(1)

Fl-10 ta' Diċembru 2016, il-Kummissjoni Ewropea (“Il-Kummissjoni”) tat bidu għal investigazzjoni dwar l-antidumping fir-rigward ta' importazzjonijiet fl-Unjoni ta' ċerti oġġetti ta' ħadid fondut bil-grafit lamellari (ħadid griż) jew ħadid fondut bil-grafit sferojdali (magħruf ukoll bħala ħadid fondut duttili), u partijiet minn dawn (“oġġetti ta' ħadid fondut”) li joriġinaw mir-Repubblika tal-Poplu taċ-Ċina (“ir-RPĊ”) u l-Indja (“il-pajjiżi kkonċernati”) abbażi tal-Artikolu 5 tar-Regolament (UE) 2016/1036 (“ir-Regolament bażiku”).

(2)

Il-Kummissjoni ppubblikat Notifika ta' Bidu f'Il-Ġurnal Uffiċjali tal-Unjoni Ewropea (2) (“in-Notifika ta' Bidu”).

(3)

Il-Kummissjoni tat bidu għal investigazzjoni wara lment imressaq fil-31 ta' Ottubru 2016 minn seba' produtturi tal-Unjoni, jiġifieri Fondatel Lecompte SA, Ulefos Niemisen Valimo Oy Ltd, Saint-Gobain PAM SA, Fonderies Dechaumont SA, Heinrich Meier Eisengießerei GmbH & Co. KG, Saint-Gobain Construction Products UK Ltd u Fundiciones de Odena SA (“l-ilmentaturi”). L-ilmentaturi jirrappreżentaw aktar minn 40 % tal-produzzjoni totali tal-Unjoni ta' oġġetti tal-ħadid fondut. L-ilment kien fih evidenza ta' dumping u ta' dannu materjali riżultanti, u dan kien biżżejjed biex il-bidu tal-investigazzjoni jkun iġġustifikat.

(4)

Fin-Notifiki ta' Bidu, il-Kummissjoni stiednet lill-partijiet interessati jikkuntattjawha sabiex jipparteċipaw fl-investigazzjoni. Barra minn hekk, il-Kummissjoni għarrfet speċifikament lill-ilmentaturi, lil produtturi magħrufa oħrajn, lill-produtturi esportaturi magħrufa u lill-awtoritajiet tar-RPĊ u lill-Indja, u lil importaturi magħrufa dwar il-bidu tal-investigazzjoni u stednithom jipparteċipaw.

(5)

Il-partijiet interessati kellhom l-opportunità jikkummentaw dwar il-bidu tal-investigazzjoni u jitolbu seduta mal-Kummissjoni u/jew mal-Uffiċjal tas-Seduta fil-proċedimenti kummerċjali.

(6)

Fin-Notifika ta' Bidu, il-Kummissjoni infurmat lill-partijiet interessati li hija għażlet lill-Indja b'mod provviżorju bħala pajjiż terz b'ekonomija tas-suq (“pajjiż analogu”) skont it-tifsira tal-Artikolu 2(7)(a) tar-Regolament bażiku. Il-partijiet interessati kellhom l-opportunità jikkummentaw u jitolbu seduta mal-Kummissjoni u/jew mal-Uffiċjal tas-Seduta fil-proċedimenti kummerċjali.

(7)

Assoċjazzjoni bl-isem ta' Free Castings Imports li tirrappreżenta 19-il importatur ippreżentat kummenti wara l-bidu tal-investigazzjoni (“assoċjazzjoni ta' importaturi mhux relatati”). Barra minn hekk, bosta produtturi esportaturi Indjani, l-industrija Indjana, u l-Kamra tal-Kummerċ taċ-Ċina għall-Importazzjoni u l-Esportazzjoni ta' Makkinarju u Prodotti Elettroniċi (“CCCME”) ippreżentaw kummenti wara l-bidu tal-proċediment.

(8)

Xi partijiet interessati ressqu l-argument li l-ilment ma jilħaqx il-livell neċessarju ta' evidenza prima facie li jwassal għall-bidu ta' investigazzjoni, peress li ma jipprovdix evidenza kompluta u fattwali għall-allegazzjonijiet li fih u ma tingħata l-ebda data dwar il-post tal-produzzjoni u l-prezzijiet domestiċi ta' produtturi esportaturi Ċiniżi. Huwa ressqu l-argument li tali data hija neċessarja sabiex tinbeda investigazzjoni kontra pajjiż b'ekonomija tas-suq bħal ma hi r-RPĊ.

(9)

Il-Kummissjoni wettqet eżaminazzjoni tal-ilment skont l-Artikolu 5 tar-Regolament bażiku, u wasslet għall-konklużjoni li r-rekwiżiti għall-bidu ta' investigazzjoni ġew sodisfatti, jiġifieri li l-adegwatezza u l-preċiżjoni tal-evidenza preżentata mill-ilmentatur kienet suffiċjenti. Huwa mfakkar li, skont l-Artikolu 5(2) tar-Regolament bażiku, ilment għandu jinkludi dik l-informazzjoni li b'mod raġjonevoli hija disponibbli għall-ilmentatur, bħal ma huma rapporti u statistika disponibbli b'mod pubbliku. Fl-aħħar nett, skont l-Artikolu 2(7) tar-Regolament bażiku, il-valur normali li hemm fl-ilment abbażi ta' data minn pajjiż analogu tikkostitwixxi evidenza prima facie biżżejjed biex tkun tista' tinbeda l-investigazzjoni. Għaldaqstant, din id-dikjarazzjoni ġiet irrifjutata.

(10)

Il-Kummissjoni għalhekk ikkonkludiet li l-ilment kien fih evidenza ta' dumping u ta' dannu materjali li rriżulta, li kienet biżżejjed biex tiġġustifika l-bidu tal-investigazzjoni.

(11)

Fin-Notifika ta' Bidu tagħha, il-Kummissjoni ddikjarat li hija tista' tieħu kampjun ta' produtturi esportaturi, produtturi tal-Unjoni u importaturi mhux relatati skont l-Artikolu 17 tar-Regolament bażiku.

(12)

Fin-Notifika ta' Bidu tagħha, il-Kummissjoni stqarret li kienet għażlet b'mod provviżorju kampjun tal-produtturi tal-Unjoni. Il-Kummissjoni għażlet il-kampjun fuq il-bażi tal-volumi ta' bejgħ l-aktar rappreżentattivi tal-prodott simili fil-perjodu tal-investigazzjoni filwaqt li żgurat firxa fit-tipi ta' prodotti u firxa ġeografika.

(13)

Dan il-kampjun kien jikkonsisti minn tliet produtturi tal-Unjoni, EJ Picardie, Saint-Gobain PAM SA, u Heinrich Meier Eisengießerei GmbH & Co. KG. Il-produtturi tal-Unjoni fil-kampjun kienu responsabbli għal 48 % tal-volum tal-produzzjoni totali u 43 % tal-bejgħ totali tal-industrija tal-Unjoni. Il-Kummissjoni stiednet lill-partijiet interessati biex jikkummentaw fuq il-kampjun provviżorju.

(14)

L-ilmentaturi ppreżentaw talba biex jinkludu r-raba' produttur tal-Unjoni, Fondatel Lecomte. Billi l-ilmentaturi ma ssostanzjawx it-talba tagħhom, il-Kummissjoni rrifjutatha.

(15)

Xi partijiet interessati argumentaw li l-kampjun propost ma kienx jagħti rappreżentazzjoni preċiża f'termini tal-post ġeografiku tal-produtturi jew il-pożizzjoni tal-produtturi tal-Unjoni fir-rigward tal-ilmentaturi. Il-kampjun propost kien jinkludi biss ilmentaturi u sostenitur tal-ilment, filwaqt li ma kienx jinkludi lill-produtturi tal-Unjoni fl-Istati Membri l-aktar affettwati mill-allegati importazzjonijiet li huma l-oġġetti ta' dumping mir-RPĊ jew il-produtturi tal-Unjoni minn pajjiżi tal-Ewropa Ċentrali u tal-Lvant.

(16)

Il-Kummissjoni nnotat li l-kampjun kien jinkludi l-akbar swieq għall-prodott ikkonċernat u l-ikbar produtturi f'termini ta' volum u bejgħ fis-suq tal-Unjoni li jistgħu jiġu investigati b'mod raġjonevoli fiż-żmien disponibbli.

(17)

Il-produtturi esportaturi Indjani argumentaw li l-kampjun tal-produtturi tal-Unjoni mhuwiex rappreżentattiv, peress li jinkludi kumpaniji li huma stess huma importaturi tal-prodott li allegatament huwa l-oġġett ta' dumping.

(18)

Il-Kummissjoni nnotat li tabilħaqq waħda mill-produtturi tal-Unjoni fil-kampjun timporta l-prodott ikkonċernat sabiex tikkompleta l-gamma ta' prodotti tagħha. Il-Kummissjoni sabet li l-kwantità importata hija ħafna iżgħar mill-kwantità prodotta minn din il-kumpanija peress li tirrappreżenta anqas minn 15 % tal-bejgħ kollu totali tagħha fl-Unjoni u għalhekk tqis li l-produttur tal-Unjoni fil-kampjun huwa rappreżentattiv tal-industrija tal-Unjoni.

(19)

Fid-dawl ta' dan ta' hawn fuq, il-Kummissjoni kkonfermat li l-kampjun huwa rappreżentattiv tal-industrija tal-Unjoni.

(20)

Biex tiddeċiedi jekk il-kampjunar kienx meħtieġ u, jekk iva, biex tagħżel kampjun, il-Kummissjoni talbet lill-importaturi mhux relatati biex jipprovdu l-informazzjoni speċifikata fin-Notifika ta' Bidu.

(21)

Tmienja u għoxrin importatur mhux relatat ippreżentaw l-informazzjoni mitluba u qablu li jiġu inklużi fil-kampjun. Skont l-Artikolu 17(1) tar-Regolament bażiku, il-Kummissjoni għażlet kampjun ta' tliet importaturi mhux relatati abbażi tal-akbar volum ta' importazzjonijiet fl-Unjoni. F'konformità mal-Artikolu 17(2) tar-Regolament bażiku, l-importaturi kollha magħrufa kkonċernati ġew ikkonsultati dwar l-għażla tal-kampjun. Ma wasal l-ebda kumment.

(22)

Biex tiddeċiedi jekk il-kampjunar huwiex meħtieġ u, jekk iva, biex tagħżel kampjun, il-Kummissjoni talbet lill-produtturi esportaturi kollha fir-RPĊ sabiex jipprovdu l-informazzjoni speċifikata fin-Notifika ta' Bidu. Barra minn hekk, il-Kummissjoni talbet lill-Missjoni tar-Repubblika tal-Poplu taċ-Ċina għall-Unjoni Ewropea sabiex tidentifika u/jew tikkuntattja lil produtturi esportaturi oħrajn, jekk hemm, li jistgħu jkunu interessati jipparteċipaw fl-investigazzjoni.

(23)

Wieħed u tmenin produttur esportatur fir-RPĊ ipprovdew l-informazzjoni mitluba u qablu li jkunu inklużi fil-kampjun. Il-Kummissjoni sabet tmienja u sebgħin produttur esportatur/gruppi ta' produtturi esportaturi ammissibbli għall-kampjun. Tliet produtturi ma rrapportaw l-ebda esportazzjoni tal-prodott ikkonċernat lejn l-UE matul il-perjodu tal-investigazzjoni u għalhekk ma kinux meqjusa ammissibbli għall-kampjun. B'mod provviżorju, il-Kummissjoni għażlet kampjun ta' tliet produtturi kooperattivi abbażi tal-akbar volum rappreżentattiv ta' esportazzjonijiet lejn l-Unjoni. Skont l-Artikolu 17(2) tar-Regolament bażiku, il-produtturi esportaturi magħrufin ikkonċernati kollha, u l-awtoritajiet tar-RPĊ ġew ikkonsultati dwar l-għażla tal-kampjun. Xi partijiet interessati stiednu lill-Kummissjoni biex testendi l-kampjun tagħha sabiex ittejjeb ir-rappreżentanza tagħha. Il-Kummissjoni qieset dawn il-kummenti. Il-kampjun definittiv kien jinkludi l-ħames l-akbar produtturi esportaturi lejn l-Unjoni li b'mod raġjonevoli setgħu jiġu investigati fiż-żmien disponibbli. Il-Missjoni tar-Repubblika tal-Poplu taċ-Ċina lill-Unjoni Ewropea esprimiet l-appoġġ tagħha fir-rigward tal-kampjun finali.

(24)

Biex tiddeċiedi jekk il-kampjunar huwiex meħtieġ u, jekk iva, biex tagħżel kampjun, il-Kummissjoni talbet lill-produtturi esportaturi kollha fl-Indja biex jipprovdu l-informazzjoni speċifikata fin-Notifika ta' Bidu. Barra minn hekk, il-Kummissjoni talbet lill-Missjoni tal-Indja għall-Unjoni Ewroepa biex tidentifika u/jew tikkuntattja produtturi esportaturi oħra, jekk ikun hemm, li jistgħu jkunu interessati jipparteċipaw fl-investigazzjoni.

(25)

Tnejn u għoxrin produttur esportatur/gruppi ta' produtturi esportaturi fl-Indja pprovdew l-informazzjoni mitluba u qablu li jkunu inklużi fil-kampjun. Il-Kummissjoni sabet 21 produttur esportatur/grupp ta' produtturi esportaturi ammissibbli għall-kampjun. Produttur wieħed ma rrapporta l-ebda esportazzjoni tal-prodott ikkonċernat lejn l-UE matul il-perjodu tal-investigazzjoni u għalhekk ma kienx meqjus ammissibbli għall-kampjun. Skont l-Artikolu 17(1) tar-Regolament bażiku, il-Kummissjoni għażlet kampjun ta' tliet gruppi ta' kumpaniji abbażi tal-akbar volum rappreżentattiv ta' esportazzjonijiet lejn l-Unjoni li jista' jiġi investigat b'mod raġjonevoli fiż-żmien disponibbli. Skont l-Artikolu 17(2) tar-Regolament bażiku, il-produtturi esportaturi kollha magħrufa kkonċernati u l-awtoritajiet tal-Indja ġew ikkonsultati dwar l-għażla tal-kampjun.

