(1)

Le litir an 6 Nollaig 2021, léirigh an Nua-Shéalainn, a suim fhoirmiúil a bheith comhlachaithe le Fís Eorpach — an Clár Réime um Thaighde agus um Nuálaíocht (2021-2027) a bunaíodh le Rialachán (AE) 2021/695 ó Pharlaimint na hEorpa agus ón gComhairle (1) (‘an Clár Fís Eorpach’).

(2)

An 9 Meán Fómhair 2022, de bhua Chinneadh (AE) 2022/1527 (2), d’údaraigh an Chomhairle tús a chur le caibidlíocht leis an Nua-Shéalainn, thar ceann an Aontais, le haghaidh Comhaontú maidir leis na prionsabail ghinearálta i dtaca le rannpháirtíocht na Nua-Shéalainne i gcláir an Aontais agus maidir le comhlachas na Nua-Shéalainne leis an gClár Fís Eorpach.

(3)

Tugadh an chaibidlíocht chun críche agus cuireadh inisealacha leis an gComhaontú idir an tAontas Eorpach, de pháirt, agus an Nua-Shéalainn, den pháirt eile (‘an Comhaontú’) an 22 Nollaig 2022.

(4)

Is é cuspóir an Chomhaontaithe creat marthanach um chomhar a bhunú idir an tAontas agus an Nua-Shéalainn agus na téarmaí agus na coinníollacha a bhaineann le rannpháirtíocht na Nua-Shéalainne i gcláir an Aontais a osclaítear dá rannpháirtíocht a leagan amach i gcomhréir leis na bunghníomhartha lena mbunaítear cláir an Aontais mar a sainmhínítear sa Chomhaontú. Faoin gComhaontú, cuirfidh an tAontas bearta comhair i gcrích leis an Nua-Shéalainn de bhun Airteagal 212 den Chonradh ar Fheidhmiú an Aontais Eorpaigh. De bhun Airteagal 3 den Chomhaontú, tá na téarmaí agus na coinníollacha a bhaineann le rannpháirtíocht na Nua-Shéalainne in aon chlár nó gníomhaíocht de chuid an Aontais faoi réir ghlacadh na bPrótacal a ghabhann leis an gComhaontú.

(5)

I gcomhréir leis an údarú ón gComhairle, rinneadh an Prótacal maidir le comhlachas na Nua-Shéalainne le Fís Eorpach — an Clár Réime um Thaighde agus um Nuálaíocht (2021-2027) a chaibidliú i gcomhthreo leis an gComhaontú agus, de bhun Airteagal 15(9) den Chomhaontú, is cuid dhílis den Chomhaontú é. Tá an Nua-Shéalainn le páirt a ghlacadh i gColún II den Chlár Fís Eorpach agus le rannchuidiú leis an gcolún sin.

(6)

Comhlíonann an Nua-Shéalainn na critéir a leagtar amach in Airteagal 16(1), pointe (d), de Rialachán (AE) 2021/695.

(7)

Tá an Comhaontú i gcomhréir le hAirteagal 16(2) de Rialachán (AE) 2021/695, lena gceanglaítear go mbeidh comhlachas ó gach ceann de na tríú tíortha leis an gClár Fís Eorpach faoi Airteagal 16(1), pointe (d), den Rialachán sin i gcomhréir leis na coinníollacha a leagtar síos i gcomhaontú lena gcumhdaítear rannpháirtíocht na tíre nó na críche sin in aon chlár de chuid an Aontais, ar choinníoll go ndéanfar leis an gcomhaontú an méid seo a leanas: cothromaíocht chóir a mhéid a bhaineann le ranníocaíochtaí agus sochair an tríú tír atá rannpháirteach sna cláir de chuid an Aontais a áirithiú; na coinníollacha maidir le rannpháirtíocht sna cláir Aontais, lena n-áirítear ríomh na ranníocaíochtaí airgeadais le cláir aonair, agus costais riaracháin na gclár, a leagan síos; gan aon chumhacht cinnteoireachta a thabhairt don tríú tír i dtaca le clár an Aontais; agus cearta an Aontais a ráthú chun bainistíocht fhónta airgeadais a áirithiú agus chun a leasanna airgeadais a chosaint.

(8)

Ba cheart an Comhaontú a shíniú thar ceann an Aontais, faoi réir a thabhairt i gcrích tráth níos déanaí.

(9)

D’fhonn comhar tráthúil idir an tAontas Eorpach agus an Nua-Shéalainn i réimse an taighde, na forbartha teicneolaíochta agus na nuálaíochta a áirithiú, agus d’fhonn rannpháirtíocht thráthúil eintitis na Nua-Shéalainne sa Chlár Fís Eorpach a chur san áireamh ba cheart an Comhaontú a chur i bhfeidhm ar bhonn sealadach, go dtí go gcomhlánófar na nósanna imeachta is gá chun go dtiocfaidh sé i bhfeidhm,