(1)

L-Unjoni aderiet mal-Konvenzjoni li tirrigwarda t-Trasport Internazzjonali bil-Ferrovija tad-9 ta’ Mejju 1980 kif emendata mill-Protokoll ta’ Vilnius tat-3 ta’ Ġunju 1999 (“il-COTIF”) f’konformità mad-Deċiżjoni tal-Kunsill 2013/103/UE (1).

(2)

L-Istati Membri kollha, bl-eċċezzjoni ta’ Ċipru u Malta, huma Partijiet għall-COTIF.

(3)

Skont l-ittra f) tal-Artikolu 13 § 1 tal-COTIF, ġie stabbilit il-Kumitat tal-Esperti Tekniċi (“CTE”) tal-Organizzazzjoni Intergovernattiva għat-Trasport Internazzjonali bil-Ferrovija (OTIF).

(4)

Skont l-ittra b) tal-Artikolu 20 § 1 tal-COTIF, u f’konformità mal-Artikolu 6 tal-Appendiċi F (APTU), is-CTE għandu l-kompetenza biex jadotta jew jemenda, fost l-oħrajn, il-preskrizzjonijiet tekniċi uniformi (UTP) li jikkonċernaw il-vaguni tal-merkanzija, l-immarkar tal-vetturi u l-istorbju tal-materjal fuq ir-roti. F’konformità mal-Artikolu 13 §§ 1, 4 u 5 tal-Appendiċi G (ATMF), is-CTE għandu l-kompetenza wkoll biex jieħu deċiżjonijiet dwar it-tfassil jew il-modifika, il-fużjoni jew l-irtirar tar-reġistri nazzjonali tal-vetturi ferrovjarji (NVR). Fl-aħħar nett, f’konformità mal-Artikolu 15 § 2 tal- Appendiċi G (AMTF), is-CTE għandu l-kompetenza biex jadotta u biex jemenda regoli għaċ-ċertifikazzjoni u l-awditjar tal-entitajiet responsabbli mill-manutenzjoni (ECM).

(5)

Is-CTE inkluda fl-aġenda tat-13-il sessjoni tiegħu, li se ssir fis-16 u s-17 ta’ Ġunju 2020, proposti għal deċiżjonijiet li jemendaw l-UTP li jikkonċernaw il-vaguni tal-merkanzija, l-immarkar tal-vettura u l-istorbju tal-materjal fuq ir-roti, għal rieżami bis-sħiħ tar-regoli għaċ-ċertifikazzjoni u l-awditjar tal- ECM u għal rieżami bis-sħiħ tal-ispeċifikazzjonijiet dwar ir-reġistri nazzjonali tal- NVR.

(6)

Jixraq li tiġi stabbilita l-pożizzjoni li għandha tittieħed f’isem l-Unjoni fis-CTE, billi l-emendi proposti ser ikunu vinkolanti għall-Unjoni.

(7)

L-objettiv ta’ dawk l-emendi proposti huwa li l-UTP li jikkonċernaw il-vaguni tal-merkanzija, l-immarkar tal-vettura u l-istorbju tal-materjal fuq ir-roti kif ukoll ir-regoli għaċ-ċertifikazzjoni u l-awditjar tal-ECM, jiġu allinjati, rispettivament, mar-Regolament ta’ Implimentazzjoni tal-Kummissjoni (UE) 2019/774 (2), (UE) 2019/776 (3), (UE) 2019/773 (4), u (UE) 2019/779 (5). L-ispeċifikazzjonijiet li jikkonċernaw l-NVR ġew aġġornati fid-dawl tad-Deċiżjoni ta’ Implimentazzjoni tal-Kummissjoni (UE) 2018/1614 (6).

(8)

L-emendi proposti huma konformi mal-liġi u mal-objettivi strateġiċi tal-Unjoni, billi jikkontribwixxu għall-allinjament tal-leġislazzjoni tal-OTIF mad-dispożizzjonijiet ekwivalenti tal-liġi tal-Unjoni, u għalhekk jenħtieġ li dawk l-emendi proposti jkunu appoġġati mill-Unjoni,