(26)

Il-Kummissjoni rċeviet kummenti minn żewġ produtturi esportaturi li l-għażla ta' tliet gruppi ta' kumpaniji biss abbażi tal-akbar volum rappreżentattiv ta' esportazzjonijiet lejn l-Unjoni mhijiex rappreżentattiva tad-diversità sinifikanti preżenti fis-suq Indjan. Billi t-tliet gruppi ta' kumpaniji magħżula b'mod provviżorju kienu jirrappreżentaw parti sostanzjali mill-esportazzjonijiet mill-Indja lejn l-UE matul il-perjodu tal-investigazzjoni u setgħu jiġu investigati b'mod raġjonevoli fiż-żmien disponibbli, il-Kummissjoni kkonfermat il-Kampjun provviżorju.

(27)

Għar-RPĊ, tmintax-il produttur mhux fil-kampjun formalment talbu eżaminazzjoni individwali skont l-Artikolu 17(3) tar-Regolament bażiku. L-eżaminazzjoni ta' numru daqshekk kbir ta' talbiet tkun ta' piż kbir wisq u ma tistax tiġi raġjonevolment mistennija matul iż-żmien disponibbli għall-investigazzjoni. Għalhekk, il-Kummissjoni ddeċidiet li ma hi ser tagħti l-ebda eżaminazzjoni individwali.

(28)

Għall-Indja, l-ebda mill-produtturi esportaturi/gruppi ta' produtturi ta' esportaturi mhux fil-kampjun ma talbu eżaminazzjoni individwali skont l-Artikolu 17(3) tar-Regolament bażiku.

(29)

Għall-finijiet tal-Artikolu 2(7)(b) tar-Regolament bażiku, il-Kummissjoni bagħtet formoli ta' talba għal TES lill-produtturi esportaturi kooperattivi kollha fir-RPĊ magħżula biex ikunu fil-kampjun u lill-produtturi esportaturi kooperativi li ma kinux fil-kampjun li xtaqu japplikaw għal marġni tad-dumping individwali. Wieħed biss mill-produtturi esportaturi fir-RPĊ magħżul fil-kampjun ippreżenta formola ta' talba għal TES, li ġiet ivvalutata mill-Kummissjoni.

(30)

Il-Kummissjoni bagħtet kwestjonarji lill-kumpaniji kollha fil-kampjun, lill-produtturi esportaturi kollha li kellhom il-ħsieb jitolbu eżaminazzjoni individwali u lil għaxar produtturi ta' pajjiżi analogi potenzjali.

(31)

Il-Kummissjoni rċeviet tweġibiet għall-kwestjonarji mit-tliet produtturi tal-Unjoni fil-kampjun, tliet importaturi mhux relatati, il-ħames produtturi esportaturi fil-kampjun fir-RPĊ, tmintax-il produttur esportatur fir-RPĊ li qed jitolbu eżaminazzjoni individwali, it-tliet gruppi ta' produtturi esportaturi fil-kampjun fl-Indja u t-tliet produtturi tal-pajjiżi analogi.

(32)

Il-Kummissjoni fittxet u vverifikat l-informazzjoni kollha li qieset neċessarja għal determinazzjoni provviżorja ta' dumping, id-dannu li jirriżulta u l-interess tal-Unjoni. Iż-żjarat ta' verifika skont l-Artikolu 16 tar-Regolament bażiku saru fil-binjiet tal-kumpaniji li ġejjin:

(33)

L-investigazzjoni tad-dumping u d-dannu kopriet il-perjodu mill-1 ta' Ottubru 2015 sat-30 ta' Settembru 2016 (“il-perjodu tal-investigazzjoni”). L-eżaminazzjoni tax-xejriet rilevanti għall-valutazzjoni tad-dannu kopriet il-perjodu mill-1 ta' Jannar 2013 sat-tmiem tal-perjodu tal-investigazzjoni (“il-perjodu kkunsidrat”).

(34)

Xi parijiet interessati argumentaw li l-perjodu kkunsidrat huwa qasir b'mod abnormali u selettiv għall-aħħar u għalhekk qasir wisq biex jippermetti analiżi xierqa.

(35)

Il-Kummissjoni nnotat li l-perjodu kkunsidrat mhuwiex qasir b'mod anormali (3). Għall-fini ta' din l-investigazzjoni, il-perjodu kkunsidrat jikkonsisti mill-perjodu tal-investigazzjoni flimkien mat-tliet snin ta' qabel, b'total ta' tliet snin u tliet kwarti. Dan ġie kkunsidrat bħala raġjonevoli għall-eżaminazzjoni tat-tendenzi rilevanti għall-valutazzjoni tad-danni. Dan ikopri aktar minn tliet snin li huwa konformi mal-prattika tal-Kummissjoni u għalhekk mhuwiex qasir b'mod anormali.

(36)

Il-prodott ikkonċernat huwa ċerti oġġetti ta' ħadid fondut bil-grafit lamellat (ħadid griż) jew ħadid fondut bil-grafit sferojdali (magħruf ukoll bħala ħadid fondut duttili) u partijiet minnhom. Dawn l-oġġetti huma ta' tip użat għal:

L-oġġetti jistgħu jkunu maħdumin bil-magni, miksijin, miżbugħin u/jew iffittjati b'materjali oħra bħal, iżda mhux limitati għal, konkrit, ċangaturi jew madum, iżda mhux idranti tat-tifi tan-nar, li joriġinaw fir-RPĊ u fl-Indja, attwalment klassifikati bil-kodiċi NM ex 7325 10 00 u ex 7325 99 10 (“il-prodott ikkonċernat”).

(37)

L-investigazzjoni wriet li l-prodotti li ġejjin għandhom l-istess karatteristiċi fiżiċi bażiċi kif ukoll l-istess użi bażiċi:

(38)

F'dan l-istadju l-Kummissjoni ddeċidiet li dawn il-prodotti huma għalhekk prodotti simili skont it-tifsira tal-Artikolu 1(4) tar-Regolament bażiku.

(39)

Il-produtturi esportaturi Indjani argumentaw li l-ambitu tal-prodott għandu definizzjoni wiesgħa wisq. B'mod partikolari, argumentaw li l-ispralli tal-kanali, soġġetti għan-norma EN 1433, għandhom jiġu esklużi mill-ambitu tal-prodott. Biex isostnu d-dikjarazzjoni tagħhom, jibbażaw primarjament fuq l-argumenti li ġejjin.

(40)

L-ewwel nett, argumentaw li l-komponenti għall-ispralli tal-kanali huma prodotti skont proċessi ta' produzzjoni differenti u huma prodotti biss f'ammonti limitati fl-Unjoni. It-tieni nett, argumentaw li l-oqfsa u l-binarji tal-ispralli tal-kanali għandhom karatteristiċi fiżiċi bażiċi differenti u huma biss komponent tas-sistemi lineari tad-drenaġġ mibjugħa fis-suq tal-Unjoni.

(41)

Produttur esportatur Ċiniż wieħed għamel talba simili, fejn minbarra l-argumenti ta' hawn fuq, argumenta li l-ispralli tal-kanali mhumiex interkambjabbli minn għotjien ta' tappieri u huma soġġetti għal standard industrijali differenti.

(42)

L-assoċjazzjoni tal-importaturi mhux relatati appoġġjat it-talba għall-esklużjoni tal-prodott rigward l-ispralli tal-kanali u mal-argumenti ta' hawn fuq żiedet tgħid li l-ispralli tal-kanali għandhom użi finali u applikazzjonijiet differenti mill-bqija tal-prodotti kkonċernati u mhumiex f'kompetizzjoni diretta mal-prodotti manifatturati mill-produtturi tal-Unjoni. Skont din l-assoċjazzjoni, l-għarfien ta' kif wieħed jimmanifattura l-ispralli tal-kanali ma jistax jinstab fl-Unjoni.

(43)

L-ilmentaturi u produttur wieħed ieħor tal-Unjoni ddikjaraw li ma joġġezzjonawx għall-esklużjoni tal-ispralli tal-kanali.

(44)

L-investigazzjoni kkonfermat li l-ispralli tal-kanali huma soġġetti għal norma separata, differenti minn dawk applikabbli għall-bqija tal-prodotti kkonċernati, jiġifieri n-norma EN 1433. Barra minn hekk, il-partijiet interessati kollha qablu dwar l-esklużjoni tal-ispralli tal-kanali mill-ambitu tal-prodott f'din l-investigazzjoni. Għalhekk, b'mod provviżorju, il-Kummissjoni eskludiet dan il-prodott mill-prodott ikkonċernat u l-prodott simili.

(45)

Importatur wieħed mhux relatat argumenta li komponenti b'dimensjoni li taqbeż l-1 000 mm ta' ftuħ ċar, importati mill-importatur mhux relatat Gatic mir-RPĊ (“komponenti Gatic”) għandhom jiġu esklużi mill-ambitu tal-prodott għax dawn il-prodotti ma jistgħux jitqiesu bħala li flimkien jikkostitwixxu prodott wieħed u, minħabba d-daqs tagħhom, ma jaqgħux taħt in-norma EN 124. Biex isostni d-dikjarazzjoni tiegħu, ibbaża primarjament fuq tliet argumenti.

(46)

L-ewwel nett, argumenta li l-komponenti Gatic huma prodotti skont proċessi ta' produzzjoni differenti, peress li l-komponenti jiġu mmuntati fl-Unjoni bl-użu ta' materjali mir-Renju Unit sabiex jinħoloq il-prodott. It-tieni nett, argumenta li l-komponenti Gatic għandhom karatteristiċi fiżiċi bażiċi differenti, għax huma ta' kwalità ogħla u jeħtieġu inġinerija addizzjonali meta mqabbla mal-prodott ikkonċernat sabiex ikunu mingħajr gass u arja. It-tielet nett, allega li l-komponenti Gatic għandhom funzjonijiet u użi finali differenti, peress li jridu jiġu ssiġillati u tipikament huma mmuntati fi struttura akbar.

(47)

Barra minn hekk, l-assoċjazzjoni tal-importaturi argumentat li għotjien fonduti u spralli użati bħala komponenti Gatic mhumiex prodott awtonomu, mhumiex f'kompetizzjoni diretta ma' tipi oħrajn ta' prodotti taħt il-prodott ikkonċernat u jeħtieġu proċessar addizzjonali fil-proċess tal-produzzjoni.

(48)

Il-produtturi esportaturi Indjani argumentaw li l-komponenti Gatic, deskritti bħala tip ta' prodott iżda mhux limitati għal dimensjoni li taqbeż l-1 000 mm ta' ftuħ ċar, huma prodotti skont proċessi uniċi, li jirriżultaw fi prodott issiġillat li jrid jiġi mmuntat, u li l-għarfien tekniku mhuwiex disponibbli għall-biċċa l-kbira tal-produtturi tal-Unjoni.

(49)

Abbażi tal-argumenti deskritti fil-premessi (45)-(48), il-partijiet interessati kkonċernati talbu l-esklużjoni tal-komponenti Gatic mill-ambitu tal-prodott.

(50)

L-ilmentaturi ma qablux ma' din it-talba. Huma argumentaw li l-komponenti Gatic għandhom l-istess karatteristiċi fiżiċi bażiċi, l-istess funzjonijiet u użi finali, u l-istess proċessi ta' produzzjoni bħall-prodott ikkonċernat. Allegatament, xi tipi ta' prodotti oħra fi ħdan il-prodott ikkonċernat għandhom l-istess karatteristiċi ta' impermeabbiltà tal-arja bħall-komponenti ta' Gatic. Huma qablu wkoll li l-prodott ikkonċernat mhuwiex definit min-norma u jinkludi firxa usa' ta' tipi ta' prodotti min-norma EN 124.

(51)

Il-Kummissjoni osservat li l-ambitu tal-prodott tal-prodott ikkonċernat jinkludi oġġetti tal-ħadid fondut u partijiet minnhom. Għaldaqstant, l-argument li l-komponenti Gatic flimkien ma jikkostitwixxux prodott wieħed huwa irrilevanti.

(52)

F'dak li għandu x'jaqsam mal-karatteristiċi fiżiċi u tekniċi tal-prodott, dawn huma ddeterminati mill-funzjoni, l-installazzjoni u l-lok, u huma l-iżjed ir-reżistenza tat-tagħbija tat-traffiku determinati mill-hekk imsejħa kategorija ta' tagħbija, l-istabbiltà tal-għatu u l-gradilja fil-qafas u l-aċċess sikur u faċli. Il-prodott jista' jkun tal-ħadid fondut griż jew duttili u l-għatu u/jew il-qafas tal-għatu jista' jimtela bil-konkrit jew b'materjali oħra. Il-prodott jista' jikkonforma ma' norma speċifika. F'dak li għandu x'jaqsam mal-funzjonijiet u l-użi finali tal-prodott, l-għotjien u l-frejms fonduti jipprovdu interfaċċa bejn in-netwerks ta' taħt l-art u l-wiċċ tat-triq jew tal-bankina. Il-prodott huwa manifatturat f'funderiji, li huma l-istess jew simili għal dawk li jipproduċu tipi oħra tal-prodott ikkonċernat.

(53)

Il-karatteristiċi kollha ta' hawn fuq japplikaw ukoll għall-komponenti Gatic, irrispettivament mid-dimensjoni tal-ftuħ ċar tal-prodott. Il-komponenti Gatic ma jistgħux jiġu distinti mill-prodott ikkonċernat fi kwalunkwe waħda mill-karatteristiċi ta' hawn fuq. Għaldaqstant, it-talba biex il-komponenti Gatic jiġu esklużi mill-prodott ikkonċernat hija rrifjutata.

(54)

Parti interessata waħda argumentat li katusi tal-art, katusi tas-soqfa, cleanouts u għotjien għall-cleanouts, u t-trademark irreġistrata Watts Dead Level Systems, soġġetta għan-norma EN 1253, għandhom ikunu esklużi mill-ambitu tal-prodott ikkonċernat. Biex isostni d-dikjarazzjoni tiegħu, argumenta li l-prodotti deskritti mill-parti interessata jaqgħu taħt norma differenti mill-prodott ikkonċernat.

(55)

L-ilmentaturi ċċaraw li ma jqisux tali prodotti soġġetti għall-EN 1253 bħala parti mill-prodott ikkonċernat, għax dawn għandhom funzjoni differenti u mhumiex użati bħala fondut muniċipali. Barra minn hekk, l-industrija tal-Unjoni ma tipproduċix dawn il-prodotti.

