|
20.5.2022 |
MT |
Il-Ġurnal Uffiċjali tal-Unjoni Ewropea |
L 141/111 |
DEĊIŻJONI TAL-KUMMISSJONI (UE) 2022/796
tat-12 ta’ Mejju 2022
li tapprova, f’isem l-Unjoni Ewropea, emenda għall-Anness XVIII tal-Ftehim ta’ Assoċjazzjoni bejn l-Unjoni Ewropea u l-Istati Membri tagħha, minn naħa waħda, u l-Amerika Ċentrali, min-naħa l-oħra
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Deċiżjoni tal-Kunsill 2012/734/UE tal-25 ta’ Ġunju 2012 dwar l-iffirmar, f’isem l-Unjoni Ewropea, tal-Ftehim li jistabbilixxi Assoċjazzjoni bejn l-Unjoni Ewropea u l-Istati Membri tagħha, minn naħa waħda, u l-Amerika Ċentrali min-naħa l-oħra, u l-applikazzjoni proviżorja tal-Parti IV tiegħu dwar kwistjonijiet kummerċjali (1), u b’mod partikolari l-Artikolu 4 tiegħu,
Billi:
|
(1) |
Id-dħul fis-seħħ tal-Ftehim ta’ Assoċjazzjoni bejn l-Unjoni Ewropea u l-Istati Membri tagħha, minn naħa waħda, u l-Amerika Ċentrali min-naħa l-oħra, (“il-Ftehim”) huwa pendenti. |
|
(2) |
Madankollu, l-Artikolu 353(4) tal-Ftehim jipprevedi l-applikazzjoni proviżorja tal-Parti IV tal-Ftehim dwar kwistjonijiet kummerċjali. Għaldaqstant, il-Parti IV tal-Ftehim ġiet applikata proviżorjament mill-1 ta’ Awwissu 2013 fir-rigward tal-Honduras, tan-Nikaragwa u tal-Panama, mill-1 ta’ Ottubru 2013 fir-rigward tal-Costa Rica u ta’ El Salvador, u mill-1 ta’ Diċembru 2013 fir-rigward tal-Gwatemala. |
|
(3) |
L-Artikolu 247 tal-Ftehim jipprevedi l-possibbiltà li jiżdiedu indikazzjonijiet ġeografiċi ġodda fl-Anness XVIII (“Indikazzjonijiet Ġeografiċi Protetti”) tal-Ftehim wara li titlesta l-proċedura ta’ oġġezzjoni u wara li l-indikazzjonijiet ġeografiċi jkunu ġew eżaminati b’suċċess mill-awtoritajiet nazzjonali jew reġjonali kompetenti f’konformità mar-regoli u l-proċeduri rilevanti għall-Kunsill ta’ Assoċjazzjoni. |
|
(4) |
Il-Costa Rica ressqet talba lill-Unjoni biex tiżdied indikazzjoni ġeografika ġdida mal-Parti B tal-Anness XVIII tal-Ftehim. L-Unjoni lestiet il-proċedura ta’ oġġezzjoni u eżaminat dik l-indikazzjoni ġeografika l-ġdida. |
|
(5) |
El Salvador ressaq talba lill-Unjoni biex jiżdiedu għaxar indikazzjonijiet ġeografiċi ġodda mal-Parti B tal-Anness XVIII tal-Ftehim. L-Unjoni lestiet il-proċedura ta’ oġġezzjoni u eżaminat dawk l-indikazzjonijiet ġeografiċi ġodda. |
|
(6) |
Skont l-Artikolu 6 tal-Ftehim, il-Kunsill ta’ Assoċjazzjoni stabbilit skont l-Artikolu 4 tal-Ftehim għandu s-setgħa li jimmodifika l-lista ta’ indikazzjonijiet ġeografiċi stabbilita fl-Anness XVIII tal-Ftehim. |
|
(7) |
L-Artikolu 274 tal-Ftehim jistabbilixxi Sottokumitat dwar il-Proprjetà Intellettwali, li jista’ jirrakkomanda, għall-approvazzjoni mill-Kunsill ta’ Assoċjazzjoni, modifiki tal-lista ta’ indikazzjonijiet ġeografiċi stabbilita fl-Anness XVIII tal-Ftehim. |
|
(8) |
Fit-13 ta’ Ġunju 2022, is-Sottokumitat dwar il-Proprjetà Intellettwali vvaluta l-informazzjoni fir-rigward tal-indikazzjoni ġeografika addizzjonali tal-Costa Rica u ta’ El Salvador u rrakkomanda lill-Kunsill ta’ Assoċjazzjoni biex jimmodifika l-Parti B tal-Anness XVIII tal-Ftehim skont dan. |
|
(9) |
Għalhekk, jenħtieġ li l-Parti B tal-Anness XVIII tal-Ftehim jiġi emendat skont dan u jenħtieġ li l-emendi jiġu approvati f’isem l-Unjoni, |
IDDEĊIDIET KIF ĠEJ:
Artikolu 1
L-emendi għall-Parti B tal-Anness XVIII tal-Ftehim stabbilit fl-abbozz tad-Deċiżjoni tal-Kunsill ta’ Assoċjazzjoni, huma b’dan approvati f’isem l-Unjoni.
