin laistigh de na tráthchláir a shonraítear i ranna 5 agus 6 den Fhógra seo. Chun aon fhaisnéis eile a chur isteach ar faisnéis í nach cumhdaítear leis na ranna sin, ba cheart cloí leis an amchlár seo a leanas:
|
— |
Aon fhaisnéis le haghaidh chéim na dtorthaí sealadacha, ba cheart í a chur isteach laistigh de 70 lá ó dháta foilsithe an Fhógra seo, mura sonraítear a mhalairt. |
|
— |
Mura sonraítear a mhalairt, níor cheart do na páirtithe leasmhara faisnéis fhíorasach nua a chur isteach tar éis an sprioc-ama do bharúlacha maidir le nochtadh na dtorthaí sealadacha nó maidir leis an doiciméad faisnéise ag céim na dtorthaí sealadacha. Tar éis an sprioc-ama sin, ní fhéadfaidh páirtithe leasmhara faisnéis fhíorasach nua a chur isteach ach amháin más féidir leo a léiriú go bhfuil gá leis an bhfaisnéis fhíorasach nua sin chun líomhaintí fíorasacha a rinne páirtithe leasmhara eile a bhréagnú agus ar choinníoll gur féidir an fhaisnéis fhíorasach nua sin a fhíorú laistigh den am atá ar fáil chun an t-imscrúdú a thabhairt chun críche go tráthúil. |
|
— |
Chun an t-imscrúdú a thabhairt chun críche laistigh de na sprioc-amanna éigeantacha, ní ghlacfaidh an Coimisiún le haighneachtaí ó pháirtithe leasmhara tar éis an sprioc-ama chun barúlacha a thabhairt maidir leis an nochtadh deiridh nó, i gcás inarb infheidhme, tar éis an sprioc-ama chun barúlacha a thabhairt maidir leis an nochtadh deiridh breise. |
8. An deis barúlacha a thabhairt maidir le haighneachtaí ó pháirtithe eile
Chun cearta na cosanta a ráthú, ba cheart an deis a bheith ag páirtithe leasmhara barúlacha a thabhairt maidir leis an bhfaisnéis a chuireann páirtithe leasmhara eile isteach. Agus é sin á dhéanamh acu, féadfaidh na páirtithe leasmhara díriú ar shaincheisteanna a ardaítear in aighneachtaí o pháirtithe eile agus ar na saincheisteanna sin amháin, agus ní fhéadfaidh siad saincheisteanna nua a ardú.
Ba cheart na barúlacha sin a dhéanamh de réir an tráthchláir seo a leanas:
|
— |
Aon bharúil maidir le faisnéis a chuirfidh páirtithe leasmhara eile isteach roimh fhorchur na mbeart sealadach, ba cheart í a dhéanamh ar an 75 lá ar a dhéanaí ó dháta foilsithe an Fhógra seo, mura sonraítear a mhalairt. |
|
— |
Barúlacha maidir leis an bhfaisnéis a chuir páirtithe leasmhara eile ar fáil mar fhreagairt ar nochtadh na dtorthaí sealadacha nó an doiciméid faisnéise, ba cheart iad a chur isteach laistigh de 7 lá ón sprioc-am chun barúlacha a thabhairt maidir leis na torthaí sealadacha nó maidir leis an doiciméad faisnéise, mura sonraítear a mhalairt. |
|
— |
Barúlacha maidir leis an bhfaisnéis a chuir páirtithe leasmhara eile ar fáil mar fhreagairt ar an nochtadh deiridh, ba cheart iad a chur isteach laistigh de 3 lá ón sprioc-am chun barúlacha a thabhairt maidir leis an nochtadh deiridh, mura sonraítear a mhalairt. Más ann do nochtadh deiridh breise, barúlacha maidir leis an bhfaisnéis a chuir páirtithe leasmhara eile ar fáil mar fhreagairt ar an nochtadh sin, ba cheart iad a chur isteach laistigh de 1 lá ón sprioc-am chun barúlacha a thabhairt maidir leis an nochtadh sin, mura sonraítear a mhalairt. |
An tráthchlár a leagtar amach, tá sé gan dochar do cheart an Choimisiúin faisnéis bhreise a iarraidh ar pháirtithe leasmhara i gcásanna a bhfuil údar cuí leo.