(56)

Il-Kummissjoni stabbilixxiet li l-prodotti li jaqgħu taħt in-norma EN 1253 mhumiex ikkunsidrati li huma parti mill-ambitu tal-prodott tal-prodott ikkonċernat.

(57)

L-assoċjazzjoni ta' importaturi mhux relatati argumentat li l-kaxex tal-wiċċ għandhom jiġu esklużi mill-ambitu tal-prodott ikkonċernat. Biex isostni d-dikjarazzjoni tiegħu, ibbaża primarjament fuq l-argumenti li ġejjin.

(58)

Il-kaxex tal-wiċċ għandhom karatteristiċi fiżiċi u tekniċi differenti mill-għotjien ta' tappieri tradizzjonali, għax tipikament huma ħafna iżgħar u jaqgħu taħt in-normi nazzjonali ta' konformità u mhux taħt l-ambitu tan-norma EN 124. L-użi finali u l-applikazzjonijiet għal kaxex tal-wiċċ huma sostanzjalment differenti minn għotjien ta' tappieri, peress li dawn iservu bħala kompartimenti u għotjien protettivi, mhux bħala punt ta' aċċess għall-ħaddiema.

(59)

Kif stabbilit fil-premessa (36), il-Kummissjoni osservat li l-prodott ikkonċernat ma jkoprix biss oġġetti li jagħtu aċċess għal sistemi tal-art jew ta' taħt il-wiċċ, iżda wkoll oġġetti li jkopru jew jipprovdu aċċess għal sistemi tal-art jew ta' taħt il-wiċċ. Għaldaqstant, il-kaxex tal-wiċċ huma parti mill-prodott soġġett għall-investigazzjoni u t-talba li l-kaxex tal-wiċċ jiġu esklużi mill-prodott ikkonċernat ġiet irrifjutata.

(60)

Għaldaqstant, b'mod provviżorju, il-Kummissjoni ddeċidiet li teskludi l-ispralli tal-kanali li huma soġġetti għan-norma EN 1433 mid-definizzjoni tal-prodott. Għall-kuntrarju, f'dan l-istadju ddeċidiet li l-prodotti soġġetti għan-norma EN 1253 ma kinux koperti bl-ilment u għalhekk mhumiex soġġetti għall-investigazzjoni. B'mod provviżorju rrifjutat ukoll it-talba li jiġu esklużi l-kaxex tal-wiċċ u komponenti Gatic mill-ambitu tal-investigazzjoni.

(61)

Skont l-Artikolu 2(7)(b) tar-Regolament bażiku, il-Kummissjoni tiddetermina l-valur normali skont l-Artikolu 2(1) sa (6) tar-Regolament bażiku għal kwaunkwe produttur esportatur fir-RPĊ li jikkonforma mal-kriterji stabbiliti fl-Artikolu 2(7)(c) tar-Regolament bażiku u li għalhekk jista' jingħata TES.

(62)

Fil-qosor, u għall-faċilitar ta' referenza biss, dawn il-kriterji huma stabbiliti hawn taħt:

(63)

Biex tiddetermina jekk il-kriterji tal-Artikolu 2(7)(c) tar-Regolament bażiku ntlaħqux, il-Kummissjoni kisbet l-informazzjoni neċessarja billi talbet lill-produtturi esportaturi kkonċernati biex jimlew il-formola tat-talba ta' TES. Produttur esportatur fil-kampjun wieħed biss, Botou Lisheng Casting Industry Co., Ltd (“Lisheng”) talab TES u wieġeb sal-iskadenza. Il-Kummissjoni vverifikat l-informazzjoni ppreżentata fil-bini tal-kumpanija kkonċernata.

(64)

Instab li Lisheng ma tikkonformax mal-kriterji fl-Artikolu 2(7)(c) tar-Regolament bażiku u għalhekk il-Kummissjoni ċaħdet it-talba tagħha għal TES.

(65)

Instab li Lisheng ma ssodisfat l-ebda mill-ħames kriterji TES stabbiliti fl-Artikolu 2(7)(c) tar-Regolament bażiku.

(66)

Skont il-kriterju 1 għall-interferenza mill-istat, instab li l-kumpanija kienet bidlet is-sjieda tagħha mingħar ma żvelat dan il-fatt lill-Kummissjoni u li wieħed mis-sidien il-ġodda kellu rabtiet mal-Istat u mal-Partit Komunista taċ-Ċina.

(67)

Skont il-kriterju 2 rigward il-kontijiet, il-kontijiet tal-kumpanija ma kinux kompluti biżżejjed biex ikunu awditjati kif suppost, u ma kinux miżmuma f'konformità ma' standards kontabilistiċi Ċiniżi jew internazzjonali.

(68)

Skont il-kriterju 3 il-kumpanija ma setgħetx turi li ma kien hemm l-ebda distorsjoni sinifikanti li ntirtet mis-sistema ta' ekonomija mhux tas-suq rigward il-kiri tal-art u l-assi fissi tagħhom.

(69)

Skont il-kriterju 4 il-kumpanija ma setatx turi li l-liġi tal-proprjetà applikat għal din il-kumpanija peress li ma setatx tipprovdi evidenza rigward il-bidla ta' sjieda peress li kumpanija twaqqfet fl-2010.

(70)

Taħt il-kriterju 5, il-kumpanija ma setgħetx turi fil-kontijiet tagħha li kienet qed tikkonverti muniti barranin bir-rata tas-suq.

(71)

Il-Kummissjoni żvelat is-sejbiet lill-produttur esportatur ikkonċernat, lill-awtoritajiet tal-pajjiż ikkonċernat u lill-industrija tal-Unjoni. Il-partijiet interessati kellhom l-opportunità jikkummentaw dwar is-sejbiet u jitolbu seduta mal-Kummissjoni u/jew mal-Uffiċjal tas-Seduta fi proċedimenti kummerċjali. Il-Kummissjoni kkunsidrat il-fehmiet ippreżentati. Il-Kummissjoni infurmat lill-partijiet interessati bid-determinazzjoni TES finali.

(72)

Wara l-iżvelar tas-sejbiet TES, ma daħlu l-ebda kummenti mill-partijiet interessati. Il-konklużjoni li tiġi rrifjutata l-pretensjoni ta' Lisheng għalhekk baqgħet mhux mibdula.

(73)

Skont l-Artikolu 2(7)(a) tar-Regolament bażiku, il-valur normali kien determinat abbażi tal-prezz jew il-valur maħdum f'pajjiż terz b'ekonomija tas-suq għall-produtturi esportaturi li ma ngħatawx TES. Għal dan il-għan, kellu jintgħażel pajjiż terz b'ekonomija tas-suq.

(74)

Minbarra l-Indja, l-Istati Uniti tal-Amerka, in-Norveġja, it-Turkija u l-Iran, li kienu msemmija fin-Notifika ta' Bidu, il-Kummissjoni ppruvat tidentifika produtturi tal-prodott ikkonċernat fil-Brażil u fil-Korea. Abbażi tal-informazzjoni riċevuta, il-Kummissjoni talbet lil għaxar produtturi magħrufa tal-prodott simili biex jipprovdu informazzjoni. Żewġ produtturi fl-Istati Uniti tal-Amerika u produttur wieħed fin-Norveġja wieġbu għall-kwestjonarju tal-pajjiżi analogi. Barra minn hekk, il-Kummissjoni kkunsidrat l-informazzjoni miksuba mit-tliet produtturi Indjani fil-kampjun.

(75)

Is-sitwazzjoni tal-Indja ġiet eżaminata għall-ewwel darba skont l-Artikolu 2(7)(a) tar-Regolament bażiku li jistipula li “fejn xieraq, għandu jiġi użat pajjiż terz b'ekonomija tas-suq li huwa soġġett għall-istess investigazzjoni”. Fin-Notifika ta' Bidu, il-Kummissjoni għalhekk kienet infurmat lill-partijiet interessati li b'mod provviżorju kienet għażlet lill-Indja bħala pajjiż analogu xieraq u kienet stiednet lill-partijiet interessati jikkummentaw.

(76)

Is-CCCME u l-assoċjazzjoni tal-importaturi mhux relatati saħqet li t-taqsima 15 tal-Protokoll ta' Adeżjoni tar-RPĊ mad-WHO kienet skadiet wara l-11 ta' Diċembru 2016. Għaldaqstant, l-għażla ta' pajjiż analogu ma kinitx għadha ġġustifikata u li l-Kummissjoni għandha tuża l-prezzijiet u l-kostijiet domestiċi tal-produtturi biex tistabbilixxi l-eżistenza ta' dumping. F'dan ir-rigward, il-Kummissjoni nnotat li wieħed biss mill-ħames produtturi esportaturi fil-kampjun tabilħaqq ipprovda informazzjoni dwar il-prezzijiet u l-kostijiet domestiċi. F'kull każ, il-Kummissjoni fakkret li, konformi mal-Artikolu 2(7) tar-Regolament bażiku, il-valur normali kien determinat abbażi ta' data minn pajjiż analogu. Għaldaqstant, din id-dikjarazzjoni ġiet irrifjutata.

(77)

L-ilmentatur tenna l-oppożizzjoni tiegħu għall-għażla tal-Indja bħala pajjiż analogu. L-ilmentatur argumenta li l-għażla tal-Indja ma kinitx xierqa minħabba evidenza prima facie ta' dumping, allegata differenza fil-proċessi ta' produzzjoni bejn il-produtturi fl-Indja u fir-RPĊ, allegati skemi ta' sussidji għall-esportazzjoni u distorsjonijiet tas-suq li jaffettwaw il-prezz tal-mineral tal-ħadid.

(78)

Il-Kummissjoni eżaminat id-dikjarazzjoni li l-Indja ma kinitx għażla xierqa minħabba evidenza prima facie ta' dumping. Il-Kummissjoni nnotat li evidenza prima facie ma tagħti l-ebda indikazzjoni dwar il-valur normali iżda dwar id-differenza potenzjali bejn il-valur normali u l-prezz tal-esportazzjoni fl-Indja. Barra minn hekk, l-investigazzjoni ma kkonfermatx l-allegazzjoni ta' dumping tal-prodott ikkonċernat fl-Indja. Għaldaqstant, din id-dikjarazzjoni ġiet irrifjutata.

(79)

Il-Kummissjoni eżaminat id-dikjarazzjoni li l-Indja ma kinitx għażla xierqa għax il-produtturi fir-RPĊ allegatament kienu awtomatizzaw il-linji ta' produzzjoni tagħhom u użaw teknoloġiji li kienu aktar simili għal dawk użati mill-produtturi fir-Renju Unit u fin-Norveġja. Il-verifiki fuq il-post li saru mill-Kummissjoni wrew li l-produtturi fl-Indja u fir-RPĊ kienu bdew jawtomatizzaw il-linji ta' produzzjoni tagħhom iżda l-produzzjoni globali fil-biċċa l-kbira baqgħet manwali fiż-żewġ pajjiżi. Għalhekk, il-Kummissjoni ma sabitx evidenza tad-differenza allegata fil-proċessi ta' produzzjoni. Għaldaqstant, din id-dikjarazzjoni ġiet irrifjutata.

(80)

Il-Kummissjoni eżaminat id-dikjarazzjoni li l-għażla tal-Indja ma kinitx xierqa minħabba allegati sussidji tal-esportazzjoni. Il-Kummissjoni nnotat li s-sussidji tal-esportazzjoni huma relatati b'mod dirett mal-prezzijiet tal-esportazzjoni, u mhux mal-valur normali, u l-ilmentatur ma ta l-ebda evidenza li dawn jaffettaw il-livell tal-valur normali. Għaldaqstant, din id-dikjarazzjoni ġiet irrifjutata.

(81)

Il-Kummissjoni eżaminat id-dikjarazzjoni li l-għażla tal-Indja ma kinitx xierqa minħabba l-eżistenza ta' distorsjonijiet tas-suq li jaffettwaw il-prezz tal-mineral tal-ħadid. Il-Kummissjoni, matul l-investigazzjoni tagħha, stabbilixxiet li l-produtturi Indjani fil-kampjun użaw ħadid fondut grezz u mhux mineral tal-ħadid. Barra minn hekk, l-effett potenzjali tad-distorsjonijiet tas-suq fuq il-mineral tal-ħadid fuq prodotti downstream bħall-ħadid fondut grezz u l-prodott ikkonċernat ma setax jiġi evidenzjat fi ħdan il-qafas ta' din l-investigazzjoni. Għaldaqstant, din id-dikjarazzjoni ġiet irrifjutata.

(82)

Il-Kummissjoni fakkret li l-Indja ntużat bħala pajjiż analogu fil-kuntest tal-proċediment anti-dumping li wassal għall-impożizzjoni ta' dazju anti-dumping fuq importazzjonijiet tal-prodott ikkonċernat li oriġina fir-RPĊ fl-2005. L-Indja u r-RPĊ igawdu livelli simili ta' żvilupp ekonomiku. Kif rikonoxxut mis-CCCME, mill-assoċjazzjoni ta' importaturi mhux relatati u mill-ilmentatur, l-Indja għandha bejgħ domestiku rappreżentattiv. Il-livell ta' kompetizzjoni fis-suq domestiku huwa għoli.

(83)

B'hekk, f'dan l-istadju, il-Kummissjoni kkonkludiet li l-Indja hija pajjiż analogu xieraq skont l-Artikolu 2(7)(a) tar-Regolament bażiku.

(84)

L-informazzjoni riċevuta mingħand il-produtturi kooperattivi fil-pajjiż analogu intużat bħala bażi sabiex jiġi ddeterminat il-valur normali għall-produtturi esportaturi li ma ngħatawx TES, skont l-Artikolu 2(7)(a) tar-Regolament bażiku.

(85)

Il-Kummissjoni l-ewwel eżaminat jekk il-volum totali tal-bejgħ domestiku għal kull produttur esportatur fil-kampjun kienx rappreżentattiv, skont l-Artikolu 2(2) tar-Regolament bażiku. Il-bejgħ domestiku jkun rappreżentattiv jekk il-volum totali tal-bejgħ domestiku tal-prodott simili għall-klijenti indipendenti fis-suq domestiku fil-pajjiż analogu jkun jirrappreżenta tal-anqas 5 % tal-volum totali tal-bejgħ b'esportazzjoni tal-prodott ikkonċernat lejn l-Unjoni ta' kull produttur esportatur matul il-perjodu ta' investigazzjoni. Abbażi ta' dan, il-bejgħ totali tal-prodott simili fis-suq domestiku tal-pajjiż analogu kien rappreżentattiv.

