(1)

Ghlac Comhthionól Ginearálta na Náisiún Aontaithe Coinbhinsiún na Náisiún Aontaithe maidir leis na hÉifeachtaí Idirnáisiúnta a bhaineann le Díol Breithiúnach Long (‘Coinbhinsiún Bhéising maidir le Díol Breithiúnach Long’ nó an ‘Coinbhinsiún’) i Nua-Eabhrac an 7 Nollaig 2022.

(2)

I gcomhréir le Cinneadh (AE) 2024/414 ón gComhairle (2), síníodh an Coinbhinsiún an 14 Márta 2024 thar ceann an Aontais maidir le hábhair a thagann faoina inniúlacht eisiach, faoi réir a thabhairt i gcrích ar dháta níos déanaí.

(3)

Is é an Coinbhinsiún an chéad ionstraim idirnáisiúnta lena mbunaítear córas comhchuibhithe chun éifeacht idirnáisiúnta a thabhairt do dhíol breithiúnach, agus an dlí náisiúnta lena rialaítear an nós imeachta um dhíol breithiúnach agus na himthosca ina dtugtar teideal glan le díol breithiúnach á gcaomhnú an tráth céanna. Neartaítear leis an creat dlíthiúil idirnáisiúnta atá ann cheana maidir le loingeas agus loingseoireacht agus cuireann sé le forbairt na gcaidreamh eacnamaíoch idirnáisiúnta comhchuí ar bhealach úsáideach. Trí dheimhneacht dhlíthiúil a áirithiú maidir leis an teideal a fhaigheann an ceannaitheoir ar an long agus í á loingsiú go hidirnáisiúnta, tá an Coinbhinsiún ceaptha chun uasmhéadú a dhéanamh ar an bpraghas is féidir leis an long a mhealladh sa mhargadh agus ar na fáltais atá ar fáil lena dáileadh ar na creidiúnaithe, agus chun trádáil idirnáisiúnta a chur chun cinn. Is inmhianaithe, dá bhrí sin, an Coinbhinsiún a chur i bhfeidhm a luaithe is féidir.

(4)

Rannchuideoidh tabhairt i gcrích an Choinbhinsiúin thar ceann an Aontais leis an deimhneacht dhlíthiúil agus an intuarthacht a áirithiú ar an leibhéal idirnáisiúnta agus ar an leibhéal Eorpach trí chóras aonfhoirmeach a chruthú maidir leis na héifeachtaí idirnáisiúnta a bhaineann le díol breithiúnach long, ar príomhchuspóirí de chuid an Aontais iad atá le baint amach ina chuid gníomhaíochtaí i gcomhréir le hAirteagal 3(5) den Chonradh ar an Aontas Eorpach.

(5)

Forbraíonn an tAontas comhar breithiúnach in ábhair shibhialta a bhfuil impleachtaí trasteorann acu bunaithe ar phrionsabal an aitheantais fhrithpháirtigh do bhreithiúnais agus do chinntí i gcásanna seachbhreithiúnacha. Sa chomhthéacs sin, ghlac reachtóir an Aontais, i measc Rialacháin eile, Rialacháin (AE) Uimh. 1215/2012 (3) agus (AE) 2020/1784 (4) ó Pharlaimint na hEorpa agus ón gComhairle. Dá bhrí sin, tá inniúlacht eisiach ag an Aontas ar na hábhair a chumhdaítear leis na Rialacháin sin, agus ní thagann na hábhair eile a chumhdaítear leis an Choinbhinsiún faoin inniúlacht sin.

(6)

Níor cheart don Aontas a bheith ina pháirtí sa Choinbhinsiún ach amháin a mhéid a bhaineann leis na hábhair a thagann faoi inniúlacht eisiach an Aontais, is é sin a mhéid a d’fhéadfadh forálacha ábhartha an Choinbhinsiúin difear a dhéanamh do chomhrialacha nó a raon feidhme a athrú. Faoi láthair, tá inniúlacht eisiach ag an Aontas maidir le forálacha áirithe den Choinbhinsiún a bhaineann le hábhair a bhaineann le comhar breithiúnach in ábhair shibhialta mar a shonraítear sa Dearbhú atá i gceangal a bhaineann le hinniúlacht an Aontais, agus coimeádann na Ballstáit a n-inniúlacht a mhéid nach ndéanann an Coinbhinsiún difear do chomhrialacha ná nach n-athraíonn sé a raon feidhme. Tá aontachas an Aontais don Choinbhinsiún a mhéid a bhaineann le hábhair a thagann faoina inniúlacht eisiach gan dochar do shainchumais na mBallstát a mhéid a bhaineann le daingniú an Choinbhinsiúin, maidir le hábhair a thagann faoina n-inniúlachtaí náisiúnta.

(7)

Foráiltear sa Choinbhinsiún go bhfuil an Eagraíocht Réigiúnach um Chomhtháthú Eacnamaíochta le dearbhú a dhéanamh ina sonrófar na hábhair a rialaítear leis an gCoinbhinsiún sin ar ina leith a d’aistrigh na Ballstáit inniúlacht chuig an eagraíocht sin. Foráiltear sa Choinbhinsiún freisin go ndéantar an dearbhú sin tráth an tsínithe, an daingnithe, an ghlactha, an fhormheasa nó an aontachais. Tráth an tsínithe, rinne an tAontas an dearbhú lena léirítear a inniúlacht in ábhair atá faoi rialú an.

(8)

I gcomhréir le hAirteagail 1 agus 2 de Phrótacal Uimh. 21 maidir le seasamh na Ríochta Aontaithe agus na hÉireann i dtaca leis an limistéar saoirse, slándála agus ceartais, atá i gceangal leis an gConradh ar an Aontas Eorpach agus leis an gConradh ar Fheidhmiú an Aontais Eorpaigh, agus gan dochar d’Airteagal 4 den Phrótacal sin, níl Éire rannpháirteach i nglacadh an Chinnidh seo agus níl sí faoi cheangal aige ná faoi réir a chur i bhfeidhm.

(9)

I gcomhréir le hAirteagail 1 agus 2 de Phrótacal Uimh. 22 maidir le seasamh na Danmhairge, atá i gceangal leis an gConradh ar an Aontas Eorpach agus leis an gConradh ar Fheidhmiú an Aontais Eorpaigh, níl an Danmhairg rannpháirteach i nglacadh an Chinnidh seo agus níl sí faoi cheangal aige ná faoi réir a chur i bhfeidhm.

(10)

Ba cheart an Coinbhinsiún agus an Dearbhú atá i gceangal leis seo a bhaineann le hinniúlacht an Aontais a fhormheas,