9. Síneadh leis na teorainneacha ama a shonraítear san Fhógra seo
Níor cheart síneadh leis na teorainneacha ama a shonraítear san Fhógra seo a iarraidh ach amháin in imthosca eisceachtúla agus ní cheadófar é ach amháin má tá údar cuí leis agus cúis mhaith léirithe.
In aon chás, beidh teorainn 3 lá de ghnáth le síneadh a chur leis an sprioc-am chun freagra a thabhairt ar cheistneoirí agus go hiondúil, ní rachaidh sé thar 7 lá.
Maidir le teorainneacha ama le haghaidh faisnéis eile seachas an fhaisnéis a shonraítear san Fhógra Tionscnaimh a chur isteach, ní rachaidh an síneadh thar 3 lá, mura léirítear gur ann d’imthosca eisceachtúla.
10. Neamh-chomhoibriú
I gcás ina ndiúltóidh aon pháirtí leasmhar rochtain a thabhairt ar an bhfaisnéis is gá nó mura gcuireann sé an fhaisnéis sin ar fáil laistigh de na teorainneacha ama, nó má chuireann sé bac suntasach ar an imscrúdú, féadfar torthaí sealadacha nó críochnaitheacha, bídís deimhneach nó diúltach, a dhéanamh ar bhonn na bhfíoras atá ar fáil, i gcomhréir le hAirteagal 28 den bhun-Rialachán.
I gcás ina ndéanfar amach gur sholáthair aon pháirtí leasmhar faisnéis a bhí bréagach nó míthreorach, féadfar neamhaird a thabhairt ar an bhfaisnéis sin agus úsáid a bhaint as na fíorais atá ar fáil.
Mura gcomhoibríonn páirtí leasmhar nó mura gcomhoibríonn sé ach i bpáirt agus, dá bhrí sin, má tá na torthaí bunaithe ar fhíorais atá ar fáil i gcomhréir le hAirteagal 28 den bhun-Rialachán, féadfaidh an toradh gan a bheith chomh fabhrach don pháirtí sin agus a bheadh sé dá mbeadh sé tar éis comhoibriú.
Mura dtugtar freagairt leictreonach, ní mheasfar go bhfuil neamh-chomhoibriú i gceist ar choinníoll go léireoidh an páirtí leasmhar lena mbaineann go mbeadh ualach breise míréasúnta nó costas breise míréasúnta ag baint leis an bhfreagra a chur isteach de réir mar a iarradh. Sa chás sin, ba cheart don pháirtí leasmhar teagmháil a dhéanamh leis an gCoimisiún láithreach.
11. Oifigeach Éisteachta
Féadfaidh páirtithe leasmhara idirghabháil an Oifigigh Éisteachta a iarraidh i gcomhair imeachtaí trádála. Déanann an tOifigeach Éisteachta athbhreithniú ar iarrataí ar rochtain ar an gcomhad, ar dhíospóidí maidir le rúndacht doiciméad, ar iarrataí ar shíneadh teorainneacha ama agus ar aon iarraidh eile a bhaineann le cearta cosanta páirtithe leasmhara agus tríú páirtithe faoi mar a d’fhéadfadh teacht chun cinn le linn na n-imeachtaí.
Féadfaidh an tOifigeach Éisteachta éisteachtaí a eagrú agus idirghabháil a dhéanamh idir an páirtí leasmhar/na páirtithe leasmhara agus seirbhísí an Choimisiúin chun a áirithiú go bhfuil cearta cosanta na bpáirtithe leasmhara á bhfeidhmiú go hiomlán. Ba cheart iarraidh ar éisteacht leis an Oifigeach Éisteachta a dhéanamh i scríbhinn agus ba cheart na cúiseanna atá leis an iarraidh a shonrú inti. Déanfaidh an tOifigeach Éisteachta scrúdú ar na cúiseanna atá leis na hiarrataí. Níor cheart na héisteachtaí sin a reáchtáil ach amháin murar réitíodh na saincheisteanna le seirbhísí an Choimisiúin in am trátha.
Ní mór aon iarraidh a chur isteach in am trátha agus go gasta ionas nach gcuirfear stiúradh ordúil na n-imeachtaí i mbaol. Chuige sin, ba cheart do pháirtithe leasmhara idirghabháil an Oifigigh Éisteachta a iarraidh a luaithe is féidir tar éis an teagmhais arb é is údar le hidirghabháil den sórt sin a bheith ann. Déanfaidh an tOifigeach Éisteachta scrúdú ar na cúiseanna le hiarrataí ar idirghabhálacha, ar chineál na saincheisteanna a ardaíodh agus ar thionchar na saincheisteanna sin ar chearta cosanta, ag féachaint go cuí do leasanna an dea-riaracháin agus don imscrúdú a thabhairt chun críche go tráthúil.