(86)

Il-Kummissjoni identifikat it-tipi ta' prodotti manifatturati u mibjugħa f'livell domestiku mill-produtturi Indjani fil-kampjun li kienu identiċi jew komparabbli għat-tipi tal-prodott mibjugħa għall-esportazzjoni lejn l-Unjoni għall-produtturi esportaturi.

(87)

Xi tipi ta' prodotti esportati mir-RPĊ lejn l-Unjoni ma setgħux jitqabblu mat-tipi ta' prodotti prodotti fil-pajjiż analogu. F'istanzi bħal dawn, il-Kummissjoni ddeterminat il-valuri normali billi kkalkolat valur normali medju ponderat għat-tipi ta' prodotti kollha li użaw l-istess materja prima (ħadid duttili jew griż).

(88)

Il-valur normali ġie ddeterminat mod ieħor abbażi ta' medja ponderata għal kull tip ta' prodott tal-valuri normali kkalkolati għal kull wieħed mill-produtturi Indjani fil-kampjun kif stabbilit fil-premessi (99) sa (102).

(89)

Il-produtturi esportaturi fil-kampjun esportaw lejn l-Unjoni direttament lil klijenti indipendenti. Il-prezz tal-esportazzjoni kien il-prezz attwalment imħallas jew li jista' jitħallas għall-prodott ikkonċernat meta mibjugħ għall-esportazzjoni lejn l-Unjoni, skont l-Artikolu 2(8) tar-Regolament bażiku.

(90)

Il-Kummissjoni pparagunat il-valur normali u l-prezz tal-esportazzjoni tal-produtturi esportaturi fil-kampjun fuq bażi ta' kif joħroġ mill-fabbrika.

(91)

Fejn iġġustifikat mill-ħtieġa li jkun żgurat paragun ġust, il-Kummissjoni aġġustat il-valur normali u/jew il-prezz tal-esportazzjoni għad-differenzi li jaffettwaw il-prezzijiet u l-komparabilità tal-prezzijiet, skont l-Artikolu 2(10) tar-Regolament bażiku. Saru aġġustamenti għat-trasport (bejn 1 % u 5 %, skont id-data rrapportata minn u vverifikata għall-kumpanija inkwistjoni), l-assigurazzjoni (bejn 0 u 0,2 %, skont id-data rrapportata minn u vverifikata għall-kumpanija inkwistjoni), l-immaniġġjar, it-tagħbija u l-ispejjeż anċillari (bejn 0,2 % u 2,5 %, skont id-data rrapportata minn u vverifkata għall-kumpanija inkwistjoni), l-imballaġġ (bejn 0 u 3 %, skont id-data rrapportata minn u vverifikata għall-kumpanija inkwistjoni), il-kreditu (bejn 0 u 1 %, skont id-data rrapportata minn u vverifikata għall-kumpanija inkwistjoni), u kumissjonijiet tal-bank (bejn 0,1 % u 0,2 %, skont id-data rrapportata minn u vverifikata għall-kumpanija inkwistjoni).

(92)

Għall-produtturi esportaturi fil-kampjun, il-Kummissjoni pparagunat il-valur normali medju ponderat ta' kull tip ta' prodott simili fil-pajjiż analogu (ara l-premessi (86) sa (88) hawn fuq) mal-prezz tal-esportazzjoni medju ponderat tat-tip korrispondenti tal-prodott ikkonċernat, skont l-Artikolu 2(11) u (12) tar-Regolament bażiku.

(93)

Fuq din il-bażi, il-marġnijiet ta' dumping medji ponderati provviżorji, mfissra bħala perċentwal tal-prezz CIF fil-fruntiera tal-Unjoni, bid-dazju mhux imħallas, huma kif ġej:

Tabella 1

Kampjun tal-marġni tad-dumping

(94)

Għall-produtturi esportaturi kooperattivi mhux inklużi fil-kampjun, il-Kummissjoni kkalkolat il-marġni tad-dumping medju ponderat, skont l-Artikolu 9(6) tar-Regolament bażiku.

(95)

Abbażi ta' dan, il-marġini tad-dumping provviżorju tal-produtturi esportaturi kooperattivi mhux fil-kampjun huwa ta' 33,1 %.

(96)

Għall-produtturi esportaturi l-oħrajn kollha fir-RPĊ, il-Kummissjoni stabbilixxiet il-marġini tad-dumping abbażi tal-fatti disponibbli skont l-Artikolu 18 tar-Regolament bażiku. Għal dan il-għan, il-Kummissjoni ddeterminat il-livell ta' kooperazzjoni tal-produtturi esportaturi. Il-livell ta' kooperazzjoni huwa l-volum ta' esportazzjonijiet tal-produtturi esportaturi kooperattivi lejn l-Unjoni mfisser bħala proporzjon tal-volum totali ta' esportazzjoni — kif irrapportat fl-istatistika tal-importazzjonijiet tal-Eurostat — mill-pajjiż ikkonċernat lejn l-Unjoni.

(97)

Il-livell ta' kooperazzjoni huwa għoli minħabba l-fatt li l-importazzjonijiet tal-produtturi esportaturi li kkooperaw kienu jikkostitwixxu madwar 60 % tal-esportazzjonijiet totali lejn l-Unjoni matul il-perjodu tal-investigazzjoni u l-industrija tal-prodott ikkonċernat wriet li hija frammentata għall-aħħar b'total ta' tmienja u sebgħin produttur esportatur jersqu 'l quddiem matul l-eżerċizzju tal-kampjunar. Abbażi ta' dan, il-Kummissjoni ddeċidiet li tibbaża l-marġni tad-dumping għall-kumpaniji l-oħrajn kollha fil-livell tal-ogħla marġni ta' dumping tal-kumpaniji fil-kampjun.

(98)

Il-marġnijiet provviżorji tad-dumping mfissra bħala perċentwal tal-prezz CIF fil-fruntiera tal-Unjoni, bid-dazju mhux imħallas, huma kif ġej:

Tabella 2

Marġni tad-dumping kollu

(99)

Il-Kummissjoni vverifikat tliet kumpaniji/gruppi ta' produtturi esportaturi Indjani. Grupp wieħed jikkonsisti minn produttur u kumpanija relatata, l-ieħor minn żewġ produtturi esportaturi.

(100)

Il-Kummissjoni l-ewwel eżaminat jekk il-volum totali ta' bejgħ domestiku ta' kull wieħed mit-tliet produtturi esportaturi kienx rappreżentattiv, skont l-Artikolu 2(2) tar-Regolament bażiku. Il-bejgħ domestiku jkun rappreżentattiv jekk it-total tal-volum tal-bejgħ domestiku tal-prodott simili lill-klijenti indipendenti fis-suq domestiku għal kull produttur esportatur ikun jirrappreżenta mill-anqas 5 % tal-volum totali tal-bejgħ għall-esportazzjoni tiegħu tal-prodott ikkonċernat lejn Unjoni matul il-perjodu tal-investigazzjoni.

(101)

Ħlief għal tip ta' prodott wieħed mibjugħ minn produttur esportatur wieħed biss li għalih il-Kummissjoni użat il-prezz fl-andament normali tal-kummerċ, it-tipi l-oħra kollha tal-prodott tat-tliet gruppi ta' produtturi esportaturi ma nbigħux fi kwantitajiet rappreżentattivi fis-suq domestiku. Għalhekk, il-Kummissjoni fasslet il-valur normali għal kull tip ta' prodott minbarra wieħed f'konformità mal-Artikolu 2(3) u (6) tar-Regolament bażiku.

(102)

Il-valur normali tfassal billi ingħadd dan li ġej mal-kost medju tal-produzzjoni tal-prodott simili tal-produtturi esportaturi fil-kampjun matul il-perjodu ta' investigazzjoni:

(103)

Il-gruppi ta' produtturi esportaturi fil-kampjun esportaw direttament lejn l-Unjoni lil klijenti indipendenti. Għalhekk, il-prezz tal-esportazzjoni kien il-prezz li verament tħallas jew kien pagabbli għall-prodott ikkonċernat meta jinbiegħ għall-esportazzjoni lejn l-Unjoni, skont l-Artikolu 2(8) tar-Regolament bażiku.

(104)

Il-Kummissjoni qabblet il-valur normali u l-prezz tal-esportazzjoni tal-gruppi ta' produtturi esportaturi fil-kampjun fuq il-bażi tal-prezz mill-fabbrika.

(105)

Fejn iġġustifikat mill-ħtieġa li jkun żgurat paragun ġust, il-Kummissjoni aġġustat il-valur normali u/jew il-prezz tal-esportazzjoni għad-differenzi li jaffettwaw il-prezzijiet u l-komparabilità tal-prezzijiet, skont l-Artikolu 2(10) tar-Regolament bażiku. Saru aġġustamenti għat-trasport (bejn 0 u 4,4 %, skont id-data rrapportata minn u vverifikata għall-kumpanija inkwistjoni), l-assigurazzjoni (bejn 0 u 0,04 %, skont id-data rrapportata minn u vverifikata għall-kumpanija inkwistjoni), l-immaniġġjar, it-tagħbija u l-ispejjeż anċillari (bejn 0,1 % u 1,8 %, skont id-data rrapportata minn u vverifkata għall-kumpanija inkwistjoni), l-imposti fuq l-immaniġġjar, il-merkanzija u l-importazzjonijiet fl-Unjoni (bejn 0 u 0,4 %, skont id-data rrapportata minn u vverifikata għall-kumpanija inkwistjoni), il-kost tal-kreditu (bejn 0,3 % u 1,5 %, skont id-data rrapportata minn u vverifikata għall-kumpanija inkwistjoni), l-ispejjeż tal-imballaġġ (bejn 1,3 % u 2,4 % skont id-data rrapportata minn u vverifikata għall-kumpanija inkwistjoni), il-kummissjonijiet tal-bank (bejn 0 u 0,2 %, skont id-data rrapportata minn u vverifikata għall-kumpanija inkwistjoni, provvedimenti oħra (bejn 0 u 0,4 % skont id-data rrapportata minn u vverfikata għall-kumpanija inkwistjoni) u kummissjonijiet (bejn 0 u 6,5 %, skont id-data rrapportata minn u vverifikata għall-kumpanija inkwistjoni).

(106)

Għall-gruppi ta' produtturi esportaturi fil-kampjun, il-Kummissjoni pparagunat il-valur normali medju ponderat ta' kull tip ta' prodott simili mal-prezz tal-esportazzjoni medju ponderat tat-tip korrispondenti tal-prodott ikkonċernat, skont l-Artikoli 2(11) u (12) tar-Regolament bażiku.

(107)

Abbażi ta' dan, il-Kummissjoni b'mod provviżorju ma sabet l-ebda dumping għall-gruppi ta' produtturi esportaturi fl-Indja fil-kampjun. B'konsegwenza, il-Kummissjoni ma stabbilixxiet l-ebda dumping provviżorju għall-produtturi esportaturi li kkooperaw barra l-kampjun, f'konformità mal-Artikolu 9(6) tar-Regolament bażiku, u l-ebda dumping provviżorju għall-produtturi esportaturi l-oħra kollha fl-Indja peress li l-esportazzjonijiet tal-produtturi esportaturi Indjani li kkooperaw jirrappreżentaw volum għoli ħafna (madwar 85 %) tal-esportazzjonijiet Indjani totali lejn l-Unjoni.

(108)

Fil-bidu tal-perjodu kkunsidrat, 24 produttur immanifatturaw il-prodott simili fl-Unjoni. Erbgħa minnhom waqqfu l-produzzjoni tagħhom matul il-perjodu kkunsidrat, u dan ħalla 20 produttur fl-Unjoni matul il-perjodu ta' investigazzjoni. Huma jikkostitwixxu l-“industrija tal-Unjoni” skont it-tifsira tal-Artikolu 4(1) tar-Regolament bażiku.

(109)

L-assoċjazzjoni tal-importaturi argumentat li sitt produtturi tal-Unjoni ma kinux inklużi fil-lista tal-produtturi tal-Unjoni. L-ilmentaturi saħqu li tnejn minn dawn il-produtturi ma pproduċewx il-prodott ikkonċernat, prodottur wieħed falla qabel il-perjodu kkunsidrat, il-produzzjoni ta' produttur wieħed kienet diġà inkluża fil-lista, u l-ilmentaturi ma kellhomx l-informazzjoni kollha għal produttur wieħed. Għalhekk l-ilmentaturi inkludew produttur tal-Unjoni wieħed addizzjonali fil-lista tal-produtturi tal-Unjoni, rifless fin-numru totali ta' produtturi fil-premessa preċedenti.

(110)

Abbażi tal-informazzjoni kollha disponibbli rigward l-industrija tal-Unjoni, bħall-ilment, tweġibiet tal-kwestjonarju vverifikati mill-produtturi tal-Unjoni fil-kampjun u preżentazzjonijiet ivverifikati mill-ilmentaturi, il-Kummissjoni stabbilixxiet il-produzzjoni totali tal-Unjoni matul il-perjodu ta' investigazzjoni għal madwar 360 elf tunnellata.

(111)

Kif indikat fil-premessa (13), tliet produtturi tal-Unjoni intgħażlu fil-kampjun u jirrappreżentaw 48 % tat-total tal-produzzjoni tal-Unjoni u 43 % tal-bejgħ totali tal-Unjoni tal-prodott simili.

(112)

Il-Kummissjoni stabbilixxiet il-konsum tal-Unjoni abbażi tad-data dwar l-importazzjoni tal-Eurostat, preżentazzjonijiet ivverifikati mill-ilmentaturi, u d-data ivverifikata dwar il-bejgħ mill-produtturi tal-Unjoni fil-kampjun.

