(1)

Le Treoir 2011/65/AE ceanglaítear ar na Ballstáit a áirithiú nach mbeidh na substaintí guaiseacha a liostaítear in Iarscríbhinn II a ghabhann leis an Treoir sin i dtrealamh leictreach agus leictreonach a chuirtear ar an margadh. Ní bhaineann an srian sin le feidhmeanna díolmhaithe áirithe a bhaineann go sonrach le feistí leighis agus uirlisí faireacháin agus rialaithe agus a liostaítear in Iarscríbhinn IV a ghabhann leis an Treoir sin.

(2)

Liostaítear catagóirí an trealaimh leictrigh agus leictreonaigh a bhfuil feidhm ag Treoir 2011/65/AE ina leith in Iarscríbhinn I a ghabhann leis an Treoir sin.

(3)

Is substaint é mearcair a bhfuil srian air agus a liostaítear in Iarscríbhinn II a ghabhann le Treoir 2011/65/AE.

(4)

Le Treoir Tharmligthe (AE) 2015/574 (2), dheonaigh an Coimisiún díolúine maidir le mearcair a úsáid i gcórais íomháithe ultrafhuaime ionsoithíche (“an díolúine”), tríd an bhfeidhm sin a áireamh in Iarscríbhinn IV a ghabhann le Treoir 2011/65/AE. Bhí an díolúine le dul in éag an 30 Meitheamh 2019, i gcomhréir leis an tríú fomhír d’Airteagal 5(2) den Treoir sin.

(5)

Fuair an Coimisiún iarratas ar athnuachan na díolúine (“an iarraidh ar athnuachan”) an 6 Deireadh Fómhair 2017 atá laistigh den teorainn ama a leagadh síos in Airteagal 5(5) de Threoir 2011/65/AE. I gcomhréir leis an bhforáil sin, beidh an díolúine bailí go dtí go mbeidh cinneadh glactha ar an iarraidh ar athnuachan.

(6)

Áiríodh le meastóireacht na hiarrata ar athnuachan comhairliúcháin leis na páirtithe leasmhara i gcomhréir le hAirteagal 5(7) de Threoir 2011/65/AE. Cuireadh na barúlacha a fuarthas le linn na gcomhairliúchán sin ar fáil go poiblí ar shuíomh gréasáin tiomnaithe.

(7)

Úsáidtear mearcair i nascóirí rothlacha leictreacha na gcóras íomháithe ultrafhuaime ionsoithíche a sholáthraíonn conair na seoltachta leictrí idir an trasduchtóir rothlach agus an trealamh leictreonach suite. De thoradh an mhearcair, is féidir, inter alia, oibriúcháin ar mhinicíocht níos airde a dhéanamh as a mbaintear íomháú ar thaifeach níos airde, rud a théann chun tairbhe na n-othar.

(8)

De dheasca easpa roghanna eile, is dodhéanta go heolaíoch agus go teicniúil mearcair a ionadú nó a dhíothú faoi láthair i gcás na bhfeidhmeanna lena mbaineann. Tá an díolúine i gcomhréir le Rialachán (CE) Uimh. 1907/2006 ó Pharlaimint na hEorpa agus ón gComhairle (3), agus ar an gcaoi sin ní lagaítear an chosaint don chomhshaol agus don tsláinte a thugtar léi.

(9)

Dá bhrí sin, is iomchuí an athnuachan ar an díolúine a dheonú.

(10)

Ba cheart an díolúine a athnuachan ar feadh na tréimhse uasta 7 mbliana go dtí an 30 Meitheamh 2026, i gcomhréir le hAirteagal 4(3) agus an tríú fomhír d’Airteagal 5(2) de Threoir 2011/65/AE. I bhfianaise thorthaí na n-iarrachtaí leanúnacha chun teacht ar ionadú iontaofa, ní dócha go mbeidh drochthionchair ag tréimhse na díolúine ar an nuálaíocht.

(11)

Ba cheart, dá bhrí sin, Treoir 2011/65/AE a leasú dá réir sin,