(1)

Le litir an 6 Bealtaine 2022, d’iarr an tSualainn, de bhun Airteagal 19 de Threoir 2003/96/CE, údarú chun rátaí laghdaithe dleachta máil a chur i bhfeidhm maidir le peitreal, gás-ola gan mharcáil agus breoslaí coibhéiseacha a úsáidtear mar bhreoslaí mótair. Sholáthair údaráis na Sualainne faisnéis bhreise agus soiléirithe breise chun tacú leis an iarraidh an 19 Bealtaine 2022 agus an 24 Bealtaine 2022. Iarradh go mbeadh feidhm ag an údarú go ceann tréimhse 3 mhí.

(2)

De réir údaráis na Sualainne, is é is aidhm do chur i bhfeidhm ráta cánach laghdaithe tionchair shóisialta agus eacnamaíocha praghsanna arda miondíola peitril, gás-ola gan mharcáil agus breoslaí coibhéiseacha a úsáidtear mar bhreoslaí mótair, atá mar thoradh ar an staid eisceachtúil gheopholaitiúil, a mhaolú, praghsanna a dhéanann difear díreach do theaghlaigh agus do chuideachtaí araon. De réir a measúnaithe, ós tír í an tSualainn inar tearc an daonra agus ina mbítear, dá bhrí sin, ag brath go mór ar an ngluaisteán, tá sé d’aidhm ag na rátaí laghdaithe dleachta máil freastal ar na riachtanais laethúla a bhaineann le hídiú breoslaí mótair trí rannchuidiú le tionchar an mhéadaithe ar phraghsanna miondíola a mhaolú.

(3)

Ní dócha go ndéanfaidh an t-údarú a iarradh saobhadh ar iomaíocht ná go gcuirfidh sé bac ar fheidhmiú cuí an mhargaidh inmheánaigh. I bhfianaise a ghiorra atá sé agus na n-imthosca eisceachtúla atá nasctha leis an staid gheopholaitiúil, mar aon le praghsanna arda eisceachtúla ar amhola, meastar go bhfuil an t-údarú a iarradh leormhaith comhréireach. Baintear cothromaíocht amach leis an údarú idir na cuspóirí sonracha beartais dá dtagraítear in Airteagal 19(1), an tríú fomhír, de Threoir 2003/96/CE, go háirithe beartas comhshaoil an Aontais agus an éigeandáil phráinneach chun inacmhainneacht fuinnimh a áirithiú do ghnólachtaí agus do theaghlaigh. Dhéanfadh an laghdú cánach na costais mhéadaithe fuinnimh a fhritháireamh go pointe áirithe, agus níl sé carnach le laghduithe cánach d’aon chineál eile.

(4)

Dá bhrí sin, ba cheart a údarú don tSualainn rátaí laghdaithe dleachta máil a chur i bhfeidhm maidir le peitreal, gás-ola gan mharcáil agus breoslaí coibhéiseacha a úsáidtear mar bhreoslaí mótair, mar a iarradh.

(5)

De bhun Airteagal 19(2) de Threoir 2003/96/CE, tá gach údarú a dheonaítear faoin bhforáil sin le bheith teoranta go docht ó thaobh ama de. Mar sin féin, ionas nach ndéanfar dochar d’fhorbairtí ginearálta a dhéanfar amach anseo ar an gcreat dlíthiúil atá ann cheana, is iomchuí a fhoráil gur cheart, i gcás ina ndéanfadh an Chomhairle, ag gníomhú di ar bhonn Airteagal 113 nó aon fhoráil ábhartha eile den Chonradh ar Fheidhmiú an Aontais Eorpaigh, córas modhnaithe ginearálta a thabhairt isteach chun cáin a ghearradh ar tháirgí fuinnimh agus leictreachais arb ina leith nach n-oiriúnófaí an t-údarú, go scoirfeadh an t-údarú sin d’fheidhm a bheith aige an lá a thiocfaidh an córas modhnaithe sin chun bheith infheidhme.

(6)

Tá an cinneadh seo gan dochar do chur i bhfeidhm rialacha an Aontais maidir leis an Státchabhair,