L-abbozz tad-Deċiżjoni tal-Kunsill ta’ Assoċjazzjoni huwa mehmuż ma’ din id-Deċiżjoni.
Artikolu 2
Ir-rappreżentant tal-Unjoni fil-Kunsill ta’ Assoċjazzjoni huwa awtorizzat japprova d-deċiżjoni tal-Kunsill ta’ Assoċjazzjoni f’isem l-Unjoni.
Artikolu 3
Din id-Deċiżjoni għandha tiġi pubblikata f’Il-Ġurnal Uffiċjali tal-Unjoni Ewropea.
Wara li tiġi adottata, id-Deċiżjoni tal-Kunsill ta’ Assoċjazzjoni għandha tiġi ppubblikata f’Il-Ġurnal Uffiċjali tal-Unjoni Ewropea.
Magħmul fi Brussell, it-12 ta’ Mejju 2022.
Għall-Kummissjoni
Janusz WOJCIECHOWSKI
Membru tal-Kummissjoni
ANNESS
ABBOZZ TAD-DEĊIŻJONI Numru […]/2022 TAL-KUNSILL TA’ ASSOĊJAZZJONI UE-AMERIKA ĊENTRALI
dwar l-emenda għall-Anness XVIII (“Indikazzjonijiet Ġeografiċi Protetti”) tal-Ftehim li jistabbilixxi l-Assoċjazzjoni bejn l-Unjoni Ewropea u l-Istati Membri tagħha, minn naħa waħda, u l-Amerika Ċentrali, min-naħa l-oħra
IL-KUNSILL TA’ ASSOĊJAZZJONI UE-AMERIKA ĊENTRALI,
Wara li kkunsidra l-Ftehim li jistabbilixxi Assoċjazzjoni bejn l-Unjoni Ewropea u l-Istati Membri tagħha, minn naħa waħda, u l-Amerika Ċentrali, min-naħa l-oħra (“il-Ftehim”), u b’mod partikolari l-Artikolu 247 tiegħu,
Billi:
|
(1) |
Il-Ftehim li jistabbilixxi l-Assoċjazzjoni bejn l-Unjoni Ewropea u l-Istati Membri tagħha, minn naħa waħda, u l-Amerika Ċentrali, min-naħa l-oħra (minn hawn ’il quddiem imsejjaħ “il-Ftehim”) (1) ġie applikat b’mod proviżorju mill-1 ta’ Awwissu 2013 fir-rigward tal-Honduras, tan-Nikaragwa u tal-Panama, mill-1 ta’ Ottubru 2013 fir-rigward tal-Costa Rica u ta’ El Salvador, u mill-1 ta’ Diċembru 2013 fir-rigward tal-Gwatemala. |
|
(2) |
L-Artikolu 247 tal-Ftehim jipprevedi l-possibbiltà li jiżdiedu indikazzjonijiet ġeografiċi ġodda fl-Anness XVIII (“Indikazzjonijiet Ġeografiċi Protetti”) tal-Ftehim wara li tkun tlestiet il-proċedura ta’ oġġezzjoni u wara li l-indikazzjonijiet ġeografiċi jkunu ġew eżaminati b’suċċess mill-awtoritajiet nazzjonali jew reġjonali kompetenti f’konformità mar-regoli u l-proċeduri rilevanti għall-Kunsill ta’ Assoċjazzjoni. |
|
(3) |
Fit-2 ta’ Lulju 2020, il-Costa Rica ppreżentat lill-Unjoni t-talba tagħha biex tiżdied indikazzjoni ġeografika ġdida fl-Anness XVIII (Indikazzjonijiet Ġeografiċi Protetti) tal-Ftehim skont l-Artikolu 247 tal-Ftehim. L-Unjoni lestiet il-proċedura ta’ oġġezzjoni, ippubblikata fis-6 ta’ Diċembru 2021 (2), u eżaminat l-indikazzjoni ġeografika l-ġdida tal-Costa Rica. |
|
(4) |
Fis-7 ta’ Ġunju 2021, El Salvador ressaq quddiem l-Unjoni t-talba tiegħu biex jiżdiedu għaxar indikazzjonijiet ġeografiċi ġodda fl-Anness XVIII (Indikazzjonijiet Ġeografiċi Protetti) tal-Ftehim skont l-Artikolu 247 tal-Ftehim. L-Unjoni lestiet il-proċedura ta’ oġġezzjoni, ippubblikata fit-28 ta’ Diċembru 2021 (3), u eżaminat l-indikazzjonijiet ġeografiċi ġodda ta’ El Salvador. |
|
(5) |