(113)

Il-konsum tal-Unjoni ta' oġġetti tal-ħadid fondut żviluppa kif ġej:

Tabella 3

Il-konsum tal-Unjoni (MT)

(114)

Il-konsum tal-Unjoni kontinwament naqas bi 8 % matul il-perjodu kkunsidrat. Is-suq ta' oġġetti ta' ħadid fondut jiddependi fuq id-domanda primarjament influwenzata mis-setturi tad-drenaġġ u tal-ilma li jiddependu fuq l-iżvilupp ekonomiku globali fl-Unjoni.

(115)

Il-Kummissjoni eżaminat jekk l-importazzjonijiet tal-oġġetti tal-ħadid fondut li joriġinaw mill-pajjiżi kkonċernati għandhomx jiġu vvalutati b'mod kumulattiv, skont l-Artikolu 3(4) tar-Regolament bażiku.

(116)

Peress li b'mod provviżorju ma nstab li jeżisti l-ebda dumping għall-Indja, il-Kummissjoni kkunsidrat li l-effett ta' dawk l-importazzjonijiet ma jistax jiġi vvalutat flimkien mal-importazzjonijiet li huma l-oġġett ta' dumping mir-RPĊ.

(117)

Il-Kummissjoni stabbilixxiet il-volum tal-importazzjonijiet fuq il-bażi tad-data tal-Eurostat. Is-sehem mis-suq tal-importazzjonijiet ġie stabbilit billi tqabblu l-volumi tal-importazzjonijiet mal-konsum tal-Unjoni kif muri fit-tabella 3 tal-premessa (113).

(118)

L-importazzjonijiet ta' oġġetti ta' ħadid fondut mir-RPĊ lejn l-Unjoni żviluppaw kif ġej:

Tabella 4

Il-volum tal-importazzjonijiet (MT) u s-sehem mis-suq

(119)

Il-volum tal-importazzjonijiet mir-RPĊ lejn l-Unjoni żdied b'16 % matul il-perjodu kkunsidrat. Wara żieda ta' 24 % bejn l-2013 u l-2014, l-importazzjonijiet mir-RPĊ naqsu b'mod kostanti fl-2015 b'4 punti perċentwali u b'4 punti perċentwali oħra fil-perjodu ta' investigazzjoni.

(120)

B'mod parallel, is-sehem mis-suq tal-Unjoni li kellhom l-importazzjonijiet mir-RPĊ żdied minn 21,7 % fl-2013 għal 27,3 % fil-perjodu tal-investigazzjoni.

(121)

Is-CCCME esprimiet it-tħassib tagħha rigward l-affidabilità tad-data dwar l-importazzjoni. Hi argumentat li l-ilmentaturi bbażaw fuq data mill-Eurostat, li ma tikkorrispondix bis-sħiħ għad-definizzjoni tal-prodott ikkonċernat.

(122)

Il-Kummissjoni tinnota li fl-ilment, l-ilmentaturi spjegaw il-metodu tagħhom biex jaslu għad-data dwar l-importazzjoni limitata għall-prodott ikkonċernat bl-użu tad-data tal-Eurostat. Fin-nuqqas ta' metodu u data aktar affidabbli, il-Kummissjoni bbażat id-determinazzjoni tal-volum ta' importazzjoni tal-prodott ikkonċernat mir-RPĊ fuq dan il-metodu bl-użu ta' data tal-Eurostat esklużi l-ispralli tal-kanali. Barra minn hekk, is-CCCME ma provdiet l-ebda data alternattiva. Għaldaqstant, din il-pretensjoni ġiet irrifjutata.

(123)

Il-Kummissjoni stabbilixxiet il-prezzijiet tal-importazzjonijiet abbażi tad-data tal-Eurostat.

(124)

Il-prezz medju tal-importazzjonijiet fl-Unjoni mir-RPĊ żviluppa kif ġej:

Tabella 5

Prezzijiet tal-importazzjoni (EUR/tunnellata)

(125)

Il-prezzijiet medji tal-importazzjoni mir-RPĊ żdiedu b'4 % matul il-perjodu kkunsidrat. Wara żieda ta' 15 % mill-2013 sal-2015 kien hemm tnaqqis qawwi ta' 11-il punt perċentwali bejn l-2015 u l-perjodu ta' investigazzjoni.

(126)

Peress li din id-data hija bbażata fuq statistika tal-importazzjonijiet u l-komponenti dettaljati tat-tip ta' prodott mhumiex magħrufa, l-evoluzzjoni tal-prezzijiet mhijiex kompletament affidabbli.

(127)

Il-Kummissjoni ddeterminat it-twaqqigħ tal-prezz matul il-perjodu ta' investigazzjoni billi qabblet:

(128)

Il-Kummissjoni qabblet il-prezzijiet fuq il-bażi ta' tip b'tip għal tranżazzjonijiet fl-istess livell ta' kummerċ, aġġustati kif xieraq fejn meħtieġ, u wara tnaqqis ta' ribassi u skontijiet. Ir-riżultat tat-tqabbil ingħata bħala perċentwal tal-fatturat tat-tliet produtturi tal-Unjoni fil-kampjun matul il-perjodu tal-investigazzjoni. Wera marġnijiet ta' twaqqigħ tal-prezz li jvarjaw minn 35,4 % sa 42,7 %.

(129)

F'konformità mal-Artikolu 3(5) tar-Regolament bażiku, l-analiżi tal-impatt tal-importazzjonijiet li huma l-oġġett ta' dumping fuq l-industrija tal-Unjoni kienet tinkludi evalwazzjoni tal-indikaturi ekonomiċi kollha li kellhom effett fuq l-istat tal-industrija tal-Unjoni matul il-perjodu kkunsidrat.

(130)

Kif imsemmi fil-premessa (12), intuża l-kampjunar għad-determinazzjoni tad-dannu possibbli li ġarrbet l-industrija tal-Unjoni.

(131)

Għad-determinazzjoni tad-dannu, il-Kummissjoni għamlet distinzjoni bejn l-indikaturi ta' dannu makroekonomiku u mikroekonomiku.

(132)

Il-Kummissjoni evalwat l-indikaturi makroekonomiċi (il-produzzjoni, il-kapaċità tal-produzzjoni, l-użu tal-kapaċità, il-volum tal-bejgħ, is-sehem mis-suq, l-impjiegi, it-tkabbir, il-produttività u d-daqs tal-marġnijiet tad-dumping u l-irkupru mid-dumping fl-imgħoddi) abbażi tal-informazzjoni pprovduta mill-ilmentaturi u l-produtturi tal-Unjoni. Id-data kienet tirrigwarda l-produtturi kollha tal-Unjoni.

(133)

L-assoċjazzjoni tal-importaturi mhux relatati argumentat li l-indikaturi makroekonomiċi juru sitwazzjoni pożittiva u stabbli fl-industrija tal-Unjoni b'mod ġenerali. Id-data tirrifletti tnaqqis globali fid-domanda Ewropea għall-prodott taħt investigazzjoni, li m'għandux jiġi attribwit għall-importazzjonijiet mir-RPĊ u mill-Indja.

(134)

Il-Kummissjoni vverifikat l-indikaturi makroekonomiċi li ngħataw mill-ilmentaturi. Id-data għall-industrija tal-Unjoni kollha kemm hi kienet ibbażata fuq data vera għall-ilmentaturi u produtturi ta' appoġġ u stimi verifikati provduti mill-ilmentaturi rigward il-bqija tal-industrija tal-Unjoni.

(135)

Abbażi ta' dan, il-Kummissjoni kkunsidrat li s-sett ta' data makroekonomika huwa rappreżentattiv tas-sitwazzjoni ekonomika tal-industrija tal-Unjoni.

(136)

Il-Kummissjoni evalwat l-indikaturi mikroekonomiċi (prezzijiet medji tal-bejgħ ta' kull unità, il-kostijiet lavorattivi, il-kost tal-unità, l-inventarji, u r-redditu fuq l-investimenti) abbażi tad-data fit-tweġibiet tal-kwestjonarju mill-produtturi tal-Unjoni fil-kampjun, verifikati kif xieraq. Id-data relatata mal-produtturi tal-Unjoni fil-kampjun.

(137)

Matul il-perjodu inkunsiderazzjoni, il-produzzjoni, il-kapaċità tal-produzzjoni u l-użu tal-kapaċità totali tal-Unjoni żviluppaw kif ġej:

Tabella 6

Produzzjoni, kapaċità tal-produzzjoni u użu tal-kapaċità

(138)

Il-volum tal-produzzjoni tal-industrija tal-Unjoni naqas b'4 % matul il-perjodu kkunsidrat. Wara żieda żgħira bejn l-2013 u l-2014, il-volum tal-produzzjoni naqas fl-2015 b'7 punti perċentwali sabiex baqa' stabbli fil-perjodu ta' investigazzjoni.

(139)

It-tnaqqis fil-volum tal-produzzjoni bejn l-2014 u l-perjodu ta' investigazzjoni kien xprunat mit-tnaqqis sinifikanti fil-konsum kif irrapportat fit-Tabella 3 tal-premessa (113) kif ukoll miż-żieda fil-volum ta' importazzjonijiet li huma l-oġġett ta' dumping mir-RPĊ.

(140)

Iċ-ċifri tal-kapaċità tal-produzzjoni rrapportati tal-industrija tal-Unjoni jirreferu għall-kapaċità teknika, li timplika li ttieħdu inkunsiderazzjoni l-aġġustamenti, meqjusin bħala standards mill-industrija, għaż-żmien meħtieġ għall-istabbiliment, il-manutenzjoni, l-ostakoli u perjodi normali oħrajn ta' waqfien.

(141)

Abbażi ta' dan, il-kapaċità ta' produzzjoni naqset mill-2013 għall-2015 b'5 punti perċentwali, u wara kien hemm żieda żgħira ta' 1 punt perċentwal.

(142)

Peress li l-volum ta' produzzjoni u l-kapaċità ta' produzzjoni jsegwu bejn wieħed u ieħor l-istess tendenza ta' tnaqqis, l-użu tal-kapaċità jibqa' stabbli matul il-perjodu kkunsidrat. B'mod ġenerali, l-użu tal-kapaċità baqa' f'livelli baxxi ħafna matul il-perjodu kkunsidrat.

(143)

Matul il-perjodu inkunsiderazzjoni, il-volum tal-bejgħ u s-sehem mis-suq tal-industrija tal-Unjoni żviluppaw kif ġej:

Tabella 7

Il-volum tal-bejgħ u s-sehem mis-suq

(144)

Il-volum ta' bejgħ tal-industrija tal-Unjoni naqas bi 11 % matul il-perjodu kkunsidrat.

(145)

Simili għall-iżvilupp tal-volum tal-produzzjoni, it-tnaqqis fil-kwantità ta' bejgħ bejn l-2014 u l-perjodu ta' investigazzjoni kien xprunat mit-tnaqqis fil-konsum fis-suq tal-Unjoni spjegat fil-premessa (113) kif ukoll miż-żieda fil-volum ta' importazzjonijiet li huma oġġetti ta' dumping mir-RPĊ.

(146)

Minħabba ż-żieda fl-importazzjonijiet mir-RPĊ f'suq b'konsum li qed jonqos, is-sehem mis-suq tal-industrija tal-Unjoni naqas bi 3 %.

(147)

Il-konsum tal-Unjoni naqas b'mod gradwali mill-2013 sal-perjodu ta' investigazzjoni bi 8 % jew kważi 46 000 tunnellata. Dan it-tnaqqis għandu impatt negattiv fuq is-sitwazzjoni tal-bejgħ u l-kwantitajiet tal-produzzjoni tal-industrija tal-Unjoni.

(148)

Matul il-perjodu inkunsiderazzjoni, l-impjiegi u l-produttività żviluppaw kif ġej:

Tabella 8

L-impjiegi u l-produttività

(149)

L-industrija tal-Unjoni naqqset il-livell ta' impjiegi b'7 % matul il-perjodu kkunsidrat. Dan it-tnaqqis kien reazzjoni għat-tnaqqis ta' 4 % fil-volumi ta' produzzjoni kkawżati minn tnaqqis fid-domanda u l-kwantitajiet dejjem akbar ta' importazzjonijiet li huma l-oġġett ta' dumping mir-RPĊ.

(150)

Il-marġni tad-dumping mir-RPĊ huwa ferm ogħla mil-livell de minimis. L-impatt tad-daqs tal-marġnijiet attwali tad-dumping fuq l-industrija tal-Unjoni kien sostanzjali, meta jitqies il-volum u l-prezzijiet tal-importazzjonijiet mir-RPĊ.

(151)

Fl-2005, il-Kunsill impona dazji definittivi anti-dumping fuq l-importazzjonijiet ta' ċerti fundituri li joriġinaw fir-RPĊ (4). Dawn il-miżuri tħassru f'Settembru 2011 (5). Il-figuri miġbura matul l-investigazzjoni attwali jissuġġerixxu li fl-Unjoni matul il-perjodu kkunsidrat reġa' tfaċċa d-dumping.

(152)

Il-prezzijiet medji ponderati tal-bejgħ ta' unità tat-tliet produtturi tal-Unjoni fil-kampjun lill-klijenti mhux relatati fl-Unjoni żviluppaw kif ġej matul il-perjodu kkunsidrat:

Tabella 9

Il-prezzijiet tal-bejgħ fl-Unjoni

(153)

Il-prezzijiet medji tal-bejgħ tal-produtturi tal-Unjoni fil-kampjun naqsu kontinwament b'5 %, filwaqt li l-kost unitarju medju tal-produzzjoni naqas bi 3 % matul il-perjodu kkunsidrat.

(154)

Sabiex jillimitaw it-telf fis-sehem mis-suq u jikkompetu mal-importazzjonijiet li huma l-oġġett ta' dumping bi prezzijiet baxxi mir-RPĊ, il-produtturi tal-Unjoni kellhom inaqqsu l-prezz tal-bejgħ tagħhom. It-tnaqqis fil-prezz jaqbeż it-tnaqqis fil-kost tal-produzzjoni tagħhom, li primarjament irriżulta mit-tnaqqis fil-prezzijiet tal-materja prima matul il-perjodu kkunsidrat.

(155)

Il-kost lavorattiv medju tat-tliet produtturi tal-Unjoni fil-kampjun żviluppa kif ġej matul il-perjodu kkunsidrat:

Tabella 10

Kost lavorattiv medju għal kull impjegat

(156)

Il-kost lavorattiv medju għal kull impjegat żdied bi 3 fil-mija matul il-perjodu kkunsidrat.

