(1)

Ir-Regolament ta’ Implimentazzjoni tal-Kummissjoni (UE) 2022/632 (2) jistabbilixxi miżuri fir-rigward tal-frott tas-Citrus L., Fortunella Swingle, Poncirus Raf., u l-ibridi tagħhom, għajr il-frott tas-Citrus aurantium L. u tas-Citrus latifolia Tanaka (“il-frott speċifikat”), li joriġina mill-Arġentina, mill-Brażil, mill-Afrika t’Isfel, mill-Urugwaj u miż-Żimbabwe, biex jipprevjenu l-introduzzjoni fit-territorju tal-Unjoni tal-Phyllosticta citricarpa (McAlpine) Van der Aa (“il-pest speċifikat”) u t-tixrid tiegħu. Dan jiskadi fil-31 ta’ Marzu 2025.

(2)

Mill-2022, l-Istati Membri rrappurtaw diversi okkorrenzi ta’ nuqqasijiet ta’ konformità minħabba l-preżenza tal-pest speċifikat fl-importazzjonijiet fl-Unjoni tal-frott speċifikat li joriġina mill-Arġentina, mill-Afrika t’Isfel, mill-Urugwaj u miż-Żimbabwe. Barra minn hekk, u minn dik is-sena, ma seħħet l-ebda importazzjoni fl-Unjoni tal-frott taċ-ċitru speċifikat li joriġina mill-Brażil. Għalhekk, ma kienet possibbli l-ebda valutazzjoni tal-livell ta’ konformità tal-Brażil mal-miżuri tar-Regolament ta’ Implimentazzjoni (UE) 2022/632.

(3)

B’riżultat ta’ dan, jeħtieġ li jinżammu l-miżuri stabbiliti fir-Regolament ta’ Implimentazzjoni (UE) 2022/632 għall-frott speċifikat minn kull wieħed minn dawk il-pajjiżi terzi, peress li dawk il-miżuri għadhom meħtieġa biex ir-riskju fitosanitarju rispettiv għat-territorju tal-Unjoni jinżamm f’livell aċċettabbli.

(4)

Ir-riskju fitosanitarju, ikkaġunat mill-preżenza tal-pest speċifikat fl-Arġentina, fil-Brażil, fl-Afrika t’Isfel, fl-Urugwaj u fiż-Żimbabwe, u mill-importazzjoni tal-frott speċifikat minn dawk il-pajjiżi terzi fl-Unjoni, ivarja kull sena fir-rigward ta’ kull pajjiż terz ta’ oriġini għall-frott speċifikat. Għaldaqstant, jenħtieġ li jiġi vvalutat aktar abbażi tal-aħħar żviluppi tekniċi u xjentifiċi dwar il-prevenzjoni u l-kontroll tal-pest speċifikat.

(5)

Għalhekk, jenħtieġ li l-miżuri previsti fir-Regolament ta’ Implimentazzjoni (UE) 2022/632 jinżammu sal-31 ta’ Marzu 2028.

(6)

Peress li r-Regolament ta’ Implimentazzjoni (UE) 2022/632 jiskadi fil-31 ta’ Marzu 2025, jenħtieġ li dan ir-Regolament japplika mill-1 ta’ April 2025 biex tiġi evitata kwalunkwe lakuna legali.

(7)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,