Fit-13 ta’ Ġunju 2022, skont l-Artikolu 274(2) tal-Ftehim, is-Sottokumitat dwar il-Proprjetà Intellettwali, f’laqgħa konġunta bejn l-UE u l-partijiet tal-Amerika Ċentrali, ikkonkluda, wara valutazzjoni minn qabel tal-informazzjoni pprovduta fir-rigward tal-indikazzjonijiet ġeografiċi l-ġodda tal-Costa Rica u ta’ El Salvador, li jirrakkomanda lill-Kunsill ta’ Assoċjazzjoni biex jimmodifika l-Anness XVIII tal-Ftehim skont dan. |
|
(6) |
Il-Kunsill ta’ Assoċjazzjoni għandu s-setgħa li jieħu d-deċiżjoni bi ftehim reċiproku f’konformità mal-Artikolu 11 tar-Regoli ta’ Proċedura tiegħu. |
|
(7) |
Għalhekk jenħtieġ li l-Anness XVIII tal-Ftehim jiġi modifikat kif deskritt f’din id-deċiżjoni, |
IDDEĊIEDA KIF ĠEJ:
Artikolu 1
L-entrati fl-Anness ta’ din id-Deċiżjoni jiżdiedu mat-tabella fil-Parti B tal-Anness XVIII “Indikazzjonijiet Ġeografiċi Protetti” tal-Ftehim, kif stabbilit bid-Deċiżjoni Nru 5/2014 tal-Kunsill ta’ Assoċjazzjoni UE-Amerika Ċentrali (4).
Artikolu 2
Din id-Deċiżjoni, magħmula f’żewġ kopji, għandha tiġi ffirmata mir-rappreżentanti tal-Kunsill ta’ Assoċjazzjoni UE-Amerika Ċentrali li huma awtorizzati jaġixxu f’isem il-Partijiet għall-finijiet tal-modifika tal-Ftehim.
Din id-Deċiżjoni għandha ssir effettiva mill-jum li fiha tkun saret l-aħħar waħda minn dawn il-firem.
Din id-Deċiżjoni għandha tidħol fis-seħħ fid-data tal-adozzjoni tagħha.
Magħmul fi
Għall-Kumitat tal-Kummerċ
Kap tad-delegazzjoni tal-UE
Kap tad-delegazzjoni tal-Amerika Ċentrali
(1) ĠU L 346, 15.12.2012, p. 3.
(2) AVVIŻ TA’ INFORMAZZJONI – KONSULTAZZJONI PUBBLIKA Indikazzjonijiet Ġeografiċi mill-Costa Rica li għandhom jiġu protetti bħala Indikazzjonijiet Ġeografiċi fl-Unjoni Ewropea (ĠU C 489, 6.12.2021, p. 10).
(3) AVVIŻ TA’ INFORMAZZJONI – KONSULTAZZJONI PUBBLIKA Indikazzjonijiet Ġeografiċi minn El Salvador li għandhom jiġu protetti bħala Indikazzjonijiet Ġeografiċi fl-Unjoni Ewropea (ĠU C 522, 28.12.2021, p. 20) u Rettifika għall-AVVIŻ TA’ INFORMAZZJONI – KONSULTAZZJONI PUBBLIKA – Indikazzjonijiet Ġeografiċi minn El Salvador li għandhom jiġu protetti bħala Indikazzjonijiet Ġeografiċi fl-Unjoni Ewropea (ĠU C 30, 20.1.2022, p. 2).
(4) Id-Deċiżjoni Nru 5/2014 tal-Kunsill ta’ Assoċjazzjoni UE-Amerika Ċentrali tas-7 ta’ Novembru 2014 dwar l-Indikazzjonijiet Ġeografiċi li għandhom jiġu inklużi fl-Anness XVIII tal-Ftehim (ĠU L 196, 24.7.2015, p. 59).
ANNESS
|
Pajjiż |
Isem |
Prodotti |
|
Il-Costa Rica |
Tarrazú |
Kafè |
|
El Salvador |
Café Alotepec |
Kafè |
|
El Salvador |
Café Bálsamo Quezaltepec |
Kafè |
|
El Salvador |
Café Cacahuatique |
Kafè |
|
El Salvador |
Café Chichontepec |
Kafè |
|
El Salvador |
Café Tecapa Chinameca |
Kafè |
|
El Salvador |
Camarón Bahía de Jiquilisco |
Gambli |
|
El Salvador |
Chaparro |
Xorb spirituż distillat b’bażi ta’ qmuħ |
|
El Salvador |
Jocote Barón Rojo San Lorenzo |
Frott frisk |
|
El Salvador |
Loroco San Lorenzo |
Ħaxix frisk |
|
El Salvador |
Pupusa de Arroz de Olocuilta |
Ħobż ċatt tond u oħxon (tortilla) magħmul mir-ross |