(157)

Il-livelli tal-istokks tat-tliet produtturi tal-Unjoni fil-kampjun żviluppaw kif ġej matul il-perjodu kkunsidrat:

Tabella 11

Inventarji

(158)

Il-livell ta' stokkijiet tal-għeluq tat-tliet produtturi tal-Unjoni fil-kampjun żdied bi 12 % matul il-perjodu kkunsidrat. Din iż-żieda mill-2013 għall-2014 kienet ikkawżata miż-żieda fil-volum tal-produzzjoni, filwaqt li naqas il-bejgħ fis-suq tal-Unjoni.

(159)

Ir-raġuni ewlenija għaż-żieda fl-inventarji kienet li għalkemm l-industrija tal-Unjoni llimtat il-volumi ta' produzzjoni tagħha, il-volumi tal-bejgħ naqsu b'rata aktar mgħaġġla peress li l-industrija tal-Unjoni tilfet sehem mis-suq għall-importazzjonijiet Ċiniżi.

(160)

Il-profittabilità, il-fluss tal-flus, l-investimenti u r-redditu fuq l-investimenti tat-tliet produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 12

Profittabilità, fluss tal-flus, investimenti u redditu fuq l-investimenti

(161)

Il-Kummissjoni stabbilixxiet il-profittabilità tat-tliet produtturi tal-Unjoni fil-kampjun billi esprimiet il-profitt nett qabel it-taxxa tal-prodott simili għall-klijenti mhux relatati fl-Unjoni bħala perċentwal tal-fatturat ta' dak il-bejgħ.

(162)

L-industrija tal-Unjoni ħabtet wiċċha ma' tnaqqis gradwali fil-profitti matul l-aħħar għaxar snin. Filwaqt li l-profitabbiltà tal-produtturi tal-Unjoni kienet ta' madwar 10 % fl-2006, din kienet ta' biss 5,3 % fl-ewwel sena tal-perjodu kkunsidrat u baqgħet sejra lura matul il-perjodu kkunsidrat. Il-profitabbiltà tat-tliet kumpaniji fil-kampjun naqset b'41 % matul il-perjodu kkunsidrat.

(163)

Din it-tendenza negattiva kienet ikkawżata mit-tnaqqis fil-kwantità ta' bejgħ tal-industrija tal-Unjoni fis-suq tal-Unjoni bi prezzijiet jonqsu b'rata aktar mgħaġġla mill-kost tal-produzzjoni matul il-perjodu kkunsidrat.

(164)

Il-fluss tal-flus nett huwa l-kapaċità tal-produtturi tal-Unjoni li jiffinanzjaw l-attivitajiet tagħhom huma stess. Il-fluss tal-flus naqas b'38 % matul il-perjodu kkunsidrat. Wara t-tnaqqis ta' 56 % bejn l-2013 u l-2014, li kien influwenzat minn produzzjoni akbar meta mqabbel mal-2013 meta l-bejgħ kien qed jonqos, dan tjieb fl-2015. Minkejja dan, it-tendenza negattiva kompliet matul il-perjodu tal-investigazzjoni, bi tnaqqis relattivament żgħir.

(165)

L-investimenti huma l-valur kontabilistiku nett tal-assi. Huma naqsu b'mod kostanti bejn l-2013 u l-2015 bi tliet (3) punti perċentwali u mbagħad niżlu f'daqqa fil-perjodu ta' investigazzjoni b'ħames (5) punti perċentwali. Kumplessivament, fil-perjodu kkunsiderat, l-investimenti naqsu bi 8 %. Ir-redditu fuq l-investimenti huwa l-profitt f'perċentwal tal-valur kontabilistiku nett tal-investimenti li jirrifletti l-livell ta' deprezzament tal-assi. Il-profittabiltà naqset bi 12 % matul il-perjodu kkunsidrat. Wara tnaqqis stabbli mill-2013 għall-2015, li kien influwenzat minn tnaqqis sostanzjali fil-bejgħ, dan tjieb kemxejn fil-perjodu ta' investigazzjoni. Madankollu, dan l-indikatur minnu nnifsu mhux indikattiv tal-istat tal-industrija tal-Unjoni. L-assi tal-industrija tal-Unjoni huma kważi għal kollox deprezzati u għalhekk il-valur nett tal-assi huwa baxx, li jirriżulta f'redditu arifiċjalment għoli fuq l-investiment.

(166)

Il-prestazzjoni finanzjara dgħajfa tal-industrija tal-Unjoni bejn l-2013 u l-perjodu ta' investigazzjoni llimitat il-kapaċità tagħha li jinġabar kapital. L-industrija li tipproduċi ħadid fondut hija waħda ta' kapital intensiv u hija kkaratterizzata minn investimenti sostanzjali rikorrenti kull 15 sa 20 sena biex jiġu aġġornati l-magni neċessarji għall-proċess tal-produzzjoni. Il-faċilitajiet ta' produzzjoni tal-industrija tal-Unjoni qed jeqdiemu b'mod rapidu u l-industrija tal-Unjoni teħtieġ investimenti sinifikanti u fit-tul sabiex tkun tista' tkompli bl-operat tagħha. Ir-redittu fuq l-investiment matul il-perjodu kkunsidrat mhux suffiċjenti biex ikopri tali investimenti sostanzjali.

(167)

L-eżaminazzjoni tal-fatturi msemmija hawn fuq turi li bejn l-2013 u l-perjodu ta' investigazzjoni, l-industrija tal-Unjoni naqqset il-produzzjoni (– 4 %) u tilfet parti mis-sehem mis-suq tagħha. Matul il-perjodu kkunsidrat fallew erba' fonderiji tal-Unjoni.

(168)

Barra minn hekk, il-profittabilità tal-produtturi tal-Unjoni naqset kważi bin-nofs f'livell baxx ħafna bejn l-2013 u l-perjodu ta' investigazzjoni.

(169)

Apparti minn hekk, indikaturi oħra ta' dannu, bħall-kapaċità (– 4 %), il-volum tal-bejgħ fl-Unjoni (– 11 %), u l-impjiegi (– 7 %) żviluppaw b'mod negattiv matul il-perjodu kkunsidrat.

(170)

Abbażi ta' dan ta' hawn fuq, il-Kummissjoni kkonkludiet f'dan l-istadju li l-industrija tal-Unjoni ġarrbet dannu materjali skont it-tifsira tal-Artikolu 3(5) tar-Regolament bażiku.

(171)

F'konformità mal-Artikolu 3(6) tar-Regolament bażiku, il-Kummissjoni eżaminat jekk l-importazzjonijiet oġġett ta' dumping mir-RPĊ ikkawżawx dannu materjali lill-industrija tal-Unjoni. Skont l-Artikolu 3(7) tar-Regolament bażiku, il-Kummissjoni eżaminat ukoll jekk fatturi magħrufin oħrajn fl-istess ħin setgħux kienu ta' dannu lill-industrija tal-Unjoni.

(172)

Il-Kummissjoni żgurat li kull dannu possibbli kkawżat minn fatturi oħrajn barra l-importazzjonijiet oġġett ta' dumping mir-RPĊ ma kienx attribwit għall-importazzjonijiet oġġett ta' dumping. Dawn il-fatturi huma: importazzjonijiet minn pajjiżi terzi oħra, prestazzjoni tal-bejgħ mill-esportazzjonijiet tal-produtturi tal-Unjoni, it-tnaqqis fid-domanda, il-kompetizzjoni bejn il-produtturi tal-Unjoni, il-ġestjoni tal-industrija tal-Unjoni, u allegata segmentazzjoni fis-suq tal-Unjoni.

(173)

Il-prezzijiet ta' importazzjonijiet li huma l-oġġett ta' dumping mir-RPĊ b'mod sinifikanti jwaqqgħu l-prezzijiet tal-industrija tal-Unjoni matul il-perjodu ta' investigazzjoni b'marġnijiet tat-twaqqigħ tal-prezz li jvarjaw minn 35,4 % għal 42,7 % li wassal għal inqas sehem mis-suq u profitti għall-industrija tal-Unjoni (minn 5,3 % fl-2013 għal 3,1 % fil-perjodu ta' investigazzjoni). Fil-fatt, matul il-perjodu kkunsidrat, l-industrija tal-Unjoni tilfet 11 % tal-volum tal-bejgħ f'suq li naqas bi 8 % filwaqt li l-volum ta' importazzjoni mir-RPĊ żdied b'16 %.

(174)

B'mod ġenerali, matul il-perjodu kkunsidrat, it-telf mis-sehem tas-suq tal-industrija ta' 2,1 punti perċentwali ġie assorbit miż-żieda fis-sehem tas-suq ta' 5,6 punti perċentwali ta' importazzjonijiet dumped li joriġinaw fir-RPĊ.

(175)

Il-volum ta' importazzjonijiet minn pajjiżi terzi oħrajn żviluppa matul il-perjodu kkunsidrat kif ġej:

Tabella 13

Importazzjonijiet minn pajjiżi terzi

(176)

Il-volumi ta' importazzjoni minn pajjiżi oħra għajr ir-RPĊ naqsu b'27 % matul il-perjodu kkunsidrat, minn 102 759 tunnellata fl-2013 għal 75 471 tunnellata matul il-perjodu tal-investigazzjoni. Is-sehem tas-suq tagħhom naqas b'20 %. Il-biċċa l-kbira ta' dawn l-importazzjonijiet joriġinaw fl-Indja (61 % fil-perjodu ta' investigazzjoni). L-importazzjonijiet ta' pajjiżi terzi jammontaw għal madwar 34 % tal-importazzjonijiet kollha fl-Unjoni fil-perjodu ta' investigazzjoni, bl-importazzjonijiet mill-Indja jkunu madwar 21 % fil-perjodu ta' investigazzjoni.

(177)

Meta jiġu kkunsidrati l-volumi ta' importazzjonijiet mill-Indja, dawn żdiedu b'19 % matul il-perjodu kkunsidrat, minn 37 917-il tunnellata fl-2013 għal madwar 46 004 tunnellati fil-perjodu tal-investigazzjoni. Is-sehem mis-suq Indjan żdied bi 30 % minn 6,5 % fl-2013 għal 8,5 % fil-perjodu ta' investigazzjoni.

(178)

Matul il-perjodu kkunsidrat, ir-RPĊ kisbet sehem mis-suq parzjalment mill-industrija tal-Unjoni u parzjalment minn pajjiżi terzi għajr l-Indja, filwaqt li ma jistax jiġi eskluż li l-Indja żiedet is-sehem mis-suq tagħha tal-anqas parzjalment ukoll għad-detriment tal-industrija tal-Unjoni.

(179)

Barra minn hekk, il-prezzijiet ta' importazzjoni mill-Indja waqqgħu l-prezzijiet tal-industrija tal-Unjoni matul il-perjodu ta' investigazzjoni f'livelli simili għall-prezzijiet tal-importazzjonijiet Ċiniżi (minn 40 % għal 50 %). Abbażi tal-volum f'tunnellati, il-prezzjonijiet tal-importazzjoni Ċiniżi kienu bħala medja ogħla mill-prezzijiet Indjani matul il-perjodu kkunsidrat. Madankollu, din id-differenza fil-prezzijiet mhix indikattiva peress li t-taħlita tal-prodott fl-esportazzjonijiet Indjani u Ċiniżi hija differenti. Tabilħaqq, l-esportazzjonijiet Indjani lejn l-UE kienu l-aktar ta' ħadid griż filwaqt li l-esportazzjonijiet Ċiniżi kienu l-aktar ta' ħadid duttili. Minħabba l-fraġilità relattivament akbar tal-ħadid griż, huwa meħtieġ volum akbar ta' materjal fil-każ ta' prodotti ta' ħadid griż milli għal prodott magħmul minn ħadid duttili sabiex tkun tista' tintlaħaq presatazzjoni kumparabbli. Għalhekk, il-prodotti magħmula minn ħadid griż huma itqal, u dan iwassal għal livell simili ta' prezz għal kull biċċa mill-prodott ikkonċernat.

(180)

Peress li l-importazzjonijiet mill-Indja jwaqqgħu l-prezzijiet tal-industrija tal-Unjoni, huma kkontribwew għad-dannu materjali lill-industrija tal-Unjoni. Madankollu, għandhom volumi u sehem mis-suq ħafna anqas (8,5 % sehem mis-suq fil-perjodu ta' investigazzjoni, imqabbel ma' 27,3 % fir-RPĊ). B'mod partikolari, il-livell ta' importazzjonijiet matul il-perjodu ta' investigazzjoni mir-RPĊ (147 186 tunnellata matul il-perjodu ta' investigazzjoni) huwa ħafna aktar sinifikanti u aktar minn tliet darbiet ogħla mil-livell ta' importazzjonijiet mill-Indja matul il-perjodu ta' investigazzjoni (46 004 tunnellata matul il-perjodu ta' investigazzjoni). Konsegwentement, l-importazzjonijiet Indjani ma kisrux ir-rabta kawżali bejn l-importazzjonijiet li huma l-oġġett ta' dumping mir-RPĊ u d-dannu mġarrab mill-industrija tal-Unjoni, u ma setgħax kellu aktar minn effett marġinali fuq id-dannu tal-industrija tal-Unjoni.

(181)

Analiżi tad-data tal-Eurostat uriet li l-prezzijiet ta' importazzjoni minn pajjiżi oħra għajr l-Indja u mir-RPĊ żdiedu matul il-perjodu kkunsidrat u b'hekk laħqu livelli li huma ogħla mill-prezzijiet tal-industrija tal-Unjoni matul il-perjodu ta' investigazzjoni filwaqt li l-volumi ta' importazzjoni naqsu b'55 % matul il-perjodu kkunsidrat (minn 64 843 tunnellata għal 29 468 tunnellata) (6). Għalhekk, dawn l-importazzjonijiet ma setgħux ikkaġunaw dannu lill-industrija tal-Unjoni.

(182)

Il-Kummissjoni analizzat ukoll b'mod kumulattiv l-importazzjonijiet minn pajjiżi apparti r-RPĊ. Il-volum ta' importazzjonijiet naqas b'27 %, il-prezz medju żdied b'39 % u kien ogħla b'mod sinifikanti mill-prezzijiet tal-importazzjonijiet mir-RPĊ. Konsegwentement, l-importazzjonijiet mill-pajjiżi kollha barra r-RPĊ ma kisrux ir-rabta kawżali bejn l-importazzjonijiet li huma l-oġġett ta' dumping mir-RPĊ u d-dannu mġarrab mill-industrija tal-Unjoni, u ma setgħax kellu aktar minn effett marġinali fuq id-dannu tal-industrija tal-Unjoni.