Chun tuilleadh faisnéise agus sonraí teagmhála a fháil, féadfaidh páirtithe leasmhara féachaint ar leathanaigh ghréasáin an Oifigigh Éisteachta ar shuíomh gréasáin Ard-Stiúrthóireacht na Trádála: https://policy.trade.ec.europa.eu/contacts/hearing-officer_en
12. Sonraí pearsanta a phróiseáil
Aon fhaisnéis phearsanta a bhailítear le linn an imscrúdaithe seo, caithfear léi i gcomhréir le Rialachán (AE) 2018/1725 ó Pharlaimint na hEorpa agus ón gComhairle (9).
Tá fógra cosanta sonraí ar fáil ar shuíomh gréasáin Ard-Stiúrthóireacht na Trádála, fógra a chuireann gach duine ar an eolas faoi phróiseáil sonraí pearsanta faoi chuimsiú ghníomhaíochtaí cosanta trádála an Choimisiúin: https://europa.eu/!vr4g9W
(1) IO L 176, 30.6.2016, lch. 55.
(2) Tagraíonn an téarma ginearálta ‘díobháil’ do dhíobháil ábhartha chomh maith le bagairt díobhála ábhartha nó moilliú ábhartha i leith bunú tionscail mar a leagtar amach in Airteagal 2(d) den bhun-Rialachán.
(3) Le tagairtí do fhoilsiú an fhógra seo, is é foilsiú an fhógra seo in Iris Oifigiúil an Aontais Eorpaigh atá i gceist.
(4) Is éard is táirgeoir onnmhairiúcháin ann aon chuideachta sa tír lena mbaineann a tháirgeann agus a onnmhairíonn an táirge faoi imscrúdú go díreach, sin nó trí thríú páirtí, chuig margadh an Aontais, lena n-áirítear aon cheann dá chuideachtaí comhlachaithe a bhfuil baint aici le táirgeadh, díolacháin intíre nó onnmhairí an táirge faoi imscrúdú.
(5) De bhun Airteagal 15(3) den bhun-Rialachán, déanfar neamhshuim d’aon mhéid nialasach agus aon mhéid de minimis d’fhóirdheontais in-fhrithchúitithe, sin agus d’aon mhéid d’fhóirdheontais in-fhrithchúitithe arna leagan síos sna himthosca dá dtagraítear in Airteagal 28 den bhun-Rialachán.
(6) Sa roinn seo ní chumhdaítear ach na hallmhaireoirí nach bhfuil comhlachaithe le táirgeoirí onnmhairiúcháin. Ní mór d’allmhaireoirí atá comhlachaithe le táirgeoirí onnmhairiúcháin Iarscríbhinn I a ghabhann leis an gceistneoir le haghaidh na dtáirgeoirí onnmhairiúcháin sin a líonadh isteach. I gcomhréir le hAirteagal 127 de Rialachán Cur Chun Feidhme (AE) 2015/2447 ón gCoimisiún an 24 Samhain 2015 lena leagtar síos rialacha mionsonraithe maidir le cur chun feidhme fhorálacha áirithe Rialachán (AE) Uimh. 952/2013 ó Pharlaimint na hEorpa agus ón gComhairle lena leagtar síos Cód Custaim an Aontais, measfar beirt a bheith comhlachaithe sna cásanna seo a leanas: (a) más oifigeach nó stiúrthóir duine acu i ngnólacht an duine eile; (b) más comhpháirtithe gnó iad a bhfuil aitheantas dlíthiúil acu; (c) más fostóir agus fostaí iad; (d) más le tríú páirtí 5 % nó níos mó de na stoic nó de na scaireanna le cearta vótála de chuid na beirte acu, nó má rialaíonn nó má choinníonn tríú páirtí iad, go díreach nó go hindíreach; (e) má stiúrann duine acu an duine eile go díreach nó go hindíreach; (f) má tá an bheirt acu faoi stiúradh díreach nó indíreach ag tríú páirtí; (g) má rialaíonn siad tríú duine go díreach nó go hindíreach le chéile; nó (h) más daoine ón teaghlach céanna iad (IO L 343, 29.12.2015, lch. 558). I gcomhréir le hAirteagal 5(4) de Rialachán (AE) Uimh. 952/2013 ó Pharlaimint na hEorpa agus ón gComhairle lena leagtar síos Cód Custaim an Aontais, ciallaíonn ‘duine’ duine nádúrtha, duine dlítheanach agus aon chumann de dhaoine nach bhfuil ina dhuine dlítheanach ach a n-aithnítear faoi dhlí an Aontais nó faoin dlí náisiúnta go bhfuil an inniúlacht aige gníomhartha dlíthiúla a dhéanamh (IO L 269, 10.10.2013, lch. 1).
