(1)

It-Trattat dwar il-Komunità tal-Enerġija (it-“Trattat”) ġie konkluż mill-Unjoni bid-Deċiżjoni tal-Kunsill 2006/500/KE (1) u daħal fis-seħħ fl-1 ta’ Lulju 2006.

(2)

Skont l-Artikoli 47 u 76 tat-Trattat, il-Kunsill Ministerjali tal-Kommunità tal-Enerġija (“il-Kunsill Ministerjali”) għandu jieħu Miżuri fil-forma ta’ Deċiżjoni jew Rakkomandazzjoni.

(3)

Skont l-Artikoli 60 u 86 tat-Trattat, il-Bord Regolatorju tal-Kommunità tal-Enerġija (“il-Bord Regolatorju”) għandu jadotta r-regoli interni ta’ proċedura tiegħu permezz ta’ Att Proċedurali.

(4)

Il-Kunsill Ministerjali, matul it-22 sessjoni tiegħu li għandha sseħħ fit-12 ta’ Diċembru 2024 fi Vjenna, għandu jadotta, inter alia, atti li jaqgħu fil-kamp ta’ applikazzjoni tal-Artikolu 218(9) tat-Trattat dwar il-Funzjonament tal-Unjoni Ewropea (TFUE) u li fuqhom għandhom jivvutaw ir-rappreżentanti tal-Unjoni. L-atti li għandhom li jiġu adottati jinkludu għadd ta’ deċiżjonijiet f’konformità mal-Artikolu 91(1)(a) tat-Trattat, dment li l-Kumitat Konsultattiv tal-Kommunità tal-Enerġija stabbilit bl-Att Proċedurali nru. 2008/01 tal-Kunsill Ministerjali jagħti fil-ħin opinjoni minn qabel b’sostenn għas-sejbiet tas-Segretarjat tal-Komunità tal-Enerġija li jiddeterminaw l-eżistenza ta’ ksur tat-Trattat u deċiżjoni dwar il-kwittanza finanzjarja tad-direttur tas-Segretarjat tal-Kommunità tal-Enerġija. Barra minn hekk, il-Kunsill Ministerjali ser jadotta wkoll il-pożizzjoni tiegħu dwar l-estensjoni tal-mandati ta’ żewġ membri tal-Kumitat Konsultattiv u l-ħatra ta’ tlett membri ġodda sal-31 ta’ Diċembru 2028,

(5)

Il-Bord Regolatorju, fid-59 sessjoni tiegħu li għandha sseħħ fl-10 ta’ Diċembru 2024 f’Ateni, għandu jadotta deċiżjoni li taqa’ fil-kamp ta’ applikazzjoni tal-Artikolu 218(9) TFUE u li fuqhajridu jivvutaw ir-rappreżentanti tal-Unjoni, jiġifieri Att Proċedurali li jissotitwixxi ir-regoli interni ta’ proċedura tiegħu.

(6)

L-għan tad-deċiżjonijiet previsti tal-Kunsill Ministerjali u tal-Bord Regolatorju huwa li jiffaċilitaw l-ilħuq tal-objettivi tat-Trattat.

(7)

Huwa xieraq li tiġi stabbilita l-pożizzjoni li għandha tittieħed f’isem l-Unjoni fi ħdan il-Kunsill Ministerjali u l-Bord Regolatorju fir-rigward tad-deċiżjonijiet previsti, peress li dawk l-atti se jkollhom effetti legali għall-Unjoni.