(183)

Matul il-perjodu kkunsidrat il-volum tal-esportazzjonijiet tat-tliet produtturi tal-Unjoni fil-kampjun żviluppa kif ġej:

Tabella 14

Il-prestazzjoni tal-esportazzjoni tal-produtturi tal-Unjoni fil-kampjun

(184)

Fil-volum u fil-valur, l-esportazzjonijiet tal-produtturi tal-Unjoni lejn klijenti relatati u mhux relatati żdied matul il-perjodu kkunsidrat. Il-prezz medju tal-unità tal-esportazzjonijiet lejn klijenti mhux relatati jibqa' bil-ferm ogħla mill-prezz medju tal-unità tal-importazzjonijiet Ċiniżi. Għalhekk, il-bejgħ ta' esportazzjonijiet tal-industrija tal-Unjoni ma kienx ta' kontribut għall-profittabilità dgħajfa u l-użu tal-kapaċità baxxa tal-industrija tal-Unjoni. Abbażi ta' dan, il-Kummissjoni kkonkludiet li l-prestazzjoni ta' esportazzjoni tal-industrija tal-Unjoni ma kinitx ta' kontribut għad-dannu mġarrab.

(185)

L-assoċjazzjoni tal-importaturi argumentat li kwalunkwe dannu materjali allegat imġarrab mill-industrija tal-Unjoni huwa primarjament ikkawżat minn tnaqqis sostanzjali tal-esportazzjonijiet tal-Unjoni matul il-perjodu kkunsidrat.

(186)

Il-Kummissjoni nnotat li l-assoċjazzjoni tal-importaturi tirrikorri għall-Eurostat għar-raġunament tagħha. Kif spjegat fil-premessa (36), il-prodott ikkonċernat huwa ex kodiċi fl-Eurostat u għalhekk l-Eurostat ma tagħtix data għad-definizzjoni tal-prodott ikkonċernat.

(187)

Id-data vverifikata mill-produtturi tal-Unjoni wriet żieda fil-volum esportat tal-prodott taħt investigazzjoni, kif muri fit-tabella 14 fil-premessa (183).

(188)

L-assoċjazzjoni tal-importaturi ma pprovdiet l-ebda raġunament biex tirribatti d-data vverifikata kif ipprovduta mill-kumpaniji fil-kampjun u għalhekk it-talba ġiet irrifjutata.

(189)

L-assoċjazzjoni tal-importaturi argumentat li d-dannu mġarrab mill-industrija tal-Unjoni huwa relatat mas-swieq tal-kostruzzjoni, il-bini u l-inġinerija ċivili li għadhom ma rkuprawx kompletament mill-kriżi ekonomika. Barra minn hekk, il-prospett inċert tal-irtirar tar-Renju Unit mill-Unjoni ħoloq problemi lill-industrija tal-Unjoni. Madankollu, l-assoċjazzjoni tal-importaturi ma tatx evidenza konklużiva għal dawn id-dikjarazzjonijiet.

(190)

Barra minn hekk, l-industrija Indjana argumentat li l-ilmentaturi inizjalment ma wrewx evidenza ta' rabta diretta bejn l-għeluq ta' fonderiji tal-produtturi tal-Unjoni Aco, Dois Portos u EJ Access Systems u pressjoni minn importazzjonijiet li allegatament huma l-oġġett ta' dumping mir-RPĊ u l-Indja. Madankollu, dan l-għeluq ikkoinċida maż-żieda f'importazzjonijiet dumped mir-RPĊ, it-telf tas-sehem mis-suq u t-tnaqqis fil-prezzijiet u l-profitabilità tal-industrija tal-Unjoni.

(191)

Il-Kummissjoni nnotat li matul il-perjodu kkunsidrat, il-konsum fl-Unjoni naqas bi 8 %, filwaqt li l-bejgħ tal-industrija tal-Unjoni naqas bi 11 % u l-importazzjonijiet dumped Ċiniżi żdiedu b'16 %. Għaldaqstant, il-Kummissjoni tikkonkludi li, anke jekk it-tnaqqis fid-domanda seta' kellu effett fuq is-sitwazzjoni ta' dannu tal-industrija tal-Unjoni fil-perjodu ta' investigazzjoni, ma setax ikisser ir-rabta kawżali bejn l-importazzjonijiet Ċiniżi li huma l-oġġett ta' dumping u d-dannu materjali mġarrab mill-industrija tal-Unjoni. Għalhekk il-Kummissjoni tirrifjuta din id-dikjarazzjoni.

(192)

L-assoċjazzjoni tal-importaturi argumentat li d-dannu mġarrab mill-industrija tal-Unjoni huwa relatat mal-kompetizzjoni ġewwa l-Unjoni minn produtturi bbażati fi Stati Membri tal-Lvant li rriżulta f'dannu għall-produtturi bbażati fl-Istati Membri tal-Punent.

(193)

L-ilmentaturi kkontradixxew dan ta' hawn fuq u argumentaw li l-produtturi mill-Ewropa ċentrali u tal-lvant ma kellhomx it-tendenza li jikkompetu ħafna fl-Istati Membri tal-punent, għax is-suq fl-Istati Membri tal-punent ma tantx kien attraenti fid-dawl tal-importazzjonijiet li huma l-oġġett ta' dumping mir-RPĊ.

(194)

Il-Kummissjoni nnutat li jeżisti kummerċ fi ħdan l-Unjoni ta' oġġetti tal-ħadid fondut, anki bejn Stati Membri tal-punent u dawk ċentrali/tal-lvant. Il-kummerċ fi ħdan l-Unjoni juri tendenza stabbli matul il-perjodu kkunsidrat u għalhekk ma setgħax kien li kkontribwixxa għad-dannu mġarrab matul il-perjodu kkunsidrat. Għaldaqstant, din il-pretensjoni ġiet irrifjutata.

(195)

L-assoċjazzjoni tal-importaturi argumentat li l-pożizzjoni aktar dgħajfa tal-industrija tal-Unjoni hija attribwibbli għad-deċiżjonijiet mhux effiċjenti adottati mill-maniġment u nuqqas ta' investimenti fir-riċerka u l-iżvilupp.

(196)

L-assoċjazzjoni tal-importaturi ma pprovdietx evidenza għal dawn id-dikjarazzjonijiet. Għalhekk, il-Kummissjoni rrifjutat dawn it-talbiet.

(197)

Is-CCCME argumentat li hemm differenzi sinifikanti fit-tipi ta' prodotti mibjugħa skont il-post ġeografiku tal-Istati Membri, primarjament relatati mad-diviżjoni bejn ħadid griż u prodotti tal-ħadid duttili. Jidher li l-klijenti għal kull Stat Membru b'mod konsistenti jużaw wieħed miż-żewġ prodotti. L-industrija tal-Unjoni hija maqsuma bejn il-produzzjoni ta' ħadid griż u ħadid duttili u l-importazzjonijiet mir-RPĊ huma prinċipalment magħmula minn ħadid duttili, filwaqt li l-importazzjonijiet mill-Indja huma prinċipalment magħmula minn ħadid griż. L-industrija Indjana wkoll qajment din il-kwistjoni.

(198)

Is-CCCME saħqet li d-dannu mġarrab fi Stat Membru b'bejgħ predominanti ta' ħadid griż ma jistax jiġi attribwit għall-importazzjonijiet Ċiniżi tal-prodott ikkonċernat, peress li dawn mhumiex f'kompetizzjoni ma' xulxin.

(199)

Il-Kummissjoni nnutat li s-suq tal-Unjoni huwa suq unika, li għandu norma pan-Ewropea u anki standards nazzjonali, b'kummerċ fi ħdan l-Unjoni u penetrazzjoni ta' importazzjonijiet. Għalkemm tista' teżisti preferenza potenzjali bejn prodotti tal-ħadid griż u tal-ħadid duttili, il-bejgħ u l-produzzjoni mhumiex esklussivament ibbażati fuq it-tip ta' ħadid fondut. Iż-żewġ tipi għandhom l-istess użu aħħari u jistgħu jservu ta' sostitut wieħed lill-ieħor. Għaldaqstant, il-Kummissjoni qieset lill-prodotti tal-ħadid griż u tal-ħadid duttili bħala prodotti interkambjabbli.

(200)

Is-CCCME saħqet ukoll li parti mill-industrija tal-Unjoni hija speċjalizzata fil-produzzjoni u l-bejgħ ta' prodotti mhux standard. L-importazzjonijiet ma jikkonċernawx prodotti mhux standard u d-dannu relatat ma' tali prodotti ma jistax jiġi attribwit għall-importazzjonijiet mir-RPĊ jew l-Indja.

(201)

Il-Kummissjoni użat sistema ta' kategorizzazzjoni tal-prodott li ppermettiet paragun tal-prodotti importati ma' prodotti simili manifatturati mill-industrija tal-Unjoni. Għalhekk, id-differenzi bejn il-prodotti jittieħdu inkunsiderazzjoni fid-determinazzjoni tal-livell ta' dannu. Għaldaqstant, din il-pretensjoni ġiet irrifjutata.

(202)

Il-Kummissjoni b'mod provviżorju stabbilixxiet rabta kawżali bejn id-dannu mġarrab mill-produtturi tal-Unjoni u l-importazzjonijiet li huma l-oġġett ta' dumping mir-RPĊ.

(203)

Il-Kummissjoni ddistingwiet u sseparat l-effetti tal-fatturi kollha magħrufin dwar is-sitwazzjoni tal-industrija tal-Unjoni mill-effetti dannużi tal-importazzjonijiet li huma l-oġġett ta' dumping.

(204)

Il-fatturi identifikati l-oħrajn bħal importazzjonijiet minn pajjiżi terzi oħra, il-prestazzjoni tal-bejgħ minn esportazzjonijiet tal-produtturi tal-Unjoni, it-tnaqqis fid-domanda, il-kompetizzjoni bejn il-produtturi tal-Unjoni, il-ġestjoni tal-industrija tal-Unjoni, u allegata segmentazzjoni fis-suq tal-Unjoni b'mod provviżorju ma nstabux li jkissru r-rabta kawżali, anke jekk wieħed jikkunsidra l-effett ikkombinat possibbli tagħhom.

(205)

Fuq il-bażi ta' dan ta' hawn fuq, il-Kummissjoni kkonkludiet f'dan l-istadju li d-dannu materjali għall-industrija tal-Unjoni li kien ikkawżat mill-importazzjonijiet dumped mir-RPĊ u l-fatturi l-oħra, meqjusin b'mod individwali jew kollettivament ma kissirx ir-rabta kawżali.

(206)

F'konformità mal-Artikolu 21 tar-Regolament bażiku, il-Kummissjoni eżaminat jekk setgħetx b'mod ċar tikkonkludi li ma kienx fl-interess tal-Unjoni li tadotta miżuri f'dan il-każ, minkejja d-determinazzjoni ta' dumping dannuż. Id-determinazzjoni tal-interess tal-Unjoni kienet ibbażata fuq valutazzjoni tal-bosta interessi involuti, inklużi dawk tal-industrija tal-Unjoni, tal-importaturi u tal-utenti.

(207)

L-industrija tal-Unjoni hija magħmula minn kumpaniji kbar kif ukoll żgħar u medji u b'mod dirett timpjega madwar 3 000 impjegat fir-rigward tal-prodott simili matul il-perjodu kkunsidrat. L-industrija tinsab prinċipalment fil-Belġju, fi Franza, fil-Ġermanja, fi Spanja u fir-Renju Unit bi ftit produzzjoni fil-Kroazja, fir-Repubblika Ċeka, fil-Finlandja, fl-Italja, fin-Netherlands, fil-Polonja, fis-Slovenja u fl-Iżvezja

(208)

Tmien produtturi tal-Unjoni (li minnhom tnejn huma relatati ma' xulxin) ikkooperaw matul l-investigazzjoni. L-ebda produttur magħruf ma oppona l-bidu tal-investigazzjoni. Kif muri fit-taqsima 4.4.4 hawn fuq, fl-analiżi tal-iżvilupp tal-indikaturi tad-dannu sa mill-bidu tal-perjodu kkunsidrat, l-industrija sħiħa tal-Unjoni esperjenzat deterjorament tas-sitwazzjoni tagħha u kienet affettwata b'mod negattiv mill-importazzjonijiet li huma l-oġġett ta' dumping.

(209)

Il-Kummissjoni tistenna li l-impożizzjoni ta' dazju antidumping provviżorju sejra tirrestawra kundizzjonijiet tal-kummerċ ġusti fis-suq tal-Unjoni, u twaqqaf id-dipressjoni tal-prezzijiet u tippermetti lill-industrija tal-Unjoni tirkupra s-sehem mis-suq mitluf tagħha. Dan iwassal għal titjib fil-profittabilità tal-industrija tal-Unjoni lejn livelli meqjusa neċessarji għal din l-industrija b'kapital intensiv.

(210)

L-industrija tal-Unjoni sofriet dannu materjali kkawżat mill-importazzjonijiet li huma l-oġġett ta' dumping. Il-Kummissjoni tfakkar li ħafna mill-indikaturi ta' dannu wrew tendenza negattiva sa mill-bidu tal-perjodu kkunsidrat. B'mod partikolari, l-indikaturi ta' dannu relatati mal-prestazzjoni finanzjarja tal-produtturi tal-Unjoni fil-kampjun, bħall-profittabilità, il-fluss tal-flus u r-redditu fuq l-investimenti kienu affettwati serjament.

(211)

Għalhekk, huwa importanti li l-prezzijiet jitreġġgħu lura għal livell li jippermetti lill-produtturi joperaw f'kundizzjonijiet ta' kummerċ ġust fis-suq tal-Unjoni. Fin-nuqqas ta' miżuri, huwa probabbli ħafna li jkun hemm deterjorament ulterjuri tas-sitwazzjoni ekonomika u finanzjarja tal-industrija tal-Unjoni.