(7) I gcás fadhbanna teicniúla, is féidir teagmháil a dhéanamh leis an Deasc Seirbhíse Trádála trí ríomhphost a sheoladh chuig trade-service-desk@ec.europa.eu nó ar an nguthán + 32 22979797.
(8) Is doiciméad ‘Íogair’ doiciméad a meastar é a bheith rúnda de bhun Airteagal 29 den bhun-Rialachán agus Airteagal 12.4 de Chomhaontú EDT maidir le fóirdheontais agus le bearta frithchúitimh. Is doiciméad é freisin atá cosanta de bhun Airteagal 4 de Rialachán (CE) Uimh. 1049/2001 ó Pharlaimint na hEorpa agus ón gComhairle (IO L 145, 31.5.2001, lch. 43).
(9) Rialachán (AE) 2018/1725 ó Pharlaimint na hEorpa agus ón gComhairle an 23 Deireadh Fómhair 2018 maidir le daoine nádúrtha a chosaint i ndáil le sonraí pearsanta a phróiseáil ag institiúidí, comhlachtaí, oifigí agus gníomhaireachtaí an Aontais agus maidir le saorghluaiseacht sonraí den sórt sin, agus lena n-aisghairtear Rialachán (CE) Uimh. 45/2001 agus Cinneadh Uimh. 1247/2002/CE (IO L 295, 21.11.2018, lch. 39).
IARSCRÍBHINN
|
☐ |
Leagan íogair |
|
☐ |
Leagan le hiniúchadh ag páirtithe leasmhara |
|
(cuir tic sa bhosca iomchuí) |
|
NÓS IMEACHTA FRITH-FHÓIRDHEONTAIS A BHAINEANN LE HALLMHAIRÍ ROTHAÍ BÓTHAIR ALÚMANAIM ÁIRITHE DE THIONSCNAMH MHARACÓ
FAISNÉIS MAIDIR LEIS AN SAMPLA D’ALLMHAIREOIRÍ NEAMHCHOMHLACHAITHE A ROGHNÚ
Tá an fhoirm seo ceaptha le cuidiú le hallmhaireoirí neamhchomhlachaithe agus an iarraidh ar fhaisnéis samplála a rinneadh i bpointe 5.3.2 den Fhógra tionscnamh á freagairt acu.
Ba cheart an leagan Íogair agus an leagan Le hiniúchadh ag páirtithe leasmhara a chur ar ais chuig an gCoimisiún de réir mar a leagtar amach san fhógra tionscnaimh.
1. CÉANNACHT AGUS SONRAÍ TEAGMHÁLA
Tabhair na sonraí seo a leanas faoi do chuideachta:
|
Ainm na cuideachta |
|
|
Seoladh |
|
|
Teagmhálaí |
|
|
Seoladh ríomhphoist |
|
|
Uimhir theileafóin |
|
2. LÁIMHDEACHAS AGUS MÉID NA NDÍOLACHÁN
Léirigh in euro (EUR) láimhdeachas iomlán na cuideachta, an luach in euro (EUR) agus an méid i míreanna agus i dtonaí i gcás allmhairí agus athdhíolacháin an táirge faoi imscrúdú de réir mar a shainítear san fhógra tionscnaimh, ar mhargadh an Aontais tar éis a allmhairithe ó Mharacó.
