(1)

Rinne an tAontas Conradh an Chomhphobail Fuinnimh (‘an Conradh’) a thabhairt i gcrích le Cinneadh 2006/500/CE ón gComhairle (1) agus tháinig sé i bhfeidhm an 1 Iúil 2006.

(2)

De bhun Airteagail 47 agus 76 den Chonradh, tá Comhairle Aireachta an Chomphobail Fuinnimh (‘an Chomhairle Aireachta’) le bearta a ghlacadh i bhfoirm Cinnidh nó Molta.

(3)

De bhun Airteagail 60 agus 86 den Chonradh, tá Bord Rialála an Chomhphobail Fuinnimh (‘an Bord Rialála’) lena rialacha nós imeachta inmheánacha a ghlacadh trí Ghníomh Nós Imeachta.

(4)

Tá an Chomhairle Aireachta, le linn an 22ú seisiún a bheidh aici i Vín an 12 Nollaig 2024, inter alia, le gníomhartha a ghlacadh a thagann faoi raon feidhme Airteagal 218(9) den Chonradh ar Fheidhmiú an Aontais Eorpaigh (CFAE) agus a bhfuil ionadaithe an Aontais le vótáil orthu. Áirítear sna gníomhartha atá le glacadh roinnt cinntí i gcomhréir le hAirteagal 91(1)(a) den Chonradh, ar choinníoll go dtugann Coiste Comhairleach an Chomhphobail Fuinnimh arna bhunú le Gníomh Nós Imeachta Uimh. 2008/01 ón gComhairle Aireachta tuairim roimh ré go tráthúil chun tacú le torthaí Rúnaíocht an Chomhphobail Fuinnimh lena gcinntear gur ann do shárú ar an gConradh agus cinneadh maidir le hurscaoileadh airgeadais stiúrthóir Rúnaíocht an Chomhphobail Fuinnimh. Thairis sin, glacfaidh an Chomhairle cinneadh maidir le sainorduithe beirt chomhaltaí den Choiste Comhairleach a fhadú agus triúr comhaltaí nua a cheapadh go dtí an 31 Nollaig 2028.

(5)

Tá an Bord Rialála, ag an 59ú seisiún a bheidh aige an 10 Nollaig 2024 san Aithin, le cinneadh a ghlacadh, a thagann faoi raon feidhme Airteagal 218(9) CFAE agus a bhfuil ionadaithe an Aontais le vótáil orthu, eadhon Gníomh Nós Imeachta a chuirtear in ionad a rialacha nós imeachta inmheánacha.

(6)

Is é is cuspóir do na gníomhartha atá beartaithe ón gComhairle Aireachta agus ón mBord Rialála baint amach chuspóirí an Chonartha a éascú.

(7)

Is iomchuí an seasamh atá le glacadh thar ceann an Aontais sa Chomhairle Aireachta agus sa Bhord Rialála maidir leis na gníomhartha atá beartithe, ós rud é go mbeidh éifeachtaí dlíthiúla don Aontas ag na cinntí sin.