(212)

Għaldaqstant, il-Kummissjoni kkonkludiet b'mod provviżorju li l-impożizzjoni ta' dazji antidumping tkun fl-interess tal-industrija tal-Unjoni. Kwalunkwe impożizzjoni ta' miżuri antidumping tippermetti lill-industrija tal-Unjoni tirkupra mill-effetti tad-dumping dannuż li jinstab.

(213)

Kif indikat fil-premessa (21), 28 importatur, li minnhom 19 huma membri tal-assoċjazzjoni tal-importaturi msemmija fil-premessa (7), jikkooperaw fl-investigazzjoni u tlieta minnhom ġew ikkampjunati. L-importaturi kooperattivi huma responsabbli għal 62 % tal-importazzjonijiet mir-RPĊ u l-Indja. It-tliet importaturi fil-kampjun jirrappreżentaw 42 % tal-volum importat mill-importaturi kooperattivi kollha. It-tliet importaturi kollha fil-kampjun flimkien mal-membri l-oħra tal-assoċjazzjoni tal-importaturi jopponu l-impożizzjoni ta' miżuri.

(214)

L-assoċjazzjoni tal-importaturi argumentat li l-adozzjoni ta' miżuri anti-dumping ma tkunx fl-interess tal-Unjoni peress li din tiġġenera distorsjoni tal-kompetizzjoni fis-suq tal-Unjoni u tipprevjeni l-importazzjonijiet tal-prodott ikkonċernat fl-Unjoni, billi l-importazzjonijiet mir-RPĊ u l-Indja jirrappreżentaw kważi t-totalità tal-importazzjonijiet kollha tal-Unjoni.

(215)

L-ilmentaturi opponew dan l-argument u nnotaw li l-impożizzjoni ta' miżuri anti-dumping tistabbilixxi mill-ġdid il-prezzijiet tal-Unjoni f'livell li jippermetti kompetizzjoni ġusta, mingħajr ma tagħlaq is-suq għall-importazzjonijiet mir-RPĊ jew l-Indja jew twassal biex produttur tal-Unjoni jikseb pożizzjoni dominanti fis-suq tal-Unjoni.

(216)

L-assoċjazzjoni tal-importaturi argumentat li importaturi mhux relatati diġà jaffaċċjaw diffikultajiet serji biex jiksbu provvisti adegwati tal-prodott taħt investigazzjoni fis-suq tal-Unjoni, minħabba integrazzjoni vertikali tal-produtturi tal-Unjoni, li ser tiddeterjora jekk jiġu imposti miżuri anti-dumping.

(217)

Il-Kummissjoni skopriet li l-industrija tal-Unjoni tbigħ lil distributuri indipendenti u mhijiex integrata vertikalment, bħalma ddikkjarat l-assoċjazzjoni tal-importaturi mhux relatati. Attwalment, l-industrija tal-Unjoni qed taħdem b'livell baxx ta' utilizzazzjoni tal-kapaċità u madwar 10 % tal-importazzjonijiet joriġinaw minn pajjiżi għajr ir-RPĊ u l-Indja, għalhekk l-importaturi jistgħu jagħmlu bidla għal produzzjoni fl-Unjoni jew importazzjonijiet oħra. Għaldaqstant, il-Kummissjoni tikkunsidra li l-ilmentaturi setgħu jasserixxu s-sigurtà tal-provvista biex jissodisfaw kwalunkwe domanda addizzjonali.

(218)

Skont l-assoċjazzjoni tal-importaturi l-biċċa l-kbira tal-importaturi mhux relatati huma SMEs u għandhom kapaċità limitata li jadattaw in-negozju tagħhom għall-impożizzjoni ta' miżuri anti-dumping.

(219)

Il-Kummissjoni evalwat id-dikjarazzjonijiet kemm tal-importaturi kif ukoll tal-ilmentaturi u kkonkludiet li abbażi tad-data attwali l-importaturi jżidu ftit valur fl-Unjoni u dazju anti-dumping ma jistax jiġi assorbit mingħajr żidiet fil-prezzijiet. Il-Kummissjoni qabblet il-prezzjiet tal-bejgħ medji tal-importaturi u l-industrija tal-Unjoni u kkonkludiet li hemm lok għal żidiet fil-prezzijiet.

(220)

Għalkemm l-importaturi sostnew li huwa diffiċli għalihom jaqilbu għal sorsi alternattivi ta' provvista minħabba l-kost ta' forom u ċertifikazzjoni, il-Kummissjoni qieset li dan huwa possibbli għar-raġuni li ġejja. L-industrija tal-Unjoni taħdem b'użu tal-kapaċità ta' 54 % u jidher li l-Indja, li b'mod provviżorju ma nstabitx tagħmel dumping, tipproduċi dejjem aktar ħadid duttili, u għalhekk hija sors possibbli ta' provvista, flimkien ma' pajjiżi oħra bħat-Turkija u n-Norveġja.

(221)

Il-Kummissjoni sabet li f'termini ta' impjieg, l-importaturi għandhom rwol minuri. Filwaqt li t-tliet importaturi tal-Unjoni fil-kampjun jimpjegaw madwar 1 200 persuna, għaż-żewġ importaturi fil-kampjun li jimportaw mir-RPĊ anqas minn 100 persuna setgħu jiġu assenjati għall-prodott ikkonċernat.

(222)

Il-Kummissjoni kkonkludiet li abbażi tal-informazzjoni disponibbli f'dan l-istadju, li xorta hija ser tivverifika wara l-impożizzjoni ta' miżuri provviżorji, l-impatt probabbli tal-miżuri fuq importaturi mhux relatati mhuwiex sostantiv u mhuwiex akbar mill-effett pożittiv tal-miżuri fuq l-industrija tal-Unjoni.

(223)

L-utenti finali ewlenin għall-prodott ikkonċernat huma s-servizzi pubbliċi. Fil-każ tal-utenti, il-prodott ikkonċernat jifforma parti żgħira biss mill-kosti tagħhom fi proġetti infrastrutturali li spiss ikunu akbar.

(224)

L-assoċjazzjoni tal-importaturi esprimiet biża' li l-miżuri anti-dumping iwasslu għal prezzijiet ogħla għad-detriment tal-utenti finali, li prinċipalment huma entitajiet pubbliċi. Madankollu, l-utenti finali ma jistgħux iserrħu fuq il-prezzijiet li huma taħt il-kost għad-detriment tal-industrija tal-Unjoni.

(225)

Ma ppreżenta ruħu l-ebda utent jew assoċjazzjoni tal-konsumatur. Fid-dawl tan-nuqqas ta' kooperazzjoni ta' dawn il-partijiet, il-Kummissjoni kkonkludiet li l-impożizzjoni provviżorja ta' miżuri ma taffettwax bla bżonn is-sitwazzjoni tagħhom.

(226)

Fuq il-bażi ta' dan ta' hawn fuq, il-Kummissjoni kkonkludiet li ma kienx hemm raġunijiet persważivi li ma kienx fl-interess tal-Unjoni li timponi miżuri provviżorji fuq importazzjonijiet tal-prodott ikkonċernat li joriġina fir-RPĊ f'dan l-istadju tal-investigazzjoni.

(227)

Abbażi tal-konklużjonijiet li waslet għalihom il-Kummissjoni dwar id-dumping, dannu, kawżalità u l-interess tal-Unjoni, jeħtieġ li jiġu imposti miżuri provviżorji sabiex jiġi evitat li jsir aktar dannu lill-industrija tal-Unjoni mill-importazzjonijiet Ċiniżi li huma l-oġġett ta' dumping. Fir-rigward tal-Indja, peress li ma nstab l-ebda dumping, mhu ser tiġi imposta l-ebda miżura provviżorja, iżda l-investigazzjoni ser tkompli għaddejja sakemm isiru sejbiet definittivi.

(228)

Sabiex jiġi ddeterminat il-livell ta' dawn il-miżuri, il-Kummissjoni l-ewwel stabbilixxiet l-ammont ta' dazju neċessarju sabiex jiġi eliminat id-dannu mġarrab mill-industrija tal-Unjoni.

(229)

Id-dannu jiġi eliminat jekk l-industrija tal-Unjoni tkun kapaċi tkopri l-ispejjeż tal-produzzjoni tagħha u tagħmel profitt qabel it-taxxa mill-bejgħ tal-prodott simili fis-suq tal-Unjoni li jista' jinkiseb b'mod raġjonevoli f'kundizzjonijiet normali ta' kompetizzjoni minn industrija ta' dan it-tip fis-settur, jiġifieri fin-nuqqas ta' importazzjonijiet oġġett ta' dumping.

(230)

Sabiex ikun jista' jiġi stabbilit dan il-profitt li jista' jintlaħaq b'mod raġjonevoli f'kundizzjonijiet normal ta' kompetizzjoni, il-Kummissjoni kkunsidrat il-profitti li saru fuq il-bejgħ mhux relatat li jintużaw għall-iskop tad-determinazzjoni tal-livell ta' eliminazzjoni tad-dannu.

(231)

Il-profitt fil-mira ġie stabbilit b'mod proviżorju fil-livell ta' 5,3 %, f'konformità mal-profitti tal-2013 mill-bejgħ mhux relatat. Peress li li kien hemm żieda kbira fl-importazzjonijiet soġġett ta' dumping fl-2014, u wara dan stabbilizzaw, jitqies li l-livell tal-2013 tal-profitti jirrifletti dak li seta' jintlaħaq b'mod raġjonevoli taħt kundizzjonijiet normali ta' kompetizzjoni, jiġifieri fin-nuqqas ta' importazzjonijiet suġġetti ta' dumping. Imbagħad, il-Kummissjoni ddeterminat il-livell ta' eliminazzjoni tad-dannu fuq il-bażi ta' tqabbil tal-prezz ta' importazzjoni medju ponderat tal-produtturi esportaturi kooperattivi fil-kampjun fir-RPĊ, aġġustat kif xieraq għall-ispejjeż tal-importazzjoni u d-dazji doganali, kif stabbilit għall-kalkoli tat-twaqqigħ tal-prezz, mal-prezz mingħajr dannu medju ponderat tal-prodott simili mibjugħ mill-produtturi tal-Unjoni fil-kampjun fis-suq tal-Unjoni matul il-perjodu tal-investigazzjoni. Kwalunkwe differenza li tirriżulta minn dan it-tqabbil ingħatat bħala perċentwal tal-valur CIF medju ponderat tal-importazzjoni.

(232)

Il-livell ta' eliminazzjoni tad-dannu għal “kumpaniji kooperattivi oħra” u għall-“kumpaniji l-oħrajn kollha” huwa definit bl-istess mod bħall-marġni tad-dumping għal dawn il-kumpaniji (ara l-premessi (94) sa (98) aktar 'l fuq).

(233)

Għandhom jiġu imposti miżuri provviżorji antidumping fuq l-importazzjonijiet ta' prodotti tal-ħadid fondut li joriġinaw mir-RPĊ, skont ir-regola tad-dazju inferjuri fl-Artikolu 7(2) tar-Regolament bażiku. Il-Kummissjoni qabblet il-livell ta' eliminazzjoni tad-dannu u l-marġnijiet tad-dumping. L-ammont tad-dazju għandu jiġi stabbilit fil-livell tal-marġni tad-dumping aktar baxx u fil-livell ta' eliminazzjoni tad-dannu.

(234)

Abbażi ta' dan ta' hawn fuq, ir-rati tad-dazju provviżorju antidumping, imfissra fil-prezz CIF fil-fruntiera tal-Unjoni, id-dazju doganali mhux imħallas, għandhom ikunu kif ġej:

(235)

Ir-rati tad-dazju antidumping ta' kumpaniji individwali speċifikati f'dan ir-Regolament ġew stabbiliti abbażi tal-konklużjonijiet ta' din l-investigazzjoni. Gћaldaqstant, dawn jirriflettu s-sitwazzjoni li nstabet matul din l-investigazzjoni fir-rigward ta' dawn il-kumpaniji. Dawn ir-rati ta' dazju huma esklussivament applikabbli għall-importazzjonijiet tal-prodott ikkonċernat li joriġina mir-RPĊ u manifatturat mill-entitajiet ġuridiċi msemmija. L-importazzjonijiet tal-prodott ikkonċernat immanifatturat minn kwalunkwe kumpanija oħra mhux imsemmija b'mod speċifiku fil-parti operattiva ta' dan ir-Regolament, inklużi entitajiet relatati ma' dawk imsemmijin b'mod speċifiku, għandhom ikunu soġġetti għar-rata ta' dazju applikabbli għall-“kumpaniji l-oħrajn kollha”. Ma għandhomx ikunu soġġetti għal xi rata individwali ta' dazju antidumping.

(236)

Kumpanija tista' titlob l-applikazzjoni ta' dawn ir-rati ta' dazju antidumping individwali jekk sussegwentement tibdel l-isem tal-entità tagħha. It-talba trid tkun indirizzata lill-Kummissjoni (7). It-talba jrid ikun fiha l-informazzjoni rilevanti kollha li tippermetti li jintwera li t-tibdil ma jaffettwax id-dritt tal-kumpanija li tibbenifika mir-rata tad-dazju li tapplika għaliha. Jekk it-tibdil fl-isem tal-kumpanija ma jaffettwax id-dritt tagħha li tibbenifika mir-rata tad-dazju li tapplika għaliha, jiġi ppubblikat avviż li jinnotifika dwar it-tibdil tal-isem f'Il-Ġurnal Uffiċjali tal-Unjoni Ewropea.

(237)

Biex ikun żgurat infurzar xieraq tad-dazji antidumping, ir-rata tad-dazju antidumping għall-kumpaniji l-oħrajn kollha għandha tapplika mhux biss għall-produtturi esportaturi li ma kkooperawx f'din l-investigazzjoni, imma anki għall-produtturi li ma kellhomx esportazzjonijiet lejn l-Unjoni matul il-perjodu ta' investigazzjoni.

(238)

Fl-interessi ta' amministrazzjoni tajba, il-Kummissjoni sejra tistieden lill-partijiet interessati sabiex iressqu kummenti bil-miktub u/jew jitolbu seduta mal-Kummissjoni u/jew mal-Uffiċjal tas-Seduta fil-proċeduri kummerċjali fi żmien skadenza fissa.

(239)

Il-konklużjonijiet li jikkonċernaw l-impożizzjoni ta' dazji provviżorji huma provviżorji u jistgħu jiġu emendati fl-istadju definittiv tal-investigazzjoni,