|
|
Méid i míreanna |
Méid i dtonaí |
Luach in euro (EUR) |
|
Láimhdeachas iomlán do chuideachta in euro (EUR) |
|
|
|
|
Allmhairí den táirge atá faoi imscrúdú de thionscnamh Mharacó |
|
|
|
|
Allmhairí an táirge faoi imscrúdú (de gach tionscnamh) |
|
|
|
|
Athdhíolacháin an táirge atá faoi imscrúdú ar mhargadh an Aontais tar éis a allmhairithe ó Mharacó |
|
|
|
3. GNÍOMHAÍOCHTAÍ DO CHUIDEACHTA AGUS CUIDEACHTAÍ ATÁ COMHLACHAITHE LÉI (1)
Tabhair sonraí maidir le gníomhaíochtaí beachta na cuideachta agus gach cuideachta atá comhlachaithe léi (liostaigh iad agus sonraigh an gaol idir iad agus do chuideachta) atá bainteach le táirgeadh agus/nó díol (onnmhairiúcháin agus/nó intíre) an táirge faoi imscrúdú. D’fhéadfaí a áireamh ar na gníomhaíochtaí sin ceannach an táirge faoi imscrúdú, é a tháirgeadh faoi shocruithe fochonarthachta, nó é a phróiseáil nó a thrádáil, agus gníomhaíochtaí eile nach iad.
|
Ainm agus suíomh na cuideachta |
Gníomhaíochtaí |
Gaol |
|
|
|
|
|
|
|
|
|
|
|
|
4. FAISNÉIS EILE
Tabhair aon fhaisnéis ábhartha eile a mheasann an chuideachta a bheith úsáideach chun cuidiú leis an gCoimisiún an sampla a roghnú.
5. DEIMHNIÚCHÁN
Tríd an bhfaisnéis thuasluaite a chur ar fáil, aontaíonn an chuideachta go bhféadfaí í a áireamh sa sampla. Má roghnaítear an chuideachta le bheith sa sampla, is é a bheidh i gceist leis sin ceistneoir a líonadh isteach agus glacadh leis go dtabharfar cuairt ar a háitreabh chun a freagra a fhíorú. Má thugann an chuideachta le fios nach mbeadh sí sásta a bheith sa sampla, measfar nár chomhoibrigh sí leis an imscrúdú. Is ar na fíorais atá ar fáil a bhunaíonn an Coimisiún torthaí a imscrúdaithe i gcás táirgeoirí allmhaireoirí neamh-chomhoibríocha, agus d’fhéadfadh sé nach mbeadh an toradh chomh fabhrach céanna don chuideachta sin agus a bheadh sé dá mbeadh comhoibriú déanta aici.
Síniú an oifigigh údaraithe:
Ainm agus teideal an oifigigh údaraithe:
Dáta:
(1) I gcomhréir le hAirteagal 127 de Rialachán Cur Chun Feidhme (AE) 2015/2447 ón gCoimisiún an 24 Samhain 2015 lena leagtar síos rialacha mionsonraithe maidir le cur chun feidhme fhorálacha áirithe Rialachán (AE) Uimh. 952/2013 ó Pharlaimint na hEorpa agus ón gComhairle lena leagtar síos Cód Custaim an Aontais, measfar beirt a bheith comhlachaithe sna cásanna seo a leanas: (a) más oifigeach nó stiúrthóir duine acu i ngnólacht an duine eile; (b) más comhpháirtithe gnó iad a bhfuil aitheantas dlíthiúil acu; (c) más fostóir agus fostaí iad; (d) más le tríú páirtí 5 % nó níos mó de na stoic nó de na scaireanna le cearta vótála de chuid na beirte acu, nó má rialaíonn nó má choinníonn tríú páirtí iad, go díreach nó go hindíreach; (e) má stiúrann duine acu an duine eile go díreach nó go hindíreach; (f) má tá an bheirt acu faoi stiúradh díreach nó indíreach ag tríú páirtí; (g) má rialaíonn siad tríú duine go díreach nó go hindíreach le chéile; nó (h) más daoine ón teaghlach céanna iad (IO L 343, 29.12.2015, lch. 558). I gcomhréir le hAirteagal 5(4) de Rialachán (AE) Uimh. 952/2013 ó Pharlaimint na hEorpa agus ón gComhairle lena leagtar síos Cód Custaim an Aontais, ciallaíonn ‘duine’ duine nádúrtha, duine dlítheanach agus aon chumann de dhaoine nach bhfuil ina dhuine dlítheanach ach a n-aithnítear faoi dhlí an Aontais nó faoin dlí náisiúnta go bhfuil an inniúlacht aige gníomhartha dlíthiúla a dhéanamh (IO L 269, 10.10.2013, lch. 1).
ELI: http://data.europa.eu/eli/C/2024/1483/oj
ISSN 1977-107X (electronic edition)